الحمدللہ ماہنامہ فیضانِ مدینہ دعوتِ اسلامی کی بہترین اور نمایاں کاوش ہے۔ حدیث ِپاک میں ہے:” ہر چیز کا ایک راستہ ہوتا ہے اور جنت کا راستہ علم ہے۔“تو جنت کے راستے پر گامزن ہونے کے لئے علمِ دین حاصل کیجئے اور علمِ دین حاصل کرنے کا بہترین ذریعہ ماہنامہ فیضانِ مدینہ کا مطالعہ بھی ہے۔ہمیں چاہئے کہ جلد از جلد  ماہنامہ فیضانِ مدینہ کی بکنگ کروا لیں، نہ صرف اپنے گھر کے لئے، بلکہ آفس کے لئے اور اسی طرح اپنی دکانوں کے لئے بھی اس کی بکنگ کروائیں اور اپنی رشتہ داروں،سہیلیوں وغیرہ کو اس کی بکنگ اور علمِ دین حاصل کرنے کا جذبہ دیں اور ذہن بنائیں،تاکہ وہ بھی اس سے فیض حاصل کریں، بلکہ بہتر یہ ہوگا کہ پہلی مرتبہ آپ خرید کر انہیں ہدیۃً پیش کریں، تاکہ وہ اسے پڑھیں ۔اللہ کرےگا تو ان کے دل میں علمِ دین کی شمع روشن ہوجائےگی اور ان کا ذہن بن جائے گا تو وہ ہر ماہ اسے خرید کر پڑھنے اور دوسروں تک علمِ دین پہنچانے والی بن جائیں گی،نیز ایسا کرنے سے ان شاء اللہ الکریم انہیں علمِ دین حاصل کرنے کا اور ہمیں علمِ دین پھیلانے کا ثواب ملے گا۔الحمدللہ ماہنامہ فیضانِ مدینہ علمِ دین کا فیضان پھیلا رہا ہے۔امیرِ اہل ِ سنت دامَتْ بَرَکاتُہمُ العالِیَہ لکھتے ہیں:

ماہنامہ فیضانِ مدینہ دھوم مچائے گھر گھر یاربّ!جا کر عشقِ نبی کے جام پلائے گھر گھر

اب سوال یہ پیدا ہوتا ہے کہ اس ماہنامہ فیضانِ مدینہ میں کیا کیا ہوتا ہے؟ تو جواب یہ ہے کہ ماہنامہ فیضانِ مدینہ میں الحمدللہ علما و مفتیانِ کرام کے قرآن و حدیث پر مشتمل مضامین ہوتے ہیں،اسی طرح دارالافتاء اہلسنت کے فتاویٰ کی صورت میں ہمارے مسائل کے شرعی حل بھی ہوتے ہیں۔خواتین کےشرعی مسائل پر مشتمل الگ صفحات ہوتے ہیں،اسی طرح بچوں کے لئے الگ صفحات ہوتے ہیں،جن میں معلوماتی اسٹوریز ہوتی ہیں، بس اتنا ہی نہیں،بلکہ سلسلہ احکامِ تجارت میں تاجروں کے لئے بہت ہی اچھی راہ نمائی اس ماہنامہ فیضانِ مدینہ میں موجود ہوتی ہے، اس کے علاوہ علمِ دین کا بہت ہی بہترین گلدستہ اس میں موجود ہوتا ہے۔اللہ پاک کے کرم سے ہمیں دعوتِ اسلامی کی طرف سے بہت ہی پیارا میگزین بنام ماہنامہ فیضانِ مدینہ نصیب ہوا،جو گھر بیٹھے علمِ دین حاصل کرنے کے لئے بہت ہی بہترین ذریعہ ہے۔اللہ کریم ہمیں ماہنامہ فیضانِ مدینہ کی بکنگ کروا کے اسے پڑھنے،علمِ دین حاصل کرنے اور دوسروں تک پہنچانے کی سعادت نصیب فرمائے۔آمین یا رب العالمین

دعوتِ اسلامی عاشقانِ رسول کی دینی تحریک ہے جو دورِ حاضر میں دینِ متین کی خدمت زور و شور سے کر رہی ہے اور اس کا دینِ متین کی خدمت کرنا روزِ روشن کی طرح واضح ہے۔دعوتِ اسلامی دن بدن ترقی کے مراحل طے کرتی جا رہی ہے۔ ہر زمانے میں اللہ پاک کے نیک بندوں نے دینِ اسلام کو پھیلانے،اس کی اشاعت اور تبلیغ کے لئے نِت نئے انداز اپنائے اور انہی انداز میں سے ایک مؤثر  و کامیاب ذریعہ تصنیف و تحریر بھی ہے۔ دعوتِ اسلامی کے بانی دورِ حاضر کی علمی و روحانی شخصیت امیرِ اہلِ سنت حضرت علامہ مولانا محمد الیاس عطار قادری دامَتْ بَرَکاتُہمُ العالِیَہ بھی دین کا درد رکھنے والوں میں سے ایک ہیں۔ آپ چاہتے ہیں کہ کسی بھی طرح اُمّت تک دین کا علم پہنچے،لہٰذا اسی کُڑھن کے پیشِ نظر ہر ماہ ایک اسلامک میگزین شائع کیا جاتا ہے جسے ماہنامہ فیضانِ مدینہ کہا جاتا ہے۔ اس ماہنامے کا پہلا شمارہ جنوری 2017 بمطابق ربیع الآخر 1439 کو منظرِ عام پر آیا۔ ماہنامہ فیضانِ مدینہ،بچے،بوڑھے، جوان ، مرد و عورت ہر ایک کے لئے یکساں مفید ہے۔ماہنامہ فیضانِ مدینہ اشعار میں شغف رکھنے والوں، نیوز سے دلچسپی رکھنے والوں، گھریلو خواتین کے لئے کھانےکی ریسپی میں لگن رکھنے والیوں، واقعات اور سیرت میں رغبت رکھنے والوں،الغرض ہر ایک کے لئے بے حد مفید ہے۔مزید یہ کہ اس ماہنامہ فیضانِ مدینہ میں ہمارے اخلاقی،روحانی و جسمانی ہر بیماری کی نشاندہی کو بیان کیا جاتاہے۔ جسمانی بیماری سے بچاؤ کے لئے مدنی کلینک، روحانی علاج کے لئے آیات و وظائف وغیرہ کا تذکرہ اور اخلاق کو سنوارنے کے طریقے بھی بیان کئے گئے ہیں۔اس کے علاوہ مدنی چینل کا مقبولِ عام سلسلہ مدنی مذاکرہ جو ہر خاص و عام کے لئے علمِ دین سیکھنے کا بہترین ذریعہ ہے،اس کے سوالات و جوابات بھی ماہنامہ فیضانِ مدینہ میں شامل ہوتےہیں۔ اگر آپ نے ابھی تک ماہنامہ فیضانِ مدینہ کی بکنگ نہیں کروائی تو جلدی کیجئے۔ماہنامہ فیضانِ مدینہ حاصل کرنے والوں کو امیرِ اہلِ سنت دامَتْ بَرَکاتُہمُ العالِیَہ دعا سے بھی نوازتے ہیں کہ یا اللہ پاک! جو کوئی جس طرح بھی جائز طریقے سے بارہ ماہ تک ماہنامہ فیضانِ مدینہ حاصل کرے، اس کو پُل صراط سے آسانی سے پار ہونا نصیب فرما۔اٰمین بجاہِ النبی الامین صلی اللہُ علیہ واٰلہٖ وسلم

ماہنامہ فیضانِ مدینہ دھوم مچائے گھر گھر یارب جا کر عشقِ نبی کے جام پلائے گھر گھر

عاشقانِ رسول کی دینی تحریک دعوتِ اسلامی نے دین کی خدمت اور تبلیغ و اشاعت میں جس بھی شعبے میں قدم رکھا،اللہ پاک کی رحمت شاملِ حال رہی۔ اس کے حبیب صلی اللہُ علیہ واٰلہٖ وسلم کی نظرِ کرم نے دعوتِ اسلامی کو وہ کامیابی عطا فرمائی جس کا نظارہ عالَم پر آشکار ہے۔دعوتِ اسلامی کی طرف سے امّت کے لئے بہترین تحفہ اور علم ِدین کا خزانہ ”ماہنامہ فیضانِ مدینہ“ہے۔ حدیثِ پاک میں ہے:ہر چیز کا ایک راستہ ہوتا ہے اور جنّت کا راستہ علم ہے۔علم حاصل کرنے کا بہت ہی بہترین ذریعہ کتابوں کا مطالعہ کرنا ہے۔ انسان کا بہترین دوست کتاب ہوتی ہے بشرطیکہ وہ کس قسم کی کتاب سے دوستی کرتا ہے۔آج کے اس پُرفتن دور میں جہاں الیکٹرونک میڈیا نے تباہی مچائی ہے، وہاں ایک تلخ حقیقت یہ بھی ہے کہ پرنٹ میڈیا کے ذریعے بھی فحاشی و بے حیائی پھیلائی جا رہی ہے۔ کئی ایسے ناولز پڑھنے والے لوگ ہیں جو باقاعدگی کے ساتھ ہر ماہ ایسے ناولز اور ڈائجسٹ وغیرہ کی بکنگ کرواتے اور انہیں پڑھتے ہیں کہ جن میں رومانی مضامین، فحش و بے حیائی،جھوٹ اور کردار کو بگاڑنے والی تحریریں ہوتی ہیں۔ الامان والحفیظ۔لہٰذا معاشرے کو ضرورت تھی اس بات کی کہ جو طبقہ علم دوست تو ہے مگر علمِ دین کی دولت سے کچھ دور ہے ان کو ایسا لٹریچر دیا جائے جو ان کو سیدھا راستہ دکھائے۔ماہنامہ فیضانِ مدینہ میں کیا کیا ہوتا ہے؟ اس میں مفتیانِ کرام کے قرآن و حدیث پر مشتمل کالمز ہوتے ہیں، آپ کے ضروری مسائل کے حل کیلئے”دارُالافتاء اہلِ سنّت“کے فتاویٰ جات بھی ہوتے ہیں، بچّوں کے لئے دلچسپ کہانیاں اور تاجروں کے لئے راہ نمائی حاصل کرنے کا معلوماتی کالم ”احکامِ تجارت“جبکہ خواتین کیلئے خصوصی طور پر ان کے مسائل کا حل بھی موجود ہوتا ہے۔ یہ ماہنامہ رنگین شمارہ اور سادہ شمارہ میں دستیاب ہے۔آپ گھر بیٹھے سال بھر کی بکنگ کروا سکتے ہیں۔یہ ما ہنامہ خوبصورت کلرنگ کی وجہ سے آنکھوں کو بھاتا ہے اور اس کے مضامین پڑھنے والا متأثر ہوئے بغیر نہیں رہتا۔ اس کی ایک اور بہترین چیز یہ ہے کہ اس میں مختلف عنوانات پر اسلامی بھائیوں اور اسلامی بہنوں کو لکھنے کا موقع بھی دیا جاتا ہے، پھر جس کی تحریر بہترین ہو، اسے سلیکٹ کر کے اس ماہنامہ کی زینت بنایا جاتا ہے۔اسلامی بہنوں کی یہ تحریرات بھی مدینہ مدینہ ہوتی ہیں، ہماری بہنوں میں چھپی ہوئی صلاحیت و قابلیت اس پیارے پیارے ماہنامہ کے ذریعے ظاہر ہو رہی ہے۔ کہتے ہیں کہ عورت ناقصہ ہوتی ہے،مگر سچ کہئے تو نگاہِ مرشد کے فیض سے ہم ناقصاؤں کی تحریر کے ذریعے کتنے لوگ کامل راستے پر چلیں گے، اس کا ہم اندازہ نہیں کر سکتیں۔لہٰذا ہم سب کو اپنی مصروفیات سے وقت نکال کر اپنی صلاحیتوں کا صحیح استعمال کرکے لکھنا چاہئے۔ رسولِ پاک صلی اللہُ علیہ واٰلہٖ وسلم نے ارشاد فرمایا:اگر اللہ پاک تمہارے ذریعے کسی ایک شخص کو ہدایت عطا فرمائے تو یہ تمہارے لئے اس سے اچھا ہے کہ تمہارے پاس سرخ اونٹ ہوں۔ (مسلم،ص1311،حدیث:2406)وہ لوگ قابلِ رشک ہیں جنہوں نے ”ماہنامہ فیضانِ مدینہ“ جاری کروایا کیونکہ وہ اس کے ذریعے اپنے لئے صدقۂ جاریہ کا کثیر ثواب اکٹھا کر رہے ہیں اور کرتے رہیں گے۔ اِنْ شآءَ اللہ۔ اس ثواب کے ہم بھی حق دار بن سکتے ہیں وہ اس طرح کہ ہم اس کی دعوت کو عام کریں اور دیگر لوگوں کو اس کے پڑھنے کی ترغیب دلائیں خصوصاً شخصیات(ٹیچرز، ڈاکٹرز اور دیگر دنیاوی شعبہ جات سے منسلک افراد) تک اس کی دعوت کو پہنچائیں کیونکہ یہ شخصیات کثیر لوگوں سے وابستہ ہوتی ہیں جب ان تک اچھا لٹریچر پہنچے گا تو یہ اپنے سے وابستہ افراد کو بھی اس کے مطالعے کی ترغیب دلائیں گے یوں نیکی کی دعوت کا دائرہ وسیع ہوتا جائے گا،علمِ دین پھیلتا جائے گا جس کے نتیجے میں باکردار معاشرہ وجود میں آئے گا، اِنْ شآءَ اللہ۔ لہٰذاعزم کر لیجئے کہ اس ”ماہنامہ فیضانِ مدینہ“کو گھر گھر پہنچانا ہے۔امیرِ اہلِ سنّت دامَتْ بَرَکاتُہمُ العالِیَہ فرماتے ہیں:

مہ نامہ فیضانِ مدینہ دھوم مچائے گھر گھر یا رب! جا کر عشقِ نبی کے جام پلائے گھر گھر

اٰمین بجاہِ النبی الامین صلی اللہُ علیہ واٰلہٖ وسلم

حدیثِ پاک میں ہے: ہرچیز کا ایک راستہ ہوتا ہے اور جنت کا راستہ علم ہے۔ ایک اور روایت میں آیا ہے: جو طلبِ علم کے لئے کسی راستے پر چلتا ہے تو اللہ پاک اس کے لئے جنت کا راستہ آسان بنا دیتا ہے۔گویااحادیث کی روشنی میں واضح ہو رہا ہے کہ جو جنت کے راستے پرگامزن ہونا چاہے تو اسے چاہئے کہ علمِ دین کے حصول کو اختیار کر لے۔کسی بھی عبادت کو کرنے کے لئے علمِ دین کا ہونا ضروری ہے۔اگرعلم حاصل کر کے اس کے مطابق عبادت کو تمام لوازمات کے ساتھ ادا کیا جائے گا تو ہی عبادت قُربِ الٰہی کا ذریعہ بنے گا۔حدیثِ پاک میں ہے:طلب العلم فریضۃ علی کل مسلم۔علمِ دین حاصل کرنے کے موجودہ دور میں متعدد ذرائع عام ہو چکے ہیں۔دعوتِ اسلامی بھی اشاعتِ علمِ دین میں شب وروز کوشاں ہے، جس کا ایک بہترین ذریعہ ماہنامہ فیضانِ مدینہ بھی ہےجو شائقینِ علمِ دین کے لئے اپنا ایک منفرد مقام رکھتا ہے۔اس ماہنامہ میں کیا ہے؟ آئیے !اس کی ایک جھلک ملاحظہ کیجئے:اس میں مناجات و نعت کے بعد سب سے پہلے مفتیانِ کرام کے قرآن و حدیث پر مشتمل مضامین ہوتے ہیں،جن میں قرآنِ کریم کی آیات، ان کی تفاسیر، شانِ نزول، احادیثِ مبارکہ،ان کی تشریحات اوران سے حاصل ہونے والے اصلاح کے مدنی پھول بیان کئے جاتے ہیں۔اس کے بعد فیضانِ امیر ِاہلِ سنت کے نام سے مضمون شائع کیا جاتا ہےجس میں امیرِ اہلِ سنت دامَتْ بَرَکاتُہمُ العالِیَہ کے مختلف مدنی مذاکروں سے حاصل ہونے والے مختلف مسائل کے حل اور راہ نمائی کے مدنی پھول ہم تک پہنچتے ہیں،اس کے بعد عوام کے مسائل کا شرعی راہ نمائی کی روشنی میں حل اور دارالافتاء اہلِ سنت کے فتاویٰ جات بھی ہوتے ہیں۔متفرق موضوعات کے متعلق بھی اَبحاث اس میں شامل کی جاتی ہیں۔تاجروں کے لئے حصولِ روزگار کے حلال ذرائع، ان کے مسائل کا حل اور ان کی راہ نمائی کے لئے الگ سے کالم اس میں موجود ہے۔ہمارے اسلاف کی مبارک سیرت سے آگاہ کرنے کے لئے ایک کالم بنام بزرگانِ دین کی سیرت بھی شائع کیا جاتا ہے۔حدیثِ پاک میں ہے:”اللہ پاک کو قوی مؤمن، ضعیف مؤمن سے زیادہ پسند ہے۔“انسان کی صحت اس کے لئے قیمتی سرمایہ ہے۔انسان کی صحت اچھی نہ ہو تو عبادات اچھے طریقے سے نہ کر پائے گا اور روز مرہ معمولات بھی متاثر ہوں گے، لہٰذا اس کے لئے ایک کالم بنام صحت و تندرستی شامل ہوتاہے،اس کے ساتھ ساتھ قارئینِ ماہنامہ فیضانِ مدینہ کے تاثرات و تحریریں بھی شامل کی جاتی ہیں ۔دعوتِ اسلامی کی شب وروز کی مصروفیات کی کچھ جھلک پیش کرتے ہوئے دعوتِ اسلامی کی مدنی خبریں بھی شائع کی جاتی ہیں،اس کے علاوہ بچوں کی بہترین تربیت کے لئے بچوں کا الگ سے کالم رکھا گیاہے،جس میں مختلف قسم کی دلچسپ کہانیاں اور قصّے بیان کر کے تربیت کے مدنی پھول اور دعائیں وغیرہ بھی بیان کی جاتی ہیں۔اس میں خواتین کے لئے بھی علیحدہ کالم رکھا گیاہے،جس میں صحابیات و صالحات کی سیرت،اُمورِ خانہ داری اور خواتین کے شرعی مسائل کا حل بیان کیا جاتا ہے،انگلش ریڈرز کے لئے انگلش میں ماہنامہ شائع کیا جاتا ہے۔اس کے علاوہ ویب ایڈیشن کے طور پر خواتین کا الگ سے بھی ماہنامہ جاری کیا جاتا ہے۔

گویا ماہنامہ فیضانِ مدینہ ہر طبقے کے لئے علمِ دین کے حصول کا ایک جامع ذریعہ ہے۔ دعا ہے:

ماہنامہ فیضانِ مدینہ یارب گھر گھر عام ہو عام دنیا بھر میں یا ربّ دین کا پیغام ہو

اللہ کریم دعوتِ اسلامی کی کاوشوں کو قبول فرمائے۔اٰمین بجاہِ النبی الامین صلی اللہُ علیہ واٰلہٖ وسلم

الحمدللہ ماہنامہ فیضانِ مدینہ لوگوں کی دینی، دنیوی،انفرادی، اجتماعی، معاشی، معاشرتی، نفسیاتی، شرعی اور اخلاقی تربیت کرتا ہے۔ جس میں قرآنِ کریم کی تفسیر،حدیث شریف کی شرح،اسلامی عقائد و معلومات،مدنی مذاکرےکےسوال و جواب،دار الافتاء اہلِ سنت،فریاد،تاریخ کے اوراق،باتیں میرے حضور کی،سب سے اولیٰ و اعلیٰ ہمارا نبی،اسلام کی روشن تعلیمات،کتابِ زندگی،آخر درست کیا ہے؟بزرگانِ دین کے مبارک فرامین،احکامِ تجارت،تاجر صحابہ کرام،روشن ستارے،اپنے بزرگوں کو یاد رکھئے،سفر نامہ،العلم نور،مدنی کلینک،نئے لکھاری،دعوتِ اسلامی کی مدنی خبریں، بچوں کا ماہنامہ فیضانِ مدینہ،اسلامی بہنوں کا ماہنامہ، تذکرہ صالحات وغیرہ کے ذریعے ہمیں بہت کچھ سیکھنے کو ملتا اور ہمارے علم میں اضافہ ہوتا ہے۔ماہنامہ فیضانِ مدینہ علمِ دین حاصل کرنے کا خزانہ ہے،جس میں ہمیں مختلف موضوعات پڑھنے کا موقع ملتا ہے، ہر مہینے نیا ماہنامہ فیضانِ مدینہ منظرِ عام پر آتا ہے، اللہ پاک نے دعوتِ اسلامی کے ماہنامہ فیضانِ مدینہ کو قبولِ عام بخشا ہے۔ الحمدللہ ماہنامہ فیضانِ مدینہ اردو، انگلش، گجراتی وغیرہ مختلف زبانوں میں شائع ہوتا ہے جس سے کثیر لوگوں کو مطالعہ کرنے میں آسانی ہوجاتی ہے۔ماہنامہ فیضانِ مدینہ اپنے ظاہری حُسن میں منفرد اور مضامین و مشمولات کے اعتبار سے بھی لاجواب ہے۔اس کے مضامین معلوماتی،اصلاحی،عام فہم اور دل نشین ہونے کے ساتھ ساتھ جدید تقاضوں کے عین مطابق ہیں۔ماہنامہ فیضانِ مدینہ کے مضامین اصلاحِ فکر و عمل کے لئے بے انتہا مفید ہے۔ اس میں ہر طبقے کے لوگوں کے لئے الگ الگ، جدید مضامین کا انتخاب خاص طور پر قابلِ تحسین ہے۔ ماہنامہ فیضانِ مدینہ علم اور اصلاح سے مُزیّن عقائدِ حقّہ کا علم بردار ماہنامہ ہے۔ ماہنامہ فیضانِ مدینہ میں مختلف ایونٹس کے متعلق بھی مختلف موضوعات ہوتے ہیں جیسے جب میلادِ مصطفی کا موقع آتا ہے تو اس بارے میں موضوع ہوتا ہے،یوں ہی جب گیارہویں شریف یارمضان المبارک کا مہینا آتا ہے تو اس بارے میں بھی ہمیں بہت سا علمِ دین حاصل ہوتا ہے۔اسی طرح جب کسی بزرگ کا عُرس آتا ہے تو اس مبارک ہستی کے بارے میں بھی ہمیں ماہنامہ فیضانِ مدینہ میں مضمون ملتا ہے۔ ماہنامہ فیضانِ مدینہ میں ایسی کوئی چیز نہیں جو نہ ملے، ماہنامہ فیضانِ مدینہ میں کیا کیا ہے؟ ماہنامہ فیضانِ مدینہ میں سب کچھ ہے۔امیرِ اہلِ سنت دامَتْ بَرَکاتُہمُ العالِیَہ دعا بھی فرماتے ہیں:یا اللہ!جو میرا مدنی بیٹا اور مدنی بیٹی بارہ ماہ کے لئے ماہنامہ فیضانِ مدینہ ایک بار پھر جاری کروا لے، نیز جو ماہنامہ فیضانِ مدینہ کے کم از کم 12 یا زائد ممبر بنائے، اس کا گھر امن کا گہوارہ بن جائے اور اسے دنیاو آخرت میں کہیں بھی آنچ نہ آئے۔زہے نصیب!اس کا خاتمہ ایمان پر ہو، قبر جنت کا باغ بنے، محشر میں پیارے حبیبصلی اللہُ علیہ واٰلہٖ وسلم کی شفاعت پائے اور پیارے مصطفی کے پیچھے پیچھے جنت میں جائے۔آمین۔ہمیں بھی چاہئے کہ ہم خود بھی اس کا مطالعہ کریں اور دوسروں کو بھی اس کی ترغیب دلائیں۔الله پاک ہمیں ماہنامہ فیضانِ مدینہ کے فیضان سے مالامال فرمائے اور اس سے خوب علمِ دین حاصل کرنے کی توفیق عطا فرمائے۔آمین

تفسیرِ قرآنِ کریم، احادیثِ مبارکہ و شرح، خصائصِ مصطفٰی ، سیرتِ انبیا و اولیا، شانِ صحابہ و اہلِ بیت، احوالِ بزرگانِ دین، عقائد و اعمال،تصوف و معرفت،معلوماتی فتاویٰ،شرعی مسائل،احکامِ تجارت،آسان وظائف،مسلکِ اعلیٰ حضرت، ملفوظاتِ امیرِ اہلِ سنت، آدابِ معاشرت،تاریخ و واقعات، تحقیق و اخلاقیات، صحت و تندرستی، اشعار و سفرناموں، انعامی سلسلوں، بچوں کیلئے دلچسپ سبق آموز کہانیوں، خواتین کیلئے مفید تحریروں سمیت کم و بیش چالیس موضوعات پر مشتمل 66 صفحات کا ماہنامہ فیضان ِمدینہ بلاشبہ معلومات کا ایک بہترین شاہکار ہے۔دورِ حاضر کے تقاضوں کے مطابق درست اسلامی تعلیمات کی اشاعت میں مصروف سنتوں بھری تحریک دعوتِ اسلامی کے اس ماہنامے کا آغاز جنوری 2017 میں ہوا تھا۔ پہلا شمارہ منظرِ عام پر آتے ہی ہاتھوں ہاتھ لیا گیا اور اللہ پاک کے فضل و سرکار  صلی اللہُ علیہ واٰلہٖ وسلم کے کرم سے دن بدن اس کی مقبولیت میں اضافہ ہوتا جارہا ہے، نہ صرف عوام بلکہ علمائے کرام،مقررین،خطیب حضرات،دینی اور دنیاوی طلبا، ڈاکٹرز اور ٹیچرز سمیت مختلف شعبہ ہائے زندگی سے تعلق رکھنے والے افراد اس بے مثال جریدے سے استفادہ کرتے اور سراہتے نظر آتے ہیں۔دیدہ زیب طباعت،شاندار اسلوب،مکمل تخریج کے ساتھ بحوالہ معلومات اور عام فہم انداز پر مبنی اس لاجواب ماہنامے میں ہر طبقہٴ فکر کی دلچسپی کا سامان موجود ہے۔متفرق موضوعات پر مشتمل مختصر و جامع مضامین کے مطالعے سے جہاں دینی و دنیاوی معلومات کا خزانہ ہاتھ آتا ہے، وہیں غیر ضروری طوالت نہ ہونے کے سبب اکتاہٹ اور بوریت بھی محسوس نہیں ہوتی۔درحقیقت جو مضامین کئی کئی کتب کے مطالعہ سے حاصل ہوتے ہیں،وہ ایک ماہنامہ فیضانِ مدینہ کا مطالعہ کرنے سے حاصل ہوجاتے ہیں۔ بلامبالغہ یہ ماہنامہ عوام و خواص دونوں ہی کیلئے گویا کوزے میں دریا کی مانند ہے۔ماہنامہ فیضانِ مدینہ کی منفرد خصوصیات کے پیشِ نظر امیرِ اہلِ سنت حضرت علامہ مولانا محمد الیاس قادری دامَتْ بَرَکاتُہمُ العالِیَہ اپنے مدنی مذاکروں میں گاہے بگاہے اس کی بکنگ کرنے، کروانے اور مطالعہ کرنے کی ترغیب ارشاد فرمانے کے ساتھ ساتھ دعاؤں سے بھی نوازتے رہتے ہیں،جن سے حصہ پانے کیلئے عاشقانِ رسول کی ایک تعداد نے نہ صرف اپنے گھر ماہنامہ فیضانِ مدینہ کی بکنگ کروا رکھی ہے بلکہ حسبِ استطاعت دوسروں کی بکنگ کروانے میں بھی کوشاں رہتے ہیں۔اس میں کوئی شک نہیں کہ ماہنامہ فیضانِ مدینہ کے مطالعے سے نہ صرف علم و عمل کا جذبہ نصیب ہوتا اور درست اسلامی تعلیمات سے آگاہی حاصل ہوتی ہے بلکہ ایک کامیاب زندگی گزارنے اور آخرت سنوارنے میں بھی مدد ملتی ہے۔ جس طرح اس کا مطالعہ علم دین کے حصول کا ذریعہ اور کارِ ثواب ہے، اسی طرح دوسروں کو اس کی بکنگ کروانے کی ترغیب دلانا بھی باعثِ اجرِ عظیم و ثوابِ جاریہ ہے۔

الحمدللہ ماہنامہ فیضانِ مدینہ(دعوتِ اسلامی) زندگی کے مختلف شعبوں سے تعلق رکھنے والے افراد کی دینی، دنیاوی، شرعی، اخلاقی، نفسیاتی، معاشرتی، انفرادی اور اجتماعی ضرورتوں کو سامنے رکھتے ہوئے ہر مہینے اوسطاً 25 سے زائد موضوعات پر کم وبیش 40 مضامین شائع کرتا ہے،جیسے تفسیر، شرح، حدیث و فقہی مسائل کا حل، بچوں کی کہانیاں، سماجی موضوعات پر اصلاحی مضامین، تاجروں کے لئے شرعی راہ نمائی، خواتین کے لئے شرعی راہ نمائی و دیگر خصوصی موضوعات، بزرگانِ دین کی سیرت، دعوتِ اسلامی کی مدنی خبریں وغیرہ ماہنامہ فیضانِ مدینہ کے ہر شمارے کی زینت ہوتی ہیں۔ماہنامہ فیضانِ مدینہ(دعوتِ اسلامی)کا پہلا شمارہ ربیع الآخر 1438ھ بمطابق 5 جنوری 2017ء کومنظرِعام میں آیا۔اس شمارے کو سوشل میڈیا کے مختلف ذرائع ویب سائٹ، فیس بک وغیرہ کے ذریعے بھی بے شمار لوگ پڑھتے ہیں، علاوہ ازیں اس کی ڈیجیٹل کاپی(Pdf)وغیرہ بھی لوگوں کو پہنچائی جاتی ہے۔اللہ پاک نے دعوتِ اسلامی کے ماہنامہ فیضانِ مدینہ کو قبولِ عام بخشا ہے، فیضانِ مدینہ میں مضامین اصلاحِ فکر و عمل کے لئے بے انتہا مفید ہیں، ماہنامہ فیضانِ مدینہ کے متعدد شمارے نظروں سے گزرے۔ ماشاءاللہ یہ علم اور اصلاح سے مزیّن، عقائدِ حقّہ کا علمبردار ہے۔ ماہنامہ میں شائع ہونے والے مضامین کی ایک جھلک:1۔تفسیرِ قرآن کریم:اس خوبصورت سلسلے میں مفتی ابو صالح محمد قاسم عطاری دامَتْ بَرَکاتُہمُ العالِیَہ قرآن ِپاک کی ایک یا دو آیتوں کی عام فہم، جامع و جدید تقاضوں کے مطابق تفسیر بیان فرماتے ہیں، اس سلسلے میں٭اللہ پاک کا پیارا کیسے بنیں؟عاشقوں کی عبادت،٭محبتِ الہٰی اور اس کی نشانیاں وغیرہ جیسے اہم موضوعات سمیت تقریباً 55 سے زیادہ آیات کی تفاسیر شائع ہو چکی ہیں۔2۔حدیث شریف اور اس کی شرح:اس عنوان کے تحت کسی اہم مسئلہ کے اوپر عمل کی جانب توجّہ دلانے کے لئے ایک منتخب حدیث شریف کا ترجمہ اور مختصر شرح بیان کی جاتی ہے، جیسے٭دین خیرخواہی ہے، ٭موت کی تمنا کرنا کیسا؟ ٭جنت کا بازار وغیرہ کی مختصر شرح بیان کی جاتی ہے۔4۔اسلامی عقائد و معلومات:سلسلہ اسلامی عقائد و معلومات میں اِسلام کے بنیادی و ضروری عقائد کی اصلاح و معلومات کے لئے مستند حوالوں سے مزیّن مضامین شائع کئے جاتے ہیں، جیسے٭ذاتِ باری ، ٭لوحِ محفوظ،٭حشر و نشر وغیرہا، مضامین شائع ہوچکے ہیں۔5۔مدنی مذاکرے کے سوال و جواب: امیرِ اہلِ سنت حضرت علامہ مولانا محمد الیاس عطار قادری دامَتْ بَرَکاتُہمُ العالِیَہ نے مسلسل کاوشوں کے ذریعے لاکھوں لوگوں کی زندگی میں انقلاب برپا کر دیا، آپ کا کردار لائقِ تقلید اور آپ کی گفتار قابلِ عمل ہے، آپ کی حیاتِ طیبہ سے نامعلوم کتنوں کی زندگی سنور گئی، آپ کے مدنی مذاکرے کے سوالات و جوابات سے علمِ دین کی بہت سی باتیں علم میں آئیں۔6۔دارالافتاء اہلِ سنت:دارالافتاءاہلِ سنت تحریری، زبانی،فون کالز، واٹس ایپ، ای میلز اور کتب کی اشاعت کی صورت میں اُمّتِ مسلمہ کی شرعی راہ نمائی میں مصروف ہے۔7۔بچوں اور بچیوں کے لئے:بچے قوم کے مستقبل ہیں، ان کی جتنی اچھی تربیت ہو گی، مستقبل اتنا ہی شاندار ہوتا ہے، الحمدللہ ماہنامہ فیضانِ مدینہ میں بچوں کی اسلامی تربیت کے لئے مضامین شائع ہوتے ہیں، مثلاً فرضی حکایت، جانوروں کی سبق آموز کہانیاں اور روشن مستقبل اور کیا آپ جانتے ہیں؟ وغیرہ شامل ہیں، ان کہانیوں سے بچوں کی اچھی تربیت اور نصیحتوں کو ذکر کیا جاتا ہے۔8۔العلم نور:یہ سلسلہ بھی ماہنامہ فیضانِ مدینہ میں شامل کیا جاتا ہے، جس کے تحت علم و حکمت سے بھرپور قرآن و حدیث، فقہ اور تصوف کے اہم مسائل بیان کئے جاتے ہیں، اب تک بہت سارے مضامین شائع بھی ہو چکے ہیں۔9۔باتیں میرے حضور کی:ہمارے پیارے آقا صلی اللہُ علیہ واٰلہٖ وسلم کے اوصافِ جلیلہ بے انتہا ہیں، جن کا ایک موضوع خصائصِ مصطفی بھی ہے، اس سلسلے سے عاشقانِ رسول کے دلوں میں عشقِ رسول کی شمع مزید فروزاں کرنے کے لئے اب تک بہت سارے خصائصِ مصطفی شائع کئے جا چکے ہیں۔10۔اسلامی بہنوں کے لئے:

عورت معاشرہ کا ایک اہم حصّہ ہے اور اس کی اسلامی اصولوں پر کی گئی تعلیم و تربیت معاشرے پر خُوش کُن اثرات مرتب کرتی ہے، ماہنامہ فیضانِ مدینہ میں اس پہلو سے بھی خصوصی توجّہ دی جاتی ہے،جس کے لئے عورتوں کو صحابیات و صالحات کی سیرت و کردار سے متعارف کروانے کے لئے تذکرۂ صالحات کے نام سے سلسلہ شائع کیا جاتا ہے، اس سلسلہ میں اُمّہاتُ المؤمنین یعنی رسولِ اکرم صلی اللہُ علیہ واٰلہٖ وسلم کی ازواجِ مطہرات اور سرکارِ دوعالم صلی اللہُ علیہ واٰلہٖ وسلم سمیت تمام نیک بیبیوں کا مبارک تذکرہ کیا جاتا ہے۔ 11۔قارئین کے صفحات:ماہنامہ فیضانِ مدینہ میں قارئین کے لئے بھی صفحات مختص ہیں، جن میں موصول ہونے والے تاثرات کو بعنوان”آپ کے تاثرات“بھی شامل کیا جاتا ہے۔پیاری اسلامی بہنو!ماہنامہ فیضانِ مدینہ کی کامیابی اور اس کی اشاعت میں امیرِ اہلِ سنت حضرت علامہ مولانا محمد الیاس عطار قادری دامَتْ بَرَکاتُہمُ العالِیَہ کی نظرِ عنایت،راہ نمائی اور عملی تربیت کے ساتھ ساتھ مرکزی مجلسِ شوریٰ کے نگران مولانا محمد عمران عطاری مد ظلہ العالی اور نگرانِ مجلس ماہنامہ فیضانِ مدینہ ابوماجد محمد شاہد عطاری مدنی مد ظلہ العالی کی محنتوں کا بہت اہم کردار ہے۔اللہ پاک ان کے مخلصانہ خدمات کو قبول فرمائے اور ماہنامہ فیضانِ مدینہ کے چیف ایڈیٹر ابو رجب محمد آصف عطاری مدنی مد ظلہ العالی کو بھی جزائے خیر عطا فرمائے۔آمین۔پیاری اسلامی بہنو!ماہنامہ فیضانِ مدینہ کے اہم مضامین کا مطالعہ کرنے کے لئے آپ بھی ماہنامہ فیضانِ مدینہ کی خریدار بنئے، بلکہ اس کی سالانہ بکنگ کروا لیجئے ان شاء اللہ آپ سب کو ہر ماہ گھر بیٹھے یہ رسالہ فراہم ہو جائے گا ۔ آپ اس کو دعوتِ اسلامی کی ویب سائٹ سےبھی مفت ڈاؤن لوڈ کرسکتی ہیں۔اللہ پاک ہم سب کو دین کی خوب سمجھ اور سیکھنے کا مزید جذبہ عطا فرمائے۔آمین بجاہ النبی الامین صلی اللہُ علیہ واٰلہٖ وسلم

الحمد للہ!اللہ پاک کے فضل و کرم اور حضور جانِ جاناں صلی اللہُ علیہ واٰلہٖ وسلم کی نظرِرحمت با برکت سے عاشقانِ رسول کی عظیم تحریک دعوتِ اسلامی علمِ دین کے فروغ کے لئے بے شمار خدمات سر انجام دے رہی ہے، انہی میں سے ایک ماہانہ میگزین ماہنامہ فیضانِ مدینہ بھی ہے۔ماہنامہ فیضانِ مدینہ میں زندگی کے مختلف شعبوں سے تعلق رکھنے والے افراد کی تربیت کی جاتی ہے، ماہنامہ فیضانِ مدینہ میں تقریبا 25 سے زائد موضوعات پر تقریباً40 مضامین پیش کئے جاتے ہیں، اس میں بزرگوں کے حالاتِ زندگی و سیرت کے ساتھ ساتھ صحابیات رضی اللہ عنہن کے بارے میں بھی معلومات کا خزانہ ہوتا ہے۔ماہنامہ فیضانِ مدینہ کے کیا کہنے!جو علم دیگر کتب سے تلاش کرنے سے بھی نہیں ملتا، وہ ماہنامہ فیضانِ مدینہ سے مل جاتا ہے۔ماہنامہ فیضانِ مدینہ کا ہر ہر صفحہ قابلِ دید ہے، اس میں بڑوں کے ساتھ چھوٹے بچوں کو بھی بہت کچھ سیکھنے کو ملتا ہے۔ الحمد للہ ماہنامہ فیضانِ مدینہ علمِ دین حاصل کرنے کا ایک بہترین ذریعہ ہے ۔ماہنامہ فیضانِ مدینہ واقعی میں فیضانِ مدینہ ہے،اس سے فیضانِ مدینہ کی خوشبو محسوس ہوتی ہے،یہ سوادِ اعظم اہلِ سنت وجماعت اور سیّدی اعلیٰ حضرت رحمۃُ اللہِ علیہ کے نظریاتی مشن کو بڑی ہمت وجرات اور تیزی کے ساتھ پوری دنیا میں پھیلانے کا ایک عظیم فریضہ سر انجام دے رہا ہے۔اللہ پاک مدینہ پاک کی خاکِ شفاء کے صدقے اس فیضان کو گھر گھر پہنچائے اور اسے قبولیتِ عام کا شرف عطا فرمائے۔آمین

ماہنامہ فیضانِ مدینہ دھوم مچائے گھر گھر یاربّ جا کرعشقِ نبی کے جام پلائے گھر گھر

عاشقان رسول کی دینی تحریک دعوت اسلامی کے زیر اہتمام دنیا بھر میں ہر جمعرات پابندی کے ساتھ بعد مغرب ہفتہ وار سنتوں بھرے اجتماعات کا انعقاد کیا جاتا ہے جن میں مبلغین دعوت اسلامی خوفِ خدا، عشق رسول، محبت صحابہ و اہل بیت، سیرت اولیاء اور دینی تعلیمات کے موضوعات پر سنتوں بھرے بیانات فرماتے ہیں۔ ان اجتماعات میں شریک ہونے والے عاشقان رسول کی  حکمت عملی کے ساتھ دینی و معاشرتی اعتبار سے تربیت بھی کی جاتی ہے اور انہیں دینِ اسلام کے رستے پر چلنے کا ذہن بھی دیا جاتا ہے۔

اسی طرح 17 مارچ 2022ء کو بھی بعد نماز مغرب دنیا بھر میں ہفتہ وار اجتماع شروع ہوجائے گا جن میں اراکین شوریٰ و مبلغین دعوت اسلامی سنتوں بھرے بیانات فرمائیں گے۔ تفصیلات کےمطابق رات 9:00 بجے نیو میمن مسجد بولٹن مارکیٹ کراچی میں ہونے والے ہفتہ وار اجتماع میں مرکزی مجلس شوریٰ کے رکن حاجی محمد امین عطاری سنتوں بھرا بیان فرمائیں گے جسے مدنی چینل پر براہ راست نشر کیا جائے گا۔

تمام عاشقان رسول سے اپنے اپنے علاقے میں ہونے والے ہفتہ وار اجتماع میں شرکت کرنے کی درخواست ہے۔

فضائلِ شبِ براءت:

خالق کائنات کی طرف سے امت ِمحمدیہ کو سال میں چند راتیں ایسی ملی ہیں جن میں خوب اللہ پاک کی رحمتوں، برکتوں کا نزول ہوتا ہےاور رحمت الہٰی کی چھما چھم بارشیں ہوتی ہیں۔ ان میں عبادت و ریاضت اور دعائیں مانگنے والے شخص کو بارگاہ ِربُّ العزت سے محروم نہیں کیا جاتا، ان راتوں میں جو شخص بیدار رہ کر عبادت کرتا ہے اُسے جنت کی خوشخبری دی گئی ہے۔ اُن بابرکت راتوں میں سے ایک شعبان المعظم کی پندرہویں رات ”شب براءت“بھی ہے ۔ یہ شب ان پانچ راتوں میں بھی شامل ہے جن میں دُعا ئیں رد نہیں کی جاتیں۔ ذیل میں ہم شبِ براءت کی فضیلتوں اور برکتوں پر کچھ روایات ذکرکررہے ہیں اور اس رات کی جانے والی عبادات بھی بیان کررہے ہیں۔

شبِ براءت کی فضیلت پر احادیثِ مبارکہ:

٭اُم المؤمنین حضرت سیدتُنا عائشہ صدیقہ رضی اللہُ عنہا سے روایت ہے،نبی کریم صلَّی اللہ علیہ واٰلہٖ وسلَّم نے ارشاد فرمایا: اللہ پاک چار راتوں میں بھلائیوں کے دروازے کھول دیتا ہے: (1)بقر عید کی رات (2)عیدالفطر کی رات (3)شعبان کی پندرہویں رات کہ اس رات میں مرنے والوں کے نام اور لوگوں کا رزق اور (اِس سال)حج کرنے والوں کے نام لکھے جاتے ہیں (4)عرفہ کی رات اذانِ (فجر)تک۔ (در منثور، الدخان، تحت الآیۃ: ، 4 / ۴۰۲)

٭حضرت معاذ بن جبل رضی اللہ عنہ سے روایت ہے کہ حضور صلَّی اللہ علیہ واٰلہٖ وسلَّم نے ارشاد فرمایا کہ جس نے پانچ راتیں بیدار رہ کر عبادت میں گزاریں اس کے لئے جنت واجب ہے۔ وہ راتیں یہ ہیں: لیلۃ الترویہ، لیلۃ النحر، لیلۃ عرفہ (نویں اور دسویں ذوالحجہ کی رات)، عید الفطر کی شب اور شب براءت۔ (الترغیب والترہیب (منذری)، 2/ 98)

٭سیدنا ابو امامہ باہلی رضی اللہ عنہ سے روایت ہیں کہ حضور صلَّی اللہ علیہ واٰلہٖ وسلَّم نے ارشاد فرمایا کہ پانچ راتوں میں دعا رد نہیں ہوتی۔ ماہ رجب کی پہلی رات، پندرہویں شعبان کی رات (شب براءت)، جمعہ کی رات، عید الفطر کی رات اور عید الاضحٰی کی رات۔ (فردوس الاخبار، ۱/۳۷۷، الحدیث ۲۷۹۷)

شب براءت کے معنیٰ:

ماہ شعبان المعظم کی پندرہویں رات کو” شب براءت“ کہا جاتا ہے۔شب کے معنی ”رات“ اور براءت کے معنیٰ نجات کے ہیں، یعنی اس رات کو ”نجات کی رات“ کہا جاتا ہے چونکہ اس رات کو مسلمان عبادت و ریاضت میں گزار کر جہنم سے نجات حاصل کرتے ہیں اس لئے اس رات کو شبِ براءت کہا جاتا ہے۔(بارہ ماہ کی عبادات، ص108)

شب براءت کے چند نام:

حضرت علامہ علی قاری رحمۃُ اللہِ علیہ نقل کرتے ہیں: شبِ براءت کے چار نام ہیں: (1)لیلۃ المبارکۃ (برکت والی رات) (2)لیلۃ البراءۃ (نجات والی رات) (3)لیلۃ الصَّکِّ_ (دستاویز والی رات) (4)لیلۃ الرحمۃ (رحمت والی رات)۔

مزید فرماتے ہیں: اسے لیلۃ البراءۃ اور لیلۃ الصَّک(نجات و دستاویزات والی رات) اس لئے کہتے ہیں کہ جب تاجر مالک سے اُس کا اناج وصول کرلیتا ہے تو اس کے لئے براءت نامہ لکھ دیتا ہے۔ اسی طرح اللہ پاک اس رات اپنے مؤمن بندوں کے لئے براءت نامہ لکھ دیتا ہے۔ (مجموع رسائل العلامہ الملا علی قاری، الرسالۃ:التبیان فی بیان ما فی لیلۃ النصف من شعبان، 3/41)

اس رات کے بارے میں اللہ پاک قرآن کریم میں ارشاد فرماتا ہے:

وَ الْكِتٰبِ الْمُبِیْنِۙۛ(۲) اِنَّاۤ اَنْزَلْنٰهُ فِیْ لَیْلَةٍ مُّبٰرَكَةٍ اِنَّا كُنَّا مُنْذِرِیْنَ(۳) فِیْهَا یُفْرَقُ كُلُّ اَمْرٍ حَكِیْمٍۙ(۴)

ترجمہ کنز الایمان: قسم اس روشن کتاب کی،  بےشک ہم نے اُسے برکت والی رات میں اُتارا ،بےشک ہم ڈر سنانے والے ہیں،  اس میں بانٹ دیا جاتا ہے ہر حکمت والا کام۔ (سورۃ الدخان، آیت2تا 4)

اکثر مفسرین کے نزدیک برکت والی رات سے شبِ قدر مراد ہے اور بعض مفسرین اس سے ”شبِ براء ت “مراد لیتے ہیں ۔(تفسیرصراط الجنان، سورۃ الدخان، آیت2تا 3)

عبادات شب براءت:

شب براءت میں جس طرح بھی ممکن ہو ہمیں تمام تَر وقت (غروب آفتاب سے طلوع فجر تک) عبادت الہی میں ہی گزرنا چاہیئے مثلاً ذکر و اذکار، درود و سلام اور تلاوت ِقرآنِ پاک الغرض جو بھی ممکن ہوسکے۔ لیکن عاشقان رسول کی آسانی کے لئے چند نوافل ذکر کرنے کی کوشش کی گئی ہے تاکہ وہ اس رات اپنے لئے ثواب کا ذخیرہ جمع کرسکیں۔

مغرب کے بعد چھ نوافل:

حضرت علامہ سیّد محمد مرتضیٰ زبیدی حسینی رحمۃُ اللہِ علیہ شعبانُ المعظم کے چھ نوافل کے بارے میں فرماتے ہیں: شبِ براءت کی عبادت سے متعلق دورِ اسلاف سے لے کر اب تک صوفیائے کرام رحمۃ اللہ علیہم کا یہ معمول چلا آرہا ہے کہ اس رات نمازِ مغرب کے بعد چھ رکعتیں دو دو کرکے ادا کی جائیں ، ہر رکعت میں ایک مرتبہ سورۂ فاتحہ اور چھ بار سورۂ اخلاص پڑھی جائے۔ ہر دو رکعات کے بعد ایک بار سورۂ یسین اور دعائے نصف شعبان پڑھی جائے۔ پہلی دو کے ذریعے اللہ پاک سے عمر میں برکت ، دوسری دو کے ذریعے رزق میں برکت اور تیسری دو رکعات کے ذریعے اچھے خاتمہ کا سوال کیا جائے۔ اسلافِ کرام رحمۃ اللہ علیہم نے ذکر فرمایا ہے کہ جو اس طریقے کے مطابق یہ نوافل ادا کرے گا اس کی مذکورہ حاجتیں پوری کی جائیں گی۔ مزید فرماتے ہیں : یہ معمولاتِ مشائخ میں سے ہے۔ (اتحاف السادۃ المتقین ، 3 / 708)

سورۂ یٰسین شریف پڑھنے میں یہ بھی ہوسکتا ہے کہ کوئی ایک اسلامی بھائی بلند آواز سے قراءت کرے اور دوسرے خاموشی سے سنیں لیکن اس میں یہ خیال رہے کہ سننے والا اِس دوران زبان سے یٰسین شریف بلکہ کچھ بھی نہ پڑھے۔

یہ مسئلہ خوب یاد رکھئے کہ جب قرآنِ کریم بلند آواز سے پڑھا جائے تو جو لوگ سننے کے لئے حاضر ہیں اُن پر فرضِ عین ہے کہ چپ چاپ خوب کان لگا کر سُنیں۔ اِنْ شَآءَاللہ رات شروع ہوتے ہی ثواب کا اَنبار لگ جائے گا۔ ہر بار یٰسین شریف کے بعد’’دُعائے نصف شعبان‘‘بھی پڑھئے۔ (رسالہ”آقا کا مہینہ“ ص15)

دعائے نصف شعبان

مفتیِ مالکیہ حضرت شیخ سالم بن محمد سنھوری مصری رحمۃ اللہ علیہم فرماتے ہیں : حضرت سیِّدُنا عبد اللہ بن مسعود رضی اللہ عنہ سے مروی ہے کہ جو بندہ یہ دعا مانگے گا اس کے رزق میں وسعت کردی جائے گی :

اَللّٰھُمَّ یَاذَا الْمَنِّ وَلَا یُمَنُّ عَلَیْہِ ، یَاذَا الْجَلَالِ وَالْاِکْرَامِ ، یَاذَاالطَّوْلِ وَ الاِنْعَامِ ، لَا اِلٰہَ اِلَّا اَنْتَ ، ظَھْرُ اللَّاجِئِیْنَ وَجَارُالْمُسْتَجِیْرِ یْنَ وَمَأْمَنُ الْخَائِـفِیْنَ، اِنْ کُنْتَ کَتَبْتَنِیْ عِنْدَکَ فِیْ اُمِّ الْکِتَابِ شَقِیّاً فَامْحُ عَنِّیْ اِسْمَ الشَّقَاوَۃِ ، وَ اَثْبِتْنِیْ عِنْدَکَ سَعِیْدًا ، وَ اِنْ کُنْتَ کَتَبْتَنِیْ عِنْدَکَ فِیْ اُمِّ الْکِتَابِ مَحْرُوْمًا مُقَتَّرًا عَلٰی رِزْ قِیْ فَامْحُ حِرْمَانِیْ وَیَسِّرْ رِزْ قِیْ وَاَ ثْبِتْنِیْ عِنْدَکَ سَعِیْدًا مُوَفِّقاً لِلْخَیْرَ اتِ ، فَاِنَّکَ تَقُوْلُ فِیْ کِتَابِکَ الَّذِیْ اَنْزَ لْتَ ( یَمْحُوا اللّٰهُ مَا یَشَآءُ وَ یُثْبِتُ ۚ وَ عِنْدَهٗۤ اُمُّ الْكِتٰبِ(۳۹) (پ13 ، الرعد : 39)( مصنف ابن ابی شیبہ،7 / 85بتغیرقلیل)

 اِلٰہِیْ بِالتَّجَلِّی الْاَعْظَمِ فِیْ لَیْلَۃِ النِّصْفِ مِنْ شَعْبَانَ الْمُکَرَّمَ ، الَّتِیْ یُفْرَقُ فِیْہَا کُلُّ اَمْرٍ حَکِیْمٍ وَیُبْرَمُ ، نَسْاَ لُکَ اَنْ تَکْشِفَ عَنَّا مِنَ الْبَلَاءِ مَانَعْلَمُ ، وَمَا لَانَعْلَمُ وَمَا اَنْتَ بِہٖ اَعْلَمُ ، اِنَّکَ اَنْتَ الْاَعِزُّ الْاَکْرَمُ ، وَصَلَّی اللہُ عَلٰی سَیِّدِنَا مُحَمَّدِ نِ النَّبِیِّ الْاُمِّیِّ وَعَلٰی آلِہٖ وَصَحْبِہٖ وَ سَلَّم (الکشف والبیان عن فضائل لیلۃ النصف من شعبان ، ص 27 واللفظ لہ ،  نعت البدایات ، ص 197 بتغیر)

صلاۃُ التسبیح کی اہمیت و فضیلت :

پیارے پیارے اسلامی بھائیو !زہے نصیب کہ شبِ براءت میں دیگر عبادات و نوافل کے ساتھ ساتھ صلوۃُ التسبیح کے نفل بھی ادا کر لئے جائیں جیساکہ حضرت علامہ علی بن سلطان قاری رحمۃ اللہ علیہ فرماتے ہیں : بہتر یہ ہے کہ شبِ براءت میں صلوٰۃُ التسبیح بھی ادا کر لی جائے کیونکہ یہ کسی شک و شبہ کے بغیر صحیح طور پر ثابت ہے۔ (مجموع رسائل العلامۃ الملا علی القاری ، الرسالۃ : التبیان فی بیان مافی لیلۃ النصف من شعبان۔۔ الخ ، 3 / 51)

صلاۃُ التسبیح کی فضیلت پر حدیث:

ہمارے پیارے آقا ، مکی مدنی مصطفٰے صلَّی اللہ علیہ واٰلہٖ وسلَّم نے اپنے چچا حضرت سیدنا عباس رضی اللہ عنہ کو صلوۃُ التسبیح کا تفصیلی طریقہ بیان کرنے کے بعد ارشاد فرمایا : میرے چچا جان!اگرروزانہ یہ نماز ادا کرسکیں توضرور کریں ، اگر روزانہ نہ ہوسکے تو ہرجمعہ کواور اگر ایسا بھی نہ کرسکیں تو ہر مہینے ادا کرلیا کریں ، یہ بھی نہ ہوسکے توسال میں ایک مرتبہ ادا کرلیا کریں اور اگر اس کی بھی طاقت نہ ہو تو زندگی میں ایک مرتبہ ادا کرلیں۔ (ابو داؤد ، کتاب التطوع ، باب صلوۃ التسبیح ، 2 / 45، الحدیث : 1297)

صلاۃُ التسبیح کا طریقہ

اس نماز کو اس ترتیب سے پڑھیں کہ تکبیرِ تحریمہ کے بعد ثَناء پڑھیں پھر پندرہ مرتبہ یہ تسبیح پڑھے : سُبْحٰنَ اﷲِ وَالْحَمْدُ لِلّٰہِ وَلَآ اِلٰہَ اِلَّا اللہُ وَاللہُ اَکْبَر پھر اَعُوْذُ بِاللہِ مِنَ الشَّیْطٰنِ الرَّجِیْم اور بِسْمِ اللہِ الرَّحْمٰنِ الرَّ حِیْم سورۂ فاتحہ اور کوئی سورت پڑھ کر رکوع سے پہلے دس بار یہی تسبیح پڑھے پھر رکوع کرے اور رکوع میں سُبْحٰنَ رَبِّیَ الْعَظِیْم تین مرتبہ پڑھ کر پھر دس مرتبہ یہی تسبیح پڑھے پھر رکوع سے سر اٹھائے اور سَمِعَ اللہُ لِمَنْ حَمِدَہ اور اَللّٰھُمَّ رَبَّنَا وَلَکَ الْحَمْد پڑھ کر پھر کھڑے کھڑے دس مرتبہ یہی تسبیح پڑھے پھر پہلے سجدے میں جائے اور تین مرتبہ سُبْحٰنَ رَبِّیَ الْاَعْلٰی پڑھ کر پھر دس مرتبہ یہی تسبیح پڑھے پھر سجدہ سے سر اٹھائے اور دونوں سجدوں کے درمیان بیٹھ کر دس مرتبہ یہی تسبیح پڑھے پھر دوسرے سجدہ میں جائے اور سُبْحٰنَ رَبِّیَ الْاَعْلٰی تین مرتبہ پڑھےپھراس کےبعدیہی تسبیح دس مرتبہ پڑھےاسی طرح چار رکعت پڑھے اور خیال رہے کہ کھڑے ہونے کی حالت میں سورۂ فاتحہ سے پہلے پندرہ مرتبہ اور باقی سب جگہ یہ تسبیح دس دس بار پڑھے یوں ہر رکعت میں 75مرتبہ تسبیح پڑھی جائے گی اور چار رکعتوں میں تسبیح کی گنتی تین سو مرتبہ ہوگی۔ ( بہار شریعت ، حصہ 4 ، 1 / 683)

ستر ہزار فرشتے دعائے مغفرت کریں گے :

حضرت علامہ علی بن سلطان قاری رحمۃ اللہ علیہ فرماتے ہیں : شبِ براءت میں سورۂ الدُخّان پڑھنا مستحب ہے۔ حضرت سیدنا ابوہریرہ رضی اللہ عنہ فرماتے ہیں کہ رسول الله صلَّی اللہ علیہ واٰلہٖ وسلَّم نے فرمایا : جو رات میں حٰم الدُّخان کی تلاوت کرےگا تو وہ صبح اس حال میں کرے گا کہ ستر ہزار فرشتے اس کے لئے دعائے مغفرت کررہے ہوں گے۔ (ترمذی،4/406، الحدیث 2897)

جنت کی خوشخبری :

حضرت علامہ احمد بن محمدصاوی مالکی رحمۃ اللہ علیہ فرماتے ہیں : جو کوئی شبِ براءت میں 100رکعت پڑھے گا تو اللہ کریم اس کے پاس 100فرشتے بھیجے گا ، جن میں سے 30 فرشتے اسے جنت کی بشارت دیں گے ، 30عذابِ نار سے بچائیں گے ، 30 اس سے دنیوی آفتیں دور کریں گے اور10 فرشتے اس سے شیطان کے مکرو فریب دور کریں گے۔ (حاشیۃ الصاوی، الدخان، تحت الایۃ : 2 ، 5 / 1908)

اللہ تبارک و تعالیٰ ہمیں اس رات عبادات کرنے اور زیادہ سے زیادنیکیاں کمانے کی توفیق عطا فرمائے۔

اٰمین بجاہِ خاتمِ النبیّین الامین صلَّی اللہ علیہ واٰلہٖ وسلَّم

مولانا حسین علاؤالدین عطاری مدنی

اسکالر اسلامک ریسرچ سینٹر دعوتِ اسلامی

الحمد الله ماہنامہ فیضان مدینہ مختلف موضوعات پر ہر ماہ کم و بیش 30 مضامین شائع کرتا ہے ۔اس میں جہاں قرآن و حدیث کے موضوعات پر بیش بہا مضامین ہوتے ہیں وہیں صحت ، تندرستی ، اور بچوں کی تربیت وغیرہ متعدد موضوعات پر بھی مضامین شامل اشاعت ہوتے ہیں یہ ماہنامہ اردو زبان کے ساتھ ساتھ انگلش ، عربی، ہندی اور گجراتی میں بھی شائع کیا جاتا ہے۔ خوش آئندہ بات یہ ہے کہ جہاں بے شمار لوگ مکتبۃ المدینہ سے خرید کر اس کا مطالعہ کرتے ہیں وہیں سوشل میڈیا کے مختلف ذرائع مثلا ویب سائٹ،ٹیلی گرام،فیس بک وغیرہ کے ذریعہ بھی اس کو پڑھتے ہیں ۔

ماہنامہ فیضان مدینہ کے چند انوکھے کالمز کا اجمالی جائزہ :

(1) فریاد : یہ کالم دعوت اسلامی کے مرکزی مجلس شوریٰ کے نگران حاجی محمد عمران عطاری کے بیانات ، گفتگو ، سلسلوں اور آڈیو میسجز کے ذریعہ تیار کیا جاتا ہے۔ اس میں ایک اہم امر کی اصلاح کی طرف نشاندہی کی جاتی ہے اور آخر میں تمام اسلامی بھائیوں سے عاجزانہ فریاد بھی کی جاتی ہے اس میں اب تک گھریلو اخراجات کیسے پورے ہوں ، مثبت سوچئیے ،دنیا کے بدلے آخرت کا زیادہ سوچئیے ، اصلاح کا درست طریقہ ، ہماری عادتوں کے فوائد و نقصانات ، بے جا بحث مت کیجئے ، حالات بدلنے کے لئیے پہلے خود کو بدلیں ، انتقام کی آگ جیسے اہم موضوعات پر قیمتی مضماین شائع ہو چکے ہیں ۔

(2) آخر درست کیا ہے؟ : یہ کالم مفتی اہلسنت مفتی دعوت اسلامی حضرت علامہ مولانا مفتی محمد قاسم عطاری کی جانب سے ماہنامہ میں شائع کیا جاتا ہے اور آپ کا یہ سلسلہ ایک جداگانہ اہمیت کا حامل ہوتا ہے جس میں آپ اسلام پر ہونے والے بے جا اعتراضات کے احسن انداز میں جوابات دیتے ہیں اس کے تحت اب تک ،کیا کافر جنتی یا ولی ہوسکتا ہے؟ ، سنتوں پر عمل کیوں کریں؟ ،وبائیں کیوں آتی ہیں؟ ، مذہب اور عقل،تناسخ یا آواگون اسلامی نقطئہ نظر سے، وغیرہ وغیرہ ناموں سے درجنوں مضمامین شائع ہوچکے ہیں۔

(3) باتیں میرے حضور کی : یہ بھی ایک انوکھا سلسلہ ہے جس میں ہمارے پیارے آقا صلی اللہ علیہ وسلم کے اوصاف جمیلہ کو بیان کیا جاتا ہے۔ جس کا جاننا ہر عاشق رسول کے لئے ضروری ہے اس کے تحت ، سب سے کثیر امت والے نبی ، جنت کا سب سے بلند درجہ ، پاکیزہ لوگوں کے سردار ، جنت اور دنیا کے مالک، بنے دو جہاں تمہارے لئے وغیرہ موضوعات پر بہت سے مضامین شائع کئے جا چکے ہیں ۔

(4)ہماری کمزوریاں : ہمارے اندر بہت سی ایسی کمزوریاں پائ جاتی ہیں جس کی وجہ سے ہمیں اکثر نقصان اٹھانا پڑھتا ہے اس کالم میں انہی کمزوریوں کو بیان کیا جاتا ہے اس کے تحت اب تک خود غرضی ،احسان فراموشی ، پھول سی بچی کا قتل ،ٹال مٹول ، بے بسی ، پڑھاپے کی پریشانی ،کنفیوزن، نفرت کیوں؟، بد دعائیں کیوں ؟،ٹائم نہیں ہے ،اختلاف رائے وغیرہ عنوانات سے بہت سے مضامین شائع کئیے جا چکے ہیں ۔

(5) مدنی کلینک : صحت اور تندرستی الله پاک کی وہ عظیم نعمت ہے جس کی حفاظت کی ہر ایک کو حاجت ہے ماہنامہ فیضان مدینہ کے اس سلسلہ میں ہر ماہ ایک بیماری اور اس کی علامت و پہچان اور اس کا علاج بیان کیا جاتا ہے اس سلسلے میں تھیلیسیمیا اور اینیمیا ، جوڑوں کا درد ، بچوں میں الرجی کے علامات و اسباب اور ان کا حل ، اچھی نیند کے اصول ،بچوں کی بیماریاں جانچنے کا طریقہ ،دَمہ (ashtma) کے اسباب و علاج ، جیسے اہم موضوعات بیان کیئے جاتے ہیں ۔

(6) بچے اور بچیوں کے لئے : بچے قوم کا مستقبل ہیں ان کی صحیح تعلیم و تربیت اور اچھی پرورش انہیں معاشرے میں نمایا مقام دلانے کے لئے ضروری ہے ماہنامہ فیضان مدینہ میں بچوں کی اسلامی تربیت کے لئے ننھے میاں کی کہانی ، جانوروں کی سبق آموز کہانیاں ، آؤ بچو! حدیث رسول سنتے ہیں ، کیا آپ جانتے ہیں؟ جیسے موضوعات شائع کئے جاتے ہیں ۔

پیارے پیارے اسلامی بھائیو! "ماہنامہ فیضان مدینہ" کے ان انوکھے مضامین کا مطالعہ کرنے کے لئے مکتبۃ المدینہ کی کسی بھی شاخ سے اس کو ہدیۃً طلب فرمالیجئے اور ہو سکے تو اس کی سالانہ بکنگ فرما لیجئے ان شاء الله الکریم اس کے ذریعہ علم کا بیش بہا خزانہ حاصل ہوگا نیز اس کو دعوت اسلامی کی ویب سائٹ http://www.dawateislami.netکے ذریعہ مفت ڈاؤن لوڈ بھی کرسکتے ہیں۔

عموماً دیکھا گیا ہے کہ گھروں میں ڈائیجسٹ ناولز اور گناہوں بھرے ماہنامے پڑھنے کا ذہن ہوتا ہے لیکن جب سے ”ماہنامہ فیضانِ مدینہ“جاری ہوا ہے تب سے گناہوں  بھرا سلسلہ کم ہوتا نظر آیا ۔

الحمداللہ ماہنامہ فیضان مدینہ عروج پکڑتا نظر آیا اور کم و بیش ماہنامہ فیضان مدینہ کو پانچ سال ہو چکے ہیں اور الحمداللہ اس کے پڑھنے والوں کی تعداد میں اضافہ در اضافہ ہوتا ہی جا رہا ہے اور اس کے پڑھنے والوں کے مطالعے میں ذوق کا اضافہ ہوا ہے۔ اور الحمدللہ اس ماہنامہ فیضان مدینہ میں دلچسپ اور مختلف موضوعات پر مضمون ہوتے ہیں جو پڑھنے والے کی دلچسپی کو کم نہیں ہونے دیتے ہیں۔ ماہنامہ فیضان مدینہ میں سے اچھی خوبی یہ ہے اس میں مردوں اور عورتوں اور بچوں کے اعتبار سے مضامین ہوتے ہیں جس کی وجہ سے ہر بندہ اس کو پڑھنے کی طرف مائل ہوتا ہے۔ اس میں سب سے اچھی بات یہ ہے کہ اس میں نئے لکھاریوں والا مضمون رائٹر کالم نگار اور لکھنے میں دلچسپی لینے والوں کو اپنی طرف متوجہ کرتا ہے۔ جس کی وجہ سے بعض رائٹر اور کالم نگار نیکیوں والے تحریر لکھنے میں مصروف ہوئے اور گناہوں بھرے موضوعات پر تحریرات لکھنے سے بچے ۔

مدنی مشورہ : میرا مشورہ یہ ہے کہ نئے لکھاریوں کے مضامین میں اضافہ کیا جائے تاکہ مزید نئے لکھاری اس ”ماہنامہ فیضانِ مدینہ“ میں مضامین لکھنے میں مصروف ہو اور اس اُمّت کو زیادہ تعداد میں ماہنامہ فیضان مدینہ کے ذریعے دعوت اسلامی نئے رائٹر فراہم کر سکیں۔

اللہ پاک سے دعا ہے کہ اللہ پاک ”ماہنامہ فیضانِ مدینہ“ کو ترقی اور عروج عطا فرمائے۔