دعوتِ اسلامی کے زیر اہتمام 27 ستمبر 2026ء کو  یونان کے دارالحکومت ایتھنز کے مشہور ایلیوناس فٹ بال کلب (Eleonas Football Club, Makrigianni 46, Ag. Ioannis Rentis 182 33, Athens, Greece) میں ایک عظیم الشان ”گرینڈ سنتوں بھرے اجتماع“ کا انعقاد کیا گیا۔ اجتماع کا باقاعدہ آغازتلاوت قرآن مجید سے ہوا جبکہ نعت خواں اسلامی بھائیوں نے بارگاہِ رسالت صلَّی اللہ علیہ واٰلہٖ وسلَّم میں ہدیۂ نعت پیش کیا۔ اس روحانی اجتماع میں یونان کے مختلف شہروں اورجزیروں سے بزنس مین اور مختلف کمیونٹی سے عاشقانِ رسول نے شرکت کی۔

اجتماع میں دعوتِ اسلامی کی مرکزی مجلسِ شوریٰ کے نگران مولانا حاجی محمد عمران عطاری مُدَّ ظِلُّہُ العالی نے ایمان افروز اور رقت انگیز بیان فرمایا۔

مولانا عمران عطاری نے خطبہ مسنونہ کے بعد درودِ پاک کی اہمیت پر روشنی ڈالتے ہوئے ارشادِ نبوی صلَّی اللہ علیہ واٰلہٖ وسلَّم نقل کیا کہ جو شخص ایک بار درودِ پاک پڑھتا ہے، اللہ پاک اس پر 10 رحمتیں نازل فرماتا ہے، 10 گناہ معاف فرماتا ہے اور 10 درجات بلند فرماتا ہے۔

نگرانِ شوریٰ نے حضرت سیدنا ذوالنون مصری رحمۃُ اللہِ علیہ کا واقعہ بیان کیا کہ کس طرح اللہ پاک نے ایک بچھو کے ذریعے شراب کے نشے میں دھت نوجوان کی بڑے سانپ (اژدھے) سے حفاظت فرمائی۔ غیب سے آواز آئی کہ اللہ پاک گناہگاروں کو بھی مہلت اور تحفظ دیتا ہے۔ اس واقعے سے متاثر ہو کر اس نوجوان نے سچی توبہ کی اور ولی اللہ کے مقام پر فائز ہوا۔

انہوں نے فرمایا کہ اللہ تعالیٰ کی رحمت نہایت وسیع ہے۔ ہم تنہائیوں میں گناہ کرتے ہیں لیکن اللہ پاک ہماری پردہ پوشی فرماتا ہے۔ انسان آنکھ، زبان، کان اور اعضاء سے گناہ کرتا ہے لیکن اللہ پاک فوراً نعمتیں نہیں چھینتا بلکہ بندے کو توبہ کی مہلت دیتا ہے۔

سورۂ تحریم کی آٹھویں آیت کا حوالہ دیتے ہوئے انہوں نے بتایا کہ ”توبۃ النصوح“(خالص توبہ) یہ ہے کہ گناہ چھٹنے کے بعد بندہ دوبارہ اس کی طرف نہ لوٹے۔ توبہ کرنے والے کے تمام سابقہ گناہ معاف کر دیئے جاتے ہیں اور قیامت کے دن اس کے اعضا اور زمین اس کے خلاف گواہی دینے سے آزاد کر دیئے جاتے ہیں۔

بیان میں قیامت کے دن کی شدت، سوا میل پر سورج، تانبے کی زمین اور گناہوں و زکوۃ نہ دینے کے عذاب کا تفصیلی ذکر کیا گیا۔ ساتھ ہی بخاری شریف کی حدیث کی روشنی میں ان 7 خوش نصیبوں کا ذکر کیا جنہیں اللہ کے عرش کا سایہ نصیب ہوگا، جن میں عادل حکمران، جوانی میں عبادت کرنے والا نوجوان، اور تنہائی میں اللہ کے خوف سے رو دینے والا شخص شامل ہیں۔

نگرانِ شوریٰ نے یونان و یورپ میں مقیم اسلامی بھائیوں کو متوجہ کرتے ہوئے فرمایا کہ کتنے پردیسی روزگار کی خاطر آئے مگر ان کے جنازے اور تابوت وطن واپس گئے۔ انسان کو چاہیے کہ دنیاوی مال و دولت کی تلاش کے ساتھ ساتھ آخرت، نماز اور موت کو ہرگز نہ بھولیں۔

بیان کے اختتام پر نگرانِ شوریٰ نے نماز کی پابندی کرنے،گناہوں سے بچنے، سنتوں کی پیروی کرنےاور اپنے ساتھ ساتھ اپنے گھر والوں کے عقائد کی حفاظت کرنے کی ترغیب دلائی۔

اجتماع کے آخر میں مولانا عمران عطاری نے بارگاہِ الٰہی میں عاجزانہ اور رقت انگیز دعا فرمائی جس سے حاضرین کی آنکھیں اشکبار ہو گئیں اور صلوۃ وسلام پر تقریب کا اختتام ہوا۔ 

دعوتِ اسلامی کے زیراہتمام 26 ستمبر 2026ء کو مدنی مرکزفیضانِ مدینہ بولونیا اٹلی (Bologna Italy) میں ایک عظیم الشان ”گرینڈ اجتماع“کا انعقاد کیا گیا۔ اس روحانی و اخلاقی پروگرام میں اٹلی اور گرد و نواح سے کثیر تعداد میں عاشقان رسول نے شرکت کی جن میں بزنس مین اور مختلف شعبہ جات کے پروفیشنلز بھی شریک تھے۔

اجتماع کا آغاز تلاوتِ قرآنِ پاک، حمد و ثناء اور درودِ پاک کی معطر صداؤ ں سے ہوا۔ اس موقع پر درودِ پاک کے فضائل بیان کرتے ہوئے رسول اللہ صلَّی اللہ علیہ واٰلہٖ وسلَّم کا فرمانِ عالی شان پیش کیا گیا کہ قیامت کی دشوار گزار گھاٹیوں سے جلد نجات پانے والا شخص وہ ہوگا جس نے دنیا میں سب سے زیادہ درود پڑھے ہوں گے۔

اجتماع میں نگرانِ شوریٰ دعوتِ اسلامی مولانا حاجی محمد عمران عطاری مُدَّ ظِلُّہُ العالی نے رقت و فکر انگیز بیان کیا۔ انہوں نے اپنے بیان میں دنیا کی فانی حقیقت، لمبی امیدوں کے نقصانات، اور موت کی تیاری پر مفصل روشنی ڈالی۔

نگران شوریٰ نے لمبی امیدیں اور دنیا کی حقیقت پر گفتگو کرتے ہوئے امام غزالی رحمۃُ اللہِ علیہ کی کتاب”احیاء العلوم“ سے حضرت عیسیٰ علیہ السلام اور ایک بوڑھے شخص کا ایمان افروز واقعہ بیان کرتے ہوئے بتایا کہ کس طرح لمبی امیدیں انسان کو غفلت میں ڈالتی ہیں۔ نبی کریم صلَّی اللہ علیہ واٰلہٖ وسلَّم کے ارشادات کی روشنی میں انہوں نے واضح کیا کہ خواہشات کی پیروی انسان کو حق سے روکتی ہے اور لمبی امیدیں دنیا کی محبت پیدا کرتی ہیں۔

یورپ اور اٹلی میں سالہا سال سے مقیم مسلمانوں کو مخاطب کرتے ہوئے انہوں نے کہا کہ انسان دنیا کمانے میں زندگی گزار دیتا ہے مگر اکثر موت اسے اچانک آ لیتی ہے۔ انہوں نے ہر مسلمان کو مدینہ منورہ میں ایمان و عافیت کے ساتھ شہادت کی تمنا رکھنے کی ترغیب دی اور حضرت عمر فاروق رضی اللہ عنہ کی دعا کا حوالہ دیا۔

سورۃ التکاثر کی تفسیر بیان کرتے ہوئے نگرانِ شوریٰ نے خبردار کیا کہ قیامت کے دن انسان سے پانچ بنیادی سوالات کیے جائیں گے: عمر، جوانی، مال کمانے اور خرچ کرنے کی جگہ، اور علم پر عمل۔ نیز ٹھنڈے پانی اور سائے جیسی نعمتوں کا بھی حساب ہوگا۔

بیان میں دیارِ غیر میں بچوں اور نسلوں کے دین و عقائد کی حفاظت پر زور دیتے ہوئے والدین کو ہدایت کی گئی کہ وہ اپنے گھروں میں 'فیضان آن لائن اکیڈمی' کے ذریعے بچوں کی دینی تعلیم و تربیت کا اہتمام کریں اور انہیں حبِ نبی صلَّی اللہ علیہ واٰلہٖ وسلَّم، حبِ اہل بیت اور تلاوتِ قرآن کی تعلیم دیں۔

اجتماع کے دوران رکن شوریٰ مولانا حاجی عبدالحبیب عطاری اور دیگر ذمہ داران کی جانب سے جامعۃ المدینہ اور فیضان آن لائن اکیڈمی سے درس نظامی (عالم کورس) اور دیگر کورسز کرنے والے اسٹوڈنٹس کو اسناد (Certificates) اور انعامات تقسیم کیے گئے۔ اس موقع پر ایک بڑی خوشخبری سنائی گئی کہ اگلے سال اٹلی کے جامعۃ المدینہ میں درجہ ٔ دورۃ الحدیث شریف کا باقاعدہ آغاز کیا جا رہا ہے۔

بیان کے اختتام پر تمام حاضرین نے اپنے گناہوں سے سچی توبہ کی اور امیرِ اہلسنت علامہ محمد الیاس عطار قادری دامت بَرَکَاتُہمُ العالیہ کے سلسلے (قادریہ رضویہ عطاریہ) میں بیعت کی سعادت حاصل کی۔ آخر میں امتِ مسلمہ کی بخشش، والدین کی مغفرت اور مدینہ منورہ کی حاضری کے لیے رقت انگیز دعا کی گئی اور بارگاہِ رسالت میں صلوٰۃ و سلام پیش کیا گیا۔

دعوتِ اسلامی کے زیرِ اہتمام 25ستمبر 2026ء کو سویڈن اسٹاک ہوم (Stockholm, Sweden) کے مقامی کمیونٹی سینٹرمیں عظیم الشان ”گرینڈ فیملی اجتماع 2026ء“کا انعقاد کیا گیا جس میں سویڈن، اسکاٹ ہوم، یورپ اور یوکےمیں مقیم عاشقانِ رسول نے کثیر تعداد میں شرکت کی۔ اجتماع کے مرکزی اور روح پرور سیشن سے مفتی محمد قاسم عطاری مُدَّ ظِلُّہُ العالی اور نگرانِ شوریٰ مولانا حاجی محمد عمران عطاری مُدَّ ظِلُّہُ العالی نے خصوصی بیان فرمایاجس کا بنیادی محور ”دین اسلام، معاشرتی اصلاح، تربیتِ اولاد، خانگی سکون اور دینی تعلیم کی اہمیت“ تھا۔

تلاوت و نعت سے عظیم الشان اجتماع کا انعقاد ہواجبکہ شیخ الحدیث والتفسیر مفتی محمد قاسم عطاری مُدَّ ظِلُّہُ العالی نے ”دینِ اسلام اور ایمان کا تقاضا“ کے موضوع پر سنتوں بھرا بیان کیا۔بیان کرتے ہوئے مفتی صاحب نے فرمایا کہ اسلام ایک مکمل دین ہے، پیدائش سے لے کر موت تک انسان جن جن احوال سے گزرتا ہے، اللہ تعالیٰ نے اس دین میں ہر شے کے بارے میں تفصیلی رہنمائی عطافرمائی اور اللہ کا کروڑ ہا کروڑ احسان کے اس نے ہمیں عظیم ہستی کے ذریعے سے دین کامل عطا فرمایا، ان عظیم ہستی کو اللہ پاک نے تمام جہان کے لئے رحمت بناکر بھیجا۔ہر مسلمان کو ایمانی تقاضے پورا کرتے ہوئے اسلامی عقائد، قبر و آخرت اور جنت و دوزخ کے ساتھ ساتھ تمام بنیادی عقائد کا علم ہونا چاہیئے، ہر مسلمان کو نفس کی پیروی کرنے کے بجائے اللہ و رسول کی اطاعت میں گزارنی چاہیئے جس نے بُری خواہشات سے اپنی نفس کو بچالیا تو بے شک جنت ہی اس کا ٹھکانا ہے۔ مفتی صاحب نے شرکا کو اسلام کے تمام ارکان بالخصوص نماز کو پابندی سے ادا کرنے کی ترغیب دلائی۔

بعدازاں نگران شوریٰ حاجی محمد عمران عطاری نے دینی و دنیاوی تعلیم کے تقابل پر ایک سبق آموز واقعہ پیش کرتے ہوئے اپنے بیان کا آغاز کیا۔واقعہ پیش کرتے ہوئے نگران شوریٰ نے کہا کہ ایک شخص نے بیوی کے اصرار کے باوجود اپنے پہلے تین بیٹوں کو صرف دنیاوی اعلیٰ تعلیم دلوا کر آفیسرز اور پروفیشنلز بنایا جبکہ بیوی کی خواہش پر چوتھے بیٹے کو عالم و حافظِ قرآن بنایا، جب ماں کی حکمتِ عملی سے باپ کے رویے کا امتحان لیا گیا تو صرف دنیاوی تعلیم یافتہ تینوں بڑے بیٹوں نے باپ کو برا بھلا کہا اور گالیاں دیں جبکہ چوتھے عالم بیٹے نے اسلام پسندانہ طرزِ عمل اختیار کرتے ہوئے ماں کو صبر، معافی اور باپ کے احترام و حقوق کا درس دیا۔ پردے کے پیچھے چھپے والد نے یہ منظر دیکھ کر زار و قطار روتے ہوئے پچھتاوے کا اظہار کیا کہ کاش اس نے تمام بچوں کو دین اور قرآن کی تعلیم دی ہوتی۔

مولانا عمران عطاری نے یورپی ممالک میں مقیم مسلمانوں کی خانگی زندگی کا احاطہ کرتے ہوئے کہا کہ ستمبر 2026ء کے موجودہ دور میں مال و دولت، گاڑیوں اور آسائشوں کے باوجود گھروں میں سکون، محبت اور اتفاق کا نہ ہونا سب سے بڑا مسئلہ بن چکا ہے۔ شوہر، بیوی اور بچوں کے درمیان باہمی ناچاقیاں اور شکایتیں عام ہیں۔ گھر کا ماحول صرف اسی صورت امن کا گہوارہ بن سکتا ہے جب پورا خاندان شریعت و سنت کے سانچے میں ڈھلے اور ایک دوسرے کے شرعی حقوق ادا کرے۔

ادب و احترام پر گفتگو کرتے ہوئے بیان میں دیہات کی تین عورتوں کی مثال دیتے ہوئے بتایا گیا کہ انجینئر اور ڈاکٹر بیٹے کی مائیں صرف عہدوں پر فخر کرتی رہیں جبکہ تیسری عورت کے عالم بیٹے نے پہنچتے ہی ماں کا مٹکہ اپنے سر پر اٹھایا اور ہاتھ پکڑ کر چلاجس پر ماں نے فخر سے کہا کہ ”میرا بیٹا عالم بن رہا ہے“۔

‏بیان میں والدین کی ذمہ داری پر کلام کرتے ہوئے بتایا گیا کہ اولاد کی اچھی تربیت کا حق شادی کے لیے نیک و دین دار عورت کے انتخاب سے شروع ہو جاتا ہے۔ ارشاداتِ باری تعالیٰ ہے کہ حضرت لقمان رحمۃُ اللہِ علیہ کی بیٹے کو نصیحتوں اور سورۃ التحریم کی چھٹی آیت کی روشنی میں واضح کیا گیا کہ ہر شخص پر اپنے اور اپنے اہل و عیال کو جہنم کی آگ سے بچانا فرض ہے۔

اس کے علاوہ نگرانِ شوریٰ نے بچوں کی تربیت میں ماں کا کردار، میاں بیوی کے حقوق اور خانگی نظام، والدین کی اطاعت اور اطاعت کا صلہ، رزق حلال کمانے اور اپنے گھروں میں مکتبۃ المدینہ کی کتابوں سے درس شروع کرنے کے حوالے سے رہنمائی کی اور ترغیب دلائی۔

بیانات کے بعد سویڈن میں فیضان آن لائن اکیڈمی سے درس ِنظامی (عالم کورس) اور دیگر کورسز کرنے والے اسٹوڈنٹس کو Certificate اور تحائف دیئے گئے۔

اختتام پر دعا مانگی گئی اور صلوۃ وسلام بھی پڑھا گیا۔

سیدنا شیخ عبد القادر جیلانی رحمۃُ اللہِ علیہ کے سالانہ عرس کے موقع پر بڑی گیارہویں شریف منانے کے لیے دعوتِ اسلامی کے زیر اہتمام 22 ستمبر 2026ء کو فیضانِ مدینہ مسجد ویمبلی (Wembley) برطانیہ میں سنتوں بھرے اجتماع کا انعقاد کیا گیا جس میں قرب و جوار کے عاشقانِ رسول نے شرکت کی۔

نگرانِ شوریٰ مولانا حاجی محمد عمران عطاری مُدَّ ظِلُّہُ العالی نے سنتوں بھرا بیان کیا اور سیدنا غوث پاک رحمۃُ اللہِ علیہ کی سیرت پر گفتگو کی۔نگران شوریٰ نے شرکا کوغوث پاک کی سیرت اپنانے، علم دین حاصل کرنے اور دینی ماحول سے وابستہ رہتے ہوئے نمازوں کی پابندی کرنے اور آخرت کی تیاری کرنے کا ذہن دیا۔

آخر میں امتِ مسلمہ کی خیر و سلامتی کے لئے دعا کی گئی اور صلوۃ و سلام پر اجتماع کا اختتام ہوا۔

دعوتِ اسلامی کے تحت آج بروز ہفتہ  26 ستمبر 2026ء کو اٹلی کے شہر بولوگنا (Bologna, Italy) میں عظیم الشان سنتوں بھرے اجتماع کا انعقاد کیا جائے گاجس میں دعوتِ اسلامی کی مرکزی مجلسِ شوریٰ کے نگران مولانا حاجی محمد عمران عطاری خصوصی بیان فرمائیں گے۔

اجتماع کے اوقات و مقام:

یہ عظیم الشان اجتماع اٹلی کے وقت کے مطابق شام 07:30 بجے مدنی مرکز فیضانِ مدینہ بولوگنا (Via Giovanni Papini, 8, 40128 Bologna BO, Italy) میں شروع ہوگا جبکہ نگرانِ شوریٰ مولانا حاجی محمد عمران عطاری کا خصوصی بیان رات تقریباً 08:00 بجے ہوگا۔

براہِ راست نشریات:

سوشل میڈیا اور مدنی چینل پر براہِ راست (Live) کوریج کا بھی اہتمام کیا گیا ہے جس کے تحت مدنی چینل کے ساتھ ساتھ مولانا حاجی محمدعمران عطاری کے فیس بک اور یوٹیوب آفیشل پیجز (MAULANAIMRANATTARI) کے ذریعے دنیا بھر سے لوگ اس اجتماعِ پاک میں شرکت کر سکیں گے۔

سنتوں کی ترویج و اشاعت میں مصروفِ عمل ”دعوتِ اسلامی“ کا سرزمینِ انگلینڈ پر تاریخی و سنہرا اقدام

دعوت اسلامی کے زیر اہتمام ناٹنگھم سٹی نیورک شو گراؤنڈ (Nottingham City Newark Showground)میں 18 تا 20 ستمبر 2026ء تین دن کے عظیم الشان سنتوں بھرے اجتماع کا انعقاد کیا گیا۔

تین دن کے اجتماع میں مختلف شہروں سے عاشقانِ رسول کی اجتماع گاہ آمد ہوئی جبکہ کینیڈا، آسٹریلیا، ساؤتھ افریقہ،دیگر افریقی و ایشیائی اور یورپی ممالک سے عاشقانِ رسول کی بڑی تعداد شریک ہوئی۔شرکا میں مختلف شعبہ جات کے پروفیشنلز، ائمہ و علمائے کرام، سیاسی و سماجی شخصیات، نگران ملاوی مولانا عثمان عطاری مدنی اور نگران FGRFیوکے و یورپ حاجی سید فضیل رضاعطاری سمیت مختلف ممالک کے ذمہ داران دعوتِ اسلامی، اراکین شوریٰ حاجی رفیع عطاری، حاجی سید عارف عطاری، حاجی خالد عطاری، مولانا حاجی عبد الحبیب عطاری اور عبد الوہاب عطاری بھی موجود تھے۔

عظیم الشان سنتوں بھرے اجتماع کا باقاعدہ آغاز تلاوتِ قرآن پاک سے ہوا۔اس کے بعد نعت خواں اسلامی بھائیوں نے کلام پڑھا، تلاوت و نعت کے بعد مبلغین دعوتِ اسلامی نے سنتوں بھرے بیانات کرتے ہوئے شرکا کونیکی کی دعوت دیتے ہوئے ان کی دینی و معاشرتی اصلاح کی۔

نماز مغرب سے قبل نگرانِ شوریٰ نے نیکی کی دعوت دیتے ہوئے جمعہ کے دن کی فضیلت بیان کی،غروب آفتاب سے قبل جمعۃالمبارک کے آخری لمحات میں قبولیت دعا کی برکات پانے کے لئے عاشقان رسول نے نگران شوریٰ کے ہمراہ رب کریم کی بارگاہ میں دعامانگنے کی سعادت پائی۔

اجتماع کے دوسرے دن نگرانِ شوریٰ مولانا حاجی محمد عمران عطاری مُدَّ ظِلُّہُ العالی کا سنتوں بھرا بیان ہوا۔ نگران شوریٰ نے بے حیائی و بے پردگی سمیت دیگر گناہوں سے بچنے اور نیک اعمال کرنے کے ساتھ ساتھ عظمت و شان مصطفٰے صلَّی اللہ علیہ واٰلہٖ وسلَّم بیان کی۔ دوسرے موقع پر رکن شوریٰ حاجی عبد الحبیب عطاری نے سنتوں بھرا بیان کرتے ہوئے ”عظمت و شان مصطفٰے صلَّی اللہ علیہ واٰلہٖ وسلَّم “ بیان کی۔بعد ازاں رکن شوریٰ حاجی خالد عطاری سمیت وقتاً فوقتاً دیگر مبلغین دعوتِ اسلامی نے بھی بیانات کئے اور شرکا کی دینی و معاشرتی اصلاح کی۔

اجتماع کے آخری دن گریجویشن سیریمنی 2026ء (Graduation Ceremony 2026) کے سلسلے میں ایک تقریب منعقد ہوئی ۔ تلاوت و نعت سے تقریب کا آغاز ہوا جبکہ رکن شوریٰ مولانا حاجی عبد الحبیب عطاری نے سنتوں بھرا بیان کیا۔ حاجی عبد الحبیب عطاری نے درود شریف کی فضیلت اور علم و علما کی شان پر تفصیلی گفتگو کی۔

بیان کے بعدرکن شوریٰ حاجی خالد عطاری نے دعوتِ اسلامی کےمختلف شعبہ جات اور اس کے تحت دنیا بھر میں ہونے والے دینی و فلاحی کاموں پر Video Documentary کے ذریعے بریفنگ دی۔

گریجویشن سریمنی میں نگرانِ شوریٰ مولانا حاجی محمد عمران عطاری مُدَّ ظِلُّہُ العالی نے بھی مختصر گفتگو کی جس میں طلبہ کو وعظ و نصیحت کرتے ہوئے انہیں اور ان والدین و سرپرست کو مبارکباد پیش کی۔نگران شوریٰ نے شرکائے اجتماع کو بھی ترغیب دلائی کہ وہ اپنے گھرمیں ایک عالم ضرور بنائیں اور اس کے لئے اپنی اولاد کو جامعۃ المدینہ میں داخلہ کروائیں۔

تمام Activity کے بعد یوکے کی سرزمین پر ہونے والے اجتماع میں خوشی کی وہ گھڑی بھی آئی کہ Online اور Physically حفظ و ناظرہ اور درس نظامی (عالم کورس) مکمل کرنے والوں کو Certificate دیئے گئے اور ان کی دستار بندی کی۔نگران شوریٰ،اراکین شوریٰ اور سینئرز اساتذۂ کرام نے ان کے سروں پر دستار سجاتے ہوئے انہیں مبارکباد پیش کی۔

گریجویشن سیریمنی کے بعد یوکے کی سرزمین پر منعقد ہونے والے عظیم الشان سنتوں بھرے اجتماع کی آخری نشست کا سلسلہ ہوا۔ نشست کا آغاز تلاوتِ قرآن و نعت رسول مقبول صلَّی اللہ علیہ واٰلہٖ وسلَّم سے ہوا۔نگران شوریٰ مولانا حاجی محمد عمران عطاری مُدَّ ظِلُّہُ العالی نے”موت کی سختی اور سکرات موت“ کے موضوع پر سنتوں بھرا بیان کیا۔بیان میں موت کے حوالے سے حدیث پاک اور صحابہ کرام علیہم الرضوان کے اقوال بیان کئے گئے اور شرکا کو موت سے قبل موت کی تیاری کرنے کا ذہن دیا گیا۔نگرانِ شوریٰ نے شرکائے اجتماع کو اپنے دلوں میں خوفِ خدا پیدا کرنے، نمازوں کی پابندی کرنے، اپنی ظاہری و باطنی اصلاح کرنے اور دعوت اسلامی کے دینی ماحول سے وابستہ رہنے کی ترغیب دلائی۔

بیان کے بعد تصوّرِ مدینہ کا سلسلہ ہوا، رقت انگیز دعا اور صلوۃ و سلام پر عظیم الشان اجتماع اپنے اختتام کو پہنچا۔آخر میں نگران شوریٰ سے اسلامی بھائیوں نے ملاقات بھی کی۔دوران اجتماع ایک خوشی کی خبر بھی سامنے آئی کہ اسلامی تعلیمات سے متاثر ہوکر نگران شوریٰ کے ہاتھ ایک غیرمسلم نے اسلام قبول کرلیا، نگران شوریٰ نے غیر مسلم کو کلمہ طیبہ پڑھاکر دائرہ اسلام میں داخل کیا۔

دینِ اسلام کی عالمگیر تحریک ”دعوتِ اسلامی“ کی دنیا بھر میں پیغامِ حق کو عام کرنے کی کاوشیں تیزی سے جاری ہیں۔ اسی سلسلے میں تبلیغِ دین اور نیکی کی دعوت کو عام کرنے کے لیے دعوتِ اسلامی کے ذمہ داران و مبلغین مختلف ممالک اور شہروں کا تبلیغی سفر کر رہے ہیں جن کی انفرادی کوششوں سے سینکڑوں غیر مسلم اسلام کی آغوش میں آ رہے ہیں۔ تازہ ترین اطلاعات کے مطابق نگرانِ ملاوی، مولانا حاجی محمد عثمان عطاری مدنی، دیگر اراکین اور ذمہ داران افریقی ممالک کے ساتھ ساتھ UK، فلپائن اور کمبوڈیا کے اہم دورے پر ہیں۔ اس سفر کے دوران وہ مختلف دور دراز دیہاتوں اور شہروں کا دورہ کر کے لوگوں کو نیکی کی دعوت پیش کر رہے ہیں۔ دعوتِ اسلامی کے مبلغین کی اس پُرخلوص کاوش اور انفرادی کوشش کے نتیجے میں اب تک سینکڑوں غیر مسلم کلمۂ طیبہ پڑھ کر دائرۂ اسلام میں داخل ہو چکے ہیں۔ نو مسلموں کو اسلام کی بنیادی تعلیمات، نماز، اور دینی احکامات کی تربیت فراہم کرنے کے لیے مقامی سطح پر مساجد اور مدارس کے قیام کا کام بھی جاری ہے۔ تفصیلات ملاحظہ کیجئے:

٭26 جولائی2026ء: Sofala Province, Mozambique میں (07) ٭26 جولائی 2026ء: Chigumula, Blantyre, Malawi میں (50) ٭27 جولائی 2026: Pretoria South Africa میں (01) ٭02 اگست 2026ء: Mzuzu, Malawi میں (04) ٭02 اگست 2026ء: Ndunde Village, Chiradzulu, Malawi میں (11) ٭04 اگست 2026ء: Lusaka, Zambiaمیں (01) ٭09 اگست 2026ء: Zomba, Malawi میں (34) ٭10 اگست 2026ء: Cruzamento de tete Mozambiqueمیں (02) ٭13 اگست 2026ء: Scotland میں (01) ٭14 اگست 2026ء: Rochdale, UK میں (01) ٭16 اگست 2026: Mauritius میں (01) ٭16 اگست 2026ء: Chimoio, Mozambique میں (02) ٭ 16 اگست2026ء: Machinjiri, Blantyre, Malawi میں (10) ٭17 اگست 2026ء: Chimoio, Manica Province میں (08) ٭17 اگست 2026ء: Hammanskraal, Pretoria میں (04) ٭18 اگست 2026ء: Sandton, South Africa میں (02) ٭19 اگست2026ء: Philippines میں (02) ٭23 اگست 2026ء: Chimenya Village, Mbulumbuzi, Malawi میں (53) ٭28 اگست 2026ء: Pampanga, Philippines میں (01) ٭30 اگست 2026ء : Blantyre, Malawi میں (04) ٭06 ستمبر2026ء: Chalamanda Village, Chiladzulu, Malawi میں (34)

دعوتِ اسلامی کے زیرِ اہتمام آج  29 اگست 2026ء بروز ہفتہ” اجتماعِ میلاد “ کا انعقاد کیا جا رہا ہے۔ یہ عظیم الشان اجتماع دیناج پور انسٹیٹیوٹ گراؤنڈ، صدر، دیناج پور بنگلہ دیش میں منعقد ہوگا۔

اس اجتماع کا باقاعدہ آغاز شام 7:00 بجے ہوگا جبکہ خلیفۂ امیرِ اہلسنت مولانا حاجی عبید رضا عطاری مدنی مدظلہ العالی کا خصوصی بیان (Speech) رات تقریباً 9:00 بجے شروع ہوگا۔

براہِ راست (Live) نشریات:

بنگلہ دیش کے ڈویژن راجشاہی،ضلع پابرنہ (Pabna) کے علاقے ایشوردی (Ishwardi) میں عظیم الشان” اجتماعِ میلاد “کا اہتمام کیا جا رہا ہے جس میں خلیفۂ امیرِ اہلسنت حضرت مولانا حاجی عبید رضا عطاری مدنی مدظلہ العالی خصوصی بیان فرمائیں گے۔

یہ اجتماع آج 28 اگست 2026ء جمعہ کی شب فتح محمد پور لوکو فٹبال گراؤنڈ (Fateh Muhammadpur Loco Football Ground)، ایشوردی، پابرنہ میں منعقد کیا جائے گا جس میں کثیر اسلامی بھائیوں کی شرکت متوقع ہے۔

معلومات کے مطابق اجتماعِ میلاد کا باقاعدہ آغاز رات 9:30 بجےتلاوتِ قراٰنِ مجید و نعتِ رسولِ مقبول صلی اللہ علیہ وآلہ وسلم سے ہوگا جبکہ خلیفۂ امیرِ اہلسنت حضرت مولانا حاجی عبید رضا عطاری مدنی مدظلہ العالی کا خصوصی بیان رات 10:00 بجے شروع ہوگا۔

قرب و جوار میں رہنے والے تمام عاشقانِ رسول اس اجتماعِ میلاد میں خود بھی شرکت کریں اور دوسروں کو بھی شرکت کرنے کی دعوت دیں تاکہ زیادہ سے زیادہ لوگ اس اجتماعِ پاک میں شرکت کر سکیں۔ 

27 اگست 2026ء کو دعوتِ اسلامی کے زیرِ اہتمام بنگلہ دیش میں پُرخلوص جلوسِ میلاد کا انعقاد کیا گیا  جس میں عاشقانِ رسول اور دعوتِ اسلامی کے ذمہ داران کی بڑی تعداد اور رکنِ مرکزی مجلسِ شوریٰ حاجی مبین عطاری نے شرکت کی ۔

ذرائع سے ملنے والی معلومات کے مطابق پاکستان سے دینی دورے پر بنگلہ دیش آئے ہوئے خلیفۂ امیرِ اہلسنت حضرت مولانا حاجی عبید رضا عطاری مدنی مدظلہ العالی کی خصوصی طور پر شرکت ہوئی۔

جلوسِ میلاد کے دوران عاشقانِ رسول ہاتھوں میں سبز پرچم لہراتے اور بارگاہِ رسالت میں مدحت کے نذرانے (نعت شریف) پیش کرتے ہوئے آگے بڑھتے رہے۔ اس موقع پر فضا ” مرحبا یا مصطفیٰ صلی اللہ علیہ وآلہ وسلم “کے پرجوش نعروں سے گونج رہی تھی۔

جلوسِ میلاد کے اختتام پر ایک پروقار محفل کا منظر دیکھنے میں آیا جہاں خلیفۂ امیرِ اہلسنت مدظلہ العالی نے تمام شرکا و امتِ مسلمہ کی سلامتی اور اُن کی دینی و دنیوی فلاح کے لیے خصوصی دعا کروائی۔

26 اگست 2026ء کو بنگلہ دیش کے معروف شہر چٹاگانگ میں ایک عظیم الشان میلاد اجتماع کا انعقاد کیا گیا  جس میں ہزاروں کی تعداد میں عاشقانِ رسول نے شرکت کی جن میں علمائے کرام، طلبہ، اسکولز و کالجز کے اسٹوڈنٹس اور سیاسی و سماجی شخصیات سمیت مختلف شعبہ ہائے زندگی سے تعلق رکھنے والی اہم شخصیات شامل تھیں۔

اجتماع کا باقاعدہ آغاز تلاوتِ قرآنِ پاک اور نعتِ رسولِ مقبول صلی اللہ علیہ وآلہ وسلم سے کیا گیا جس کے بعد رکنِ مرکزی مجلسِ شوریٰ حاجی مبین عطاری نے سنتوں بھرا بیان کیا اور حاضرین کو سنتِ نبوی پر عمل پیرا ہونے کی ترغیب دلائی۔

بعد ازاں پاکستان سے خصوصی دورے پر بنگلہ دیش آئے ہوئے خلیفۂ امیرِ اہلسنت حضرت مولانا حاجی عبید رضا عطاری مدنی مدظلہ العالی نے میلادِ مصطفیٰ کی مناسبت سے سنتوں بھرا بیان کیا۔

خلیفۂ امیرِ اہلسنت مدظلہ العالی نے اپنے بیان میں آمدِ مصطفیٰ صلی اللہ علیہ وآلہ وسلم سے جڑے ایمان افروز واقعات اور میلاد شریف کی برکات بیان فرما کر حاضرین کے قلوب کو منور کیا۔

اجتماع کے اختتام پر نہایت دلکش منظر دیکھنے میں آیا جب تمام عاشقانِ رسول نے ” مرحبا یا مصطفیٰ صلی اللہ علیہ وآلہ وسلم “کے پرجوش نعروں کی گونج میں صبحِ بہاراں کا جشن منایا اور ایک دوسرے کو میلاد النبی صلی اللہ علیہ وآلہ وسلم کی مبارکباد پیش کی۔

امریکہ کی ریاست الینوائے کے شہر بلومنگٹن (Bloomington) میں دعوتِ اسلامی USA کے زیرِ اہتمام استقبالِ ربیع الاول اور ولادتِ با سعادت کے سلسلے میں کشتیوں (Boats) پر ایک پروقار اور یادگار جلوسِ میلاد کا انعقاد کیا گیا۔

مختلف ذرائع سے ملنے والی معلومات کے مطابق اس منفرد اور تاریخی کشتیوں کے جلوسِ میلاد میں مقامی مسلم کمیونٹی، عاشقانِ رسول، بچوں اور بزرگوں نے بڑی تعداد میں شرکت کی۔

شرکت کرنے والے عاشقانِ رسول نے نبی کریم صلی اللہ علیہ و اٰلہ و سلم کی ولادتِ با سعادت کی خوشی میں ذکر و اذکار، صلوٰۃ و سلام اور نعت خوانی کا اہتمام کیا جس سے پورا ماحول عشقِ رسول صلی اللہ علیہ و اٰلہ و سلم کے نعروں سے گونج اٹھا۔

جلوس میں بچوں سے لے کر بزرگوں تک نے یکساں جوش و جذبے کے ساتھ شرکت کی اور اس دن کو ایک یادگار و پرمسرت موقع بنا دیا۔

اس واٹر پروسیشن (Water Procession) کا بنیادی مقصد دیارِ غیر میں بھی آنے والی نسلوں کو سنتِ نبوی صلی اللہ علیہ و اٰلہ و سلم اور محبتِ رسول صلی اللہ علیہ و اٰلہ و سلم سے جوڑنا نیز امن و محبت کا پیغام عام کرنا تھا۔