اللہ ربّ العزت نے انسان کو امانت دار بنایا ہے۔ یہ دنیا، یہ نعمتیں، یہ رشتے، یہ منصب، یہ مال سب کچھ ہمارے پاس بطور امانت رکھا گیا ہے۔ اور اللہ تعالیٰ نے بار بار قرآنِ مجید میں خیانت کی سخت مذمت فرمائی ہے۔ خیانت وہ بدترین صفت ہے جو انسان کو اخلاقی، روحانی اور معاشرتی طور پر برباد کر دیتی ہے۔

قرآنِ مجید میں اللہ تعالیٰ ارشاد فرماتا ہے:

یٰۤاَیُّهَا الَّذِیْنَ اٰمَنُوْا لَا تَخُوْنُوا اللّٰهَ وَ الرَّسُوْلَ وَ تَخُوْنُوْۤا اَمٰنٰتِكُمْ وَ اَنْتُمْ تَعْلَمُوْنَ(۲۷)

ترجمہ کنز الایمان: اے ایمان والو اللہ و رسول سے دغانہ کرو اور نہ اپنی امانتوں میں دانستہ خیانت۔ (انفال:27)

اس آیت میں اللہ تعالیٰ نے صاف الفاظ میں یہ حکم دے دیا کہ خیانت مومن کی شان نہیں ہو سکتی۔ مومن وہ ہے جو امانت کو حفاظت کے ساتھ پورا کرے، جو وعدہ پورا کرے، جو لوگوں کے مال، عزت، راز اور ذمہ داریوں کی حفاظت کرے۔

اللہ تعالیٰ دوسری جگہ فرماتا ہے:

وَ اِمَّا تَخَافَنَّ مِنْ قَوْمٍ خِیَانَةً فَانْۢبِذْ اِلَیْهِمْ عَلٰى سَوَآءٍؕ - اِنَّ اللّٰهَ لَا یُحِبُّ الْخَآىٕنِیْنَ۠(۵۸)

ترجمہ کنزالایمان: اور اگر تم کسی قوم سے دغا(عہد شکنی) کا اندیشہ کرو تو ان کا عہد ان کی طرف پھینک دو برابری پر بےشک دغا والے اللہ کو پسند نہیں۔(انفال:58)

وہ بندہ کتنا بدقسمت ہوگا جس کے بارے میں اللہ خود فرما دے کہ میں اسے پسند نہیں کرتا! اللہ کی ناراضگی سے بڑی مصیبت کوئی نہیں۔ خیانت کا دائرہ بہت وسیع ہےمال میں خیانت،تجارت میں دھوکہ،دفتر میں کام چوری،لیڈرشپ میں ناجائز فائدہ،دوستوں کے راز فاش کرنا،وعدہ خلافی کرنا،یہ سب خیانت میں شامل ہے۔

اِنَّ اللّٰهَ یَاْمُرُكُمْ اَنْ تُؤَدُّوا الْاَمٰنٰتِ اِلٰۤى اَهْلِهَاۙ-وَ اِذَا حَكَمْتُمْ بَیْنَ النَّاسِ اَنْ تَحْكُمُوْا بِالْعَدْلِؕ-اِنَّ اللّٰهَ نِعِمَّا یَعِظُكُمْ بِهٖؕ-اِنَّ اللّٰهَ كَانَ سَمِیْعًۢا بَصِیْرًا(۵۸)

ترجمہ کنز العرفان: بیشک اللہ تمہیں حکم دیتا ہے کہ امانتیں جن کی ہیں ان کے سپرد کرو اور یہ کہ جب تم لوگوں میں فیصلہ کرو تو انصاف کے ساتھ فیصلہ کرو بیشک اللہ تمہیں کیا ہی خوب نصیحت فرماتا ہے، بیشک اللہ سننے والا ،دیکھنے والا ہے۔(سورۃ النساء، آیت 58)

یہ آیت بتاتی ہے کہ امانت ادا کرنا اللہ کا حکم ہے، اور خیانت کرنا اللہ کی نافرمانی ہے۔ جس پر ذمہ داری ہو اسے چاہیے کہ پورے اخلاص، دیانت اور خوفِ خدا کے ساتھ اسے ادا کرے، چاہے وہ منصب کی امانت ہو، مال کی ہو، زبان کی ہو یا رویے کی۔ اے اللہ! ہمیں خیانت، دھوکے اور بے ایمانی سے بچا۔اے اللہ! ہمیں امانت داروں میں شامل فرما۔اے اللہ! ہمارے نفس کو پاکیزہ بنا، اس میں دیانت اور سچائی پیدا فرما۔آمین بجاہ الخاتم النبیین صلی الله علیہ وسلم۔