توحید اسلام کی بنیاد ہے اور یہی وہ اصل پیغام ہے جس کی دعوت تمام انبیاء کرام علیہم السلام نے اپنی اپنی امتوں کو دی۔ نبی کریم ﷺ کی ساری تعلیمات کا مرکز بھی یہی تھا کہ ‏انسان صرف اللہ تعالیٰ کو ایک مانے، اسی کی عبادت کرے اور اسی کو حقیقی معبود تسلیم کرے۔ توحید انسان کے عقیدے، عمل اور اخلاق کو سیدھا کرتی ہے۔قرآن مجید نے ‏توحید کو بہت واضح اور سادہ انداز میں بیان کیا ہے۔ سورۃ الاخلاص میں ارشاد ہوتا ہے:

قُلْ هُوَ اللّٰهُ اَحَدٌۚ(۱)اَللّٰهُ الصَّمَدُۚ(۲)لَمْ یَلِدْ وَ لَمْ یُوْلَدْۙ(۳)وَ لَمْ یَكُنْ لَّهٗ كُفُوًا اَحَدٌ۠(۴)

ترجمۂ کنزُالعِرفان: تم فرماؤ: وہ اللہ ایک ہے۔اللہ بے نیاز ہے۔نہ اس نے کسی کو جنم دیا اور نہ وہ کسی سے پیدا ہوا۔ اور کوئی اس کے برابر نہیں ۔ (سورۃ الاخلاص ،1تا 4)

یہ مختصر سورت پوری توحید کا خلاصہ ہے اور نبی کریم ﷺ نے اسی عقیدے کو لوگوں کے دلوں میں راسخ فرمایا۔

اللہ تعالیٰ کا بندوں پر حق (عبادت میں یکتائی):‏رسول اللہ ﷺ نے توحید کی سب سے جامع تعریف اللہ کے حقوق کے حوالے سے فرمائی، جو کہ توحیدِ الوہیت کی اصل بنیاد ہے۔

عَنْ مُعَاذٍ‎ ‎رَضِيَ اللهُ عَنْهُ، قَالَ: كُنْتُ رِدْفَ النَّبِيِّ ﷺَ عَلَى حِمَارٍ، يُقَالُ لَهُ: عُفَيْرٌ، فَقَالَ: يَا مُعَاذُ هَلْ تَدْرِي حَقَّ اللهِ عَلَى عِبَادِهِ وَمَا حَقُّ ‏الْعِبَادِ عَلَى اللَّهِ، قُلْتُ: اللهُ وَرَسُولُهُ أَعْلَمُ، قَالَ: فَإِنَّ حَقَّ اللهِ عَلَى الْعِبَادِ أَنْ يَعْبُدُوهُ، وَلَا يُشْرِكُوا بِهِ شَيْئًا ترجمہ‎:‎حضرت معاذ رضی اللہ عنہ نے بیان کیا کہ آخری نبی ﷺ جس درازگوش (گدھے) پر سوار تھے، میں اس پر آپ کے پیچھے بیٹھا ہوا تھا۔ اس کا ‏نام عفیر تھا۔ آپ ﷺ نے فرمایا ‏‎”‎اے معاذ! کیا تمہیں معلوم ہے کہ اللہ تعالیٰ کا حق اپنے بندوں پر کیا ہے؟"‏‎ ‎میں نے عرض کیا اللہ اور اس کے رسول ہی زیادہ ‏جانتے ہیں۔ آپ ﷺ نے فرمایا ‏‎”‎اللہ کا حق اپنے بندوں پر یہ ہے کہ اس کی عبادت کریں اور اس کے ساتھ کسی کو شریک نہ ٹھہرائیں۔(صحیح البخاری:2856)‏

اس حدیث میں نبی کریم ﷺ نے نہایت سادہ اور تربیتی انداز میں توحید کی اصل حقیقت بیان فرمائی۔ اس میں واضح کیا گیا کہ انسان کی سب سے بڑی ذمہ داری اللہ کی ‏خالص عبادت ہے اور شرک سے مکمل اجتناب کرنا ہے۔

توحید اور اخلاص (شرکِ اصغر سے براءت):‏توحید کا تقاضا ہے کہ انسان کا ہر عمل ریاکاری (دکھاوے) سے پاک ہو۔ رسول اللہ ﷺ نے واضح فرمایا کہ توحید کی قبولیت کے لیے نیت کا خالص ہونا شرط ہے۔

عَنْ أَبِي هُرَيْرَةَ ، قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: قَالَ اللَّهُ تَبَارَكَ وَتَعَالَى: أَنَا أَغْنَى الشُّرَكَاءِ عَنِ الشِّرْكِ، مَنْ عَمِلَ عَمَلًا أَشْرَكَ ‏فِيهِ مَعِي غَيْرِي تَرَكْتُهُ وَشِرْكَهُ‎ ۔

ترجمہ:رسول اللہ ﷺ نے فرمایا: ‎اللہ تعالیٰ نے ارشاد فرمایا کہ شریک بنائے جانے والوں میں سب سے زیادہ میں شراکت سے مستغنی ‏ہوں۔ جس شخص نے بھی کوئی عمل کیا اور اس میں میرے ساتھ کسی اور کو شریک کیا تو میں اسے اس کے شرک کے ساتھ اکیلا چھوڑ دیتا ہوں۔(صحیح مسلم،باب تحريم الرياء: 7475)‏

اس حدیث میں نبی کریم ﷺ نے نہایت واضح انداز میں یہ حقیقت بیان فرمائی کہ اللہ تعالیٰ صرف وہی عمل قبول فرماتا ہے جو خالص اسی کے لیے ہو۔ اگر ‏عبادت میں ریاکاری یا دکھاوا شامل ہو جائے تو وہ عمل ضائع ہو جاتا ہے۔

یہی توحید کا عملی پہلو ہے کہ انسان نہ صرف اللہ کو ایک مانے بلکہ اپنی عبادات، نیت اور اعمال کو بھی اسی کے لیے خالص رکھے۔‏

شخصیت پرستی اور غلو کی سختی سے ممانعت:‏توحید کی حفاظت کا سب سے بڑا مظہر یہ ہے کہ رسول اللہ ﷺ نے اپنی ذات کے بارے میں بھی امت کو کسی بھی قسم کے غلو (حد سے بڑھنے) سے سختی سے منع فرمایا، ‏تاکہ امت ان گمراہیوں سے بچ سکے جن کا شکار پچھلی امتیں ہوئیں۔

توحید پر قائم رہنے کی فضیلت:‏زمانہ نبی کریم ﷺ نے توحید پر قائم رہنے والوں کو عظیم بشارتیں بھی عطا فرمائیں۔ حضرت عبادہ بن صامت رضی اللہ عنہ سے روایت ہے‎:‎قَالَ رَسُولُ اللهِ ﷺ‎:‎‏ "مَنْ شَهِدَ أَنْ لَا إِلَهَ إِلَّا اللهُ وَأَنَّ مُحَمَّدًا رَسُولُ اللهِ، حَرَّمَ اللهُ عَلَيْهِ النَّارَ ‏‎ترجمہ‎:‎جس شخص نے اس حقیقت کی گواہی دی کہ اللہ کے سوا کوئی معبود نہیں اور محمد ﷺ اللہ کے رسول ہیں، اللہ تعالیٰ نے اس پر جہنم کی آگ حرام ‏کر دی ۔ ‎‏(صحیح مسلم،کتاب الایمان، حدیث: 142)‏

اسی طرح ایک اور حدیث میں آیا‎:‎‎‏ قَالَ رَسُولُ اللهِ ﷺ: فَإِنَّ اللهَ قَدْ حَرَّمَ عَلَى النَّارِ مَنْ قَالَ لَا إِلَهَ إِلَّا اللهُ يَبْتَغِي بِذَلِكَ وَجْهَ اللهِ‎‏ترجمہ‎:‎اللہ تعالیٰ نے اس شخص پر جہنم کو حرام کر دیا جو خلوص کے ساتھ لا إلہ إلا اللہ کہے۔ (صحیح البخاری، حدیث: 425)‏

یہ فضائل اس بات کو واضح کرتے ہیں کہ توحید انسان کی نجات کا سب سے بڑا ذریعہ ہے۔

نبی کریم ﷺ نے توحید کو دین کی بنیاد قرار دیا اور اپنی تعلیمات کے ذریعے اسے ہر دل میں راسخ کیا۔ آپ ﷺ نے نہایت حکمت کے ساتھ توحید کو واضح کیا، اس کی اہمیت ‏بیان فرمائی، اور شرک کے ہر پہلو سے خبردار کیا۔ ساتھ ہی توحید پر قائم رہنے والوں کو جنت اور اللہ کی رضا کی بشارت دی۔آج بھی ہماری کامیابی اسی میں ہے کہ ہم خالص توحید کو اختیار کریں، اپنے عقائد اور اعمال کو شرک سے پاک رکھیں، اور نبی کریم ﷺ کی تعلیمات کے مطابق اپنی زندگی ‏گزاریں۔ یہی وہ راستہ ہے جو انسان کو دنیا و آخرت میں کامیابی عطا کرتا ہے۔

اسلام ایک ایسا پاکیزہ دین ہے جس کی بنیاد توحید پر قائم ہے۔توحید کا مطلب یہ ہے کہ اللہ تعالیٰ کو اس کی ذات، صفات، عبادت اور اختیارات میں یکتا مانا جائے اور اس کے ساتھ کسی کو شریک نہ ٹھہرایا جائے۔ یہی تمام انبیاءِ کرام علیہم السلام کی دعوت کا اصل پیغام تھا۔ نبی کریم ﷺ نے بھی اپنی پوری حیاتِ مبارکہ میں سب سے زیادہ توجہ عقیدۂ توحید پر دی اور لوگوں کو ہر قسم کے شرک سے بچنے کی تعلیم فرمائی۔احادیثِ مبارکہ میں نبی اکرم ﷺ نے نہایت واضح انداز میں توحید کی اہمیت بیان فرمائی اور اسے دین کی بنیاد قرار دیا۔

(1)توحید اسلام کی پہلی بنیاد ہے:رسول اللہ ﷺ نے فرمایا:بُنِيَ الإِسْلَامُ عَلَى خَمْسٍ: شَهَادَةِ أَنْ لَا إِلٰهَ إِلَّا اللَّهُ وَأَنَّ مُحَمَّدًا رَسُولُ اللَّهِترجمہ:اسلام کی بنیاد پانچ چیزوں پر رکھی گئی ہے، جن میں سب سے پہلی گواہی دینا ہے کہ اللہ کے سوا کوئی معبود نہیں اور محمد ﷺ اللہ کے رسول ہیں۔(بخاری، 8)

اس حدیث سے واضح ہوتا ہے کہ اسلام کی سب سے پہلی اور مضبوط بنیاد عقیدۂ توحید ہے۔ اگر عقیدہ درست نہ ہو تو اعمال کی عمارت بھی مضبوط نہیں رہتی۔

یہ مختصر مگر جامع دعوت اس حقیقت کو ظاہر کرتی ہے کہ دنیا و آخرت کی حقیقی کامیابی صرف اللہ تعالیٰ کی وحدانیت کو ماننے میں ہے۔

(3)توحید جنت میں داخلے کا ذریعہ ہے:رسول اللہ ﷺ نے فرمایا:مَنْ مَاتَ وَهُوَ يَعْلَمُ أَنَّهُ لَا إِلٰهَ إِلَّا اللَّهُ دَخَلَ الْجَنَّةَ

ترجمہ:جو شخص اس حال میں فوت ہوا کہ وہ جانتا تھا کہ اللہ کے سوا کوئی معبود نہیں، وہ جنت میں داخل ہوگا۔(مسلم، 26)

یہ حدیث توحید کی عظیم فضیلت کو بیان کرتی ہے۔ خالص دل کے ساتھ اللہ تعالیٰ کی وحدانیت پر ایمان رکھنا نجات کا سبب بنتا ہے۔

(4)شرک سب سے بڑا گناہ ہے:نبی کریم ﷺ نے اپنی امت کو شرک سے بہت سختی کے ساتھ بچنے کی تلقین فرمائی۔آپ ﷺ نے فرمایا:أَكْبَرُ الْكَبَائِرِ الإِشْرَاكُ بِاللَّهِترجمہ:سب سے بڑا گناہ اللہ کے ساتھ شریک ٹھہرانا ہے۔(بخاری، 2654)

اس حدیث سے معلوم ہوا کہ شرک ایسا سنگین گناہ ہے جو انسان کو اللہ تعالیٰ کی رحمت سے دور کر دیتا ہے۔

(5) نبی کریم ﷺ نے چھپے ہوئے شرک سے بھی خبردار فرمایا:رسول اللہ ﷺ نے فرمایا:إِنَّ أَخْوَفَ مَا أَخَافُ عَلَيْكُمُ الشِّرْكُ الْأَصْغَرُصحابۂ کرام رضی اللہ عنہم نے عرض کی: "یارسول اللہ! شرکِ اصغر کیا ہے؟"آپ ﷺ نے فرمایا:الرِّيَاءُترجمہ:آپ ﷺ نے فرمایا: "ریاکاری۔"(مسند احمد، 23630)

اس حدیث سے معلوم ہوا کہ عبادت صرف اللہ تعالیٰ کی رضا کے لیے ہونی چاہیے۔ لوگوں کو دکھانے کے لیے عبادت کرنا بھی خطرناک عمل ہے۔

(6) توحید اللہ تعالیٰ کی مغفرت کا سبب ہے:رسول اللہ ﷺ نے فرمایا کہ اللہ تعالیٰ ارشاد فرماتا ہے:يَا ابْنَ آدَمَ! لَوْ أَتَيْتَنِي بِقُرَابِ الْأَرْضِ خَطَايَا ثُمَّ لَقِيتَنِي لَا تُشْرِكُ بِي شَيْئًا لَأَتَيْتُكَ بِقُرَابِهَا مَغْفِرَةًترجمہ:اے آدم کے بیٹے! اگر تو زمین بھر گناہ لے کر میرے پاس آئے، پھر میرے ساتھ کسی کو شریک نہ ٹھہرایا ہو، تو میں اتنی ہی مغفرت لے کر تیرے پاس آؤں گا۔(ترمذی، 3540)

یہ حدیث بتاتی ہے کہ خالص توحید اللہ تعالیٰ کی بے شمار رحمتوں اور مغفرت کا ذریعہ ہے۔

اسلام کا پیغام:توحید دینِ اسلام کی روح اور تمام عبادات کی اصل بنیاد ہے۔ نبی کریم ﷺ نے پوری زندگی لوگوں کو ایک اللہ کی عبادت کی دعوت دی اور ہر قسم کے شرک، خواہ ظاہر ہو یا چھپا ہوا، اس سے بچنے کی تعلیم فرمائی۔

ہر مسلمان کو چاہیے کہ وہ اپنے عقیدے کی حفاظت کرے، ہر عبادت خالص اللہ تعالیٰ کے لیے انجام دے، اور توحید پر مضبوطی کے ساتھ قائم رہے۔اللہ تعالیٰ ہمیں صحیح عقیدۂ توحید نصیب فرمائے، شرک کے ہر فتنے سے محفوظ رکھے اور ایمان پر خاتمہ عطا فرمائے۔ آمین۔

اللہ تبارک و تعالی نے انبیاء کرام کو مبعوث فرمایا کئی مقاصد کی بنیاد پر جن میں سے ایک مقصد لوگوں کو اللہ تبارک و تعالی کی توحید وحدانیت کی تعلیم دینا بھی ہے جیسا کہ ارشاد فرمایا:

حضرت جبرائیل علیہ الصلوۃ والسلام نے حضور علیہ الصلوۃ والسلام سے اسلام کے بارے میں پوچھا تو آپ نے ارشاد فرمایا الْإِسْلَامُ أَنْ تَشْهَدَ أَنْ لَا إِلَهَ إِلَّا اللَّهُ وَأَنَّ مُحَمَّدًا رَسُولُ اللَّهِ ترجمہ اسلام یہ ہے کہ تم گواہی دو کہ اللہ کےسواءکوئی معبودنہیں اورمحمداللہ کے رسول ہیں۔( مرآۃ المناجیح شرح مشکاۃ المصابیح جلد 1 کتاب الایمان حدیث نمبر 2)

اس حدیث میں جب حضور علیہ الصلاۃ والسلام نے اسلام کے بارے میں خبر دی تو سر فہرست توحید و رسالت کا ذکر فرمایا اگرچہ اس کے علاوہ بھی اس چیزوں کا ذکر کیا اسی طرح کا مضمون دوسری احادیث میں بھی ملتا ہے ۔

اسلام کی بنیاد پانچ چیزوں پر ہے :حضرت عبداللہ بن عمر رضی اللہ عنہما سے روایت ہے انہوں نے فرمایا کہ حضور علیہ الصلوۃ والسلام نے ارشاد فرمایا :بُنِيَ الْإِسْلَامُ عَلَى خَمْسٍ: شَهَادَةُ أَنْ لَا إِلَهَ إِلَّا اللَّهُ وَأَنَّ مُحَمَّدًا عَبْدُهُ وَرَسُولُهُ وَإِقَامُ الصَّلَاةِ وَإِيتَاءُ الزَّكَاةِ وَالْحَجُّ وَصَوْمُ رَمَضَانَ ترجمہ: اسلام پانچ چیزوں پرقائم کیا گیا اس کی گواہی کہا اللہ کے سوا کوئی معبود نہیں،محمد( ﷺ )اس کےبندےاور رسول ہیں اورنمازقائم کرنا زکوۃ دینا اور حج کرنا اور رمضان کے روزے۔(مرآۃ المناجیح شرح مشکاۃ المصابیح جلد 1 کتاب الایمان حدیث نمبر 4)

اس حدیث میں جب حضور علیہ الصلوۃ والسلام نے اسلام کے بنیادوں کا ذکر فرمایا تو سب سے پہلے توحید کا ذکر فرمایا تو ضمنا یہ حدیث تو توحید کی اہمیت اور اس کے اصل ایمان ہونے پر بھی دلیل بنتی ہے ۔

ایمان کی شاخوں میں سے سب سے افضل شاخ:حضرت ابوہریرہ رضی اللہ تعالی عنہ سے مروی ہے فرماتے ہیں کہ حضور علیہ الصلوۃ والسلام نے ارشاد فرمایا الْإِيمَانُ بِضْعٌ وَسَبْعُوْنَ شُعْبَةً فَأَفْضَلُهَا: قَولُ لَا إِلَهَ إِلَّا اللَّهُ ترجمہ: ایمان کی چنداورستّر شاخیں ہیں ان سب میں اعلٰی یہ کہنا ہے کہ اللہ کے سوا کوئی معبود نہیں۔(مرآۃ المناجیح شرح مشکاۃ المصابیح جلد 1 کتاب الایمان حدیث نمبر 5)

اس حدیث میں بھی حضور علیہ الصلوۃ والسلام نے افضل توحید بیان کرنے کو فرمایا یعنی حضور علیہ الصلوۃ والسلام نے تربیت ایسی فرمائی کہ افضل عمل بھی توحید اسلام کی بنیادوں میں سر فہرست توحید ہے ۔

وَعَنْ أَبِيْ هُرَيْرَةَ قَالَ: أَتٰی أَعْرَابِيٌّ النَّبِيَّ صَلَّى اللّٰهُ عَلَيْهِ وَسَلَّمَ فَقَالَ: دُلَّنِي عَلٰی عَمَلٍ إِذَا عَمِلْتُهُ دَخَلْتُ الْجَنَّةَ قَالَ تَعْبُدُ اللهَ وَلَا تُشْرِكُ بِهٖ شَيْئًا وَتُقِيْمُ الصَّلَاةَ الْمَكْتُوبَةَ وَتُؤَدِّيْ الزَّكَاةَ الْمَفْرُوضَةَ وَتَصُوْمُ رَمَضَانَ

ترجمہ :روایت ہےحضرت ابوہریرہ رضی اللہ عنہ سے فرماتےہیں کہ ایک دیہاتی حضورعلیہ السلام کی خدمت میں حاضر ہوئے عرض کرنے لگے کہ مجھے ایسے کام کی ہدایت فرمایئے کہ میں وہ کروں تو جنتی ہوجاؤں فرمایا الله کو پوجو اُس کا کسی کو شریک نہ ٹھہراؤ نماز قائم کرو،زکوۃ فرض دو،رمضان کے روزے رکھو ۔(مرآۃ المناجیح شرح مشکاۃ المصابیح جلد 1 کتاب الایمان حدیث نمبر 14 )

اس حدیث میں جب حضور علیہ الصلاۃ والسلام سے جنت میں داخل کرنے والے عمل کے بارے میں سوال کیا گیا تو آپ نے سرفہرست یہ فرمایا کہ اللہ کی عبادت کرو اور اس کے ساتھ کسی کو شریک نہ ٹھہراؤ یعنی اس حدیث سے بھی یہ پتہ چلتا ہے کہ حضورﷺ نے توحید کا درس دیا۔

وَعَنْ سُفْيَانَ ابْنِ عَبْدِ اللهِ الثَّقَفِيِّ قَالَ: قُلْتُ: يَا رَسُولَ اللهِ قُلْ لِيْ فِيْ الْإِسْلَامِ قَوْلًا لَا أَسْأَلُ عَنْهُ أَحَدًا بَعْدَكَ وَفِي رِوَايَةٍ غَيْرَكَ قَالَ قُلْ اٰمَنْتُ بِاللهِ ثُمَّ اسْتَقِمْ ترجمہ: روایت ہے حضرت سفیان ابن عبد الله ثقفی سے کہ میں نے عرض کیایارسول الله ﷺ مجھے اسلام کے متعلق ایسی بات بتائیں کہ آپ کے بعداس کےمتعلق کسی سے نہ پوچھوں۔ دوسری روایت میں ہے(کہ آپ کے سوا) فرمایا کہ کہو کہ مَیں الله پر ایمان لایا پھر اُس پرقائم رہو ۔

(مرآۃ المناجیح شرح مشکاۃ المصابیح جلد 1 کتاب الایمان حدیث نمبر 15)

اللہ تبارک و تعالی سے سوال ہے کہ ہمیں حضور علیہ الصلوۃ والسلام کے فرمان پر دل و جان سے عمل کرنے کی توفیق عطا فرمائے۔

اللہ تعالیٰ کی ذاتِ بابرکت سے ملاقات کی خواہش اور شوق ہر سچے مومن کا وہ قلبی جذبہ ہے جو اس کی روح کو تسکین دیتا ہے اور زندگی کو حقیقی مقصد فراہم کرتا ہے۔ دنیا کی فانی خوبصورتی، عارضی آسائشیں اور چند روزہ تعلقات اس انسان کو مطمئن نہیں کر سکتے جس کے دل میں اپنے حقیقی خالق و مالک سے ملنے کی تڑپ آباد ہو چکی ہو۔

اللہ سے ملاقات کا شوق محض ایک آرزو نہیں، بلکہ یہ اطاعت، تقویٰ اور محبتِ الٰہی کی روشن دلیل ہے۔ یہ شوق انسان کے اندر سے موت کا خوف ختم کر دیتا ہے اور اسے ایک پل کی طرح محسوس کرواتا ہے جو بندے کو اس کے محبوبِ حقیقی سے ملا دیتا ہے۔

شیخ طریقت امیر اہلسنت حضرت علامہ محمد الیاس عطار قادری دامت بَرَکَاتُہمُ العالیہ نے عاشقانِ رسول کے دلوں میں رب سے ملاقات کا شوق پیدا کرنے کے لئے اس ہفتے20 صفحات کا رسالہ ”اللہ پاک سے ملاقات کا شوق“ پڑھنے/سننے کی ترغیب دلائی ہے اور پڑھنے/سننے والوں کو اپنی دعاؤں سے نوازا ہے۔

دعائے عطار

یاربّ المصطفٰے! جو 20 صفحات کا بُک لیٹ ”اللہ پاک سے ملاقات کا شوق“ پڑھ یا سن لے اُس سے ہمیشہ کے لئے راضی ہوجا اور اس کو اپنی ملاقات کا شوق عطا فرمااور ماں باپ سمیت بخش دے۔ اٰمین

یہ رسالہ آڈیو میں سننے اور اردو سمیت کئی زبانوں میں ڈاؤن لوڈ کرنے کے لئے نیچے دیئے گئے لنک پر کلک کیجئے:

Download

دعوتِ اسلامی کے شعبہ جامعۃالمدینہ کے زیر اہتمام سنتوں بھرے اجتماع کا انعقاد ہونے جارہاہے۔ یہ اجتماع 31 اکتوبر 2026ء کو عالمی مدنی مرکز فیضانِ مدینہ کراچی میں صبح 09:00 بجے منعقدہوگا جبکہ اس تقریب کو مدنی چینل پر براہ ِراست (Live) نشر بھی کیا جائے گا۔

اجتماع میں خصوصی بیان دعوتِ اسلامی کی مرکزی مجلس شوریٰ کے نگران مولانا حاجی محمد عمران عطاری مُدَّ ظِلُّہُ العالی فرمائیں گے۔

اس اجتماع کو منعقد کرنے کا مقصد جامعات المدینہ کے طلبہ، اساتذہ اور مدنی عملے کی دینی و اصلاحی تربیت کرنا ہے۔

اسلامی علوم کی موثر تدریس طلبہ کی علمی سمجھ بوجھ، اخلاقی اقدار اور کردار سازی میں بنیادی اور انتہائی اہم کردار ادا کرتی ہے۔ اسی عزم کے پیشِ نظر دارالمدینہ انٹرنیشنل یونیورسٹی (DMIU) کے پرو وائس چانسلر بریگیڈیئر (ریٹائرڈ) پروفیسر ڈاکٹر محمد طاہر نواز نے اسلامی مضامین پڑھانے والے اساتذہ کرام کے ساتھ ایک اہم میٹنگ منعقد کی۔

میٹنگ کے اہم نکات اور موضوعات:

٭موثر تدریس اور نصاب کی بروقت تکمیل: میٹنگ میں اسلامی علوم کی تدریس کو مزید موثر بنانے اور طے شدہ نصاب کو مقررہ وقت کے اندر مکمل کرنے پر زور دیا گیا۔

٭اساتذہ کی پابندیٔ وقت: اساتذہ کی بروقت آمد و رفت اور وقت کی پاسداری کو معیاری تعلیم کے لیے لازمی قرار دیا گیا۔

٭اخلاقی و سماجی اقدار کا انضمام: اس بات پر خصوصی توجہ دی گئی کہ روزمرہ کے تدریسی عمل کے دوران طلبہ کے اندر اخلاقی اور سماجی اقدار کو کیسے عملی طور پر شامل کیا جائے۔

٭انضباطی ماحول اور اعلیٰ معیار: پرو وائس چانسلر نے اس بات پر روشنی ڈالی کہ اساتذہ پر یہ بھاری ذمہ داری عائد ہوتی ہے کہ وہ یونیورسٹی میں ایک نظم و ضبط سے آراستہ تعلیمی ماحول قائم رکھیں۔

میٹنگ کی گفتگو میں پروفیسر ڈاکٹر محمد طاہر نواز نے اساتذہ کی ذمہ داریوں کی اہمیت کو اجاگر کرتے ہوئے کہا کہ اساتذہ تعلیمی معیار کی بلندی کو یقینی بنائیں۔ انہوں نے اس بات پر زور دیا کہ اسلامی تعلیمات صرف نظریاتی حد تک محدود نہ رہیں بلکہ طلبہ کی علمی و ذہنی ترقی اور کردار سازی کا عملی حصہ بنیں۔

دعوتِ اسلامی کے ایجوکیشن ڈیپارٹمنٹ کے وفد نے مرکزی مجلسِ شوریٰ کے رکن عبدالوہاب عطاری کے ہمراہ اسلام آباد میں علامہ اقبال اوپن یونیورسٹی کے مرکزی کیمپس کا دورہ کیا۔ اس موقع پر وفد نے یونیورسٹی کے وائس چانسلر پروفیسر ڈاکٹر ناصر محمود سے ایک اہم ملاقات کی۔

ملاقات کے دوران دونوں فریقین نے ملک میں تعلیم کے فروغ بالخصوص دور دراز اور محروم طبقے تک علم کی رسائی کے لیے مشترکہ تعلیمی منصوبوں اور مستقبل کی شراکت داری پر تفصیلی گفتگو کی۔ وفد نے وائس چانسلر کو دعوتِ اسلامی کے تحت چلنے والے تعلیمی اداروں، بالخصوص جدید و دینی علوم کے امتزاج اور سماجی فلاحی خدمات کے بارے میں آگاہ کیا۔

رکن شوریٰ عبدالوہاب عطاری نے علامہ اقبال اوپن یونیورسٹی کے ملک گیر تعلیمی نظام اور بالخصوص آن لائن و فاصلاتی نظامِ تعلیم (Distance Learning) کے ذریعے لاکھوں طلبہ کو زیورِ تعلیم سے آراستہ کرنے کے شعبے میں کردار کو سراہا۔ ملاقات میں اس بات پر اتفاق کیا گیا کہ دونوں ادارے مل کر ایسے پروگرامز پر کام کر سکتے ہیں جن سے طلبہ کی اخلاقی و فنی تربیت کو مزید بہتر بنایا جا سکے۔

وائس چانسلر پروفیسر ڈاکٹر ناصر محمود نے دعوتِ اسلامی کے وفد کا خیرمقدم کیا اور ان کی تعلیمی و سماجی کاوشوں کی تعریف کی۔ انہوں نے باہمی تعاون کے ساتھ ایسے تعلیمی و تربیتی اقدامات کی حمایت کا اظہارکیا جو معاشرے میں مثبت تبدیلی اور فروغِ علم کا باعث بنیں۔

عاشقانِ رسول کی دینی تحریک دعوتِ اسلامی کے زیرِ اہتمام صوبائی دارالحکومت لاہور، پنجاب کی تاریخی  اور معروف جامع مسجد داتا دربار میں 1 نومبر 2026ء بروز اتوار ایک روح پرور ”تہجد اجتماع“ کا انعقاد کیا جا رہا ہے۔

تفصیلات کے مطابق اس بابرکت و روحانی اجتماع کا آغاز صبح تقریباً 4:00 بجے تلاوتِ قراآنِ پاک و نعت رسولِ مقبول ہوگا جس کے بعد مبلغِ دعوتِ اسلامی کا سنتوں بھرا بیان ہوگا۔

اس اجتماعِ پاک میں دعوتِ اسلامی کی مرکزی مجلسِ شوریٰ کے رکن حاجی یعفور رضا عطاری بالخصوص شرکت فرمائیں گے نیز جامع مسجد داتا دربار کے قرب و جوار میں رہنے والے عاشقانِ رسول کی بھی شرکت متوقع ہے۔

شعبہ معاونت برائے اسلامی بہنیں دعوتِ اسلامی کے زیرِ اہتمام 24 اکتوبر 2026ء کو جہلم سٹی   میں ایک اہم مدنی مشورے کا انعقاد کیا گیا جس میں ڈویژن، ڈسٹرکٹ اور تحصیل سطح کے ذمہ دار اسلامی بھائیوں نے شرکت کی۔

شعبہ معاونت برائے اسلامی بہنیں دعوتِ اسلامی کے زیرِ اہتمام 23 اکتوبر 2026ء کو ڈویژن گجرات میں ایک اہم مدنی مشورے کا انعقاد کیا گیا  جس میں ڈویژن، ڈسٹرکٹ، تحصیل اور ٹاؤن سطح کے تمام ذمہ داران نے شرکت کی۔

اس موقع پر نگرانِ شعبہ غلام الیاس عطاری اور صوبائی ذمہ دار محمد اقبال عطاری نے ماہِ قافلہ کے اہداف، خالی یو سیز (UCs) کے اہداف، نئے مقامات کے ایڈریس، روحانی علاج بستے، سوسائٹی کے اہداف اور ماہانہ دینی کاموں کے متعلق تفصیلی گفتگو کی اور اہم نکات پر رہنمائی فراہم کی۔(رپورٹ:محمد علی رفیق عطاری، شعبہ معاونت برائے ا سلامی بہنیں صوبہ پنجاب آفس، کانٹینٹ:غیاث الدین عطاری)

عالمی سطح کی دینی تحریک دعوتِ اسلامی کینیڈا کے زیرِ اہتمام آج  29 اکتوبر 2026ء کو ایک سنتوں بھرے اجتماع کا اہتمام کیا جا رہا ہے جس میں بالخصوص رکنِ مرکزی مجلسِ شوریٰ حاجی خالد عطاری کی شرکت متوقع ہے۔

معلومات کے مطابق یہ سنتوں بھرا اجتماع شام 6:30 بجے کینیڈا کی عمارت فیضانِ مکہ (#5000 4250 109 AVE NE) میں منعقد کیا جائے گا جس کے آغاز میں تلاوت قرآن و نعت خوانی کی جائے گی جبکہ وقتِ مناسب پر مبلغِ دعوتِ اسلامی کا سنتوں بھرا بیان بھی ہوگا۔

کینیڈا کے مختلف علاقوں میں رہنے والے عاشقانِ رسول کو اس اجتماعِ پاک میں شرکت کی دعوت دی جاتی ہے تاکہ وہ اِن نیک اجتماعات کے ذریعے علمِ دین حاصل کرسکیں۔

توحید اسلام کا بنیادی عقیدہ ہے جس کامطلب ہے کہ اللہ پاک کی وحدانیت اور یکتائی پر ایمان رکھنا ہے نبی کریم  ﷺ نے اپنی نبوت کے دوران توحید کی تعلیمات کو بہت اہمیت دی ہے اور لوگوں کو اللہ پاک کی وحدانیت کی طرف بلایا۔

اسلام کی بنیاد پانچ چیزوں پر ہیں:روایت ہے حضرت ابن عمرسے فرماتے ہیں کہ فرمایا نبی ﷺ نے اسلام پانچ چیزوں پرقائم کیا گیااس کی گواہی کہ اللہ کے سوا کوئی معبود نہیں،محمد( ﷺ )اس کےبندےاور رسول ہیں اورنمازقائم کرنا،زکوۃ دینا اور حج کرنا،اور رمضان کے روزے۔

یعنی اسلام مثل خیمہ یاچھت کے ہے اور یہ پانچ ارکان اس کے پانچ ستونوں کی طرح کہ جو کوئی ان میں سے ایک کا انکار کرے گا وہ اسلام سے خارج ہوگا،خیال رہے کہ ان اعمال پر کمال ایمان موقوف ہے اور ان کے ماننے پر نفس ایمان موقوف،لہذا جوصحیح العقیدہ مسلمان کبھی کلمہ نہ پڑھے یانماز روزہ کا پابند نہ ہو،وہ اگرچہ مؤمن تو ہے مگر کامل نہیں،اور جو ان میں سےکسی کا انکارکرے وہ کافر ہے۔(مرآۃالمناجیح شرح مشکوٰۃ المصابیح جلد 1 :حدیث: 4)

ایمان کی ستر شاخیں ہیں:روایت ہےحضرت ابوہریرہ( رضی اللہ عنہ )سے فرماتے ہیں کہ فرمایا نبی ﷺ نے ایمان کی چنداورستّر شاخیں ہیں ان سب میں اعلٰی یہ کہنا ہے کہ ﷲ کے سوا کوئی معبود نہیں اور سب سے ادنیٰ تکلیف دہ چیز کا راستہ سے ہٹانا ہےاور غیرت بھی ایمان کی شاخ ہے۔(مرآۃالمناجیح شرح مشکوٰۃ المصابیح جلد 1 :حدیث:5)

ایماں کا مزہ کس کو حاصل ہوتا ہے:روایت ہے عباس ابن عبدالمطلب سے فرماتے ہیں کہ فرمایا نبی ﷺ نے اس نے ایمان کا مزہ چکھ لیاجو الله کے رب ہونے،اسلام کے دین ہونے،محمد ﷺ کے نبی ہونے سے راضی ہوگیا ۔(مرآۃالمناجیح شرح مشکوٰۃ المصابیح جلد 1 :حدیث:9)

روایت ہےحضرت ابوہریرہ رضی اللہ عنہ سے فرماتےہیں کہ ایک دیہاتی حضورعلیہ السلام کی خدمت میں حاضر ہوئے عرض کرنے لگے کہ مجھے ایسے کام کی ہدایت فرمایئے کہ میں وہ کروں تو جنتی ہوجاؤں فرمایا الله کو پوجو اُس کا کسی کو شریک نہ ٹھہراؤ نماز قائم کرو،زکوۃ فرض دو،رمضان کے روزے رکھو وہ بولے قسم اس کی جس کے قبضہ میں میری جان ہے کبھی اس سے کچھ گھٹاؤں بڑھاؤں گا نہیں پھرجب وہ چل دیئے تو حضور ﷺ نے فرمایا کہ جو جنتی مردکو دیکھنا چاہے وہ اسے دیکھ لے۔ (مرآۃ المناجیح شرح مشکوٰۃ المصابیح جلد:1 , حدیث نمبر:14)

لہذا ہمیں بھی چاہیے کہ ہم اللہ پاک کی وحدانیت کو سمجھیں اور اس کے ساتھ کسی کو شریک نہ ٹھرائیں اور جن چیزوں کی ہمیں حضور علیہ السلام نے تعلیم دی ہے ان پر عمل کریں تاکہ ہم اپنے عقائد کو درست کریں کیونکہ ایمان کلمہ طیبہ پر موقوف ہے، اگر ہمارا ایمان کامل نہیں ہوا تو ہم دنیا و آخرت کی بھلائیوں سے بھی محروم ہوسکتے ہیں ۔

اللہ پاک سے دعا ہے کہ ہمیں ان باتوں پر عمل کرنے۔ اور دوسروں تک پہچانے کی توفیق عطا فرمائیں آمین ۔