گزشتہ تین سالوں (یعنی 25جنوری 2016ء) سے مدنی چینل پر جاری درسِ شفاء شریف کا ختم شریف 3مارچ 2019ء بروز اتوار عالمی مدنی مرکز فیضانِ مدینہ بابُ المدینہ کراچی میں ہوا، اس پُر مسرّت موقع پر شیخِ طریقت، امیرِ اَہلِ سنّت دَامَتْ بَرَکَاتُہُمُ الْعَالِیَہ نے مدرّسِ شفاء شریف استاذُ الحدیث حافظ حسّان عطاری مدنی کو تہنیتی پیغام جاری کیا اور شفاء شریف کے درس کی تکمیل پر مبارکباد دیتے ہوئے مدنی پھول عطا فرمائے۔ ختمِ شفاء شریف میں مفتی محمدقاسم قادری مُدَّظِلُّہُ الْعَالِی نے خصوصی شرکت فرمائی اور سنّتوں بھرا بیان فرمایا۔

30اپریل 2019ء کو میر پور خاص میں واقع ایک سی این جی پمپ میں شارٹ سرکٹ کی وجہ سے آگ لگ گئی جس کے باعث تقریباً 4کروڑ روپے کا نقصان ہوگیا۔ خبر ملنے پر شیخِ طریقت، امیرِ اَہلِ سنّت مولانا محمد الیاس عطّاؔر قادری رضوی دَامَتْ بَرَکَاتُہُمُ الْعَالِیَہ نے سی این جی پمپ کے مالک فاروق میمن کے نام ایک صوتی پیغام جاری کیا جس میں آپ نے ان سے مالی نقصان پر اظہارِ افسوس کیا اور اظہار ہمدردی کرتے ہوئے انہیں صبروتسلی کا ذہن دیا۔

پچھلے دنوں سابق وفاقی وزیر قمر زمان کائرہ کے جواں سال بیٹے اسامہ قمر اور ان کے دوست حمزہ بٹ کا کار حادثے کے سبب لالہ موسیٰ پنجاب میں انتقال ہوگیا تھا، امیرِ اَہلِ سنّت علامہ محمد الیاس عطّاؔر قادری دَامَتْ بَرَکَاتُہُمُ الْعَالِیَہ نے رکنِ شوریٰ حاجی یعفور رضا عطاری کی جانب سے اطلاع ملنے پر مرحوم اسامہ قمر کے والد سابق وفاقی وزیر قمر زمان کائرہ اور حمزہ بٹ کے والد امجد سعید کے نام تعزیتی پیغام جاری کیا،تعزیتی پیغام میں آپ نے لواحقین سے تعزیت فرماتے ہوئے مرحومین کے لئے دعائے مغفرت کی، لواحقین کو صبر وہمت سے کام لینے کی تلقین فرمائی اور مدنی پھول ارشاد فرمائے ۔

سوال: ڈرائیونگ کرتے وقت بار بار میسج (SMS) آنے سے ذہن میں یہ خیالات آئیں کہ پتا نہیں کس کے میسج آ رہے ہیں؟ نہ جانے ان میں کیا پیغامات ہیں؟ تو ایسی صورت میں دورانِ ڈرائیونگ موبائل فون استعمال کرنا چاہیے یا نہیں ؟ جواب: دورانِ ڈرائیونگ موبائل فون استعمال کرنے سے بچنا ہی بہتر ہے اگرچہ بار بار میسج (SMS) آ رہے ہوں کیونکہ دورانِ ڈرائیونگ موبائل فون استعمال کرنے میں ایکسیڈنٹ (Accident) ہونے کا خطرہ ہوتا ہے بلکہ آئے دن اس وجہ سے ایکسیڈنٹ ہوتے ہوں گے اور کئی جانیں بھی ضائع ہوجاتی ہوں گی۔ ایسے موقعے پر صبر کرنا چاہئے اور موبائل فون بند (Off) کر کے ایک طرف رکھ دینا چاہیے۔ دورانِ ڈرائیونگ موبائل فون استعمال کرنا قانوناً جرم بھی ہے۔ اگر قانون نافذ کرنے والوں نے پکڑ لیا تو پھر آزمائش ہو سکتی ہے۔اسی طرح جب سگنل (Signal) پر گاڑیاں رُکتی ہیں تو اُس وقت بھی موبائل فون استعمال نہیں کرنا چاہئے کیونکہ سگنل کھل گیا تو پیچھے سے آنے والی گاڑی آپ کی گاڑی سے ٹکرا سکتی ہے یا پھر آپ کی وجہ سے گاڑیوں کی لمبی لائن رُکی رہے گی اور پھر بَدمزگی بھی ہوسکتی ہے لہٰذا دورانِ ڈرائیونگ موبائل فون استعمال نہیں کرنا چاہئے۔ ہاں! اگر زیادہ ہی ایمرجنسی ہے تو راستے میں کہیں مناسب جگہ پر رُک جائیں، جہاں کوئی قانونی رُکاوٹ بھی نہ ہو اور نہ ہی کوئی دوسرا آپ کی وجہ سے پریشان ہو۔اب موبائل فون دیکھ لیں اور جواب وغیرہ کی ترکیب بنا لیں ، اس میں کوئی حرج نہیں ہے۔ وَاللہُ اَعْلَمُ عَزَّوَجَلَّ وَ رَسُوْلُہٗ اَعْلَم صلَّی اللہ علیہ واٰلہٖ وسلَّم صَلُّوْا عَلَی الْحَبِیْب! صلَّی اللہُ علٰی محمَّد