ارشاد خداوندی ہے: قُلْ اِنْ كَانَ اٰبَآؤُكُمْ وَ اَبْنَآؤُكُمْ وَ اِخْوَانُكُمْ وَ اَزْوَاجُكُمْ وَ عَشِیْرَتُكُمْ وَ اَمْوَالُ اﰳقْتَرَفْتُمُوْهَا وَ تِجَارَةٌ تَخْشَوْنَ كَسَادَهَا وَ مَسٰكِنُ تَرْضَوْنَهَاۤ اَحَبَّ اِلَیْكُمْ مِّنَ اللّٰهِ وَ رَسُوْلِهٖ وَ جِهَادٍ فِیْ سَبِیْلِهٖ فَتَرَبَّصُوْا حَتّٰى یَاْتِیَ اللّٰهُ بِاَمْرِهٖؕ-وَ اللّٰهُ لَا یَهْدِی الْقَوْمَ الْفٰسِقِیْنَ۠(۲۴) (پ 10، التوبۃ: 24) ترجمہ کنز الایمان: تم فرماؤ اگر تمہارے باپ اور تمہارے بیٹے اور تمہارے بھائی اور تمہاری عورتیں اور تمہارا کنبہ اور تمہاری کمائی کے مال اور وہ سودا جس کے نقصان کا تمہیں ڈر ہے اور تمہارے پسند کے مکان یہ چیزیں اللہ اور اس کے رسول اور اس کی راہ میں لڑنے سے زیادہ پیاری ہوں تو راستہ دیکھو(انتظار کرو) یہاں تک کہ اللہ اپنا حکم لائے اور اللہ فاسقوں کو راہ نہیں دیتا۔

محبت کیا چیز ہے محبت آخر کیا چیز ہے کہ بندہ اپنے محبوب پر سب کچھ وار دینے کے لئے تیار ہو جاتا ہے لہذا یہ جاننا ضروری ہے کہ محبت کسے کہتے ہیں؟ جو عشق اللہ رسول کی ذات سے ہو اسے عشق حقیقی کہتے ہیں۔

امام غزالی رحمۃ اللہ علیہ مکاشفۃ القلوب میں فرماتے ہیں: محبت اس کیفیت اور جذبے کا نام ہے جو کسی پسندیدہ چیز کی طرف طبیعت کے میلان کو ظاہر کرتا ہے۔ اگر یہ میلان شدت اختیار کر جائے تو اسے عشق کہتے ہیں اس میں زیادتی ہوتی رہتی ہے یہاں تک کہ عاشق محبوب کا بندہ بے دام بن جاتا ہے اور مال و دولت یہاں تک کہ جان تک اس پر قربان کر دیتا ہے۔

محبت اور عشق کے معنی و مفہوم میں قدرے فرق ہے کیونکہ اللہ و رسول سے محبت تو ہر مسلمان کرتا ہے مگر عاشق کا درجہ کوئی کوئی پاتا ہے۔

اعلیٰ حضرت رحمۃ اللہ علیہ کے نزدیک عشق: اعلیٰ حضرت رحمۃ اللہ علیہ فرماتے ہیں: محبت کے لغوی معنی ہیں جب محبت پختہ ار موکدہ یعنی بہت زیادہ پکی ہو جائے تو اسے عشق کہتے ہیں پھر جسکی اللہ و رسول سے پختہ محبت ہو جائے اور اس پر محبت کے آثار ظاہر ہو جائیں کہ وہ ہمہ وقت اللہ کے ذکرو فکر میں اور اسکی اطاعت میں مصروف رہتا ہے تو پھر کوئی رکاوٹ نہیں کہ اس کی محبت کو عشق کہا جائے۔ محبت ہی کا دوسرا نام عشق ہے۔ (فتاویٰ رضویہ، 21/ 115ملتقطاً)

نبی کریم ﷺ نے فرمایا: تم میں سے کوئی اس وقت تک کامل مومن نہ ہو گا جب تک کہ میں اسے اس کے باپ اسکی اولاد اور تمام لوگوں سے زیادہ محبوب نہ ہو جاؤں۔ (مسلم، ص 47، حدیث: 169)

اللہ ہمیں اللہ و رسول کی ذات سے عشق کرنے کی توفیق عطا فرمائے۔ آمین