دینِ اسلام کا سب سے بنیادی عقیدہ عقیدہِ توحید ہے یہی وہ عقیدہ ہے جس پر پورے دین کا اطلاق ہوتا ہے اور عقیدے پر ہی اسلام کی پوری عمارت قائم ہے۔اور تمام انبیاء کرام علیہم السلام کی دعوت کا مرکز عقیدہ ہی رہا ہے حضرت آدم علیہ السلام سے لیکر آخری نبی حضرت محمد مصطفیٰ  ﷺ تک جتنے انبیاء کرام علیہم السلام اس جہاں میں مبعوث فرمائے تمام نے اپنے احسن انداز میں فریضہ انجام دیتے ہوئے اپنی قوموں کو بہترین انداز میں اللہ عزوجل کی وحدانیت بیان فرمائی ۔ اللہ عزوجل نے قرآن مجید کی بیشتر آیات میں واضح الفاظ میں بیان فرمایا ہے کہ انبیاء کرام علیہم السلام کیسے اللہ عزوجل کی وحدانیت بیان فرمایا کرتے تھے ۔

وَ لَقَدْ بَعَثْنَا فِیْ كُلِّ اُمَّةٍ رَّسُوْلًا اَنِ اعْبُدُوا اللّٰهَ وَ اجْتَنِبُوا الطَّاغُوْتَۚ-فَمِنْهُمْ مَّنْ هَدَى اللّٰهُ وَ مِنْهُمْ مَّنْ حَقَّتْ عَلَیْهِ الضَّلٰلَةُؕ-فَسِیْرُوْا فِی الْاَرْضِ فَانْظُرُوْا كَیْفَ كَانَ عَاقِبَةُ الْمُكَذِّبِیْنَ(۳۶)

ترجمہ کنزالایمان : اور بےشک ہر امّت میں سے ہم نے ایک رسول بھیجا کہ اللہ کو پوجو اور شیطان سے بچو تو ان میں کسی کو اللہ نے راہ دکھائی اور کسی پر گمراہی ٹھیک اتری تو زمین میں چل پھر کر دیکھو کیسا انجام ہوا جھٹلانے والوں کا۔(سورۃ النحل :36)

تفسیر صراط الجنان :وَ لَقَدْ بَعَثْنَا فِیْ كُلِّ اُمَّةٍ رَّسُوْلًا:اور بیشک ہر امت میں ہم نے ایک رسول بھیجا ۔ یعنی جس طرح ہم نے تم میں محمد مصطفٰی ﷺ کو بھیجا اسی طرح ہر امت میں ہم نے ایک رسول بھیجا اور ہر رسول کو حکم دیا کہ وہ اپنی قوم سے فرمائیں کہ اے لوگو!اللہ عَزَّوَجَلَّ کی عبادت کرو اور شیطان کی پیروی کرنے سے بچو تو ان اُمتوں میں کسی کو اللہ تعالیٰ نے ہدایت دیدی تووہ ایمان سے مشرف ہوئے اور کسی پر علمِ الٰہی میں گمراہی ثابت ہوگئی تووہ اپنی اَزلی شقاوت کی وجہ سے کفر پر مرے اور ایمان سے محروم رہے۔ اے کفارِ مکہ! تم زمین میں چل پھر کر دیکھو کہ اپنے رسولوں عَلَیْہِمُ الصَّلٰوۃُ وَالسَّلَام کو جھٹلانے والوں کاکیسا انجام ہوا؟ انہیں اللہ تعالیٰ نے ہلاک کر دیا اور اُن کے شہر ویران کر دئیے ،ان کی اجڑی ہوئی بستیاں اُن کی بربادی کی خبر دیتی ہیں ،اس کو دیکھ کر سمجھو کہ اگر تم بھی اُن کی طرح کفر و تکذیب پر مُصِر رہے تو تمہارا بھی ایسا ہی انجام ہونا ہے۔ (خازن، النحل، تحت الآیۃ: ۳۶، ۳ / ۱۲۲، مدارک، النحل، تحت الآیۃ: ۳۶، ص۵۹۵، جلالین، النحل، تحت الآیۃ: ۳۶، ص۲۱۸، ملتقطاً)

اس آیت سے معلوم ہوا کہ توحید تمام انبیاء کرام کی دعوت کا مرکز رہا ہے اور اسی میں ہی امت کی بھلائی ہے۔

دوسری جگہ ارشاد خداوندی ہے :وَ اِلٰهُكُمْ اِلٰهٌ وَّاحِدٌۚ-لَاۤ اِلٰهَ اِلَّا هُوَ الرَّحْمٰنُ الرَّحِیْمُ۠(۱۶۳)

ترجمۂ کنزالایمان:اور تمہارا معبود ایک معبود ہے اس کے سوا کوئی معبود نہیں مگر وہی بڑی رحمت والا مہربان۔ (سورۃ البقرۃ:163)

تفسیر صراط الجنان:وَ اِلٰهُكُمْ اِلٰهٌ وَّاحِدٌ: اور تمہارا معبود ایک معبود ہے۔ کفار نے حضورِ اقدس صَلَّی اللہُ تَعَالٰی عَلَیْہِ وَاٰلِہٖ وَسَلَّمَ سے اللہ تعالیٰ کی شان و صفت معلوم کی تو یہ آیت مبارکہ نازل ہوئی کہ تمہارا معبودایک معبود ہے۔(خازن، البقرۃ، تحت الآیۃ: ۱۶۳، ۱ / ۱۰۸)

نہ اس کے اجزاء ہیں ، نہ کوئی اس کی مثل ہے ، معبود و رب ہونے میں کوئی اس کا شریک نہیں ، وہ اپنی ذات و صفات اور افعال میں یکتا ہے، مخلوق کو تنہا اسی نے بنایا، وہ اپنی ذات میں اکیلا ہے۔

اور احادیث مبارکہ سے بھی ثابت ہے اور بیشتر احادیث طیبہ میں ذکر ہوا ہے کہ حضور نبی اکرم خاتم النبیین ﷺ کیسے اللہ پاک کی توحید کا بیان فرماتے تھے چنانچہ :

عَنْ عُمَرَ بْنِ الْخَطَّابِ رَضِيَ اللَّهُ عَنْهُ قَالَ: بَيْنَمَا نَحْنُ عِنْدَ رَسُولِ اللَّهِ صَلَّى اللَّهُ عَلَيْهِ وَسَلَّمَ ذَاتَ يَوْمٍ إِذْ طَلَعَ عَلَيْنَا رَجُلٌ شَدِيدُ بَيَاضِ الثِّيَابِ شَدِيدُ سَوَادِ الشَّعْرِ لَا يُرٰى عَلَيْهِ أَثَرُ السَّفَرِ وَلَا يَعْرِفُهُ مِنَّا أَحَدٌ حَتَّى جَلَسَ إِلَى النَّبِيِّ صَلَّى اللَّهُ عَلَيْهِ وَسَلَّمَ فأسند رُكْبَتَيْهِ إِلَى رُكْبَتَيْهِ وَوَضَعَ كَفَّيْهِ عَلَى فَخِذَيْهِ وَقَالَ: يَا مُحَمَّدُ أَخْبِرْنِي عَنِ الْإِسْلَامِ قَالَ:الْإِسْلَامُ أَنْ تَشْهَدَ أَنْ لَا إِلَهَ إِلَّا اللَّهُ وَأَنَّ مُحَمَّدًا رَسُولُ اللَّهِ

روایت ہے حضرت عمر ابن خطاب( رضی اللہ عنہ) سے فرماتے ہیں کہ ایک دن ہم نبی ﷺ کی خدمت میں حاضرتھے کہ ایک صاحب ہمارے سامنےنمودارہوئے جن کے کپڑے بہت سفیداور بال خوب کالے تھے اُن پر آثارِ سفر ظاہر نہ تھے اور ہم سےکوئی اُنہیں پہچانتا بھی نہ تھایہاں تک کہ حضور( ﷺ ) کے پاس بیٹھے اور اپنے گھٹنے حضور( ﷺ ) کےگھٹنوں شریف سے مَس کر دیئےاور اپنے ہاتھ اپنے زانو پر رکھےاور عرض کیا اَےمحمد( ﷺ )مجھے اسلام کے متعلق بتائیے فرمایا کہ اسلام یہ ہے کہ تم گواہی دو کہ اللہ کےسواءکوئی معبودنہیں اورمحمداللہ کے رسول ہیں۔(مرآۃ المناجیح شرح مشکوٰۃ المصابیح ج1 ،حدیث نمبر1)

وَعَنِ ابْنِ عُمَرَ رَضِيَ اللّٰهُ عَنْهُمَا قَالَ: قَالَ رَسُولُ الله صَلَّى اللّٰهُ عَلَيْهِ وَسَلَّمَ : أُمِرْتُ أَنْ أُقَاتِلَ النَّاسَ حَتَّى يَشْهَدُوْا أَنْ لَا إِلَهَ إِلَّا اللّٰهُ وَأَنَّ مُحَمَّدًا رَسُولُ اللهِ

روایت ہے ابن عمر رضی اللہ عنہما سے فرماتے ہیں کہ فرمایا رسول الله ﷺ نےکہ مجھے حکم دیا گیا کہ لوگوں سے جنگ کروں تاکہ گواہی دیں کہ رب کے سواکوئی معبودنہیں اورمحمد الله کے رسول ہیں۔(مرآۃ المناجیح شرح مشکوٰۃ المصابیح جلد:1 ،حدیث نمبر:12)

ان آیات کریمہ اور احادیث طیبہ سے ہمیں یہ سیکھنے کو ملتا ہے کہ اسلام کی اصل توحید ہے۔اور یہ توحید نبی اکرم ﷺ اور تمام انبیاء کرام علیہم السلام کا دعوت کا مرکز رہا ہے۔تو ہمیں بھی چائیے کہ ہم اپنے عقیدے کی درست اصلاح کریں علم دین حاصل کریں علمائے کرام کی صحبت میں رہیں ان کے درس و بیان میں شرکت کو یقینی بنائے۔بدمذہبوں کی بیٹھک سے دور رہیں۔ان شاء اللہ اللہ نے چاہا اسی میں کامیابی حاصل ہوگی۔

اللہ پاک ہمیں عمل کی توفیق عطا فرمائے آمین بجاہ النبی الامین۔

جس طرح ایک انسان کا زندہ رہنے کے لیے سانس کا ہونا ضروری ہے اور جس طرح ایک انسان کو اپنی دنیا بہتر کرنے کے لیے دنیا کے تمام سہولت کا دستیاب ہونا ضروری ہے اسی طرح آخرت میں سرخرو ہونے کے لیے آخرت میں وہ نعمت والا گھر یعنی جنت حاصل کرنے کے لیے آخرت میں اپنے آپ کو نیک متقین پرہیزگار صالحین اور اللہ کے پسندیدہ بندوں میں شامل ہونے کے لیے ضروری ہے کہ بندہ رب کی وحدانیت پر ایمان رکھتا ہو رب تعالی کی وحدانیت کے متعلق حدیث مبارکہ ۔

حضرتِ سَیِّدُنااَبو نجیح عَمْرو بِن عَبَسَہ سُلَمِي رَضِیَ اللہُ تَعَالٰی عَنْہُ فرماتے ہیں کہ میں زمانۂ جاہلیت میں یہ گمان کرتا تھا کہ لوگ گمراہی میں پڑے ہیں اور وہ کسی صحیح دین پر نہیں ہیں ۔ وہ بتوں کی پوجا کرتے ہیں پھر میں نے سنا کہ مکے میں کوئی شخص ہے جو کہ خبریں دیتاہے ۔ میں اپنی سواری پر بیٹھا اور ان کے پاس پہنچ گیاوہاں رسولُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم کسی خفیہ مقام پر تھے اور اُن کی قوم اُن پر دلیر تھی ، میں حیلے بہانے سے مکے میں اُن تک پہنچ گیا ، میں نے اُن سے عرض کی : ’’آپ کون ہیں؟ ‘‘ انہوں نے فرمایا : ” میں نبی ہوں ۔ “ میں نے پوچھا : ’’ نبی کسے کہتے ہیں؟ ‘‘ فرمایا : ” مجھےاللہ عَزَّوَجَلَّ نے بھیجا ہے ۔ “ میں نے عرض کی : ’’اللہ عَزَّ وَجَلَّ نے آپ کو کیا چیز دے کر بھیجا ہے ؟ ‘‘ فرمایا : ”اللہ عَزَّوَجَلَّ نے مجھے صلہ رحمی ، بت شکنی ، توحید اوراللہ عَزَّوَجَلَّ کے ساتھ کسی کو شریک نہ کرنے کے پیغام کے ساتھ بھیجا ہے ۔ “ میں نے عرض کی : ’’اِس دین پر آپ کے ساتھ کون کون ہے ؟ ‘‘ فرمایا : ” آزاد اور غلام ۔ “ ( حضورصَلَّی اللہُ تَعَالٰی عَلَیْہِ وَاٰلِہٖ وَسَلَّم کے ساتھ اُس وقت حضرت سَیِّدُنَا ابو بکر صدیق اور سَیِّدُنَا بلال رَضِیَ اللہُ تَعَالٰی عَنْہُمَا تھے ۔ ) میں نے عرض کی : ’’میں آپ کی پیروی کرتا ہوں ۔ ‘‘ آپ صَلَّی اللہُ تَعَالٰی عَلَیْہِ وَاٰلِہٖ وَسَلَّم نے ارشادفرمایا : ” ابھی تم اِس کی استطاعت نہیں رکھتے ، کیا تم میرا اور میرے ساتھیوں کا حال نہیں دیکھ رہے ؟ بلکہ ابھی تم اپنے گھر والوں کے پاس لوٹ جاؤ جب تم سنو کہ مجھے غلبہ حاصل ہوگیا ہے تو میرے پاس آجانا ۔ “حضرت سَیِّدُنَاعَمرو رَضِیَ اللہُ تَعَالٰی عَنْہُ کہتے ہیں کہ میں اپنے گھر چلا گیا اور بعد ازاں رسول اکرم صَلَّی اللہُ تَعَالٰی عَلَیْہِ وَاٰلِہٖ وَسَلَّم ہجرت کرکے مدینہ منورہ تشریف لے گئے ۔ میں اپنے گھر پر تھا اور میں آپ عَلَیْہِ السَّلَام کی مدینہ منورہ تشریف آوری کے بعد لوگوں سے آپ کے بارے میں معلومات کرتا رہتا ، حتی کہ میرے خاندان کے کچھ لوگ مدینے شریف سے میرے پاس آئے تو میں نے اُن سے پوچھا : ’’جو صاحب مدینے تشریف لائے ہیں ان کا کیا حال ہے ؟ ‘‘ انہوں نے بتایا : ’’ لوگ تیزی سے ان کی دعوت قبول کر رہے ہیں ، اُن کی قوم نے انہیں قتل کرنا چاہا لیکن وہ ایسا نہ کرسکے ۔ ‘‘ حضرت عَمرو بن عبسہ رَضِیَ اللہُ تَعَالٰی عَنْہُ کہتے ہیں کہ پس میں مدینے پہنچ گیا ، میں نے حضورصَلَّی اللہُ تَعَالٰی عَلَیْہِ وَاٰلِہٖ وَسَلَّم کی بارگاہ میں حاضر ہوکر عرض کی : ’’یارسولَ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم ! کیا آپ مجھے پہچانتے ہیں؟ ‘‘رسولُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم نے فرمایا : ” ہاں تم مجھے مکے میں ملے تھے ۔ “ میں نے عرض کی : ’’یارسولَ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم ! مجھے اُن چیزوں کے بارے میں بتائیں جواللہ عَزَّوَجَلَّ نے آپ کو بتائی ہیں اور جنہیں میں نہیں جانتا ، مجھے نمازکے بارے میں بتائیں ۔ ‘‘رسولُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم نے فرمایا : ” صبح کی نماز پڑھو ، پھر اس وقت تک نماز سے رُکے رہو جب تک سورج ایک نیزے کے برابر بلند نہ ہوجائے کیونکہ سورج شیطان کے سینگوں کے درمیان طلوع ہوتا ہے اور اُس وقت کافر اُس کو سجدے کرتے ہیں ، پھر نماز پڑھو کیونکہ اس وقت فرشتے نماز میں حاضر ہوتے اور گواہی دیتے ہیں یہاں تک کہ جب سایہ نیزے کی مقدار سے کم ہوجائے تو اُس کے بعد نماز سے رُک جاؤکیونکہ اس وقت جہنم بھڑکائی جاتی ہے ، پھر جب سورج ڈھل جائے تو نماز پڑھو کیونکہ نماز میں فرشتے حاضر ہوتے ہیں اور گواہی دیتے ہیں یہاں تک کہ تم عصر کی نماز پڑھو ، پھر نماز سے رُکے رہو یہاں تک کہ سورج غروب ہوجائے کیونکہ سورج شیطان کے سینگوں کے درمیان غروب ہوتا ہے اور اُس وقت کفار اُسے سجدہ کرتے ہیں ۔ “ حضرت سَیِّدُنَاعَمرو بن عبسہ رَضِیَ اللہُ تَعَالٰی عَنْہُ فرماتے ہیں کہ میں نے عرض کی : ’’یارسولَ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم ! مجھے وضو کے بارے میں بتائیے ۔ ‘‘ فرمایا : ” تم میں سے جو شخص بھی وضو کا پانی لے کر کلی کرتا ہے ، پھر ناک میں پانی ڈالتا ہے اور ناک صاف کرتا ہے تو اُس کے چہرے ، منہ اور ناک کے گناہ جھڑ جاتے ہیں ، پھر جب وہ حکم الٰہی کے مطابق اپنا چہرہ دھوتا ہے تو داڑھی کے اَطراف سے چہرے کے گناہ پانی کے ساتھ گِر جاتے ہیں پھر جب وہ اپنے ہاتھ کہنیوں تک دھوتا ہے تو اُس کے ہاتھوں کے گناہ انگلیوں سے پانی کے ساتھ گر جاتے ہیں پھر اپنے سر کا مسح کرتا ہے تو اس کے سر کے گناہ بالوں کے کناروں سے پانی کے ساتھ بہہ جاتے ہیں ، پھر وہ اپنے پاؤں ٹخنوں سمیت دھوتا ہے تو اس کے پیروں کے گناہ انگلیوں سے پانی کے ساتھ گر جاتے ہیں ، پھر اگر وہ کھڑے ہوکر نماز پڑھے اوراللہ عَزَّوَجَلَّ کی ایسی حمد و ثناء کرے جو اس کی شان کے لائق ہے اور اپنے دل کواللہ عَزَّوَجَلَّ کے لیے تمام چیزوں سے فارغ کرے تو وہ گناہوں سے ایسا پاک ہوجاتا ہے جیسے اُس دن تھا جس دن اس کی ماں نے اسے جنا تھا ۔ “

حضرت سَیِّدُنَاعَمرو بن عبسہ رَضِیَ اللہُ تَعَالٰی عَنْہُ نے یہ حدیث صحابی رسول حضرت سَیِّدُنَا ابو امامہ رَضِیَ اللہُ تَعَالٰی عَنْہُ کو سنائی تو ابو امامہ رَضِیَ اللہُ تَعَالٰی عَنْہ نے کہا : ” اے عَمْرو ! دیکھو تم کیا کہہ رہے ہو ، کیا ایک ہی جگہ پر ( ایک ہی عمل سے ) کسی کو اتنا اجر مل سکتا ہے ؟“حضرت سَیِّدُنَاعَمرو بن عبسہ رَضِیَ اللہُ تَعَالٰی عَنْہُ نے کہا : ” اے ابو امامہ ! میں بوڑھا ہوچکا ہوں ، میری ہڈیاں کمزور ہو چکی ہیں ، میری موت کا وقت قریب آچکا ہے ، اس حالت میں مجھے کیا ضرورت کہ میں اللہ عَزَّوَجَلَّ اور اس کے رسول صَلَّی اللہُ تَعَالٰی عَلَیْہِ وَاٰلِہٖ وَسَلَّم پر جھوٹ باندھوں ، اگر میں نے یہ حدیث رسولُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم سے ایک بار ، دو بار ، تین بار حتّٰی کہ سات بار تک نہ سنی ہوتی تو میں اس حدیث کو کبھی بیان نہ کرتا بلکہ میں نے تو یہ حدیث سات بار سے بھی زیادہ سُنی ہے ۔ “(فیضان ریاض الصالحین جلد:4 ، حدیث نمبر:438 )

حدیث مبارکہ کی تشریح ۔ یہ حدیث مبارکہ مکمل ذکر کی گئی ہے اس میں کئی پہلوؤں کا بیان ہے حدیث مبارکہ کے شروع میں وہ باتیں ذکر کی گئی ہیں جس کا تعلق ہمارے موضوع سے ہے جس میں یہ بیان کیا گیا ہے کہ نبیوں کا تشریف لانا نبیوں کا بھیجا جانا رسولوں کا تشریف لانا ان تمام کو اگر ہم دیکھیں تو ان تمام سے ایک ہی بات معلوم ہوگی کہ یہ تمام محض رب تعالی کی وحدانیت کو بیان کرنے اور رب کے بندوں کو رب سے ملوانے اور رب کی طرف لوٹنے کے لیے مبعوث فرمائے گئے ۔

رب تعالی سے دعا ہے کہ میں نے یہ جو کچھ لکھا اس کو اپنی پاک بارگاہ میں قبول فرمائے اور مجھے اور تمام مسلمانوں کو مرتے دم تک رب کی وحدانیت پر قائم و دائم رہنے کی توفیق عطا فرمائے اور جو رب کی وحدانیت کا انکار کرتے ہیں اگر ان کی قسمت میں ہدایت ہے تو ان ہدایت عطا فرمائے وگرنہ انہیں نست و نعبوت فرمائے آمین۔

توحید اسلام کی بنیاد اور سب سے اہم عقیدہ ہے نبی کریم ﷺ نے سب سے پہلے لوگوں کو یہی پیغام دیا کہ اللہ کے سوا کوئی معبود نہیں۔ چنانچہ نبی کریم  ﷺ نے کئی مقامات پر توحید کو ذکر کیا ہے ہم یہاں کچھ احادیث پیش کرتے ہیں:

عَنْ عُثْمَانَ، قَالَ: قَالَ رَسُولُ اللّٰهِ ﷺ: مَنْ مَاتَ وَهُوَ يَعْلَمُ أَنَّهُ لَا إِلَهَ إِلَّا اللّٰهُ، دَخَلَ الْجَنَّةَ۔

حضرت عثمان رضی اللہ عنہ سے روایت ہے وہ کہتے ہیں کہ رسول اللہﷺ نے فرمایا: ’’جو شخص اس حال میں مرا کہ وہ اس بات کو اچھی طرح جانتا تھا کہ اللہ کے علاوہ کوئی بھی الٰہ نہیں(یعنی عقیدۂ توحید کو اچھی طرح سمجھتا تھا اور اسی عقیدہ پر موت تک قائم رہا) تو وہ شخص جنت میں داخل ہوگا۔(صحیح مسلم :۲۶)

عَنْ جَابِرٍ،قَالَ أَتَي النَّبِيَّ صلى اللّٰه عليه وسلم رَجُلٌ فَقَالَ يَا رَسُولَ اللّٰهِ مَا الْمُوجِبَتَانِ فَقَالَ: مَنْ مَاتَ لَا يُشْرِكُ بِاللّٰهِ شَيْئًا دَخَلَ الْجَنَّةَ وَمَنْ مَاتَ يُشْرِكُ بِاللّٰهِ شَيْئًا دَخَلَ النَّارَ۔

حضرت جابر رضی اللہ عنہ سے روایت ہے کہ نبی ﷺ کے پاس ایک شخص آیا اس نے آکر عرض کیا کہ اے اللہ کے رسول ﷺ وہ کون سی دوچیزیں ہیں جوواجب کردینے والی ہیں (ایک چیز جنت کو واجب کرنے والی اور ایک چیز جہنم کو واجب کردینے والی ہے) آپ ﷺنے فرمایا: ’’جو شخص اس حال میں فوت ہوا کہ وہ اللہ کے ساتھ کسی کو شریک نہیں کرتا تھا وہ جنت میں داخل ہوگا اور جوشخص اس حال میں فوت ہوا کہ وہ اللہ کے ساتھ کسی کو شریک کیا کرتا تھا تو وہ جہنم میں داخل ہوگا‘‘۔(صحیح مسلم:۹۳)

عَنْ عُبَادَةَ بْنِ الصَّامِتِ قال سَمِعْتُ رَسُولَ اللّٰهِ صلى اللّٰه عليه وسلم يَقُولُ:مَنْ شَهِدَ أَنْ لَا إِلٰهَ إِلاَّ اللّٰهُ وَأَنَّ مُحَمَّدًا رَسُولُ اللّٰهِ حَرَّمَ اللّٰهُ عَلَيْهِ النَّار۔

عبادہ بن صامت رضی اللہ عنہ کہتے ہیں میں نے رسول اللہﷺسے سنا آپ نے فرمایا :’’جس شخص نے یہ گواہی دی کہ اللہ کے سوا کوئی معبود نہیں اور محمد(ﷺ)اللہ کے رسول ہیں تو اللہ نے اس پر جہنم کی آگ کو حرام کردیا‘‘۔ (صحیح مسلم:۲۹)

عَنِ ابْنِ عُمَرَ،رَضِيَ اللّٰهُ عَنْهُمَا قَالَ: قَالَ رَسُولُ اللّٰه ِﷺ بُنِيَ الإِسْلَامُ عَلٰي خَمْسٍ:شَهَادَةِ أَنْ لَا إِلٰهَ إِلَّا اللّٰهُ وَأَنَّ مُحَمَّدًا رَسُولُ اللّٰهِ،وَإِقَامِ الصَّلَاةِ،وَإِيتَائِ الزَّكَاةِ،وَالحَجِّ،وَصَوْمِ رَمَضَانَ

حضرت عبداللہ بن عمر رضی اللہ عنہما سے روایت کی کہ رسول اللہ ﷺ نے فرمایا :’’اسلام کی بنیاد پانچ چیزوں پر قائم کی گئی ہے۔اول گواہی دینا کہ اللہ کے سوا کوئی معبود نہیں اور بے شک حضرت محمد ﷺاللہ کے سچے رسول ہیں اور نماز قائم کرنا اور زکوٰۃ ادا کرنا اور حج کرنا اور رمضان کے روزے رکھنا‘‘۔(صحیح بخاری:۸)

مذکورہ حدیث میں تمام اعمال و عبادات میں توحید ہی کا ذکر مقدم ہے تو پتہ یہ چلا کہ اولین ذکر و شرط توحید ہے اس کے بغیر کوئی بھی عبادت قابل قبول نہیں۔

ان احادیث سے ہمیں یہ بھی معلوم ہوتا ہے اللہ کے ساتھ شرک نہ کرنا سب سے اہم عمل، شرک سب سے بڑا گناہ ہے، توحید اسلام کی بنیاد ہے۔

کیا ایک سلطنت کے دو بادشاہ ہو سکتے ہیں؟تو جواب یقیناً نہ ہوگا کیونکہ جس طرح ایک معمولی سی ریاست، ایک شہر یا ایک گھر کے دو سربراہ نہیں ہو سکتے کیونکہ ان کے الگ الگ ارادے اور الگ الگ احکامات نظام کو درہم برہم کر دیں گے، بالکل اسی طرح یہ اتنی بڑی کائنات جس میں کروڑوں ستارے، کہکشائیں، زمین و آسمان اور ہم سب شامل ہیں کسی ایک ہی 'حاکمِ اعلیٰ' کے حکم سے چل رہی ہے۔اگر یہاں ایک سے زیادہ خدا ہوتے، تو کائنات میں امن کے بجائے جنگ ہوتی۔ ایک کہتا سورج مشرق سے نکلے، دوسرا کہتا مغرب سے۔ ایک زندگی چاہتا، دوسرا موت۔ لیکن ہم دیکھتے ہیں کہ یہاں ہر چیز ایک مکمل نظم و ضبط میں ہے۔اسی طرح ہمیں حضور  ﷺ کی کثیر احادیث طیبہ میں بھی اللہ جل مجده کو وحدہ لاشریک ماننے کا حکم آیا۔تو آئیے اسے ہم مضمون کے موضوع کے مطابق حدیث پاک کی روشنی میں جانتے ہیں۔

حضرت عبداللہ ابن عمر رضی اللہ عنہ نبی اکرم ﷺ کا یہ فرمان نقل کرتے ہیں: اسلام کی بنیادی احکام پانچ ہیں اس بات کی گواہی دینا کہ اللہ تعالی کے سوا کوئی معبود نہیں اور حضرت محمد ﷺ اس کے بندے اور اس کے رسول ہیں،نماز پڑھنا، زکوۃ ادا کرنا، حج کرنا اور رمضان میں روزے رکھنا۔(صحیح مسلم،حدیث نمبر21)

حضرت عثمان رضی اللہ عنہ نبی اکرم ﷺ کا یہ فرمان نقل کرتے ہیں:جو شخص مرتے وقت اس بات کا یقین رکھتا ہو کہ اللہ تعالی کے سوا کوئی اور عبادت کے لائق نہیں ہے وہ شخص جنت میں داخل ہوگا۔(صحیح مسلم شریف،حدیث نمبر 44)

حضرت معاذ بن جبل رضی اللّہ عنہ بیان کرتے ہیں ایک مرتبہ میں نبی اکرم ﷺ کے کے ہمراہ "عفیر" نامی گدھے پر سوار تھا آپ ﷺ نے فرمایا: اے معاذ! کیا تم جانتے ہو کہ اللہ تعالی کا بندوں پر کیا حق ہے اور بندوں کا اللہ تعالی پر کیا حق ہے؟ میں عرض کی' اللہ اور اس کا رسول ﷺ بہتر جانتے ہیں آپ نے فرمایا: بندوں پر اللہ تعالی کا حق یہ ہے‘ وہ اسی کی عبادت کریں اور کسی کو اس کا شریک نہ سمجھیں اور اللہ تعالی پر بندوں کا یہ حق ہے کہ جب وہ کسی کو اس کا شریک نہ سمجھیں تو اللہ تعالی انہیں عذاب میں مبتلا نہ کرے (حضرت معاذ کہتے ہیں) میں نے عرض کی‘ یا رسول اللہ ﷺ ! میں لوگوں کو یہ خوشخبری سنا دوں؟ تو آپ ﷺ نے فرمایا: انہیں یہ خوشخبری نہ سناؤ ورنہ وہ اسی بات پر تکیہ کر لیں گے۔(صحیح مسلم،حدیث نمبر 52)

"حضرت ابو ہریرہ رضی اللہ عنہ بیان کرتے ہیں’ نبی اکرم صلی اللہ علیہ نے اپنے چچا (ابو طالب) سے کہا تھا’ آپ لا الہ الا اللہ پڑھ لیں’ میں قیامت کے دن آپ کے حق میں اس کے اعتراف کی گواہی دوں گا تو ابو طالب نے جواب دیا: اگر مجھے قریش کے طعنوں کا اندیشہ نہ ہوتا تو میں یہ اعتراف کر کے تمہاری انکھوں کی ٹھنڈک (یعنی تمہاری خوشی) کا سامان کر دیتا ہے مگر قریش کہیں گے’ میں موت کے ڈر سے مسلمان ہو گیا تھا(راوی کہتے ہیں اس موقع پر) اللہ تعالی نے یہ آیت نازل فرمائی: "(اے نبی!) تم جسے پسند کرتے ہو' اسے تم ہدایت نہیں دے سکتے لیکن اللہ جسے چاہے ہدایت دے سکتا ہے۔(صحیح مسلم،حدیث نمبر43)

احادیثِ مبارکہ کی روشنی میں یہ واضح کیا گیا ہے کہ:اسلام کی اساس: اسلام کی عمارت پانچ ستونوں پر قائم ہے، جن میں سب سے پہلا اور بنیادی ستون اللہ کی وحدانیت اور رسول اللہ ﷺ کی رسالت کی گواہی دینا ہے۔

نجات کا ذریعہ: جو شخص اس یقین کے ساتھ مرا کہ اللہ کے سوا کوئی عبادت کے لائق نہیں، وہ یقیناً جنت کا حقدار قرار پائے گا۔

خالق حقیقی کا وجود ماننے کی طرح اس کی توحید پر ایمان لانا بھی کائنات کے فطری تقاضوں میں سے ایک تقاضا ہے توحید کا معنی یہ ہے کہ اللہ تعالیٰ کو اس کی ذات اور صفات میں شریک سے پاک ماننا یعنی جیسے اللہ تعالیٰ ہے ویسا ہم کسی کو نہ مانے اور ذہن وگمان میں آنے والی ہر چیز سے اللہ کی ذات کو یکتا سمجھنا۔ آ ئیے توحید کی نبوی تعلیمات ملاحظہ فرمائیں۔

( 1 ) آگ کا حرام ہونا :آقا کریم صلی اللہ تعالی علیہ وسلم نے فرمایا جو گواہی دے کے اللہ کے سوا کوئی لائق عبادت نہیں اور یقینا محمد مصطفی صلی اللہ تعالی علیہ وسلم اللہ کے رسول ہیں اللہ تعالی اس پر آگ حرام کرے گا۔(کتاب : صحیح مسلم شریف ،باب الایمان: جلد نمبر : 1 ، صفحہ نمبر : 57 ، حدیث نمبر :47 )

( 2 ) ان کا حساب اللہ کے ذمے ہے :نبی کریم صلی اللہ تعالی علیہ والہ وسلم نے فرمایا مجھے حکم دیا گیا ہے کہ لوگوں سے جنگ کروں یہاں تک کہ گواہی دیں کہ رب کے سوا کوئی معبود نہیں اور پیارے آقا صلی اللہ تعالی علیہ والہ وسلم اللہ کے رسول ہیں اور نماز قائم کریں اور زکوۃ دیں جب یہ کر لیں گے تو مجھ سے اپنے خون و مال بچا لیں گے سوائے اسلامی حق کے اور ان کا حساب اللہ کے ذمے ہے ۔( ابو داؤد فی سنن ،باب الایمان : جلد نمبر : 3 ، صفحہ نمبر : 101 ، حدیث نمبر : 2641 )

( 3 ) ایمان کی ادنی شاخ : نبی کریم صلی اللہ تعالیٰ علیہ وسلم نے فرمایا ایمان کی چند اور ستر شاخیں ہیں ان سب میں اعلیٰ یہ کہنا ہے کہ اللہ کے سوا کوئی معبود نہیں اور سب سے ادنیٰ تکلیف دہ چیز کا راستہ سے ہٹانا ہے اور غیرت بھی ایمان کی شاخ ہے۔(صحیح مسلم شریف ، باب الایمان :جلد نمبر :1 ، حدیث نمبر : 58 ، صفحہ نمبر : 63 )

(4) اسلام کا قائم ہونا : پیارے پیارے آقا صلی اللہ تعالی علیہ والہ وسلم نے ارشاد فرمایا کہ اسلام پانچ چیزوں پر قائم کیا گیا اس کی گواہی کے اللہ کے سوا کوئی معبود نہیں محمد صلی اللہ تعالی علیہ والہ وسلم اس کے بندے اور رسول ہیں اور نماز قائم کرنا اور زکوۃ دینا اور حج کرنا اور رمضان کے روزے رکھنا ۔(صحیح بخاری شریف ، باب الایمان: جلد نمبر : 1 ، حدیث نمبر : 8 ، صفحہ نمبر : 49 )

( 5 ) جنتی مرد کو دیکھ لو : ایک دیہاتی نبی کریم صلی اللہ تعالی علیہ وسلم کی خدمت میں حاضر ہو کر عرض گزار ہوا کہ مجھے ایسے کام کی ہدایت فرمائیے کہ میں وہ کروں تو جنتی ہو جاؤں فرمایا اللہ کو پوجو اس کا کسی کو شریک نہ ٹھہراؤ نماز قائم کرو اور زکوۃ فرض دو رمضان کے روزے رکھو وہ بولا قسم اس کی کہ جس کے قبضہ میں میری جان ہے کبھی اس سے کچھ گھٹاؤں بھڑاؤں گا نہیں پھر جب وہ چل دیا تو نبی کریم ﷺ نے فرمایا جو جنتی مرد کو دیکھنا چاہے اسے دیکھ لے ۔( صحیح بخاری باب الایمان جلد نمبر: 3 صفحہ نمبر: 261 حدیث نمبر ہے: 1397)

پیارے پیارے اسلام بھائیو! اللہ تعالی اپنی ذات اور صفات میں کسی کا محتاج نہیں اللہ تعالی کا وجود کسی کا دیا ہوا نہیں ہے بلکہ وہ اپنے وجود میں مستقل ہے تو ہمارا یہ عقیدہ ہونا چاہیے کہ اللہ تعالی واجب الوجود ہے اور اس کے علاوہ کوئی بھی واجب الوجود نہیں اللہ تعالی کے علاوہ کسی دوسرے کو مستحق عبادت نہ مانا جائے اللہ عزوجل سے دعا ہے اس پر عمل کرنے کی توفیق عطا فرمائے۔

اسلام کی بنیاد جس عظیم عقیدے پر قائم ہے وہ عقیدۂ توحید ہے۔ توحید کا معنی یہ ہے کہ اللہ تبارک و تعالیٰ کو ذات، صفات، افعال اور عبادت میں یکتا مانا جائے۔ یہی وہ بنیادی عقیدہ ہے جس کی تبلیغ تمام انبیاءِ کرام علیہم السلام نے فرمائی۔تمام انبیاء و رسل علیہم السلام کو مبعوث فرمانے کی بنیادی حکمت یہ تھی کہ اللہ تبارک و تعالیٰ کی وحدانیت کو ثابت کیا جائے اور اخلاص کے ساتھ صرف اسی کی عبادت کی جائے۔ لہٰذا تمام انبیاءِ کرام علیہم السلام کے عقائد متفق ہیں، یعنی کسی بھی نبی علیہ السلام کے دین میں شرک جائز نہیں تھا۔

سجدۂ تعظیمی سابقہ انبیاءِ کرام علیہم السلام کی بعض شریعتوں میں جائز تھا، لیکن سجدۂ تعبدی کسی بھی نبی علیہ السلام کی شریعت میں جائز نہیں تھا۔ جبکہ شریعتِ محمدیہ میں سجدۂ تعظیمی ہو یا سجدۂ تعبدی، دونوں ناجائز ہیں۔اللہ تبارک و تعالیٰ نے قرآنِ مجید میں بارہا اپنی وحدانیت کو بیان فرمایا ہے۔ آئیے! توحید کا بیان سب سے پہلے رب تعالیٰ کے کلامِ پاک سے سنتے ہیں۔اللہ تعالیٰ قرآنِ مجید میں ارشاد فرماتا ہے:

وَ مَاۤ اَرْسَلْنَا مِنْ قَبْلِكَ مِنْ رَّسُوْلٍ اِلَّا نُوْحِیْۤ اِلَیْهِ اَنَّهٗ لَاۤ اِلٰهَ اِلَّاۤ اَنَا فَاعْبُدُوْنِ(۲۵)

ترجمۂ کنزُالعِرفان: اور ہم نے تم سے پہلے کوئی رسول نہ بھیجا مگر یہ کہ ہم اس کی طرف وحی فرماتے رہے کہ میرے سوا کوئی معبود نہیں تو میری ہی عبادت کرو۔(سورۃ الانبیاء، آیت: 25)

تفسیر صراط الجنان:وَ مَاۤ اَرْسَلْنَا مِنْ قَبْلِكَ مِنْ رَّسُوْلٍ اِلَّا:اور ہم نے تم سے پہلے کوئی رسول نہ بھیجا مگر۔ ارشاد فرمایا کہ اے حبیب! صَلَّی اللہ تَعَالٰی عَلَیْہِ وَاٰلِہٖ وَسَلَّمَ، ہم نے آپ سے پہلے جس امت کی طرف کوئی رسول اور نبی بھیجا، ہم اس کی طرف وحی فرماتے رہے کہ زمین و آسمان میں میرے علاوہ کوئی معبود نہیں جو عبادت کیے جانے کا مستحق ہو، تو اخلاص کے ساتھ میری عبادت کرو اور صرف مجھے ہی معبود مانو۔

لہٰذا اس آیتِ مبارکہ سے واضح طور پر ثابت ہوتا ہے کہ رب تعالیٰ واحد و یکتا ہے، ذات و صفات میں اس کا کوئی شریک نہیں۔

اسی طرح ہمارے پیارے آقا، مکی مدنی مصطفیٰ صلی اللہ علیہ وآلہ وسلم نے بھی بارہا وحدانیتِ خداوندی کو ماننے اور بیان کرنے کا حکم فرمایا ہے۔ چنانچہ حدیثِ پاک میں ہے:

(1)روایت ہے حضرت ابن عمر سے فرماتے ہیں کہ فرمایا نبی ﷺ نے: اسلام پانچ چیزوں پر قائم کیا گیا اس کی گواہی کہ اللہ کے سوا کوئی معبود نہیں، محمد ( ﷺ ) اس کے بندے اور رسول ہیں اور نماز قائم کرنا ، زکوٰۃ دینا اور حج کرنا اور رمضان کے روزے۔ (بخاری و مسلم)( مرآۃ المناجیح شرح مشکوٰۃ المصابیح، جلد: 1)

اس حدیثِ مبارک سے حضور سید عالم صلی اللہ علیہ وآلہ وسلم نے ہمیں تعلیم دی ہے کہ اللہ تبارک و تعالیٰ واحد ہے اور کوئی بھی اس کا شریک نہیں۔

اگر ہم اس مسئلے کو آسان مثال سے سمجھنا چاہیں تو یوں سمجھ سکتے ہیں کہ اگر اللہ تعالیٰ کو واحد و یکتا نہ مانا جائے، بلکہ دوسرے خدا کے وجود کا عقیدہ رکھا جائے، تو دونوں میں اختلافِ ارادہ ہونا ممکن ہوگا۔مثلاً اگر ایک خدا ارادہ کرے کہ دن ہو، اور دوسرا ارادہ کرے کہ رات ہو، تو یہ دونوں چیزیں ایک ساتھ جمع نہیں ہو سکتیں، ورنہ اجتماعِ نقیضین لازم آئے گا۔اگر ایک کا حکم نافذ ہو جائے تو دوسرے کا حکم نافذ نہ ہو سکے گا، اور جس کا حکم نافذ نہ ہو وہ عاجز ہوگا۔ جبکہ عاجزی خدا کے لیے محال ہے۔ لہٰذا ثابت ہوا کہ خدا ایک ہی ہے، اس کا کوئی شریک نہیں۔

(2) حدیثِ ابن عمر رضی اللہ عنہماروایت ہے ابن عمر رضی اللہ عنہما سے فرماتے ہیں کہ فرمایا رسول الله ﷺ نے کہ مجھے حکم دیا گیا کہ لوگوں سے جنگ کروں تاکہ گواہی دیں کہ رب کے سوا کوئی معبود نہیں اور محمد الله کے رسول ہیں اور نماز قائم کریں زکوٰۃ دیں جب یہ کرلیں گے تو مجھ سے اپنے خون و مال بچالیں گے سوائے اسلامی حق کے اُن کا حساب الله کے ذمہ ہے ۔اس میں بخاری مسلم کا اتفاق ہے مگر مسلم نے اسلامی حق کا ذکر نہ کیا۔(مرآۃ المناجیح شرح مشکوٰۃ المصابیح، جلد: 1، حدیث نمبر: 12)

(3) حدیثِ ابو موسیٰ اشعری رضی اللہ عنہ اور روایت ہے حضرت ابو موسیٰ اشعری سے فرماتے ہیں کہ فرمایا رسول الله ﷺ نے کہ تکلیف دہ بات کو سنتے ہوئے صبر کرنے والا خدا سے بڑھ کر کوئی نہیں، لوگ اس کے لئے اولاد کا دعویٰ کرتے ہیں پھر بھی وہ انہیں راحت و رزق دیئے جاتا ہے۔(مرآۃ المناجیح شرح مشکوٰۃ المصابیح، جلد: 1، حدیث نمبر: 23)

(4)حدیثِ ابو ہریرہ رضی اللہ عنہ روایت ہے حضرت ابو ہریرہ رضی اللہ عنہ سے فرماتے ہیں کہ فرمایا نبی ﷺ نے ایمان کی چند اور ستر شاخیں ہیں ان سب میں اعلیٰ یہ کہنا ہے کہ اللہ کے سوا کوئی معبود نہیں اور سب سے ادنیٰ تکلیف دہ چیز کا راستہ سے ہٹانا ہے اور غیرت بھی ایمان کی شاخ ہے۔(مرآۃ المناجیح شرح مشکوٰۃ المصابیح، جلد: 1)

(5)روایت ہے عبادہ ابن صامت سے فرماتے ہیں کہ میں نے حضور ﷺ کو فرماتے ہوئے سنا جو گواہی دے کہ الله کے سوا کوئی لائق عبادت نہیں اور یقینًا محمد الله کے رسول ہیں الله تعالٰی اس پر آگ حرام کرے گا۔ (مرآۃ المناجیح شرح مشکوٰۃ المصابیح جلد:1 , حدیث نمبر:36)

(6)روایت ہے حضرت معاذ ابن جبل سے فرماتے ہیں فرمایا رسول الله ﷺ نے جنت کی چابیاں کلمہ شہادت ہے کہ رب کے سوا کوئی معبود نہیں۔اسے احمد نے روایت کیا۔(مرآۃ المناجیح شرح مشکوٰۃ المصابیح جلد:1 , حدیث نمبر:40)

اے میرے عزیز بھائیو! آپ ان احادیثِ مبارکہ سے بخوبی اندازہ لگا سکتے ہیں کہ حضور سید عالم صلی اللہ علیہ وآلہ وسلم نے کس طرح واضح طور پر اللہ تبارک و تعالیٰ کی وحدانیت کو بیان فرمایا۔ حضور اکرم صلی اللہ علیہ وآلہ وسلم کے اقوال پر نظر کی جائے یا افعال پر، ہر طرف وحدانیتِ باری تعالیٰ کی جھلک نظر آتی ہے۔

اللہ تبارک و تعالیٰ سے دعا ہے کہ وہ مالکِ لم یزل ہمیں ہمیشہ کما حقہٗ اپنی وحدانیت کو بیان کرنے کی توفیق عطا فرمائے، اور مرتے دم تک وحدانیتِ باری تعالیٰ پر قائم رہنے کی سعادت نصیب فرمائے۔ آمین بجاہ النبی الأمین صلی اللہ علیہ وآلہ وسلم۔

توحید اسلام کی بنیاد اور تمام انبیاء کرام عليهم السلام کی دعوت کا مرکزی پیغام ہے ۔ حضور جان کائنات فخر موجودات  ﷺ نے اپنی پوری حیاتِ مبارکہ میں امت کو سب سے پہلے اللہ کی وحدانیت کا درس دیا ۔توحید کا مطلب یہ ہے کہ عبادت ، دعا ، خوف، امید اور ہر قسم کی بندگی صرف اللہ تعالٰی کے لیے خاص کی جائے قرآن و سنت میں بار بار اس حقیقت کو واضح کیا گیا کہ اللہ تبارک و تعالٰی واحد ہے اس کا کوئی شریک نہیں اور وہی عبادت کے لائق ہے۔

روایت ہے حضرت ابوذر رضی اللہ تعالی عنہ سے فرماتے ہیں کہ میں حضور جان کائنات ﷺ کی خدمت میں حاضر ہوا۔ حضور پر سفید کپڑاتھا اور سور ہے تھے کچھ دیر بعد پھر آیا تو آپ جاگ چکے تھے فرمایا کہ نہیں ہے کوئی بندہ جو لا اله الا اللہ کہے پھر اس پر مر جائے جنت میں جائے گا۔ میں نے عرض کیا اگر چہ زنا اور چوری کرے فرمایا اگرچہ زنا اور چوری کرے میں نے کہا اگر چہ زنا اور چوری کرے فرمایا اگر چہ زنا اور چوری کرے۔ میں نے کہا اگر چہ زنا و چوری کرے فرمایا اگر چہ زنا و چوری کرے۔ ابوذر کی ناک رگڑنے کے باوجود حضرت ابو ذر جب بھی یہ حدیث بیان کرتے تھے تو کہتے تھے کہ اگر چہ ابوذر کی ناک رگڑ جائے۔(مراٰۃ المناجیح جلد 1 ص 52 حدیث نمبر 23 مطبوعہ حسن پبلشرز)

عرب میں یہ لفظ نا پسندیدگی کے معنی میں استعمال ہوتا ہے یعنی اگرچہ تم نا پسندیدگی کی بنا پر سوال کرتے کرتے زمین پر ناک بھی رگڑ دو جب بھی یہی حکم رہے گا۔(مراٰۃ المناجیح جلد 1 ص 52 شرح حدیث نمبر 23 مطبوعہ حسن پبلشرز)

روایت ہے عباس ابن عبدالمطلب رضی اللہ عنہ سے فرماتے ہیں فرمایا نبی کریم ﷺ نے اس نے ایمان کا مزہ چکھ لیا جو اللہ کے ربّ ہونے اسلام کے دین ہونے محمد کے نبی ہونے سے راضی ہو گیا ۔(مراٰۃ المناجیح جلد 1 ص 40 حدیث نمبر 07 مطبوعہ حسن پبلشرز)

روایت ہے عبادہ بن صامت رضی اللہ تعالی عنہ سے فرماتے ہیں کہ میں نے حضور پرنور شافع یوم النشور ﷺ کو فرماتے ہوئے سنا جو گواہی دے کہ اللہ کے سوا کوئی عبادت کے لائق نہیں اور محمد اللہ کے رسول ہیں اللہ تعالیٰ اس پر آگ حرام کرے گا۔(مراٰۃ المناجیح جلد 1 ص 59 حدیث 31 نمبر مطبوعہ حسن پبلشرز)

روایت ہے حضرت عثمان رضی اللہ تعالی عنہ سے فرماتے ہیں کہ فرمایا رسول اللہ ﷺ نے جو یہ جانتے مانتے مرگیا کہ اللہ کے سوا کوئی عبادت کے لائق نہیں وہ جنت میں داخل ہوگا ۔(مراٰۃ المناجیح جلد 1 ص 59 حدیث نمبر 32 مطبوعہ حسن پبلشرز)

ان احادیث سے معلوم ہوتا ہے کہ دین کی ابتدا توحید سے ہوتی ہے اور دیگر عبادات بھی اس وقت قبول ہوتی ہیں جب عقیدہ توحید درست ہو ۔اللہ پاک ہمیں مرتے دم تک صحیح العقیدہ مسلمان رکھے اور مدینے میں شہادت کی موت عطا فرمائے ۔

توحید اسلام کے بنیادی ارکان میں سے پہلا رکن ہے ہمیں پیدا ہوتے ہی کان میں اذان دے کر اور جب بولنے لگتے ہیں تو لب پر کلمہ طیبہ لا الہ الا اللہ جاری کروا کر توحید ہی کا جام پلایا جاتا ہے۔ اور یہی اقرار ایمان کی اصل ہے ہمارے نبی محترم پیغمبر آخر الزماں صلی اللہ تعالی علیہ وسلم نے اپنی 63 سالہ زندگی میں جس عقیدے پر سب سے زیادہ زور دیا ہے وہ خالص توحید ہے آپ صلی اللہ تعالی علیہ وسلم کا پورا بیان عمل دعوت اسی ایک نقطہ توحید کے اردگرد گھومتا رہتا ہے کہ عبادت خوف دعا توکل امید یہ ساری کی ساری چیزیں صرف ایک اللہ وحدہ لا شریک ذات کے لیے ہیں۔اسی بارے میں اللہ تبارک و تعالی قرآن کریم میں ارشاد فرماتا ہے :

قُلْ هُوَ اللّٰهُ اَحَدٌۚ(۱)ترجمہ کنزالایمان : تم فرماؤ وہ اللہ ہے وہ ایک ہے ۔ ( سورۃ الاخلاص آیت نمبر 1 )

اللہ تبارک و تعالی کی توحید کی گواہی کے لیے یہی ایک آیت ہی کافی ہے لیکن چونکہ ہمارا موضوع نبوی تعلیمات کے حوالے سے ہے تو یہاں کچھ احادیث ذکر کرنا بھی ضروری ہے نبی محترم صلی اللہ تعالی علیہ وسلم کی چن احادیث ذیل میں ذکر کی جا رہی ہے ۔

(1) وَعَنِ ابْنِ عُمَرَ رَضِیَ اللہُ عَنْہُمَا قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : بُنِيَ الْإِسْلَامُ عَلَى خَمْسٍ: شَهَادَةُ أَنْ لَا إِلَهَ إِلَّا اللَّهُ وَأَنَّ مُحَمَّدًا عَبْدُهُ وَرَسُولُهُ وَإِقَامُ الصَّلَاةِ وَإِيتَاءُ الزَّكَاةِ وَالْحَجُّ وَصَوْمُ رَمَضَانَ ۔

ترجمہ : روایت ہے حضرت ابن عمرسے فرماتے ہیں کہ فرمایا نبی ﷺ نے اسلام پانچ چیزوں پرقائم کیا گیااس کی گواہی کہ اللہ کے سوا کوئی معبود نہیں،محمد( ﷺ )اس کےبندےاور رسول ہیں اورنمازقائم کرنا،زکوۃ دینا اور حج کرنا اور رمضان کے روزے۔

اسلام مثل خیمہ یاچھت کے ہے اور یہ پانچ ارکان اس کے پانچ ستونوں کی طرح کہ جو کوئی ان میں سے ایک کا انکار کرے گا وہ اسلام سے خارج ہوگا،اور اس کا اسلام منہدم ہوجاویگا۔خیال رہے کہ ان اعمال پر کمال ایمان موقوف ہے اور ان کے ماننے پر نفس ایمان موقوف،لہذا جوصحیح العقیدہ مسلمان کبھی کلمہ نہ پڑھے یانماز روزہ کا پابند نہ ہو،وہ اگرچہ مؤمن تو ہے مگر کامل نہیں،اور جو ان میں سےکسی کا انکارکرے وہ کافر ہے۔لہذا حدیث پر کوئی اعتراض نہیں،نہ اعمال ایمان کے اجزاء ہیں۔ ( مرآۃ المناجیح شرح مشکوٰۃ المصابیح جلد:1 ،حدیث نمبر:4 )

(2) وَعَنْ أَبِي هُرَيْرَةَ رَضِیَ اللہُ عَنْہُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ الْإِيمَانُ بِضْعٌ وَسَبْعُوْنَ شُعْبَةً فَأَفْضَلُهَا: قَولُ لَا إِلَهَ إِلَّا اللَّهُ وَأَدْنَاهَا إِمَاطَةُ الْأَذٰى عَنِ الطَّرِيقِ وَالْحَيَاءُ شُعْبَةٌ مِنَ الْإِيْمَانِ

ترجمہ : روایت ہےحضرت ابوہریرہ( رضی اللہ عنہ )سے فرماتے ہیں کہ فرمایا نبی ﷺ نے ایمان کی چنداورستّر شاخیں ہیں ان سب میں اعلٰی یہ کہنا ہے کہ اللہ کے سوا کوئی معبود نہیں اور سب سے ادنیٰ تکلیف دہ چیز کا راستہ سے ہٹانا ہےاور غیرت بھی ایمان کی شاخ ہے ۔( مرآۃ المناجیح شرح مشکوٰۃ المصابیح جلد:1 ، حدیث نمبر:5 )

(3) وَعَنِ ابْنِ عُمَرَ رَضِيَ اللّٰهُ عَنْهُمَا قَالَ: قَالَ رَسُولُ الله صَلَّى اللّٰهُ عَلَيْهِ وَسَلَّمَ : أُمِرْتُ أَنْ أُقَاتِلَ النَّاسَ حَتَّى يَشْهَدُوْا أَنْ لَا إِلَهَ إِلَّا اللّٰهُ وَأَنَّ مُحَمَّدًا رَسُولُ اللهِ وَيُقِيْمُوا الصَّلَاةَ وَيُؤْتُوْا الزَّكَاةَ فَإِذَا فَعَلُوْا ذٰلِكَ عَصَمُوْا مِنِّيْ دِمَاءَهُمْ وَأَمْوَالَهُمْ إِلَّا بِحَقِّ الْإِسْلَامِ وَحِسَابُهُمْ عَلَى اللهِ. مُتَّفَقٌ عَلَيْهِ إِلَّا أَنَّ مُسْلِمًا لَمْ يَذْكُرْ إِلَّا بِحَقِّ الْإِسْلَامِ

ترجمہ : روایت ہے ابن عمر رضی اللہ عنہما سے فرماتے ہیں کہ فرمایا رسول الله ﷺ نےکہ مجھے حکم دیا گیا کہ لوگوں سے جنگ کروں تاکہ گواہی دیں کہ رب کے سواکوئی معبودنہیں اورمحمد الله کے رسول ہیں اورنماز قائم کریں زکوۃ دیں جب یہ کرلیں گے تو مجھ سے اپنے خون و مال بچالیں گے سواءاسلامی حق کے اُن کا حساب الله کے ذمہ ہے ۔اس میں بخاری مسلم کا اتفاق ہےمگرمسلم نے اسلامی حق کا ذکر نہ کیا۔ ( مرآۃ المناجیح شرح مشکوٰۃ المصابیح جلد:1 , حدیث نمبر:12 )

خلاصہ یہ ہے کہ توحید صرف ایک عقیدہ کا نام نہیں ہے بلکہ ہماری زندگیوں کا وہ محور ہے جس پر دنیا اور آخرت کی کامیابی منحصر ہے ہمارے نبی محترم صلی اللہ تعالی علیہ وسلم نے اپنی ساری زندگی اسی پیغام کو زندہ کرنے اور لوگوں تک پہنچانے میں گزار دی ہر حال میں صرف اللہ ہی کی طرف رجوع کیا اسی سے مانگا اسی سے ڈرے اور اسی پر بھروسہ کیا لہذا ہمیں چاہیے کہ ہم اللہ تبارک و تعالی ہی سے مدد مانگیں اور اس کی توحید کی رسی کو مضبوطی سے تھامے رکھیں اپنی اولاد خاندان معاشرے میں اسی خالص عقیدے کی دعوت عام کریں کیونکہ جس دل میں توحید کا نور بس جائے تو وہ دل کبھی گمراہ نہیں ہو سکتا اور جس زندگی کا مقصد اللہ کی رضا ہو تو وہ زندگی کبھی بھی ضائع نہیں ہو سکتی۔

آپ دیکھئے حضرت غوث اعظم رضی اللہ تعالی عنہ حضرت داتا گنج بخش علی ہجویری رحمۃ اللہ علیہ حضرت خواجہ معین الدین چشتی رحمۃ اللہ علیہ کتنے ہی اکابرین بزرگان دین ہیں انہوں نے اپنی زندگی کے اندر ایک اللہ تبارک و تعالی کو مان کر ان اللہ کی تعلیمات کو عام فرمایا آج دیکھیں کہ اللہ تبارک و تعالی نے ان کے نام کو کس قدر بلند فرمایا ہے اور انہوں نے اپنے وقت میں ایک اللہ کے نام کا کھلایا ہے آج اللہ تبارک و تعالی ان کے ساتھ وفا فرما رہا ہے کہ لوگوں کو ان کے نام کا کھلا رہا ہے اللہ تبارک و تعالی ہمیں خالص توحید پر عمل کرنے کی توفیق عطا فرمائے اور اسی عقیدے پر خاتمہ بالخیر فرمائے آمین۔

(1) اسلام کی بنیاد : وَعَنِ ابْنِ عُمَرَ رَضِیَ اللہُ عَنْہُمَا قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : بُنِيَ الْإِسْلَامُ عَلَى خَمْسٍ: شَهَادَةُ أَنْ لَا إِلَهَ إِلَّا اللَّهُ وَأَنَّ مُحَمَّدًا عَبْدُهُ وَرَسُولُهُ وَإِقَامُ الصَّلَاةِ وَإِيتَاءُ الزَّكَاةِ وَالْحَجُّ وَصَوْمُ رَمَضَانَ

روایت ہے حضرت ابن عمرسے فرماتے ہیں کہ فرمایا نبی ﷺ نے اسلام پانچ چیزوں پرقائم کیا گیا اس کی گواہی کہ اللہ کے سوا کوئی معبود نہیں،محمد( ﷺ )اس کےبندےاور رسول ہیں اورنمازقائم کرنا زکوۃ دینا اور حج کرنا اور رمضان کے روزے۔( صحیح بخاری ، جلد 1 ، کتاب الایمان ، حدیث : 8)

(2) ایمان کی شاخ : وَعَنْ أَبِي هُرَيْرَةَ رَضِیَ اللہُ عَنْہُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ الْإِيمَانُ بِضْعٌ وَسَبْعُوْنَ شُعْبَةً فَأَفْضَلُهَا: قَولُ لَا إِلَهَ إِلَّا اللَّهُ وَأَدْنَاهَا إِمَاطَةُ الْأَذٰى عَنِ الطَّرِيقِ وَالْحَيَاءُ شُعْبَةٌ مِنَ الْإِيْمَانِ

روایت ہےحضرت ابوہریرہ( رضی اللہ عنہ )سے فرماتے ہیں کہ فرمایا نبی ﷺ نے ایمان کی چنداورستّر شاخیں ہیں ان سب میں اعلٰی یہ کہنا ہے کہ اللہ کے سوا کوئی معبود نہیں اور سب سے ادنیٰ تکلیف دہ چیز کا راستہ سے ہٹانا ہے اور غیرت بھی ایمان کی شاخ ہے۔( مشکوة المصابیح ، جلد 1 ، کتاب الایمان ، حدیث : 3)

(3) ایمان کی لذت :

وَعَنِ الْعَبَّاسِ بْنِ عَبْدِ الْمُطَّلِب ِقَالَ: قَالَ رَسُولُ اللهِ صَلَّى اللّٰهُ عَلَيْهِ وَسَلَّمَ : ذَاقَ طُعْمَ الْإِيمَانِ مَنْ رَضِيَ بِاللّٰهِ رَبًّا وَبِالْإِسْلَامِ دِينًا وَبِمُحَمَّدٍ رَسُولًا

روایت ہے عباس ابن عبدالمطلب سے فرماتے ہیں کہ فرمایا نبی ﷺ نے اس نے ایمان کا مزہ چکھ لیاجو الله کے رب ہونے،اسلام کے دین ہونے،محمد ﷺ کے نبی ہونے سے راضی ہوگیا۔( صحیح مسلم ، جلد 1 ، کتاب الایمان ، حدیث : 151)

(4)جہنم کی آگ حرام : عَنْ عُبَادَةَ ابْنِ الصَّامِتِ قَالَ: سَمِعْتُ رَسُولَ اللهِ صَلَّى اللهُ عَلَيْهِ وَسَلَّمَ يَقُولُ:مَنْ شَهِدَ أَنْ لَا إِلَهَ إِلَّا اللهُ وَأَنَّ مُحَمَّدًا رَسُولُ الله ِ حَرَّمَ اللهُ عَلَيْهِ النَّارُ

روایت ہے عبادہ ابن صامت رضی اللہ تعالی عنہ سے فرماتے ہیں کہ میں نے حضور ﷺ کو فرماتے ہوئے سنا جو گواہی دے کہ الله کے سوا کوئی لائق عبادت نہیں اور یقینًا محمد الله کے رسول ہیں الله تعالٰی اس پر آگ حرام کرے گا ۔( مشکوةالمصابیح ، جلد 1 ، کتاب الایمان ، حدیث : 31)

(5) جنت میں داخلہ : وَعَنْ عُبَادَةَ ابْنِ الصَّامِتِ قَالَ قَالَ رَسُوْلُ اللّٰهِ صَلَّى اللّٰهُ عَلَيْهِ وَسَلَّمَ : «مَنْ شَهِدَ أَنْ لَا إِلَهَ إِلَّا اللّٰهُ وَحْدَهٗ لَا شَرِيكَ لَهُ وَأَنَّ مُحَمَّدًا عَبْدُهُ وَرَسُولُهُ وَأَنَّ عِيسٰى عَبْدُ اللهِ وَرَسُولُهُ اِبْنُ أَمَتِهِ وَكَلِمَتُهٗ أَلْقَاهَا إِلٰى مَرْيَمَ وَرُوحٌ مِنْهُ وَالْجَنَّةُ وَالنَّارُ حَقٌّ أَدْخَلَهُ اللّٰهُ الْجَنَّةَ عَلٰى مَا كَانَ مِنَ الْعَمَلِ

روایت ہے حضرت عبادہ ابن صامت سے فرماتے ہیں فرمایا نبی ﷺ نے جوگواہی دے کہ اکیلے خدا کے سوا کوئی معبود نہیں اس کا کوئی شریک نہیں اور محمد الله کے بندے اور رسول ہیں عیسٰی الله کے بندے اور رسول اوراس کی بندی کے بیٹے الله کا کلمہ ہیں جو مریم میں ڈالا اور الله کی طرف سے روح ہیں اور جنت و دوزخ حق ہے الله اُسے جنت میں داخل کرے گا مطابق عمل کے۔(مشکوةالمصابیح ، جلد 1 ، کتاب الایمان ، حدیث :24)

اسلام کی بنیاد جس عظیم عقیدے پر قائم ہے، وہ توحید ہے۔ توحید کا مطلب ہے اللہ تعالیٰ کو اُس کی ذات، صفات، عبادت اور اختیارات میں ایک ماننا۔ تمام انبیاءِ کرام علیھم السلام نے اپنی قوموں کوتوحید کی دعوت دی۔ ہمارے آخری نبی حضرت محمد ﷺ نے بھی اپنی پوری زندگی میں لوگوں کو خالص توحید کی دعوت دی اور شرک سے بچنے کی تلقین فرمائی۔

توحید کا مفہوم:توحید عربی زبان کے لفظ "وحد" سے مشتق ہے، جس کے معنی اپنی ذات میں منفرد ہونے کے ہیں ۔

اسلامی اصطلاح میں توحید کا مطلب یہ ہے کہ

• اللہ تعالیٰ ایک ہے۔

• اُس کا کوئی شریک نہیں۔

• عبادت کے لائق صرف اللہ ہے۔

• کائنات کا خالق، مالک اور رازق صرف اللہ تعالیٰ ہے۔

قرآنِ مجید میں اللہ تعالیٰ فرماتا ہے:ترجمۂ کنزالایمان: تم فرماؤ وہ اللہ ہے وہ ایک ہے ۔ (سورۃ الاخلاص: 1)

احادیث میں توحید کا بیان:

(1)ہم سے اسحاق بن ابراہیم نے بیان کیا، انہوں نے یحییٰ بن آدم سے سنا، انہوں نے کہا کہ ہم سے ابوالحوص نے بیان کیا، ان سے ابواسحاق نے، ان سے عمرو بن میمون نے اور ان سے معاذ رضی اللہ عنہ نے بیان کیا کہ نبی کریم ﷺ جس گدھے پر سوار تھے، میں اس پر آپ کے پیچھے بیٹھا ہوا تھا۔ اس گدھے کا نام عفیر تھا۔ آپ ﷺ نے فرمایا ”اے معاذ! کیا تمہیں معلوم ہے کہ اللہ تعالیٰ کا حق اپنے بندوں پر کیا ہے؟ اور بندوں کا حق اللہ تعالیٰ پر کیا ہے؟“ میں نے عرض کیا اللہ اور اس کے رسول ہی زیادہ جانتے ہیں۔ آپ ﷺ نے فرمایا ”اللہ کا حق اپنے بندوں پر یہ ہے کہ اس کی عبادت کریں اور اس کے ساتھ کسی کو شریک نہ ٹھہرائیں اور بندوں کا حق اللہ تعالیٰ پر یہ ہے کہ جو بندہ اللہ کے ساتھ کسی کو شریک نہ ٹھہراتا ہو اللہ اسے عذاب نہ دے۔“(صحیح بخاری، حدیث2856)

(2)سول اللہ ﷺ نے فرمایا:"مَنْ كَانَ آخِرُ كَلَامِهِ لَا إِلٰهَ إِلَّا اللَّهُ دَخَلَ الْجَنَّةَ"ترجمہ:جس کا آخری کلام لا إله إلا الله ہو، وہ جنت میں داخل ہوگا۔(سنن ابی داود :حدیث 3116 )

ان احادیث سے یہ واضح ہوا کہ توحید اسلام کا بنیادی عقیدہ اور نبی کریم ﷺ کی سب سے بڑی دعوت ہے۔ قرآن و حدیث میں بار بار اللہ کی وحدانیت کو بیان کیا گیا ہے۔ ایک مسلمان کی کامیابی اسی میں ہے کہ وہ خالص دل کے ساتھ صرف اللہ تعالیٰ کی عبادت کرے اور ہر قسم کے شرک سے بچے۔ یہی دنیا اور آخرت کی کامیابی کا راستہ ہے۔

عقیدہ توحید بہت زیادہ اہمیت کا حامل ہے بلکہ یہ تمام عقائد و اعمال کی اصل اور جڑ ہے۔ کہ تمام عقائد و اعمال کی صحت اسی پر موقوف ہے۔ اس کی اہمیت کا اندازہ اس بات سے بھی ہوتا ہے کہ تمام انبیاء کی تبلیغ کا بنیادی مقصد توحید کا پیغام پہنچانا ہے۔ توحید سے مراد یہ ہے کہ اللہ کریم کی ذاتِ پاک کو اس کی ذات اورصِفات میں شریک سے پاک ماننا۔ توحید تین طرح کی ہوتی ہیں ایک توحید الوہیت، دوسری توحید ربوبیت، تیسری توحید اسماء و صفات۔

توحید الوہیت سے مراد یہ ہے کہ تمام قسم کی عبادات صرف اسی کے لیے انجام دی جائیں۔ اور توحید ربوبیت سے مراد یہ ہے کہ ہم اس بات پر ایمان لائیں کہ اللہ تعالی ہی ہر چیز کا تنہا خالق، مالک اور مدبر ہے۔ اور توحید اسماء و صفات سے مراد یہ ہے کہ ہم اللہ تعالی کے ان اسماء و صفات پر ایمان لائیں جنہیں اللہ تعالی نے اپنی ذات کے لیے ثابت کیا ہے اور جنہیں اس کے نبی حضور ﷺ نے ثابت کیا۔ توحید کے دو غلاف ہیں ایک کلمہ توحید کا زبان سے کہنا اور دوسرا اس کا دل سے اعتقاد رکھنا۔ اب آیئے احادیث کے ذریعے عقیدہ توحید کی اہمیت کو جانتے ہیں:

موحد جنت میں داخل ہوگا:عَنْ عُثْمَانَ، قَالَ: قَالَ رَسُولُ اللّٰهِ ﷺ:مَنْ مَاتَ وَهُوَ يَعْلَمُ أَنَّهُ لَا إِلَهَ إِلَّا اللّٰهُ، دَخَلَ الْجَنَّةَحضرت عثمان رضی اللہ عنہ سے روایت ہے وہ کہتے ہیں کہ رسول اللہﷺ نے فرمایا: جو شخص اس حال میں مرا کہ وہ اس بات کو اچھی طرح جانتا تھا کہ اللہ کے علاوہ کوئی بھی الٰہ نہیں(یعنی توحید پر دل سے ایمان رکھتا ہو) تو وہ شخص جنت میں داخل ہوگا۔(صحیح مسلم، کتاب الایمان، حدیث نمبر 136)

شفاعت کا مستحق صرف موحد ہوگا:عَنْ أَبِي هُرَيْرَةَ، أَنَّهُ قَالَ: قِيلَ يَا رَسُولَ اللَّهِ، مَنْ أَسْعَدُ النَّاسِ بِشَفَاعَتِكَ يَوْمَ الْقِيَامَةِ، قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: لَقَدْ ظَنَنْتُ يَا أَبَا هُرَيْرَةَ، أَنْ لَا يَسْأَلَنِي عَنْ هَذَا الْحَدِيثِ أَحَدٌ أَوَّلُ مِنْكَ لِمَا رَأَيْتُ مِنْ حِرْصِكَ عَلَى الْحَدِيثِ، أَسْعَدُ النَّاسِ بِشَفَاعَتِي يَوْمَ الْقِيَامَةِ، مَنْ قَالَ لَا إِلَهَ إِلَّا اللَّهُ خَالِصًا مِنْ قَلْبِهِ أَوْ نَفْسِهِ. حضرت ابوہریرہ سے روایت ہے کہ انہوں نے عرض کی یا رسول اللہ ﷺ قیامت کے دن آپ کی شفاعت کے ذریعے لوگوں میں سے سب سے زیادہ سعادت مند شخص کون ہوگا ہے؟ تو حضور ﷺ نے فرمایا کہ اے ابو ہریرہ مجھے اندازہ تھا کہ اس بات کے متعلق تیرے سے پہلے کوئی مجھ سے نہیں پوچھے گا اس لیے کہ میں نے تیری حدیث کے متعلق حرص کو دیکھا ہے۔ لوگوں میں سب سے زیادہ قیامت کے دن میری شفاعت کے ذریعے سعادت مند وہ ہوگا جو صدقِ دل سے لا الہ الا اللہ کہے گا۔(صحیح بخاری، کتاب العلم، حدیث 99)

سچا موحد صدیقین اور شہداء میں سے ہوگا:عَنْ عَمْرِو بْنِ مُرَّةَ الْجُهْنِيِّ رضی الله عنه قَالَ: جَاءَ رَسُوْلَ اللهِ صلی الله عليه وآله وسلم رَجُلٌ مِنْ قُضَاعَةَ، فَقَالَ لَهُ: يَا رَسُوْلَ اللهِ، أَرَأَيْتَ إِنْ شَهِدْتُ أَنْ لَا إِلٰهَ إِلَّا اللهُ وَأَنَّکَ رَسُوْلُ اللهِ، وَصَلَّيْتُ الصَّلَوَاتِ الْخَمْسَ، وَصُمْتُ الشَّهْرَ، وَقُمْتُ رَمَضَانَ، وَآتَيْتُ الزَّکَاةَ. فَقَالَ النَّبِيُّ صلی الله عليه وآله وسلم : مَنْ مَاتَ عَلٰی هٰذَا کَانَ مِنَ الصِّدِّيْقِيْنَ وَالشُّهَدَاءِ.

حضرت عمر بن مرہ رضی اللہ عنہ سے روایت ہے کہ انہوں نے کہا کہ قبیلہ قضاعہ کا ایک شخص رسول اللہ ﷺ کے پاس حاضر ہوا اور آپ سے عرض کی کہ یا رسول اللہ ﷺ اگر میں گواہی دوں کہ اللہ کے سوا کوئی معبود نہیں اور آپ اللہ کے رسول ہیں اور میں پانچ نمازیں ادا کروں اور رمضان کے روزے رکھوں اور اس میں قیام بھی کروں اور زکوۃ ادا کروں تو آپ کی کیا رائے ہے۔ نبی کریم ﷺ نے فرمایا جو اس حالت میں مرے گا صدیقین اور شہداء میں سے شمار ہوگا۔(صحیح ابن خزیمہ، حدیث 2280، صفحہ 75،باب في فضل قيام رمضان واستحقاق قائمه اسم الصديقين والشهداء، دار التاصيل)

یاد رہے کہ توحید تمام احکام کی درستگی کی بنیاد ہے یعنی توحید ہی پر تمام احکامات کی صحت موقوف ہے۔ سب سے مقدم فریضہ، محور حیات، سب سے افضل نیکی، ایمان کا سب سے افضل شعبہ، اور افضل ترین عمل توحید ہی ہے۔ اللہ پاک سے دعا ہے کہ ہم کو عقیدہ توحید پر ہمیشہ قائم رکھے۔آمین بجاہ خاتم النبیین ﷺ ۔

توحید وہ بنیادی حقیقت ہے جس پر اسلام کی پوری عمارت قائم ہے۔ یہی وہ دعوت ہے جو آدم علیہ السلام سے لے کر حضور  ﷺ تک ہر نبی کی زبان پر رہی۔ نبی کریم ﷺ نے توحید کو خشک فلسفیانہ بحث نہیں بنایا، بلکہ روزمرہ کی زندگی، دعاؤں، مثالوں اور خطاب کے ذریعے اسے دلوں میں اتارا۔ ان کا اسلوب ایسا تھا کہ ایک ان پڑھ بدوی بھی سمجھ جائے اور ایک عالم بھی اس کی گہرائی پر غور کرے۔اللہ تعالیٰ فرماتا ہے:

شَهِدَ اللّٰهُ اَنَّهٗ لَاۤ اِلٰهَ اِلَّا هُوَۙ-وَ الْمَلٰٓىٕكَةُ وَ اُولُوا الْعِلْمِ قَآىٕمًۢا بِالْقِسْطِؕ-لَاۤ اِلٰهَ اِلَّا هُوَ الْعَزِیْزُ الْحَكِیْمُؕ(۱۸)

ترجمہ کنزالایمان: اللہ نے گواہی دی کہ اس کے سوا کوئی معبود نہیں اور فرشتوں نے اور عالموں نے انصاف سے قائم ہو کر اس کے سوا کسی کی عبادت نہیں عزت والا حکمت والا۔ (سورۃ آل عمران، آیت 18)

نبی کریم ﷺ کے بیان میں توحید کے کئی زاویے سامنے آتے ہیں۔

پہلا زاویہ یہ ہے کہ توحید انسان کو غیر اللہ کی غلامی سے آزاد کرتی ہے۔ نبی کریم ﷺ نے فرمایا: لَا إِلَهَ إِلَّا اللَّهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ ترجمہ: اللہ کے سوا کوئی معبود نہیں، وہ اکیلا ہے، اس کا کوئی شریک نہیں، اسی کی بادشاہی ہے اور اسی کے لیے تعریف ہے، اور وہ ہر چیز پر قادر ہے۔(صحیح مسلم، کتاب المساجد، باب استحباب الذکر بعد الصلاۃ، حدیث نمبر: 593)

یہ کلمہ انسان کو بتوں، خواہشات اور طاقتور لوگوں کے خوف سے نکال کر صرف اللہ کی بندگی میں داخل کرتا ہے۔

دوسرا زاویہ یہ ہے کہ توحید دعا اور عبادت کو خالص کرتی ہے۔ نبی کریم ﷺ نے معاذ بن جبل رضی اللہ عنہ سے فرمایا: يَا مُعَاذُ أَتَدْرِي مَا حَقُّ اللَّهِ عَلَى الْعِبَادِ قَالَ اللَّهُ وَرَسُولُهُ أَعْلَمُ، قَالَ أَنْ يَعْبُدُوهُ وَلَا يُشْرِكُوا بِهِ شَيْئًا

ترجمہ: "اے معاذ! کیا تم جانتے ہو بندوں پر اللہ کا کیا حق ہے؟ انہوں نے کہا اللہ اور اس کا رسول بہتر جانتے ہیں۔ فرمایا یہ کہ وہ اس کی عبادت کریں اور اس کے ساتھ کسی کو شریک نہ ٹھہرائیں"۔ (صحیح البخاری، کتاب التوحید، حدیث نمبر: 7373)

اس حدیث سے معلوم ہوتا ہے کہ عبادت کا مقصد ہی اللہ کی وحدانیت کا اظہار ہے۔

تیسرا زاویہ یہ ہے کہ توحید یقین اور اطمینان پیدا کرتی ہے۔ نبی کریم ﷺ نے صحابہ کو تلقین فرمائی کہ ہر حال میں اللہ پر بھروسہ رکھو۔ جب صحابہ نے پوچھا کہ توکل کیا ہے تو آپ ﷺ نے فرمایا: أَنْ تَعْلَمَ أَنَّ مَا أَصَابَكَ لَمْ يَكُنْ لِيُخْطِئَكَ وَمَا أَخْطَأَكَ لَمْ يَكُنْ لِيُصِيبَكَ ترجمہ: "یہ جان لو کہ جو تمہیں پہنچا وہ تم سے چوکنے والا نہ تھا، اور جو تم سے ٹل گیا وہ تمہیں پہنچنے والا نہ تھا"۔ (سنن الترمذی، کتاب الزہد، حدیث نمبر: 2516)

یہی یقین توحید کا ثمرہ ہے کہ بندہ اسباب کے ساتھ اللہ پر بھروسہ کرتا ہے۔

چوتھا زاویہ یہ ہے کہ توحید اخلاق کو سنوارتی ہے۔ جب انسان یقین کر لے کہ دیکھنے والا صرف اللہ ہے تو وہ خلوت میں بھی گناہ سے بچتا ہے۔ نبی کریم ﷺ نے فرمایا: اتَّقِ اللَّهَ حَيْثُ مَا كُنْتَترجمہ: "جہاں کہیں بھی ہو اللہ سے ڈرو"۔ (سنن الترمذی، کتاب البر والصلۃ، حدیث نمبر: 1987)

یہ تقویٰ توحید کے بغیر ممکن نہیں، کیونکہ جب اللہ کی ذات ہی واحد نگہبان ہو تو بندہ بے خوف اور بے باک ہو جاتا ہے۔نبی کریم ﷺ نے توحید کی تعلیم میں نرمی اور حکمت اختیار فرمائی۔ طائف کے پتھر کھا کر بھی آپ ﷺ نے بد دعا نہ دی، بلکہ فرمایا: اللَّهُمَّ اهْدِ قَوْمِي فَإِنَّهُمْ لَا يَعْلَمُونَترجمہ: "اے اللہ! میری قوم کو ہدایت دے، یہ نہیں جانتے"۔ (صحیح البخاری، کتاب بدء الخلق، حدیث نمبر: 3231)

یہی اسلوب تھا جس نے سخت دل نرم کیے اور توحید کے نور سے منور کیا۔

توحید کا نبوی بیان ہمیں یہ سکھاتا ہے کہ اسلام کا ہر حکم، ہر عبادت اور ہر معاملہ اللہ کی وحدانیت پر پلٹتا ہے۔ جب بندہ اس حقیقت کو سمجھ لیتا ہے تو اس کی زندگی میں سکون آ جاتا ہے، اس کا دل مطمئن ہو جاتا ہے، اور اس کا ہر عمل اللہ کے لیے خالص ہو جاتا ہے۔ یہی وہ پیغام ہے جو قیامت تک ہر انسان کے لیے نجات کا ذریعہ ہے۔