دعوتِ اسلامی کےتحت  13اگست 2022ء بروز ہفتہ پاکستان کے شہر اسلام آباد میں ماہانہ مدنی مشورہ ہوا جس میں اسلام آباد سٹی نگران،سٹی سطح شعبہ ذمہ دار اور زون نگران اسلامی بہنوں نے آن لائن شرکت کی ۔

15اگست 2022ء  کو دعوت اسلامی کے تحت اسلامی بہنوں کے مدنی مرکز فیضان صحابیات میں مدنی مشورہ ہوا ۔یہ مدنی مشورہ مختلف زبانوں میں دعوت اسلامی کا دینی کام کرنے سے متعلق تھا ۔اس میں انگلش ،عربی اور چائنیز زبان کی ذمہ دار اسلامی بہنوں نے شرکت کی۔

مدنی مشورے میں عالمی مجلس مشاورت کی نگران اسلامی بہن نے مختلف زبانوں میں دین کام کرنے کے بارے میں مدنی پھول سمجھائے اور مدرسۃ المدینہ بالغات، شارٹ کورسز بھی دیگر زبانوں میں ہورہے ہیں ان کے اس دینی کام کو سراہا اور مزید کوشش کرنے کی ترغیب دلائی جس پر ذمہ دار اسلامی بہنوں نے اچھی اچھی نیتوں کا اظہار کیا۔

دعوت اسلامی کی جانب سے  12اگست 2022ء کو سینٹرل افریقہ کی ریجن نگران اسلامی بہن کا یوگنڈا کی اسلامی بہن کے ساتھ دینی کام کے سلسلے میں مدنی مشورہ ہوا جس میں انفرادی و تنظیمی مسائل پر بات چیت ہوئی اور نعم البدل بنانے کے حوالے سے مدنی پھول بنائے گئے۔

15 اگست2022ء  کو یو سی حسین آباد کراچی میں مبلغہ دعوت اسلامی کے سوئم کے سلسلے میں محفلِ نعت کا انعقاد ہوا جس میں گھر کی خواتین سمیت دیگر مقامی اسلامی بہنوں نے شرکت کی۔

مقالے کا عنوان :امام المحدثین کی اسانید مع تعارف شیوخ ِاسانید قسط 02 :

مقالے کی PDF کے لئے ڈاؤن لوڈ پر کلک کریں Download PDF

امام المحدثین کی اسانیدا حادیث

امام المحدثین، جَید عالِم، اُستاذُالعُلَما، مفتیِ اسلام،محدث العصر حضرت علامہ مفتی سید محمد دِیدار علی شاہ مَشْہدی نقشبندی قادِری مُحدِّث اَلْوَری رحمۃ اللہ علیہ(ولادت: 1273 ھ مطابق 1856 ء ، وفات : 1354 ھ مطابق 1935 ء ) برِعظیم کے مستند عالم دین ،مفتی اسلام ،مسند العصر،شیخ طریقت اور صاحب تصنیف بزرگ تھے آپ نے دورہ حدیث شریف افضل المحدثین علامہ احمد علی سہارنپوری سے کیا،جبکہ استاذ العلما و المشائخ علامہ فضل رحمن گنج مرادآبادی، اعلیٰ حضرت امام احمد رضا خان اور تاج العلماء ، اولاد رسول ، علامہ محمد میاں مارہروی رحمۃ اللہ علیہم سے احادیث مبارکہ اور دیگر علوم کی اسناد و اجازات حاصل کیں،اس کی تفصیل ذکر کرتے ہوئے آپ تحریر فرماتے ہیں :

”اورسند کتب فقہ اورحدیث سے مسائلِ فقہ مطابق کرنے کے جو تمام کتب احادیث قراءۃ و سماعۃ حضرت سید پیر مہر علی شاہ صاحب ([1]) مد اللہ ظلہ العالی

مسند آراء گولڑہ شریف ضلع راولپنڈی اور مولانا وصی احمد صاحب مرحوم مغفور سورتی ثم پیلی بھیتی([2]) اور تقریبا ًبیس پچّیس طلبہ کے ساتھ حرفاً حرفاً مولانا احمد علی صاحب سہارنپوری مرحوم مغفور پر 1292ھ (مطابق 1878ء)میں پیش کر کے خاکسار (امام المحدثین مفتی سیدمحمددیدارعلی شاہ رحمۃ اللہ علیہ )نے حاصل کی تھی،وہ یہ ہے : مولانا احمد علی سہارنپوری نے مولانا قاری عبدالرحمن صاحب پانی پتی([3]) کے ساتھ تمام کتب صحاح ستہ و غیرہا معہ طریق استنباط مسائل ضروریہ اور طریق موافق کرنے روایات فقہی کے قرآن اوراحادیث کے ساتھ پیش کی مولانا شاہ محمد اسحاق علیہ الرحمہ پر ، اور مولانا شاہ محمد اسحاق رحمۃ اللہ علیہ نے اسی طرح تمام احادیث کی مولانا شاہ عبد العزیز رحمۃ اللہ علیہ پر اور مولانا شاہ عبدالعزیز رحمۃ اللہ علیہ اپنے رسالہ ٔ ’’عجالہ نافعہ“ ([4])میں اپنی سندیں اس طرح تحریر فرماتے ہیں ۔

”اس فقیر (شاہ عبدالعزیز دہلوی)نے علم حدیث اور باقی جملہ علوم اپنے والد ماجد سے لیے ہیں اور بعض کتابیں حدیث کی مثلاً مصابیح و مشکوة و مسوی شرح موطا (جو کہ انہی کی تصنیفات میں سے ہے ( و حصن حصین اور شمائل ترمذی تحقیق و تفتیش کے ساتھ قراءة و سماعا ان سے حاصل کیں اور اوائل بخاری سے بھی کسی قدر بطریق درایت ان سے سنا ہے اور صحیح مسلم اور دیگر کتب صحاح ستہ کو غیر منتظم طریق پر بدیں نوع ان سے سنا ہے کہ دوسرے طلبا آپ کی خدمت میں پڑھتے تھے تو یہ فقیر بھی حاضر رہتا اور ان کی تحقیقات و تنقیحات کو سنتا رہتا تھا۔ یہاں تک کہ خدا کے فضل و کرم سے ادراکِ دقائقِ اسانید و معانی ِاحادیث میں کافی سمجھ اور ملکہ حاصل ہو گیا۔ بعد ازاں آپ کے قابل اعتماد احباب شاہ محمد عاشق پھلتی و خواجہ محمد امین ولی اللہی سے بطور رسم اجازت بھی حاصل کی اور شاہ محمد عاشق پھلتی سماع و قراۃ میں شیخ ابو طاہر قدس سرہ اور دیگر مشائخ محترم سے شریک اور حضرت شاہ ولی اللہ رحمۃ اللہ علیہ کے رفیق تھے اور حضرت شاہ صاحب (شاہ ولی اللہ )بعض حدیث کی کتابیں مثل مشکوۃ و صحیح بخاری پر پہلے اپنے ملک میں اپنے 1والد بزرگوار (شاہ عبد الرحیم )کے حضور میں عبور کر کے بطریق درایت ان سے یہ علم حاصل کر چکے تھے اور آپ(شاہ عبد الرحیم ) کی سند محمد زاہد مرحوم کے واسطے سے ملا جمال الدین دوانی تک پہنچتی ہے اور آپ کی حدیث کی سند انموذج العلوم([5]) کی ابتدا میں مفصل مذکور ہے اور فقیر(شاہ عبد العزیز ) کے والد بزرگوار (شاہ ولی اللہ)نے حاجی محمد افضل صاحب سیالکوٹی سے بھی اجازت حاصل کی تھی، جو کہ ان ممالک میں صاحب سندتھے ، ان کی سند بھی آپ کے رسائل میں مذکور ہے۔

بالآخر والد ماجد بزرگوار نے مدینہ منورہ اور مکہ معظمہ میں اجلہ مشائخ حرمین شریفین سے اس علم کی بالاستیعاب تکمیل کی اور آپ نے زیادہ تر 3استفادہ حضرت شیخ ابو طاہر مدنی قدس سرہٗ سے کیا جو اس علم میں اپنے زمانے کے یگانہ و فرید العصر تھے (رحمۃ اللہ علیہ و علی اسلافہ و مشائخہ )اور یہ عجب حسن اتفاقات سے ہے کہ شیخ ابو طاہر قدس سرہٗ صوفیاء کرام و عرفاء عظام کے واسطے سے شیخ زین الدین زکریا انصاری تک مسلسل سند رکھتے ہیں کہ انہوں (شیخ ابو طاہر )نے سند حاصل کی تھی اپنے باپ شیخ ابراہیم کُردی سے اور انہوں نے شیخ احمد قشاشی سے اور انہوں نے شیخ احمد شناوی([6]) سے اور انہوں نے اپنے والد شیخ عبد القدوس شناوی([7])سے ۔نیزشیخ ابو طاہر نے شیخ محمد بن ابی الحسن بکری اور شیخ محمد بن احمد رملی اور شیخ عبد الرحمن بن عبد القادر بن فہد سے بھی استفادہ حاصل کیا ،اور یہ سب لوگ جلیل القدر مشائخ اور عارفین باللہ سے کسب علم کیا ہے ۔ اور شیخ عبد القدوس نے شیخ ابن حجر مکی اور شیخ عبد الوہاب شعراوی سےسند حاصل کی۔ اور ان دونوں بزرگوں نے شیخ الاسلام زین الدین زکریا انصاری سے استفادہ کیا اور شیخ محمد بن بکری نے اپنے والد عارف باللہ ابو الحسن بکری سے اور انہوں (ابو الحسن بکری )نے شیخ زین الدین زکریا سے اور ایسے ہی شیخ محمد رملی نے اپنے باپ سے اور انہوں نے زین الدین زکریا سے تحصیل علم کیا ہے ، لیکن شیخ عبدالرحمن بن عبد القادر بن فہد نے اپنے چچا جار الله بن فہد سے اور انہوں (جار اللہ )نے شیخ جلال الدین سیوطی سے استفادہ کیا ہے ، اور شیخ ابو طاہر قدس سرہٗ نے شیخ حسن عُجَیمی سے بھی استفادہ کیا ہے اور شیخ حسن عُجَیمی ، شیخ عیسی مغربی کے شاگرد تھے اور وہ شیخ محمد بن العلاء بابلی کے ، اور وہ شیخ سالم سنہوری کے ، اور سالم نے شیخ نجم الدین غیطی سے علم حاصل کیا اور نجم الدین غیطی نے شیخ الاسلام زین الدین زکریا انصاری سے استفادہ کیا ، اور شیخ عیسیٰ مغربی کئی واسطوں سے شیخ جلال الدین سیوطی کے شاگرد ہیں ۔ اور شیخ ابو طاہر نے شیخ احمد نخلی سے بھی علم حاصل کیا جو اپنے زمانے میں مکہ مکرمہ کے سب سے بڑے عالم تھے اور شیخ احمد نخلی نے سلطان مزاحی سے ، اور انہوں نے شہاب الدین احمد بن خلیل سبکی سے ، اور انہوں نے شیخ محمد مقدسی سے ، اور انہوں نے شیخ زین الدین زکریا سے تحصیل علم کیا ۔

اور حضرت شیخ ابو طاہر نے شیخ عبداللہ بن سالم بصری سے بھی علم حاصل کیا تھا اور وہ شیخ احمد نخلی کے ہمعصر تھے اور شیخ احمد نخلی کے اساتذہ سے بھی تلمذ رکھتے تھے۔

اور شیخ ابوطاہر نے شیخ محمد بن محمد بن سلیمان مغربی سے بھی تحصیل علم کیا ۔

الغرض ان عزیزوں میں سے ہر ایک نے دو یا تین واسطوں سے بہت سے طرق پر اسناد حاصل کیا اوران کا شجرہ شیخ زین الدین زکریا ، شیخ جلال الدین سیوطی ، شمس الدین سخاوی ، عبدالحق سنباطی اور سید کمال الدین محمد بن حمزہ حسینی تک پہنچتا ہے اور ہر ایک ان میں سے صاحب سند اور اپنے وقت کا حافظ تھا اور ان کی تصنیفات ملکوں میں جاری و ساری اور ان کی اسانید اکناف و آفاق عالم میں مشہور و معروف ہیں۔ ⁽[8]⁾

مذکورہ سندِحدیث کےشیوخ کا مختصرتعارف

۞ امامُ الْمُحدِّثین حضرت مولانا سیِّد محمد دِیدار علی شاہ مَشْہدی نقشبندی قادِری مُحدِّث اَلْوَری رحمۃ اللہ علیہ، جَیِّد عالِم، اُستاذُ العُلَما، مفتیِ اسلام اور اکابرین اہل سنّت سے تھے۔آپ 1273ھ مطابق 1856ھ کو اَلْوَر (راجِسْتھان، ہِند )میں پیدا ہوئے اور لاہور میں 22 رجب المرجب 1354 ھ مطابق 20 ،اکتوبر 1935 ء کو (بروز پیر)نماز عصر کے سجدے میں وصال فرمایا ،جامع مسجد حنفیہ محمدی محلہ اندرون دہلی گیٹ لاہور سے متصل جگہ میں تدفین کی گئی۔ دارُ العُلُوم حِزْبُ الْاَحْناف لاہور([9]) اور فتاویٰ دِیداریہ([10]) آپ کی یادگار ہیں۔ ([11])

۞ افضل المحدثین علامہ احمد علی سہارنپوری کی ولادت 1225 ھ مطابق 1810ءکو ہوئی اور 6 جمادَی الاُولیٰ 1297ھ مطابق 16 اپریل 1880 ء کو تقریباً بہتر (72) سال کی عمر میں داعیِ اجل کو لبیک کہا۔ آپ اپنے آبائی قبرستان متصل عید گاہ سہارنپور میں سپردِ خاک کیے گئے۔آپ حافظِ قرآن، عالمِ اجل، استاذُ الاساتذہ، مُحدّثِ کبیر اور کثیر الفیض شخصیت کے مالک تھے، اشاعتِ احادیث میں آپ کی کوشش آبِ زر سے لکھنے کے قابل ہے، آپ نے صحاح ستہ اور دیگر کتب احادیث کی تدریس، اشاعت ، حواشی اور درستیٔ متن میں جو کوششیں کیں وہ مثالی ہیں ۔ ⁽[12]⁾

۞ علامہ شاہ محمد اسحاق دہلوی مہاجر مکی کی پیدائش ذوالحجہ 1197ھ مطابق 1782ء دہلی میں ہوئی ،یہ حضرت شاہ عبد العزیز محدث دہلوی کےنواسے ، شاگرد اور جانشین تھے ، پہلے دہلی پھر مکہ شریف میں تدریس کرتے رہے ،وفات رجب 1262ھ کو مکہ شریف میں ہوئی اور جنت المعلیٰ میں دفن کئے گئے ۔ ⁽[13]⁾

۞ سِراجُ الہند حضرت شاہ عبد العزیز محدّثِ دہلوی رحمۃ اللہ علیہ علوم و فُنون کے جامع، استاذُ العلماء و المحدثین، مُفَسِّرِ قراٰن، مصنّف اور مفتیٔ اسلام تھے، تفسیرِ عزیزی، بُستانُ المُحدّثین ، تحفۂ اِثنا عشریہ اور عاجلہ نافعہ([14])آپ کی مشہور کُتُب ہیں۔ 1159 ہجری کو دہلی میں پیدا ہوئے اور 7 شوال 1239ہجری میں وِصال فرمایا، مزار مبارک درگاہ حضرت شاہ وَلِیُّ اللہ مہندیاں، میر درد روڈ، نئی دہلی میں ہے۔ ⁽[15]⁾

۞ مولانا شاہ محمد عاشق پُھلتی کی ولادت 10 رمضان 1110 ھ کو ہوئی ، اور 30 محرم 1176 ھ کو دہلی میں وفات پائی ،تدفین والد ماجد کے پہلو میں درگاہ شریف پھلت ( ضلع مظفرنگر،یوپی،ہند) میں کی گئی ،آپ حضرت شاہ ولی اللہ دہلوی کے ماموں زاد بھائی ،برادرِ نسبتی،سمدھی،بچپن کے دوست،شاگرد اور خلیفہ تھے ،آپ نے علم دین اپنے خاندان کے علما سے حاصل کیا ، 1143ھ کو حج کے لیے حجاز مقدس کا سفر کیا سات ماہ یہاں رہے اور علمائے عرب سے استفادۂ علمی کے بعد مختلف اسناد سے نوازے گئے۔حضرت شاہ ولی اللہ محدث دہلوی کی حالات زندگی بنام ”القول الجلی فی ذکر آثار الولی )[16]( تحریر فرمائی جو آپ کی پہچان ہے ۔ ⁽[17]⁾

۞ خواجہ محمد امین ولی اللہی کشمیری کی پیدائش کشمیر میں ہوئی ،تجارت کی غرض سے لاہور پھر شاہجہاں آباد (یوپی،ہند) آگئے ،خواجہ محمد ناصر نقشبندی (خلیفہ خواجہ محمد زبیر سرہندی)کی صحبت سے دین کی طرف راغب ہوگئے ،حضرت شاہ ولی اللہ محدث دہلوی سے علوم اسلامیہ حاصل کئے، آپ درجہ ولایت پر فائز اور اپنے مرشد کے معتمد تھے،مرشد کی وفات کے بعد بھی دہلی میں ہی رہے ،وفات 1187 ھ میں ہوئی۔⁽[18]⁾

۞ حضرت مولانا شاہ ولی اللہ احمد بن عبد الرحیم محدث دہلوی فاروقی حنفی نقشبندی رحمۃ اللہ علیہ کی پیدائش دہلی میں 3 شوال 1110 ھ مطابق 1699 ء کو ہوئی اور یہیں 1176 ھ مطابق 1762 ء کو وصال فرمایا ،آپ حافظ قرآن،علوم عقلیہ و نقلیہ کے ماہر،عرب کے کبار شیوخ سے مستفیض تھے ،1143 ھ کو حجاز مقدس حاضر ہوئے اور وہاں آٹھ عرب مشائخ سے استفادہ کیا ،آپ نے زندگی بھر حدیث پاک کا درس دیا ، قوم و ملت کی رہنمائی کی ،آپ کی تصنیف کردہ کتب میں فتح الرحمن فی ترجمۃ القرآن فارسی ،الفوز الکبیر فی اصول التفسیر،مؤطا امام مالک کی دو شروحات المصفیٰ فارسی،المسوّی عربی، حجۃ اللہ البالغہ فارسی، ازالۃ الخفاء عن خلافۃ الخلفاء فارسی ،الانتباہ فی سلاسل اولیاء اللہ فارسی، انسان العين فی مشائخ الحرمين اور الارشاد الی مہمات الاسناد عربی ([19]) مشہور ہیں ، آپ کا شمار ہند کی مؤثر شخصیات میں ہوتا ہے ۔ ⁽[20]⁾

حضرت شاہ ولی اللہ محدث دہلوی کی پہلی سند

۞ حضرت مولانا شاہ عبد الرحیم دہلوی کی ولادت 1054 ھ میں پھلت (ضلع مظفرنگر،یوپی،ہند)میں ہوئی اور وصال 12 صفر 1131 ھ کو دہلی میں فرمایا ،آپ جید عالم دین ، ظاہری و باطنی علوم سے آگاہ، صوفی بزرگ اور محدث وقت تھے ،علم فقہ میں بھی عبور رکھتے تھے ، فتاوی عالمگیری کی تدوین میں بھی شامل رہے ،کئی سلاسل کے بزرگوں سے روحانی فیضان حاصل کیا ، ،سلسلہ قادریہ ،سلسلہ نقشبندیہ،سلسلہ ابو العلائیہ ، سلسلہ چشتیہ اور سلسلہ قادریہ قابل ذکر ہیں ۔ ⁽[21]⁾

۞ حضرت علامہ میر محمد زاہد ہروی ہند کے ایک اہل ثروت علمی گھرانے میں پیدا ہوئے، والد علامہ قاضی محمد ہروی سلطنت مغلیہ کے لشکر شاہی کے قاضی ، جید عالم دین اور صاحب تصنیف تھے ،ابتدائی علوم اسلامیہ ان سے حاصل کئے پھر علمائے کابل،توران اور لاہور سے استفادہ کر کے منقول و معقول میں ماہر ہو کر بارہویں صدی کے علما و فقہا میں شمار ہونے لگے ،آپ بھی سلطنت مغلیہ کے کئی عہدوں مثلا وقائع نگاری،محتسب لشکر شاہی اور صدارتِ کابل پر فائز رہے ،پھر سلطنت کے عہدوں سے مستعفی ہو کر درس و تدریس اور تصنیف کے طرف متوجہ ہوگئے ،بشمول مولانا شاہ عبد الرحیم دہلوی کثیر علما نے آپ سے استفادہ کیا ،آپ کی کتب میں حاشیہ شرح مواقف امور عامہ ،حاشیہ شرح تہذیب علامہ دوانی،حاشیہ رسالہ تصور و تصدیق از علامہ قطب الدین رازی([22]) یادگار ہیں ،آپ کا وصال1101 ھ مطابق 1690ء کو کابل میں ہوا۔ ⁽[23]⁾

۞حضرت علامہ محمد فاضل بدخشی لاہوری حنفی مشہور محدث و فقیہ علامہ عین القضا ہمدانی کے خاندان سے ہیں،آپ روستان نزد بدخشان(افغانستان) کے رہنے والے تھے ، آپ نے اپنے علاقے،کابل ،توران اور لاہور کے علما سے علم حاصل کیا،تحصیل علم کے بعد ہند آکر مغلیہ بادشاہ جہانگیر سے ملاقات کی،بادشاہ آپ سے متاثر ہوا اور پنجاب کی صدارت پر فائز کیا،لشکر کا امیر عدل بھی مقرر کیا، تقریبا 1044ھ میں آپ نے اس عہدے سے مستعفی ہو کر درس و تدریس میں مشغول ہوگئے ، آپ علامہ دہر اور فاضل لاہور تھے کثیر علما نے استفادہ کیا ۔آپ کا وصال 1050 ھ کو لاہور میں وفات پائی اور یہیں تدفین ہوئی۔ ⁽[24]⁾

۞استاذ الکل حضرت مولانا ابو الفضل یوسف بن محمد کوسج قراباغی محمد شاہی رحمۃ اللہ علیہ جید عالم دین ،متکلم و محقق،صاحبِ تصانیف،استاذ العلماء اور اسلامی شاعر تھے، آپ نے کئی کتب ([25]) تصنیف کیں ۔آپ کا وصال1035 ھ میں ہوا۔ ⁽[26]⁾

۞شمس الملت و الدین حضرت علامہ مرزا جان حبیب اللہ بن عبد اللہ باغنوی شیرازی حنفی کا تعلق شیراز(صوبہ فارس ،ایران)کے محلے باغنو سے ہے ،جید عالم دین ،متکلم و اصولی اور فن منطق میں ماہر تھے ،آپ نے کئی کتب اور حواشی لکھے ،آپ کا وصال 994 ھ میں ہوا۔گیارہ سے زائد کتب و حواشی میں حاشیہ شرح مختصر الاصول اور حاشیہ شرح مختصر ابن حاجب ([27]) بھی ہیں ۔ ⁽[28]⁾

۞ملا جمال الدین محمود شیرازی حنفی کا شمار مشہور فضلاء میں ہوتا ہے، 908ھ میں جب شیراز پر صفوی حکومت قائم ہوئی تو آپ حرمین شریفین چلے گئے ،حج کرنے کے بعد گجرات ، ہند آگئے ،وہاں کچھ عرصہ گزار نے کے بعد آگرہ میں آخر مقیم ہوگئے، یہیں حضرت شاہ رفیع الدین محدث اکبر آبادی([29]) کی صحبت اختیار کی ،وصال 999ھ میں ہوا،آپ صاحب تصنیف ([30]) بھی ہیں ۔ ⁽[31]⁾

۞محقق دوانی حضرت علامہ جلال الدین محمد بن اسعد الدین صدیقی شافعی کی پیدائش 830 ھ کو موضع دوان نزد کازرون (صوبہ فارس،ایران)میں ہوئی ، یہیں 9ربیع الاول 908ھ یا 918 ھ کو وصال ہوا۔والد گرامی اور دیگر علما سے علوم اسلامیہ حاصل کئے ،کئی شہروں کا سفر کیا ،کازرون کے قاضی بنائے گئے ،زندگی بھر درس و تدریس اور تصنیف و تالیف میں مصروف رہے ، آپ نے فقہ،اصول،كلام ،فلسفہ اور تفسير میں 84 کتب و حواشی تحریر فرمائے ،مشہور کتب میں انموذج العلوم، تفسير سورة الكافرون ، شواکل الحور،شرح كتاب ہياكل النور سهروردی⁽[32]⁾اور لوامع‌ الاشراق فی مکارم الاخلاق المعروف اخلاق جلالی([33]) ہیں ،آپ فقیہ شافعی ، حازق حكيم  ، متكلّم و منطقی ، مفسر و محقق اور اديب و شاعر تھے۔⁽[34]⁾

۞ علامہ سعدالدین اسعدصدیقی تفتازانی کا تعلق موضع دوان نزد کازرون (صوبہ فارس،ایران) ہے ،آپ محدث اور جامع المرشدی کازرون کے استاذ تھے، آپ نے علم تفسیر اور حدیث علامہ شرف الدین عبدالرحیم صدیقی اور علامہ شمس الدین ابو الخیر محمد بن محمد جزری)[35]( سے حاصل کیا،آپ ایک عرصے تک علامہ سید شریف جرجانی)[36] (کی صحبت میں رہے ،مشہور زمانہ محقق علامہ جلال الدین محمد دوانی آپ کے ہی صاحبزادے اور شاگرد ہیں ۔⁽[37]⁾

۞ شرف الملت و الدین حضرت شیخ ابو فضائل عبد الرحیم صدیقی جرہی شیرازی شافعی کے آبا و اجداد کا تعلق جرہ نزد کازرون (صوبہ فارس،ایران)سے ہے۔ آپ کی ولادت 3صفر 744 ھ کو شیراز (ایران)میں اور وصال 17صفر828ھ کو لار(Lar ،صوبہ فارس ،ایران )میں ہوا ، حفظ قرآن کے بعد آپ نے عرب و عجم کے کثیر علما سے استفادہ کیا ،آپ محدث ،متکلم ،صاحب تصوف اور کثیر الفیض بزرگ تھے ، شیراز ،عراق ،مصر،شام اور فلسطین کے علما آپ سے مستفیض ہوئے ،آپ عبادت و تلاوت میں کثرت کرنے ،نفلی روزے رکھنے اور پنج وقتہ با جماعت نماز کی ادائیگی کا اہتمام کرنے میں حریص تھے ۔([38])

۞علامہ عصر ،امام الملت و الدین ، ابو مکارم علی بن علی بن مبارك شاه صديقی ساوجی شافعی کی پیدائش 766ھ کو ہوئی اور رجب 841ھ کو 75سال کی عمر میں وصال فرمایا، آپ کا تعلق ساوہ (Saveh ،صوبہ ٔمرکزی ،ایران)ہے ،آپ جامع معقول و منقول، مفتی ٔعلاقہ، صاحب تقویٰ و کرامت اور ذکر و فکر میں مشغول رہنے والے تھے۔ ⁽[39]⁾

۞شیخُ الاسلام، عمدۃُ المحدثین، شہابُ الدّین، حافظ احمد بن علی ابنِ حجر عسقلانی شافعی رحمۃ اللہ علیہ کی ولادت 773ھ کو قاہرہ مصر میں ہوئی اور یہیں 28ذوالحجہ852ھ کو وصال فرمایا۔ تدفین قَرافہ صُغریٰ میں ہوئی۔ آپ حافظُ القراٰن، محدثِ جلیل، استاذُ المحدثین، شاعرِ عربی اور 150 سے زائد کُتُب کے مصنف ہیں۔ آپ کی تصنیف ”فتح الباری شرح صحیح البخاری“ ([40])کو عالمگیر شہرت حاصل ہے۔ ⁽[41]⁾

حضرت شاہ ولی اللہ محدث دہلوی کی دوسری سند

۞حضرت مولانا شیخ حاجی محمد افضل محدث سیالکوٹی کی پیدائش سیالکوٹ میں ہوئی،ہند کے علما بالخصوص نبیرہ مجدد الف ثانی شیخ حجۃ اللہ سرہندی ،شیخ عبد الاحد وحدت سرہندی اور مکہ شریف میں حضرت شیخ سالم بن عبداللہ بصری([42]) سے سند حدیث حاصل کی ،دہلی میں مسند حدیث بچھائی ،حضرت شاہ ولی اللہ اور مرزا مظہر جانجان ([43]) رحمۃ اللہ علیہما مشہور شاگرد ہیں،آخر الذکر کے شاگرد و خلیفہ مولانا شاہ نعیم اللہ بہرائچی([44]) نے آپ کی بیاض کا خلاصہ (عربی وفارسی )تحریر کیا ہے۔ 1146ھ کو دہلی میں وصال فرمایا، حضرت خواجہ باقی بااللہ ([45])کے مزار سے متصل تدفین کی گئی۔⁽[46]⁾

۞شاہ گل حضرت شیخ عبد الاحد وحدت سرہندی کی ولادت تقریبا 1050ھ کو سر ہند میں ہوئی اور آپ نے 75سال کی عمر میں 27ذوالحجہ 1126ھ کو وصال فرمایا ، اپنے والد گرامی سمیت کئی علما سے استفادہ کیا ،والد گرامی اور چچا جان حضرت خواجہ معصوم عروۃ الوثقی ([47])سے خلافت حاصل ہوئی ،آپ عالم دین ،شیخ طریقت اور صاحبِ دیوان شاعرتھے ،فارسی میں وحدت اور ریختہ(اردو)میں گل تخلص تھا،آپ نے تقریبا 50کتب تحریر فرمائیں۔ دیوان شعر فارسی ، الجنات الثمانیہ ([48]) وغیرہ آپ کی تصانیف ہیں ۔ ⁽[49]⁾

۞ خازن الرحمت حضرت مولانا شیخ محمد سعید سرہندی کی ولادت ماہِ شعبان 1005ھ میں سرہند شریف اور وفات 27جمادی الاخریٰ 1070ھ یا 1071ھ کو ہوئی ،تدفین والد گرامی حضرت شیخ مجدد الف ثانی کے پہلو میں کی گئی،آپ والد گرامی سے ظاہری و باطنی علوم حاصل کر کے جید عالم دین بنے ،علما کا آپ کی جانب رجوع تھا ، بادشاہ اورنگ زیب عالمگیر آپ کا عقیدت مند تھا،آپ سے کئی کرامات کا صدور ہوا ، آپ نے کئی کتب بھی تحریر فرمائیں ،آپ کے صاحبزادے حضرت شیخ عبد الاحد وحدت سرہندی نے آپ کے احوال پر کتاب ”لطائف المدینہ“ ([50]) تحریر فرمائی ۔ ⁽[51]⁾

۞تاجدارِ سلسلۂ نقشبندیہ مجددیہ حضرت مجددِ الفِ ثانی شیخ احمد فاروقی سرہندی حنفی رحمۃ اللہ تعالٰی علیہ کی ولادت 971ھ کو سرہند شریف (ضلع فتح گڑھ، صوبہ مشرقی پنجاب) ہند میں ہوئی اور 28 صَفَرُالْمُظَفَّر 1034ھ کو یہیں وصال فرمایا، روضۂ مبارک مرجعِ انوار ہے۔ آپ عالمِ باعمل، مصنفِ کُتُب اور عالمگیر شہرت کے حامل شیخِ طریقت ہیں۔ ”مکتوباتِ امام ربانی“ ⁽[52]⁾آپ کی کُتُب سے ہے۔ ⁽[53]⁾

۞عالم کبیر،مفسر قرآن ،مسند العصر حضرت مولانا یعقوب بن حسن صرفی کشمیری کی ولادت 908ھ کو کشمیر میں ہوئی ،آپ بچپن سے ہی ذہین،تیز فہم اور علامات بزرگی رکھنے والے تھے ،حفظِ قرآن کے بعد مقامی علمائے اہل سنت سے علوم معقول و منقول حاصل کئے ،پھر سمرقند جا کر حضرت شیخ حسین خوارزمی سے سلسلہ کبرویہ میں بیعت و خلافت حاصل کی ،پھر حجاز مقدس میں جاکر حضرت امام ابن حجر ہیتمی اور دیگر مشائخ سے اسناد لینے کا شرف پایا،واپس آکر ہند میں درس و تدریس اور تصنیف میں مصروف ہوگئے ،تفسیر،حدیث اور فقہ میں کمال درجے کا رسوخ حاصل تھا،کئی تصانیف یادگار ہیں۔ 12ذیقعدہ 1003ھ کو وصال فرمایا۔ہمایوں بادشاہ آپ پر بہت مہربان تھا ،طبعا نہایت فیاض اور سخی تھے ۔صوفیانہ شاعری بھی کرتے تھے۔⁽[54]⁾

۞شیخ الاسلام ،شہاب الملت و الدین،مفتی حجاز حضرت امام ابو العباس،ابن حجر احمد بن محمد سعدی ہیتمی شافعی الازہری کی پیدائش رجب 909 ھ کو محلہ ابی الہيتم (صوبہ غربیہ ،مصر)میں ہوئی اور مکہ مکرمہ میں رجب 974 ھ کو وصال فرمایا ،آپ علم تفسیر، حدیث ،فقہ،تاریخ اور کلام وغیرہ میں ماہر تھے ،آپ نے جید علمائے عصر سے استفادہ کیا اور محدث و فقیہ شافعی ہونے کا شرف حاصل کیا ،آپ نے تقریبا 33 سال تدریس ،افتا اور تصنیف و تالیف میں مصروف رہے ،کثیر علما نے آپ سے اجازات حاصل کیں۔آپ کی تصانیف میں” الصواعق المحرقہ“،”الفتاوى الحدیثیہ“ ، ”تحفۃ الاخبار فی مولد المختار“ اور” تحفۃالمحتاج بشرح المنہاج “ ([55]) ہیں۔([56])

۞شیخ الاسلام حضرت امام زین الدین ابو یحییٰ زکریا بن محمد انصاری الازہری رحمۃ اللہ علیہ کی ولادت 826ھ کو سُنیکہ(صوبہ شرقیہ)مصر میں ہوئی،جامعۃ الازہر سے علوم اسلامیہ حاصل کئے،قاہرہ میں مقیم ہوگئے ،آپ فقیہ شافعی،محدث وقت،حافظ الحدیث، صوفی باصفا،قاضی القضا ۃ،بہترین قاری،مصنف کتب کثیرہ،لغوی و متکلم ، مؤرخ و مدرس، مفتی اسلام اور نویں صدی ہجری کےمجدد ہیں،آپ نے 4 ذوالحجہ 925ھ کو قاہرہ مصر میں وفات پائی۔ قاہرہ میں امام شافعی کے مزار کے قریب قرافہ صغریٰ میں تدفین ہوئی،آپ کا مزار مرجع خلائق ہے۔” الدقائق المحكمة فی شرح المقدمة “ ([57])، ” تحفۃ الباری علی صحيح البخاری“ ([58]) اور ” اَسنى المطالب“ ([59]) آپکی مشہور کتب ہیں۔ ⁽[60]⁾

۞شیخ الاسلام، عمدۃُ المحدثین، شہابُ الدّین، حافظ احمد بن علی ابنِ حجر عسقلانی شافعی رحمۃ اللہ علیہ الکافی کا ذکر گزرچکا ہے ۔

حضرت شاہ ولی اللہ محدث دہلوی کی تیسری سند

۞حضرت شیخ جمال الدین ابو طاہر محمد بن ابراہیم کورانی مدنی رحمۃ اللہ علیہ کی ولادت مدینہ شریف میں 1081ھ مطابق 1670ء کو ہوئی اور یہیں 1145ھ مطابق 1733ء کو وصال فرمایا اور جنت البقیع میں دفن کئے گئے ،آپ جید عالم دین ،محدث و مسند،مفتی ٔ شافعیہ مدینہ منورہ،علامہ شیخ ابراہیم کردی آپ کے والد صاحب اور شیخ احمد قشاشی نانا محترم تھے ۔ والد صاحب کے علاوہ ،مفتیٔ شافعیہ مدینہ منورہ شیخ سید محمد بن عبد الرسول برزنجی⁽[61]⁾اور شیخ حسن بن علی عُجیمی ([62]) سے اجازات حاصل کیں ، کئ کتب بھی لکھیں ،جواب تک مطبوع نہیں ہوسکیں ،مکتبہ حرم مکی میں آپ کی ثبت کا مخطوط پانچ اوراق میں محفوظ ہے ۔ ⁽[63]⁾

۞حضرت امام شیخ برہان الدین، ابو العرفان ابراہیم بن حسن کورانی کردی کی ولادت کردستان(عراق) میں 1025ھ کو ہوئی،آپ شافعی عالم دین،محدث و مسند ، سلسلہ نقشبندیہ کے شیخ طریقت ہیں۔ 80سے زائد کتب لکھیں جن میں اسانید و مرویات پر مشتمل ” کتاب الامم لایقاظ الھمم “ ([64]) مطبوع ہے۔آپ عراق سے ہجرت کر کے مدینہ شریف مقیم ہوگئے تھے،یہیں ایک قول کے مطابق18ربیع الآخر 1101ھ مطابق 29 جنوری 1690 ء میں وصال فرمایا۔ ⁽[65]⁾

۞ خاتم المحدثین حضرت امام عبد اللہ بن سالم بصری شافعی رحمۃ اللہ علیہ کی ولادت 1049ھ کو مکہ میں ہوئی اور یہیں 4 رجب 1134ھ کو وصال فرمایا، جنتُ المعلی میں دفن کئے گئے،بصرہ میں نشوونما پائی،پھر مکہ شریف میں آ کر مقیم ہوگئے ، آپ مسجد حرام شریف میں طلبہ کو پڑھایا کرتے تھے،زندگی بھر یہ معمول رہا،کثیر علما نے آپ سے استفادہ کیا،آپ جید عالم دین،محدث و حافظ الحدیث اور مسند الحجاز تھے، کئی کتب تصنیف فرمائیں جن میں سے ”ضیاء الساری فی مسالک ابواب البخاری “ ⁾[66] ⁽ یادگار ہے۔ ⁽[67]⁾

۞حضرت شیخ شمسُ الدّین ابو عبد اللہ محمد بن محمد بن سلیمان رودانی مالکی رحمۃ اللہ علیہ مراکش کے علاقے تارُودَنْت (صوبہ سوس ماسہ)میں 1037ھ کو پیدا ہوئے ، ابتدائی تعلیم وہاں حاصل کر کے آپ الجزائر، مصر، شام، استنبول اور حجاز مقدس آئے اور اولاً مدینہ شریف پھر مکہ مکرمہ میں مقیم ہوگئے، یہیں شادی کی، آپ کا شمار مکہ شریف کی مؤثر و مقبول شخصیات میں ہوتا تھا،آپ حدیث، فقہ، حساب،فلکیات اور عربی ادب میں ماہر تھے۔آپ نے دینی خدمات میں امامت،فتاوی نویسی اور تدریس کو منتخب فرمایا،تحریر و تصنیف میں بھی مصروف رہے،آپ کی سات تصانیف میں سے ” جمع الفوائد من جامع الاصول “ و ” مجمع الزوائد“ )[68] (آپ کی پہچان ہے،اس عظیم محدث کا وصال 10ذیقعدہ 1094 ھ کو دمشق میں ہوا اور جبل قاسیون میں تدفین کی گئی۔ ⁽[69]⁾

۞قطب زماں ،حضرت سید صفی الدین احمد قشاشی بن محمد بن عبد النبی یونس قدسی مدنی حسینی رحمۃ اللہ علیہ کی ولادت 12ربیع الاول 991 ھ مطابق 1583 ء کو مدینہ منورہ میں ہوئی ،آپ حافظ قرآن، شافعی عالم دین ،عرب و عجم کے تقریبا سو علما و مشائخ سے مستفیض،سلسلۂ نقشبندیہ کے شیخ طریقت ، 70کے قریب کتب کے مصنف،نظریہ وحدۃ الوجود کے قائل و داعی تھے،کثیر شاگردوں میں نمایاں شیخ برہان الدین ابراہیم کردی کورانی شافعی مدنی ،صاحب در مختار علامہ علاؤالدین حصکفی ) [70] ( اور حضرت حسن عجیمی رحمۃ اللہ علیہم تھے ۔آپ نے 19ذوالحجہ 1071ھ مطابق 1661ء کو مدینہ شریف میں وصال فرمایا اور جنت البقیع میں مدفون ہوئے ،تصانیف میں روضہ اقدس کی زیارت کے لیے سفرِ مدینہ کے اثبات پر کتاب ’’ الدرۃ الثمینۃ فیماالزائر النبی الی المدینۃ ‘‘ ([71])آپ کی پہچان ہے ۔ ⁽[72]⁾

۞حضرت ابو المواہب احمد بن علی بن عبدالقدوس شناوی مصری خامی مدنی عباسی رحمۃ اللہ علیہ کی پیدائش975ھ کو ہوئی، شناوی کہنے کی وجہ یہ ہے کہ آپ کے آبا و اجداد کا تعلق موضع شنو(صوبہ غربیہ ) مصر سے ہے ،آپ کا وصال مدینہ شریف میں 6یا 8ذوالحجہ 1028 ھ کو ہوا اور جنت البقیع میں حضرت ابراہیم بن رسول اللہ (رضی اللہ عنہ و صلی اللہ علیہ والہ وسلم )کے قبہ مبارک کے عقب میں تدفین ہوئی،آپ جید عالم دین ،محدث وقت ،ثقہ راوی،ادیب و شاعر،کئی کتب کے مصنف اور سلسلہ قادریہ شطاریہ کے شیخ طریقت و صاحب کرامات تھے ۔آپ کی کتب میں ” تجلیۃ البصائر حاشیۃ على كتاب الجواهر“ ) [73](بھی ہے۔ ⁽[74]⁾

۞محدث وقت ،علامہ زماں حضرت نور الدين علی بن عبد القدوس قرشی عباسی شناوی ایک صوفی اور علمی گھرانے میں پیدا ہوئے ،دیگر علمائے عصر کے ساتھ اپنے شیخ ابن حجر عسقلانی اور امام الصوفیہ حضرت شیخ عبد الوہاب شعرانی رحمۃ اللہ علیہما سے علوم و فنون حاصل کئے اور اسناد و اجازات سے نوازے گئے،مشہور محدث شیخ احمد شناوی رحمۃ اللہ علیہ آپ کے قابل فخر فرزند ہیں۔ ([75])

۞امام الوقت،قطب ربانی حضرت شیخ ابو المواہب عبد الوہاب شعرانی شعراوی شافعی رحمۃ اللہ علیہ عالمِ کبیر،محدث وقت ،مفتی ٔ اسلام ،صوفی بزرگ ،زہد و تقویٰ کے جامع اور صاحب تصانیف ہیں ، 300 کتب میں سے ” تنبیہ المغترین “،”اَنوارُالقُدسیہ “اور ”طبقات شعرانی “ ([76]) بھی ہیں۔حضرت امام زکریا انصاری،شیخ شہاب الدین رملی ،امام جلال الدین سیوطی اور امام شہاب الدین قسطلانی آپ کے اساتذہ ہیں ،آپ کی پیدائش 27 رمضان 898ھ کو قلقشندة(طوخ،صوبہ قلیوبیہ،مصر )میں ہوئی اور وصال جمادی الاولی ٰ 973ھ میں ہوا، مزار مبارک باب شعری، مدینۃ البعوث،قاہرہ مصر میں ہے۔ ⁽[77]⁾

۞تاج العارفين ابو الحسن محمد بن محمد بكری صدیقی مصری شافعی کی ولادت 899 ھ قاہرہ مصر میں ہوئی اور یہیں 952 ھ کو وصال فرمایا ،آپ جامعۃ الازہر کے فارغ التحصیل،عالم با عمل، مفسر قرآن،محدث وقت،فقیہ شافعی ،ادیب و شاعر،شیخ طریقت،استاذ الاعظم اور مصنف کتب کثیرہ ہیں،آپ کی چالیس کتب میں تفسیر البکری ([78]) آپ کی پہچان ہے۔ ⁽[79]⁾

۞عارف باللہ حضرت شیخ جلال الدین ابو البقاء محمد بن عبد الرحمن بکری شافعی رحمۃ اللہ علیہ کی ولادت 2 صفر 807 ھ میں دَھْرُوط میں ہوئی اور یہیں 15ربیع الآخر 891ھ میں وصال فرمایا ،آپ نے دیگر مشائخ کے ساتھ علامہ ابن حجر عسقلانی سے بھی استفادہ کیا ،آپ علم فقہ میں ماہر،اصول و ادب میں حاوی اور علم حدیث سے مالا مال تھے،فقہ شافعی کی حفاظت،علم حدیث کی ترویج اور معاشرے کی اصلاح کی بھرپور کوششوں نے آپ کو زمانے میں یکتا بنادیا۔ آپ نے کئی شافعی کتب کی شروحات لکھیں۔ ⁽[80]⁾

۞ شافعی صغیر حضرت سیّدنا امام شمسُ الدّین محمد بن احمد رمْلی مصری رحمۃ اللہ علیہ شیخ الاسلام، عالمِ کبیر، فقیہِ شافعی، دسویں سن ہجری کے مجدد،محدث وقت ،ماہر تفسیر و نحو اور استاذُ العُلَما ہیں، تصانیف میں ” نہایۃ المحتاج شرح المنہاج “ ([81])مشہور ہے۔ 919ھ میں قاہرہ مصر میں پیدا ہوئے اور 13 جُمادَی الاُولیٰ 1004 ھ میں وفات پائی، تدفین قاہرہ میں ہوئی ۔⁽[82]⁾

۞ شیخ الاسلام حضرت امام شہاب الدین احمد بن حمزہ رملی شافعی کی ولادت منوفیہ مصر میں ہوئی اور جمادی الاُخری 957 ھ مطابق 1550 ء کو قاہرہ میں وصال فرمایا، تدفین جامع میدان بیرون باب قنطرہ (مصر)میں ہوئی ، آپ عالم باعمل ،صوفی با صفا، فقیہ شافعی ،محدث وقت اور ایک درجن سے زائد کتب کے مصنف ہیں ،جن میں ”فتح الجواد بشرح منظومۃ ابن العماد “، غایۃ المأمول فی شرح ورقات الاصول اور فتح الرحمن بشرح زبدابن رسلان([83]) مطبوع ہیں ،ان کے فتاویٰ کا مجموعہ فتاویٰ رملی([84])کے نام سے مشہور ہے۔ ⁽[85]⁾

۞ حضرت ابو زید عبدالرحمٰن بن عبد القادر بن عبد العزیز ہاشمی شافعی مکی ایک علمی گھرانے میں پیدا ہوئے ،اپنے چچا علامہ ابن فہد جاراللہ مکی اور علامہ ابن حجر مکی وغیرہ جید علما سے استفادہ کیا ،آپ مکی عالم دین ،مسند وقت اور فقیہ شافعی تھے ،آپ سے کئی علما نے استفادہ کیا۔ ⁽[86]⁾

۞ محب الملت و الدین حضرت ابن فہد ابو الفضل جار اللہ محمد بن عبد العزیز ہاشمی مکی ،امام العلما،مستندمؤرخ ،استاذ المحدثین ،مسند عصر اور کئی درجن کتب کے مصنف ہیں ، آپ نے عرب،شام ،بیت المقدس ،یمن اور مصر کا سفر کیا وہاں کے علما سے استفادہ کیا،امام قاضی زکریا انصاری اور امام جلال الدین سیوطی سے اجازت حدیث حاصل کی،آپ کی ولادت 20 رجب 891 ھ مکہ شریف میں ہوئی اور یہیں 15جمادی الاخریٰ 954 ھ کو وصال فرمایا ،زندگی بھر علوم عقلیہ و نقلیہ کی تدریس میں مصروف رہے، 56 کتب و رسائل تحریر فرمائیں ،تاریخ مکہ پر آپ کی کتب ” بلوغ القریٰ باخبار ام القریٰ “ ، ”حسن القریٰ فی اودیۃ ام القریٰ “ اور” نخبۃ بهجۃ الزمان بعمارة مكۃ الملوك بنی عثمان “ جبکہ حضرت عبد اللہ بن عباس رضی اللہ عنہ کے فضائل پر ” کتاب تحفۃ اللطائف “ ([87]) بھی ہے۔ ⁽[88]⁾

۞ شیخ الاسلام حضرت قاضی زین الدین ابو یحیٰ زکریا انصاری الازہری اور شیخ الاسلام، عمدۃُ المحدثین، شہابُ الدّین، حافظ احمد بن علی ابنِ حجر عسقلانی شافعی علیہ رحمۃ اللہ الکافی کا ذکر گزر چکا ہے ۔

حضرت شاہ ولی اللہ محدث دہلوی کی چوتھی سند

٭علامہ شاہ ولی اللہ محدث دہلوی اور آپ کے استاذ حضرت شیخ جمال الدین ابو طاہر محمد بن ابراہیم کورانی مدنی کا تذکرہ گزرچکا ہے ۔

۞ عالمِ کبیر، مسند العصر حضرت سیّدُنا شیخ ابو الاسرار حسن بن علی عُجَیْمی حنفی مکی رحمۃ اللہ علیہ کی ولادت 10ربیع الاول 1049 ھ مکۂ مکرمہ میں ہوئی۔ 3شوَّالُ المکرَّم 1113 ھ کو وصال طائف (عرب شریف) میں فرمایا، تدفین احاطۂ مزار حضرت سیّدُنا عبد اللہ بن عباس رضی اللہ عنہما میں ہوئی۔ آپ عالم اسلام کے سو سے زائد علما و صوفیا کے شاگرد، حافظ قران ، محدثِ شہیر،فقیہ حنفی،صوفیِ کامل،مسندِ حجاز،استاذ الاساتذہ، اور 60 سے زائد کتب کے مصنف تھے،آپ نے طویل عرصہ مسجد حرم ،مسجدنبوی اور مسجد عبد اللہ بن عباس (طائف)میں تدریس کی خدمات سرانجام دیں ⁽[89]⁾

۞مسند العصر حضرت شیخ ابو مہدی عیسی بن محمد جعفری ہاشمی ثعلبی مالکی کی ولادت 1020 ھ کو زواوۃ (الجزائر، افریقہ)میں ہوئی اور وصال مکہ شریف میں24 رجب 1080 ھ میں ہوا،آپ محدث،مسند،مرشد،فقیہ مالکی،مدرسِ حرم مکی ،امام الحرمین ،عالم مغریبین و مشرقین،زہد و تقویٰ کے مالک اور صاحب تصنیف تھے، ”كنز الروایۃ المجموع فی درر المجاز ويواقیت المسموع“ ([90]) آپ کی یادگار تصنیف ہے۔ ⁽[91]⁾

۞استاذ الحرمین و المصر حضرت شیخ شمس الدین ابو عبد اللہ محمد بن علاء الدین بابلی کی ولادت موضوع بابل صوبہ منوفیہ مصر میں 1000 ھ اور وفات 15 جمادی الاولیٰ 1077 ھ کو قاہرہ میں ہوئی ،آپ نے حدیث،فقہ شافعی اور دیگر علوم کے لیے کئی سفر کئے۔ علمائے عرب بالخصوص علمائے مکہ سے بھر پور استفادہ کیا ، کہا جاتا ہے کہ آپ نے شب قدر میں دعا کی کہ میں فن حدیث میں امام ابنِ حجر عسقلانی کی طرح ہوجاؤں،آپ کی دعا قبول ہوئی اور آپ کو یہ مقام حاصل ہوگیا ، آپ حافظ الحدیث ، مسند العصر،فقیہ شافعی، مدرس و مرشد،عبادت گزار،حسن اخلاق کے پیکر اور سوز و گداز کے ساتھ کثرت سے تلاوت قرآن کرنے والے تھے ۔آپ کی اسانید و کتب کو علامہ شیخ عیسی ٰمغربی نے ” ثبت شمس الدين البابلی“ ([92]) کے نام سے جمع فرمایا ہے ۔ ⁽[93]⁾

۞حضرت شیخ ابو النجا سالم بن محمد عز الدین سنہوری مصری مالکی ،محدث کبیر،خاتمۃ الحفاظ، مفتی مالکیہ ،جامع علوم و فنون تھے ،فقہ مالکی میں آپ کی کتاب ” تيسير الملك الجليل “ ([94]) ہے ۔آپ کی پیدائش تقریبا 950 ھ کو سنهور المدینہ ( صوبہ کفر الشیخ مصر)میں ہوئی،علم دین قاہرہ میں حاصل کر کے وہیں خدمات پیش کیں ، آپ کا وصال 3 جَمادی الاُخریٰ 1015ھ کو ہوا اور مجاورین قبرستان میں دفن کئے گئے۔ ⁽[95]⁾

۞شیخ الاسلام حضرت امام نجم الدین ابو المواہب محمد بن احمد غیطی سکندری رحمۃ اللہ علیہ کی پیدائش 910 ھ اور وفات 981 ھ میں ہوئی، آپ کا تعلق مصر کے صوبہ سکندریہ کے مرکزی شہر سکندریہ سے ہے،آپ نے دیگر مشائخ بالخصوص شیخ الاسلام زین الدین زکریا انصاری رحمۃ اللہ علیہ سے علم حدیث،فقہ اور تصوف وغیرہ حاصل کر کے اسناد اور تدریس و افتاء کی اجازات لیں،آپ امام الوقت، مسندالعصر، محدث زمانہ، مرشد گرامی، محبوب ِخاص و عام،بغیر لومۃ اللائم برائی سے منع کرنے والے اور کئی کتب کے مصنف تھے۔ ” بهجة السامعين والناظرين بمولد سيد الاولين و الآخرين “اور” قصۃ المعراج الصغری“ ([96])وغیرہ آپ کی تصنیف کردہ کتب ہیں۔⁽[97]⁾

۞شیخ الاسلام حضرت قاضی زین الدین ابو یحیٰ زکریا انصاری الازہری اور شیخُ الاسلام، عمدۃُ المحدثین، شہابُ الدّین، حافظ احمد بن علی ابنِ حجر عسقلانی شافعی رحمۃُ اللہِ علیہ کا ذکر گزرچکا ہے ۔

حضرت شاہ ولی اللہ محدث دہلوی کی پانچویں سند

علامہ شاہ ولی اللہ محدث دہلوی اور آپ کے استاذ حضرت شیخ جمال الدین ابو طاہر محمد بن ابراہیم کورانی مدنی کا تذکرہ گزرچکا ہے ۔

۞حضرت شیخ احمد بن محمد نخلی نقشبندی مکی شافعی ،امام الوقت ،علامہ دہر ، محدث کبیر،فقیہ شافعی،صوفی باصفا اور صاحب تصنیف تھے ۔آپ کی پیدائش 1044 ھ کو مکہ مکرمہ میں ہوئی اور یہیں 1130 ھ کو وصال فرمایا ،تدفین جنت المعلیٰ میں ہوئی ۔آپ نے علمائے عصر سے علوم اسلامیہ حاصل کر کے مسجد حرام میں درس و تدریس میں مشغول ہوگئے ، آپ حضرت خواجہ سید شمس الدین امیر کُلال سوخاری بخاری([98]) کے مرید و خلیفہ ہیں ۔آپ نے اپنی اسناد و مرویات کو کتاب ”ثبت النخلی“ ([99]) میں تحریر فرمایا ہے جو طبع شدہ ہے۔ ⁽[100]⁾

۞حضرت شیخ ابو العزائم سلطان بن احمد سلامہ مزّاحی مصری ازہری شافعی رحمۃ اللہ علیہ کی ولادت 985 ھ مصر میں ہوئی اور یہیں 17 جمادی الآخر1075 ھ میں وصال فرمایا، تدفین مجاورین قبرستان قاہرہ میں ہوئی،آپ نے علمائے عصر سے حفظ قرآن و قراٰت،حدیث و فقہ و تصوف اور دیگر علوم حاصل کر کے 1008 ھ میں فارغ التحصیل ہوئے اور جامعۃ الازہر میں تدرس کرنے لگے، آپ امام الائمہ، بحر العلوم، استاذ الفقہاء و القراء،محدث وقت،علامہ زمانہ ، نابغہ عصر،زہد و تقویٰ کے پیکر،مرجع خاص و عام، عابد و زاہد اور کئی کتب کے مصنف تھے۔ ⁽[101]⁾

۞شیخ الاسلام،ناصر الملت و الدین حضرت امام شہاب الدین احمد بن خلیل سبکی شافعی رحمۃ اللہ علیہ کی ولادت 939 ھ اور وفات 1032 ھ میں ہوئی، آپ نے مدرسہ باسطیہ مصر میں داخلہ لے کر علم دین حاصل کیا،جید علمائے مصر سے استفادہ کر کے محدث و فقیہ بننے کی سعادت پائی،حدیث و فقہ میں آپ کی کئی تصانیف ہیں،ان میں سے ” فتح الغفور بشرح منظومۃ القبور “ )[102]( مشہور ہے۔ ⁽[103]⁾

۞ حضرت شیخ شمس الدین محمد صفوی مقدسی شافعی،شیخ الاسلام زکریا انصاری کے شاگرد ہیں ،جب یہ جامع الحاکم (شمالی قاہرہ،مصر)میں تشریف لائے تو امام شہاب الدین احمد بن خلیل سبکی شافعی نے ان سے استفادہ کیا اور اسناد حاصل کیں ۔ ⁽[104]⁾

15 محرم الحرام 1444ھ بمطابق 13 اگست 2022ء بروز ہفتہ بعد نماز عشاء عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں شہر کراچی کے عاشقان رسول فیضان مدینہ آکر جبکہ دیگر مقامات پر ہزاروں عاشقان رسول بذریعہ مدنی چینل شریک ہوئے۔

مدنی مذاکرے میں شیخ طریقت، امیر اہلسنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے کئے گئے سوالات کے علم و حکمت سے بھر پور جوابات دیئے اور مسلمانوں کی دینی ومعاشرتی رہنمائی کے لئے مدنی پھول ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال: ہم دُرست نمازکس طرح پڑھ سکتے ہیں ؟

جواب: جس طرح ہرہنرسیکھنے سے آتاہے، اسی طرح نماز بھی سیکھنےکی کوشش کریں گے تو دُرست نمازبھی آجائے گی،دعوتِ اسلامی میں ”فیضانِ نمازکورس “کروایا جاتاہے، اس میں داخلہ لے لیں،نمازسیکھنے کے لیے مکتبۃ المدینہ کی ان کتب’’نمازکے احکا م اور فیضانِ نماز‘‘کا مُطالَعہ کیجئے ۔

سوال : تعزیّت کا اسلامی طریقہ کیا ہے؟

جواب: تعزیّت اظہارِغم ہوتاہے،مثلاً کسی کے ہاں فوتگی ہوجائے تواُن کے پاس جائیں ، سلام کریں،میّت کے لیے دُعائے مغفرت کریں،لواحقین وسوگواران کو صبرکی تلقین کریں۔

سوال: کیااپنے وطن سے محبّت کرنی چاہئے؟

جواب: وطن سے محبّت تو فطری بات ہے،اپناوطن جس میں بندہ پیداہوتاہے، بڑاہوتاہے، اس سےفطری طورپر محبّت ہوتی ہے ،اپنا وطن اپنا ہوتاہے ، اپنے وطن کی تعمیرکی جاتی ہے ،سجایا جاتاہے ،جو وطن کی توڑپھوڑ کرتاہے ،وہ حماقت کرتاہے ،اگرہم سب وطن کی تعمیرمیں لگ جائیں تو سب سکھی ہوجائیں ۔

سوال : دعوتِ اسلامی کیسی تحریک ہے؟

جواب : دعوت ِاسلامی مسجدبناؤ اورمسجدبھروتحریک ہے ۔

سوال: پاکستان کیساملک ہے؟

جواب: پاکستان میں جس آزادی سے دِین کا کام ہورہا ہے اتنا کسی بھی ملک میں آزادی سے نہیں ہوتا،اللہ کرے ایساہی رہے اس کا بچہ بچہ نمازی بن جائے ۔

سوال: جب خوشی حاصل ہوتو کیا کرنا چاہئے؟

جواب: اللہ پاک کا شکراداکرناچاہئے ،صدقہ وخیرات کیا جائے ،بندہ اپنا محاسبہ کرے ،نیکیاں کرنے اورگُناہوں سے بچنے کی نیّت کرے ۔

سوال: بچے کیسےجشن ِآزادی منائیں؟

جواب: بچے بھی جشنِ آزادی منانے کے حقدارہیں ،موسیقی ،باجےوغیرہ سے بچیں ۔

سوال: آپ کون سے شہر میں پیداہوئے ہیں ؟

جواب: میں اصلاً نسلاًپاکستانی ہوں،کراچی(سندھ) میں پیداہواہوں مگر مدینہ شریف میں مرنے کی میری خواہش ہے ۔

سوال : آپ کی فیلڈ(Field) کیا ہے؟

جواب: نیکیاں بڑھاؤ،گناہ مٹاؤ،یہ ہماری فیلڈاور ہمارادھندایعنی کاروبارہے۔

سوال: مسواک کس طرح اپنے ساتھ رکھیں،جبکہ ہمارے لباس میں اسے رکھنے کے لیے جیب نہیں ہوتی؟

جواب:اپنے لباس میں مسواک کی جگہ بنا لیں ،آگے نہیں رکھ سکتے تو کہیں بھی مناسب جگہ پر لبا س میں جگہ بنا لیں ،یہ دل میں رکھنے والی چیز ہے ،طے کرلیں کہ مسواک کو اپنانا ہے ،اس سُنّت کو قبرمیں جانے تک نِبھانا ہے اوراس کے لیے اپنے پورے لباس میں کہیں نہ کہیں جگہ بنانی ہے ،اِنْ شَآءَاللہُ الْکریم تاکہ یہ ہمارے ساتھ رہے ،جہاں بھی وضوکریں تومِسواک استعمال کرسکیں ۔

سوال : کیا اسلامی بہنیں مسواک کرسکتی ہیں ؟

جواب : جی ہاں ! اُن کے لیے حضرت عائشہ صدیقہ رضی اللہ عنہاکی سُنّت ہے۔

سوال: اِس ہفتے کارِسالہ ” امیرِ اہلِ سنّت کے سفرِ مدینہ کے واقعات “ پڑھنے یاسُننے والوں کوجانشینِ امیرِاہلِ ِسُنّت مدظلہ العالی نے کیا دُعا دی ؟

جواب: یارَبَّ المصطفےٰ! جوکوئی 21صفحات کا رسالہ ” امیرِ اہلِ سنّت کے سفرِ مدینہ کے واقعات“ پڑھ یا سُن لے ،اُسےعاشقِ مدینہ امیر ِاہلِ سنّت کے صدقے مدینے کا حقیقی دیوانہ بنااوراُس سے ہمیشہ ہمیشہ کےلئے راضی ہوجا ۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

15 اگست 2022ء بروز پیر مدنی مرکز فیضان مدینہ جوہر ٹاؤن لاہور میں جانشین امیر اہلسنت حاجی مولانا عبید رضا عطاری مدنی مُدَّ ظِلُّہُ العالی کی اہلیہ مرحومہ کے لئے ایصال ثواب اجتماع کا انعقاد کیا گیا جس میں سمن آباد ٹاؤن، داتا گنج ٹاؤن، گلبرگ ٹاؤن اور اقبال ٹاؤن کے عاشقان رسول سمیت مختلف ذمہ داران دعوت اسلامی نے شرکت کی۔

جانشین امیر اہلسنت نے ”ایصالِ ثواب“ کے موضوع پر سنتوں بھرا بیان کیا اور شرکا کو اپنے مرحومین کے لئے بھی ایصال ثواب کرنے کا ذہن دیا۔ اس موقع پر اراکین شوریٰ حاجی محمد اظہر عطاری اور حاجی یعفور رضا عطاری بھی موجود تھے۔

آخر میں جانشین امیر اہلسنت دامت بَرَکَاتُہمُ العالیہ سے اسلامی بھائیوں نے ملاقاتیں بھی کیں۔

مرکزی مجلس شوریٰ دعوت اسلامی کے نگران مولانا حاجی محمد عمران عطاری مُدَّ ظِلُّہُ العالی 17 اگست 2022ء کو اپنے تنظیمی دورے پر عالمی مدنی مرکز فیضان مدینہ کراچی سے پاکستان کے صوبہ پنجاب روانہ ہوگئے۔

پنجاب پہنچ کر نگران شوریٰ حاجی مولانا محمد عمران عطاری مُدَّ ظِلُّہُ العالی نے پاکستان کے دار الحکومت اسلام آباد میں قائم مدنی مرکز فیضان مدینہ میں منعقد کردہ سنتوں بھرے اجتماع میں بیان فرمایا۔ اجتماع میں اسلام آباد، راولپنڈی، کشمیر اور خیبر پختونخواہ میں قائم جامعات المدینہ کے طلبہ ، اساتذہ کرام اور ناظمین شریک تھے۔

نگران شوریٰ نے شرکا کی تربیت کرتے ہوئے انہیں اپنا زیادہ سے زیادہ وقت تعلیم میں خرچ کرنے، دینی کاموں میں شریک ہونے اور محنت و شوق کے ساتھ علم دین حاصل کرنے کی ترغیب دلائی۔

اس موقع پر نگران پاکستان مشاورت حاجی محمد شاہد عطاری، اراکین شوریٰ حاجی محمد اسلم عطاری، حاجی مولانا محمدجنید عطاری مدنی، حاجی مولانا محمد اسد عطاری مدنی اور حاجی محمد رفیع عطاری بھی موجود تھے۔

عاشقانِ رسول کی دینی تحریک دعوتِ اسلامی کے زیرِ اہتمام پچھلے دنوں مٹیاری حیدرآباد سندھ میں شعبہ مزارات اولیاء کے ذمہ دار اسلامی بھائیوں نے پاکستان مشائخ بورڈ کے ممبر پیر اکبر علی قادری صاحب سے ملاقات کی۔

اس دوران صوبائی ذمہ دار عاصم عطاری نے انہیں دنیا بھر میں اسلامی تعلیمات عام کرنےوالے دعوتِ اسلامی کے مختلف شعبہ جات کا تعارف کروایا جس پر انہوں نے دعوتِ اسلامی کی کاشوں کو سراہا۔بعدازاں صوبائی ذمہ دار نے پیر اکبر علی قادری صاحب کو مکتبۃ المدینہ دعوتِ اسلامی کے کُتُب تحفے میں پیش کیں۔(رپورٹ:دانیال ذمہ دار پاکستان آفس، کانٹینٹ:غیاث الدین عطاری)

دعوتِ اسلامی کے تحت 16 اگست 2022ء بروز منگل بذریعہ انٹر نیٹ مدنی مشورہ منعقد ہوا جس میں شعبہ کفن دفن کےکراچی سٹی ذمہ داران، ڈسٹرکٹ ذمہ داران اور ٹاؤن ذمہ داران کی شرکت ہوئی۔

مرکزی مجلسِ شوریٰ کے رکن حاجی منصور عطاری نے شعبے کے دینی کاموں کے حوالے سے گفتگو کرتے ہوئے مختلف موضوعات پر کلام کیا اور ذمہ دار اسلامی بھائیوں کو مدنی پھولوں سے نوازا۔

مزید رکنِ شوریٰ نے مدنی مشورے میں شریک ذمہ داران کو زیادہ سے زیادہ تدفین کورس کروانے کے اہداف دیئے جس پر انہوں نے اچھی اچھی نیتوں کا اظہا رکیا۔(رپورٹ:عزیر عطاری رکن شعبہ کفن دفن ، کانٹینٹ:غیاث الدین عطاری)

شعبہ روحانی علاج دعوتِ اسلامی کے تحت پنجاب پاکستان کے شہر ڈیرہ غازی خان میں مدنی مشورے کا انعقاد ہوا جس میں ڈسٹرکٹ، تحصیل اور استخارہ کے ذمہ دار اسلامی بھائیوں نے شرکت کی۔

ڈویژن ذمہ دار مولانا محمدانیس عطاری مدنی نے اس مدنی مشورے میں ستمبر 2022ء کو ڈیرہ غازی خان میں 30 مقامات پر ہونے والے دعائے شفاء اجتماع کے حوالے سے گفتگو کی نیز ڈیرہ غازی خان کے ہر یوسی میں روحانی علاج کے بستے مکمل کرنے کے بارے میں مشاورت ہوئی جس پر ذمہ داران نے اپنی اپنی رائے کا اظہارکیا۔

آخر میں دعوتِ اسلامی کے 12 دینی کاموں کے سلسلے میں اہم نکات پر تبادلۂ خیال کیا گیا جس پر ذمہ داران نے اچھی اچھی نیتوں کا اظہار کیا۔

(رپورٹ:سمیر علی عطاری آفس ذمہ دار، کانٹینٹ:غیاث الدین عطاری)

دعوتِ اسلامی کے شعبہ جات کے ذریعے دنیا بھر میں دینی کام عام کرنے والے ذمہ دار اسلامی بھائیوں کے لئے وقتاً فوقتاً مختلف کورسز کا اہتمام کیا جاتا جس میں اُن کی دینی، اخلاقی اور تنظیمی اعتبار سے تربیت کی جاتی ہے۔

اسی سلسلے میں پچھلے دنوں شعبہ کفن دفن دعوتِ اسلامی کے تحت تدفین کورس کا انعقاد کیا گیا جس میں مدرسۃ المدینہ بوائز ڈسٹرکٹ اوکاڑہ کے ناظمین سمیت دیگر اسلامی بھائیوں نے شرکت کی۔

ڈویژن ذمہ دار لیاقت عطاری نے کورس میں شریک ناظمین کو غسلِ میت دینے، کفن کاٹنے اور پہنانے کا طریقہ سکھایا نیز کورس مکمل کرنے کے بعد دیگر عاشقانِ رسول کو بھی اس طرح کے کورسز میں داخلہ دلوانے کا ذہن دیا جس پر انہوں نے اچھی اچھی نیتوں کا اظہار کیا۔(رپورٹ:احمد ندیم عطاری شعبہ تعلیم، کانٹینٹ:غیاث الدین عطاری)