4 شعبان المعظم, 1441 ہجری

: : :
(PST)

اَلْحَمْدُ لِلّٰہِ عَزَّ وَجَلَّ گزشتہ شب سے مدنی چینل پر ایک بہت ہی خوبصورت و معلوماتی سلسلہ”دلوں کی راحت“ کے عنوان سے شروع کیا گیا ہے جسے مدنی چینل پر روزانہ رات 09:00تا11:00دیکھا جا سکے گا۔ اس پروگرام میں امیرِ اہلِ سنت دَامَتْ بَرَکَاتُہُمُ الْعَالِیَہ، جانشینِ امیرِ اہلِ سنت، نگرانِ شوریٰ مولانا محمدعمران عطاری، رکنِ شوریٰ مولاناحاجی عبدالحبیب عطاری سمیت دیگر مبلغین و ثناء خوانِ رسول تشریف فرما ہوں گے۔

گزشتہ شب تلاوتِ قراٰن و نعتِ رسول سے اس سلسلے کا آغاز ہوا اور امیرِ اہلِ سنت دَامَتْ بَرَکَاتُہُمُ الْعَالِیَہ، جانشینِ امیرِ اہلِ سنت، نگرانِ شوریٰ مولانا محمدعمران عطاری اور رکنِ شوریٰ مولاناحاجی عبدالحبیب عطاری نے عاشقانِ رسول کے فون کالز پر پوچھے گئےمختلف سوالات کے جوابات دیئے اور اپنی زندگی کے تجربات بھی شیئر کئے۔

سب سے پہلا سوال امیرِ اہلِ سنت سے خدمتِ دین میں آنے والی مشکلات سے متعلق پوچھا گیا جس کے جواب میں امیرِ اہل سنت نے غیر متوقع جواب ارشاد فرماتے ہوئے کہا کہ اللہ عَزَّوَجَلَّ کے کرم سے جب میں نےخدمتِ دین کا کام شروع کیا آزمائشوں و تکالیف بھی آئیں مگر ان کے مقابلے میں اللہ نے عزتیں زیادہ عطا فرمائیں۔ جوق در جوق عاشقانِ رسول دعوتِ اسلامی میں شامل ہوتے چلے گئے۔ امیر اہلِ سنت نے خدمتِ دین سے متعلق اپنی زندگی کی یادگاریں اور تجربات بھی ذکر فرمائے۔آپ سے جب زندگی کے سب سے خوشگوار لمحے کے بارے میں سوال ہوا تو آپ کا کہنا تھا کے میری زندگی کا سب سے خوشگوار لمحہ وہ ہوگا جب میری روح اس حال میں نکلے گی کہ مجھ سے کہا جائے گا

یٰۤاَیَّتُهَا النَّفْسُ الْمُطْمَىٕنَّةُۗۖ(۲۷)ارْجِعِیْۤ اِلٰى رَبِّكِ رَاضِیَةً مَّرْضِیَّةًۚ(۲۸)

(اے اطمینان والی جان (ف۲۴) اپنے رب کی طرف واپس ہو یوں کہ تو اس سے راضی وہ تجھ سے راضی)

اس کے علاوہ بھی کئی سوالات کے علم و حکمت بھرےجوابات دیئے گئے۔اختتام پررکنِ شوریٰ حاجی عبد الحبیب عطاری نے عاشقانِ رسول کوکورونا وائرس سے گھبرانے و فکر مند ہونےکے بجائے اللہ عَزَّ وَجَلَّ کی ذات پر بھروسہ کرنے کا ذہن دیا اور دلوں کی راحت کے حصول کے لئے روزانہ رات 09:00تا11:00 مدنی چینل پر اللہ عَزَّ وَجَلَّ اور اس کےحبیب صلَّی اللہ علیہ واٰلہٖ وسلَّم کے ذکر سے معمورسلسلہ”دلوں کی راحت“ دیکھنے کا ذہن دیا۔