دعوتِ اسلامی  کی مجلس انٹرنل آڈٹ کے زیر اہتمام 18 مئی کو عالمی مدنی مرکز فیضانِ مدینہ کراچی میں بذریعہ انٹر نیٹ مدنی مشورہ ہوا جس میں دعوت اسلامی کی مرکزی مجلس شوریٰ کے رکن حاجی سید ابراہیم عطاری نے سنتوں بھرا بیان فرمایا۔ رکن شوریٰ نے مشورے میں شریک اسلامی بھائیوں کو جدول کا جائزہ لینے اور زیادہ سے زیادہ مدنی عطیات جمع کرنے کی ترغیب دلائی۔ اس مدنی مشورے میں نگران مجلس مالیات محمد مزمل عطاری سمیت انٹرنل آڈٹ ڈیپارٹمنٹ کے اراکین نے شرکت کی۔ 

فیصل آباد کے علاقے مدینہ ٹاؤن میں قائم مدنی مرکزفیضان مدینہ سے مجلس کفن دفن کے تحت 7 دن کے آن لائن شارٹ کورس کا انعقاد کیاگیا جس میں رکن شوریٰ حاجی منصور عطاری نے بذریعہ ویڈیو لنک ان اسلامی بھائیوں کی رہنمائی فرمائی نیز کورس کے اختتام پر نگران پاکستان انتظامی کابینہ و رکن شوریٰ حاجی محمد شاہد عطاری نے  کورس کرنے والے اسلامی بھائیوں میں بیان فرمایا اور بذریعہ ویڈیو لنک مدنی پھول ارشاد فرمائے۔

کورس میں کامیاب ہونے والے اسلامی بھائیوں کو سرٹیفکیٹس بھی دئیے۔ نگران پاکستان نے ان اسلامی بھائیوں کو ذہن دیا کہ ہر گھر میں کم از کم ایک اسلامی بھائی اور ایک اسلامی بہن کوغسل میت کا طریقہ آنا چاہئے۔

سربراہِ تنظیم ایم کیو ایم پاکستان بحالی کمیٹی ڈاکٹر فاروق ستار نے دعوت اسلامی کے عالمی مدنی مرکز فیضان مدینہ کا دورہ کیا۔ دورے کے موقع پر مجلس رابطہ کے ذمہ داران و دیگر اسلامی بھائیوں نے فاروق ستار سے ملاقات کی ذمہ دار اسلامی بھائی نے فاروق ستار کو دعوت اسلامی کے تحت تھیلسمیااوردیگر امراض میں مبتلاافرادکیلئے لگائے گئے بلڈ کیمپ اور راشن پیک ہونے والے گودام کا دورہ کروایا اور اس حوالے سے بریفنگ دی۔ ڈاکٹر فاروق ستار نے کہا کہ دعوت اسلامی نے ہمیشہ بڑھ چڑھ کر لوگوں کی مدد کی ہے جو ایک قابل تعریف عمل ہے۔ 

دعوت اسلامی کی مرکزی مجلس شوریٰ کے نگران حاجی محمد عمران عطاری مَدَّظِلُّہُ الْعَالِی نے بذریعہ انٹرنیٹ اسلامی بہنوں کا مدنی مشورہ فرمایا۔ اس مدنی مشورے میں یوکے ،یورپین ممالک، سینٹرل افریقہ ،اور ساؤتھ افریقہ کی ذمہ دار اسلامی بہنیں شامل تھیں۔ نگران شوری نے مدنی کاموں میں مزید بہتری لانے اور مطالعہ کرنے کے حوالے سے مدنی پھول ارشاد فرمائے۔ اس موقع پر رکن شوریٰ حاجی ابوماجد محمد شاہد عطاری مدنی اور رکن شوریٰ حاجی برکت علی عطاری بھی موجود تھے۔

پچھلے دنوں مبلغِ دعوتِ اسلامی محمد ثوبان عطاری نے  گورنر ہاوس میں جاکر گورنر پنجاب چوہدری سرور سے ملاقات کی اور انہیں اس مشکل وقت میں دعوتِ اسلامی کے فلاحی کاموں کے بارے میں بریک کیا۔ مبلغِ دعوت اسلامی نے انہیں بتایا کہ دعوتِ اسلامی کس طرح مستحق افراد میں راشن تقسیم کررہی ہے اور تھیلیسمیا کے بچوں کے لئے خون کا انتطام کررہی ہے جسے سن کر گورنر پنجاب نے دعوتِ اسلامی کی خدمات کو سراہا۔ 

کورونا وائرس  اور لاک ڈاؤن کے باعث دعوت اسلامی کے تحت جہاں بیشتر ممالک میں غریب، مستحقین اور حاجت مندوں کی داد رسی کیلئے راشن اور نقد رقوم کی تقسیم کا سلسلہ جاری ہے وہاں نیپال کے شہر نیپال گنج میں بھی متاثرین میں راشن کی تقسیم کا سلسلہ جاری ہے۔ اس سلسلے میں دعوت اسلامی کے مدنی مرکزفیضان مدینہ نیپال گنج میں باقاعدہ راشن کے تھیلے بنائے گئے اور مستحق افراد تک پہنچائے گئے۔

دعوتِ اسلامی کے زیر اہتمام26 مارچ2020ء بروز جمعرات ہفتہ وار سنتوں بھرا  اجتماع بذریعہ مدنی چینل نشر کیا گیا ۔ اس اجتماع پاک میں امیر اہل سنت مولانا محمد الیاس عطار قادری دَامَتْ بَرَکَاتُہُمُ الْعَالِیَہ نے سنتوں بھرا بیان فرمایا۔ ملک بھر میں یہ اجتماع مدنی چینل کے ذریعے براہِ راست دیکھا گیا۔

بیان کے اختتام پر ذکر اللہ اور دعا کا سلسلہ ہوا جس میں امیر اہل سنت دَامَتْ بَرَکَاتُہُمُ الْعَالِیَہ نے انسانیت دشمن وائرس ’’ کرونا ‘‘ سے حفاظت کےلیے خصوصی دعافرمائی۔

دعوت اسلامی کے زیر اہتمام 22 مارچ 2020ء کو پاکستانی وقت کے مطابق رات 9:30 بجے عالمی مدنی مرکز فیضان مدینہ کراچی میں محفلِ نعت بسلسلۂ معراج شریف(مدنی مذاکرہ) کا انعقاد ہوگا جسے بذریعۂ مدنی چینل اور سوشل میڈیا دنیا بھر میں براہ راست نشر کیا جائیگا۔

تفصیلات کے مطابق اس اجتماع میں عالمی مذہبی اسکالر علامہ محمد الیاس عطار قادری دَامَتْ بَرَکَاتُہُمُ الْعَالِیَہ خصوصی طور پر شریک ہونگے اور مدنی مذاکرہ فرمائیں گے۔ 15مارچ 2020ء کی شب مدنی چینل پر ہونے والی دعائیہ تقریب میں امیر اہل سنت دَامَتْ بَرَکَاتُہُمُ الْعَالِیَہ نے اجتماع پاک کے حوالے سے اسلامی بھائیوں کو تنبیہ کرتے ہوئے کہا کہ تمام اسلامی بھائی محفلِ نعت میں بذریعۂ مدنی چینل اپنے گھروں پر شرکت کریں ۔

دعوتِ اسلامی کے زیر اہتمام ہفتہ وار سنتوں بھرا  اجتماع بذریعہ مدنی چینل نشر کیا گیا ۔ اس اجتماع میں امیر اہل سنت مولانا محمد الیاس عطار قادری دَامَتْ بَرَکَاتُہُمُ الْعَالِیَہ نے سنتوں بھرا بیان فرمایا۔ ملک بھر میں یہ اجتماع مدنی چینل کے ذریعے براہِ راست دیکھا گیا۔ امیر اہل سنت دَامَتْ بَرَکَاتُہُمُ الْعَالِیَہ نے موت کی تیاری کے حوالے بیان کرتے ہوئے فرمایا کہ ’’ قبر وحشر کا معاملہ نہایت ہولناک ہےمگر اس سے قبل موت کا معاملہ بھی انتہائی کربناک ہے۔ آہ! ہمارا ہر سانس موت کی طرف گویا ایک قدم اور ہمارے شب و روز موت کی جانب گویا ایک ایک میل ہیں، ایک ایک کلو میٹر ہیں چاہے کوئی زندگی کی کتنی ہی بہاریں لوٹنے میں کامیاب ہو بھی جائے مگر اسے موت کی خزاں سے دوچار ہونا ہی پڑے گا ، کوئی چاہے کتنا ہی عیش و عشرت کی زندگی گزارے مگر موت تمام تر لذتوں کو ختم کرکے ہی رہے گی، کوئی خواہ کتنا ہی اہل و عیال اور دوست و احباب کی رونقوں میں دلشاد ہولے مگر موت اسے جدائی کاغم دے کر رہے گی، آہ کتنے مغرور آبرودار موت کے ہاتھوں ذلیل و خوار ہوگئے ، نہ جانے کتنے ظالم حکمرانوں کو موت نے ان کے بلند محلات سے نکال کر قبر کی کال کوٹھڑی میں ڈال دیا ، نہ جانے کیسے کیسے افسروں کو موت نے کوٹھیوں کی وسعتوں سے اٹھا کر قبر کی تنگیوں میں پہنچا دیا ، کتنے ہی وزیروں کو بنگلے کی چٹا چونگ روشنیوں سے قبر کی تاریکیوں میں منتقل کردیا، آہ موت ہی کے سبب بہت سارے دولہے مچلتے ارمانوں کے ساتھ آراستہ و پیراستہ حجالۂ عروسی میں داخل ہونے کے بجائے کیڑے مکوڑوں سے ابھرتی تنگ و تاریک قبروں میں چلے گئے نہ جانے کتنے ہی نوجوان شادی کی مسرتوں کے ذریعے اپنی جوانی کی بہاریں دیکھنے سے قبل ہی موت کا شکار ہوکر وحشتناک قبروں میں جاپہنچے۔

عالمی مدنی مرکزفیضان مدینہ کراچی  میں 06 تا 13 مارچ 2020 دعوتِ اسلامی کے زیر اہتمام چلنے والے دارالمدینہ اسکولنگ سسٹم کراچی ریجن کے ٹیچرز کے لیے ’’فیضانِ نماز کورس‘‘ اور ’’ 12 مدنی کام کورس‘‘ کا انعقاد کیا گیا۔ مدنی کام کورس کے دوران دار الافتاء اہل سنّت کے مفتیانِ کرام اور دعوتِ اسلامی کی مجلسِ شوریٰ کے اراکین نے مختلف اوقات میں ٹیچرز اسلامی بھائیوں کی تربیت فرمائی۔

کورس کے اختتامی سیشن میں رکنِ شوریٰ حاجی محمداطہر عطاری نے سنتوں بھرا بیان فرماتے ہوئے ٹیچرز اسلامی بھائیوں کو دعوتِ اسلامی کے 12 مدنی کاموں میں بھرپور شرکت کرنے اور شعبہ تعلیم سے وابستہ دیگر افراد کو بھی اس کی ترغیب دلانے کا ذہن دیا۔

دعوت اسلامی کے مدنی مرکزفیضان مدینہ سیکٹر جی الیون اسلام آباد میں  شیخ الحدیث و دارالعلوم انوار رضا راولپنڈی کے مہتمم مولانا محمد سلیمان رضوی مدظلہ العالی، خطیب مرکزی جامع مسجد حنفیہ غوثیہ مولانا قاری صلاح الدین، ناظم اعلیٰ جامعہ انوار رضا مولانا قاری الطاف قریشی کی تشریف آوری ہوئی۔

پنجاب کے شہر ملتان میں قائم دعوت اسلامی کے مدنی مرکزفیضان مدینہ میں اسسٹنٹ ایڈووکیٹ جنرل پنجاب چوہدری ذوالفقار علی سدھو اور سابق صدر ڈسٹرکٹ بار اللہ دتہ کاشف بوسن کی آمد ہوئی۔

نگران کابینہ، مجلس نشرواشاعت اور مجلس رابطہ باالعلماء کے ذمہ داران نے ان کو خوش آمدید کہا اور رکن شوریٰ قاری محمد سلیم عطاری سے ان شخصیات کی ملاقات کروائی۔

رکن شوریٰ نے فیضان مدینہ میں قائم دفاتر اور مختلف شعبہ جات کا تعارف پیش کیا اور انہیں دنیا بھر میں دین اسلام کی ترویج کے لئے ہونے والے دعوت اسلامی کے مدنی کاموں کے حوالے سے بتایاجس پر ان شخصیات نے دعوت اسلامی کی اشاعت دین کی کاوشوں کو سراہا۔