اللہ کریم نے انسانیت کی رشد و ہدایت کے لیے انبیاء کرام کی جماعت مبعوث فرمائی اور انہیں وہ دینِ کامل عطا فرمایا جو انسانیت کو ہمہ گیر اور جامع رہنمائی عطا کرتا ہے۔ وہ تمام عقائد و نظریات جن پر نجاتِ اخروی موقوف ہے رسول اللہ ﷺ نے اپنی امت کو قرآن و سنت کی نصوص قطعیہ کی صورت میں بتا دیے ہیں۔

پیارے اسلامی بھائیو! اگر عقیدہ درست ہے تو اعمال بھی درست ہوں گے، اور اگر عقیدہ میں خرابی آ جائے تو نیک اعمال بھی انسان کو نجات نہیں دلا سکتے۔

اب سوال یہ پیدا ہوتا ہے کہ عقیدہ کیا ہے؟عقیدہ دراصل دل سے کسی بات کو سچ ماننے اور اس پر پختہ یقین رکھنے کا نام ہے۔ اسلام میں بنیادی عقائد: توحید، رسالت، آخرت، فرشتوں، آسمانی کتابوں اور اچھی بُری تقدیر پر ایمان لانا ہیں۔ یہی وہ بنیادیں ہیں جن پر ایک مسلمان کی پوری زندگی قائم ہوتی ہے۔

قرآنِ کریم و حدیث کی روشنی میں مطالعہ عقائد کی اہمیت و ضرورت:

اللہ کریم ارشاد فرماتا ہے:قُلْ هَلْ یَسْتَوِی الَّذِیْنَ یَعْلَمُوْنَ وَ الَّذِیْنَ لَا یَعْلَمُوْنَؕ-اِنَّمَا یَتَذَكَّرُ اُولُوا الْاَلْبَابِ۠(۹) ترجمہ کنزالایمان: تم فرماؤ کیا برابر ہیں جاننے والے اور انجان نصیحت تو وہی مانتے ہیں جو عقل والے ہیں ۔ (سورۃالزمر آیت نمبر 9)

حضرت ابو امامہ باہلی رَضِیَ اللہ تَعَالٰی عَنْہُ فرماتے ہیں ،حضور پُر نور صَلَّی اللہ تَعَالٰی عَلَیْہِ وَاٰلِہٖ وَسَلَّمَ کی بارگاہ میں دو آدمیوں کا ذکر کیا گیا، ان میں سے ایک عالِم تھا اور دوسرا عبادت گزار، تو حضورِ اَقدس صَلَّی اللہ تَعَالٰی عَلَیْہِ وَاٰلِہٖ وَسَلَّمَ نے ارشاد فرمایا: ’’عالم کی فضیلت عبادت گزار پر ایسی ہے جیسے میری فضیلت تمہارے ادنیٰ پر ہے، پھر سرکارِ دو عالَم صَلَّی اللہ تَعَالٰی عَلَیْہِ وَاٰلِہٖ وَسَلَّمَ نے ارشاد فرمایا ’’اللہ تعالیٰ، اس کے فرشتے ،آسمانوں اور زمین کی مخلوق حتّٰی کہ چیونٹیاں اپنے سوراخوں میں اور مچھلیاں لوگوں کو (دین کا) علم سکھانے والے پر درود بھیجتے ہیں۔(ترمذی، کتاب العلم، باب ما جاء فی فضل الفقہ علی العبادۃ، 4 / 313، الحدیث: 2694)

موجودہ دور میں مطالعہ عقائد کی ضرورت:پیارے اسلامی بھائیو! اگر آپ اپنے اردگرد نظر دوڑائیں تو آپ دیکھیں گے کہ آج سوشل میڈیا، یوٹیوب، اور مختلف پلیٹ فارمز(Platforms) پر ہر شخص دین کی بات کر رہا ہے، لیکن ہر بات درست نہیں ہوتی۔ کئی لوگ قرآن و حدیث کی غلط تشریحات پیش کر کے لوگوں کے عقائد خراب کر رہے ہیں۔

آج کے دور میں درج ذیل خطرات عام ہیں:

(1)الحاد بے دینی، دین بیزای۔(2)خرافات ، دین میں نئی نئی باتیں شامل کرنا۔(3)غلط نظریات کو پھیلانا وغیرہ۔

اگر آپ نے اپنے عقائد کا مطالعہ نہیں کیا ہوگا تو آپ آسانی سے ان فتنوں کا شکار ہو سکتے ہو۔

مطالعۂ عقائد کے فوائد

(1)ایمان کی مضبوطی:پیارے اسلامی بھائیو! جب آپ اپنے عقائد کو دلائل کے ساتھ سیکھیں گے تو آپ کا ایمان مضبوط ہوگا، کوئی بھی آپ کو بہکا نہیں سکے گا۔

(2)آخرت کی کامیابی:صحیح عقیدہ ہی نجات کا ذریعہ ہے۔ اگر عقیدہ درست نہ ہو تو عبادات بھی قبول نہیں ہوتیں۔

ہماری ذمہ داری کیا ہے؟پیارے اسلامی بھائیو! اب یہ آپ کی ذمہ داری ہے کہ:

(1)مستند علماء سے عقائد سیکھیں ارشاد باری تعالی ہے:

فَسْــٴَـلُوْۤا اَهْلَ الذِّكْرِ اِنْ كُنْتُمْ لَا تَعْلَمُوْنَۙ(۴۳)

ترجمہ کنزالایمان:تو اے لوگوں علم والوں سے پوچھو اگر تمہیں علم نہیں۔ (سورۃنحل آیت 43)

(2)قرآن و حدیث کا مطالعہ کریں۔(3)اہلِ سنت کے عقائد کو سمجھیں۔(4)ہر سنی سنائی بات پر یقین نہ کریں۔

یاد رکھیں! عقیدہ دین کی جڑ ہے، اور درخت کی جڑ مضبوط ہو تو ہی وہ سرسبز رہتا ہے۔

اللہ تعالیٰ ہمیں علمِ دین سیکھنے اور اس پر عمل کرنے کی توفیق عطا فرمائے آمین بجاہ خاتم النبیین ﷺ ۔