کراچی (ویب ڈیسک):دعوتِ اسلامی کے ممتاز مبلغ، رکنِ مجلس المدینۃ العلمیہ اور ماہنامہ فیضانِ مدینہ کے چیف ایڈیٹر،مولانا ابورجب محمد آصف عطاری مدنی صاحب طویل علالت کے بعد خالقِ حقیقی سے جا ملے۔ آپ 23 مارچ 1976ء کو پیدا ہوئے اور وصال کے وقت آپ کی عمر 50 سال 24 دن تھی، آپ گزشتہ کئی ماہ سے مسلسل جگر کے عارضے میں مبتلا اور علیل تھے۔

ذرائع کے مطابق مولانا آصف عطاری مدنی صاحب کا انتقال آج 16 اپریل 2026ء بروز جمعرات، سہ پہر تقریباً 3 بجے کراچی کے ایک مقامی اسپتال میں ہوا۔ آپ کے وصال کی خبر پر دعوتِ اسلامی کے اراکینِ شوریٰ، جامعۃ المدینہ کے اساتذہ و طلبہ اور اسلامک ریسرچ سینٹر کے اسکالرز نے دکھ اور رنج و ملال کا اظہار کیا ہے۔

مرحوم نے اپنی زندگی کا بڑا حصہ دینِ متین کی خدمت اور علم کی شمع روشن کرنے میں صرف کیا۔ آپ کی خدمات کے چند نمایاں پہلو درج ذیل ہیں:

تدریسی خدمات: آپ نے مسلسل 25 سال تک دعوتِ اسلامی کے تعلیمی ادارے جامعۃ المدینہ کراچی میں درس و تدریس کے فرائض سرانجام دیئے اور ہزاروں طلبہ کی علمی آبیاری کی۔

تحریر و تصنیف: گزشتہ 26 برسوں سے آپ علمی و تحقیقی میدان میں سرگرمِ عمل رہے۔ آپ نے 22 سے زائد مختصر و مفصل کُتُب تصنیف کیں جو علمی حلقوں میں بلند مقام رکھتی ہیں۔

صحافتی خدمات: بطور چیف ایڈیٹر ماہنامہ فیضانِ مدینہ، آپ نے اسے ایک معیاری رسالہ بنانے میں کلیدی کردار ادا کیا۔ اس کے علاوہ آپ نے 250 سے زائد علمی، تحقیقی اور اصلاحی کالمز تحریر کیے جو قارئین کی فکری تربیت کا ذریعہ بنے۔

آپ کو شیخِ طریقت، امیرِ اہل سنت علامہ محمد الیاس عطار قادری دامت بَرَکَاتُہمُ العالیہ سے گہری عقیدت تھی۔ صحت مندی کے ایام میں آپ طویل عرصے تک امیرِ اہل سنت کی صحبت میں رہے اور خصوصاً "مدنی مذاکرے" میں آپ کی شرکت مستقل ہوتی تھی، جہاں آپ کو ایک "عاشقِ مدنی مذاکرہ" کے طور پر پہچانا جاتا تھا۔امیر اہل سنت دامت بَرَکَاتُہمُ العالیہ بھی ان سے بڑی محبت فرماتے تھے اور انتقال سے ایک روز قبل ہی امیر اہل سنت اور جانشین امیر اہل سنت نے اسپتال جاکر ان سے عیادت کی تھی۔

مرحوم کی نمازِ جنازہ اور تدفین کے حوالے سے تفصیلات کا اعلان جلد کیا جائے گا۔

"اللہ پاک مرحوم کی تمام دینی و علمی خدمات کو اپنی بارگاہ میں قبول فرمائے، انہیں جنت الفردوس میں اعلیٰ مقام عطا کرے اور پسماندگان کو صبرِ جمیل عطا فرمائے۔ آمین"