ہمیں چاہئیےکہ ہم اپنے حسن اخلاق کو اچھا کریں ۔  اور اخلاق کو خوبصورت بنانے کیلئے ایک بہت ہی اہم چیز تواضع ہے جو کہ ہمارے اندر کہیں نہ کہیں پائی جاتی ہے بس ہمیں اُسے بیدار کرنے ( جگانے) کی ضرورت ہے ۔ تواضع ہے کیا ؟ تواضع کو سمجھنے کیلئے اُسکا معنی و مفہوم ملاحظہ ہو:

تواضع کے لغوی معنی : عاجزی و انکساری کے ہیں ۔

اصطلاحی معنی: اپنے آپ کو کمتر سمجھنا، دوسروں کو ان کی حیثیت کے مطابق احترام دینا اور حق کے سامنے سرتسلیم خم کرنا ہے ۔

اللہ تبارک و تعالیٰ عزوجل نے قرآن مجید فرقان حمید میں تواضع کو اختیار کرنے والوں اور اُسکے ترک کرنے والوں کے انجام کے متعلق ارشاد فرمایا ہے جن میں سے چند آیات درج ذیل ہیں : ارشاد باری تعالیٰ ہے :

وَ عِبَادُ الرَّحْمٰنِ الَّذِیْنَ یَمْشُوْنَ عَلَى الْاَرْضِ هَوْنًا وَّ اِذَا خَاطَبَهُمُ الْجٰهِلُوْنَ قَالُوْا سَلٰمًا(۶۳)

ترجمہ کنز العرفان : اور رحمن کے وہ بندے جو زمین پر آہستہ چلتے ہیں اور جب جاہل اُن سے بات کرتے ہیں تو کہتے ہیں "بس سلام " ۔ ( پاره: 19 ، سورۃ الفرقان ، آیت نمبر 63)

اس آیت مبارک میں کامل مؤمنین کی صفات کا بیان ہوا ہے ہمیں بھی چاہئیے کہ ہم ان صفات پر (زمین پر آہستہ چلنے اور جاہلوں سے جھگڑا کرنے سے اعراض کرنے ) پر عمل کر کے کامل مؤمنین کی صف میں شام شامل ہو جائیں ۔

ارشاد باری تعالیٰ ہے : اِنَّهٗ لَا یُحِبُّ الْمُسْتَكْبِرِیْنَ(۲۳) ترجمہ کنز العرفان : بے شک وہ (اللہ) مغروروں کو پسند نہیں فرماتا ۔ (پارہ : 14 ، سورۃ النحل، آیت نمبر: 23)

ایک انسان کو بحیثیت مسلمان اللہ تعالیٰ کا پسندیدہ ہونا چاہیئے نہ کہ نا پسندیدہ اور اللہ کے پسندیدہ بندوں میں شمار ہونے کا ایک راستہ تواضع و حسن اخلاق کو اپنانا ہے ۔

اللہ پاک سے دعاگو ہوں کہ جو کچھ تحریر کیا گیا اللہ تعالیٰ ہمیں اُس پر عمل کرنے کی توفیق عطا فرمائے ۔ (آمین)