دعوتِ اسلامی (پاکستان) اور یوگنڈا کے جامعات کے درمیان ایک نیا تعلیمی معاہدہ طے پا گیا ہے جو علم کے تبادلے، ادارہ جاتی تعاون اور تعلیمی مواقع کی بنیاد رکھے گا۔

دارالمدینہ انٹرنیشنل یونیورسٹی (دعوتِ اسلامی) اسلام آباد کے چانسلر اور رکنِ شوریٰ مولانا حاجی محمد جنید عطاری مدنی نے ایک وفد کے ہمراہ 23 اکتوبر 2026ء کو اسلامک یونیورسٹی اِن یوگنڈا (IUIU) کے ریکٹر (Rector) سے ملاقات کی جس میں باہمی علمی دلچسپی کے شعبوں اور دونوں جامعات کے درمیان تعاون کے مواقع پر تفصیلی گفتگو کی گئی۔

ملاقات کے دوران علمی تعاون کا باضابطہ فریم ورک قائم کرنے کے لیے مفاہمتی یادداشت (MoU) پر دستخط کیے گئے جس کے تحت علم کے تبادلے اور تعلیمی ترقی سے متعلق مستقبل کے اقدامات میں سہولت فراہم کی جائے گی۔

اس موقع پر وفد کی جانب سے دنیا بھر میں دعوتِ اسلامی کے تعلیمی، اسلامی اور فلاحی اقدامات کا جائزہ پیش کیا گیا نیز اسلامی تعلیم و سماجی فلاح و بہبود میں اس کی خدمات کو نمایاں کیا گیا۔

اللہ تعالیٰ ایک ہے، اُس کا کوئی شریک نہیں، وہی عبادت کے لائق ہے۔ تمام انبیاءِ کرام عَلَیْہِمُ السَّلَام اسی توحید کا درس لے کر دنیا میں تشریف لائے۔ لیکن اس توحید کو مکمل انداز میں دنیا تک پہنچانے والی سب سے عظیم اور آخری ہستی ہمارے پیارے آقا، مکی مدنی مصطفیٰ ﷺ کی ہے۔

و حَدَّثَنِي عَبْدُ اللَّهِ بْنُ أَبِي الْأَسْوَدِ حَدَّثَنَا الْفَضْلُ بْنُ الْعَلَائِ حَدَّثَنَا إِسْمَاعِيلُ بْنُ أُمَيَّةَ عَنْ يَحْيَی بْنِ مُحَمَّدِ بْنِ عَبْدِ اللَّهِ بْنِ صَيْفِيٍّ أَنَّهُ سَمِعَ أَبَا مَعْبَدٍ مَوْلَی ابْنِ عَبَّاسٍ يَقُولُ سَمِعْتُ ابْنَ عَبَّاسٍ يَقُولُ لَمَّا بَعَثَ النَّبِيُّ صَلَّی اللَّهُ عَلَيْهِ وَسَلَّمَ مُعَاذَ بْنَ جَبَلٍ إِلَی نَحْوِ أَهْلِ الْيَمَنِ قَالَ لَهُ إِنَّکَ تَقْدَمُ عَلَی قَوْمٍ مِنْ أَهْلِ الْکِتَابِ فَلْيَکُنْ أَوَّلَ مَا تَدْعُوهُمْ إِلَی أَنْ يُوَحِّدُوا اللَّهَ تَعَالَی فَإِذَا عَرَفُوا ذَلِکَ فَأَخْبِرْهُمْ أَنَّ اللَّهَ قَدْ فَرَضَ عَلَيْهِمْ خَمْسَ صَلَوَاتٍ فِي يَوْمِهِمْ وَلَيْلَتِهِمْ فَإِذَا صَلَّوْا فَأَخْبِرْهُمْ أَنَّ اللَّهَ افْتَرَضَ عَلَيْهِمْ زَکَاةً فِي أَمْوَالِهِمْ تُؤْخَذُ مِنْ غَنِيِّهِمْ فَتُرَدُّ عَلَی فَقِيرِهِمْ فَإِذَا أَقَرُّوا بِذَلِکَ فَخُذْ مِنْهُمْ وَتَوَقَّ کَرَائِمَ أَمْوَالِ النَّاسِ

ترجمہ :عبداللہ بن ابی اسود، فضل بن علاء، اسماعیل بن امیہ، یحییٰ بن محمد بن عبداللہ بن صیفی، ابومعبد (ابن عباس (رضی اللہ عنہ ) کے آزاد کردہ غلام) حضرت ابن عباس (رضی اللہ عنہ ) سے روایت کرتے ہیں ان کو کہتے ہوئے سنا کہ جب نبی صلی اللہ تعالیٰ علیہ وسلم نے معاذ (رضی اللہ عنہ) کو یمن کی طرف روانہ کیا تو آپ صلی اللہ تعالیٰ علیہ وسلم نے فرمایا کہ تم اس قوم کے پاس جاتے ہو، جو اہل کتاب ہے اس لیے سب سے پہلی چیز جس کی طرف تم بلاؤ وہ یہ ہے کہ وہ لوگ اللہ کو ایک سمجھیں، جب وہ لوگ اس کو مان لیں تو ان کو بتانا کہ اللہ نے ان پر دن رات میں پانچ (وقت کی) نمازیں فرض کی ہیں، جب وہ لوگ نماز پڑھیں تو انہیں بتانا کہ اللہ تعالیٰ نے ان پر ان کے مالوں میں زکوۃ فرض کی ہے جو ان کے مالداروں سے لی جائے گی اور ان کے فقراء کو واپس کی جائے گی، جب وہ لوگ اس کو اقرار کرلیں تو ان سے زکوۃ لے اور لوگوں کے عمدہ مالوں سے پرہیز کر۔(صحیح بخاری : جلد سوم : کتاب التوحید۔۔حدیث 2271)

حَدَّثَنَا مُحَمَّدُ بْنُ بَشَّارٍ حَدَّثَنَا غُنْدَرٌ حَدَّثَنَا شُعْبَةُ عَنْ أَبِي حَصِينٍ وَالْأَشْعَثِ بْنِ سُلَيْمٍ سَمِعَا الْأَسْوَدَ بْنَ هِلَالٍ عَنْ مُعَاذِ بْنِ جَبَلٍ قَالَ قَالَ النَّبِيُّ صَلَّی اللَّهُ عَلَيْهِ وَسَلَّمَ يَا مُعَاذُ أَتَدْرِي مَا حَقُّ اللَّهِ عَلَی الْعِبَادِ قَالَ اللَّهُ وَرَسُولُهُ أَعْلَمُ قَالَ أَنْ يَعْبُدُوهُ وَلَا يُشْرِکُوا بِهِ شَيْئًا أَتَدْرِي مَا حَقُّهُمْ عَلَيْهِ قَالَ اللَّهُ وَرَسُولُهُ أَعْلَمُ قَالَ أَنْ لَا يُعَذِّبَهُمْ

محمد بن بشار، غندر، شعبہ، ابوحصین و اشعث بن سلیم، اسود بن بلال، حضرت معاذ بن جبل (رضی اللہ عنہ) سے روایت کرتے ہیں کہ نبی (صلی اللہ علیہ وآلہ وسلم) نے فرمایا کہ اے معاذ کیا تم جانتے ہو کہ اللہ کا حق بندے پر کیا ہے، معاذ نے کہا اللہ اور اس کے رسول زیادہ جاننے والے ہیں آپ نے فرمایا وہ یہ کہ اللہ کی عبادت کرے اور اس کا کسی چیز کو شریک نہ بنائے، (پھر فرمایا) تم جانتے ہو کہ بندوں کا حق اللہ پر کیا ہے، انہوں نے کہا کہ اللہ اور اس کے رسول زیادہ جانتے ہیں، آپ نے فرمایا کہ وہ یہ کہ اللہ ان کو عذاب نہ دے۔(صحیح بخاری : جلد سوم : کتاب التوحید حدیث 2272)

حَدَّثَنَا قَبِيصَةُ حَدَّثَنَا سُفْيَانُ عَنْ ابْنِ جُرَيْجٍ عَنْ سُلَيْمَانَ عَنْ طَاوُسٍ عَنْ ابْنِ عَبَّاسٍ رَضِيَ اللَّهُ عَنْهُمَا قَالَ کَانَ النَّبِيُّ صَلَّی اللَّهُ عَلَيْهِ وَسَلَّمَ يَدْعُو مِنْ اللَّيْلِ اللَّهُمَّ لَکَ الْحَمْدُ أَنْتَ رَبُّ السَّمَوَاتِ وَالْأَرْضِ لَکَ الْحَمْدُ أَنْتَ قَيِّمُ السَّمَوَاتِ وَالْأَرْضِ وَمَنْ فِيهِنَّ لَکَ الْحَمْدُ أَنْتَ نُورُ السَّمَوَاتِ وَالْأَرْضِ قَوْلُکَ الْحَقُّ وَوَعْدُکَ الْحَقُّ وَلِقَاؤُکَ حَقٌّ وَالْجَنَّةُ حَقٌّ وَالنَّارُ حَقٌّ وَالسَّاعَةُ حَقٌّ اللَّهُمَّ لَکَ أَسْلَمْتُ وَبِکَ آمَنْتُ وَعَلَيْکَ تَوَکَّلْتُ وَإِلَيْکَ أَنَبْتُ وَبِکَ خَاصَمْتُ وَإِلَيْکَ حَاکَمْتُ فَاغْفِرْ لِي مَا قَدَّمْتُ وَمَا أَخَّرْتُ وَأَسْرَرْتُ وَأَعْلَنْتُ أَنْتَ إِلَهِي لَا إِلَهَ لِي غَيْرُکَ حَدَّثَنَا ثَابِتُ بْنُ مُحَمَّدٍ حَدَّثَنَا سُفْيَانُ بِهَذَا وَقَالَ أَنْتَ الْحَقُّ وَقَوْلُکَ الْحَقُّ

قبیصہ، سفیان، ابن جریج، سلیمان، طاؤس، حضرت ابن عباس (رضی اللہ عنہ ) سے روایت کرتے ہیں انہوں نے بیان کیا کہ نبی (صلی اللہ علیہ وآلہ وسلم) رات کو یہ دعا مانگا کرتے تھے، کہ یا اللہ ! تیرے ہی لیے حمد ہے، تو ہی آسمانوں اور زمین کا رب ہے، تیرے ہی لیے حمد ہے تو ہی آسمانوں اور زمین کا مالک ہے اور جو کچھ اس میں ہے، تیرے ہی لیے حمد ہے تو آسمان اور زمین کی روشنی ہے، تیرا قول حق ہے اور تیرا وعدہ بھی حق ہے اور تیری ملاقات بھی حق ہے اور جنت بھی حق ہے اور دوزخ حق ہے اور قیامت حق ہے، یا اللہ میں تیرا مطیع ہوں اور تجھ پر ایمان لایا اور تجھ پر ہی بھروسہ کیا اور تیری ہی طرف رجوع کیا، تیری ہی مدد سے میں نے دشمنوں کا مقابلہ کیا، تجھی سے میں جھگڑے کا انصاف چاہتا ہوں، تو میرے اگلے اور پچھلے، ظاہر، پوشیدہ، گناہوں کو بخش دے، تو میرا معبود ہے تیرے سوا کوئی معبود نہیں۔ ہم سے ثابت بن محمد نے اور ان سے سفیان نے اسی طرح بیان کیا اور اتنا زیادہ بیان کیا کہ (انت الحق و قولک الحق) ۔(صحیح بخاری : جلد سوم : کتاب التوحید حدیث 2284)

اللہ تبارک و تعالی نے اس دنیا میں کم و بیش ایک لاکھ 24 ہزار انبیاء اور رسول بھیجے ان کا صرف ایک ہی کام تھا وہ اللہ تبارک و تعالی کی وحدانیت اور عبادت کا حکم دینا اور سب سے آخر میں ہمارے پیارے نبی  ﷺ تشریف لائے آئیے آقا علیہ الصلوۃ والسلام کی احادیث مبارکہ سے توحید باری تعالی کے بارے میں علم حاصل کرتے ہیں ۔

(1) عَنْ اَبِي هُرَ يْرَةَرَضِيَ اللَّهُ عَنْهُ اَنَّ رَسُوْلَ اللَّهِ صَلَّى اللهُ عَلَيْهِ وَسَلَّم قَالَ:الْاِ يمَانُ بِضْعٌ وَّسَبْعُوْنَ اَوْ بِضْعٌ وَسِتُّوْنَ شُعْبَةً فَاَفْضَلُهَا قوْلُ لَا اِلٰهَ اِلَّا اللَّهُ وَاَدْنَاهَا اِمَاطَةُ الْاَذَى عَنِ الطَّرِيْقِ وَالْحَيَاءُشُعْبَةٌ مِنَ الْاِيمَانِ.

حضرت سَیِّدُنا ابو ہریرہ رَضِیَ اللہ تَعَالٰی عَنْہُ سے مروی ہےکہ نبی کریم صَلَّی اللہ تَعَالٰی عَلَیْہِ وَاٰلِہٖ وَسَلَّم نے فرمایا: ایمان کےساٹھ یا ستر سے زائد شعبے ہیں۔ ا ن میں سے افضل لَااِلٰہَ اِلَّا اللّٰہ کہنا اورسب سے ادنیٰ درجہ راستے سے کسی تکلیف دہ چیز کو ہٹا دینا ہے اورحَیا(بھی)ایمان کا ایک شعبہ ہے۔(فیضان ریاض الصالحین جلد5 ، حدیث نمبر:683)

(2) عَنْ عُبَادَۃَ بْنِ الصَّامِتِ قَالَ سَمِعْتُ رَسُوْلَ اللّٰہ صَلَّی اللّٰہ تَعَالٰی عَلَیْہِ وَاٰلِہٖ وَسَلَّمَ یَقُوْلُ مَنْ شَھِدَ أَنْ لَا إِلٰہَ إِلَّا اللّٰہُ وَأَنَّ مُحَمَّداً رَّسُوْلُ اللّٰہِ حَرَّمَ اللّٰہُ عَلَیْہِ النّارَ

حضرت عبادہ بن صامت رَضِیَ اللہ تَعَالٰی عَنْہُ نے کہا کہ میں نے رسولِ کریم ﷺ کو فرماتے ہوئے سنا کہ جو شخص اس بات کی گواہی دے کہ اللہ تعالیٰ کے سوا کوئی معبود نہیں اورمحمد ( صَلَّی اللہ تَعَالٰی عَلَیْہِ وَاٰلہٖ وَسَلَّم) اللہ تعالیٰ کے رسول ہیں۔ تو اللہ تعالیٰ اس پر دوزخ کی آگ حرام فرما دیتا ہے ۔( مشکاۃ المصابیح کتاب الإیمان،الفصل الأول،الحدیث:7،ج1)

(3) عَنِ الْبَرَاءِ بْنِ عَازِبٍ عَنِ النَّبِيِّ صَلَّی اللہُ عَلَیْہِ وَاٰلِہٖ وَسَلَّم قَالَ : اَلْمُسْلِمُ اِذَا سُئِلَ فِى الْقَبْرِ يَشْهَدُ اَنْ لَّا اِلَهَ اِلاَّ اللَّهُ وَاَنَّ مُحَمَّدًا رَّسُولُ اللَّهِ فَذٰلِكَ قَوْلُهُ تَعَالٰى : یُثَبِّتُ اللّٰهُ الَّذِیْنَ اٰمَنُوْا بِالْقَوْلِ الثَّابِتِ فِی الْحَیٰوةِ الدُّنْیَا وَ فِی الْاٰخِرَةِۚ.

حضرتِ سَیِّدُنا براء بن عازِب رَضِیَ اللہُ تَعَالٰی عَنْہُ فرماتے ہیں کہ رسولِ اکرم ، شاہِ بنی آدم صَلَّی اللہُ تَعَالٰی عَلَیْہِ وَاٰلِہٖ وَسَلَّم نے ارشادفرمایا : مسلمان سے جب قبر میں پوچھا جاتا ہے تو وہ اس بات کی گواہی دیتا ہے کہ اللہ عَزَّ وَجَلَّ کے سوا کوئی عبادت کے لائق نہیں اور حضرت محمدصَلَّی اللہُ تَعَالٰی عَلَیْہِ وَاٰلِہٖ وَسَلَّم اللہ عَزَّوَجَلَّ کے رسول ہیں ۔اللہ عَزَّوَجَلَّ کے اس فرمانِ عالیشان سے یہی مراد ہے یُثَبِّتُ اللّٰهُ الَّذِیْنَ اٰمَنُوْا بِالْقَوْلِ الثَّابِتِ فِی الْحَیٰوةِ الدُّنْیَا وَ فِی الْاٰخِرَةِۚ- ( پ13 ،ابراھیم :27 )ترجمۂ کنزالایمان : اللہ ثابت رکھتا ہے کہ ایمان والوں کو حق بات پر دنیا کی زندگی میں اور آخرت میں ۔( فیضان ریاض الصالحین جلد:4 حدیث نمبر:427)

اللہ تعالیٰ سے دعا ہے کہ وہ ہمیں ان احادیث کو پڑھنے اور سمجھنے اور آگے پہنچانے کی توفیق عطا فرمائے آمین ثم آمین

جب کوئی بندہ اس پورے جہان کے اندر غور و فکر کرتا ہے اسے معلوم ہوتا ہے کہ اسے کوئی چلانے والا اور اسے کوئی پیدا کرنے والا موجود ہے اسی دعوت کو عام کرنے کے لیے اللہ تعالی کی ذات بابرکات نے اپنے انبیاء کرام کو دنیا کے اندر بھیجا اور انہوں نے اللہ تعالی کی وحدانیت کی طرف لوگوں کو بلایا جیسا کہ اللہ کے رسول ﷺنے فرمایا:

(1)حضرت معاذ بن جبل رضی اللہ عنہ سے مروی ہے وہ فرماتے ہیں کہ نبی کریم ﷺ نے فرمایا اے معاذ کیا تو جانتا ہے اللہ کا حق بندوں پر کیا ہے حضرت معاذ نے فرمایا اللہ ورسولہ اعلم پھر اللہ کے رسول ﷺ نے فرمایا کہ بندے اللہ کی عبادت کریں اسکے ساتھ کسی کو شریک نہ ٹھہرائیں پھر رسول اللہ ﷺ نے فرمایا کیا تو جانتا ہے بندوں کا حق اللہ پر کیا ہے تو حضرت معاذ نے دوبارہ فرمایا اللہ ورسولہ اعلم رسول اللہ ﷺ نے فرمایا بندوں کا حق اللہ پر یہ ہے کہ ان کو عذاب نہ دے۔(شرح صحیح البخاری،جلد 25 ، حدیث نمبر 7373)

لفظ توحید کی تحقیق :اصل میں توحید جو ہے وہ مصدر ہے وحد یوحد توحیدا سے آتا ہے جس کا معنی یہ بنتا ہے ۔

عرب کے اندر مقولہ ہے : وحدت اللہ یعنی میں نےرب تعالیٰ کی ذات کا اعتقاد رکھا اس اعتبار سے کہ وہ اپنی ذات و صفات کے اعتبار سے واحد ہے اور یکتا ہے اسکا کوئی شبیہ و نذیر نہیں ہے ۔(کتاب التوحید عمدۃالقاری شرح صحیح البخاری )

(2) حضرت ابوہریرہ رَضِیَ اللہ تَعَالٰی عَنْہُ سے روایت ہے، نبی کریم ﷺ نے ارشادفرمایا: ’’(قیامت کے دن) اللہ تعالیٰ اپنے دائیں دست ِ قدرت سے زمین کو اپنے ہی قبضے میں لے گااور آسمان کو لپیٹ لے گا، پھرفرمائے گا:حقیقی بادشاہ میں ہوں ،آج زمین کے بادشاہ کہاں ہیں ؟( صحیح بخاری، کتاب الرقاق، باب یقبض ، 2/ 251، الحدیث: 2519)

اس حدیث کریم سے معلوم ہوا کہ واجب الوجود صرف رب تبارک و تعالی کی ذات ہے باقی جتنی بھی ہیں وہ سب کچھ وقتی طور پر ہیں اور حاکمیت اور حکم اسی کی ذات کا ہی رہنا ہے جو ذات اپنے وجود کے اندر تنہا ہے نہ اس کا کوئی شریک، نہ ثانی ،نہ کوئی شبیہ نہ اس کا نظیر ،ساری دنیا اپنے وجود کے اندر اس ایک کی محتاج ہے اور اپنے باقی رہنے کے اندر اسی ذات کے محتاج ہیں۔

جیسا کہ اللہ تعالیٰ نے قرآن مجید میں ارشاد فرمایا :لَا یَضِلُّ رَبِّیْ وَ لَا یَنْسَىترجمہ کنزالایمان:میرا رب نہ بہکے نہ بھولے۔

(7)حضرت عبداللہ بن عمر رَضِیَ اللہ تَعَالٰی عَنْہُمَا سے روایت ہے، رسولُ اللہ ﷺ نے ارشاد فرمایا’’ اللہ تعالیٰ قیامت کے دن آسمانوں کو لپیٹ دے گا۔ پھر انہیں اپنے (شایانِ شان معنوں میں ) دائیں ہاتھ میں لے گا، پھر ارشادفرمائے گا: میں بادشاہ ہوں ، کہاں ہیں جابر لوگ؟ کہاں ہیں تکبُّر والے لوگ؟ پھر زمینوں کو اپنے (شایانِ شان معنوں میں ) بائیں ہاتھ میں لپیٹ لے گا، پھرارشاد فرمائے گا: میں بادشاہ ہوں ،کہاں ہیں جابر لوگ؟ کہاں ہیں تکبُّر و غرور کرنے والے لوگ۔( مسلم، کتاب صفۃ القیامۃ والجنّۃ والنّار، ص1299، الحدیث) 

توحید اسلام کا بنیادی رکن اور تمام انبیاء کی دعوت کا مرکزی نکتہ ہے۔ نبی کریم ﷺ نے اپنی پوری زندگی اللہ عزوجل کی وحدانیت کو ثابت کرنے میں گزاری اور شرک(شریک ٹھہرانے) کی ہر صورت میں نفی کی۔ جس طرح قرآن پاک میں اللہ پاک کی وحدانیت کا ذکر ہیں اسی طرح حدیث پاک میں بھی اللہ پاک کی وحدانیت، ربوبیت، الوہیت اور اسماء و صفات کا واضح بیان ملتا ہے۔

حضرت معاذ بن جبل فرماتے ہیں کہ میں نبی کریم ﷺ کے ساتھ ایک سواری پر تھا۔ آپ ﷺ نے فرمایا:اے معاذ! کیا تم جانتے ہو اللہ کا بندوں پر کیا حق ہے؟میں نے عرض کیا: اللہ اور اس کے رسول بہتر جانتے ہیں۔آپ ﷺ نے فرمایا: اللہ کا بندوں پر حق یہ ہے کہ وہ اسی کی عبادت کریں اور اس کے ساتھ کسی کو شریک نہ ٹھہرائیں۔(صحیح بخاری، حدیث: 2856)

حضرت عبداللہ بن مسعودسے روایت ہے:میں نے عرض کیا: یا رسول اللہ! سب سے بڑا گناہ کون سا ہے؟آپ ﷺ نے فرمایا: یہ کہ تم اللہ کے ساتھ کسی کو شریک ٹھہراؤ حالانکہ اسی نے تمہیں پیدا کیا ہے۔(صحیح بخاری، حدیث: 4477)

حضرت ابو ہریرہ سے روایت ہے کہ رسول اللہﷺ نے فرمایا:جس نے لا إلہ إلا اللّٰه کہا اور اللہ کے سوا جن کی عبادت کی جاتی ہے ان کا انکار کیا، اس کا مال اور خون محفوظ ہوگیا، اور اس کا حساب اللہ کے ذمہ ہے۔(صحیح مسلم، حدیث: 23)

حضرت ابو ذر روایت کرتے ہیں کہ حضرت محمد ﷺ نے فرمایا:میرے پاس جبرائیل آئے اور انہوں نے خوشخبری دی کہ آپ کی امت میں سے جو اس حال میں مرے کہ اللّہ کے ساتھ کسی کو شریک نہ کرتا ہو، وہ جنت میں داخل ہوگا۔(صحیح بخاری، حدیث: 1237)

حضرت ابن عمرسے روایت ہے کہ رسول اللہ ﷺ نے فرمایا:اسلام کی بنیاد پانچ چیزوں پر رکھی گئی ہے: اس بات کی گواہی دینا کہ اللہ کے سوا کوئی معبود نہیں اور محمد ﷺ اللہ کے رسول ہیں۔(صحیح بخاری، حدیث: 8)

اللہ پاک میری اس کوشش کو اپنی پاک بارگاہ میں قبول و منظور فرمائے۔

اسلام کی پوری عمارت جس بنیاد پر قائم ہے، اسے "توحید" کہتے ہیں۔ توحید کا آسان مطلب یہ ہے کہ سچے دل سے یہ مانا جائے کہ اللہ تعالیٰ اپنی ذات، صفات، اور اختیارات میں اکیلا ہے۔ کائنات کی ہر چیز کو پیدا کرنے والا اور چلانے والا صرف وہی ہے۔ تاریخ میں جتنے بھی انبیاء علیھم السلام آئے، ان سب کی پہلی اور بنیادی دعوت یہی تھی۔ ہمارے پیارے نبی حضور جان عالم ﷺ نے بھی اپنی پوری زندگی توحید کی اہمیت واضح کرنے اور شرک (اللہ کے ساتھ کسی کو شریک کرنے) سے بچنے کی تاکید میں گزاری۔​نبی کریم ﷺ نے جب مکہ میں اپنی دعوت کا آغاز کیا، تو سب سے پہلے لوگوں کے سامنے یہی پیغام رکھا:لا الٰہ الا اللہ کہو، کامیاب ہوجاؤ گے۔( مسند احمد جلد 25 صفحة 404 مؤسسۃ الرسالۃ)

​یہ ایک جملہ دراصل کامیابی کی وہ چابی ہے جو انسان کو دنیا اور آخرت دونوں میں سرخرو کرتی ہے۔

​توحید بندے پر اللہ کا پہلا حق:​اللہ نے ہمیں پیدا کیا، زندگی دی اور بے شمار نعمتوں سے نوازا۔ اس لیے ہمارا بھی یہ فرض ہے کہ ہم اس کا حق پہچانیں۔ ایک مرتبہ رسول اللہ ﷺ نے حضرت معاذ بن جبل رضی اللہ عنہ سے فرمایا:

بندوں پر اللہ کا حق یہ ہے کہ وہ صرف اسی کی عبادت کریں اور اس کے ساتھ کسی کو شریک نہ ٹھہرائیں۔(صحيح البخاری جلد 4 صفحہ 78 حديث 2873 دار التأصيل - القاهرة)

​اس کے برعکس، شرک کو کائنات کا سب سے بڑا گناہ اور ظلم قرار دیا گیا ہے۔ جب حضرت عبداللہ بن مسعود رضی اللہ عنہ نے آپ ﷺ سے پوچھا کہ سب سے بڑا گناہ کون سا ہے؟ تو آپ ﷺ نے فرمایا:یہ کہ تم اللہ کا شریک ٹھہراؤ حالانکہ اسی نے تمہیں پیدا کیا ہے۔(صحيح البخاري جلد 6 صفحة 10 حديث 4456 دار التأصيل - القاهرة)

​توحید کا اصل مقصد: ​اکثر لوگ سمجھتے ہیں کہ توحید صرف زبان سے "لا الٰہ الا اللہ" کہہ دینے کا نام ہے۔ لیکن اسلام ہمیں سکھاتا ہے کہ توحید کا اصل اثر انسان کے عمل اور اس کے اخلاق پر ظاہر ہونا چاہیے۔ رسول اللہ ﷺ کا ارشاد ہے:اللہ تمہاری صورتوں اور مالوں کو نہیں دیکھتا بلکہ تمہارے دلوں اور اعمال کو دیکھتا ہے۔ (صحيح مسلم جلد 8 صفحہ 11 حديث 2564 دار الطباعة العامرة - تركيا)

​اس حدیث سے واضح ہوتا ہے کہ اگر ہمارے دل میں اخلاص نہیں ہے اور ہم نیک کام صرف لوگوں کو دکھانے (ریاکاری) کے لیے کر رہے ہیں، تو یہ بھی توحید کے خلاف ہے۔

​جب ایک مسلمان کا عقیدۂ توحید سچا اور پکا ہو جاتا ہے، تو اس کی سوچ اور زندگی میں درج ذیل تبدیلیاں آتی ہیں:

​خوف اور مایوسی کا خاتمہ: جب انسان کا یہ یقین ہو جاتا ہے کہ نفع اور نقصان، عزت اور ذلت، اور زندگی اور موت صرف اللہ کے ہاتھ میں ہے، تو وہ بندوں کے سامنے جھکنا چھوڑ دیتا ہے۔ وہ کسی ظالم سے نہیں ڈرتا اور نہ ہی حالات سے مایوس ہوتا ہے۔

​عاجزی اور انکساری: توحید انسان کے اندر سے تکبر اور غرور کو ختم کرتی ہے۔ انسان یہ جان لیتا ہے کہ اس کے پاس جو کچھ بھی ہے وہ سب اللہ کی امانت ہے، اس لیے وہ دوسروں کو حقیر نہیں سمجھتا۔

​گناہوں سے دوری: یہ یقین کہ اللہ ہر وقت مجھے دیکھ رہا ہے اور میری نیتوں سے واقف ہے، انسان کو تنہائی میں بھی گناہ کرنے سے روکتا ہے۔

​نبی کریم ﷺ کا فرمان ہے کہ جو شخص سچے دل سے توحید کی گواہی دے، اللہ اس پر جہنم کی آگ حرام کر دیتا ہے۔ (صحیح مسلم جلد 1 صفحة 42 حديث 29 دار الطباعة العامرة - تركيا)

​آج ہمیں اپنے ایمان کا جائزہ لینے کی ضرورت ہے۔ ہمیں نہ صرف زبان سے توحید کا اقرار کرنا چاہیے، بلکہ اپنے ہر عمل کو دکھاوے سے پاک کر کے صرف اللہ کی رضا کے لیے ہی عمل کرنا چاہیے۔ اللہ تعالیٰ ہمیں خالص عقیدۂ توحید پر جینے اور اسی پر مرنے کی توفیق عطا فرمائے۔ آمین یا رب العالمین۔

اسلام کی بنیاد جس عقیدے پر قائم ہے وہ توحید ہے۔ تمام انبیاءِ کرام علیہم السلام کی دعوت کا مرکزی نقطہ یہی تھا کہ انسان صرف ایک اللہ کی عبادت کرے، اسی سے مدد مانگے اور اسی کو کائنات کا حقیقی مالک سمجھے۔ نبی کریم ﷺ نے اپنے اقوال، اعمال اور پوری زندگی کے ذریعے توحید کا ایسا جامع بیان فرمایا جس نے انسانیت کو شرک، گمراہی اور باطل معبودوں سے نجات دی۔

قرآنِ کریم میں توحید:(1) قُلْ هُوَ اللّٰهُ اَحَدٌۚ(۱)اَللّٰهُ الصَّمَدُۚ(۲)

ترجمۂ کنزالایمان: تم فرماؤ وہ اللہ ہے وہ ایک ہے ۔اللہ بے نیاز ہے۔(سورۃ الاخلاص: 1-2)

(2) وَ اِلٰهُكُمْ اِلٰهٌ وَّاحِدٌۚ-لَاۤ اِلٰهَ اِلَّا هُوَ الرَّحْمٰنُ الرَّحِیْمُ۠(۱۶۳)

ترجمۂ کنزالایمان:اور تمہارا معبود ایک معبود ہے اس کے سوا کوئی معبود نہیں مگر وہی بڑی رحمت والا مہربان۔ (سورۃ البقرہ: 163)

(3) وَ مَا خَلَقْتُ الْجِنَّ وَ الْاِنْسَ اِلَّا لِیَعْبُدُوْنِ(۵۶)

ترجمہ کنزالایمان:اور میں نے جِنّ اور آدمی اتنے ہی(اسی لئے)بنائے کہ میری بندگی کریں۔(سورۃ الذاریات: 56)

احادیثِ مبارکہ میں توحید:

(1) کلمۂ توحید کی فضیلت :حضرت ابو ہریرہ سے روایت ہے کہ رسول اللہ ﷺ نے فرمایا: ایمان کی ستر سے زائد شاخیں ہیں اور ان میں سب سے افضل ‘لا الٰہ الا اللہ’ کہنا ہے۔(صحیح مسلم، کتاب الایمان، باب بیان عدد شعب الایمان)

توحید کی اقسام:

(1) توحیدِ ربوبیت:اللہ تعالیٰ کو کائنات کا خالق، مالک اور رازق ماننا۔

(2)توحیدِ الوہیت:عبادت صرف اللہ تعالیٰ کے لیے مخصوص کرنا۔

(3) توحیدِ اسماء و صفات:اللہ تعالیٰ کی صفات کو ویسا ہی ماننا جیسا قرآن و حدیث میں آیا ہے۔

توحید کے اثرات:دل میں اللہ تعالیٰ کی محبت پیدا ہوتی ہے۔خوف اور مایوسی ختم ہوجاتی ہے۔انسان شرک اور بدعات سے بچتا ہے۔معاشرے میں اخوت اور مساوات قائم ہوتی ہے۔انسان کا تعلق براہِ راست اللہ تعالیٰ سے مضبوط ہوجاتا ہے۔

توحید اسلام کی روح اور ایمان کی بنیاد ہے۔ نبی کریم ﷺ نے پوری زندگی انسانیت کو اسی عظیم پیغام کی دعوت دی۔ آج بھی کامیابی، نجات اور دل کے سکون کا راستہ اسی عقیدۂ توحید میں پوشیدہ ہے۔ مسلمان کی ذمہ داری ہے کہ وہ اپنے عقیدے کو خالص رکھے، اللہ تعالیٰ پر کامل بھروسہ کرے اور اپنی عبادات صرف اسی کے لیے انجام دے۔

اللہ تعالیٰ ہمیں صحیح معنوں میں توحید کو سمجھنے اور اس پر عمل کرنے کی توفیق عطا فرمائے۔ آمین۔

توحید اسلام کا بنیادی عقیدہ ہے۔ اللہ تعالیٰ کی ذات، صفات اور عبادت میں اس کو ایک ماننا ہی توحید کہلاتا ہے۔ حضور نبی کریم ﷺ نے اپنی پوری زندگی میں توحید کی تعلیم دی اور لوگوں کو شرک سے بچنے کا حکم فرمایا۔ نبی پاک ﷺ نے سب سے پہلے لوگوں کو یہی پیغام دیا کہ صرف ایک اللہ کی عبادت کرو اور اسی سے مدد مانگو۔

اللہ تعالیٰ قرآنِ پاک میں ارشاد فرماتا ہے:

قُلْ هُوَ اللّٰهُ اَحَدٌۚ(۱)اَللّٰهُ الصَّمَدُۚ(۲)لَمْ یَلِدْ وَ لَمْ یُوْلَدْۙ(۳)وَ لَمْ یَكُنْ لَّهٗ كُفُوًا اَحَدٌ۠(۴)

ترجمۂ کنزالایمان: تم فرماؤ وہ اللہ ہے وہ ایک ہے ۔اللہ بے نیاز ہے۔نہ اس کی کوئی اولاد اور نہ وہ کسی سے پیدا ہوا۔ اور نہ اس کے جوڑ کا کوئی۔ (پارہ 30، سورۃ الاخلاص، آیت 1-4)

اس آیتِ مبارکہ میں اللہ تعالیٰ کی وحدانیت کو واضح طور پر بیان کیا گیا ہے۔ حضور اکرم ﷺ نے بھی اپنی امت کو یہی تعلیم دی کہ اللہ ایک ہے اور اسی کی عبادت کرنی چاہیے۔

حضرت عبد اللہ بن عباس رضی اللہ عنہما سے روایت ہے کہ جب نبی کریم ﷺ نے حضرت معاذ بن جبل رضی اللہ عنہ کو یمن بھیجا تو فرمایا:تم اہلِ کتاب کے پاس جا رہے ہو، سب سے پہلے انہیں اس بات کی دعوت دینا کہ وہ گواہی دیں کہ اللہ کے سوا کوئی معبود نہیں اور محمد ﷺ اللہ کے رسول ہیں۔(صحیح بخاری، کتاب الزکاۃ، باب وجوب الزکاۃ، حدیث: 1395)

اس حدیثِ مبارکہ سے معلوم ہوتا ہے کہ دین کی سب سے پہلی دعوت توحید ہے۔ نبی کریم ﷺ نے ہر موقع پر اللہ کی وحدانیت بیان فرمائی۔قرآنِ پاک میں ایک اور مقام پر اللہ تعالیٰ ارشاد فرماتا ہے:

وَ اِلٰهُكُمْ اِلٰهٌ وَّاحِدٌۚ-لَاۤ اِلٰهَ اِلَّا هُوَ الرَّحْمٰنُ الرَّحِیْمُ۠(۱۶۳)

ترجمۂ کنزالایمان:اور تمہارا معبود ایک معبود ہے اس کے سوا کوئی معبود نہیں مگر وہی بڑی رحمت والا مہربان۔ (پارہ 2، سورۃ البقرۃ، آیت 163)

نبی کریم ﷺ نے تیرہ سال مکہ مکرمہ میں لوگوں کو توحید کی دعوت دی۔ کفار مکہ بتوں کی پوجا کرتے تھے مگر آپ ﷺ نے صبر اور حکمت کے ساتھ انہیں سمجھایا کہ عبادت صرف اللہ تعالیٰ کا حق ہے۔ حضرت ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا:جو اس حال میں مرے کہ وہ جانتا ہو کہ اللہ کے سوا کوئی معبود نہیں تو وہ جنت میں داخل ہوگا۔(صحیح مسلم، کتاب الایمان، باب من مات لا یشرک باللہ شیئًا دخل الجنۃ، حدیث: 26)

اس حدیث سے معلوم ہوا کہ توحید انسان کی نجات کا سبب ہے۔ اگر انسان سچے دل سے اللہ کو ایک مانے اور اسی کی عبادت کرے تو وہ کامیاب ہوگا۔آخر میں یہ بات واضح ہوتی ہے کہ توحید ہی اسلام کی بنیاد ہے۔ حضور نبی کریم ﷺ نے اپنی تعلیمات اور عمل کے ذریعے امت کو اللہ کی وحدانیت کا درس دیا۔ ہمیں بھی چاہیے کہ ہم خالص اللہ تعالیٰ کی عبادت کریں اور ہر قسم کے شرک سے بچیں۔

(1) توحید اسلام کا عظیم ترین رکن:توحید (لا الٰہ الا اللہ) اسلام کا سب سے بڑا اور پہلا ستون ہے۔ کوئی شخص اس وقت تک دائرہ اسلام میں داخل نہیں ہو سکتا جب تک وہ توحید کی گواہی نہ دے ۔رسول اللہ صلی اللہ علیہ وآلہ وسلم نے فرمایا:"بُنِيَ الْإِسْلَامُ عَلَى خَمْسٍ: شَهَادَةِ أَنْ لَا إِلَهَ إِلَّا اللَّهُ وَأَنَّ مُحَمَّدًا رَسُولُ اللَّهِ"ترجمہ: "اسلام کی بنیاد پانچ چیزوں پر رکھی گئی ہے: اس بات کی گواہی دینا کہ اللہ کے سوا کوئی معبود نہیں اور بے شک محمد ﷺ اللہ کے رسول ہیں۔"(صحیح بخاری، کتاب الایمان، حدیث: 8؛ صحیح مسلم، کتاب الایمان، حدیث: 16)

(2)توحید اولین فریضہ ہے:نبی کریم صلی اللہ علیہ وآلہ وسلم نے سب سے پہلے توحید کی دعوت دینے کا حکم دیا۔ حضرت معاذ بن جبل رضی اللہ عنہ کو یمن بھیجتے ہوئے فرمایا:"إِنَّكَ تَأْتِي قَوْمًا مِنْ أَهْلِ الْكِتَابِ، فَلْيَكُنْ أَوَّلَ مَا تَدْعُوهُمْ إِلَيْهِ شَهَادَةُ أَنْ لَا إِلَهَ إِلَّا اللَّهُ"ترجمہ: "تم اہل کتاب کی ایک قوم کے پاس جا رہے ہو، پس سب سے پہلے جس چیز کی طرف تم انہیں بلاؤ وہ "لا الہ الا اللہ" کی گواہی ہے" ۔(صحیح بخاری، کتاب التوحید، حدیث: 7372)

(3)توحید کی فضیلت:رسول اللہ صلی اللہ علیہ وآلہ وسلم نے توحید کی فضیلت میں فرمایا:"مَنْ شَهِدَ أَنْ لَا إِلَهَ إِلَّا اللَّهُ وَحْدَهُ لَا شَرِيكَ لَهُ، وَأَنَّ مُحَمَّدًا عَبْدُهُ وَرَسُولُهُ ... أَدْخَلَهُ اللَّهُ الْجَنَّةَ عَلَى مَا كَانَ مِنَ الْعَمَلِ"ترجمہ: "جو شخص گواہی دے کہ اللہ کے سوا کوئی معبود نہیں، وہ یکتا ہے اس کا کوئی شریک نہیں اور محمد ﷺ اس کے بندے اور رسول ہیں ... تو اللہ اسے جنت میں داخل فرمائے گا چاہے اس کے اعمال کیسے ہی ہوں" ۔(صحیح بخاری، کتاب احادیث الانبیاء، حدیث: 3435؛ صحیح مسلم، کتاب الایمان، حدیث: 28)

ایک اور حدیث میں فرمایا:"فَإِنَّ اللَّهَ قَدْ حَرَّمَ عَلَى النَّارِ مَنْ قَالَ لَا إِلَهَ إِلَّا اللَّهُ يَبْتَغِي بِذَلِكَ وَجْهَ اللَّهِ"ترجمہ: "بیشک اللہ نے اس شخص پر جہنم کو حرام کر دیا جو اللہ کی رضا کے لیے"لا الہ الا اللہ" کہے"۔(صحیح بخاری، کتاب الصلوۃ، حدیث: 425؛ صحیح مسلم، کتاب المساجد، حدیث: 263)

(4) شرک سے بچنے کی تلقین:رسول اللہ صلی اللہ علیہ وآلہ وسلم نے شرک کے بارے میں سخت وعید سنائی اور فرمایا:

"أَلَا أُخْبِرُكُمْ بِأَكْبَرِ الْكَبَائِرِ؟ قَالُوا: بَلَى يَا رَسُولَ اللَّهِ، قَالَ: الْإِشْرَاكُ بِاللَّهِ"ترجمہ: "کیا میں تمہیں سب سے بڑے گناہوں کے بارے میں بتاؤں؟" صحابہ نے عرض کیا: کیوں نہیں، یا رسول اللہ! فرمایا: "اللہ کے ساتھ شرک کرنا"۔(صحیح بخاری، کتاب الایمان، حدیث: 13)

حضرت عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وآلہ وسلم نے فرمایا:"مَنْ مَاتَ وَهُوَ يَدْعُو مِنْ دُونِ اللَّهِ نِدًّا دَخَلَ النَّارَ"ترجمہ: "جو شخص اس حال میں مرا کہ وہ اللہ کے سوا کسی اور کو پکارتا تھا تو وہ جہنم میں داخل ہو گا"۔(صحیح بخاری، کتاب التوحید، حدیث: 7401)

(5) تفسیر صراط الجنان کی روشنی میں:تفسیر صراط الجنان (سورۃ الانعام، آیت 82) وہ جو ایمان لائے اور اپنے ایمان میں شرک کو نہ ملایا تو انہی کے لیے امان ہے اوریہی ہدایت یافتہ ہیں ۔کے تحت ہے: حضرت عبداللہ بن مسعود رَضِیَ اللہُ تَعَالٰی عَنْہُ فرماتے ہیں ’’ جب یہ آیتِ کریمہ نازل ہوئی توصحابۂ کرام رَضِیَ اللہُ تَعَالٰی عَنْہُم بہت پریشان ہوئے اور انہوں نے رسولُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کی خدمت میں عرض کی ’’ہم میں سے ایسا کون ہے جو اپنی جان پر ظلم نہیں کرتا۔ رسولِ کریم صَلَّی اللہُ تَعَالٰی عَلَیْہِ وَاٰلِہٖ وَسَلَّمَ نے ارشاد فرمایا :’’اس سے یہ مراد نہیں بلکہ اس سے مراد شرک ہے۔ (بخاری، کتاب احادیث الانبیاء، باب قول اللہ تعالی: ولقد آتینا لقمان الحکمۃ الخ، ۲ / ۴۵۱، الحدیث: ۳۴۲۹)

توحید وہ حقیقت ہے جس پر انسان کی نجات کا دارومدار ہے۔ یہی وہ پیغام ہے جسے نبی کریم  ﷺ نے مکہ کے اندھیرے میں کھڑے ہو کر سب سے پہلے بلند کیا۔ نہ شاعری، نہ فصاحت کا دباؤ، بس ایک صاف اعلان: "لا الہ الا اللہ"۔ نبی کریم ﷺ کا اسلوب یہ تھا کہ توحید کو دلوں کی گہرائی تک پہنچایا جائے، نہ کہ صرف ذہن کی حد تک محدود رکھا جائے۔ اسی لیے ان کا بیان سادہ، براہ راست اور عمل سے بھرپور تھا۔اللہ تعالیٰ فرماتا ہے:

وَ مَاۤ اَرْسَلْنَا مِنْ قَبْلِكَ مِنْ رَّسُوْلٍ اِلَّا نُوْحِیْۤ اِلَیْهِ اَنَّهٗ لَاۤ اِلٰهَ اِلَّاۤ اَنَا فَاعْبُدُوْنِ(۲۵)

ترجمۂ کنزالایمان: اور ہم نے تم سے پہلے کوئی رسول نہ بھیجا مگر یہ کہ ہم اس کی طرف وحی فرماتے کہ میرے سوا کوئی معبود نہیں تو مجھی کو پوجو۔ (سورۃ الانبیاء، آیت 25)

نبی کریم ﷺ کے بیان میں توحید کے چند پہلو اس طرح ابھرتے ہیں۔

پہلا پہلو یہ ہے کہ توحید انسان کو خوف و طمع سے آزاد کرتی ہے۔ جب بندہ یہ سمجھ لے کہ رزق، عزت اور موت صرف اللہ کے ہاتھ میں ہے تو وہ مخلوق کے آگے جھکنا چھوڑ دیتا ہے۔ نبی کریم ﷺ نے فرمایا:

وَاعْلَمْ أَنَّ الْأُمَّةَ لَوِ اجْتَمَعَتْ عَلَى أَنْ يَنْفَعُوكَ بِشَيْءٍ لَمْ يَنْفَعُوكَ إِلَّا بِشَيْءٍ قَدْ كَتَبَهُ اللَّهُ لَكَترجمہ: "جان لو کہ اگر تمام لوگ جمع ہو کر تمہیں کچھ فائدہ پہنچانا چاہیں تو وہ تمہیں اتنا ہی فائدہ پہنچا سکتے ہیں جتنا اللہ نے تمہارے لیے لکھ دیا ہے"۔ (سنن الترمذی، کتاب صفۃ القیامۃ، حدیث نمبر: 2516)

یہی یقین انسان کو بے خوف اور بے نیاز بنا دیتا ہے۔

دوسرا پہلو یہ ہے کہ توحید عبادت کو ریاکاری سے پاک کرتی ہے۔ نبی کریم ﷺ نے فرمایا:

إِنَّ اللَّهَ لَا يَقْبَلُ مِنَ الْعَمَلِ إِلَّا مَا كَانَ لَهُ خَالِصًا وَابْتُغِيَ بِهِ وَجْهُترجمہ: "اللہ اس عمل کو قبول نہیں کرتا مگر جو خالص اسی کے لیے ہو اور اس سے اللہ کی رضا مقصود ہو"۔ (سنن النسائی، کتاب الجہاد، حدیث نمبر: 3140)

اس لیے توحید کا تقاضا ہے کہ نماز، روزہ، صدقہ ہر چیز میں نیت صرف اللہ کی ہو۔

تیسرا پہلو یہ ہے کہ توحید اللہ کی صفات میں کسی کو شریک نہ کرنے کا نام ہے۔ نبی کریم ﷺ نے لوگوں کو اس بات سے روکا کہ وہ آپ ﷺ کی تعریف میں غلو کریں۔ فرمایا: لَا تُطْرُونِي كَمَا أَطْرَتِ النَّصَارَى ابْنَ مَرْيَمَ، فَإِنَّمَا أَنَا عَبْدُهُ، فَقُولُوا عَبْدُ اللَّهِ وَرَسُولُهُترجمہ: "مجھے اس طرح مت بڑھاؤ جیسے نصاریٰ نے مریم کے بیٹے کو بڑھایا، میں تو صرف اس کا بندہ ہوں، سو کہو اللہ کا بندہ اور اس کا رسول"۔ (صحیح البخاری، کتاب احادیث الانبیاء، حدیث نمبر: 3445)

اس سے معلوم ہوتا ہے کہ توحید صرف اللہ کو معبود ماننا ہی نہیں، بلکہ نبی کو بھی ان کے مقام پر رکھنا ہے۔

چوتھا پہلو یہ ہے کہ توحید امید اور رحمت کا دروازہ کھولتی ہے۔ نبی کریم ﷺ نے فرمایا: مَنْ مَاتَ وَهُوَ يَعْلَمُ أَنَّهُ لَا إِلَهَ إِلَّا اللَّهُ دَخَلَ الْجَنَّةَ ترجمہ: "جو اس حال میں مرے کہ وہ جانتا ہو کہ اللہ کے سوا کوئی معبود نہیں، وہ جنت میں داخل ہوگا"۔ (صحیح مسلم، کتاب الایمان، حدیث نمبر: 26)

یہ حدیث مایوس دلوں کے لیے روشنی ہے کہ گناہوں کے باوجود توبہ اور توحید نجات کا راستہ کھول دیتی ہے۔

نبی کریم ﷺ نے توحید کو صرف وعظ میں نہیں رکھا، بلکہ عملی نمونہ بن کر دکھایا۔ راتوں کو قیام، دن میں دعوت، مشکلات میں صبر، اور ہر حال میں اللہ کی طرف رجوع۔ یہی اسلوب تھا جس نے قلوب کو بدل دیا۔

توحید کا نبوی بیان ہمیں یہ سکھاتا ہے کہ زندگی کا ہر لمحہ اللہ سے جڑنے کا موقع ہے۔ جب بندہ یہ جان لے کہ کائنات کا مالک ایک ہے تو اس کی فکر، اس کی محبت اور اس کی امید سب اسی ایک ذات کے گرد گھومنے لگتی ہیں۔ یہی وہ توحید ہے جو دل کو زندہ اور آخرت کو کامیاب کر دیتی ہے۔

عقیدہ توحید تمام عقائد پر مقدم ہے توحید میں زبان سے اقرار اور دل سے تصدیق کیے بغیر انسان مسلمان ہی نہیں ہوسکتا آج کے پر فتن دور میں عقیدہ توحید کو سمجھنا بے حد ضروری ہے اہل محبت کی اداؤں کو شرک کی طرف منسوب کیا جارہا ہے بات بات پر شرک کے فتویٰ لگائے جارہے ہیں ۔

(1)توحید کے معنیٰ ومفہوم: توحید کے معنی ہیں اللہ تعالیٰ کو واحد و یکتا ماننا ، اللہ پاک واحد ہے اس کا کوئی شریک نہیں وہ اپنی ذات وصفات میں یکتا ہے کوئی اس کی مثل نہیں ۔ ( اعتقاد الاحباب فی الجمیل والمصطفی والال والاصحاب المعروف دس عقیدے،صفحہ-339 -340 )

(2) احادیث النبویۃ فی بیان التوحید : اسلام کی عمارت پانچ چیزوں پر قائم ہے شھادت توحید و رسالت مصطفی ( ﷺ )،نماز قائم کرنا زکوٰۃ ادا کرنا،خانہ کعبہ کا حج کرنا ،رمضان شریف کے روزے رکھنا ،ان پانچ چیزوں کو ارکان اسلام کہا جاتاہے یہ تمام ستون کی حیثیت رکھتی ہیں ۔

حضرت عمر بن خطاب رضی اللہ عنہ روایت فرماتے ہیں ایک دن ہم رسول اللہ ( ﷺ ) کی بارگاہ رسالت میں حاضر تھے کہ ایک صاحب ہمارے سامنے ظاہر ہوئے جن کے کپڑے بہت سفید اور بال خوب کالے تھے ان پر آثار سفر ظاہر نہ تھے اور ہم سے کوئی انھیں پہچانتا بھی نہ تھا یہاں تک کہ حضور ( صلیٰ اللہ علیہ وسلم) کے پاس بیٹھے اور اپنے گھٹنے نبی (علیہ السلام)کے گھنٹوں سے مس کردئیے اور اپنے ہاتھ اپنے زانو پر رکھے اور عرض کیا اے محمد (صلیٰ اللہ علیہ وسلم)۔مجھے اسلام کے متعلق بتائیے فرمایا اسلام یہ ہے کہ تم گواہی دو کہ اللہ پاک کے علاؤہ کوئی معبود نہیں اور محمد ( ﷺ )اللہ پاک کےرسول ہیں،اور نماز قائم کرو ، زکوٰۃ دو ، رمضان کے روزے رکھو، کعبہ کا حج کرو اگر وہاں پہنچ سکو ۔( مراٰۃ المناجیح شرح مشکوٰۃ المصابیح ،کتاب الایمان،باب اول ،24-25 صفحہ )

حضرت ابو ھریرہ( رضی اللہ عنہ) فرماتے ہیں کہ ایک دن دیہاتی حضور ( ﷺ )کی خدمت میں حاضر ہوئے عرض کرنے لگے کہ مجھے ایسے کام کی ہدایت فرمائیے کہ میں وہ کروں تو جنتی ہو جائوں فرمایا اللہ کی عبادت کرو اس کا شریک نہ ٹھہراؤ، نماز قائم کرو ، فرض زکوٰۃ دو، رمضان کے روزے رکھو، وہ بولے قسم اس کی جس کے قبضہ میں میری جان ہے کبھی اس سے گھٹائوں بڑھاؤں گا نہیں پھر جب وہ چلے گئے تو حضور ( ﷺ )نے فرمایا کہ جو جنتی مرد کو دیکھنا چاہے وہ اسے دیکھ لے۔( مراٰۃ المناجیح شرح مشکوٰۃ المصابیح ،کتاب الایمان،باب 1، صفحہ 34-35 )

دونوں احادیث مبارکہ میں ارکان اسلام کا تذکرہ ہے ارکان اسلام میں سب سے پہلے تذکرہ شھادت عقیدہ توحید اور رسالت مصطفی ( ﷺ ) کا ہے اس سے مراد تمام اسلامی عقائد ہیں اس کے بعد حدیث مبارکہ میں اعمال کا تذکرہ ہےاس سے معلوم ہوا اسلامی عقائد اعمال پر مقدم ہیں اگر اسلامی عقائد درست نہ ہوں اعمال قابل قبول نہیں ،پہلے اسلامی عقائد کی اصلاح میں بھرپور توجہ فرمائیں ۔

(3) سورۃ اخلاص کے ذریعے اعلانِ توحید :اللہ تعالیٰ نے سورۃ الاخلاص میں اپنے محبوب ( ﷺ ) سے اپنی توحید کا اعلان کروایا ہے :قُلْ هُوَ اللّٰهُ اَحَدٌۚ(۱)

ترجمۂ کنزُالعِرفان: تم فرماؤ: وہ اللہ ایک ہے۔ (سورۃ الاخلاص ،پارہ 30، آیت نمبر 1)

(4) توحید کی فضیلت :جہنم سے آزادی کی بشارت: حضرت انس ( رضی اللہ عنہ سے روایت ہے نبی کریم ( ﷺ ) کجاوہ پر تھے معاذ بن جبل (رضی اللہ عنہ) حضور ( ﷺ )کے ردیف (سواری پر نبی کریم ( ﷺ )کے پیچھے بیٹھے والے تھے حضور ( ﷺ )نے فرمایا اے معاذ (رضی اللہ عنہ)عرض کیا حاضر ہوں یارسول اللہ خدمت میں ،فرمایا اے معاذ عرض کیا یارسول اللہ حاضر ہوں خدمت میں،فرمایا اے معاذ عرض کیا حاضرہوں خدمت میں تین بار فرمایا ایسا کوئی نہیں جو گواہی دے کہ اللہ کے سوا معبود نہیں اور بیشک محمد (صلی اللہ وسلم)اللہ کے رسول ہیں سچے دل سے مگر اللہ اسےآگ پر حرام فرمائےگا۔(مشکوٰۃ المصابیح فی شرح مراۃ المصابیح، کتاب الایمان، فصل الاول، صفحہ 46)

حضرت عبادہ بن صامت (رضی اللہ عنہ) روایت کرتے ہیں رسول اللہ ( ﷺ )نے فرمایا جو گواہی دے اللہ کے سوا کوئی معبود نہیں اور محمد ( ﷺ )اللہ کے بندے اور رسول ہیں عیسیٰ (علیہ السلام) اللہ کے بندے اور رسول اور اس کی بندی کے بیٹے(حضرت مریم رحمۃاللہ علیھا) اللہ کا کلمہ ہیں جو مریم میں ڈالا(اللہ پاک کا کلمہ" کن ")اور اللہ کی طرف سے روح ہیں اور جنت و دوزخ حق ہے اللہ اس جنت میں داخل کرتا عمل کے مطابق ۔(مراٰۃ المناجیح شرح مشکوٰۃ المصابیح ،کتاب الایمان ،الفصل الاول ،صفحہ 48-49 )

شرک سے بچنے کی تلقین : شرک کا مفہوم: کسی کو اللہ پاک کے ساتھ ذات وصفات اور عبادت میں شامل کرنا مثلاً: جس طرح رب ذوالجلال عبادت کے لائق ہے اسی طرح وہ بندہ بھی عبادت کے لائق ہے، جس طرح اللہ پاک کی صفات ذاتی ہیں اسی طرح اس بندے کی صفات بھی ذاتی ہیں جس طرح اللہ پاک خدا ہے اسی طرح وہ بت بھی الوہیت میں شامل ہے(وہ بھی خدا ہے )۔

اِنَّ اللّٰهَ لَا یَغْفِرُ اَنْ یُّشْرَكَ بِهٖ وَ یَغْفِرُ مَا دُوْنَ ذٰلِكَ لِمَنْ یَّشَآءُۚ-وَ مَنْ یُّشْرِكْ بِاللّٰهِ فَقَدِ افْتَرٰۤى اِثْمًا عَظِیْمًا(۴۸)ترجمۂ کنزُالعِرفان: بیشک اللہ اس بات کو نہیں بخشتا کہ اس کے ساتھ شرک کیا جائے اوراس سے نیچے جو کچھ ہے جسے چاہتا ہے معاف فرما دیتا ہے اور جس نے اللہ کا شریک ٹھہرایا توبیشک اس نے بہت بڑے گناہ کا بہتان باندھا۔ (سورۃ النساء ،پارہ 5،آیت نمبر 48)

سورۃ لقمان میں فرمایا: وَ اِذْ قَالَ لُقْمٰنُ لِابْنِهٖ وَ هُوَ یَعِظُهٗ یٰبُنَیَّ لَا تُشْرِكْ بِاللّٰهِﳳ-اِنَّ الشِّرْكَ لَظُلْمٌ عَظِیْمٌ(۱۳)

ترجمۂ کنزُالعِرفان: اور یاد کرو جب لقمان نے اپنے بیٹے کو نصیحت کرتے ہوئے فرمایا: اے میرے بیٹے! کسی کو الله کا شریک نہ کرنا، بیشک شرک یقینا بڑا ظلم ہے۔ (سورۃ القمان ،پارہ21،آیت نمبر13)

ان دو آیات میں شرک کی مذمّت فرمائی گئی ،شرک کو اللہ پاک معاف نہیں فرماتا مطلب یہ ہے جو کافر مرجائے اس کی بخشش نہیں ہوگی ،حضرت لقمان حکیم (رحمۃاللہ علیہ)نے اپنے بیٹے کو شرک سے بچنے کی وصیت فرمائی اللہ پاک کی بارگاہ میں دعا ہے وہ ہمیں ہمیشہ عقیدہ توحید کا قائل رکھے اور شرک سے محفوظ فرمائے۔ آمین بجاہ النبی الامین ﷺ ،صلو علی الحبیب ،صلی اللہ علی محمد ﷺ ۔

دعا ہے رب ذوالجلال ان کاوشوں کو اپنی بلند بارگاہ میں قبول فرمائے اور میری میرے والدین واساتذہ وپیرو مرشد کی کامل مغفرت وبخشش فرمائے اور خاتمہ ایمان پر فرمائے۔

اسلام ایک برحق دین ہے اس کا ہر حکم حکمت پر مبنی، اس کا ہر قانون فائدہ مند،اس میں کوئی خامی نہیں، کوئی خرابی نہیں، اس میں کوئی نقص و عیب نہیں، ایسا اس لیے کہ اسلام اللہ تعالیٰ کی طرف سے نازل کردہ دین ہے۔اور اس دین کی تعلیمات ہمیں حضور  ﷺ نے دی اور تعلیمات پر سر فہرست عقیدہ ہے اور عقیدے میں سب سے اہم عقیدہ عقیدہِ توحید ہے۔ اور یہ سب سے بنیادی عقیدہ ہے یہی وہ عقیدہ ہے جس پر پورے دین کا اطلاق ہوتا ہے اور یہ عقیدہ ایسا ستون ہے جس پر اسلام کی پوری عمارت قائم ہے۔اور تمام انبیاء کرام علیہم السلام کی دعوت کا مرکز عقیدہ ہی رہا ہے حضرت آدم علیہ السلام سے لیکر آخری نبی حضرت محمد مصطفیٰ ﷺ تک جتنے انبیاء کرام علیہم السلام اس جہاں میں مبعوث فرمائے تمام نے اپنے احسن انداز میں فریضہ انجام دیتے ہوئے اپنی قوموں کو بہترین انداز میں اللہ عزوجل کی وحدانیت بیان فرمائی ۔ اللہ عزوجل نے قرآن مجید کی بیشتر آیات میں واضح الفاظ میں بیان فرمایا ہے کہ انبیاء کرام علیہم السلام کیسے اللہ عزوجل کی واحدنیت بیان فرمایا کرتے تھے ۔

چنانچہ اللہ عزوجل فرماتا ہے:

وَ لَقَدْ بَعَثْنَا فِیْ كُلِّ اُمَّةٍ رَّسُوْلًا اَنِ اعْبُدُوا اللّٰهَ وَ اجْتَنِبُوا الطَّاغُوْتَۚ-فَمِنْهُمْ مَّنْ هَدَى اللّٰهُ وَ مِنْهُمْ مَّنْ حَقَّتْ عَلَیْهِ الضَّلٰلَةُؕ-فَسِیْرُوْا فِی الْاَرْضِ فَانْظُرُوْا كَیْفَ كَانَ عَاقِبَةُ الْمُكَذِّبِیْنَ(۳۶)

ترجمہ کنزالایمان : اور بےشک ہر امّت میں سے ہم نے ایک رسول بھیجا کہ اللہ کو پوجو اور شیطان سے بچو تو ان میں کسی کو اللہ نے راہ دکھائی اور کسی پر گمراہی ٹھیک اتری تو زمین میں چل پھر کر دیکھو کیسا انجام ہوا جھٹلانے والوں کا۔(سورة النحل آیت نمبر 36 )

تفسیر صراط الجنان :وَ لَقَدْ بَعَثْنَا فِیْ كُلِّ اُمَّةٍ رَّسُوْلًا:اور بیشک ہر امت میں ہم نے ایک رسول بھیجا ۔ یعنی جس طرح ہم نے تم میں محمد مصطفٰی ﷺ کو بھیجا اسی طرح ہر امت میں ہم نے ایک رسول بھیجا اور ہر رسول کو حکم دیا کہ وہ اپنی قوم سے فرمائیں کہ اے لوگو!اللہ عَزَّوَجَلَّ کی عبادت کرو اور شیطان کی پیروی کرنے سے بچو تو ان اُمتوں میں کسی کو اللہ تعالیٰ نے ہدایت دیدی تووہ ایمان سے مشرف ہوئے اور کسی پر علمِ الٰہی میں گمراہی ثابت ہوگئی تووہ اپنی اَزلی شقاوت کی وجہ سے کفر پر مرے اور ایمان سے محروم رہے۔ اے کفارِ مکہ! تم زمین میں چل پھر کر دیکھو کہ اپنے رسولوں عَلَیْہِمُ الصَّلٰوۃُ وَالسَّلَام کو جھٹلانے والوں کاکیسا انجام ہوا؟ انہیں اللہ تعالیٰ نے ہلاک کر دیا اور اُن کے شہر ویران کر دئیے ،ان کی اجڑی ہوئی بستیاں اُن کی بربادی کی خبر دیتی ہیں ،اس کو دیکھ کر سمجھو کہ اگر تم بھی اُن کی طرح کفر و تکذیب پر مُصِر رہے تو تمہارا بھی ایسا ہی انجام ہونا ہے۔ (خازن، النحل، تحت الآیۃ: ۳۶، ۳ / ۱۲۲، مدارک، النحل، تحت الآیۃ: ۳۶، ص۵۹۵، جلالین، النحل، تحت الآیۃ: ۳۶، ص۲۱۸، ملتقطاً)

اس آیت سے معلوم ہوا کہ توحید تمام انبیاء کرام کی دعوت کا مرکز رہا ہے اور اسی میں ہی امت کی بھلائی ہے۔

دوسری جگہ ارشاد خداوندی ہے :

وَ اِلٰهُكُمْ اِلٰهٌ وَّاحِدٌۚ-لَاۤ اِلٰهَ اِلَّا هُوَ الرَّحْمٰنُ الرَّحِیْمُ۠(۱۶۳)

ترجمۂ کنزالایمان:اور تمہارا معبود ایک معبود ہے اس کے سوا کوئی معبود نہیں مگر وہی بڑی رحمت والا مہربان۔ (سورة البقرۃ آیت نمبر 163)

تفسیر صراط الجنان:وَ اِلٰهُكُمْ اِلٰهٌ وَّاحِدٌ: اور تمہارا معبود ایک معبود ہے۔ کفار نے حضورِ اقدس صَلَّی اللہُ تَعَالٰی عَلَیْہِ وَاٰلِہٖ وَسَلَّمَ سے اللہ تعالیٰ کی شان و صفت معلوم کی تو یہ آیت مبارکہ نازل ہوئی کہ تمہارا معبودایک معبود ہے۔(خازن، البقرۃ، تحت الآیۃ: ۱۶۳، ۱ / ۱۰۸)

نہ اس کے اجزاء ہیں ، نہ کوئی اس کی مثل ہے ، معبود و رب ہونے میں کوئی اس کا شریک نہیں ، وہ اپنی ذات و صفات اور افعال میں یکتا ہے، مخلوق کو تنہا اسی نے بنایا، وہ اپنی ذات میں اکیلا ہے۔اور احادیث مبارکہ سے بھی ثابت ہے اور بیشتر احادیث طیبہ میں ذکر ہوا ہے کہ حضور نبی اکرم خاتم النبیین ﷺ کیسے اللہ پاک کی توحید کا بیان فرماتے تھے چنانچہ :

عَنْ عُمَرَ بْنِ الْخَطَّابِ رَضِيَ اللَّهُ عَنْهُ قَالَ: بَيْنَمَا نَحْنُ عِنْدَ رَسُولِ اللَّهِ صَلَّى اللَّهُ عَلَيْهِ وَسَلَّمَ ذَاتَ يَوْمٍ إِذْ طَلَعَ عَلَيْنَا رَجُلٌ شَدِيدُ بَيَاضِ الثِّيَابِ شَدِيدُ سَوَادِ الشَّعْرِ لَا يُرٰى عَلَيْهِ أَثَرُ السَّفَرِ وَلَا يَعْرِفُهُ مِنَّا أَحَدٌ حَتَّى جَلَسَ إِلَى النَّبِيِّ صَلَّى اللَّهُ عَلَيْهِ وَسَلَّمَ فأسند رُكْبَتَيْهِ إِلَى رُكْبَتَيْهِ وَوَضَعَ كَفَّيْهِ عَلَى فَخِذَيْهِ وَقَالَ: يَا مُحَمَّدُ أَخْبِرْنِي عَنِ الْإِسْلَامِ قَالَ:الْإِسْلَامُ أَنْ تَشْهَدَ أَنْ لَا إِلَهَ إِلَّا اللَّهُ وَأَنَّ مُحَمَّدًا رَسُولُ اللَّهِ

روایت ہے حضرت عمر ابن خطاب( رضی اللہ عنہ) سے فرماتے ہیں کہ ایک دن ہم نبی ﷺ کی خدمت میں حاضرتھے کہ ایک صاحب ہمارے سامنےنمودارہوئے جن کے کپڑے بہت سفیداور بال خوب کالے تھے اُن پر آثارِ سفر ظاہر نہ تھے اور ہم سےکوئی اُنہیں پہچانتا بھی نہ تھایہاں تک کہ حضور( ﷺ ) کے پاس بیٹھے اور اپنے گھٹنے حضور( ﷺ ) کےگھٹنوں شریف سے مَس کر دیئے اور اپنے ہاتھ اپنے زانو پر رکھے اور عرض کیا اَےمحمد( ﷺ )مجھے اسلام کے متعلق بتائیےفرمایا کہ اسلام یہ ہے کہ تم گواہی دو کہ اللہ کےسواءکوئی معبودنہیں اورمحمداللہ کے رسول ہیں۔(مرآۃ المناجیح شرح مشکوٰۃ المصابیح جلد:1 ، حدیث نمبر:1)

وَعَنِ ابْنِ عُمَرَ رَضِيَ اللّٰهُ عَنْهُمَا قَالَ: قَالَ رَسُولُ الله صَلَّى اللّٰهُ عَلَيْهِ وَسَلَّمَ : أُمِرْتُ أَنْ أُقَاتِلَ النَّاسَ حَتَّى يَشْهَدُوْا أَنْ لَا إِلَهَ إِلَّا اللّٰهُ وَأَنَّ مُحَمَّدًا رَسُولُ اللهِ

روایت ہے ابن عمر رضی اللہ عنہما سے فرماتے ہیں کہ فرمایا رسول الله ﷺ نےکہ مجھے حکم دیا گیا کہ لوگوں سے جنگ کروں تاکہ گواہی دیں کہ رب کے سواکوئی معبودنہیں اورمحمد الله کے رسول ہیں۔(مرآۃ المناجیح شرح مشکوٰۃ المصابیح جلد:1 , حدیث نمبر:12)

ان آیات کریمہ اور احادیث طیبہ سے ہمیں یہ درس ملتا ہے کہ اسلام کی اصل روح ہی توحید ہے۔اور یہ توحید نبی اکرم ﷺ اور تمام انبیاء کرام علیہم السلام کی دعوت کا مرکز رہا ہے۔اور ہمارے اسلاف بھی ہمیں اسی کا درس دیتے رہتے ہیں ۔ ہمیں بھی چائیے کہ ہم اپنے عقیدے کی درست اصلاح کریں علم دین حاصل کریں کثیر مطالعہ کریں، عقیدے کے متعلق علم الکلام پر کتابیں پڑھیں ،علمائے کرام کی صحبت میں رہیں ان کے درس و بیان میں شرکت کریں بدمذہبوں کی بیٹھک سے دور رہیں ۔اللہ پاک ہمیں عمل کی توفیق عطا فرمائے آمین بجاہ النبی الامینﷺ ۔