پچھلے دنوں افریقی ملک ملاوی اور موزمبیق میں آنے والے سمندری طوفان ”فریڈی“ نے مختلف علاقوں میں تباہی مچادی۔ سمندری طوفان اور بارشوں کے باعث انتقال کرجانے والے افراد کی تعداد 200 سے تجاوز کرچکی ہے جبکہ زخمی اور بے گھر ہونے والوں کی تعداد ہزاروں کے قریب ہے۔اس طوفان اور بارشوں کی وجہ سے کئی مکانات تباہ ہوئے تو کئی دیواریں گرگئیں اور کچھ گھروں کی چھتیں بھی اُڑگئیں۔

ہنگامی اقدام کرتے ہوئے دعوت اسلامی کا شعبہ FGRFکے تحت نگران ملاوی کابینہ مولانا محمد عثمان عطاری اور دیگر ذمہ داران نے متاثرہ علاقوں کا دورہ کیا اور امدادی کام کرنے کے لئے حالات کا جائزہ لیا۔

حالات کا جائزہ لینے کے بعد FGRF کے ذمہ داران نے متأثرہ علاقوں میں امدادی کاموں کا آغاز کردیاجہاں متأثرین میں اشیائے خوردونوش، خشک راشن سمیت استعمال و ضرورت کی اشیاء، پلاسٹک شیٹ اور دیگر چیزوں کی تقسیم کا سلسلہ رہا۔ان امدادی کاموں میں نگران ملاوی کابینہ مولانا محمد عثمان عطاری مدنی، FGRF کے ذمہ داران اور پرائیویٹ ایسوسی ایشن کے عہدیداران نے حصہ لیا۔

اس موقع پر ذمہ داران دعوت اسلامی مقامی افراد میں نیکی کی دعوت بھی دیتے رہے جس کی بدولت قبولِ اسلام کی بہاریں بھی دیکھنے آئی اور کچھ غیر مسلموں نے اسلام قبول کرلیا۔ نگران ملاوی کابینہ مولانا محمد عثمان عطاری مدنی نے غیر مسلموں کو کلمہ طیبہ پڑھاکر دائرہ اسلام میں داخل کرلیااور ان کے اسلامی نام بھی رکھے۔

16 مارچ 2023ء کوریا میں مبلغ دعوت اسلامی ڈاکٹر سہیل عطاری نے افریقی ملک روانڈا (Rwanda) سے تعلق رکھنے والے ایک غیر مسلم شخص پر انفرادی کوشش کی جس کے نتیجے میں اس شخص نے اسلام کی دعوت سے متاثر ہوکر اسلام قبول کرلیا۔

ایسٹ ریجن مشاورت کے رکن مولانا فراز عطاری مدنی نے جنوبی کوریا کے شہر انچون (Inchon) میں قائم مدنی مرکز فیضان مدینہ میں انہیں کلمہ طیبہ پڑھاتے ہوئے دائرہ اسلام میں داخل کرلیا ۔ نیو مسلم شخص کا اسلامی نام ”سلیمان“ رکھا گیا۔

دعوتِ اسلامی کے شعبہ بیرون ملک ائمہ مساجد کا  فیضانِ مدینہ کراچی سے بذریعہ انٹر نیٹ مدنی مشورے کا انعقاد ہوا جس میں ساؤتھ افریقہ کے ائمہ کرام نے شرکت کی۔

مدنی مشورے میں رکن شوریٰ حاجی محمد عقیل عطاری مدنی نے ائمہ کے درمیان امام صاحبان کی ذمہ داری کے حوالے سے مدنی پھول دیئےاور’’اعتکاف ا ور رمضان ڈونیشن‘‘ کے حوالے سے اسلامی بھائیوں کی تربیت کی جس کا مقصد اعتکاف کے انتظامی معاملات میں گزشتہ سالوں کے مقابلہ میں مزید بہتری لانا اور ڈونیشن میں اضافہ تھا۔

بعدازاں رکنِ شوریٰ نے مدنی عطیات و اعتکاف کے حوالے سے ذہن سازی کی جس پر اسلامی بھائیوں نے اچھی اچھی نیتیں کیں۔واضح رہےکہ! اس مشورے کو مقامی امام صاحبان کے لئے انگلش زبان میں ٹرانسلیٹ بھی کیا گیا۔( رپورٹ: شعبان مدنی ، کانٹینٹ:رمضان رضا عطاری)

11 مارچ 2023ء بروز ہفتہ برمنگھم یوکے میں FGRF دعوتِ اسلامی اور برمنگھم ٹری پیپلز (Birmingham Tree people) کے رضا کاروں کی مشترکہ کاوش سے شجرکاری مہم کا انعقاد کیا گیا۔

اس موقع پر نگرانِ ویلز UK سیّد فضیل رضا عطاری نے برمنگھم UK کے دیگر ذمہ دار اسلامی بھائیوں کے ہمراہ کم و بیش 500 پودے لگائے اور دعوتِ اسلامی کے دینی کاموں میں ترقی کے لئے دعائے خیر کروائی۔(کانٹینٹ:غیاث الدین عطاری) 

دنیا بھر کے لوگوں کی دینی و اخلاقی تربیت کرنے والی عاشقانِ رسول کی دینی تحریک دعوتِ اسلامی کے ایجوکیشن ڈیپارٹمنٹ کے تحت  کیلیفورنیا (ساکرامنٹو) میں رمضانُ المبارکی اہمیت پر نوجوانوں کے لئے سیمینار کا انعقاد کیا گیا۔

11 مارچ 2023ء کو بنگلہ دیش کے شہر محمد پور ڈھاکہ کے مقامی ہال میں جامعۃ المدینہ انٹرنیشنل افیئرز کے تحت عظیم الشان اجتماع دستار فضیلت  کا انعقاد کیا گیا جس میں علمائے کرام، جامعۃ المدینہ کے اساتذہ و طلبائے کرام، مختلف شعبہ ہائے زندگی سے وابستہ افراد و عاشقان رسول سمیت ذمہ داران دعوت اسلامی کی شرکت ہوئی۔

اجتماع کا آغاز تلاوت قرآن و نعت مقبول رسول صلَّی اللہ علیہ واٰلہٖ وسلَّم سے کیا گیا جبکہ جامعۃ المدینہ کے فارغ التحصیل مبلغین دعوت اسلامی نے عربی اور بنگلہ زبان میں سنتوں بھرا بیان کیا۔ اجتماع میں علمائے کرام اور عاشقان رسول کی جانشین امیر اہلسنت دامت بَرَکَاتُہمُ العالیہ کے ہمراہ لائیو Live مدنی چینل پر شیخ طریقت امیر اہلسنت علامہ محمد الیاس عطار قادری دامت بَرَکَاتُہمُ العالیہ کے مدنی مذاکرے میں شرکت کی۔

مدنی مذاکرے کے بعد پھر وہ روح پرور لمحہ بھی آیا کہ جامعۃ المدینہ سے اس سال فارغ التحصیل ہونے والے مدنی علمائے کرام کی خلیفہ امیر اہلسنت مولانا حاجی عبید رضا عطاری مدنی مُدَّ ظِلُّہُ العالی نے دستار بندی فرمائی۔ آخر میں جانشین امیر اہلسنت نے دعا کروائی اور صلوٰۃ و سلام پر اجتماع کا اختتام ہوا۔

10 مارچ 2023ء کو بنگلہ دیش کے شہر راج شاہی کے مقامی پارک میں عظیم الشان سنتوں بھرے اجتماع کا انعقاد کیا گیا جس میں مختلف علاقوں سے مختلف شعبہ ہائے زندگی سے وابستہ افراد و عاشقان رسول سمیت ذمہ داران دعوت اسلامی شریک ہوئے۔

اجتماع کے آغاز میں تلاوت و نعت شریف کے بعد مبلغ دعوت اسلامی نے بنگلہ زبان میں سنتوں بھرا بیان کیا جبکہ سفر بنگلہ دیش پر موجود خلیفہ امیر اہلسنت مولانا حاجی عبید رضا عطاری مدنی مُدَّ ظِلُّہُ العالی نے ”تقویٰ و پرہیزگاری“ کے موضوع پر بیان کیااور اسلامی بھائیوں کو مدنی پھولوں سے نوازتے ہوئے بتایا کہ دنیا میں عزت، مقام و مرتبہ، ترقی اورکامیابی اُسے ملتی ہے جو زیادہ محنت کرتا ہے جبکہ آخرت میں بلند درجات، زیادہ عزت، زیادہ مقام و مرتبہ اُسے ملے گا جو زیادہ تقوے والا ہوگا۔

سنتوں بھرے اجتماع کا اختتام صلوٰۃ و سلام پر ہوا جبکہ عاشقان رسول نے جانشین امیر اہلسنت سے ملاقات بھی کی۔

9 مارچ 2023ء کو بنگلہ دیش نارائن گنج کے علاقے کاشی پور کی جامع مسجد عید گاہ میں دعوت اسلامی کے زیر اہتمام ہفتہ وار سنتوں بھرے اجتماع کا انعقاد کیا گیا جس میں مختلف شعبہ ہائے زندگی سے وابستہ کاروباری اور عاشقان رسول سمیت ذمہ داران دعوت اسلامی نے شرکت کی۔

خلیفہ امیر اہلسنت مولانا حاجی عبید رضا عطاری مدنی مُدَّ ظِلُّہُ العالی نے سنتوں بھرا بیان کیا اور شرکا کو نیک اعمال بجالانے، نمازوں کی پابندی کرنے، ماہ رمضان کے روزے رکھنے اور جن کی نمازیں اور روزے رہتے ہیں انہیں ان کی قضا کرنے کا ذہن دیا نیز دوران بیان خلیفہ امیر اہلسنت نے کلام بھی پڑھا۔ مبلغ دعوت اسلامی نے بنگلہ زبان میں جانشین امیر اہلسنت کے بیان کی ترجمانی بھی کی۔ اجتماع میں ذکر و اذکار کا سلسلہ ہوا جبکہ نگران بنگلہ دیش مشاورت مبین عطاری نےدعا کروائی۔

8 مارچ 2023ء کو خلیفہ امیر اہلسنت مولانا حاجی عبید رضا عطاری مدنی مُدَّ ظِلُّہُ العالی اپنے سفر بنگلہ دیش کے دوران چٹاگانگ کی جامع مسجد اکبر شاہ پہنچے جہاں دعائے افطار کا سلسلہ ہوا جس میں کثیر تعداد میں عاشقان رسول نے شرکت کی نیز مناجات و کلام بھی پڑھے گئے۔خلیفہ امیر اہلسنت دامت بَرَکَاتُہمُ العالیہ نےدعا کروائی۔

بعد نماز مغرب جانشین امیر اہلسنت نے سنتوں بھرا بیان کرتے ہوئے مدنی پھولوں سے نوازا۔

اسی طرح جانشین امیر اہلسنت مولانا حاجی عبید رضا عطاری مدنی مُدَّ ظِلُّہُ العالی نے چٹاگانگ کے علاقے آگرہ میں عاشقان رسول کے ہمراہ شب براءت کی مبارک سعاتوں میں نوافل ادا کئے اور دعا کروائی۔

8 مارچ 2023ء کو بنگلہ دیش کے شہر چٹاگانگ میں سابق میئر کی رہائش گاہ پر سنتوں بھرے اجتماع کا انعقاد کیا گیا جس میں نگران بنگلہ دیش ریجن مولانا حاجی محمد رضا عطاری اور نگران بنگلہ دیش مشاورت مبین عطاری سمیت مختلف شعبے سے وابستہ افراد و عاشقان رسول نے شرکت کی۔

سنتوں بھرے اجتماع کا آغاز تلاوت قرآن پاک و نعت رسول مقبول صلَّی اللہ علیہ واٰلہٖ وسلَّمہوا جبکہ خلیفۂ امیر اہلسنت مولانا حاجی عبید رضا عطاری مدنی مُدَّ ظِلُّہُ العالی نے سنتوں بھرا بیان کیا اور شرکا کو مدنی پھولوں سے نوازا۔

اسی طرح جانشین امیر اہلسنت دامت بَرَکَاتُہمُ العالیہ کی مختلف عاشقان رسول کے گھروں پر تشریف آوری ہوئی جہاں انہوں نے مختلف شخصیات و کاروباری حضرات سے ملاقاتیں کیں اور انہیں نیکی کی دعوت دیتے ہوئے مدنی پھول بیان کئے۔ اس موقع پر دعاؤں کا سلسلہ بھی ہوا۔

6 مارچ 2023ء کو خلیفۂ امیر اہلسنت مولانا حاجی عبید رضا عطاری مدنی مُدَّ ظِلُّہُ العالی دینی کاموں کی ترویج و اشاعت اور تنظیمی ایکٹیویز کا جائزہ لینے کے لئے پاکستان سے بنگلہ دیش کے شہر چٹاگانگ پہنچے جہاں ذمہ داران دعوت اسلامی بنگلہ دیش نے خوش آمدید کہا۔

7 مارچ 2023ء کی شب بنگلہ دیش کے شہر چٹاگانگ کے علاقےکھلشی کے مقام پر عظیم الشان سنتوں بھرے اجتماع کا انعقاد کیا گیا جس میں چٹاگانگ کے مختلف علاقوں سے مختلف شعبہ ہائے زندگی سے وابستہ افراد و عاشقان رسول اور ذمہ داران دعوت اسلامی نے شرکت کی۔

اجتماع کا باقاعدہ آغاز تلاوت قرآن پاک اور نعت رسول مقبول صلَّی اللہ علیہ واٰلہٖ وسلَّمسے ہوا، اس کے بعد مقامی مبلغین دعوت اسلامی نے بنگلہ زبان میں سنتوں بھرا بیان کیا جبکہ بنگلہ دیش کے سفر پر موجود جانشین امیر اہلسنت مولانا حاجی عبید رضا عطاری مدنی مُدَّ ظِلُّہُ العالی نے سنتوں بھرا بیان کیا اور شرکائے اجتماع کو مدنی پھولوں سے نوازتے ہوئے انہیں موت کو یاد کرنے اور رب کریم عَزَّوَجَلَّ کو راضی کرنے کی ترغیب دلائی۔

آخر میں ذکر و اذکار کا سلسلہ ہوا اور رقت انگیز دعاؤں کے ساتھ صلوۃ و سلام پڑھتے ہوئے اجتماع اپنے اختتام کو پہنچا۔