دعوتِ اسلامی کے شعبہ ”رابطہ برائے ایگریکلچر اینڈ لائیو اسٹاک ڈیپارٹمنٹ“ کے زیرِ اہتمام عالمی مدنی مرکز فیضانِ مدینہ، کراچی میں منعقد ہونے والا دو روزہ سنتوں بھرا اجتماع مروجہ دینی و تنظیمی جذبوں کے ساتھ اختتام پذیر ہو گیا۔ 04 اور 05 جولائی 2026ء کو ہونے والے اس منفرد اجتماع میں ملک بھر سے لائیو اسٹاک، پولٹری، کیٹل فارمنگ اور ایگریکلچر کے شعبہ جات سے وابستہ عاشقانِ رسول اور دعوتِ اسلامی کے متعلقہ شعبے کے ذمہ داران نے بڑی تعداد میں شرکت کی۔

اجتماع کا باقاعدہ آغاز تلاوتِ کلامِ پاک اور حضورِ اکرم صلَّی اللہ علیہ واٰلہٖ وسلَّم کی بارگاہِ اقدس میں نعتِ رسولِ مقبول کے نذرانے پیش کر کے کیا گیا۔ اجتماع کے دوران شرکا نے دعوتِ اسلامی کے ہفتہ وار ”مدنی مذاکرے“میں بھی خصوصی شرکت کی جہاں انہوں نے شیخِ طریقت، امیرِ اہلسنت حضرت علامہ مولانا محمد الیاس عطار قادری دامت بَرَکَاتُہمُ العالیہ کے علم و حکمت سے بھرپور جوابات سے اپنے دلوں کو منور کیا اور دینی و دنیاوی معلومات میں اضافہ کیا۔

نگرانِ شوریٰ کا موضوع ”رزقِ حلال کی برکت“ پر اہم بیان:

دو دن تک جاری رہنے والے اجتماع میں مرکزی مجلسِ شوریٰ کے نگران مولانا حاجی محمد عمران عطاری مدظلہ العالی نے ”رزقِ حلال کی برکت“کے موضوع پر نہایت ہی دلنشین انداز میں گفتگو کی۔ انہوں نے والدین کی جانب سے اولاد کی تربیت پر زور دیتے ہوئے فرمایا: ”والدین اپنے بچوں کو کمانے کی تربیت تو دیتے ہیں، خواہ وہ جانور پالنے کا کام ہو، زراعت ہو، پولٹری ہو یا کیٹل فارمنگ، اگر فیلڈ میں فائدہ نظر آئے تو ہم بچوں کو اسی فیلڈ میں لاتے ہیں ورنہ کسی دوسری فیلڈ میں بھیج دیتے ہیں۔ لیکن سب سے اہم بات یہ ہونی چاہیے کہ ہم اپنی اولاد کو یہ سکھائیں کہ بیٹا! کماؤ تو صرف حلال کماؤ۔ حرام، رشوت، جھوٹ، دھوکے، ملاوٹ اور بددیانتی سے بچو۔“

انہوں نے افسوس کا اظہار کرتے ہوئے سوال کیا کہ آج ایمانداری سے بتائیں کہ کتنے والدین ایسے ہیں جو بیٹھ کر اپنے بچوں کو ایمانداری اور حلال کمانے کی اس طرح وصیت اور نصیحت کرتے ہیں؟

رکن شوریٰ مولانا حاجی عبد الحبیب عطاری کا سنتوں بھرا بیان:

رکنِ شوریٰ مولانا حاجی عبد الحبیب عطاری نے شرکا سے گفتگو کرتے ہوئے ایک اہم نکتے کی وضاحت کی اور کہا: ”بعض لوگوں نے یہ غلط تصور (Concept) بنا لیا ہے کہ دین شاید مالدار بننے سے روکتا ہے۔ ایسا ہرگز نہیں ہے، آپ مالدار بنیں اس میں کوئی حرج نہیں، لیکن مال کے نشے میں غرق نہ ہوں، تکبر کا شکار نہ ہوں اور نہ ہی لوگوں کے حقوق دبائیں۔ اللہ پاک آپ کو حلال راستے سے اربوں روپے عطا فرمائے تو یہ نعمت ہے“۔ انہوں نے مثال دیتے ہوئے فرمایا کہ حضرت سیدنا عثمانِ غنی اور حضرت عبد الرحمن بن عوف رضی اللہ عنہما اپنے وقت کے امیر ترین لوگ اور اربوں پتی تھے، مگر ان کا ایک درہم یا دینار بھی حرام کا نہیں تھا۔ آج ہمیں اپنے مال کو چیک کرنا چاہیے کہ اس میں کہیں جھوٹ، دھوکا اور ملاوٹ تو شامل نہیں؟ اگر ایسا ہے تو وہ مال کسی کام کا نہیں۔ انہوں نے واضح کیا کہ حلال مال دنیا میں بہت ساری عبادات کو بجا لانے کا سبب بھی بنتا ہے۔

اختتامی سیشن اور رقت انگیز دعا:

اس دو روزہ تربیتی و سنتوں بھرے اجتماع کے اختتامی سیشن میں اراکینِ شوریٰ اور قاری سلیم عطاری سمیت دعوتِ اسلامی کے مبلغین نے شرکا کی تنظیمی و اخلاقی رہنمائی کی۔ اجتماع کا اختتام بارگاہِ رسالت صلَّی اللہ علیہ واٰلہٖ وسلَّم میں صلوٰۃ و سلام کے نذرانے اور امتِ مسلمہ کے لیے رقت انگیز دعا کے ساتھ کیا گیا۔ بعد ازاں شرکائے اجتماع نے نگرانِ شوریٰ مولانا حاجی محمد عمران عطاری سے ملاقاتیں بھی کیں اور دعوتِ اسلامی کے اس اقدام کو خوب سراہا۔