پچھلے دنوں مرکزی مجلسِ شوریٰ کے رکن و نگرانِ پاکستان مشاورت حاجی محمد شاہد عطاری پاکستان کے شہر کراچی کے دورے پر تھے۔

تفصیلات کے مطابق نگرانِ پاکستان مشاورت نے دورانِ دورہ صحرائے مدینہ کراچی میں واقع مفتیِ دعوتِ اسلامی مرحوم مفتی محمد فاروق عطاری مدنی اور مرحوم رکنِ شوریٰ حاجی زم زم عطاری کے مزار پر حاضری دی۔

بعدازاں رکنِ شوریٰ نے مزار پر فاتحہ خوانی پڑھی نیز دعا کا بھی سلسلہ رہا۔اس موقع پرنگرانِ پاکستان مشاورت کے ہمراہ مرکزی مجلسِ شوریٰ کے رکن حاجی محمد امین عطاری سمیت دیگر ذمہ دار اسلامی بھائی بھی موجود تھے۔(رپورٹ:عبدالخالق عطاری نیوز فالواپ ذمہ دار، کانٹینٹ:غیاث الدین عطاری)

18 مئی 2022ء  بروز بدھ کی شب عالمی مدنی مرکز فیضانِ مدینہ کراچی میں دنیا بھر کے امام صاحبان کے لئے خصوصی مدنی مذاکرےکا انعقاد کیا گیاجس میں دور و نزدیک سے کثیر عاشقان رسول نے شرکت کی۔

شیخِ طریقت امیر اہل سنت مولانا محمد الیاس عطار قادری نے سنتوں بھرا بیان فرمایاجس میں عاشقان رسول کومسجدوں کی آباد کاری اور لوگوں کے ساتھ حسن سلوک کرنے نیز امامت کرنے کے حوالے سے قیمتی مدنی پھول عطا فرمائے۔

مزید امیر اہل سنت دامت برکاتہم العالیہ نے عاشقان رسول کو اللہ و رسول کی رضا کو پیش نظر رکھنےاورصحابہ کرام سے محبت رکھنے کا ذہن دیا ۔ آپ نے اپنے جذبات کا اظہار کرتے ہوئے اپنے مریدین کو یہ وصیت فرمائی کہ میرے جنازے کو ایسا شخص کندھا نہ دے جو صحابی رسول ، کاتب وحی امیر معاویہ رضی اللہ عنہ سے چِڑتا ہو۔ اس بات کااظہار آپ نے ان الفاظ میں فرمایا کہ مجھے مدینہ کے کتے کھا جائیں لیکن ایسے کندھے نہیں چاہئیں جو گستاخ رسول ہو، گستاخِ صحابہ و اہلِ بیت ہو،ایسا کندھا کسی کام کا نہیں ہے۔آپ نے فرمایا: اگر اپنا باپ بھی ایسا ہو تو وہ کسی کام کا نہیں ،حضرت امیرمعاویہ رضی اللہ عنہ جنتی صحابی ہیں ،ایسے جنتی صحابی کہ خود سرکار ﷺ نے جنت کی بشارت دی۔ اس پر کئی احادیث موجود ہیں۔

اس موقع پر امیر اہل سنت نے یہ بھی ارشاد فرمایا کہ حضرت علی کرم اللہ وجہ الکریم کی شان امیرمعاویہ رضی اللہ عنہ سے بہت درجہ بلند ہے۔ کروڑوہا درجے بلند بھی کہوں تو کم ہے لیکن اس کا مطلب یہ نہیں کہ امیر معاویہ صحابی نہیں ہیں۔ آپ رضی اللہ عنہ صحابی رسول ہے آپ کا اپنا ایک مقام ہے، کچھ لوگ آپ کو برا کہتے ہیں اس حوالے سے آپ کی مظلومیت ہے۔

اس کے علاوہ آپ نے حضرت امیر معاویہ رضی اللہ عنہ سے محبت کا اظہار کرتے ہوئے ارشاد فرمایا: میں دعوت اسلامی کے بہت پہلے سے اس معاملے میں جذباتی ہوں اور مجھے حضرت امیر معاویہ رضی اللہ عنہ سے بہت پُرانا پیار ہے۔ اللہ پاک ان کے صدقے میری آنے والی نسلوں کو بخشے اور میری نسلوں میں کوئی بھی صحابہ اور اہل بیت کا گستاخ نہ ہو۔  ’’ اَلْمَرْءُ مَعَ مَنْ اَحَبَّ ‘‘ ۔ یعنی جو جس کے ساتھ محبت رکھے گا اس کا حشر اس کے ساتھ ہوگا۔ ( مسلم ، کتاب البر۔ ۔ ۔ الخ ، باب المرء مع من احب ، ص ۱۰۸۸ ، حدیث : ۶۷۱۸) گستاخانِ صحابہ کے ساتھ اٹھائے گئے تو ہو گا کیا؟ ملے گا کیا ؟۔آپ نے فرمایا : اپنے بھلے، عاشقان رسول بھلے، عاشقان صحابہ و اہل بیت بھلے (یعنی اچھے)۔

امیر اہل سنت دامت برکاتہم العالیہ نے شرکا کو جو امیر معاویہ کے بارے میں اچھی رائے نہیں رکھتے ایسوں کو نہ سننے کی ترغیب دیتے ہوئے ارشاد فرمایا : جب قراٰن و حدیث میں ان کی فضیلتیں آگئیں اب کسی ہسٹری کا حوالہ، تاریخ کا حوالہ دینا درست نہیں۔ قراٰن و حدیث کے مقابلے میں کسی ہسٹری اور تاریخ کا حوالہ نہیں چلتا۔ یہ بالکل اصول کے ہی خلاف ہے۔کسی صحابی ،امام اور اولیاء کرام کے خلاف ہمیں کسی سے سننا ہی نہیں ہے جو وسوسہ آئے۔ ان کو سنے وہ جس میں لچک ہو ، دیوار جو نرم ہو کیل وہاں گَڑھ جاتی ہے۔اپنے کو نرم دیوار نہیں بننا۔ ہمیں سیسہ پِلائی ہوئی دیوار بننا ہے کہ بم بھی ٹکرائے تو ہم پر نہ پھٹے،ٹکرا کر دشمن کے کلیجہ پر جاکے پھٹے ،ہم پر نہ پھٹے۔

اس پر رکن شوریٰ حاجی امین سمیت دیگر عاشقان رسول نے ہر صحابی نبی۔۔۔۔۔۔ جنتی جنتی کے نعرے لگائے ۔ 

17مئی 2022ء کو  بحرین کے علاقے منامہ میں واقع پاکستانی سفارت خانے میں مفتی علی اصغر عطاری مدنی نے پاکستانی سفیر (Ambassador) محمد ایوب سے ملاقات کی۔

اس موقع پر مختلف موضوعات کے ساتھ ساتھ دعوت اسلامی کی دینی خدمات اور پاکستانی کمیونیٹی کی بہتری کے تعلق سے گفتگو ہوئی۔ خصوصاً کردار سازی اور اخلاقی امور میں سوسائٹی میں کیسے بہتری آسکتی ہےاس پر تبادلہ خیال ہوا۔آخر میں مفتی صاحب نے سفیر محمد ایوب کو مکتبۃ المدینہ کی مطبوعہ سیرت نبوی اور تصوف پر شائع کردہ کتب پیش کیں۔ 

15 مئی 2022 ء  کو بحرین میں فندق خلیج Gulf Hotel میں منعقد ہونے والی ایفوفی AAOIFI ادارے کی عالمی کانفرنس میں دنیا کے متعدد ممالک سے آئے ہوئے ماہرین اسلامی بینکاری کے اجتماع کا انعقاد ہوا۔

بحرین، شام، فلسطین، سوڈان،عرب شریف،افغانستان،عرب امارات اوردیگر ممالک کے ماہرین سے مفتی علی اصغر عطاری مدنی نے تبادلہ خیال فرمایا اور مختلف ایشوز پر بات چیت کی نیز آئندہ رابطے میں رہنے اور مختلف دینی مسائل پر تبادلہ خیال کرتے رہنے پر اتفاق کیا۔

آج 19 مئی 2022ء بروز جمعرات بعد نماز عشاء  دعوت اسلامی کے عالمی مدنی مرکز فیضان مدینہ باب المدینہ کراچی میں ہونے والے ہفتہ وار سنتوں بھرے اجتماع میں نگرانِ پاکستان مشاورت رکن شوریٰ حاجی محمد شاہد عطاری سنتوں بھرا بیان فرمائیں گے ۔

دوسری جانب19 مئی 2022ء بروز جمعرات بعد نماز عشاء رات 9:30 بجے’’ سبحانی مسجد اورنگی ٹاؤن کراچی‘‘ میں ہونے والے ہفتہ وار اجتماع میں رکنِ شوریٰ حاجی محمد اطہر عطاری سنتوں بھرا بیان فرمائیں گے ۔

بیانات کا موضوع ’’ فیضانِ امیر حمزہ رضی اللہ عنہ ‘‘ ہوگا۔

عالمی مدنی مرکز کے قریبی عاشقانِ رسول اسلامی بھائیوں سے اس میں شرکت کی مدنی التجاء ہے جبکہ دیگر مقامات و شہروں کے اسلامی بھائی اپنے قریبی ہونے والے دعوت اسلامی کے ہفتہ وار سنتوں بھرے اجتماع میں شرکت فرمائیں۔

گزشتہ دنوں اسلام آباد میں سیکرٹری مذہبی امور پاکستان سردار اعجاز جعفر کے گھر پر جانشین امیر اہل سنت مولانا حاجی عبید رضاعطاری مدنی دامت بَرَکَاتُہمُ العالیہاور رکن شوریٰ و نگران اسلام آباد (سٹی ) مشاورت حاجی وقار المدینہ عطاری کی آمد ہوئی۔

تفصیلات کے مطابق سردار اعجاز نے جانشین امیر اہل سنت کا استقبال کیا اور ان سے ملاقات کی، دوران ملاقات جانشین امیر اہل سنت نے گفتگو کرتے ہوئے اُن کی دینی و اخلاقی اعتبار سے تربیت کی اور انہیں مدنی پھولوں سے نوازا ساتھ ہی مکتبۃ المدینہ کی شائع کردہ کتاب ”صراط الجنان“ تحفے میں پیش کی۔( کانٹینٹ:محمد مصطفی انیس انصاری) 

پاکستان کے شہرلاہور میں قائم دعوتِ اسلامی کے مدنی مرکز فیضانِ مدینہ جوہر ٹاؤن میں ایک نشست کا انعقاد کیا گیا جس میں جامعۃ المدینہ بوائز کے دورۂ حدیث شریف میں پڑھنے والے اور تخصص فی الفقہ سمیت دیگر کورسز کرنے والے طلبۂ کرام نے شرکت کی۔

اس نشست میں مرکزی مجلسِ شوریٰ کے رکن حاجی یعفور رضا عطاری نے سنتوں بھرا بیان کرتے ہوئے شرکا کی دینی، اخلاقی اور تعلیمی اعتبار سے تربیت کی اور اُن کی 12 ماہ کے مدنی قافلوں میں سفر کرنے کے حوالے سے ذہن سازی کی جس پر انہوں نے اچھی اچھی نیتوں کا اظہا ر کیا۔(رپورٹ:غلام یاسین عطاری دفتر ذمہ دار، کانٹینٹ:غیاث الدین عطاری)

دعوتِ اسلامی کے تحت گزشتہ دنوں مرکزی مجلسِ شوریٰ کے رکن حاجی محمد عقیل عطاری مدنی نےدینی کاموں کے سلسلے میں ڈسٹرکٹ کورنگی لانڈھی ٹاؤن کا دورہ کیا جہاں انہوں نےمقامی ذمہ داران کے ہمراہ مختلف مقامات پر عاشقانِ رسول سے ملاقات کی۔

اس دوران رکنِ شوریٰ نے عاشقانِ رسول کے درمیان سیکھنے سکھانے کا حلقہ لگایا جس میں انہوں نے سنتوں بھرا بیان کرتے ہوئے اُن کی دینی و اخلاقی اعتبار سے تربیت کی اور انہیں دعوتِ اسلامی کے دینی ماحول سے منسلک ہونے کا ذہن دیا ۔بعدازاں اسلامی بھائیوں نے اچھی اچھی نیتیں کیں۔(کانٹینٹ:غیاث الدین عطاری)

دعوتِ اسلامی کے تحت 11 مئی 2022ء بروز بدھ جوہر ٹاؤن لاہور میں قائم مدنی مرکز فیضانِ مدینہ میں ملک بھر سے آڈیٹرز کی آمد ہوئی جہاں اُنہوں نے مرکزی مجلسِ شوریٰ کے رکن حاجی یعفور رضا عطاری سے ملاقات کی ۔

اس دوران رکنِ شوریٰ نے وہاں موجود عاشقانِ رسول سے گفتگو کرتے ہوئے انہیں شعبہ فیضان آن لائن اکیڈمی کے تحت ہونے والے مختلف کورسز کر کے اپنی صلاحیتوں کو مزید بڑھانے کا ذہن دیا نیز چند اہم موضوعات پر اُن کی تربیت کی۔بعدازاں رکنِ شوریٰ نے آڈیٹرز کے درمیان تحائف بھی تقسیم کئے۔(رپورٹ:غلام یاسین عطاری دفتر ذمہ دار، کانٹینٹ:غیاث الدین عطاری)

جشن ولادت اعلیٰ حضرت امام احمد رضا خان علیہ الرحمہ کے موقع پر ”اجتماعِ افتتاحِ بخاری“ کا انعقاد کیا گیا

10 شوال المکرم 1442ھ بمطابق 12 مئی 2022ء بروز جمعرات عالمی مدنی مرکز فیضان مدینہ کراچی میں امام اہلسنت، مجدد دین و ملت، پروانۂ شمع رسالت، استاذ العلماء الشاہ امام احمد رضا خان رحمۃ اللہ علیہ کی یوم ولادت کے موقع پر ”اجتماعِ افتتاحِ بخاری“کا انعقاد کیا گیا۔ اجتماع پاک کا آغاز سورہ ٔاخلاص کی تلاوت سے کیا گیا جبکہ نعت خواں اسلامی بھائی نے بارگاہِ رسالت مآب صلَّی اللہ علیہ واٰلہٖ وسلَّم میں ہدیۂ نعت کا نذرانہ پیش کیا۔

شیخ طریقت امیر اہلسنت علامہ محمد الیاس عطار قادری دامت بَرَکَاتُہمُ العالیہ نے سامعین کو امام المحدثین حضرت سیدنا محمد بن اسماعیل بخاری رحمۃ اللہ علیہ کی کتاب”بخاری شریف“ کا مکمل نام بتایا اور امام بخاری رحمۃ اللہ علیہ نے اس کتاب کو تالیف کیوں کیا اس کی وجہ بیان فرمائی۔اس کے بعد امیر اہلسنت دامت بَرَکَاتُہمُ العالیہ نے ”بخاری شریف “ کی پہلی حدیث پڑھتے ہوئے اس کی تفصیلاً تشریح بھی بیان فرمائی۔اس نشست میں شیخ طریقت دامت بَرَکَاتُہمُ العالیہ نے درجات حدیث پر بھی مختصراًکلام فرمایا۔

مذکورہ تقریب میں مصر کے جامعہ اظہر سے تشریف لائے ہوئے ڈاکٹر مولانا جمال فاروق دقاق صاحب مُدَّ ظِلُّہُ العالی ، نگران شوریٰ حاجی مولانا محمد عمران عطاری مُدَّ ظِلُّہُ العالی ، استاذ الحدیث مفتی محمد حسان عطاری مدنی مُدَّ ظِلُّہُ العالی ، استاذ العلماء مفتی محمد سجاد عطاری مدنی مُدَّ ظِلُّہُ العالی ، استاذ العلماء مولانا احمد رضا شامی صاحب، استاذ العلماء مولانا محمد کامران عطاری مدنی صاحب،استاذ العلماء مولانا عبد الواحد عطاری مدنی صاحب، رکن شوریٰ حاجی محمد امین عطاری، اراکین مجلس جامعۃ المدینہ مولانا سید ساجد عطاری مدنی، مولانا فہیم عطاری مدنی، مولانا عارف عطاری مدنی اور دورۃ الحدیث شریف کے سینکڑوں طلبائے کرام شریک تھے۔ اس کے علاوہ ملک و بیرون ملک میں قائم دورۃ الحدیث شریف کے ہزاروں طلبائے کرام ، مفتیان کرام، سینئر اساتذۂ کرام اور اراکین شوریٰ بذریعہ مدنی چینل بھی شریک ہوئے۔

اس اجتماع میں نگران شوریٰ نے12 ماہ کے مدنی قافلے کے حوالے سے گفتگو کی جس میں انہوں نے دورۃ الحدیث شریف کے طلبائے کرام کو 12 ماہ کےمدنی قافلے میں سفر کرنے کی ترغیب دلائی جس پر کئی طلبہ اس راہ کےمسافر بننے کے لئے تیار بھی ہوگئے جنہیں امیر اہلسنت دامت بَرَکَاتُہمُ العالیہ کی جانب سے عیدی کا تحفہ پیش کیا گیا اور دعاؤں سے بھی نوازا گیا۔

واضح رہے کہ اس سال ملک و بیرون ملک میں قائم دورۃ الحدیث شریف میں 1670 بوائز اسٹوڈنٹس اور 3211 گرلز اسٹوڈنٹس شریک ہونگے اور انشاء اللہ الکریم سال کے آخر میں عاشقان رسول کی عالمگیر تحریک دعوت اسلامی امت کو کم و بیش 5ہزار علمائے کرام کا تحفہ پیش کرے گی۔

عاشقان رسول کی عالمگیر دینی تحریک دعوت اسلامی اصلاح معاشرہ اور مسلمانوں کو علمِ دین کی طرف راغب کرنے  اور انہیں نیکی کی راہ پر گامزن کرنے کے لئے دن بدن سرتوڑ کوششیں کررہی ہے۔ان سب کو عملی جامہ پہنانے کے لئے تنظیمی شیڈول کے مطابق وقتاً فوقتاً مختلف پروگرامز منعقد کئے جاتے رہتے ہیں۔

اسی سلسلے میں آج رات بروز جمعرات بعد نماز مغرب دنیا بھر میں ہفتہ وار اجتماعات کا انعقاد کیا جائیگا جن میں مبلغین دعوت اسلامی اور اراکین شوریٰ سنتوں بھرے بیانات فرمائیں گے۔

تفصیلات کے مطابق مدنی مرکز فیضان مدینہ شاہ جہانگیر روڈ گجرات میں بعد نماز عشاء تقریباً 9:30 بجے ہونے والے ہفتہ وار اجتماع میں مرکزی مجلس شوریٰ کے رکن حاجی محمد اظہر عطاری سنتوں بھرا بیان فرمائیں گے جسے مدنی چینل پر براہ راست نشر کیا جائیگا۔

اس کے علاوہ عالمی مدنی مرکز فیضان مدینہ کراچی میں رکن شوریٰ حاجی محمد علی عطاری، مہاجر کیمپ 4 نمبر بلدیہ ٹاؤن، کراچی میں رکن شوریٰ حاجی محمد امین عطاری، مدنی مرکز فیضان مدینہ سوساں روڈ فیصل آباد میں رکن شوریٰ حاجی یعفور رضا عطاری اور رضائے مصطفٰے مسجد کورنگی نمبر 4 کراچی میں رکن شوریٰ حاجی فضیل رضا عطاری سنتوں بھرے بیانات فرمائیں گے۔

تمام عاشقان رسول سے اپنے اپنے علاقے میں ہونے والے ہفتہ وار اجتماع میں شرکت کرنے کی درخواست ہے۔

10 مئی 2022 ء بروز منگل مدنی مرکز فیضان مدینہ لاہور میں لاہور میٹروپولیٹن کے شعبہ کارکردگی کا رکن شوری حاجی یعفوررضا عطاری نے مدنی مشورہ   کیا جس میں نگران ٹاؤن مشاورت اور شعبہ کارکردگی کے ذمہ داران نے شرکت کی ۔

رکن شوری حاجی یعفور رضا عطاری نے ذمہ داران کو 12 دینی کاموں کی کارکردگی اور جدول کے حوالے سے گفتگو کی اور اسلامی بھائیوں کی اخلاقی و معاشرتی اعتبار سے تربیت کی اور مدنی پھولوں سے نوازا۔(رپورٹ:غلام یاسین عطاری دفتر ذمہ دار، کانٹینٹ:شیخ محمد مصطفی انیس )