تاریخ اسلام کا ایک اہم ترین معرکہ کربلا ہے یہ معرکہ حق اور باطل کے درمیان تھا اہل کوفہ نے نواسہ رسول امام حسین کو خطوط وقاصد بھیج کر دھوکہ سے بلایا اور یزید منافق کی بیعت کرنے پر مجبور کیا امام حسین نے بیعت کرنے سے انکار کیا تو یزیدی لشکر نے آپ پر آپ کے اہل خانہ اور جانثار وں پر ظلم وستم کرنا شروع کر دیا اور انہیں شہید کر دیا۔

ہر محرم الحرام میں تمام مسلمان سیدنا امام حسین کی شہادت پر اپنے قلبی رنج کا اظہار کرتے ہیں مگر ان غمزدگان میں بہت کم لوگ اس جانب، اس مقصد کی طرف متوجہ ہوتے ہیں جس کی خاطر امام حسین نے اتنی بڑی قربانی دی۔ ہمارے لیے اس مقصد کو جاننا بہت ہی ضروری ہے جس کی خاطر نواسہ رسول امام حسین نے اپنا پورا خاندان قربان کردیا۔

آئیے مختصراً جانتے ہیں کہ واقعہ کربلا سے ہم نے کیا سیکھا:

1۔ واقعہ کربلا سے ہمیں یہ درس ملتا ہے کہ دین سے محبت رکھنے والا دین کی بقا وسلامتی کی خاطر اپنے کسی بھی عزیز سے عزیز متاع کو بھی اللہ کی راہ میں لٹا اور مٹا دینے سے گریز نہیں کرتا۔

2۔ خدمت دین اور دعوت دین میں کبھی بھی پس وپیش کا شکار نہیں ہونا چاہیے بلکہ جب بھی موقع میسر ہو دین کے نام پر چل پڑنا اور دین کی سربلندی کے لیے ہر جائز کوشش کرنی چاہئے۔

3۔ دین کی حفاظت کے لیے اپنی محبوب چیز یں، گھر بار بلکہ اپنی جان بھی راہ خدا میں نذرانہ کرنا پڑے تو پیچھے نہیں ہٹنا چاہیے۔

4۔ اگر دنیا کی اس عارضی زندگی میں مصیبتوں اور تکلیفوں کے تاریک بادل بھی چھا جائے تب بھی حکم خدا وند ی سے غفلت نہیں برتنی چاہیے بلکہ ہر حال میں حکم الٰہی بجا لانا چاہیے۔

5۔ نماز کی پابندی کرنی چاہیے ہر حال میں اپنے رب کے اگئے سجدہ ریز ہو نا چاہیے کہ امام حسین نے جنگ کے حالات میں جب ہر طرف تلواریں تھی تنے تنہا میدان میں تھے نماز کا وقت ہوا تو اپنے رب کے اگئے حاضر ہو گئے اور سجدے میں سر کٹا دیا۔ سبحان اللہ

6۔ واقعہ کربلا ہمیں درس دیتا ہے کہ جو بھی وعدہ کرو اسے پورا کرو اس پر مکمل عمل کرو۔

7۔ اسلام وایمان کی عظیم نعمت پاکر جھوٹ، غیبت، دھوکہ وفریب، ظلم اور حقوق اللہ حقوق العباد کو ضائع نہیں کرنا چاہیے۔

8۔ دین اسلام ایک پر امن دین ہے اس لیے کسی پر ظلم نہیں کرنا چاہیے۔

9۔ مسلمان کا شیوہ محبت قرآن اور عادت تلاوت قرآن ہے امام حسین نے نیزے پر قرآن پڑھا واہ کیا محبت ہے قرآن سے۔

اللہ کریم ہمیں اہل بیت کی محبت عطا فرمائے اور ہمیں اہل بیت کا خوب خوب فیضان عطا فرمائے اور ہمیں واقعہ کربلا کے حقیقی مقصد کو سمجھنے کی توفیق عطا فرمائے۔