علم کی دنیا میں داخل ہونے کا سب سے پہلا دروازہ "لفظ" ہے۔ اور ہر لفظ کے معانی و مفاہیم تک پہنچنے کا سب سے معتبر ذریعہ "لغت" ہے۔ مطالعہ چاہے دینی ہو یا دنیاوی، لغت کے بغیر ادھورا اور ناقص رہتا ہے۔ جس طرح مسافر کے لیے نقشہ ضروری ہے، اسی طرح طالبِ علم کے لیے لغت ایک رہنما کا درجہ رکھتی ہے۔ اگر الفاظ کے درست معانی معلوم نہ ہوں تو نہ عبارت سمجھ آتی ہے، نہ مفہوم واضح ہوتا ہے اور نہ ہی علم کی لذت حاصل ہوتی ہے۔ اسی لیے اسلافِ امت نے لغت کو علم کی کنجی قرار دیا ہے۔

لغت کی اہمیت کا اندازہ اس بات سے لگایا جا سکتا ہے کہ قرآنِ مجید کو سمجھنے کے لیے بھی عربی لغت کی ضرورت پیش آتی ہے۔ صحابۂ کرام رضی اللہ عنہم فصیح عربی جانتے تھے، اس کے باوجود جب کوئی لفظ مشکل ہوتا تو اس کا معنی اہلِ لغت سے معلوم کرتے۔ حضرت عبد اللہ بن عباس رضی اللہ عنہما کے بارے میں منقول ہے کہ وہ مشکل الفاظ کے معانی قدیم عربی اشعار سے تلاش کیا کرتے تھے۔ امام سیوطی رحمۃ اللہ علیہ نے فرمایا: "لغت کی معرفت تفسیر کے لیے شرط ہے"۔ (الاتقان فی علوم القرآن، النوع التاسع والثلاثون، ج 2، ص 179)

لغت مطالعے کے دوران تین بڑے فائدے دیتی ہے:

اول: صحیح فہم :بہت سے الفاظ کے کئی معانی ہوتے ہیں۔ سیاق و سباق کے مطابق درست معنی کا انتخاب لغت ہی سے ممکن ہے۔ مثلاً عربی لفظ "عین" کے 20 سے زائد معانی ہیں۔ آنکھ، چشمہ، جاسوس، اصل، سونا وغیرہ۔ اب اگر طالبِ علم بغیر لغت دیکھے اپنی طرف سے معنی لے لے تو پوری عبارت کا مفہوم بدل جائے گا۔

سوم: علمی غلطیوں سے حفاظت :بہت سے لوگ صرف سنی سنائی بات پر یا اندازے سے معنی لے لیتے ہیں جس سے سنگین علمی غلطیاں جنم لیتی ہیں۔ خاص طور پر احادیث اور فقہی عبارات میں ایک زبر زیر کا فرق معنی بدل دیتا ہے۔ لغت ان غلطیوں سے بچاتی ہے۔ محدثین کرام کا اصول تھا کہ وہ "غریب الحدیث" یعنی حدیث کے مشکل الفاظ پر مستقل کتابیں لکھتے۔ امام ابو عبید قاسم بن سلام رحمہ اللہ کی "غریب الحدیث" اس کی بہترین مثال ہے۔

دورِ حاضر میں مطالعہ کے رجحان میں کمی کی ایک بڑی وجہ لغت سے دوری ہے۔ طلبہ کتاب کھولتے ہیں، دو چار مشکل الفاظ سامنے آتے ہیں، سمجھ نہیں آتے، تو کتاب بند کر دیتے ہیں۔ اگر ساتھ لغت رکھنے کی عادت ہو تو یہ مشکل آسان ہو جائے۔ اب تو موبائل میں بھی مستند لغات میسر ہیں جیسے "المعانی"، "فیروز اللغات"، "اردو لغت بورڈ" کی لغت۔

یاد رکھیں، لغت دیکھنا کم علمی کی علامت نہیں بلکہ علم سے محبت کی دلیل ہے۔ امام شافعی رحمۃ اللہ علیہ فرماتے ہیں: "جس نے لغت میں مہارت حاصل نہ کی اس نے علم کا ایک بڑا حصہ کھو دیا"۔ (مناقب الشافعی للبیہقی، ج 2، ص 155)

من جملہ یہ کہ مطالعہ اور لغت کا تعلق ایسا ہی ہے جیسا جسم اور روح کا۔ لغت کے بغیر مطالعہ بے روح ہے۔ ہر طالبِ علم کو چاہیے کہ دورانِ مطالعہ لغت اپنے پاس رکھے، نئے الفاظ نوٹ کرے اور انہیں یاد کرے۔ یہی طریقہ علم میں پختگی اور فہم میں گہرائی پیدا کرے گا۔ جو قومیں الفاظ کی قدر کرتی ہیں، وہی علم کی معراج پاتی ہیں۔

علم حاصل کرنے کا سب سے بڑا ذریعہ مطالعہ یعنی کتابیں پڑھنا ہے۔ کتابوں کا مطالعہ اسی وقت بامقصد، کامیاب اور مفید ہوتا ہے جب ہمیں ان میں موجود الفاظ کا درست تلفظ، معنی، مفہوم اور استعمال معلوم ہو۔ یہ تمام چیزیں ہمیں لغت (Dictionary) سے حاصل ہوتی ہیں۔ یہی وجہ ہے کہ لغت کو علم و ادب کی دنیا میں خاص مقام حاصل ہے۔ اور مطالعہ ذہن کو روشن کرتا ہے اور لغت اس روشنی کو راستہ دکھاتی ہے

اور یوں بھی کہنا درست ہوگا کہ مطالعہ علم دیتا ہے اور لغت اس علم کو سمجھنے کا ہنر سکھاتی ہے۔لغت ایک ایسا علمی خزانہ ہے جس میں الفاظ کے معنی، تلفظ، استعمال، مترادفات، محاورات اور بعض اوقات ان کی تاریخ بھی درج ہوتی ہے۔ آئیے لغت کی مزید اہمیت و افادیت جانتے ہیں۔

الفاظ کے معنی معلوم کرنے میں مدد:مطالعے کے دوران اکثر مشکل الفاظ سامنے آتے ہیں۔ لغت ان الفاظ کے معنی جاننے میں ہماری مدد کرتی ہے۔ اور جب تک کسی مشکل لفظ کا معنی معلوم نہ ہو، عبارت پوری طرح سمجھ میں نہیں آتی۔ اور اس بات کو درسِ نظامی (یعنی عالم کورس) پڑھنے اور پڑھانے والے بخوبی جانتے ہیں۔ کہ لغت کے بغیر ایک استاد کا پڑھانا ناممکن کے قریب ہی ہے ۔

آئندہ مطالعہ آسان ہوتا اور وقت بھی بچتا ہے:جو شخص لغت استعمال کرنے کی عادت بنا لیتا ہے، اس کے لیے آئندہ مطالعہ آسان ہو جاتا ہے۔ کئی الفاظ بار بار استعمال ہوتے ہیں، اس لیے ان کے معنی ذہن نشین ہو جاتے ہیں۔ یوں ہر بار لغت کھولنے کی ضرورت نہیں پڑتی اور کم وقت میں زیادہ مطالعہ ہو جاتا ہے۔

درست تلفظ اور معنی کی کثرت:مطالعے کے دوران بعض الفاظ عربی، فارسی یا اردو کے ہوتے ہیں۔ جب ہم متعلقہ زبان کی لغت دیکھتے ہیں تو ان کا درست تلفظ اور معنی معلوم ہوتا ہے۔ اس کے ساتھ یہ بھی پتہ چلتا ہے کہ ایک لفظ کے کئی معانی ہو سکتے ہیں۔ پھر موقع کی مناسبت سے ان الفاظ کو مختلف مواقع پر استعمال کرکے ہم اپنی گفتگو اور تحریر میں نکھار پیدا کر سکتے ہیں۔

مختصر یہ کہ لغت کی بہت زیادہ اہمیت ہے۔ یہ نہ صرف مطالعے کو آسان بناتی ہے بلکہ زبان و بیان میں بھی نکھار پیدا کرتی ہے۔ اگر ہم مطالعے میں لغت کی اہمیت کو ایک جملے میں بیان کرنا چاہیں تو یہ کہنا بے جا نہ ہوگا کہ:لغت مطالعے کی جان ہے۔

فلسطین میں درپیش مسائل  اورمظلوم مسلمانوں کی امداد و بحالی کے سلسلے میں دعوتِ اسلامی کے فلاحی ادارے FGRF (فیضان گلوبل اینڈ ریلیف فاؤنڈیشن) نے ایک بڑا اور اہم اقدام اٹھایا ہے۔

امتِ مسلمہ کی دردمندی اور انسانی بنیادوں پر ریلیف کے کاموں کو وسعت دینے کے جذبے کے تحت دعوتِ اسلامی کے فلاحی شعبے FGRF کی جانب سے امدادی منصوبے کا باضابطہ اعلان کیا گیا ہے۔

مختلف ذرائع سے ملنے والی معلومات کے مطابق یہ اعلان 3 نومبر 2026ء کو فلسطین کے سفیر (Ambassador) ‫ ڈاکٹر زہیر محمد حمد اللہ زید کی رکنِ مرکزی مجلسِ شوریٰ مولانا حاجی عبد الحبیب عطاری سے ملاقات میں ہوا۔

اس ملاقات کے دوران یہ طے کیا گیا کہ دعوتِ اسلامی کا فلاحی ادارہ FGRF مختلف ذرائع سے فلسطین کے مظلوم مسلمانوں کی 5 ملین ڈالر (تقریباً 1 ارب 39 کروڑ پاکستانی روپے) کی امداد کرے گا۔

اس امدادی منصوبے کے تحت پہلے مرحلے میں ”Tent City“ قائم کی جائے گی جبکہ اگلے مرحلے میں Authorities کی اجازت ملنے کے بعد ”Madani Home“ (یتیم خانہ) کی تعمیر کی جائے گی ان شاء اللہ الکریم۔

ملک میں اسلامی مالیاتی نظام کے فروغ، علمی و تحقیقی اداروں اور متعلقہ مالیاتی اداروں کے مابین باہمی روابط و تعاون کو مستحکم کرنے کے سلسلے میں ایک اہم پیش رفت سامنے آئی ہے۔اسٹیٹ بینک آف پاکستان اور دعوتِ اسلامی کے اسلامک اکنامک سینٹر کے مابین مشترکہ کاوشوں کو اجاگر کرنے کے لیے ایک میٹ اپ کا انعقاد کیا گیا۔

تفصیلات کے مطابق اسٹیٹ بینک آف پاکستان کے اسلامک فنانس پالیسی ڈیپارٹمنٹ کے ایڈیشنل ڈائریکٹر ظفر قیوم نے اسلامک اکنامک سینٹر (دعوتِ اسلامی) کا دورہ کیا جہاں ہیڈ آف اسلامک اکنامک سینٹر مفتی علی اصغر عطاری سلمہ الباری نے تمام مہمان کا پرخلوص استقبال کیا۔

ملاقات کے دوران اسلامک اکنامک سینٹر کے تحت جاری اسلامی مالیاتی تعلیم، تحقیق اور شرعی رہنمائی سمیت اسلامک فنانس کے مختلف شعبوں میں جاری سرگرمیوں پر تفصیلی تبادلۂ خیال کیا گیا۔

اس موقع پر ایڈیشنل ڈائریکٹر ظفر قیوم نے اسلامک اکنامک سینٹر کی جانب سے اسلامی مالیات کے فروغ، آگاہی اور ترقی کے لیے کی جانے والی علمی و عملی کاوشوں کو سراہا۔

سنتِ نبوی صلَّی اللہ علیہ واٰلہٖ وسلَّم کی ترویج اور سادگی کو فروغ دینے کے سلسلے میں عالمی مدنی مرکز فیضانِ مدینہ کراچی میں ایک باوقار تقریبِ نکاح کا انعقاد کیا گیا جس میں فریقین کے اہلِ خانہ سمیت دینی ماحول سے وابستہ عاشقانِ رسول بھی موجود تھے۔

ذرائع سے ملنے والی معلومات کے مطابق 26 اکتوبر 2026ء کو بعد نمازِ عصر دعوتِ اسلامی کے عالمی مدنی مرکز فیضانِ مدینہ کراچی میں خلیفۂ امیرِ اہلسنت حضرت مولانا حاجی عبید رضا عطاری مدنی مدظلہ العالی نے 4 اسلامی بھائیوں کا نکاح پڑھایا۔

اس موقع پر خلیفۂ امیرِ اہلسنت مدظلہ العالی نے خطبۂ نکاح پڑھا اور وہاں موجود حاضرین کو خیر و برکت کی دعائیں دیتے ہوئے انہیں سنت کے مطابق زندگی گزارنے کی ترغیب دلائی ۔

عاشقانِ رسول کی دینی تحریک عوتِ اسلامی کے تحت دینی سرگرمیوں کے تناظر میں ایک باوقار نشست کا انعقاد کیا گیا جس دوران عاشقانِ رسول کو خلیفۂ امیرِ اہلسنت مدظلہ العالی سے بالمشافہ ملاقات کا شرف حاصل ہوا۔

تفصیلات کے مطابق 28 اکتوبر 2026ء کو دعوتِ اسلامی کے عالمی مدنی مرکز فیضانِ مدینہ کراچی میں عاشقانِ رسول کی خلیفۂ امیرِ اہلسنت حضرت مولانا حاجی عبید رضا عطاری مدنی مدظلہ العالی سے خصوصی ملاقات ہوئی۔

ملاقات کے دوران خلیفۂ امیرِ اہلسنت مدظلہ العالی نے وہاں موجود عاشقانِ رسول کو مختلف مدنی پھولوں سے نوازا۔ اس موقع پر انہوں نے حاضرین کو دم کرنے کے ساتھ ساتھ دینی کاموں میں عملی شرکت کا ذہن دیا ۔

اردو زبان میں لغت کے کئی اقسام ہیں جو استعمال کے مقصد اور ترتیب کے لحاظ سے مختلف ہوتے ہیں۔ ذیل میں لغت کے چند اہم اقسام دیے جا رہے ہیں:

عام لغت:یہ عام استعمال کی لغت ہوتی ہے، جس میں ایک زبان کے الفاظ کے معنی اور ان کے مترادفات دیے جاتے ہیں۔ مثال کے طور پر:اردو سے اردو لغت،اردو سے انگریزی لغت

ایسی لغت جس میں دو زبانوں کے درمیان ترجمہ کیا جاتا ہے، مثلاً:اردو-انگریزی لغت انگریزی-اردو لغت

مترادفات کی لغت: (Thesaurus):یہ لغت مترادفات (Synonyms) اور متضاد الفاظ (Antonyms) فراہم کرتی ہے تاکہ مختلف الفاظ کے ذریعے اظہار کو بہتر بنایا جا سکے۔

تشریحی لغت:ایسی لغت جس میں الفاظ کی مکمل وضاحت، معنی، تلفظ، اور جملے میں استعمال کی مثال دی جاتی ہے۔

تاریخی لغت:ایسی لغت جس میں الفاظ کی تاریخی پس منظر اور ان کے ارتقاء کی تفصیلات فراہم کی جاتی ہیں۔

اشاریاتی لغت:یہ لغت خاص موضوعات پر مواد تلاش کرنے میں مدد فراہم کرتی ہے، جیسے کتب، رسائل، یا دیگر اشاعتی مواد کے حوالہ جات۔

ان اقسام کو استعمال کرنے کا مقصد مختلف ہو سکتا ہے، جیسے تعلیمی، تحقیقی، یا عام معلومات کے لیے۔

مطالعہ کے دوران لغت (Dictionary) کا استعمال قارئین کی فہم کو گہرا کرنے، ذخیرہ الفاظ بڑھانے اور زبان پر مکمل دسترس حاصل کرنے کے لیے ناگزیر ہے۔ لغت محض الفاظ کے معانی تلاش کرنے کا ذریعہ نہیں، بلکہ یہ علم اور تحقیق کے نئے دروازے کھولتی ہے۔مطالعہ میں لغت کی اہمیت اور افادیت کو مندرجہ ذیل نکات کے ذریعے واضح کیا جا سکتا ہے۔

صحیح تفہیم: کتاب یا مضمون پڑھتے وقت جب کوئی مشکل یا نیا لفظ سامنے آتا ہے، تو لغت اس کا درست ترین لغوی اور اصطلاحی مفہوم واضح کرتی ہے۔

سیاق و سباق کی تفہیم:ایک ہی لفظ کے کئی معانی ہو سکتے ہیں، لغت مطالعہ کرنے والے کو یہ سکھاتی ہے کہ جملے کے سیاق و سباق کے مطابق کون سا معنی موزوں ہے۔

نئے الفاظ کا سیکھنا: لغت کا باقاعدہ استعمال قاری کے ذخیرہ الفاظ کو وسعت دیتا ہے، جس سے اس کی اپنی تحریر اور تقریر کی صلاحیت مضبوط ہوتی ہے۔

تخلیقی صلاحیتیں: الفاظ کا وسیع ذخیرہ انسان کے دماغ کے خوابیدہ حصوں کو متحرک کرتا ہے، جس سے فکری اور تخلیقی صلاحیتوں میں اضافہ ہوتا ہے۔

مطالعہ کرتے ہوئے اگر لغت کے الفاظ ذہن نشین نہ ہو تو خرابی لازم ہوتی ہے۔

مطالعہ انسان کی ذہنی، فکری اور علمی نشوونما کے لیے بے حد ضروری ہے۔ لیکن کسی بھی تحریر، کتاب یا مضمون سے مکمل فائدہ اٹھانے کے لیے زبان اور اس کے الفاظ پر عبور ہونا لازمی ہے۔ مطالعے کے دوران لغت (Dictionary) ایک ایسے رہنما کا کردار ادا کرتی ہے جو قاری کے لیے علم کے بند دروازے کھولتی ہے۔ لغت کے بغیر مطالعہ ادھورا اور سطحی رہ جاتا ہے۔

ذیل میں مطالعہ کے دوران لغت کے استعمال کی بنیادی اہمیت اور اس کے فوائد کا تفصیلی احاطہ کیا گیا ہے:

(1) ذخیرہ الفاظ (Vocabulary) میں اضافہ :کسی بھی زبان کو سیکھنے اور اس پر گرفت مضبوط کرنے کے لیے لغت سب سے بہترین ہتھیار ہے۔ مطالعے کے دوران جب قاری نئے، ثقیل یا نایاب الفاظ سے ٹکراتا ہے، تو لغت اسے ان الفاظ کے درست معنی فراہم کرتی ہے۔ بار بار لغت کا استعمال قاری کے اپنے ذاتی ذخیرہ الفاظ کو وسعت دیتا ہے، جس سے اس کی گفتگو اور تحریر میں خوبصورتی پیدا ہوتی ہے۔

(2) تفہیمِ مضمون اور گہرائی کا ادراک :بعض اوقات کسی جملے میں ایک واحد لفظ کا مطلب نہ جاننے کی وجہ سے پورے پیراگراف کا مفہوم بدل جاتا ہے یا سمجھ نہیں آتا۔ لغت قاری کو متن کا اصل سیاق و سباق (Context) سمجھنے میں مدد دیتی ہے۔ اس سے کتاب کا اصل پیغام، مصنف کا نظریہ اور مضمون کی گہرائی واضح ہو کر سامنے آتی ہے اور قاری ابہام سے بچ جاتا ہے۔

(3) درست تلفظ اور اعراب کی ادائیگی :صرف لفظ کا مطلب جاننا کافی نہیں ہوتا، بلکہ اسے صحیح طریقے سے بولنا بھی زبان دانی کا اہم حصہ ہے۔ لغت میں الفاظ کے اعراب (زیر، زبر، پیش) اور تلفظ کی واضح رہنمائی موجود ہوتی ہے۔ اس کی مدد سے قاری الفاظ کو غلط بولنے کی عادت سے بچتا ہے اور اس کی لغت پر مبنی پڑھنے کی عادت اس کی بول چال کو بھی معیاری بنا دیتی ہے۔

(4) الفاظ کا درست استعمال اور گرامر :ایک ہی لفظ کے مختلف مقامات پر الگ الگ معانی ہو سکتے ہیں۔ لغت ہمیں بتاتی ہے کہ کوئی لفظ اسم (Noun) ہے، فعل (Verb) ہے یا صفت (Adjective)۔ مزید برآں، یہ الفاظ کے محاوراتی اور مجازی استعمال سے بھی روشناس کراتی ہے۔ اس علم کی بدولت قاری اپنی تحریر اور تقریر میں الفاظ کا صحیح اور بروقت استعمال کرنے کے قابل ہوتا ہے۔

(5) تحقیق اور خود اعتمادی میں اضافہ :لغت کا باقاعدہ استعمال انسان میں خود شناسی اور تحقیقی مادہ پیدا کرتا ہے۔ جب قاری کسی پر انحصار کیے بغیر خود لفظ کا مطلب تلاش کرتا ہے، تو اس کا علمی اعتماد بڑھتا ہے۔ زبان پر مضبوط گرفت ہونے سے وہ مشکل سے مشکل کتاب پڑھنے سے نہیں گھبراتا۔

مطالعہ انسان کی زندگی میں بہت اہم مقام رکھتا ہے۔ علم حاصل کرنے، شعور بڑھانے اور دنیا کو سمجھنے کے لیے مطالعہ ضروری ہے۔ انسان جتنا زیادہ مطالعہ کرتا ہے اتنا ہی اس کے علم، سوچ اور تجربے میں اضافہ ہوتا ہے۔ مگر مطالعے کے دوران اکثر ایسے الفاظ سامنے آتے ہیں جن کے معنی سمجھنا مشکل ہو جاتا ہے۔ اگر ان الفاظ کے معنی معلوم نہ ہوں تو پوری عبارت سمجھنے میں دشواری پیش آتی ہے۔ ایسی صورت میں لغت انسان کی بہترین رہنمائی کرتی ہے۔ لغت نہ صرف الفاظ کے معنی بتاتی ہے بلکہ زبان کو درست انداز میں سمجھنے اور استعمال کرنے میں بھی مدد دیتی ہے۔ اسی وجہ سے مطالعے میں لغت کی اہمیت بہت زیادہ ہے۔

لغت کا تعارف:لغت ایک ایسی کتاب ہے جس میں کسی زبان کے الفاظ کو ترتیب وار جمع کیا جاتا ہے اور ان کے معنی، تلفظ اور استعمال بیان کیے جاتے ہیں۔ ہر زبان کی اپنی الگ لغت ہوتی ہے، جیسے اردو لغت، عربی لغت اور انگریزی لغت وغیرہ۔ لغت انسان کو نئے الفاظ سیکھنے اور زبان کے خزانے کو بڑھانے کا بہترین ذریعہ فراہم کرتی ہے۔ قدیم زمانے سے علماء اور ادباء لغات مرتب کرتے آئے ہیں تاکہ لوگوں کو زبان سیکھنے میں آسانی ہو۔

مطالعے میں لغت کی ضرورت:مطالعے کے دوران بہت سے مشکل اور نئے الفاظ سامنے آتے ہیں۔ اگر قاری ان الفاظ کے معنی نہ جانتا ہو تو مضمون یا کتاب کا اصل مفہوم سمجھنا مشکل ہو جاتا ہے۔ لغت ان مشکل الفاظ کے معنی معلوم کرنے میں مدد دیتی ہے۔ اس کے ذریعے نہ صرف لفظ کا مطلب معلوم ہوتا ہے بلکہ اس کا صحیح تلفظ اور درست استعمال بھی پتہ چلتا ہے۔ یہی وجہ ہے کہ طلبہ، اساتذہ اور اہلِ علم مطالعے کے وقت لغت کو اپنے پاس رکھتے ہیں۔

زبان دانی میں لغت کا کردار:لغت زبان کو بہتر بنانے میں اہم کردار ادا کرتی ہے۔ جو شخص لغت کا استعمال کرتا ہے اس کے ذخیرۂ الفاظ میں اضافہ ہوتا رہتا ہے۔ اس کی گفتگو اور تحریر زیادہ مؤثر اور خوبصورت ہو جاتی ہے۔ لغت کے ذریعے مترادف، متضاد اور محاورات بھی سیکھنے کو ملتے ہیں۔ اس طرح انسان زبان کے باریک نکات سے واقف ہو جاتا ہے اور اس کی علمی صلاحیتوں میں اضافہ ہوتا ہے۔

طلبہ کے لیے لغت کی اہمیت:طلبہ کے لیے لغت ایک قیمتی خزانے کی حیثیت رکھتی ہے۔ امتحانات کی تیاری، مضامین لکھنے اور کتابیں سمجھنے میں لغت بہت مددگار ثابت ہوتی ہے۔ جو طالب علم لغت کے استعمال کی عادت اپنا لیتا ہے وہ دوسروں کے مقابلے میں زیادہ کامیاب ہوتا ہے۔ لغت کی مدد سے طالب علم نئے الفاظ سیکھتا ہے اور اپنی تحریر کو بہتر بناتا ہے۔

جدید دور میں لغت کی اہمیت:موجودہ دور میں ٹیکنالوجی نے لغت کے استعمال کو مزید آسان بنا دیا ہے۔ اب صرف کتابی لغات ہی نہیں بلکہ موبائل ایپس اور انٹرنیٹ پر بھی آن لائن لغات موجود ہیں۔ چند سیکنڈ میں کسی بھی لفظ کا مطلب، تلفظ اور ترجمہ معلوم کیا جا سکتا ہے۔ یہ سہولت خاص طور پر طلبہ اور محققین کے لیے بہت فائدہ مند ہے۔ جدید لغات میں مثالیں اور تلفظ سننے کی سہولت بھی موجود ہوتی ہے جس سے سیکھنے کا عمل مزید آسان ہو جاتا ہے۔

لغت اور علمی ترقی:لغت علمی ترقی کا اہم ذریعہ ہے۔ اس کے ذریعے انسان مختلف علوم و فنون کی اصطلاحات کو سمجھتا ہے۔ سائنس، ادب، تاریخ اور دینی علوم کے مطالعے میں لغت بہت مدد دیتی ہے۔ لغت انسان کی تحقیق اور جستجو کے جذبے کو بڑھاتی ہے اور اسے زیادہ علم حاصل کرنے کی ترغیب دیتی ہے۔

مختصر یہ کہ لغت مطالعے کا ایک لازمی حصہ ہے۔ یہ مشکل الفاظ کو آسان بناتی ہے، زبان کو بہتر کرتی ہے اور علم میں اضافہ کرتی ہے۔ لغت کے استعمال سے انسان کی تحریر، گفتگو اور فہم میں بہتری آتی ہے۔ ہر طالب علم اور علم دوست شخص کو چاہیے کہ وہ لغت کے استعمال کی عادت اپنائے تاکہ وہ بہتر انداز میں علم حاصل کر سکے اور اپنی علمی صلاحیتوں کو ترقی دے سکے۔

لغت کسی بھی زبان کی بنیاد اور علم کے خزانوں کی کنجی ہے۔ مطالعۂ لغت انسان کو الفاظ کے معانی، ان کے صحیح استعمال اور زبان کی باریکیوں سے آشنا کرتا ہے۔ ایک طالب علم، استاد، مصنف یا عام قاری کے لیے لغت کا مطالعہ نہایت ضروری ہے، کیونکہ اس سے علمی وسعت، فکری پختگی اور زبان پر عبور حاصل ہوتا ہے۔

اللہ تعالیٰ نے انسان کو علم کی نعمت عطا فرمائی اور علم کے حصول کے مختلف ذرائع مہیا کیے۔ ان ذرائع میں زبان کو بنیادی حیثیت حاصل ہے، کیونکہ انسان اپنے خیالات، جذبات اور معلومات کا اظہار زبان کے ذریعے کرتا ہے۔ ہر زبان بے شمار الفاظ پر مشتمل ہوتی ہے، اور ان الفاظ کے معانی، استعمال اور باریکیوں کو جاننے کے لیے لغت سے رجوع کیا جاتا ہے۔ اسی لیے مطالعۂ لغت کو علمی دنیا میں خاص اہمیت حاصل ہے۔

لغت دراصل الفاظ کا ایسا مجموعہ ہے جس میں الفاظ کے معانی، تلفظ، استعمال اور بعض اوقات ان کی اصل و تاریخ بھی بیان کی جاتی ہے۔ جب کوئی شخص کسی نئے لفظ سے آشنا ہوتا ہے تو اس کے صحیح مفہوم تک پہنچنے کے لیے لغت کی ضرورت پیش آتی ہے۔ اگر لغت نہ ہو تو زبان کی بہت سی پیچیدگیاں حل کرنا مشکل ہوجائیں۔ اس لیے لغت زبان کی رہنمائی کرنے والی کتاب سمجھی جاتی ہے۔

مطالعۂ لغت کی سب سے بڑی ضرورت یہ ہے کہ یہ انسان کے علمی ذخیرے میں اضافہ کرتا ہے۔ ایک طالب علم جب مختلف علوم و فنون کا مطالعہ کرتا ہے تو اسے کئی نئے اور مشکل الفاظ کا سامنا کرنا پڑتا ہے۔ اگر وہ لغت سے مدد نہ لے تو ان الفاظ کے درست مفاہیم تک رسائی حاصل نہیں کر سکتا۔ نتیجتاً اس کے علم میں کمی رہ جاتی ہے۔ لغت کا مطالعہ نہ صرف الفاظ کے معانی سمجھنے میں مدد دیتا ہے بلکہ نئے الفاظ سیکھنے کا ذریعہ بھی بنتا ہے۔

مطالعۂ لغت انسان کی زبان دانی میں بھی اضافہ کرتا ہے۔ جو شخص باقاعدگی سے لغت کا مطالعہ کرتا ہے اس کے ذخیرۂ الفاظ میں اضافہ ہوتا رہتا ہے۔ جب الفاظ زیادہ ہوں تو انسان اپنے خیالات کو بہتر انداز میں بیان کر سکتا ہے۔ یہی وجہ ہے کہ بڑے ادیب، شاعر اور مقرر لغت سے گہرا تعلق رکھتے ہیں۔ ان کی تحریروں اور تقاریر میں الفاظ کی خوبصورتی اور روانی اسی وجہ سے نظر آتی ہے۔

آج کے دور میں تعلیم اور تحقیق کی اہمیت بہت بڑھ گئی ہے۔ ہر میدان میں نئی اصطلاحات اور نئے الفاظ وجود میں آتے رہتے ہیں۔ سائنس، ٹیکنالوجی، طب، معاشیات اور دیگر شعبوں میں ایسے کئی الفاظ استعمال ہوتے ہیں جنہیں سمجھے بغیر متعلقہ علم حاصل کرنا مشکل ہے۔ مطالعۂ لغت انسان کو ان اصطلاحات سے واقف کرتا ہے اور اس کی علمی صلاحیتوں میں اضافہ کرتا ہے۔

طلبہ کے لیے مطالعۂ لغت کی اہمیت اور بھی زیادہ ہے۔ امتحانات میں کامیابی کے لیے صرف کتابیں پڑھ لینا کافی نہیں بلکہ الفاظ کے درست معانی اور ان کے استعمال سے واقفیت بھی ضروری ہوتی ہے۔ جو طالب علم لغت سے تعلق رکھتا ہے وہ بہتر انداز میں مضامین لکھتا، سوالات سمجھتا اور اظہارِ خیال کرتا ہے۔ اسی طرح دینی علوم کے طلبہ کے لیے عربی لغات کا مطالعہ بے حد اہم ہے، کیونکہ قرآن، حدیث اور فقہ کے فہم میں لغت کلیدی کردار ادا کرتی ہے۔

مطالعۂ لغت انسان میں تحقیق کا ذوق بھی پیدا کرتا ہے۔ جب کوئی شخص کسی لفظ کی جستجو کرتا ہے تو وہ صرف اس کا معنی نہیں جانتا بلکہ اس کی اصل، استعمال اور دیگر پہلوؤں سے بھی واقف ہوتا ہے۔ اس طرح اس کی سوچ میں گہرائی پیدا ہوتی ہے اور علمی تجسس بڑھتا ہے۔

موجودہ دور میں اگرچہ انٹرنیٹ اور موبائل ایپلی کیشنز نے معلومات تک رسائی آسان بنا دی ہے، لیکن لغت کی اہمیت آج بھی برقرار ہے۔ جدید ڈیجیٹل لغات نے لغت کے استعمال کو مزید آسان اور مفید بنا دیا ہے۔ اب لوگ چند لمحوں میں ہزاروں الفاظ کے معانی معلوم کر سکتے ہیں۔

مختصراً یہ کہ مطالعۂ لغت علم کے حصول کا اہم ذریعہ اور زبان کے فہم کی بنیادی کنجی ہے۔ یہ انسان کے ذخیرۂ الفاظ میں اضافہ کرتا، علمی وسعت پیدا کرتا اور اظہار کی صلاحیت بہتر بناتا ہے۔ ہر طالب علم اور صاحبِ علم شخص کو چاہیے کہ لغت کے مطالعے کی عادت اپنائے، کیونکہ یہی عادت علمی ترقی اور فکری پختگی کا سبب بنتی ہے۔

عارف: استاد جی! السلام علیکم۔ ایک بات سمجھ نہیں آ رہی۔ میں نے سنا ہے کہ آپ کہتے ہیں "بغیر لغت کے کتاب پڑھنا اندھے کا چلنا ہے"۔ یہ بات اتنی سخت کیوں کہی آپ نے؟

استاد محترم: وعلیکم السلام عارف۔ بیٹھ جاؤ۔ سخت نہیں کہی، حقیقت کہی ہے۔ بتاؤ، کل تم نے سورة العلق پڑھی تھی نا؟

عارف: جی ہاں، " اِقْرَاْ بِاسْمِ رَبِّكَ الَّذِیْ خَلَقَۚ(۱) " سے شروع ہوتی ہے۔

استاد محترم: اچھا، " اِقْرَاْ " کا مطلب صرف "پڑھ" ہی ہے؟ اگر میں کہوں " اِقْرَاْ " کا مطلب "سمجھ کر پڑھ، غور کر کے پڑھ، تحقیق کر کے پڑھ" ہے، تو تمہارے مطالعے کا معیار بدل جائے گا نا؟

عارف: جی ہاں، فرق تو پڑے گا۔

استاد محترم: یہی فرق لغت پیدا کرتی ہے عارف۔ اللہ تعالیٰ نے خود قرآن میں فرمایا:

وَ مَاۤ اَرْسَلْنَا مِنْ رَّسُوْلٍ اِلَّا بِلِسَانِ قَوْمِهٖ لِیُبَیِّنَ لَهُمْؕ

ترجمہ کنز الایمان: اور ہم نے ہر رسول اس کی قوم ہی کی زبان میں بھیجا کہ وہ انہیں صاف بتائے ۔(ابراہیم:4)

دیکھو، اللہ نے بھی وضاحت کے لیے زبان کی سمجھ کو ضروری قرار دیا۔ اگر زبان نہ سمجھو گے تو ہدایت تک کیسے پہنچو گے؟

عارف: سمجھ گیا استاد جی۔ یعنی لغت علم کا دروازہ ہے؟

استاد محترم: بالکل! لغت تین کام کرتی ہے:

(1) لفظ کا صحیح مفہوم بتاتی ہے :تم نے "خَلَقَ" پڑھا۔ عام طور پر "پیدا کرنا" ترجمہ کرتے ہیں۔ مگر لغت بتاتی ہے کہ " خَلَقَ " کے معنی "کسی چیز کو عدم سے وجود میں لانا، اندازہ کرنا، مقدار مقرر کرنا" بھی ہیں۔ اب " الَّذِیْ خَلَقَۚ" کا مطلب صرف "جس نے پیدا کیا" نہیں رہتا، بلکہ "جس نے ہر چیز کو اندازے اور نظام کے ساتھ پیدا کیا" بن جاتا ہے۔

(2)سیاق و سباق سے بچاتی ہے :عربی میں "عَيْن" کے 20 سے زیادہ معنی ہیں: آنکھ، چشمہ، جاسوس، خود وہ چیز۔ اگر لغت نہ دیکھو گے تو "عَيْنُ الْمَاءِ" کو "پانی کی آنکھ" پڑھ دو گے، حالانکہ مطلب ہے "پانی کا چشمہ"۔ اسی لیے اللہ فرماتا ہے:

اَفَلَا یَتَدَبَّرُوْنَ الْقُرْاٰنَ اَمْ عَلٰى قُلُوْبٍ اَقْفَالُهَا(۲۴)

ترجمہ کنز الایمان: تو کیا وہ قرآن کو سوچتے نہیں یا بعضے دلوں پر اُن کے قفل لگے ہیں۔(محمد:24)

تدبر کے لیے پہلے الفاظ کا معنی معلوم ہونا ضروری ہے۔

(3) مطالعے کو گہرا اور مستقل بناتی ہے :جو طالب علم ہر مشکل لفظ لغت میں دیکھتا ہے، اس کا ذہن تیز ہوتا ہے، حافظہ مضبوط ہوتا ہے، اور وہ دوسروں پر انحصار نہیں کرتا۔

عارف: مگر استاد جی، آج کل تو گوگل ترجمہ ہے، موبائل میں ڈکشنری ایپ ہے۔ پھر کتابی لغت کی کیا ضرورت؟

استاد محترم: ہنستے ہوئے: مشین ترجمہ لفظ کا جسد دیتا ہے، روح نہیں۔ وہ "ضَرَبَ" کا ترجمہ ہر جگہ "مارا" کرے گا، چاہے وہاں مطلب "مثال بیان کی" ہو، جیسے: "وَضَرَبَ اللَّهُ مَثَلًا" یہاں "مارا اللہ نے مثال" بے معنی ہے۔ لغت تمہیں بتائے گی کہ "ضرب المثل" محاورہ ہے جس کا معنی "مثال بیان کرنا" ہے۔

دوسری بات، کتابی لغت تمہیں لفظ کے مترادف، متضاد، اشتقاق، اور شعر و نثر میں استعمال بھی دکھاتی ہے۔ اس سے زبان پر دسترس پیدا ہوتی ہے۔ رسول اللہ ﷺ نے فرمایا: "أنا أفصح العرب" میں عربوں میں سب سے فصیح ہوں۔ فصاحت لغت کے بغیر ممکن نہیں۔

عارف: تو کیا میں ہر لفظ لغت میں دیکھوں؟ یہ تو بہت وقت لے گا۔

استاد محترم: نہیں بیٹا، حکمت سے کام لو۔ پہلے پورا پیراگراف پڑھو۔ جو 3-4 کلیدی الفاظ سمجھ نہ آئیں، انہیں نوٹ کرو اور لغت دیکھو۔ رفتہ رفتہ تمہارا ذخیرہ الفاظ بڑھے گا اور لغت کی ضرورت کم ہو جائے گی۔

یاد رکھو، علم کی پہلی سیڑھی لفظ ہے، لفظ کی سیڑھی معنی ہے، اور معنی کی سیڑھی لغت ہے۔ اسی لیے صحابہ کرام شاعروں کے پاس جاتے تھے تاکہ قرآن کے مشکل الفاظ کا معنی سمجھ سکیں۔

عارف: استاد جی، آج میری آنکھیں کھل گئیں۔ کل سے میں "مصباح اللغات" اور "المعجم الوسیط" ساتھ رکھوں گا۔ ان شاء اللہ اب مطالعہ بے جان نہیں رہے گا۔

استاد محترم: ماشاء اللہ۔ اللہ تمہیں علم نافع عطا کرے۔ یاد رکھو، جس نے زبان کو عزت دی، زبان نے اسے عزت دی۔ اور سب سے بڑی عزت قرآن کی زبان عربی کو سمجھنے میں ہے، کیونکہ اللہ فرماتا ہے:

اِنَّاۤ اَنْزَلْنٰهُ قُرْءٰنًا عَرَبِیًّا لَّعَلَّكُمْ تَعْقِلُوْنَ(۲)

ترجمہ کنز الایمان: بےشک ہم نے اسے عربی قرآن اتارا کہ تم سمجھو۔(یوسف:2)

اب جاؤ، اور لغت کو اپنا دوست بناؤ۔

مطالعہ علم کے حصول کا سب سے بڑا ذریعہ ہے، لیکن مطالعہ محض الفاظ کی گردانی کا نام نہیں بلکہ مفہوم کی تہہ تک پہنچنے کا عمل ہے۔ اس عمل میں "لغت" یعنی ڈکشنری وہ بنیاد ہے جس کے بغیر علم کی عمارت کھڑی نہیں ہو سکتی۔ خاص طور پر جب بات ہو دینِ اسلام کی، قرآن و حدیث کی اور فقہِ اسلامی کی، تو لغت کی اہمیت دوچند ہو جاتی ہے۔ اہل سنت و جماعت (برہلوی مکتبہ فکر) کے اکابرین اور جید علماء کرام نے ہمیشہ اس بات پر زور دیا ہے کہ کسی بھی عبارت کا صحیح مفہوم سمجھنے کے لیے اس زبان کے لغوی قواعد اور الفاظ کے اصل اشتقاق سے واقفیت ضروری ہے۔

لغت کی شرعی و علمی ضرورت:اسلامی علوم کا مدار عربی زبان پر ہے۔ امام المحدثین، شیخ الاسلام حضرت علامہ امام جلال الدین سیوطی شافعی (جنہیں امام احمد رضا خان فاضلِ بریلوی قدس سرہ اپنا پیشوا مانتے تھے) اپنی مشہور کتاب "الاتقان فی علوم القرآن" میں فرماتے ہیں کہ قرآن پاک کے اسرار و رموز کو جاننے کے لیے لغت کا علم سب سے پہلا زینہ ہے۔

اعلیٰ حضرت، امامِ اہلسنت امام احمد رضا خان بریلوی رحمۃ اللہ علیہ، جنہوں نے اپنی مایہ ناز تصنیف "فتاویٰ رضویہ" میں کئی مقامات پر لغت کی اہمیت کو واضح فرمایا ہے۔ آپ کا اندازِ تحقیق یہ تھا کہ جب کسی مسئلے پر بحث فرماتے تو پہلے اس کے لغوی معنی پر سیر حاصل گفتگو کرتے تاکہ اصطلاحی معنی سمجھنے میں آسانی ہو۔

فہمِ قرآن اور لغت:قرآن کریم عربی زبان میں نازل ہوا۔ اسے سمجھنے کے لیے لغتِ عرب پر عبور ناگزیر ہے۔ امام احمد رضا خان کے خلیفہ اور مشہور مفسرِ قرآن، صدر الافاضل علامہ نعیم الدین مراد آبادی رحمۃ اللہ علیہ اپنی تفسیر "خزائن العرفان" میں جابجا لغوی ابحاث لائے ہیں۔مثال کے طور پر، لفظ "مولیٰ" کے کئی لغوی معنی ہیں۔ اگر کوئی شخص لغت سے ناواقف ہو تو وہ حدیث "من کنت مولاہ فعلی مولاہ" کا صحیح مطلب نہیں سمجھ سکتا۔ لغت بتاتی ہے کہ مولیٰ کے معنی دوست، مددگار، آزاد کرنے والا اور مختارِ کار کے بھی ہیں۔ علماءِ اہل سنت نے لغت کے سہارے ہی یہ ثابت کیا کہ یہاں مولیٰ سے مراد وہ محبت اور نصرت ہے جو ایمان کا جزو ہے۔

اگر مطالعہ کرنے والا لغت سے نابلد ہو تو وہ "مجاز" اور "حقیقت" کے فرق کو نہیں سمجھ پائے گا، جس سے گمراہی کا اندیشہ ہے۔

فتاویٰ رضویہ میں لغوی باریکیاں:امام احمد رضا خان بریلوی رحمۃ اللہ علیہ نے اپنی تحریروں میں لغت کو جس طرح استعمال کیا، اس کی نظیر نہیں ملتی۔ آپ نے لغت کے ذریعے مخالفین کے اعتراضات کے دندان شکن جوابات دیے۔

آپ ایک بحث کے دوران لغتِ عرب کے مشہور امام "ابن منظور" کی کتاب "لسان العرب" اور "فیروز آبادی" کی "القاموس المحیط" کے حوالے دیتے ہیں۔ آپ کا موقف یہ تھا کہ جب تک لفظ کی اصل (Root word) معلوم نہ ہو، اس پر حکمِ شرعی لگانا جہالت ہے۔آپ نے فرمایا:"الفاظ کے لغوی معنی کا لحاظ رکھنا فقہاء کے نزدیک اس لیے ضروری ہے کہ احکامِ شرعیہ کا دارومدار اکثر عرف اور لغت پر ہوتا ہے۔" (فتاویٰ رضویہ، جلد 27، صفحہ 154 )

بدعقیدگی کا خطرہ: اگر کوئی "استویٰ" یا "ید" (ہاتھ) کے لغوی و مجازی فرق کو نہ سمجھے تو وہ اللہ عزوجل کے لیے جسم ثابت کرنے کی گمراہی میں پڑ سکتا ہے۔

غلط بیانی: لغت سے دوری انسان کو مصنف کی مراد سے دور کر دیتی ہے۔

ترجمہ کی غلطیاں: لغت کے بغیر کیا گیا ترجمہ بسا اوقات کفر تک پہنچا دیتا ہے۔ اسی لیے امام احمد رضا خان نے "کنز الایمان" میں لغوی و نحوی باریکیوں کا خاص خیال رکھا۔

مطالعہ کے لیے اہم لغات (سنی علماء کی ترجیحات):ایک طالبِ علم کو مطالعہ کے دوران کن لغات سے مدد لینی چاہیے؟ علماءِ بریلی نے مندرجہ ذیل کتب کو معتبر مانا ہے:

المفردات فی غریب القرآن: امام راغب اصفہانی (قرآنی الفاظ کے لیے)۔

لسان العرب: علامہ ابن منظور۔

القاموس المحیط: علامہ فیروز آبادی۔

تاج العروس: علامہ مرتضیٰ زبیدی (جو کہ ایک عظیم سنی عالم اور محدث تھے)۔

لغت اور فقہِ اسلامی:فقہِ حنفی میں "الفاظ کے معانی" پر بہت زور دیا گیا ہے۔ کتاب "نور الانوار" (جو مدارس میں پڑھائی جاتی ہے) میں لغت، حقیقت، مجاز، کنایہ اور صریح کی بحثیں اس لیے رکھی گئی ہیں تاکہ ایک فقیہ جب مطالعہ کرے تو وہ جان سکے کہ کلام کس معنی میں مستعمل ہے۔

حضرت صدر الشریعہ علامہ امجد علی اعظمی رحمۃ اللہ علیہ "بہارِ شریعت" میں حج کے بیان میں یا نکاح و طلاق کے باب میں اکثر فرماتے ہیں کہ "لغت میں اس کا معنی یہ ہے اور شرع میں یہ"۔ یہ اس بات کی دلیل ہے کہ اسلامی قانون کو سمجھنے کے لیے لغت کی بنیاد ناگزیر ہے۔

حاصلِ بحث یہ ہے کہ مطالعہ ایک فن ہے اور لغت اس فن کا سب سے اہم اوزار ہے۔ چاہے وہ قرآن و حدیث ہو یا امام احمد رضا خان کے علمی شہ پارے، لغت کے بغیر ان کے عمیق مفاہیم تک پہنچنا ناممکن ہے۔ اہل سنت کے علماء نے ہمیشہ لغت کو "خادمِ شرع" قرار دیا ہے۔

ایک محقق اور طالبِ علم کے لیے ضروری ہے کہ وہ اپنے مطالعہ کی میز پر معتبر لغات کو جگہ دے۔ اگر ہم لغت کی اہمیت کو نظر انداز کریں گے تو ہم صرف الفاظ کے ڈھیر میں گم ہو جائیں گے اور علم کی روح تک کبھی نہیں پہنچ پائیں گے۔ جیسا کہ اعلیٰ حضرت نے اپنے کلام میں علم اور عقل کے توازن کی بات کی ہے، اسی طرح لغت اور فہم کا چولی دامن کا ساتھ ہے۔خداوندِ قدوس ہمیں علمِ دین کو صحیح لغوی و شرعی تناظر میں سمجھنے کی توفیق عطا فرمائے۔ آمین۔