شعبہ فلکیات دعوتِ اسلامی کے تحت درسِ نظامی کے طلبۂ کرام، علمائے کرام اور میٹرک پاس اسٹوڈنٹس کے لیے توقیت، فلکیات اور جغرافیہ سیکھنے کا سنہری موقع فراہم کیا جا رہا ہے۔

شعبے کی جانب سے آن لائن ”توقیت و فلکیات کورس“ کے انعقاد کا اعلان کیا گیا ہے جو کہ مکمل طور پر مفت ہوگا اور اس کی کلاسیں آن لائن گوگل میٹ (Google Meet) کے ذریعے منعقد کی جائیں گی۔

کورس کا دورانیہ، اوقات اور تاریخ:

کورس کا آغاز 25 نومبر 2026ء سے ہوگا جو 24 دسمبر 2026ء تک جاری رہے گا اور کلاس کی ٹائمنگ دوپہر 2:15 سے 3:00 بجے تک ہوگی جبکہ ہفتہ وار تعطیل اتوار ہوگی۔

اس کورس میں آپ کیا سیکھ سکتے ہیں؟:

٭نماز اور سحر و افطار کے اوقات نکالنے کے طریقے٭ 6 ماہ کا دن اور 6 ماہ کی رات کہاں اور کیوں ہوتی ہے؟٭دن اور رات کیسے بنتے ہیں اور چھوٹے بڑے کیوں ہوتے ہیں؟٭ کمپاس کیسے کام کرتا ہے اور اس کے استعمال کا طریقہ٭ رمضان کبھی سردی اور کبھی گرمی میں کیوں آتا ہے؟٭رؤیتِ ہلال (چاند دیکھنے کے احکام و سائنسی اصول) اور اس کے علاوہ بہت کچھ۔

کتاب اور نصاب:

یہ مکمل کورس کتاب ”نصابِ توقیت“ سے پڑھایا جائے گالہٰذا بروقت کتاب حاصل کر لیں۔

سرٹیفیکیٹ اور داخلہ:

کورس کامیابی سے مکمل کرنے والے طلبہ کو سرٹیفیکیٹ بھی دیا جائے گا۔

داخلے اور دیگر تفصیلات کے لیے اس نمبر پر رابطہ کیا جاسکتا ہے، واٹس ایپ نمبر: 0343-1164026۔(رپورٹ: شعبہ فلکیات دعوتِ اسلامی ، کانٹینٹ:غیاث الدین عطاری)

دعوتِ اسلامی کے شعبہ فلکیات کے زیرِ اہتمام ”Astronomy Course“ کے دوسرے لیول کا باقاعدہ آغاز کیا جا رہا ہے۔

علمِ فلکیات کے شائقین کے لیے یہ ایک اہم موقع ہے، جہاں وہ اس علم کی گہرائیوں کو سمجھ سکیں گے۔ یہ ایک مکمل طور پر مفت آن لائن کورس ہے جس کی کلاسیں گوگل میٹ پلیٹ فارم پر منعقد ہوں گی۔

کورس کا انعقاد اور تاریخ:

ذرائع سے ملنے والی معلومات کے مطابق، اس کورس کا آغاز ان شاء اللہ الکریم 23 نومبر 2026ء کو ہوگا جبکہ کورس کے نصاب اور اس کے اہم موضوعات کی تفصیل کچھ یوں ہے۔

دوسرے لیول میں شرکا کو درج ذیل اہم موضوعات پر مہارت فراہم کی جائے گی:

٭نمازوں کے اوقات کا تعین: پانچوں نمازوں کے اوقات کو جدید اور تحقیقی انداز میں معلوم کرنے کی عملی تربیت۔

٭کیلکولیشن: دنیا کے ان خطوں کی کیلکولیشن جہاں چھ ماہ کا دن اور چھ ماہ کی رات ہوتی ہے ۔

٭فجر و عشا کے اوقات: ان مقامات اور حالات کا علم جہاں فجر و عشا کا وقت نہیں آتا اور اسے معلوم کرنے کا فارمولا۔

٭ناٹیککل المینیک: ناٹیکل المینیک (Nautical Almanac) کے استعمال کا طریقہ۔

٭بروج اور ابجد: بروج معلوم کرنے کا طریقہ اور علمِ ابجد کا استعمال۔

داخلے کی شرائط: اس کورس میں صرف وہی طلبہ داخلے کے اہل ہوں گے جنہوں نے ”Astronomy Course“ کے پہلے لیول میں کم از کم 70 فیصد نمبر حاصل کیے ہیں نیز ایسے طلبہ جن کے نمبر 70 فیصد سے کم ہیں، انہیں ہدایت کی گئی ہے کہ وہ دوبارہ ٹیسٹ دینے کے لیے جلد از جلد رابطہ فرمائیں، تاکہ وہ بھی اس علمی سفر میں شامل ہو سکیں۔

دعوتِ اسلامی کے زیرِ اہتمام عالمی مدنی مرکز فیضانِ مدینہ کراچی سے ہفتہ وار مدنی مذاکرے کا انعقاد کیا جاتا ہے  جس میں عقائد، فلاحی و دینی موضوعات اور روزمرہ مسائل کے جوابات قرآن و سنت کی روشنی میں دیے جاتے ہیں۔

اسی سلسلے کو برقرار رکھتے ہوئےدعوتِ اسلامی کے عالمی مدنی مرکز فیضانِ مدینہ کراچی میں 7 نومبر 2026ء کو ہفتہ وار مدنی مذاکرے کا انعقاد کیا گیا جس میں ملک بھر اور بیرونِ ملک سے کثیر تعداد میں عاشقانِ رسول نے شرکت کی۔

ذرائع سے ملنے والی معلومات کے مطابق عالمی مدنی مرکز فیضانِ مدینہ کراچی میں بالمشافہ اور دیگر شہروں و ممالک میں مدنی چینل کے ذریعے لاکھوں کی تعداد میں زائرین و ناظرین نے اس بابرکت نشست میں شمولیت حاصل کی۔

مدنی مذاکرے کے دوران عاشقانِ رسول کی جانب سے پوچھے گئے مختلف دینی، اخلاقی اور اصلاحی سوالات کے شیخِ طریقت، امیرِ اہل ِسنّت حضرت علامہ مولانا ابو بلال محمد الیاس عطار قادری رضوی دَامَتْ بَرَکَاتُہُمُ الْعَالِیَہ نے دلائل و حکمت سے بھرپور جوابات ارشاد فرمائے جن میں سے بعض درج ذیل ہیں:

مدنی مذاکرے کے بعض سوال وجواب

سوال: ایک پوسٹ میں لکھا تھا:مطالعہ وقت کی دیوار میں کیا گیا وہ سوراخ ہے جہاں سے انسان صدیوں پرانے ذہنوں کی خوشبوسُونگھ سکتا ہے، اس بارے میں آپ کیا فرماتے ہیں؟

جواب: جو زندہ حضرات ہوتے ہیں ،اُن کی ظاہری صحبت ملتی ہے ،زیارت ہوتی ہے اور ذہن بھی معلوم ہوتا ہے مگر جو اس دنیا سے جا چکے ہیں ،اُن کی ظاہری صحبت نہیں ملتی ،تاہم مطالعہ کرنا (یعنی دِینی کتابیں اور رسائل پڑھنا) ایک ذریعہ ہے جس سے یہ کمی کسی حد تک پوری کی جاسکتی ہے۔ حضرت عبداللہ بن مبارک رحمۃ اللہ علیہ سے لوگوں نے عرض کی کہ آپ با جماعت نماز ادا کرنے کے بعد ہمارے ساتھ کیوں نہیں بیٹھتے؟فرمایا: میں جا کر صحابہ و تابعین(رضی اللہ عنہم اجمعین) کے ساتھ بیٹھ جاتا ہوں ،انہوں نے کہا کہ وہ تو وفات پا چکے ہیں، وہ کہاں ہیں؟ فرمایا: میں مطالعہ کرنے چلا جاتا ہوں ،اس کے ذریعے صحابہ و تابعین(رضی اللہ عنہم اجمعین) کی سیرت کو پا لیتا ہوں ۔ یوں ایک لحاظ سے اُن کی صحبت حاصل ہو جاتی ہے ۔

سوال: سنجیدگی اور چہرے پر مسکراہٹ میں توازن کیسے برقرار رہے ؟

جواب: سنجیدگی اور چہرے پر مسکراہٹ موقع کی مناسبت سے ہی ہو گا، بغیر کسی وجہ کے کوئی مسکراتا رہے تو لوگ اسے کیا سمجھیں گے؟ ہر وقت خاموش رہنا یا منہ پھُلا کر رکھنا سنجیدگی نہیں ۔اسی طرح مسکرانا ،خوش طبعی کی ایسی بات کرنا جو کسی کی دل آزاری کا باعث نہ ہویا عیب کھلنے کا سبب نہ ہو، یہ غیر سنجیدگی نہیں ۔نبیِ کریم صلی اللہ علیہ والہ وسلم بہت مسکرایا کرتے تھے اور بہت کم مقدار میں آپ سے خوش طبعی بھی ثابت ہے۔بندہ ہشاش بشاش رہے،کسی کا دل نہ دُکھائے ،کسی کو اس کے رویے کی وجہ سے شکایت پیدا نہ ہو۔

سوال: آپس کی ناچاقیوں اور غلط فہمیوں کو کیسے دُور کیا جائے ؟

جواب:اس کی کئی صورتیں بنیں گی،مکتبۃ المدینہ کارسالہ’’ناراضیوں کاعلاج“ پڑھیں،غلطی ہو جائے تو معافی تلافی کر لیں ،توبہ کرنا بنتا ہو تو تو بہ کریں ، عاجزی اختیار کریں تو ناچاقیوں اور غلط فہمیوں کا حل ہوتا رہے گا۔

سوال: آج کا انڈہ کل کی مرغی سے بہتر ہے، اس محاورے کا کیا مطلب ہے؟

جواب: اس کا مطلب یہ ہے کہ آج تھوڑا نفع مل رہا ہے تو اسے حاصل کر لیں ،زیادہ کے انتظار میں اسے چھوڑا نہ جائے ،ایسا نہ ہو کہ کل یہ تھوڑا نفع بھی نہ ملے ۔حضرت زبیر بن عوّام رضی اللہ عنہ نہایت کامیاب تاجر تھے ۔کامیابی کا راز پوچھا گیا تو فرمایا کہ: میں نےکبھی کوئی چیز بغیر دیکھے نہیں خریدی اور کم نفع کو بھی کبھی رد نہیں کیا۔اللہ پاک جسے چاہے برکت سے نواز دیتا ہے ۔اس لیے تھوڑے نفع کو نہ چھوڑا جائے ،قطرہ قطرہ مل کر دریا بنتا ہے ۔حضرت عبدالرحمن بن عوف رضی اللہ عنہ بھی بہت مالدارتاجر تھے ،ان سے ان کی مالداری کے بارے میں پوچھا گیا تو آپ نے اس کے3 اسباب ارشاد فرمائے :(1)میں نے نفع کو کبھی نہیں ٹھکرایا(2)جب بھی مجھ سے جانور خریدا جاتاہےتو میں اسے بیچنے میں تاخیر نہیں کرتا(3)میں اُدھار نہیں بیچتا۔

سوال: محاورہ کیا ہوتا ہے ؟

جواب: مختصر الفاظ کا مجموعہ جس میں کئی الفاظ کو سمیٹا گیا ہو،اُسے محاورہ کہتے ہیں۔اس سے لفظی معنیٰ مراد نہیں ہوتے بلکہ مُرادی معنیٰ لینے ہوتے ہیں جیسے میرا بیٹا چاند کا ٹکڑا ہے، اس سے مراد واقعی چاند کا ٹکڑا ہونا نہیں بلکہ حسین و خوبصورت ہونا مُراد ہے ۔ محاورے کے الفاظ کچھ اورہوتے ہیں اورمرادی معنیٰ کچھ اور۔ محاورہ گفتگو اور تحریر کا حُسن ہوتا ہے۔محاورے کے ذریعے بات سمجھانا آسان ہوتا ہے ۔

سوال: اس شعر کا کیا مطلب ہے:؟

جواب: غالباً یہ مفتیِ اعظم ہند حضرت علامہ مولانا محمد مصطفیٰ رضا خان نوری رحمۃ اللہ علیہ کی جوانی کا شعر ہے اور یہ مقطع ہے ،مقطع وہ آخری شعر ہوتا ہے جس میں شاعر اپنا تخلص ذکر کرتا ہے ۔اس شعر کا مطلب ہے کہ جو نیکیاں کرنی ہیں جوانی میں کر لو، جب جوانی ڈھلتی ہے تو زندگی بھی ڈَھل رہی ہوتی ہے(یعنی کم ہو رہی ہوتی ہے)، پھر انسان چُستی کے ساتھ نیکیاں نہیں کر پاتا ۔ جب میں جوان تھا تو بہت بھاگ دوڑ کرتا تھا، بہت سفر بھی کئے ،ایک مرتبہ تقریباً 7 گھنٹے مدنی مذاکرہ بھی کیا تھا ،کھڑے ہو کر 3،3 گھنٹے محرم شریف کے بیانات بھی کئے ہیں ،اَب بڑھاپے کی وجہ سے یہ سوچ بھی نہیں سکتا۔ اس سے میرے وہ اسلامی بھائی درس لیں جو ابھی جوان ہیں ( جوانی میں ہی خوب دِین کا کام کریں)۔

سوال: حضرت علامہ عبد المصطفیٰ الازہری رحمۃ اللہ علیہ کے بارے میں امیر اہل سنت دامت برکاتہم العالیہ نے کیا بتایا؟

جواب: حضرت علامہ عبد المصطفیٰ الازہری ، صدر الشریعہ مفتی امجد علی اعظمی رحمۃ اللہ علیہما کے صاحبزادے ،شیخ الحدیث ،کئی علماء کے شاگرد تھے ،جو خود اور ان کے آگے شاگرد دنیا میں پھیلے ہوئے ہوں گے ،یہ بھی شاعر تھے ۔پہلے علماء شاعر اور حکیم ہوا کرتے تھے ،اگر اس شعبے(Field)میں علمائے کرام ہوں تو اس سے اُمّت کو زیادہ نفع پہنچے ۔

سوال: دل کی تکلیف کا روحانی علاج کیا ہے ؟

جواب:دل کی تکلیف کا روحانی علاج

یا اَللّٰہُ قَوِّنِیْ وَ قَلْبِیْ(یعنی: اے اللہ! مجھے اور میرے دل کو قوّت عطا فرما)۔

جس کا دل گھبراتا ہو، دھڑکن بڑھ گئی ہو، دل بڑا ہو گیا ہو، ہارٹ اٹیک ہوا ہو، الغرض دل میں کسی قسم کی بیماری ہو، ہر نماز کے بعد دل پر ہاتھ رکھ کر سات بار پڑھ لے اِنْ شَآءَ اللّٰہ الکریم فائدہ خود ہی دیکھ لے گا۔

مُدّت: تا حصولِ مُراد۔

تاکید: کسی قاری صاحب کو سنا دیجیے۔

یقیناً: اللہ پاک چاہے تو ہی فائدہ ملے۔

لازمی: نماز کی پابندی اور لوگوں کو تکلیف دینے سے پرہیز۔

سوال: اِس ہفتے کارِسالہ ”حیوانات و جنّات کے واقعات“ پڑھنے یا سُننے والوں کو امیر اہل سنت دامت برکاتہم العالیہ نے کیا دُعا دی ؟

دعوتِ اسلامی کا شعبہ مدنی کورسز اسلامی بھائیوں کی دینی اور اخلاقی  تربیت کے لیے ملک بھر میں اپنی خدمات سرانجام دے رہا ہے جس کا بنیادی مقصد سنتِ رسول کی پیروی اور معاشرے میں مثبت دینی اقدار کو فروغ دینا ہے۔

دعوتِ اسلامی کے عالمی مدنی مرکز فیضانِ مدینہ کراچی میں 7 نومبر 2026ء کو شعبہ مدنی کورسز کے زیرِ اہتمام ایک عظیم الشان سنتوں بھرے اجتماع کا انعقاد کیا گیا جس میں کثیر تعداد میں اسلامی بھائیوں نے شرکت کی۔

اجتماع کا باقاعدہ آغاز تلاوتِ کلامِ پاک اور سرورِ کائنات صلَّی اللہ علیہ واٰلہٖ وسلَّم کی بارگاہ میں نعتِ رسولِ مقبول سے ہوا جس کے بعد خلیفۂ امیرِ اہلسنت حضرت مولانا حاجی عبید رضا عطاری مدنی مدظلہ العالی نے سنتوں بھرا بیان کیا۔

اپنے بیان کے دوران خلیفۂ امیرِ اہلسنت مدظلہ العالی نے حاضرین کی دینی و اخلاقی تربیت کرتے ہوئے انہیں مدنی پھولوں سے نوازا اور زندگی کے تمام شعبوں میں سنتِ نبوی پر عمل پیرا ہونے کے حوالے سے اُن کی ذہن سازی کی۔

خلیفۂ امیرِ اہلسنت مدظلہ العالی نے اسلامی بھائیوں کو دعوتِ اسلامی کے دینی و فلاحی کاموں میں بڑھ چڑھ کر حصہ لینے کی ترغیب دلائی اور اخلاص کے ساتھ دینِ اسلام کا پیغام عام کرنے کا ذہن دیا۔

دعوتِ اسلامی کے شعبہ فلکیات کے زیرِ اہتمام 9 اور 10 نومبر 2026ء کو 2 دن کا آن لائن مفت (FREE) ”رویتِ ہلال سیشن“ منعقد کیا جا رہا ہے جوکہ روزانہ دوپہر 02:30 بجے سے 03:30 بجے تک جاری رہے گا۔

اس سیشن کے دوران اسلامی بھائیوں کو علمِ فلکیات اور چاند سے متعلق اہم معلومات فراہم کی جائیں گی۔

کورس کے نصاب میں درج ذیل موضوعات شامل ہیں:

٭ چاند نظر آنے کی شرائط ٭سورج و چاند کی جسامت کتنی ہے؟٭نئے چاند کی پیدائش اور چاند کی عمر کی وضاحت٭ سورج اور چاند کا زمین سے فاصلہ ٭چاند دکھائی دینے کے اعتبار سے کبھی مکمل گول یا کبھی کم نظر آنے کی وجوہات٭سورج اور چاند کی گردش اور اس کے دورانیہ۔

سیشن میں جمادی الاخریٰ 1448ھ کا چاند نظر آنے کے امکانات پر تفصیلی پریکٹیکل رپورٹ کے ساتھ اسلامی بھائیوں کی رہنمائی کی جائے گی۔ واضح رہےیہ تمام کلاسز گوگل میٹ (Google Meet) پر آن لائن لی جائیں گی۔

کلاس کا لنک

https://meet.google.com/ymn-gwsg-qwy

نوٹ:کلاس کے دوران اپنے پاس ڈائری اور قلم لازمی رکھیں تاکہ اہم نکات کو نوٹس کی صورت میں محفوظ کیا جا سکے۔سیشن سے متعلق مزید معلومات کے لیے واٹس ایپ نمبر (0343-1164026) پر رابطہ کیا جا سکتا ہے۔

اگر آپ کو گوگل میٹ پر کلاس جوائن کرنے کا طریقہ معلوم نہیں ہے، تو آپ اس ویڈیو کے ذریعے سیکھ سکتے ہیں:

ویڈیو لنک

https://youtu.be/bReVxCnrg98?si=3Om8_

مطالعہ ایک طالب علم کی زندگی کا سب سے قیمتی سرمایہ اور علم کے دروازے کھولنے کی اصل چابی ہے۔ جب ہم کتابیں پڑھتے ہیں تو دراصل ہم مصنف کے ذہن اور اس کے صدیوں کے تجربات سے براہِ راست گفتگو کر رہے ہوتے ہیں۔ لیکن اس علمی گفتگو میں اکثر ایک رکاوٹ سامنے آ جاتی ہے اور وہ رکاوٹ مشکل اور نامانوس الفاظ کی ہوتی ہے۔ خاص طور پر جب ہم دینی علوم، فقہ، حدیث یا تفاسیر کا مطالعہ کرتے ہیں، تو عربی، فارسی یا ثقیل اردو کے ایسے بہت سے الفاظ ہماری نظروں سے گزرتے ہیں جن کا مطلب ہمیں بالکل معلوم نہیں ہوتا۔ ٹھیک اسی وقت اگر ہمارے پاس لغت (ڈکشنری) موجود نہ ہو تو مطالعے کا سارا مزہ کرکرا ہو جاتا ہے اور بعض اوقات تو پوری عبارت کا مطلب ہی کچھ کا کچھ بن جاتا ہے۔

لغت دراصل ایک خاموش استاد کی طرح ہوتی ہے جو ہر وقت، ہر جگہ ہماری رہنمائی کے لیے تیار رہتی ہے۔ ہم مدرسے کے طلباء جب عربی عبارات حل کرنے بیٹھتے ہیں، تو لغت کے بغیر ہمارا گزارا ہی نہیں ہوتا۔ مثال کے طور پر اگر 'المنجد'، 'مصباح اللغات' یا اردو کے لیے 'فیروز اللغات' ہمارے پاس نہ ہو تو ہم مشکل الفاظ کے درست معانی، ان کی جمع اور ان کے باب تک نہیں پہنچ سکتے۔ صرف معانی ہی نہیں، لغت سے ہمیں الفاظ کا صحیح تلفظ اور ان پر اعراب (زبر، زیر، پیش) کا بھی علم ہوتا ہے۔ ایک طالب علم کے لیے صرف لفظ کو دیکھ کر پڑھ لینا کافی نہیں ہوتا، بلکہ اس کا درست تلفظ اور مخارج ادا کرنا بہت ضروری ہے، ورنہ ذرا سی غلطی سے معنی بالکل بدل جانے کا خطرہ ہوتا ہے۔

آج کل کچھ طلباء لغت دیکھنے سے کتراتے ہیں اور دورانِ مطالعہ محض اپنے اندازے سے مطلب نکالنے کی کوشش کرتے ہیں۔ علم حاصل کرنے کے راستے میں یہ ایک بہت بڑی غلطی ہے۔ اندازے سے مطلب نکالنے والا انسان کبھی پختہ علم حاصل نہیں کر سکتا۔ شروع شروع میں لغت دیکھنا تھوڑا مشکل اور اکتا دینے والا کام ضرور لگتا ہے، کیونکہ بار بار کتاب چھوڑ کر لغت کے بھاری بھرکم صفحات پلٹنے پڑتے ہیں اور حروفِ تہجی کے اعتبار سے لفظ کا مادہ (Root Word) تلاش کرنا پڑتا ہے، لیکن یقین جانیں جب اس محنت کی عادت پڑ جائے تو یہ ایک نہایت دلچسپ مشغلہ بن جاتا ہے۔ آپ لغت میں ایک لفظ ڈھونڈنے جاتے ہیں اور اس کے آس پاس موجود مزید چار نئے الفاظ آپ کو سیکھنے کو مل جاتے ہیں۔ اس طرح آہستہ آہستہ طالب علم کے ذخیرہِ الفاظ (Vocabulary) میں زبردست اضافہ ہوتا چلا جاتا ہے۔

اس کے علاوہ، لغت کا ایک بڑا فائدہ یہ ہے کہ جب ہم خود محنت کر کے لغت سے کسی لفظ کا معنی تلاش کرتے ہیں تو ہمارا ذہن اس لفظ کو ایک طویل عرصے تک محفوظ کر لیتا ہے۔ اگر کوئی استاد یا ساتھی ہمیں فوراً مطلب بتا دے تو وہ بات کچی رہتی ہے اور جلدی بھول جاتی ہے، لیکن اپنی ذاتی محنت سے لغت کے سمندر سے تلاش کیا گیا لفظ ذہن کی تختی پر ہمیشہ کے لیے نقش ہو جاتا ہے۔ اسی عادت سے ترجمہ کرنے کی صلاحیت میں بھی بے پناہ نکھار آتا ہے اور عبارات کے پوشیدہ مفاہیم کھل کر سامنے آ جاتے ہیں۔

موجودہ دور میں تو لغت کا استعمال اور بھی زیادہ آسان ہو گیا ہے۔ اب تو موبائل فونز میں بڑی بڑی مستند لغات کی ایپلی کیشنز موجود ہیں، جن کے ذریعے چند سیکنڈوں میں مشکل سے مشکل لفظ کا مطلب سکرین پر سامنے آ جاتا ہے۔ اس لیے اب ڈیجیٹل دور میں لغت نہ دیکھنے یا سستی کرنے کا کوئی بہانہ باقی نہیں رہا۔ اگر ہم علم دین اور مطالعے میں واقعی رسوخ اور مہارت حاصل کرنا چاہتے ہیں، تو ہمیں لغت کو اپنا بہترین دوست بنانا ہوگا۔

یہ کہنا بالکل غلط نہ ہوگا کہ لغت کے بغیر مطالعہ کرنا ایسا ہی ہے جیسے بغیر ہتھیار کے کسی میدانِ جنگ میں اتر جانا۔ ہر طالب علم، بالخصوص دینی علوم حاصل کرنے والوں کو چاہیے کہ وہ لغت دیکھنے کی محنت کو اپنی روزمرہ روٹین کا لازمی حصہ بنائیں۔ اسی محنت اور جستجو سے ہی علم میں گہرائی، وسعت اور پختگی آتی ہے۔ اللہ پاک ہمیں علمِ نافع عطا فرمائے اور مطالعے کا سچا شوق نصیب کرے۔ آمین بجاہ النبی الامین ﷺ ۔

لغت مطالعے میں ریڑ کی ہڈی کی مانند ہے جب کوئی طالب علم یا محقق یا کوئی عام قاری کتاب پڑھتا ہے تو بعض اوقات ایسے الفاظ سامنے اتے ہیں جن کے معنی واضح نہیں ہوتے ایسے صورت میں کلام کا سیاق و سباق یا مفہوم سمجھ نہیں اتا اور یہ سورت عموما عجمی کو عربی پڑھتے ہوئے پیش اتی ہے ایسی صورت میں لغت اہم کردار ادا کرتے ہوئے مطالعے کو آسان مفید اور موثر بناتی ہے۔

مطالعہ میں لغت کی حیثیت:مطالعہ میں لغت کی حیثیت ایک خاموش استاد کی ہے جو طالب علم کو ذہنی خود مختار بنا دیتی ہے۔ الفاظ کے معنی خود تلاش کرنے کی جستجو جہاں علم میں گہرائی پیدا کرتی ہے، وہیں یہ طالب علم کے علمی اعتماد کو بھی بڑھاتی ہے۔ یہی وہ مہارت ہے جو آگے چل کر آپ کو مشکل اور ثقہ کتابوں کے سمندر سے موتی چننے کے قابل بناتی ہے

الفاظ کا تلفظ: صرف معنی جان لینا کافی نہیں ہوتا، بلکہ لفظ کو درست طریقے سے ادا کرنا اور لکھنا بھی ضروری ہے۔ بعض اوقات دوران مطالعہ ایسے الفاظ کا سامنا کرنا پڑتا ہے جن کا تلفظ معلوم نہیں ہوتا تو ان کا تلفظ معلوم کرنے کے لیے بھی لغت اپنا اہم کردار ادا کرتی ہے جس سے الفاظ بولنے میں صحیح مدد ملتے ہیں۔

الفاظ کا خزانہ (vocabulary) :دورانِ مطالعہ لغت کا باقاعدہ استعمال طالب علم اور زبان سیکھنے والے کے لیے ذخیرہِ الفاظ میں وسعت پیدا کرتا ہے۔ جب مطالعتی (مطالعہ کرنے والا) ایک لفظ کے معنی تلاش کرتے ہوئے اکثر بہت سے نئے ہم معنی (مترادف) (Synonyms) اور الفاظ ضد (متضاد) (Antonyms) الفاظ بھی حاصل کرتے ہیں جس سے ترجمہ کرنے اور بول چال میں مزید نکھار پیدا ہوتا ہے۔

دینی طلباء کے لیے لغت کی اہمیت: طالبِ علم کے لیے عربی مطالعہ، عربی کتب کی تیاری اور اُن کے حاشیوں کو سمجھنے میں لغت نہایت اہم کردار ادا کرتی ہے۔ خصوصاً دینی طلبہ کے لیے لغت اس لیے ضروری ہے کہ اس کے ذریعے مشکل الفاظ، اصطلاحات اور عبارات کا صحیح مفہوم معلوم ہوتا ہے۔ لغت کے بغیر عربی علوم میں مہارت حاصل کرنا اور کتب سے بھرپور فائدہ حاصل کرنا دشوار ہے۔

ترجمہ میں مہارت:طالبِ علم کے لیے مسلسل لغت کا استعمال ترجمہ کرنے کی صلاحیت پیدا کرتا ہے۔ اس کے ذریعے الفاظ کے صحیح معانی، مناسب مفہوم اور درست استعمال کا علم ہوتا ہے، جس سے ترجمہ زیادہ واضح، درست اور مؤثر بنتا ہے۔ لغت کے باقاعدہ استعمال سے طالبِ علم آہستہ آہستہ مطالعتی کتب کے ترجمہ میں مہارت حاصل کر لیتا ہے۔

محاورات اور ضرب الامثال کا فہم (Understanding Idioms):بعض اوقات قاری کو مطالعے کے دوران ایسے چھپے ہوئے معانی کا سامنا ہوتا ہے جن کا تعلق الفاظ کے ظاہری مطلب کے بجائے ان کے علامتی یا محاوراتی مفہوم سے ہوتا ہے، اور یہاں لغت ایک بہترین رہنما کا کردار ادا کرتی ہے۔

مطالعہ کے دوران اپنے پاس ہمیشہ ایک آسان اور معیاری لغت (چاہے وہ کتابی صورت میں ہو یا موبائل ایپ کی شکل میں) ضرور رکھیں۔ کسی لفظ پر اٹک جائے تو اسے فوری دیکھ لینے سے وہ لفظ کافی دیر تک ذہن میں محفوظ رہتا ہے۔

مختصراً یہ کہ لغت مطالعہ کے میدان میں نہایت اہم حیثیت رکھتی ہے۔ یہ نہ صرف مشکل الفاظ کے معانی، تلفظ اور درست استعمال سے آگاہ کرتی ہے بلکہ ذخیرۂ الفاظ میں اضافہ، ترجمہ میں مہارت اور علمی اعتماد پیدا کرنے کا بھی ذریعہ بنتی ہے۔ خصوصاً دینی طلبہ کے لیے عربی کتب، حواشی اور علمی عبارات کو سمجھنے میں لغت ایک بہترین مددگار ثابت ہوتی ہے۔ لہٰذا ہر طالبِ علم کو چاہیے کہ دورانِ مطالعہ لغت کے استعمال کو اپنی مستقل عادت بنائے تاکہ علم کے دروازے اس پر وسیع ہوتے جائیں۔

مطالعہ انسان کی زندگی میں بہت اہمیت رکھتا ہے کیونکہ اسی کے ذریعے انسان علم حاصل کرتا ہے اور اپنے اندر بہتری لاتا ہے۔ جب ہم کتابیں پڑھتے ہیں تو ہمیں نئی نئی معلومات ملتی ہیں، لیکن بعض اوقات ہمیں ایسے الفاظ بھی ملتے ہیں جن کا مطلب سمجھ میں نہیں آتا۔ اس وجہ سے پوری عبارت سمجھنا مشکل ہو جاتا ہے۔ میرے خیال میں اگر ہم لغت کا استعمال کریں تو یہ مشکل آسان ہو سکتی ہے کیونکہ لغت ہمیں الفاظ کے معنی سمجھاتی ہے اور پڑھائی میں مدد دیتی ہے۔

لغت کیا ہے اور کیوں ضروری ہے؟لغت ایک ایسی کتاب ہوتی ہے جس میں الفاظ کے معنی، ان کا درست تلفظ اور استعمال بتایا جاتا ہے۔ یہ ہر طالب علم کے لیے بہت ضروری ہوتی ہے کیونکہ اس کے ذریعے ہم نئے الفاظ سیکھتے ہیں۔ جب ہم لغت استعمال کرتے ہیں تو ہمیں زبان کو بہتر سمجھنے میں مدد ملتی ہے اور ہم آہستہ آہستہ اچھے طریقے سے بولنا اور لکھنا سیکھ جاتے ہیں۔

مطالعہ میں لغت کی اہمیت:جب ہم کسی سبق کا مطالعہ کرتے ہیں اور ہمیں کوئی لفظ مشکل لگتا ہے تو ہم فوراً لغت کی مدد سے اس کا مطلب معلوم کر سکتے ہیں۔ اس سے نہ صرف وہ لفظ سمجھ میں آتا ہے بلکہ پوری عبارت بھی آسان ہو جاتی ہے۔ اگر ہم لغت استعمال نہ کریں تو کئی باتیں ادھوری رہ جاتی ہیں اور ہمیں صحیح سمجھ حاصل نہیں ہوتی۔

الفاظ کے ذخیرے میں اضافہ:لغت کے استعمال سے ہمارے الفاظ میں اضافہ ہوتا ہے۔ جتنا زیادہ ہم نئے الفاظ سیکھتے ہیں اتنا ہی ہمارا علم بڑھتا ہے۔ اس کے ساتھ ساتھ ہم اپنی بات بھی بہتر طریقے سے بیان کر سکتے ہیں۔ ایک اچھے طالب علم کی یہ خوبی ہوتی ہے کہ وہ الفاظ کو سمجھ کر صحیح جگہ پر استعمال کرے، اور یہ چیز لغت کے بغیر ممکن نہیں۔

درست زبان اور املا کی بہتری:لغت ہمیں صرف الفاظ کے معنی ہی نہیں بتاتی بلکہ ان کا درست املا اور تلفظ بھی سکھاتی ہے۔ اس سے ہم اپنی غلطیوں کو درست کر سکتے ہیں اور ہماری تحریر بہتر ہو جاتی ہے۔ خاص طور پر اردو زبان میں صحیح املا بہت اہم ہوتا ہے، اس لیے لغت کا استعمال بہت فائدہ مند ہے۔

خود اعتمادی میں اضافہ:

جب ہمیں الفاظ کے معنی معلوم ہوتے ہیں تو ہمیں پڑھنے اور لکھنے میں اعتماد آتا ہے۔ ہم سبق کو بہتر طریقے سے سمجھتے ہیں اور بغیر کسی کی مدد کے خود بھی سیکھ سکتے ہیں۔ میرے خیال میں لغت انسان کو خود مختار بناتی ہے کیونکہ وہ خود اپنی مشکلات حل کرنا سیکھ جاتا ہے۔

آج کے دور میں لغت کا استعمال:آج کل لغت صرف کتاب کی شکل میں نہیں بلکہ موبائل فون میں بھی آسانی سے دستیاب ہے۔ بہت سی ایپس اور ویب سائٹس ہیں جہاں ہم فوراً کسی بھی لفظ کا مطلب دیکھ سکتے ہیں۔ اس سے طلبہ کے لیے سیکھنا اور بھی آسان ہو گیا ہے۔ میں خود بھی کبھی کبھی موبائل سے الفاظ کا مطلب دیکھ لیتا ہوں، جس سے مجھے کافی فائدہ ہوتا ہے۔

تعلیم میں لغت کا کردار:جو طالب علم باقاعدگی سے لغت استعمال کرتے ہیں وہ پڑھائی میں زیادہ کامیاب ہوتے ہیں۔ وہ سوالات کو اچھی طرح سمجھتے ہیں اور بہتر انداز میں جواب لکھتے ہیں۔ اس کے علاوہ ان کی تحریر بھی صاف اور مؤثر ہوتی ہے، جس سے استاد پر اچھا اثر پڑتا ہے۔

آخر میں ہم یہ کہہ سکتے ہیں کہ لغت مطالعہ میں بہت اہم کردار ادا کرتی ہے۔ یہ نہ صرف ہمارے علم میں اضافہ کرتی ہے بلکہ ہماری زبان کو بھی بہتر بناتی ہے۔ ہمیں چاہیے کہ ہم روزانہ مطالعہ کرتے وقت لغت کا استعمال کریں تاکہ ہم زیادہ سے زیادہ سیکھ سکیں اور ایک کامیاب طالب علم بن سکیں۔

مطالعہ میں لغت کی اہمیت ایک نہایت بنیادی اور اساسی حیثیت رکھتی ہے، خصوصاً جب بات عربی اسلامی کتب یا قدیم اردو متون کے فہم کی ہو۔ لغت دراصل الفاظ کے معانی، ان کے استعمال اور سیاق و سباق کو سمجھنے کا ذریعہ ہے، جس کے بغیر کسی بھی علمی متن کا صحیح ادراک ممکن نہیں۔ اگر قاری کو الفاظ کے اصل معانی اور ان کی باریکیوں کا علم نہ ہو تو وہ عبارت کا مفہوم صحیح طور پر نہیں سمجھ سکتا، جس کے نتیجے میں غلط فہمیاں پیدا ہو سکتی ہیں۔ اس لیے مطالعہ کے دوران لغت سے واقفیت نہ صرف ضروری بلکہ ناگزیر ہے۔

علماء نے بھی لغت کے علم کو فہمِ دین کی بنیاد قرار دیا ہے۔ چنانچہ امام جلال الدین سیوطی رحمۃ اللہ علیہ فرماتے ہیں: لا يجوز تفسير القرآن لمن لا يعرف اللغة العربية یعنی جو شخص عربی زبان (اور اس کی لغت) سے واقف نہیں، اس کے لیے قرآن کی تفسیر کرنا جائز نہیں۔ (الاتقان فی علوم القرآن، جلد 2، صفحہ 179)

اس قول سے واضح ہوتا ہے کہ محض الفاظ کا سرسری علم کافی نہیں بلکہ لغوی مہارت ضروری ہے، کیونکہ یہی مہارت انسان کو نصوص کے دقیق معانی تک پہنچاتی ہے اور اسے سطحی یا غلط فہم سے بچاتی ہے۔

مطالعہ میں لغت کا باقاعدہ استعمال انسان کی مختلف علمی صلاحیتوں کو جلا بخشتا ہے۔ سب سے پہلی صلاحیت “فہمِ دقیق” (deep comprehension) ہے، جس کے ذریعے قاری ایک لفظ کے ظاہری معنی کے ساتھ اس کے ضمنی اور مجازی معانی کو بھی سمجھتا ہے۔ مثال کے طور پر عربی لفظ “عین” کے کئی معانی ہیں: آنکھ، چشمہ، جاسوس، اور قیمتی چیز؛ اب سیاق کے مطابق صحیح معنی کا تعین لغت ہی سے ممکن ہے۔ یہ باریکیاں لغت کے ذریعے ہی واضح ہوتی ہیں۔

دوسری اہم صلاحیت “تحقیقی و تنقیدی شعور” ہے۔ جب قاری لغت کی طرف لو لگاتا ہے تو وہ الفاظ کے اصل مادہ (root) اور اس کے مشتقات کو دیکھتا ہے، جس سے اس میں تحقیق کا ذوق پیدا ہوتا ہے۔ مثال کے طور پر “کتب” کے مادہ سے “کتاب”، “مکتوب”، “کاتب” اور “مکتب” جیسے الفاظ بنتے ہیں، جن سب کا بنیادی مفہوم “لکھنا” “لکھاری” “جہاں لکھتا ہے” ہے۔ اس طرح قاری الفاظ کے درمیان تعلق کو سمجھ کر زیادہ گہرائی سے علم حاصل کرتا ہے۔

تیسری صلاحیت “صحیح استنباط” (correct inference) کی ہے، جو فقہی اور دینی متون میں نہایت اہم ہے۔ ایک لفظ کے مختلف احتمالات میں سے درست معنی کا انتخاب ہی صحیح حکم تک پہنچنے کا ذریعہ بنتا ہے۔ اگر لغت کا سہارا نہ لیا جائے تو استنباط میں غلطی ہو سکتی ہے(حکم ہی صحیح جگہ تک نہیں پہنچے گا پہنچانے والا کیا بنے گا)، جو علمی انحراف کا سبب بن سکتی ہے۔

مزید برآں، لغت کا استعمال غلط تشریحات سے بچنے کا ایک مضبوط ذریعہ ہے۔ دینی متون میں بعض اوقات ایک لفظ کے کئی معانی ہوتے ہیں اور اگر قاری لغت سے مدد نہ لے تو وہ اپنی رائے یا ظاہری مفہوم کی بنیاد پر غلط معنی اخذ کر سکتا ہے۔ یہی غلطی بعض اوقات بڑے فکری انحراف کا سبب بن جاتی ہے(جیسے معتزلہ کا رب تعالیٰ کے لیے جسم کو ثابت کرنا قرآن پاک کے الفاظ کی غلط تشریح کا ہی تو سبب ہے) ۔ اس لیے جب قاری مستند لغات جیسے دور حاضر میں “القاموس الوحید” سے رجوع کرتا ہے تو اسے الفاظ کے مستند اور مستدل معانی حاصل ہوتے ہیں، جس سے وہ درست مفہوم تک پہنچ جاتا ہے۔

خلاصہ یہ ہے کہ مطالعہ میں لغت کا استعمال نہ صرف علمی ترقی کا ذریعہ ہے بلکہ صحیح فہم کی ضمانت بھی ہے۔ یہ قاری کو گہرائی، بصیرت اور احتیاط عطا کرتا ہے اور اسے غلط تشریحات سے محفوظ رکھتا ہے۔ لہٰذا ہر طالبِ علم کو چاہیے کہ وہ مطالعہ کے ساتھ لغت کو لازم پکڑے، تاکہ وہ علم کو درست انداز میں سمجھ سکے اور اس سے حقیقی فائدہ حاصل کر سکے۔"

دنیا میں رہنے والے اربوں انسان اپنا مَافِي الضَّمِیر بیان کرنے کیلئے سیکڑوں زبانیں بولتے ہیں۔ہر زبان اپنے مخصوص قواعد،أسرار،اسلوب ومنھج اور معانی کا مجموعہ ہے ۔ہر زبان کے اندر ایسے کئی تعبیرات اور الفاظ ہوتے ہیں کہ جن کو جاننے کیلئے اس زبان کی لغت Dictionary کا سہارا لینا پڑتا ہے۔جس طرح ایک انسان کی عادات سے اس کے کردار کا پتہ چلتا ہے اسی طرح ایک زبان کی لغت سے اس زبان کی سلاست ،نشیب وفراز کا اندازہ ہوتا ہے ۔ کسی زبان میں موجود تحریر کو درست پڑھنے اور کماحقہ سمجھنے کیلئے ہمیں اس زبان کی لغت کی محتاجی ہے۔ہر زبان اپنے الفاظ کے اندر ایک مخصوص معنی و لطف رکھتی ہے جو دوسروں کا حصہ نہیں ہوتا۔

اس بات کو ایک مثال سے سمجھیے :ایک مرتبہ ایک استاذ صاحب نے کلاس میں موجود طلبہ سے پوچھا کہ مَنْ جَدَّ وَجَدَ( ترجمہ جس نے کوشش کی اُس نے پایا ) کا ترجمہ کیا ہے تو ایک طالبعلم نے بڑے اعتماد کے ساتھ ہاتھ کھڑا کیا کہ استاذ محترم مجھے آتا ہے ۔استاذ صاحب نے فرمایا بتاؤ کیا مطلب ہے( تو طالب علم سمجھا کہ جَدَّ کے معنی دادا کے ہیں اور وَجَدَ وَجْد سے ہے) طالب علم کہنے لگا مَنْ جَدَّ وَجَدَ کا ترجمہ ہے کہ "کس کا دادا وجد میں آیا " استاذ صاحب مسکرانا شروع ہوگئے کہ طالب علم نے یہ محاورہ کس طرز پر حل کیا ہے۔

محترم قارئین! یہ بات قابل توجہ ہے کہ ہر زبان کے اپنے معانی اور ترجمہ ہیں حل کرنے کیلئے اس زبان کی لغت سے مدد لینا ہی قابل اعتماد راہ ہے ۔

قرآن و حدیث کا ترجمہ کرتے ہوئے تو معاملہ اور زیادہ نازک ہوجاتا ہے اس لیے علماء کرام نے باقاعدہ اس علم کے متعلق لغات تحریر کی ہیں جیسے قرآن کے الفاظ سے متعلق امام راغب اصفہانی کی مفردات اور حدیث کی متداول و مشہور لغت مجمع بحار الانوار وغیرہ قابل ذکر ہیں۔کسی لفظ کا ترجمہ کرتے ہوئے اگر لغت میں اس کے معنی دیکھ لیے جائے تو لغت میں ایک لفظ کے مختلف ترجمے ،مختلف اعتبارات و جہات سے لکھے ہوتے ہیں جس کی مدد سے اچھے سے اچھا ترجمہ کیا جاسکتا ہے ۔ایک ہی معنی کو ادا کرنے کیلئے مختلف نوعیت کی الفاظ حاصل کرنے کیلئے بھی لغت کارفرما ثابت ہوتے ہے ۔جیسے اردو میں مدد کیلئے لفظ تعاون ، اعانت ،استمداد بھی استعمال کرسکتے ہیں۔ عربی میں کوشش کیلئے لفظ سعی ، حاول اور ارادے کیلئے قصد،اراد وغیرہ ۔کسی بھی زبان کی لغت دیکھتے ہوئے ایک امر کا خیال رکھنا اشد ضروری ہے کہ "منسوب الیہ بدلنے سے ترجمے میں آسمان زمین کا فرق آجاتا ہے"جیسے اردو میں کسی کو اندر آنے کی دعوت دینی ہے تو آؤ،آئیے ،تشریف لائے، لفظ عربی کی ایک مثال ملاحظہ کیجئے :مَکَر لغت عرب میں ستر یعنی پوشیدگی کے معنی میں ہے اسی لئے خفیہ تدبیر کو بھی مَکَر کہتے ہیں اور وہ تدبیر اگر اچھے مقصد کے لیے ہو تو محمود اور کسی قبیح غرض کے لیے ہو تو مذموم ہوتی ہے مگر اردو زبان میں یہ لفظ فریب کے معنی میں مستعمل ہوتا ہے اس لیے ہر گز شانِ الٰہی میں نہ کہا جائے گا اور اب چونکہ عربی میں بھی دھوکے کے معنیٰ میں معروف ہوگیا ہے اس لیے عربی میں بھی شانِ الٰہی میں اس کا اطلاق جائز نہیں آیت میں جہاں کہیں مذکور ہوا ہے وہاں وہ خفیہ تدبیر کے معنی میں ہے۔(صراط الجنان ،سورة آل عمران، 54 )

لغت سے معنی دیکھ لینے سے ترجمہ میں ایک تسلسل،عمدگی،شائستگی پیدا ہوجاتی ہے ۔لغت کا ایک اصول ہے کہ۔ لا قیاس فی اللغة( لغت میں کوئی قیاس آرائی، اپنی رائے کا دخل نہیں ) لہذا جب کبھی ضرورت ہو تو اٹکل سے ترجمہ بتانے ،مراد سمجھنے کی بجائے لغت سے استفادہ کیا جائے یہاں تک کہ صحابہ کرام رضی اللہ عنھم سے متعلق متعدد حدیثوں میں ملتا ہے کہ جب کوئی مطلب معلومہ ہوتا تو سید عالم ،أفصح العرب صَلَّی اللہ عَلَیْہ واٰلہ وسَلَّم سے پوچھ لیتے۔

عربی زبان میں تو لغت کی اہمیت افادیت یوں بھی بڑھ جاتی ہے کہ صرف ایک زبر،زیر یا پیش تبدیل ہونے سے معنی بالکل بدل جاتے ہیں جیسے جِنازہ جیم کے زیر سے وہ ڈولی ہے جس میں میت رکھی جائے اور جیم کے فتح(جَنازہ )سے خود میت مراد ہوتی ہے ۔( مرأة المناجیح جلد 4 ،حدیث2920)

لَبَنٌ باء کے زبر سے مراد "دودھ" ہے جبکہ لَبِنٌ سے مراد" مٹی کی کچی اینٹ" ہے ۔

لغت کی اہمیت Importance کو اس سے بھی سمجھا جاسکتا ہے کہ بسا اوقات مطالعہ کرتے ہوئے پوری عبارت کی سمجھ آجاتی ہے لیکن صرف ایک لفظ کا ترجمہ معلوم نہ ہونے کی وجہ سے مراد/ بات میں خلل آجاتا ہے ۔لہذا مطالعہ کرتے ہوئے لغت ساتھ رکھی جائے اور جب حاجت ہو تو اس سے مدد حاصل کرکے بات کو واضح سمجھ لیا جائے ۔

زبان بات چیت کا وہ ذریعہ ہے جس سے ہم اپنی بات دوسروں تک پہنچاتے ہیں۔ کسی بھی زبان کو صحیح طرح سے بولنے، لکھنے اور سمجھنے کے لیے "لغت" (Dictionary) ایک بنیادی ضرورت ہے۔ لغت صرف ایک کتاب کا نام نہیں بلکہ یہ علم کا وہ خزانہ ہے جو ہمیں لفظوں کے درست معنی اور ان کے صحیح استعمال کا طریقہ سکھاتا ہے۔ مطالعہ لغت کی اہمیت جتنی دنیاوی کاموں کے لیے ہے، اتنی ہی ہمارے دین کو سمجھنے کے لیے بھی ضروری ہے۔ ذیل میں اہم نکات دیے گئے ہیں جو سادہ انداز میں اس کی اہمیت واضح کرتے ہیں۔

(1) قرآن و حدیث کے فہم میں مدد:دین اسلام کو سمجھنے کا سب سے بڑا ذریعہ قرآن مجید اور احادیثِ نبوی ہیں۔ چونکہ یہ عربی زبان میں ہیں، اس لیے ان کے الفاظ کا حقیقی مطلب جاننے کے لیے لغت کی ضرورت پڑتی ہے۔ لغت ہمیں بتاتی ہے کہ اللہ تعالیٰ نے جو لفظ استعمال کیا ہے اس کا اصل مقصد اور گہرائی کیا ہے۔ اس کے بغیر دین کی صحیح معلومات حاصل کرنا مشکل ہے۔

(2) صحیح تلفظ اور تلاوت :دین میں الفاظ کو صحیح طریقے سے ادا کرنا بہت ضروری ہے، خاص طور پر نماز کے دوران۔ لغت ہمیں بتاتی ہے کہ کس لفظ پر کیا اعراب ہونا چاہیے ہے، تاکہ ہم اسے غلط نہ پڑھیں۔ دنیاوی لحاظ سے بھی اگر کوئی شخص لفظوں کو صحیح طریقے سے بولتا ہے تو اس کی بات زیادہ اثر رکھتی ہے اور لوگ اسے عزت کی نگاہ سے دیکھتے ہیں۔

(3) لفظوں کی اصل پہچان:لغت ہمیں یہ سکھاتی ہے کہ لفظ کا مادہ اشتقاق کیا ہے ۔ اس سے انسان کے عقل و علم میں اضافہ ہوتا ہے اور اسے پتہ چلتا ہے کہ ایک ہی لفظ سے دوسرے بہت سے الفاظ کیسے بنے۔ یہ علم ہمیں چیزوں کی حقیقت تک پہنچنے میں مدد دیتا ہے، چاہے وہ دینی باتیں ہوں یا دنیاوی معلومات۔

(4)اپنی بات کو بہتر انداز میں کہنا:جب ہمیں لفظوں کے زیادہ معنی معلوم ہوتے ہیں، تو ہم اپنی بات کو بہتر اور آسان طریقے سے دوسروں کو سمجھا سکتے ہیں۔ ایک مبلغ جو دین کی دعوت دیتا ہے یا ایک طالب علم جو دنیا کے کسی بھی شعبے میں علم حاصل کرتا ہو ، دونوں کے لیے ضروری ہے کہ وہ اچھے اور درست الفاظ کا انتخاب کریں تاکہ سننے والا ان کی بات کو پسند کرے۔

(5) خاص اصطلاحات کا مطلب جاننا:ہر کام اور ہر علم کے کچھ خاص الفاظ ہوتے ہیں جنہیں "اصطلاحات" کہا جاتا ہے۔ مثلاً دین میں 'نماز' یا 'زکوٰۃ' کے خاص معنی ہیں، اور دنیاوی لحاظ سے سائنس یا قانون کے اپنے الفاظ ہوتے ہیں۔ لغت ہمیں ان مشکل اور خاص لفظوں کا آسان مطلب بتاتی ہے جس سے وہ علم سیکھنا آسان ہو جاتا ہے۔

(6) ترجمہ کرنے میں آسانی:اگر ہم ایک زبان کی بات دوسری زبان میں بتانا چاہتے ہیں، تو لغت ہماری سب سے بڑی مددگار ہوتی ہے۔ خاص طور پر جب ہم قرآن کا ترجمہ پڑھتے یا لکھتے ہیں، تو لغت ہمیں بتاتی ہے کہ کون سا لفظ سب سے بہتر رہے گا تاکہ اللہ کا پیغام صحیح طرح سے پہنچ سکے۔ دنیاوی کاموں میں بھی ترجمہ کرنے کے لیے لغت کے بغیر چارہ نہیں۔

(7) لفظوں کے ذخیرے میں اضافہ:روزانہ لغت دیکھنے سے انسان کے پاس لفظوں کا ایک بڑا خزانہ جمع ہو جاتا ہے۔ جس کے پاس جتنے زیادہ الفاظ ہوں گے، وہ اتنا ہی زیادہ ذہین سمجھا جاتا ہے۔ اس سے انسان کی سوچنے کی صلاحیت بڑھتی ہے اور وہ ہر طرح کی کتابوں کو آسانی سے پڑھ اور سمجھ سکتا ہے۔

(8) مترادف یعنی ایک جیسے معنی والے الفاظ کا علم:کبھی کبھی ہم ایک ہی لفظ بار بار استعمال کرتے ہیں جس سے تحریر یا تقریر میں اکتاہٹ محسوس ہونے لگتی ہے ۔ لغت ہمیں ایک ہی مطلب کے دوسرے بہت سے الفاظ بتاتی ہے۔ اس سے ہماری گفتگو میں خوبصورتی پیدا ہوتی ہے اور ہم موقع کی مناسبت سے بہتر لفظ استعمال کر سکتے ہیں۔

(9) زبان کی غلطیوں سے بچنا:ہم اپنی روزمرہ کی زندگی میں بہت سے الفاظ غلط بولتے یا غلط لکھتے ہیں۔ لغت ہمیں ہماری ان غلطیوں کے بارے میں بتاتی ہے اور ہماری اصلاح کرتی ہے۔ اپنی زبان کو درست رکھنا ہمارا علمی فرض بھی ہے تاکہ ہماری آنے والی نسلیں بھی صحیح زبان سیکھ سکیں۔

خلاصہ یہ ہے کہ لغت ایک ایسا بہترین دوست ہے جو ہر قدم پر ہماری رہنمائی کرتا ہے۔ چاہے ہم دین کی سمجھ حاصل کرنا چاہیں یا دنیا کے کسی بھی میدان میں کامیابی حاصل کرنا چاہیں، لغت سے دوستی کرنا بہت ضروری ہے۔ یہ ہمارے دماغ کو روشن کرتی ہے، ہمیں غلطیوں سے بچاتی ہے اور ہمیں ایک پڑھا لکھا اور سمجھدار انسان بنانے میں مدد دیتی ہے۔ اس لیے ہمیں چاہیے کہ جب بھی کوئی مشکل لفظ سامنے آئے، فوراً لغت کا سہارا لیں تاکہ ہمارا علم پختہ ہو سکے۔

مطالعہ میں لغت کی اہمیت: علم کی تفہیم کا کلیدی راستہ کسی بھی زبان کو سمجھنے، اس کی گہرائی تک پہنچنے اور اس کے اصل مفہوم سے واقف ہونے کے لیے "لغت" (Dictionary) ایک بنیادی سیڑھی کا درجہ رکھتی ہے۔ مطالعہ خواہ دینی کتب کا ہو یا دنیاوی فنون کا، الفاظ کے صحیح معانی اور ان کے درست استعمال سے واقفیت کے بغیر علم کا حق ادا نہیں ہو سکتا۔

قرآن مجید اور فصاحتِ لسان:اللہ رب العزت نے کلامِ مجید کو عربی مبین (واضح عربی) میں نازل فرمایا تاکہ انسان اس کے مفاہیم کو سمجھے۔ الفاظ کے معانی پر غور کرنا دراصل فہمِ قرآن کی پہلی بنیاد ہے۔

دین کی یہ "فقہ" یا سمجھ بوجھ اس وقت تک حاصل نہیں ہو سکتی جب تک انسان کو ان الفاظ کے لغوی اور اصطلاحی معانی معلوم نہ ہوں جن میں اللہ اور اس کے رسول ﷺ نے ہم سے خطاب فرمایا ہے۔

لغت کے بغیر مطالعہ کے نقصانات:مطالعہ کے دوران لغت سے دوری انسان کو کئی طرح کی فکری غلطیوں میں مبتلا کر سکتی ہے:

(1) غلط فہمی: ایک ہی لفظ کے کئی معانی ہو سکتے ہیں، سیاق و سباق کے مطابق صحیح معنی کا انتخاب لغت کے بغیر ممکن نہیں۔

(2) تحریفِ معنوی: الفاظ کے غلط مطالب لینے سے پوری عبارت کا مفہوم بدل جاتا ہے، جو خاص طور پر مذہبی معاملات میں گمراہی کا سبب بن سکتا ہے۔

(3) ذوقِ مطالعہ میں کمی: جب قاری کو الفاظ سمجھ نہیں آتے، تو وہ اکتاہٹ کا شکار ہو کر مطالعہ ترک کر دیتا ہے۔

لغت ایک علمی ضرورت:اسلامی تاریخ میں علمائے کرام نے لغت پر بے پناہ کام کیا۔ امام راغب اصفہانی کی "مفردات القرآن" ہو یا علامہ ابن منظور کی "لسان العرب"، ان بزرگوں نے اپنی زندگیاں صرف اس لیے وقف کر دیں تاکہ آنے والی نسلیں قرآن و حدیث کے ایک ایک لفظ کی روح تک پہنچ سکیں۔

مطالعہ صرف الفاظ کو پڑھ لینے کا نام نہیں، بلکہ ان کے معنی کو دل میں اتارنے کا نام ہے۔ لغت ایک ایسی روشنی ہے جو مطالعہ کے بند کمروں میں علم کے چراغ روشن کرتی ہے۔ اگر ہم چاہتے ہیں کہ ہمارا مطالعہ محض تفریح نہ رہے بلکہ "علمِ نافع" بن جائے، تو ہمیں اپنی میز پر کتاب کے ساتھ ایک مستند لغت کو بھی جگہ دینی ہوگی۔