حضرت علامہ مفتی عبید اللہ جان نعیمی الازھری صاحب کو جامعۃ الازہر مصر سے کلیۃ اصولِ الدین کی قِسمُ الحدیث کے تحت علامہ ابن عساکر رحمۃُ اللہِ علیہ کے لکھے ہوئے مخطوطے ”الاِشراف علٰی معرفۃ ِالاطراف“ کی تحقیق و تخریج کرنے اور اس کے مناقشے کے بعد ممتاز کیفیت پر ایم فِل M. Phil کی سند جاری کردی گئی۔ اس کے علاوہ آپ کو افتاء کا تین سالہ نصاب مکمل کرنے پر ادارے کی جانب سے مفتی کی سند بھی دی گئی۔

جب یہ خبر رکن شوریٰ حاجی ابو ماجد محمد شاہد عطاری مدنی کے ذریعے امیر اہل سنت علامہ محمد الیاس عطار قادری دامت بَرَکَاتُہمُ العالیہکو دی گئی تو آپ نے خوشی کا اظہار فرمایا اور اپنے آڈیو پیغام کے ذریعے انہیں اور ان کے والد محترم شیخ الحدیث حضرت علامہ مفتی محمد جان نعیمی صاحب مُدَّ ظِلُّہُ العالی کو مبارکبار پیش کی اور مدنی پھول ارشاد فرماتے ہوئے ان کے حق میں دعائیں کیں۔

پیغام امیر اہلسنت!

شیخ الحدیث حضرت علامہ ومولانا مفتی محمد جان نعیمی صاحب مُدَّ ظِلُّہُ العالی کے بڑے شہزادے حضرت علامہ مفتی عبید اللہ جان نعیمی الازھری کی خدمتِ بابرکت میں السلام و علیکم ورحمۃ اللہ وبرکاتہ:

دعوت اسلامی کی مرکزی مجلس شوریٰ کے رکن حاجی ابوماجد محمد شاہد عطاری مدنی نے یہ خبرِ فرحت اثر دی کہ ماشاء اللہ الکریم آپ نے جامعۃ الازہر کے کلیۃ اصولِ الدین کی قِسمُ الحدیث کے تحت علامہ ابن عساکر رحمۃُ اللہِ علیہ کے لکھے ہوئے مخطوطے ”الاشراف علٰی معرفۃ ِ الاطراف“ کی تحقیق و تخریج کی اور جس کے مناقشے کے بعد آپ کو ممتاز درجے پر کامیاب قرار دیا گیا اور ایم فِل M. Phil کی سند بھی جاری کی گئی نیز آپ نے مصر ہی میں افتاء کا تین سالہ نصاب مکمل کرکے مفتی کی سند بھی حاصل کی۔ ماشاء اللہ، ماشاء اللہ۔۔

میں اس کامیابی پر آپ کو اور آپ جناب کے والد محترم حضرت شیخ الحدیث الحاج مفتی محمد جان نعیمی صاحب اطال اللہ عمرہ کو مبارکباد پیش کرتا ہوں اور اللہ رب العزت کے بارگاہ میں دعاگوں ہوں کہ اللہ رب العزت آپ کو مزید کامیابیاں اور ترقیاں عطا فرمائے۔ آپ پر، آپ کے خاندان اور دیگر متعلقین خصوصاً آپ کے دادا جان مفتی محمد عبد اللہ نعیمی شہید رحمۃُ اللہِ علیہ، آپ کے چچا جان حضرت علامہ مولانا مفتی غلام محمد نعیمی صاحب کا خصوصی فیضان جاری رہےاور آپ اپنے اکابرین کی علمی میراث کے حقیقی جانشین رہیں۔

اللہ پاک آپ کے علم و عمل میں خوب برکتیں دے، آپ کے ذریعے ایک عالَم علمی فیضان سے مالا مال ہو، آپ کو ، آپ کی آل اولاد کو، آباؤاجداد کو سب کو اللہ پاک بے حساب مغفرت سے مشرف فرمائے، آپ کے صدقے مجھ گناہگار کے حق میں بھی یہ دعائیں مستجاب ہو، خوب پھلے پھولیں، آباد رہیں، بار بار حج کریں، میٹھا مدینہ دیکھیں۔

وَ الشُّعَرَآءُ یَتَّبِعُهُمُ الْغَاوٗنَؕ(۲۲۴)اَلَمْ تَرَ اَنَّهُمْ فِیْ كُلِّ وَادٍ یَّهِیْمُوْنَۙ(۲۲۵)وَ اَنَّهُمْ یَقُوْلُوْنَ مَا لَا یَفْعَلُوْنَۙ(۲۲۶) اِلَّا الَّذِیْنَ اٰمَنُوْا وَ عَمِلُوا الصّٰلِحٰتِ وَ ذَكَرُوا اللّٰهَ كَثِیْرًا وَّ انْتَصَرُوْا مِنْۢ بَعْدِ مَا ظُلِمُوْاؕ-وَ سَیَعْلَمُ الَّذِیْنَ ظَلَمُوْۤا اَیَّ مُنْقَلَبٍ یَّنْقَلِبُوْنَ۠(۲۲۷)

اور شاعروں کی پیرو ی گمراہ کرتے ہیں، کیا تم نے نہ دیکھا کہ وہ ہر نالے میں سرگرداں پھرتے ہیں،اور وہ کہتے ہیں جو نہیں کرتے، مگر وہ جو ایمان لائے اور اچھے کام کئے اور بکثرت اللہ کی یاد کی اور بدلہ لیا بعد اس کے کہ اُن پر ظلم ہوا اور اب جانا چاہتے ہیں ظالم کہ کس کروٹ پر پلٹا کھائیں گے ۔ (سورۃ الشعراء، آیت 224تا 227)

٭ حضرت بریدہ رَضِیَ اللہ عَنْہُ سے روایت ہے،حضور اقدس صَلَّی اللہ عَلَیْہِ وَاٰلِہٖ وَسَلَّمَ نے ارشاد فرمایا: ’’جس نے اسلام میں فحش اور بے حیائی پر مشتمل اشعار کہے تو ا س کی زبان ناکارہ ہے۔ ( شعب الایمان ، الرابع و الثلاثون من شعب الایمان ۔۔۔ الخ ، فصل فی حفظ اللسان عن الشعر الکاذب ، ۴ / ۲۷۶ ، الحدیث: ۵۰۸۸)

٭حضور اقدس صَلَّی اللہ عَلَیْہِ وَاٰلِہٖ وَسَلَّمَ حضرت حسان رَضِیَ اللہ عَنْہُ سے فرماتے: ’’تم اللہ کے رسول کی طرف سے (کفار کی بد گوئیوں کا) جواب دو۔ (پھر دعا فرماتے) اے اللہ! عَزَّوَجَلَّ، تو حضرت حسان رَضِیَ اللہ عَنْہُ کی حضرت جبریل عَلَیْہِ السَّلَام کے ذریعے مدد فرما۔( بخاری، کتاب الادب، باب ہجاء المشرکین، ۴ / ۱۴۲، الحدیث: ۶۱۵۲)

یاد رہے کہ اشعار فی نفسہ برے نہیں کیونکہ وہ ایک کلام ہے، اگر اشعار اچھے ہیں تووہ اچھا کلا م ہے اور برے اشعار ہیں تو وہ برا کلام ہے، جیساکہ حضرت عروہ رَضِیَ اللہ عَنْہُ سے روایت ہے،رسول اکرم صَلَّی اللہ عَلَیْہِ وَاٰلِہٖ وَسَلَّمَ نے ارشاد فرمایا: ’’شعر ایک کلام ہے،اچھے اشعار اچھے کلام کی طرح ہیں اور برے اشعار برے کلام کی طرح ہیں۔ ( سنن الکبری للبیہقی،کتاب الحج،باب لایضیق علی واحد منہما ان یتکلّم بما لا یأثم فیہ الخ، ۵ / ۱۱۰، الحدیث: ۹۱۸۱)

عاشقان رسول کی رہنمائی کے لئے اس ہفتے جانشین امیر اہلسنت حاجی مولانا عبید رضا عطاری مدنی مُدَّ ظِلُّہُ العالی نے رسالہ ”امیر اہل سنت سے شاعری کے بارے میں سوال جواب“ پڑھنے/ سننے کی ترغیب دلائی ہے اور پڑھنے/ سننے والوں کو اپنی دعاؤں سے نوازا ہے۔

دعائے جانشین امیر اہلسنت

یااللہ پاک! جو کوئی 17 صفحات کا رسالہ ”امیر اہلسنت سے شاعری کے بارے میں سوال جواب“ پڑھ یا سن لے اسے فضولیات سے بچاکر اپنے اور اپنے محبوب صلَّی اللہ علیہ واٰلہٖ وسلَّم کے ذکر میں مشغول رہنے والی زبان عطا فرما۔ اٰمین بجاہ خاتم النبیین صلَّی اللہ علیہ واٰلہٖ و سلَّم

یہ رسالہ دعوتِ اسلامی کی ویب سائٹ سے ابھی مفت ڈاؤن لوڈ کیجئے

Download

رسالہ آڈیو میں سننے کے لئے کلک کریں

Audio Book

13 رجب المرجب کو اسلام کے چوتھے خلیفہ   امیر المؤمنین ، دامادِ رسول حضرت سیدنا مولا علی شیرِ خدا کرم اللہ وجہہ الکریم کا یومِ ولادت ہے۔ اسی مناسبت سے آج رات 14 فروری 2022ء ، 13 رجب المرجب 1443ھ کو ”جشن ولادت مولاعلی مشکل کشا رضی اللہُ عنہ“کے پُرمسرت موقع پر عالمی مدنی مرکز فیضان مدینہ کراچی میں سنتوں بھرے اجتماع کا انعقاد کیا جائیگا۔

اجتماع کا آغاز تلاوت قرآن مجید سے کیا جائیگا جبکہ نعت خواں اسلامی بھائی بارگاہ مصطفٰے صلَّی اللہ علیہ واٰلہٖ وسلَّم میں ہدیۂ نعت پیش کرتے ہوئے مولا علی رضی اللہُ عنہ کی شان میں منقبتیں بھی پڑھیں گے۔ دوران اجتماع مرکزی مجلس شوریٰ کے نگران حاجی مولانا محمد عمران عطاری مُدَّ ظِلُّہُ العالی ”مولانا علی کی شان“ میں سنتوں بھرا بیان فرمائیں گے۔ بیان کے بعد مدنی مذاکرے کا سلسلہ بھی ہوگا جس میں شیخ طریقت امیر اہل سنت علامہ محمد الیاس عطار قادری دامت بَرَکَاتُہمُ العالیہ سیرت مولا علی رضی اللہُ عنہ پر گفتگو فرماتے ہوئے مدنی پھول ارشاد فرمائیں گے۔

اجتماع کے آغاز میں جلوس علویہ جبکہ اختتام پر لنگر علویہ کا بھی اہتمام کیا جائیگا۔

دعوت اسلامی کے زیر اہتمام ہر ہفتے پابندی کے ساتھ اور بعض مہینوں میں ایونٹس کی مناسبت سے  6دن، 10دن، 11 اور 12 دن تک مدنی مذاکرے کا سلسلہ ہوتا ہے جس میں کثیر تعداد میں عاشقان رسول شریک ہوتے ہیں۔ ان مدنی مذاکروں میں شیخ طریقت امیر اہلسنت علامہ محمد الیاس عطار قادری دامت بَرَکَاتُہمُ العالیہشرعی، تنظیمی، اخلاقی، طبی اور معاشرتی اعتبار سے عاشقان رسول کی رہنمائی فرماتے ہیں۔

ہر ہفتے کی طرح آج بھی 12 فروری 2022ء بعد نماز عشاء عالمی مدنی مرکز فیضان مدینہ کراچی سے براہ راست مدنی چینل پر مدنی مذاکرے کا انعقاد کیا جائیگا۔ مدنی مذاکرے میں امیراہلسنت دامت بَرَکَاتُہمُ العالیہ شرعی مسائل کے حوالے سے گفتگو فرماتے ہوئے عاشقان رسول کی رہنمائی فرمائیں گے۔

تمام عاشقان رسول سے اس مدنی مذاکرے میں شرکت کرنے کی درخواست ہے۔ 

خاندان مصطفٰے صلَّی اللہ علیہ واٰلہٖ وسلَّم کے شجر کی ہر شاخ چودہویں کے چاند کی طرح چمکتا دمکتا اور تاریک ظلمت میں آفتاب کی طرح روشن ہے۔ ان میں سے ایک بہت بڑا نام شہید کرب و بلا، راکن دوشِ مصطفٰے، امام عرش مقام، امامِ ہمام، صحابی ابن صحابی، حضرت امام حسین رضی اللہُ عنہ کے پڑپوتے، عظیم تابعی بزرگ حضرت امام جعفر صادق رحمۃُ اللہِ علیہ کا بھی ملتا ہے جن کی ولادت 17 ربیع الاول 80 یا 83 ہجری کو مدینہ پاک میں ہوئی۔ آپ رحمۃُ اللہِ علیہ کی کنیت ابو عبد اللہ اور ابو اسماعیل جبکہ لقب صادق، فاضل اور طاہر ہے۔

حضرت امام جعفر صادق رحمۃُ اللہِ علیہکی والدہ محترمہ کا نام مبارک حضرت بی بی ام فردہ بنت قاسم بن محمد بن ابو بکر صدیق رضی اللہُ عنہم ہے جبکہ آپ کے والد محترم کا نام مبارک حضرت امام محمد باقر بن علی بن زین العابدین بن امام حسین رضی اللہُ عنہم ہے۔ یعنی آپ رحمۃُ اللہِ علیہ والد کی طرف ”حسینی سید“ اور والدہ کی طرف سے ”صدیقی“ ہیں۔ (اللباب فی تہذیب الانساب، ص229، فیضان صدیق اکبر، ص82)

عاشقان رسول کو حضرت سیدنا امام جعفر صادق رحمۃُ اللہِ علیہ کی سیرت سےبہرہ مند کرنے اور انہیں اپنانے کا ذہن دینے کے لئے امیر اہلسنت دامت بَرَکَاتُہمُ العالیہ نے اس ہفتے رسالہ ”فیضان امام جعفر صادق رحمۃُ اللہِ علیہ“ پڑھنے/سننے کی ترغیب دلائی ہے اور پڑھنے/سننے والوں کو اپنی دعاؤں سے نوازا ہے۔

دعائے عطار

یاربَّ المصطفٰے! جو کوئی 21 صفحات کا رسالہ ”فیضانِ امام جعفر صادِق “پڑھ یا سن لے اُسے تمام صحابہ و اہل بیت کا سچا غلام بنااور اسے امام جعفر صادق کے پیارے پیارے نانا جان صلَّی اللہ علیہ واٰلہٖ وسلَّمکی قیامت میں شفاعت نصیب فرما۔ اٰمِیْن بِجَاہِ خَاتمِ النّبیِّین صلَّی اللہ علیہ واٰلہٖ وسلَّم

یہ رسالہ دعوتِ اسلامی کی ویب سائٹ سے ابھی مفت ڈاؤن لوڈ کیجئے

Download

رسالہ آڈیو میں سننے کے لئے کلک کریں

Audio Book

رسولِ اکرم صلَّی اللہ علیہ واٰلہٖ وسلَّم نے فرمایا: قِیامت کے روز جب اللہ پاک کے عرش کے سِوا کوئی سایہ نہیں ہوگا۔ تین شخص اللہ کریم کے عرش کے سائے میں ہوں گے۔ (1)وہ شخص جو میرے کسی اُمتی کی پریشانی دُور کردے (2)میری سنت کو زندہ کرنے والا (3)مجھ پر کثرت سے دُرُود پاک پڑھنے والا۔ (تسدید القوس اختصار مسندالفردوس، ص 163 مخطوط مصور، البدور السافرۃ، ص131، حدیث:366)

حضرتِ سیّدُنا موسی علٰی نَبِیِّنَاوعلیہ الصَّلٰوۃ وَالسَّلام نے اللہ پاک کی بارگاہ میں عرض کی: اے میرے رب کریم! وہ کون ہے جو تیرے عرش کے سائے میں ہوگا جس دن اُس کے علاوہ کوئی سایہ نہ ہوگا؟ اللہ پاک نے فرمایا: اے موسیٰ! وہ لوگ جو مریضوں کی عیادت کرتے، جنازہ کے ساتھ جاتے اور کسی کا بچہ فوت ہوجائے تو اس سے تعزیت کرتے ہیں۔ (تمہيد الفرش للسيوطی،ص16)

بروز قیامت رب عَزَّوَجَلَّ کی رحمت سے کون کون سے اشخاص عرش کے سائے میں ہونگے۔ اس کی چند تفصیلات سےآگاہ کرنے اور عاشقان رسول کے دلوں میں اس کی حرص پیدا کرنے کے لئے امیر اہل سنت علامہ محمد الیاس عطار قادری دامت بَرَکَاتُہمُ العالیہ نے اس ہفتےرسالہ ” عرش کا سایہ“ پڑھنے/سننے کی ترغیب دلائی ہے اور پڑھنے/سننے والوں کو اپنی دعاؤں سے نوازا ہے۔

دعائے عطار

یاربَّ المصطفٰے! جو کوئی 17 صفحات کا رسالہ ”عرش کا سایہ“ پڑھ یا سُن لے، اُسے قِیامت کی سَخْت گرمی میں عرش کا سایہ نصیب فرماکر اپنے راضی ہونے کی خوشخبری عنایت فرما۔ اٰمِیْن بِجَاہِ خَاتمِ النّبیِّین صلَّی اللہ علیہ واٰلہٖ وسلَّم

یہ رسالہ دعوتِ اسلامی کی ویب سائٹ سے ابھی مفت ڈاؤن لوڈ کیجئے

Download

رسالہ آڈیو میں سننے کے لئے کلک کریں

Audio Book

اَلَاۤ اِنَّ اَوْلِیَآءَ اللّٰهِ لَا خَوْفٌ عَلَیْهِمْ وَ لَا هُمْ یَحْزَنُوْنَۚۖ(۶۲)الَّذِیْنَ اٰمَنُوْا وَ كَانُوْا یَتَّقُوْنَؕ(۶۳)

ترجمہ کنز الایمان: سن لو بےشک اللہ کے ولیوں پر نہ کچھ خو ف ہے نہ کچھ غم، وہ جو ایمان لائے اور پرہیزگاری کرتے ہیں۔ (سورہ یونس، آیت 62، 63)

ماہ رجب المرجب 1443ھ کا عنقریب آغاز ہونے والا ہے۔ ہجری سال میں یہ ماہ بہت اہمیت کا حامل ہے کیونکہ ماہ رجب کی جہاں بہت ساری خصوصیات ہے اس کی ایک خوبی یہ بھی ہے یہ ماہ ہمیں رمضان المبارک سے مزید قریب کردیتا ہے۔

اس ماہ میں جہاں بہت سے اللہ پاک کے برگزیدہ بندوں کا یوم پیدائش و یوم وفات ہے وہاں اولیائے کرام میں ایک بڑا نام سلطان الہند، آقائے چشت، حضرت سیدنا خواجہ معین الدین حسن سنجری اجمیری چشتی (المعروف حضرت خواجہ غریب نواز) رحمۃ اللہ علیہ کا بھی ہے جن کا عرس دنیا بھر میں ہر سال رجب المرجب کے مہینے میں نہایت مذہبی عقیدت واحترام سے منایا جاتا ہے۔

فیضان اولیاء، دنیائے اسلام کی عالمگیر تحریک دعوت اسلامی بھی اولیائے کرام کے اعراس منانے میں سر فہرست ہے۔ حضرت خواجہ غریب رحمۃ اللہ علیہ کے 810 ویں عرس کے موقع پر 2 فروری 2022ء سے رجب شریف کی چھٹی رات تک مدنی مذاکرے کا انعقاد کیا جائیگا جو کہ مدنی چینل پر براہ راست نشر ہوگا۔

ان مدنی مذاکروں کے آغاز میں جلوس غریب نواز کا اہتمام ہوگا، نعت خواں حضرات بارگاہِ رسالت صلَّی اللہ علیہ واٰلہٖ وسلَّم میں ہدیۂ نعت پیش کرنے کے ساتھ ساتھ منقبت غریب نواز پڑھیں گے۔ مدنی مذاکروں میں امیراہلسنت علامہ محمد الیاس عطار قادری دامت بَرَکَاتُہمُ العالیہ سیرت خواجہ غریب نواز رحمۃ اللہ علیہ اور دینی خدمات بیان کرنے کے علاوہ اعراس منانے کے حوالے سے عاشقان رسول کی شرعی رہنمائی فرمائیں گے۔

اولیائے کرام کی محبت کو اپنے دلوں میں اجاگر کرنے کے لئے تمام عاشقان رسول کو ان مدنی مذاکروں میں شرکت کرنے کی دعوت دی جاتی ہے۔

وَ عَاشِرُوْهُنَّ بِالْمَعْرُوْفِ: اور ان (یعنی عورتوں) سے اچھا برتاؤ کرو۔ (سورۃ النساء، آیۃ19)

حقوق الزوجین کے بارے میں فرامینِ مصطفےٰ صلَّی اللہ علیہ واٰلہٖ وسلَّم

٭ قسم ہے اس کی جس کے قبضۂ قدرت میں محمد کی جان ہے! عورت اپنے پروردگار کا حق ادا نہ کرے گی جب تک شوہر کے کُل حق ادا نہ کرے۔ (ابنِ ماجہ،ج 2،ص411،حدیث:1853)

٭جب عورت اپنے شوہر کو دنیا میں ایذا (تکلیف) دیتی ہے تو حُورِ عین (یعنی بڑی اور خوبصورت آنکھوں والی حور) کہتی ہیں: خدا تجھے مارے، اِسے ایذا نہ دے یہ تو تیرے پاس مہمان ہے، عنقریب تجھ سے جُدا ہو کر ہمارے پاس آئے گا۔(ترمذی،ج 2،ص392، حدیث:1177)

٭عورت ایمان کا مزہ نہ پائے گی جب تک حقِ شوہر ادا نہ کرے۔(معجم کبیر،ج 20،ص52،حدیث:90)

٭جو عورت اس حال میں مری کہ شوہر راضی تھا، وہ جنّت میں داخل ہوگی۔(ترمذی،ج 2،ص386، حدیث:1164)

٭حضُورِ اکرم صلَّی اللہ علیہ واٰلہٖ وسلَّم نے فرمایا: تم میں اچھے لوگ وہ ہیں جو عورَتوں سے اچھی طرح پیش آئیں۔ ( اِبن ماجہ،ج 2،ص478، حدیث:1978)

جانشین امیر اہلسنت حاجی مولانا عبید رضا عطاری مدنی مُدَّ ظِلُّہُ العالی نے عاشقان رسول کو حقوق الزوجین کے متعلق معلومات فراہم کرنے اور اپنی ازدواجی زندگی کو بہترطریقے سے گزارنے کے لئے اس ہفتے رسالہ ”امیر اہل سنت سے میاں بیوی کے بارے میں سوال جواب“ پڑھنے/ سننے کی ترغیب دلائی ہے اور پڑھنے/ سننے والوں کو اپنی دعاؤں سے نوازا ہے۔[HA1]

دعائے جانشین امیر اہلسنت

یااللہ پاک! جو کوئی 17 صفحات کا رسالہ ”امیر اہل سنت سے میاں بیوی کے بارے میں سوال جواب“ پڑھ یا سن لے، اُس کا گھر امن کا گہوارہ بنا اور اس کو اپنی ساری فیملی کے ساتھ مدینے کی بار بار حاضری نصیب فرما۔ اٰمین بجاہ خاتم النبیین صلَّی اللہ علیہ واٰلہٖ وسلَّم

یہ رسالہ دعوتِ اسلامی کی ویب سائٹ سے ابھی مفت ڈاؤن لوڈ کیجئے

Download

رسالہ آڈیو میں سننے کے لئے کلک کریں

Audio Book

18جماد الثانی 1443ھ بمطابق 22 جنوری 2022ء کو عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں شہر کراچی اور بیرون شہر سے عاشقان رسول نے کثیر تعداد میں شرکت کی۔

مدنی مذاکرے میں شیخ طریقت، امیر اہلسنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے ہونے والے سوالات کے جوابات دیئے اور مدنی پھول ارشاد فرمائے۔

مدنی مذاکرے چند مدنی پھول ملاحظہ کیجئے:

سوال : عام مؤمن اورمؤمنِ کامل میں کیا فرق ہے ؟

جواب : ایمان کے مختلف درجے ہیں، فرمانِ مصطفےٰ صلَّی اللہ علیہ واٰلہٖ وسلَّم ہے: جو خود پیٹ بھرکرسوئے اور اس کاپڑوسی بھوکا ہو وہ مؤمن کامل نہيں۔ (معجمِ کبیر،ج 12،ص119، حدیث: 12741)

اِس لیے ہراُس عمل سے بچناچاہئے جس سے ایمان میں کوئی کمزوری آئے ۔

سوال: تکبرسے کیا مرادہے اورتکبرکرنے والوں کاکیا عذاب ہے ؟

جواب: اگرکوئی اپنے آپ کو دوسرے سے افضل سمجھے تویہ تکبرہے ۔رسول اللہ صلی اللہ علیہ والہ وسلم نے فرمایا :متکبرین کا حشرقیامت کے دن چیونٹیوں کے برابرجسموں میں ہوگا اوران کی صورتیں آدمیوں کی ہوں گی ،ہرطرف سے ان پر ذِلّت چھائےہوئے ہوگی ،ان کو کھینچ کرجہنم کے قیدخانے کی طرف لے جایا جائے گا۔جس کا نام بُولس ہے۔ان کے اوپرآگوں کی آگ ہوگی ،اُنہیں جہنمیوں کا نچوڑ پلایا جائے گا جس کوطِیْنَۃُ الْخَبَال کہتے ہیں ۔ (ترمذی،4/221،حدیث :2500)

(تکبر کی تباہ کاریوں ،اس کی علامات اوراس کا علاج جاننے کے لیے مکتبۃ المدینہ کی کتاب”تکَبُّر“کا مطالعہ بے حد مفید رہے گا۔ان شاۤء اللہُ الکریم)

Download

سوال: آندھی اورتنگ دستی کا اندیشہ ہوتو کون ساوظیفہ پڑھناچاہئے ؟

جواب :چلتے پھرتےوضوبے وضو’’ یَاوَکِیْلُ ‘‘پڑھتےرہیں ،حاجتیں پوری ہوں گی ،مصیبتیں حل ہوں گی ، رزق اوربھلائی کے دروازے کھلیں گے۔

سوال: جب نبیِ کریم صلی اللہ علیہ والہ وسلم حضرت ابوبکرصدیق رضی اللہ عنہ کے ساتھ غارِثورمیں تھے تو وہاں کھاناکون لے کر جاتاتھا؟

جواب: حضرت ابوبکرصدیق رضی اللہ عنہ کی بیٹی حضرت اسماءرضی اللہ عنہا ۔

سوال: مکتبۃ المدینہ کی کتاب ’’با طنی بیماریوں کا علاج‘‘کے بارے میں آپ کیا فرماتے ہیں۔

جواب : ’’باطنی بیماریوں کا علاج‘‘ مکتبۃ المدینہ کی منفردکتاب ہے جو کئی فرض علوم پر مشتمل ہے ،سب کو اس کا مطالعہ کرنا چاہئے ۔

Download

سوال : کیا دل بدلتارہتاہے ؟

جواب: جی ہاں ! دل کو قلب کہتے ہیں یہ مُنقَلِب ہوتارہتاہے یعنی بدلتارہتاہے ۔

سوال: اِس ہفتے کارِسالہ ” اقوالِ صدیقِ اکبر رضی اللہ عنہ “ پڑھنے یاسُننے والوں کو امیرِاہلِ ِسُنّت نے کیا دُعا دی ؟

جواب: یا ربَ المصطفےٰ! جو کوئی 17 صفحات کا رسالہ’’ اقوالِ صدیقِ اکبر رضی اللہ عنہ‘‘ پڑھ یا سن لے اُسے اور اُس کی نسلوں کو صحابہ و اہلِ بیت کی سچی غلامی نصیب فرما اور اسے عشقِ رسول کی لازوال دولت سے مالا مال فرما کر بےحساب بخش دے ۔ اٰمِیْن بِجَاہِ خاتمِ النَّبیّن صلَّی اللہ علیہ واٰلہٖ وسلَّم ۔

عالمی مدنی مرکز فیضان مدینہ کراچی میں 15 جنوری 2022ء کو ہفتہ وار مدنی مذاکرے کا انعقاد کیا گیا جس میں کثیر عاشقان رسول فیضان مدینہ کراچی آکر براہ راست اور جبکہ دیگر مقامات پر اسلامی بھائیوں کی بڑی تعداد نے بذریعہ مدنی چینل شرکت کی۔

بانی دعوت اسلامی حضرت علامہ محمد الیاس عطار قادری دامت بَرَکَاتُہمُ العالیہ نے دینی و معاشرتی اعتبار سے شرکا کی تربیت کرتے ہوئے عاشقان رسول کی جانب سے ہونے والے سوالات کے جوابات دیئےاور مدنی پھول ارشاد فرمائے۔

مدنی مذاکرے چند مدنی پھول ملاحظہ کیجئے:

سوال:ایک مسلمان کو کتنا علمِ دین ہونا چاہیے؟

جواب:حدیث پاک میں ہے کہ علم حاصل کرنا ہر مسلمان پر فرض ہے۔ (سنن ابن ماجہ1/146)

اس سے مراد ضروری صحیح عقائد، دیگر علوم مثلاً نماز کا فرض ہونا، روزے ، حج، زکوٰة وغیرہ کےضروری مسائل اوران کی ادائیگی کے طریقے کا علم ہونا ضروری ہے،اسی طرح تاجر کے لیے تجارت کے ضروری مسائل،و علیٰ ھذا القیاس

ظاہری گناہوں اور باطنی امراض کے بارے میں بھی معلومات ہونی چاہئیں۔

سوال:کوئی غیر ضروری سوال کرے تو اس کو کیا جواب دیا جائے؟

جواب:گناہ والی بات نہ ہو تو سچ سچ بتادیا جائے،اگر بات بتا نے والی نہ ہوتو یہ کہہ دیا جائے:" معاف کردیجئے میں نہیں بتاسکتا"۔ بہرحال فضول اور غیر ضروری سوالات کرنے والے کی اصلاح ہونی چاہئےتا کہ وہ اس طرح کے سوالات ہی نہ کرے ۔

سوال:کیا یہ درست ہے کہ دائیں ہا تھ (Right Hand)میں خارِش ہو تو دولت آتی ہے اوربائیں ہاتھ(Left Hand) میں ہوتو دولت جاتی ہے ؟

جواب :ایسی کوئی بات نہیں ۔

سوال:صدیق اکبر کا کیا معنیٰ ہے۔

جواب : صدیق کا معنی ہے ’’سچا‘‘اور اکبر کا معنی ہے" سب سے بڑا"،یہ مسلمانوں کے پہلے خلیفہ ،صحابیِ رسول حضرت ابوبکر صدیق رضی اللہ عنہ کا لقب ہے۔

سوال:کیا بال سفید ہوجائیں توبندہ بوڑھا ہوجاتا ہے؟

جواب: نہیں،ایسا نہیں ہے! بال بیماری کی وجہ سے بھی سفید ہوجاتے ہیں’’ بوڑھے‘‘ کی تعریف یہ ہے کہ بندہ 60سال کا ہوجائے تو مکمل بوڑھاہوجاتاہے۔

سوال:موت کے تذکرے کوبعض لوگ سنجیدہ نہیں لیتےیا اس کو پسند نہیں کرتے، اس کی کیا وجوہات ہیں؟

جواب : یہ نفس اور شیطان کا دھوکہ ہے،لوگ مرنے کے لیے تیار نہیں ہیں، یہ مانتے ہیں کہ موت نے آنا ہے مگر کام ایسے ہیں کہ جیسے مرنا ہی نہیں۔

سوال:جب ہم لوگوں کے ساتھ ہوں تواس وقت کیا احتیاط کرنی چاہئے ؟

جواب:ایسے کاموں سے بچا جائے جس سے لوگوں کو گِھن آتی ہے، مثلاً بار بار ناک میں اُنگلی ڈالنا، بدن سے میل اُتارناوغیرہ۔

سوال:مہمان کے ساتھ کیسا سلوک کرنا چاہئے؟

جواب :مہمان آتا ہے تو اپنا رزق ساتھ لاتا ہے اور جاتا ہے تو میزبان کے گناہوں کی مغفرت کا باعث بنتا ہے، مہمان آئے تو خوش دلی سے پیش آنا چاہیے، مہمان کو مان دیا جائے، مہمان کے مرتبے کے مطابق سلوک ہونا چاہئے، ایسی کوئی حرکت نہ کریں جس سے مہمان کی دل آزاری ہو، مہمان کو چاہیے کہ مروت و حیا کو پیش نظر رکھے اور کھانے کے اوقات میں نہ جائے۔

سوال: اِس ہفتے کارِسالہ ” بُخار کے فضائل “ پڑھنے یاسُننے والوں کو امیرِاہلِ ِسُنّت نے کیا دُعا دی ؟

جواب: یاربَّ المصطفٰے! جو کوئی 21 صفحات کا رسالہ ”بُخار کے فضائل“ پڑھ یا سُن لے اُسے بیماری میں شکوہ و شکایت کرنے سے بچا کر اپنی رضا پر راضی رہنے کی توفیق عطا فرمااور اُسے بے حساب بخش دے۔ اٰمِیْن بِجَاہِ خاتمِ النَّبیّن صلَّی اللہ علیہ واٰلہٖ وسلَّم ۔

فرمان مصطفٰے صلَّی اللہ علیہ واٰلہٖ وسلَّم: علم سیکھنے سے ہی آتا ہے اور فقہ غور و فکر سے حاصل ہوتی ہےاور اللہ عزوجل جس کے ساتھ بھلائی کا ارادہ فرماتا ہے اسے دین میں سمجھ بوجھ عطا فرماتا ہے اور اللہ عزوجل سے اس کے بندوں میں وہی ڈرتے ہیں جو علم والے ہیں۔ (المعجم الکبیر، الحدیث: 7312، ج19، ص511)

حضرت سیدنا ابراہیم علیہ السلام سے ارشاد ہوا: اے ابراہیم ! میں علیم ہوں، ہر علیم کو دوست رکھتا ہوں، یعنی علم میری صفت ہےاور جو میری اس صفت(علم) پر ہے وہ میرا محبوب ہے۔ (جامع بیان العلم و فضلہ، ص70، حدیث 213)

دین اسلام کی عالمگیر تحریک دعوت اسلامی کے دینی ماحول میں بھی عاشقان رسول کو دینی تعلیم سے آراستہ ہونے کی ترغیب دلائی جاتی ہےاور مختلف ایونٹس کے ساتھ ساتھ ہر ہفتے پابندی کے ساتھ عالمی مدنی مرکز فیضان مدینہ کراچی میں مدنی مذاکرے کا انعقاد کیا جاتا ہے جس میں امیر اہلسنت علامہ محمد الیاس عطار قادری دامت بَرَکَاتُہمُ العالیہ دینی و معاشرتی اعتبار سے لوگوں کی اصلاح کرتے اور اسلامی بھائیوں کی جانب سے ہونے والے سوالات کے جوابات ارشاد فرماتے ہیں۔

ہر ہفتے کی طرح آج بھی بمطابق 22 جنوری 2022ء کو عالمی مدنی مرکز فیضان مدینہ کراچی سے براہ راست مدنی چینل پر ہفتہ وار مدنی مذاکرے کا انعقاد کیا جائیگا جس میں امیر اہلسنت علامہ محمد الیاس عطار قادری دامت بَرَکَاتُہمُ العالیہ مدنی پھول بیان کرنے کے ساتھ ساتھ عاشقان رسول کی جانب سے ہونے والے سوالات کے جوابات بھی ارشاد فرمائیں گے۔

تمام عاشقان رسول سے مدنی مذاکرے میں شریک ہوکر علمِ دین سیکھنے کی درخواست ہے۔

قرآن و حدیث کے بعد تمام مسلمانوں کے نزدیک سب سے بڑی حجت اور دلیل صحابہ کرام علیہم الرضوان کے قول و فعل ہے۔صحابہ کرام میں بھی سب سے بڑی حجت افضل البشر بعد الانبیاء، یار ِغار ، خلیفۂ اوّل، امیر المؤمنین حضرت سیدنا صدیق اکبر رضی اللہُ عنہ کے قول کی ہے جو مردوں میں سب سے پہلے اسلام لائےاور اپنا تن، من، دھن سب آقائے دوجہاں سرکار عالم صلَّی اللہ علیہ واٰلہٖ وسلَّم پر قربان کردیا۔

آقا کریم صلَّی اللہ علیہ واٰلہٖ وسلَّم کی دنیا فانی سے پردہ فرمانے کے بعدرسول اللہ صلَّی اللہ علیہ واٰلہٖ وسلَّم کے تربیت یافتہ حضرت سیدنا صدیق اکبر رضی اللہُ عنہ نے مسلمانوں کی رہنمائی جبکہ تمام صحابہ کرام بھی دل و جان سےآپ کی نصیحت کو قبول کرتے اور اس پر عمل کرتےتھے۔ صحابہ کرام کے بعد آپ رضی اللہُ عنہ کی نصیحت قیامت تک مسلمانوں کے لئے رہنمائی اور اس پر عمل کرنے والوں کے لئے کامیابی کا رستہ ہے۔

ارشادات صدیق اکبر رضی اللہُ عنہ

٭حضرت ابو بکر صدیق رضی اللہُ عنہ نے فرمایا: نبی کریم ﷺ پر درود پاک پڑھنا گناہوں کا اِس قدر جلد مٹاتا ہے کہ پانی بھی آگ کو اُتنی جلدی نہیں بجھاتا اور نبی ﷺ پر سلام بھیجنا غلاموں کو آزاد کرنے سے افضل ہے۔ (تاریخ بغداد، 7/172، رقم:3607)

٭اللہ پاک نے جو تمہیں نکاح کا حکم فرمایا، تم اس کی اطاعت کرواس نے جو غنی کرنے کا وعدہ کیا ہے پورا فرمائے گا۔ اللہ پاک نے فرمایا: ”اگر وہ فقیر ہوں گے تو اللہ پاک انہیں اپنے فضل سے غنی کردے گا۔ (تفسیر ابن ابی حاتم، النور، تحت الآیۃ: 32،8/2582)

اس ہفتے امیر اہل سنت دامت بَرَکَاتُہمُ العالیہ نے مسلمانوں کے پہلے خلیفہ، امیر المؤمنین حضرت سیدنا صدیق اکبر رضی اللہُ عنہ کے مزید ملفوضات و ارشادات سے عاشقان رسول کوبہرہ مند کرنے کے لئے 17 صفحات پر مشتمل رسالہ ”اقوال صدیق اکبر رضی اللہُ عنہ“ پڑھنے/سننے کی ترغیب دلائی ہے اور پڑھنے/سننے کو اپنی دعاؤں سے نوازا ہے۔

دعائے عطار

یا رب المصطفٰے! جو کوئی 17 صفحات کا رسالہ ” اقوالِ صدیقِ اکبر رضی اللہ عنہ “ پڑھ یا سن لے اُسے اور اُس کی نسلوں کو صحابہ و اہل بیت کی سچی غلامی نصیب فرما اور عشق رسول کی لازوال دولت سے مالا مال فرما کر بےحساب بخش دے۔ اٰمین بجاہِ خاتمِ النبیین صلی اللہ علیہ وسلم

یہ رسالہ دعوتِ اسلامی کی ویب سائٹ سے ابھی مفت ڈاؤن لوڈ کیجئے

Download

رسالہ آڈیو میں سننے کے لئے کلک کریں

Audio Book