"مجلس" جلوس سے ماخوذ ہے، اس کا معنی ہے بیٹھنے کی جگہ یا بیٹھک۔ اصطلاح میں مجلس اس جگہ یا محفل کو کہتے ہیں جہاں لوگ کسی مقصد کے لیے جمع ہو کر بیٹھیں۔ یہ مقصد دینی بھی ہوسکتا ہے اور دنیاوی بھی، جیسے وعظ و نصیحت، علمی مذاکرہ، مشاورت، خوشی یا غمی کی محفل وغیرہ۔

مجلس کے مقاصد کے اعتبار سے اس کے آداب اور حقوق میں بھی فرق ہوتا ہے، لیکن چند ایسے حقوق ہیں جن کا لحاظ ہر مجلس میں رکھنا ضروری ہے۔ ان میں سے چند درج ذیل ہیں:

لباس و تیاری:مجلس میں جانے سے پہلے ممکن ہو تو ستھرے کپڑے پہنیں اور اچھی نیت کے ساتھ خوشبو لگائیں۔

بیٹھنے کا طریقہ:مجلس میں جہاں جگہ مل جائے وہیں بیٹھ جائیں۔ نبی کریم ﷺ کا بھی یہی طریقہ تھا۔ اگر کوئی مسلمان بھائی آئے تو اسے جگہ دیں۔

گفتگو کے آداب:جو بات ہو رہی ہو اسے توجہ سے سنیں۔ جب کلام کا موقع ملے تو بات کریں اور کسی کی بات نہ کاٹیں۔

کھانے کے آداب:اگر مجلس میں کھانا پیش کیا جائے تو سنت کے مطابق کھائیں۔ کھانے میں عیب نہ لگائیں۔ اگر طبیعت کے موافق ہو تو کھائیں ورنہ خاموشی سے ہاتھ روک لیں۔ نبی کریم ﷺ کا بھی یہی انداز تھا۔

اجازت اور اختتام:بغیر اجازت مجلس سے نہ اٹھیں مجلس کے اختتام پر دعائے خیر کریں اور رخصت ہوتے وقت آگے بڑھ کر سلام و مصافحہ کریں۔

ان آداب پر عمل کرنے والا شخص معاشرے میں عزت کی نگاہ سے دیکھا جاتا ہے۔ لوگوں کی نظروں میں وہ بااخلاق اور مہذب ہو جاتا ہے اور سب سے بڑھ کر وہ اللہ اور اس کے رسول ﷺ کی رضا حاصل ہوتی ہے۔

اللہ کریم ہمیں ان آداب پر عمل کرنے کی توفیق عطا فرمائے اور ہمیں بااخلاق اور سنتوں پر عمل کرنے والا مسلمان بنائے۔آمین