عالمی سطح کی دینی تحریک دعوتِ اسلامی کے دارالمدینہ انٹرنیشنل یونیورسٹی کے تحت 23 ستمبر 2024ء بروز پیر  اسلام آباد کے گارڈن ایونیو شکر پڑیاں روڈ پر واقع پاک چائنہ فرینڈ شپ سنٹر میں ”میلاد کانفرنس“ منعقد ہوئی جس میں خصوصی طور پر سابق وزیرِ اعظم شاہد خاقان عباسی اور صوبہ خیبرپختونخوا کے موجودہ گورنر فیصل کریم کنڈی کی شرکت ہوئی۔

تفصیلات کے مطابق اس کانفرنس میں ملک کی اہم سیاسی و سماجی شخصیات، مختلف یونیورسٹیز کے وائس چانسلرز، رجسٹرار، ڈینز، لیکچرارز، پروفیسرز، مختلف ممالک سے آئے ہوئے اسٹوڈنٹس، دارالمدینہ یونیورسٹی کی فیکلٹی،اسٹوڈنٹس، مرکزی مجلسِ شوریٰ کے اراکین اوردیگر عاشقانِ رسول بھی موجود تھے۔

کانفرنس کا باقاعدہ کا آغاز تلاوتِ قراٰن و نعت شریف سے کیا گیا جس کے بعد مرکزی مجلسِ شوریٰ کے نگران اور انٹرنیشنل اسلامک اسکالر مولانا حاجی محمد عمران عطاری سلمہ الباری نے سنتوں بھرا بیان کیا۔

نگرانِ شوریٰ نے بحیثیتِ استاد، والدین، معاشرے اور ریاست کے اہم ذمہ داران کے لئے سیرتِ مصطفیٰ صلَّی اللہ علیہ واٰلہٖ وسلَّم کی روشنی میں رہنمائی اصول بیان کرتے ہوئے ان کی روشنی میں معاشرے کی برائیوں کو ختم کرنے کا ذہن دیا۔

حاضرین سے گفتگو کے دوران نگرانِ شوریٰ مولانا حاجی محمد عمران عطاری نے انہیں مکتبۃ المدینہ کی کُتُب ”آخری نبی صلَّی اللہ علیہ واٰلہٖ وسلَّم کی پیاری سیرت“ اور ”سیرتِ مصطفیٰ صلَّی اللہ علیہ واٰلہٖ وسلَّم“ مطالعہ کرنے کا ذہن دیا۔

دعا اور صلوٰۃ و سلام پر کانفرنس کا اختتام ہوا جبکہ اسلامی بھائیوں نے نگرانِ شوریٰ مولانا حاجی محمد عمران عطاری سے ملاقات بھی کی۔(رپورٹ:محمد دانش عطاری معاون رکن شوری حاجی وقار المدینہ عطاری، کانٹینٹ:غیاث الدین عطاری)

دارالمدینہ انٹرنیشنل یونیورسٹی کے پروفیسرز کے ایک وفدنے چانسلر ڈاکٹر دانش اقبال عطاری کی سربراہی میں دارالمدینہ ہیڈآفس کا مختصر دورہ کیا۔ اس دورے میں اُنھیں دارالمدینہ سے متعلق بریفنگ دی گئی  اور ادارے کے مختلف شعبوں کا دورہ کروایا گیا۔ وفد کو دارالمدینہ کے نصاب اور نظام تعلیم کی خصوصیات سےبھی آگاہ کیا گیا۔) غلام محی الدین ترک ،اردو کانٹینٹ رائیٹر(مارکیٹنگ اینڈ کمیونیکیشن ڈیپارٹمنٹ دارالمدینہ ،ہیڈ آفس کراچی)

دارالمدینہ انٹرنیشنل یونیورسٹی، اسلام آباد میں جشن آزادی کے سلسلے میں ایک تقریب منعقد کی گئی جس میں رکن شوری دارالمدینہ انٹرنیشنل یونیورسٹی حاجی جنید عطاری مدنی صاحب، یونیورسٹی کے Dean ، ہیڈ آف ڈیپارٹمنٹس،فیکلٹی ممبرز،مختلف سیاسی، سماجی، ایجوکیشنل پروفیشنلز اور کاروباری شخصیات نے شرکت کی۔

اس تقریب کا عنوان تھا:’’نعمتِ آزادی کی قدر کیجیے‘‘

اس تقریب میں خصوصی بیان استاذ الحدیث مولانا سید خالد شاہ عطاری مدنی صاحب نے کیا ، ان کے علاوہ پروفیسرز اور اسٹوڈنٹس نے بھی اظہار خیال کیا۔رکن شوری نے وطن عزیز کی ترقی اور حفاظت کے لیےدعا بھی کی۔ تقریب کا اختتام قومی ترانہ اور درود وسلام پر ہوا۔(رپورٹ: غلام محی الدین ترک ،اردو کانٹینٹ رائیٹر(مارکیٹنگ اینڈ کمیونیکیشن ڈیپارٹمنٹ دارالمدینہ ،ہیڈ آفس کراچی)

پاکستان پبلشرز اینڈ بک سیلرز ایسوسی ایشن کے زیر اہتمام ایکسپو سینٹر، کراچی میں ہونے والے 18ویں کراچی بین الاقوامی کتاب میلے میں دارالمدینہ انٹرنیشنل اسلامک ایجوکیشن سسٹم کے ادارے دارالمدینہ انٹرنیشنل یونیورسٹی پریس (قادری پبلی کیشن ) نے باوقارانداز میں شرکت کی ۔ دارالمدینہ کے اسٹال پر دعوت اسلامی کی مرکزی مجلس شوریٰ کے رکن سید ابراہیم عطاری،نگران شریعہ ایڈوائز دارالمدینہ انٹرنیشنل اسلامک ایجوکیشن سسٹم مفتی کفیل عطاری المدنی ، مولانا کوکب نورانی اوکاڑوی،دیگرمعززسیاسی وسماجی شخصیات اور اسکولز کے نمائندوں نے بھی اسٹال کا دورہ کیا ۔ بچوں نے دارالمدینہ کے ریڈرز میں خصوصی دل چسپی ظاہر کی اور دارالمدینہ کی نصابی کتب کے حوالے سے معلومات حاصل کیں۔ اسٹال پر دارالمدینہ کی شائع کردہ 125سے زائد کتب رکھی گئی تھیں جن میں یکساں قومی نصاب سے منظور شدہ 92کتابیں بھی شامل تھیں۔ان کتابوں میں اسلامیات کا راہ اسلام سلسلہ،روشن سفر اردوسلسلہ، SRMاُردو خوش خطی ، ڈائنامک انگلش (Dynamic English) یونیک میتھ میٹکس( Unique Mathematics) ، ایوری ڈے نالج (Everyday Knowledge) کے علاوہ اسمارٹ آئی سی ٹی (Smart ICT)کی کتابوں کے علاوہ گول مٹول ،بطخ رانی اور دوسرے ریڈرز بھی رکھے گئے تھے۔(رپورٹ:غلام محی الدین ترک ،اردو کانٹینٹ رائٹر مارکیٹنگ اینڈ کمیونی کیشن ڈیپارٹمنٹ فیضان اسلامک اسکول سسٹم ،ہیڈ آفس کراچی)