واٹس ایپ نمبر: 03044525139

پیارے اسلامی بھائیو!جس طرح بیماریاں ظاہری ہوتی ہیں جیسے بخار کھانسی وغیرہ اسی طرح بیماریاں باطنی بھی ہوتی ہیں ۔ جسمانی بیماریاں جسم کو متاثر کرتی ہیں لیکن باطنی بیماریاں روح و قلب و ایمان کو متاثر کرتی ہیں ۔ عام طور پر یہ ظاہری گناہوں کی نسبت زیادہ خطرناک ہیں انہیں میں سے ایک بغض و کینہ بھی ہے۔

آئیے اسکے متعلق جاننے کی کوشش کرتے ہیں ۔

بغض و کینہ کی تعریف : کینہ یہ ہے کہ انسان اپنے دل میں کسی کو بوجھ جانے اس سے غیر شرعی دشمنی وبغض رکھے نفرت کرے اور یہ کیفیت ہمیشہ ہمیشہ باقی رہے ۔ (احیاء العلوم ج3ص223)

بغض و کینہ رکھنے والے سے بچو: اللہ کے محبوب دانائے غیوب مُنَزَّہ عن العیوب عزوجل و ﷺ کا فرمان عالیشان ہے: اللہ عزوجل شعبان کی پندرھویں رات اپنے بندوں پر(اپنی قدرت کے شایان شان)تجلی فرماتا ہے اور مغفرت چاہنے والوں کی مغفرت فرماتا ہے اور رحم طلب کرنے والوں پر رحم فرماتا ہے جبکہ کینہ رکھنے والوں کو ان کی حالت پر چھوڑ دیتا ۔ ایک اور مقام پر ارشاد فرمایا: بغض رکھنے والوں سے بچو کیونکہ بغض دین کو موڑ ڈالتا ہے ۔یعنی تباہ کر دیتا ہے ۔(شعب الایمان باب فی الصیام ج3ص383حدیث نمبر 3835)

حضرت ابوہریرہ رضی اللہ عنہ نے کہا کہ حضورعلیہ الصلاۃ والسلام نے فرمایا کہ بندوں کے اعمال ہر ہفتہ دو مرتبہ پیش کیے جاتے ہیں۔ پیر اور جمعرات کو ، پس ہر بندہ کی مغفرت ہوتی ہے سوا اس بندہ کے جو اپنے کسی مسلمان بھائی سے بغض و کینہ رکھتا ہے اس کے متعلق حکم دیا جاتا ہے کہ ان دونوں کو چھوڑے رہو (یعنی فرشتے ان کے گناہوں کو نہ مٹائیں) یہاں تک کہ وہ آپس کی عداوت سے باز آجائیں۔ (انوار الحدیث ، بغض و کینہ حدیث1)

حضرت ابوہریرہ رضی اللہ عنہ نے کہا کہ حضورعلیہ الصلاۃ والسلام نے فرمایا کہ کسی مسلمان کو جائز نہیں کہ وہ تین دن سے زیادہ کسی مسلمان کو عداوۃً چھوڑ رکھے اگر تین دن گزر جائیں تو اس کو چاہیے کہ اپنے بھائی سے مل کر سلام کرے اگر وہ سلام کا جواب دے دے تو(مصالحت کے )ثواب میں دونوں شریک ہیں اور اگر سلام کا جواب نہ دے تو جواب نہ دینے والا گنہگار ہوا اور سلام کرنے والا ترک تعلقات کے گناہ سے بری ہوگیا۔ (انوار الحدیث بغض و حسد حدیث 2)

بغض و کینہ سے بچنے کی دعا: دعوت اسلامی کے اشاعتی ادارے مکتبۃ المدینہ کی مطبوعہ 84صفحات پر مشتمل رسالے بغض و کینہ کے صفحہ نمبر 40 پر موجود ہے کہ : پارہ 28سورہ حشرآیت نمبر 10کو وقتاً فوقتاً پڑھتے رہنے سے ان شاء اللہ بغض و کینہ سے حفاظت رہے گی ۔

سوچئے اور عقل مندی سے کام لیجئے کہ عموماً بغض و کینہ جیسی باطنی بیماریوں کی وجہ دنیاوی چیزیں ہوتی ہیں ۔لیکن سوچنے کی بات یہ ہے کہ دنیا کی وجہ سے اپنی آخرت کو برباد کر لینا دانشمندی ہے۔

اللہ تعالی ہمیں عمل کرنے کی توفیق عطا فرمائے۔ آمین