جس طرح ایک انسان کے حقوق ہیں اسی طرح جانوروں کے بھی ہیں، قرآن وحدیث میں جانوروں کے حقوق بھی بیان کیے گئے ہیں جانور بھی اللہ تعالیٰ کی مخلوق ہے ایک انسان کو جانوروں کے حقوق کا خاص خیال رکھنا چاہیے ، مثلاً ظلم نہ کرنا ان کی خوراک کا خیال رکھنا طاقت سے زیادہ بوجھ نہ لادنا وغیرہ ۔۔آیئے جانوروں کے چند حقوق پڑھیے:

(1)جانوروں کو سیراب کرنا : روایت ہے حضرت عمرو ابن شعیب سے وہ اپنے والد سے وہ اپنے دادا سے راوی فرماتے ہیں کہ نبی کریم صلی الله علیہ وسلم جب بارش کی دعا کرتےتو کہتے الٰہی اپنے بندوں اپنے جانوروں کو سیراب کر اپنی رحمت پھیلا دے اپنے مردہ شہرکو زندہ کردے ۔ (کتاب:مرآۃ المناجیح شرح مشکوٰۃ المصابیح جلد:2 ، حدیث نمبر:1506)

(2)ظلم نہ کرنا: روایت ہے حضرت سہیل ابن حنظلیہ سے فرماتے ہیں رسول اﷲ صلی اللہ علیہ و سلم ایک اونٹ پر گزرے،جس کی پیٹھ پیٹ سے مل گئی تھی تو فرمایا ان بے زبان جانوروں میں اﷲ سے ڈرو ان پر سوار ہو جب وہ لائق سواری ہوں اور انہیں چھوڑ دو لائق سواری کی حالت میں ۔(مرآۃ المناجیح شرح مشکوٰۃ المصابیح جلد:5 ، حدیث نمبر:3370)

(3)پیٹھ کو منبر نہ بناؤ : روایت ہے حضرت ابوہریرہ سے وہ نبی کریم صلی اللہ علیہ و سلم سے راوی کہ فرمایا : اپنے جانوروں کی پیٹھوں کو منبر نہ بناؤ کیونکہ اﷲ تعالٰی نے انہیں اس لیے تمہارا تابع کیا ہے کہ تم کو اس شہر تک پہنچادیں جہاں تم بغیرسخت مشقت کے نہ پہنچتے اور رب نے زمین تمہارے لیے ہی پیدا کی ہے تو تم زمین پر اپنی ضروريات پوری کرو ۔(مرآۃ المناجیح شرح مشکوٰۃ المصابیح جلد:5 ، حدیث نمبر:3916)

(4)جانوروں کی دیکھ بھال کرنا: حضرت ام مالک بہزیہ فرماتی ہیں کہ رسول الله صلی الله علیہ و سلم نے فتنہ کا ذکر فرمایا اسے بہت قریب کیا ،میں نے عرض کیا یارسول الله! اس میں بہترین آدمی کون ہوگا ؟ فرمایا وہ شخص جو اپنے جانوروں میں رہے،ان کا حق ادا کردے اور اپنے رب کی عباد ت کرے اور وہ شخص جو اپنے گھوڑے کا سر پکڑے ہو وہ دشمن کو ڈرائے اور دشمن اسے ڈرایئں۔( مرآۃ المناجیح شرح مشکوٰۃ المصابیح جلد:7 ، حدیث نمبر:5400 )

(5)جانوروں پر خرچ کرنا:حضرت عمر سے روایت ہے، فرماتے ہیں کہ بنی نضیر کے مال ان میں سے تھے جو اللہ تعالٰی نے اپنے رسول پر فئ فرمائے جن پر مسلمانوں نے گھوڑے دوڑائےنہ اونٹ چنانچہ یہ رسول اللہ صلی اللہ علیہ وسلم کے لیے خاص طور پر رہے کہ آپ اپنے گھر والوں کو ایک سال کا خرچ دےدیتے تھے پھرجو باقی بچتا اسے اللہ کی راہ میں ہتھیاروں جانوروں میں خرچ کرتےتھے ۔ (مرآۃ المناجیح شرح مشکوٰۃ المصابیح جلد:5 ، حدیث نمبر:4056 )