حضرت علامہ مولانا سید شاہ تراب الحق قادری رحمۃُ اللہِ علیہ کے صاحبزادے اور حضرت علامہ مولانا سید شاہ عبد الحق قادری صاحب دامت بَرَکَاتُہمُ العالیہ کے بڑے بھائی شاہ سراج الحق قادری دل کے عارضے کے سبب 16 مئی 2023ء کی شب کراچی کے نجی اسپتال میں انتقال کر گئے۔اِنَّا لِلہِ وَاِنَّا اِلَیْہِ رٰجِعُوْن

انتقال کی خبر ملنے پر شیخِ طریقت امیر اہل سنت علامہ محمد الیاس عطار قادری دامت بَرَکَاتُہمُ العالیہ نے اپنے ویڈیو پیغام کے ذریعے علامہ شاہ عبد الحق قادری صاحب سمیت تمام سوگواران سے تعزیت کی اور لواحقین کو صبر کی تلقین کرتے ہوئے مرحوم کے لئے دعائیں کیں۔

پیغام امیر اہلسنت:

شہزادۂ عالی وقار سیّدِ آبرو دارحضرت علامہ مولانا الحاج شاہ عبد الحق قادری اطال اللہ عمرہ ۔۔السلام و علیکم ورحمۃ اللہ و برکاتہ

سوشل میڈیا کے ذریعے جناب کے بڑے بھائی جان حضرت قبلہ شاہ سید سراج الحق کے وصال باکمال کی خبر ملی۔ اِنَّا لِلہِ وَاِنَّا اِلَیْہِ رٰجِعُوْن

اللہ کریم حضرت مرحوم کو غریق رحمت فرمائے،بے حساب مغفرت سے مشرف کرے،حضرت کی قبر کو اللہ پاک جنت کاباغ بنائے،ان کے نانا جان صلَّی اللہ علیہ واٰلہٖ وسلَّم کے جلووں سے ان کی قبر آباد ہو، رحمت کا نزول ہو،اللہ پاک تمام لواحقین کو صبر جمیل اور صبر جمیل پر اجر جزیل مرحمت فرمائے۔

حضورِ والا آپ بھی صبر کیجئے گا، حضرت کے شہزادگان، شہزادیوں اور تمام ہی خاندان والوں کو میری طرف سے تعزیتی پیغام دے دیجئے گا، نانا جان صلَّی اللہ علیہ واٰلہٖ وسلَّم سے میری سفارش کیجئے گا کہ مجھے تمام تر خامیوں سمیت قبول فرمالے، اللہ آپ کے درجے بلند فرمائے، آپ کے خانوادے کو آباد رکھے۔