سمجھانا کے بنیادی معنی کسی کو کوئی بات ذہن نشین کرانا،وضاحت کرنا یا مفہوم سمجھانا ہے۔

اس فعل کے دیگر معانی میں نصیحت کرنا،آگاہ کرنا،تسلی دینا، دلاسہ دینا یا کسی کو نشیب و فراز سے واقف کرانا شامل ہیں۔

نصیحت کیجئے شرمندہ نہ کیجئے مقصد دستک دینا ہوتا ہے دروازہ توڑنا نہیں! کا مطلب یہ ہے کہ اصلاح یا تنقید کا انداز نرم ہونا چاہیے نہ کہ تحقیر آمیز یا سخت کہ جس سے سامنے والا شرمندہ ہو یا پھر ضدی۔

سب کے سامنے سمجھانا یا اصلاح کرنا عام طور پر ناپسندیدہ سمجھا جاتا ہے کیونکہ یہ سامنے والے کو احساس کمتری میں مبتلا کرسکتا ہے۔

محفل میں ٹوکنے سے انسان کی عزت نفس کو ٹھیس پہنچ سکتی ہے اور دل آزاری کا سبب بھی بن سکتی ہے سامنے والے کی رسوائی ہوسکتی ہے اسکے دل میں آپکے لئے بغض بھی پیدا ہو سکتا ہے۔ اگر اس نے اپنی غلطی کی اصلاح کر بھی لی تب بھی شاید وہ آپ سے بدظن ہوجائے۔

حضرت ام درداء رضی اللہ عنہا فرماتی ہیں: جس نے کسی کے عیب کی الگ سے اصلاح کی اس نے اسے سدھار دیا اور جس نے کسی کے عیب کی سب کے سامنے اصلاح کی اس نے اسے بگاڑ دیا۔ (شعب الایمان، 6/112، حدیث:7641)

دوسروں کی عزت کا خیال رکھیں: سمجھاتے ہوئے مسلمان کی عزت کا خیال رکھیں اور اچھے انداز سے اچھے الفاظ کے ساتھ سمجھائیں تاکہ سمجھنے والے کو آپ سے وحشت نہ ہو اور وہ آئندہ بھی آپ سے تربیت لینے میں ہچکچاہٹ کا شکار نہ ہو۔

الله تبارک وتعالیٰ ہمیں اچھے انداز کے ساتھ اصلاح کرنے کا جذبہ نصیب فرمائے۔