نبی کریم صلی اللہ علیہ وآلہ وسلم کا فرمانِ عالی شان ہے کہ اللہ پاک فرماتا ہے : ”میں اپنے بندے کے گمان کے مطابق معاملہ کرتاہوں اور جب وہ مجھے یاد کرتا ہے تومیں اس کے ساتھ ہوتا ہوں ۔ پس اگر وہ مجھے جماعت میں یاد کرے تومیں اسے اس سے بہتر جماعت میں یاد کرتا ہوں اور اگر وہ مجھے دل میں یاد کرے میں بھی اس کو اکیلا یاد کرتا ہوں، اگر وہ ایک بالشت میرے قریب آتا ہے تو میری رحمت ایک ہاتھ اس کے قریب آجاتی ہے،اور اگر وہ ایک ہاتھ میرے قریب آتا ہے تو میری رحمت دونوں بازوؤں کے پھیلا ؤ کے بقدر اس کے قریب ہوجاتی ہے ۔اور اگر وہ چل کرمیری طرف آتا ہے تو میری رحمت دوڑتی ہوئی اس کی طرف آتی ہے“۔(صحیح مسلم ،کتاب الذکر والدعاء ،باب الحث علی ذکراللہ تعالیٰ ، رقم ۲۶۷۵،ص۱۴۳۹)

حضرتِ سیدنا معاذبن جبل رضی اللہ عنہ سے مروی ہے کہ شہنشاہِ مدینہ،قرارِ قلب و سینہ، صاحبِ معطر پسینہ، باعثِ نُزولِ سکینہ، فیض گنجینہ صلَّی اللہ علیہ واٰلہٖ وسلّم نے فرمایا: ”راہِ خدا عزوجل میں ذکراللہ کی کثرت کرنے والے کے لئے خوشخبری ہے کہ اس کیلئے ہر کلمہ کے بدلے ستر ہزار نیکیاں ہیں اور ان میں سے ہر نیکی دس گنا ہے اوراس کے علاوہ اللہ عزوجل کے پاس اس کے لئے بہت کچھ ہے“۔ (طبرانی کبیر ،رقم ۱۴۳، ج۲۰، ص ۷۸)

دعوت اسلامی کے زیر اہتمام ہرجمعرات پابندی کے ساتھ ہونے والے ہفتہ وار اجتماع میں بھی کثیر عاشقان رسول شریک ہوکر اللہ کا ذکر کرتے، گناہوں سے توبہ کرتے، رب کی بارگاہ میں دعائیں کرتے ہوئے، بارگاہِ مصطفٰے صلَّی اللہ علیہ واٰلہٖ وسلَّم میں درود سلام کا نذرانہ پیش کرتے اور آخرت کو یاد کرتے ہوئے ثواب کا ڈھیروں ڈھیر خزانہ حاصل کرتے ہیں۔

ہر ہفتے کی طرح آج رات بعد عشاء بمطابق 6 جنوری 2021ء کو دنیا بھر میں ہفتہ وار سنتوں بھرے اجتماعات شروع ہوجائیں گے جن میں مبلغینِ دعوتِ اسلامی سنتوں بھرے بیانات فرمائیں گے۔ تفصیلات کے مطابق مدنی مرکز فیضان مدینہ نزد انصاری چوک شاہ رکن عالم کالونی ملتان میں ہونے والے ہفتہ وار اجتماع میں نگران پاکستان مشاورت حاجی محمد شاہد عطاری ”قرآنی تعلیمات سیکھئے اور عمل کیجئے“ کےموضوع پرسنتوں بھرا بیان فرمائیں گے جسے مدنی چینل پر براہ راست نشر کیاجائیگا۔ اس کے علاوہ فیضان اسلام D.H.A فیز7 کراچی میں رکن شوریٰ حاجی محمدامین عطاری، مدنی مرکز فیضان مدینہ اسلام آباد G-11 میں رکن شوریٰ حاجی وقار المدینہ عطاری اور جامع مسجد حسن مہتاب چڑر گاؤں فیز Z.3میں بلاک ڈیفنس لاہور میں محمد ثوبان عطاری بیان فرمائیں گے۔

تمام عاشقانِ رسول سے گزارش کی جاتی ہے کہ آپ بھی اپنے شہر میں ہونے والے سنتوں بھرے اجتماع میں ضرور شرکت فرمائیں۔ آپ کے قریب میں ہفتہ وار سنتوں بھرا اجتماع کہاں ہوتا ہے یہ جاننے کے لئے درج ذیل لنک پر کلک کیجئے۔

https://www.dawateislami.net/map/ijtema