دارالمدینہ انٹرنیشنل یونیورسٹی (DMIU) کے مستقبل کے تعلیمی منصوبوں کے حوالے سے ایک اہم میٹنگ منعقد کی گئی جس میں دعوتِ اسلامی کی مرکزی مجلسِ شوریٰ کے نگران مولانا حاجی محمد عمران عطاری کی خصوصی شرکت ہوئی۔

اس اہم میٹنگ میں دارالمدینہ انٹرنیشنل یونیورسٹی کے چانسلر، وائس چانسلر، پرو وائس چانسلر، رجسٹرار، ڈائریکٹر پلاننگ اینڈ ڈویلپمنٹ، فیکلٹی ممبران اور مختلف شعبہ جات کے سربراہان (Heads of Departments) موجود تھے۔

معاشرتی اصلاح میں جامعات کا کردار:

میٹنگ میں نگرانِ شوریٰ مولانا حاجی محمد عمران عطاری نے اعلیٰ تعلیمی اداروں کی ذمہ داریوں پر روشنی ڈالتے ہوئے کہا کہ یونیورسٹی کو ایسے تعلیم یافتہ افراد تیار کرنے کے لیے تعمیری و بامقصد کردار ادا کرنا چاہیے جو نہ صرف علمی میدان میں آگے ہوں بلکہ اخلاقی طور پر ذمہ دار بھی ہوں۔

نگرانِ شوریٰ کا میٹنگ میں مزید کہنا تھا کہ نوجوانوں میں سماجی بیداری پیدا کی جائے تاکہ وہ معاشرے میں مثبت تبدیلی لانے کے لیے اپنا فعال کردار ادا کر سکیں۔

مستقبل کے تعلیمی منصوبوں پر بریفنگ:

میٹنگ کے دوران یونیورسٹی کی انتظامیہ نے نگرانِ شوریٰ کو مستقبل کے تعلیمی اقدامات و دیگر اداروں کے ساتھ باہمی تعاون (Institutional Collaborations) کے منصوبوں پر تفصیلی بریفنگ دی۔

یہ میٹنگ دارالمدینہ انٹرنیشنل یونیورسٹی کے اس عزم کی عکاسی کرتی ہے جس کے تحت اعلیٰ تعلیم کو محض ڈگری کے حصول تک محدود رکھنے کے بجائے ایک واضح مقصد، اعلیٰ اقدار اور سماجی ذمہ داری کے مضبوط احساس کے ساتھ آگے بڑھایا جا رہا ہے۔(رپورٹ: سید ذیشان حسین بخاری عطاری ہیڈ آف سوشل میڈیا ڈیپارٹمنٹ کنزالمدارس بورڈ فیصل آباد، کانٹینٹ:غیاث الدین عطاری)