دعوتِ اسلامی کے شعبہ سینٹرل H.R کے (TAD) ڈیپارٹمنٹ کے زیرِ اہتمام عالمی مدنی مرکز فیضانِ مدینہ کراچی میں ایک دن کا ” Walk-in job interviews “ کا سلسلہ منعقد ہوا جس کا مقصد مستحق اور باصلاحیت نوجوانوں کو روزگار کے بہترین مواقع فراہم کرنا تھا۔

پروگرام کی تفصیلات:

مرکزی مجلسِ شوریٰ کی زیرِ نگرانی H.R ڈیپارٹمنٹ نے مختلف شعبہ جات میں خالی اسامیوں کو پُر کرنے کے لیے اس سیشن کا اہتمام کیا۔ انٹرویوز میں کراچی بھر سے کثیر تعداد میں تعلیم یافتہ اور ہنرمند عاشقانِ رسول نے شرکت کی۔ امیدواروں کے جوش و خروش کا یہ عالم تھا کہ فیضانِ مدینہ میں صبح سے ہی نوجوانوں کی بڑی تعداد اپنی اسناد (Documents) کے ساتھ موجود تھی۔

خصوصی بیان:

رکن شوریٰ حاجی محمد امین عطاری نے سامعین کے درمیان سنتوں بھرا بیان کیا اور شرکا کو دعوتِ اسلامی کے دینی ماحول سے وابستہ رہنےاور ہر دم دین اسلام کی خدمت کرنے کا ذہن دیا جس پر انٹرویوز کے لئے آنے والے اسلامی بھائیوں نے اپنی اپنی نیتوں کا اظہار کیا۔

نظم و ضبط اور انتظام:

H.R ڈیپارٹمنٹ کے ماہرین پر مشتمل پینل نے امیدواروں کے انٹرویوز لئے اور ان کی تعلیمی و تکنیکی صلاحیتوں کا جائزہ لیا۔

انٹرویوز کے دوران نہ صرف پیشہ ورانہ مہارتوں کو دیکھا گیا بلکہ دعوتِ اسلامی کے دینی ماحول کے مطابق اخلاقی اور تنظیمی ضوابط کی آگاہی بھی دی گئی۔

فیضانِ مدینہ کے اسٹاف کی جانب سے آنے والے امیدواروں کے لئے بیٹھنے اور دیگر ضروری سہولیات کا بہترین انتظام کیا گیا تھا تاکہ نظم و ضبط برقرار رہے۔

مقصد اور پیغام:

اس اقدام کا بنیادی مقصد معاشرے میں بے روزگاری کے خاتمے کے لئے عملی کوششیں کرنا اور نوجوانوں کو ایسے پلیٹ فارم پر اکٹھا کرنا ہے جہاں وہ رزقِ حلال کے ساتھ ساتھ دینِ متین کی خدمت کے ماحول سے بھی وابستہ رہ سکیں۔

دعوتِ اسلامی کے مدنی مرکز فیضانِ مدینہ فیصل آباد میں شعبہ ”رابطہ برائے تاجران“کے زیرِ اہتمام ایک دن کا ”فیضانِ نماز کورس“کا انعقاد کیا گیا جس میں نگرانِ پاکستان مشاورت حاجی محمد شاہد عطاری نے خصوصی شرکت کی اور شرکاء کو نماز کے احکامات سکھائے۔

اس کورس میں شعبہ رابطہ برائے تاجران کے نگرانِ مجلس فہیم عطاری مدنی، دیگر ذمہ داران اور تاجر برادری نے شرکت کی۔ نگرانِ پاکستان مشاورت نے کورس کے دوران نہایت سہل انداز میں درج ذیل موضوعات پر روشنی ڈالی:

٭نماز کے فرائض و واجبات کی درست ادائیگی ٭نماز کے مستحبات اور مکروہات کی پہچان ٭ نماز کا عملی اور درست طریقہ

کورس کے اختتام پر نگرانِ پاکستان مشاورت نے شرکا کو قیمتی مدنی پھولوں سے نوازتے ہوئے اس بات پر زور دیا کہ تجارت کے ساتھ ساتھ دینی احکامات سیکھنا ہر مسلمان کے لئے ضروری ہے۔ انہوں نے تاجروں کو دعوتِ اسلامی کے 80 سے زائد شعبہ جات میں ہونے والے دینی کاموں میں عملی طور پر حصہ لینے اور اپنے مال و وقت کے ذریعے دین کی خدمت کرنے کی ترغیب دلائی۔

پروگرام کے آخر میں نگرانِ پاکستان نے دعا فرمائی اور کورس میں شریک اسلامی بھائیوں سے فرداً فرداً ملاقات بھی کی۔ تاجر برادری نے دعوتِ اسلامی کی اس کاوش کو سراہتے ہوئے عزم کیا کہ وہ اپنی زندگیوں کو سنتوں کے مطابق ڈھالنے کی بھرپور کوشش کریں گے۔

دعوتِ اسلامی کی دینی و فلاحی ایکٹیویٹیز کا جائزہ لینے اور اُن میں مزید بہتری لانے کے لئے مدنی مرکز فیضانِ مدینہ فیصل آباد میں 12اپریل 2026ء کو ایک میٹنگ ہوئی جس میں مختلف شہروں سے میٹروپولیٹن نگران اور  ذمہ داران نے شرکت کی۔

اس موقع پر رکنِ شوریٰ حاجی اسلم عطاری، حاجی مولانا عمر عطاری مدنی، مولاناحافظ عبد الرؤف عطاری مدنی ( بہاولپور سٹی)، سادات عطاری (ملتان سٹی)، محمد عادل عطاری (سرگودھاسٹی)، مظہر عطاری مدنی (فیصل آباد سٹی)، محمد یعقوب عطاری (گوجر انوالہ سنی)، حاجی فاروق عطاری (سیالکوٹ سٹی)، عمر عطاری مدنی (گجرات سٹی) اور حاجی حماد عطاری (راولپنڈی سٹی) موجوود تھے۔

مدنی مشورے کے اہم پوائنٹس میں مختلف دینی کاموں (جیسے اصلاحِ اعمال، قافلہ، مدرسۃ المدینہ بالغان، مدنی کورسز) کی دسمبر 2025ء تا فروری 2026ء تک کی اوسطاً کارکردگی، موجودہ تقرری، رمضان عطیات، اعتکاف کارکردگی اور ماہانہ خود کفالت شامل تھے۔

12 اپریل 2026ءکو  دعوتِ اسلامی کے شعبہ حج و عمرہ کے زیرِ اہتمام عالمی مدنی مرکز فیضانِ مدینہ (پرانی سبزی منڈی کراچی) میں ایک عظیم الشان تربیتی اجتماع منعقد ہوا۔ اس اجتماع کا بنیادی مقصد رواں سال حج کی سعادت حاصل کرنے والے خوش نصیب عازمین کو مناسکِ حج کی درست ادائیگی اور اس سفرِ مبارک کے آداب سے آگاہ کرنا تھا۔

اجتماع میں اس سال حج پر جانے والے عازمین کی بڑی تعداد نے شرکت کی۔ اس کے علاوہ معاون نگرانِ مجلس پاکستان، شعبہ حج و عمرہ کے ذمہ داران اور کثیر تعداد میں عاشقانِ رسول بھی موجود تھے۔

دعوتِ اسلامی کی مرکزی مجلسِ شوریٰ کے رکن، حاجی سید ابراہیم عطاری نے ”حج کی اہمیت اور اس کی ادائیگی“ کے موضوع پر سنتوں بھرا بیان کیا۔ انہوں نے عازمین کو تاکید کرتے ہوئے کہاکہ حج کی ادائیگی کا مقصد محض دنیاوی شہرت یا ’حاجی‘ کہلوانا نہیں ہونا چاہیے بلکہ یہ عظیم عبادت صرف اور صرف اللہ پاک کی رضا اور خوشنودی کے لئے ہونی چاہیے۔ رکنِ شوریٰ نے دورانِ بیان عازمین کو حج کے دوران پیش آنے والے مختلف مسائل اور ان کے شرعی حل کے حوالے سے کئی اہم نکات پر رہنمائی بھی فراہم کی۔

رقت آمیز مناظر اور نعتیہ کلام

اجتماع کے دوران نعت خواں اسلامی بھائیوں نے اپنی خوبصورت آواز میں ہدیہ نعت اور حج و مدینہ کی یاد میں کلام پیش کئے جس سے پُرکیف سماں بندھ گیا اور کئی شرکاکی آنکھیں اشکبار ہو گئیں۔

دعوتِ اسلامی کے تحت مدنی مرکز فیضانِ مدینہ فیصل آباد میں 1 اپریل  2026ء کو پاکستان مشاورت آفس کے اراکین و ذمہ داران کی ایک میٹنگ منعقد ہوئی جس میں المدینۃالعلمیہ کے اسلامی بھائی، فیضانِ مدینہ فیصل آباد کے ناظمین، شعبہ ذمہ داران اور سیکیورٹی ڈیپارٹمنٹ کے ذمہ داران شریک ہوئے۔

اس میٹنگ میں مرکزی مجلسِ شوریٰ کے رکن و نگرانِ پاکستان مشاورت حاجی محمد شاہد عطاری نے تمام اسلامی بھائیوں کی اخلاقی و روحانی اعتبار سے تربیت کی اور انہیں حضور صلَّی اللہ علیہ واٰلہٖ وسلَّم کی صحابۂ کرام کو کی گئیں نصیحتوں کے بارے میں بتایا۔

نگرانِ پاکستان مشاورت نے حاضرین کو اُن نصیحتوں پر عمل کرنے، اپنی آخرت کی تیاری کرنے اور پیارے آقا مکی مدنی مصطفیٰ صلَّی اللہ علیہ واٰلہٖ وسلَّم کی سنتوں پر عمل کرنے کا ذہن دیا۔

اس کے علاوہ نگرانِ پاکستان مشاورت نے تمام اسلامی بھائیوں کو دعوتِ اسلامی کے دینی کاموں میں حصہ لیتے رہنے بالخصوص قافلے میں شرکت کرنے اور ماہِ اپریل ماہِ اجتماع منانے کی ترغیب دلائی جس پر انہوں نے اچھی اچھی نیتیں کیں۔(رپورٹ:عبدالخالق عطاری نیوز فالو اپ ذمہ دار نگرانِ پاکستان مشاورت، کانٹینٹ:غیاث الدین عطاری)

دعوتِ اسلامی کے مدنی مرکز فیضانِ مدینہ فیصل آباد، پنجاب میں 21 تا 27 مارچ 2026ء کو ”تصوف کورس“ کا اہتمام کیا گیا جس میں مختلف شعبہ ہائے زندگی سے تعلق رکھنے والے کثیر اسلامی بھائیوں نے شرکت کی۔

تفصیلی معلومات کے مطابق یہ کورس مختلف سیشنز میں مشتمل تھا جن میں رکنِ مرکزی مجلسِ شوریٰ و نگرانِ پاکستان مشاورت حاجی محمد شاہد عطاری اور دیگر مبلغین نے شرکا کی رہنمائی کرتے ہوئے انہیں کورس کروایا۔

کورس کے اختتام پر وہاں موجود تمام اسلامی بھائیوں کا ٹیسٹ لیا گیا اور نمایاں کارکردگی پر انہیں تحائف بھی پیش کئے گئے جبکہ نگرانِ پاکستان مشاورت نے اسلامی بھائیوں کے سروں پر عمامہ شریف باندھا۔(رپورٹ: ‫عبدالخالق عطاری ، نیوز فالواپ ذمہ دار ، کانٹینٹ:غیاث الدین عطاری)

7 مارچ 2026ء بمطابق 17 رمضانُ المبارک 1447ھ کو دعوتِ اسلامی کے مدنی مرکز فیضانِ مدینہ جوہر ٹاؤن لاہور میں ہونے والے ”افطار اجتماع“ میں وزیرِ تعلیم رانا سکندر حیات نے اپنے وفد کے ہمراہ شرکت کی۔

اس دوران وزیرِ تعلیم رانا سکندر حیات کو وہاں موجود ذمہ دار اسلامی بھائیوں نے مختلف ڈیپارٹمنٹس کا وزٹ کروایا جس پر انہوں نے دعوتِ اسلامی کی خدماتِ دین کو سراہا اور خوشی کا اظہار کیا۔

اس موقع پر وزیرِ تعلیم رانا سکندر حیات کی ملاقات مرکزی مجلسِ شوریٰ کے رکن حاجی یعفور رضا عطاری سے ہوئی جس میں انہوں نے دعوتِ اسلامی کی دینی و سماجی خدمات کے حوالے سے مشاورت کی۔(رپورٹ:رابطہ برائے ایگریکلچر اینڈ لائیواسٹاک ڈیپارٹمنٹ، کانٹینٹ:غیاث الدین عطاری)

دعوتِ اسلامی کے تحت فیصل آباد، پنجاب میں موجودمدنی مرکز فیضانِ مدینہ میں 22، 23 اور 24 دسمبر 2025ء کو 3 دن کا ”تربیتِ اولاد کورس“ ہوا جس میں شعبہ محبتیں بڑھاؤ کے ذمہ داران اور اس سے وابستہ عاشقانِ رسول نے شرکت کی۔

تفصیلات کے مطابق یہ 3 دن کا کورس مختلف سیشنز پر مشتمل تھا جن میں مرکزی مجلسِ شوریٰ کے رکن و نگرانِ پاکستان مشاورت حاجی محمد شاہد عطاری نے شرکا کی رہنمائی کرتے ہوئے مختلف امور پر اُن کی تربیت کی جن میں سے بعض درج ذیل ہیں:

٭والدین کے حقوق اولاد پر اور اولاد کے حقوق والدین پر کیا ہیں؟٭تربیتِ اولاد کے بارے میں اسلام کی تعلیمات کیا ہیں؟۔

کورس میں شریک اسلامی بھائیوں نے مذکورہ موضوعات سے متعلق سوالات کئے جس کے نگرانِ پاکستان مشاورت نے جوابات دیئے جبکہ اسلامی بھائیوں کا ٹیسٹ بھی لیا گیا اور نمایاں کارکردگی پر اُن کے درمیان تحائف تقسیم ہوئے ۔ (رپورٹ:عبدالخالق عطاری نیوز فالو اپ ذمہ دار نگرانِ پاکستان مشاورت، کانٹینٹ:غیاث الدین عطاری)

دعوتِ اسلامی کے ذمہ داران کی تنظیمی  طریقۂ کار کے متعلق رہنمائی کرنے کے لئے 12، 13 اور 14 دسمبر 2025ء کو مدنی مرکز فیضانِ مدینہ فیصل آباد میں 3 دن کا ”تحصیل نگران کورس“ منعقد کیا گیا جس میں صوبہ پنجاب کے تحصیل نگران و ٹاؤن نگران اسلامی بھائیوں نے شرکت کی۔

اس 3 دن کے کورس میں مختلف سیشنز ہوئے جن میں مرکزی مجلسِ شوریٰ کے رکن و نگرانِ پاکستان مشاورت حاجی محمد شاہد عطاری نے مختلف موضوعات پر ذمہ داران کی تربیت کی۔

موضوعات کی تفصیل:

٭ تحصیل نگران اور 12 دینی کام٭ تحصیل نگران اور تنظیمی ذمہ داریاں٭ نگران بننے کی برکتیں اور تقاضے٭ شعبہ جات کے ذریعے کیسے 12 دینی کاموں کو مضبوط کرنا ہے؟٭ مالِ وقف کے احکام٭ خود کفالت کی اہمیت و طریقۂ کار ۔

13 نومبر 2025ء کو فیصل آباد میں دعوتِ اسلامی کی مرکزی مجلسِ شوریٰ کے رکن اور کنزالمدارس بورڈ کے صدر مولانا حاجی جنید عطاری مدنی کی نگرانی میں کنزالمدارس بورڈ کے مختلف شعبہ جات کے ذمہ داران کا ایک اہم میٹنگ منعقد ہوئی جس میں مرکزی مجلسِ شوریٰ دعوتِ اسلامی کے نگران مولانا حاجی عمران عطاری مُدَّ ظِلُّہُ العالی نے خصوصی شرکت کی۔

میٹنگ میں دوران مولانا حاجی عمران عطاری نے کنزالمدارس کی تعلیمی سمت کو مزید مضبوط بنانے کے حوالے سے نہایت بصیرت افروز نکات اور قیمتی رہنمائی فرمائی۔ انہوں نے ذمہ داران کو دعوتِ اسلامی کے ویژن کو پیشِ نظر رکھتے ہوئے نئے جذبے، یکسوئی اور محنت کے ساتھ کام جاری رکھنے کی ترغیب دلائی۔

یہ میٹنگ اسلامی تعلیمی معیار کو مزید بہتر بنانے اور کنزالمدارس بورڈکے روشن تعلیمی مستقبل کی تشکیل کی جانب ایک اہم قدم ثابت ہوگی۔

اس میٹنگ میں نگران پاکستان مشاورت حاجی محمد شاہد عطاری، اراکین شوریٰ حاجی رفیع عطاری، حاجی محمد اسلم عطاری بھی موجود تھے۔

دعوتِ اسلامی کے شعبہ جامعۃ المدینہ بوائز پاکستان کے زیر اہتمام 05 نومبر 2025ء کو عالمی مدنی مرکز فیضانِ مدینہ کراچی میں سنتوں بھرے اجتماع کا انعقاد ہوا جس میں کراچی میں قائم جامعات المدینہ بوائز کے طلبائے کرام، اساتذۂ کرام اور ناظمین شریک ہوئے جبکہ ملک کے دیگر شہروں اور مختلف ممالک میں قائم جامعات المدینہ بوائز/گرلز کے اسٹوڈنٹس نے بذریعہ مدنی چینل شرکت کی۔

دعوتِ اسلامی کی مرکزی مجلس شوریٰ کے نگران مولانا حاجی محمد عمران عطاری مُدَّ ظِلُّہُ العالی نے سنتوں بھرا بیان کیا اور طلبہ/طالبات کے درمیان علم دین کی فضیلت بیان کرتے ہوئے کہاکہ دین کا علم انسان کو اللہ پاک کی معرفت، صحیح زندگی گزارنے کا طریقہ اور نیکی کی طرف رہنمائی فراہم کرتا ہے جبکہ تکبر انسان کو حق سے دورکرتا اور ریا کاری اعمال کو برباد کردیتی ہے۔ آپ نےمزید کہا کہ نیک اعمال صرف اللہ پاک کی رضا کے لئے کئے جائے، علم دین حاصل کرنے میں تکالیف و آزمائشیں آتی رہتی ہیں ہمیں صبر و تحمل سے کام لینا چاہیئے کیونکہ جب دین کا طالب علم کسی تکلیف میں مبتلا ہوتا ہے تو رب تبارک و تعالیٰ اپنے فرشتوں کے ذریعے بھی اس کی مدد فرماتا ہے۔ بیان کرتے ہوئے نگران شوریٰ نے فرمایا کہ دنیا میں اس وقت کم و بیش 08 ارب انسان موجود ہیں، ہمیں اس بات پر غور کرنا چاہیئے کہ مجھ میں ایسا کیا ہے کہ اللہ پاک نے اُن 08 ارب لوگوں میں سے مجھےعلم دین کے لئے چنا اور میں عالم دین بن رہا ہوں تو غور کرنے پر ہمیں کچھ نظر نہیں آئے گا سوائے اس کے ہم اپنے رب کا شکر ادا کریں۔فرمان رسول صلَّی اللہ علیہ واٰلہٖ وسلَّم بیان کرتے ہوئے حاجی محمد عمران عطاری نے کہا کہ ”جو علم کی تلاش میں کسی راستے پر چلتا ہےاللہ کریم اس کے لئے جنت کا راستہ آسان فرمادیتا ہے“، صحابہ کرام علیہم الرضوان علم دین کی فضیلت حاصل کرنے کےلئے ایک ایک ماہ کا سفر ایک ایک حدیث سننے کے لئے کیا کرتے تھے۔نگرانِ شوریٰ نے طلبہ کو مخاطب کرتے ہوئے کہا کہ ہمیں نہ صرف علم دین حاصل کرنا ہے بلکہ اپنے اعمال کو بھی بڑھانا ہے، فرائض و واجبات کو پابندی کے ساتھ ادا کرنا ہے اور نوافل کے ذریعے اپنی نیکیوں میں بھی اضافہ کرنا ہے۔

اجتماع کے اختتام دعائے خیر کی گئی اور صلوۃ و سلام بھی پڑھا گیا۔

18 اکتوبر 2025ء کو دعوتِ اسلامی کے تحت فیصل آباد، پنجاب میں واقع مدنی مرکز فیضانِ مدینہ میں ایک ٹریننگ سیشن کا انعقاد کیا گیا جس میں تخصص  فی الدعویٰ کے طلبۂ کرام نے شرکت کی۔

سیشن کا آغاز تلاوتِ قراٰن و نعتِ رسولِ مقبول صلَّی اللہ علیہ واٰلہٖ وسلَّم سے کیا گیا جس کے بعد رکنِ مرکزی مجلسِ شوریٰ و نگرانِ پاکستان مشاورت حاجی محمد شاہد عطاری نے مختلف اصلاحی و تنظیمی موضوعات پر طلبۂ کرام کی رہنمائی کی۔

موضوعات کی تفصیل:

٭تنظیم پر اعتماد اور ماتحت کی تربیت کا عمل٭نئے علاقوں میں ہفتہ وار اجتماعات کے آغاز اور استقامت کی حکمتِ عملی٭دلوں میں جگہ بنانے اور افراد کو ذمہ دار بنانے کے مؤثر طریقے٭محبت ، دلجوئی، نفسیاتی پہچان اور خوشی و غمی میں شرکت٭نگران کی ذاتی و روحانی ترقی٭عبادت، شیخِ طریقت امیرِ اہلِ سنت دامت بَرَکَاتُہمُ العالیہ سے تعلق اور باطنی بیماریوں سے حفاظت٭ وقت کی قدر وسعت ، مشورہ دینے اور فالو اپ کا مؤثر انداز۔