تحریر: مولانا دانیال عطاری

آنکھیں اللہ پاک کی عطا کردہ وہ عظیم نعمت ہیں جن کے ذریعے انسان اس خوبصورت کائنات کے رنگ، اپنے پیاروں کے چہرے، قرآنِ پاک کے الفاظ اور قدرتِ الٰہی کی بے شمار نشانیاں دیکھتا ہے۔ یہ نعمت اس قدر قیمتی ہے کہ اس کی حقیقی قدر کا احساس اکثر اس وقت ہوتا ہے جب نظر کمزور ہونے لگے یا بصارت کسی مشکل سے دوچار ہو جائے۔

عالمی یومِ بصارت کی اہمیت:

ہر سال اکتوبر کی دوسری جمعرات عالمی یومِ بصارت منایا جاتا ہے۔ یہ دن ہمیں اس جانب متوجہ کرتا ہے کہ آنکھوں کی صحت اور بصارت کی حفاظت محض ایک طبی ضرورت نہیں بلکہ ہماری زندگی کے معیار سے جڑا ایک اہم معاملہ ہے۔ یہ دن ہمیں اپنی بصارت کی حفاظت کے ساتھ ساتھ اُن افراد کا احساس کرنے کا بھی موقع فراہم کرتا ہے جو بصارت کی کمزوری یا کسی دوسرے جسمانی چیلنج کا سامنا کر رہے ہیں۔

آنکھوں کی حفاظت اور سنتِ نبوی:

ہمارے پیارے آقا، مدینے والے مصطفیٰ صلَّی اللہ علیہ واٰلہٖ وسلَّم نے بھی آنکھوں کی حفاظت کے حوالے سے سرمہ استعمال کرنے کی ترغیب ارشاد فرمائی۔ حدیثِ پاک میں سرمے کے فوائد بیان کرتے ہوئے نظر کی تیزی اور پلکوں کے بالوں کے لیے اس کے فائدے کا ذکر ملتا ہے، جس سے ہمیں آنکھوں کی صحت اور حفاظت کی اہمیت کا اندازہ ہوتا ہے۔

دعوتِ اسلامی کے اسپیشل پرسنز ڈیپارٹمنٹ کا کردار:

دینی و سماجی خدمت کے میدان میں دعوتِ اسلامی کا اسپیشل پرسنز ڈیپارٹمنٹ بصارت سے محروم افراد کی ضروریات کو سمجھنے، اُن تک آڈیو بک اور بریل بک کے ذریعے دینی و اخلاقی تعلیم پہنچانے اور انہیں معاشرے کا فعال حصہ بنانے کے لیے قابلِ قدر خدمات انجام دے رہا ہے۔ ایسے افراد کے ساتھ ہمارا رویہ محض ہمدردی تک محدود نہیں ہونا چاہیئے، بلکہ عزت، محبت، اعتماد اور برابری پر مبنی ہونا چاہیئے۔

صلاحیتیں اور عزم:

یہ بات بھی پیشِ نظر رہنی چاہیئے کہ بصارت کی کمزوری یا جسمانی معذوری کسی انسان کی صلاحیتوں کی کمی کی دلیل نہیں۔ دنیا میں ایسے بے شمار افراد موجود ہیں جنہوں نے اپنی محنت، عزم، صبر اور صلاحیتوں کے ذریعے یہ ثابت کیا کہ جسمانی مشکلات کامیابی کی راہ میں حائل ہونے کے بجائے انسان کے حوصلے کو مزید مضبوط بنا سکتی ہیں۔

عہد اور پیغام:

ہمیں چاہیئے کہ اپنی آنکھوں کی حفاظت کو اپنی زندگی کا حصہ بنائیں، بصارت سے متعلق آگاہی کو فروغ دیں اور اپنے اردگرد موجود اسپیشل پرسنز کے لیے آسانیاں پیدا کرنے میں اپنا کردار ادا کریں۔ کبھی ایک چھوٹی سی مدد، حوصلہ افزائی کا ایک جملہ یا عزت و محبت سے پیش آنے کا ایک انداز کسی کی زندگی میں بڑی خوشی کا سبب بن سکتا ہے۔