عمیر مدنی کے گھر شہزادے کی ولادت ہوئی

امیر اہل سنت علامہ محمد الیاس عطار قادری دامت بَرَکَاتُہمُ العالیہ نے اپنے آڈیو پیغام کے ذریعے عمیر مدنی سمیت سارے خاندان والوں کو مبارکباد دی اور مدنی منے کانام رکھتے ہوئے دعاؤں سے نوازا اور مدنی پھول ارشاد فرمائے۔

پیغام عطار!

حضرت امام نجم الدین غزی شافعی رحمۃ اللہ علیہ فرماتے ہیں: انسان کو چاہیئے کہ اپنی اولاد کو نیک لوگوں کے پاس لے جایا کریں ، ان کی صحبت اختیار کرنے کا عادی بنوائیں اور ان کی زیارت کروائیں اس کی بہت سی برکات نصیب ہوں گی، بزرگانِ دین کا یہی معمول رہا ہے۔

سگِ مدینہ محمد الیاس عطار قادری عفی عنہ کی جانب سے پیارے پیارے مدنی بیٹے عمیر مدنی کی خدمت میں السلام علیکم ورحمۃاللہ وبرکاتہ

ماشا اللہ الکریم شہزادےکی ولادت بہت بہت بہت مبارک ہو۔عمیر بیٹا اللہ رب العزت کے پیار ے پیار ے آخری نبی مکی مدنی محمدعربی صلی اللہ علیہ وسلم کے مبارک نام کی تعظیم اور اس سے برکت حاصل کرنے کے لئے صاحبزادے کا نام رکھتا ہوں ”محمد“ اور پکارنے کے لیے صحابی رسول کی نسبت سے ”عُفیر“ ، عفیر کا معنیٰ ہے ”مٹیالے رنگ والا“۔ میں آپ کو اپنی مدنی بیٹی کو اور سارے خاندان کو مبارک باد پیش کرتا ہوں اور پیارے پیارے پھول جیسے بچے کو سلسلہ عا لیہ قادریہ رضویہ میں داخل کرتاہوں۔

اللہ رب العزت اس بچے کو آپ کے لئے اور ساری امت کے لئے باعث ِ برکت بنائے۔

یا رب المصطفی جل جلالہ و صلی اللہ علیہ وسلم، عُفیر عطاری کو درازیٔ عمر بالخیر عطا فرما۔ یا اللہ پاک انہیں صحت راحتوں عافیتوں عبادتوں ریاضتوں دینی خدمتوں بھری طویل زندگی عطا فرما۔ ر ب کریم انہیں ماں باپ کی آنکھوں کی ٹھنڈک اور فرماں نبردار بنا۔ ر بِ کریم سار ے خاندان کے لئے سکون کا باعث بنا، نیکی کی دعوت پھیلنے کا ذر یعہ بنا ۔ یا اللہ پاک پیارے پیارے پھول جیسے بچے عُفیر عطاری بڑےہوکر باعمل عالم دین اور مفتی اسلام اور دعوت اسلامی کی مخلص مبلغ بنے۔

یا اللہ پاک ان کی امی کی کمزور ی دور ہو انہیں طاقت دے ہمت دے راحت دے سلامتی دے ۔یا اللہ پاک انہیں نصیب ہو ، یا اللہ پاک ان کی نارمل لائف شروع ہوجائے، تیر ی ہمت کے سائے میں تیری رضا والے کام کرنا شر وع کردیں، دین و دنیا کی کام تیری رضا کے سائے میں کرنے والی بن جائیں۔ یا اللہ پاک ان کے ابو کو بھی راحتوں صحتوں بھری زندگی عطا فرما اور ان کی روزی روزگار میں خیر وبرکت عطا فرمائے ۔

گھر کے تمام افراد کی خدمتوں میں عرض ہے کہ نمازوں کی پابندی کرتے رہیں۔ گناہوں سے پاک سنتوں بھری زندگی گزار یں۔ دعوت اسلامی کے دینی ماحول سے ہر دم وابستہ رہیں۔ خاندان کے تمام اسلامی بھائی اپنے چہرے پرتھوڑی کے نیچے ایک مٹھی داڑھی سجائیں۔ داڑھی منڈانا اور ایک مٹھی سے گھٹانا حرام اور جہنم میں لے جانے والا کام ہے۔ معا ذا للہ

اب تک جس نے داڑ ھی منڈائی یا ایک مٹھی سے گھٹائی ہو اس پر واجب ہے کہ فوراً توبہ کرے اور پکا عہد کر یں کہ نہ اب داڑھی کٹے نہ ایک مٹھی سے گھٹے۔ مردوں کے لئے زلفیں رکھنا سنت ہے۔ اللہ کریم کے پیارے پیارے آخری نبی مکی مدنی محمد عربی صلی اللہ علیہ وآلہ وسلم نے کبھی آدھے مبارک کان تک کبھی پورے مبارک کان تک اور کبھی مبارک کندھوں تک بال شریف بڑھائے ، زہے نصیب اس سنت پر بھی عمل کی سعادت نصیب ہوجائے۔

یاد رہے کہ مرد کے لیے بالوں کو اتنا بڑھانا کہ کندھوں سے نیچے پہنچ جائے حرام اور گناہ ہے جب کہ عورت کے لئے بالوں کو کاٹ کر کندھے سے اوپر کرلینا حرام و گناہ ہے۔ اس مسئلے کی مزید تفصیلات کے لیے فتاویٰ رضویہ شریف جلد 21 صفحہ نمبر 600کا مطالعہ فرمائیں۔ ہر جمعرات کو اچھی اچھی نیتوں کے ساتھ دعوت اسلامی کے سنتوں بھرے اجتماع میں اول تا آخر شریک ہوں۔ وہیں رات بھی گزاریں، وہیں سوئیں۔ تہجد کی سعادت حاصل کریں، رقت انگیز دعائے تہجد کی بھی برکتیں لوٹیں۔