اللہ پاک نے حضور علیہ الصلوۃ والسلام کو بہت سارے کمالات عطا فرمائے ہیں آپ کے ان کمالات میں سے ایک کمال تربیت فرمانا بھی ہے آپ نے ظاہری اعمال کے ساتھ ساتھ باطنی اعمال کی طرف بھی توجہ دلائی ان میں سے ایک اخلاص بھی ہے آپ نے اخلاص کی اہمیت بھی بیان فرمائی:

رضائے الٰہی کے لیے خرچ: حضرت سیدنا سعد بن ابی وقاص رَضِیَ اللہُ تَعَالٰی عَنْہُ سے مَروی ہے کہ حضور نبی کریم رؤف رحیم صَلَّی اللہُ تَعَالٰی عَلَیْہِ وَاٰلِہٖ وَسَلَّم نے اِن سے ارشاد فرمایا : ’’تم رضائے اِلٰہی کے لئے جو کچھ بھی خرچ کرو گے تمہیں اُس کااجر دیاجائے گا یہاں تک کہ جولقمہ تم اپنی زوجہ کو کھلاتے ہو اُس پر بھی اَجر دیا جائے گا۔ (فیضان ریاض الصالحین جلد:3 ، حدیث نمبر:292)

زندگی خوشگواری: حضرتِ سَیِّدُنا ابو ہریرہ رَضِیَ اللہُ تَعَالٰی عَنْہُ سے روایت ہے کہ حضور نبی رحمت صَلَّی اللہُ تَعَالٰی عَلَیْہِ وَاٰلِہٖ وَسَلَّم نے ارشاد فرمایا : ’’جو کسی مریض کی عیادت کرے یااللہ عَزَّ وَجَلَّ کی رضا کے لیے اپنے ( مسلمان ) بھائی کی زیارت کرے تو ایک پکار نے والا آواز دیتا ہے کہ تیری زندگی خوشگوار ہو اور تیرا چلنا باعث برکت ہو اور تونے جنت میں گھر بنالیا ۔(فیضان ریاض الصالحین جلد:4 ، حدیث نمبر:362 )

اخلاص کی برکت: حضرت ابوہریرہ سے روایت ہےفرماتے ہیں رسول الله صلی اللہ علیہ وسلم نے فرمایا جو ایمان و اخلاص سے رمضان کے روزے رکھے اس کے پچھلے گناہ بخش دیئے جاتے ہیں اور جو رمضان میں ایمان و اخلاص سے راتوں میں عبادت کرے تو اس کے پچھلے گناہ بخش دیئے جائیں گے اور جو شب قدر میں ایمان و اخلاص کے ساتھ عبادت کرے تو اس کے پچھلے گناہ بخش دیئے جائیں گے۔(مرآۃ المناجیح شرح مشکوٰۃ المصابیح جلد:3 ، حدیث نمبر:1958)

رضائے الٰہی: رسولﷲ صلی اللہ علیہ وسلم نےفرمایا :جو رضائے الٰہی کی تلاش میں ایک دن روزہ رکھے توﷲ اسے دوزخ سے اتنا دور کردے گا جیسے اُڑنے والے کوّے کی دوری جب وہ بچہ ہو حتی کہ بوڑھا ہوکر مرجائے

(مرآۃ المناجیح شرح مشکوٰۃ المصابیح جلد:3 ، حدیث نمبر:2074)

گناہ معاف: حضرت معقل ابن یسار مزنی سےروایت ہے کہ نبی کریم صلی اللہ علیہ و سلم نے فرمایا کہ جو رضائے الٰہی کے لیے سورہ یٰس پڑھے اس کے گزشتہ گناہ بخش دیئے جائیں گے لہذا اسے مرنے والے کے پاس پڑھا کرو۔ (مرآۃ المناجیح شرح مشکوٰۃ المصابیح جلد:3 ، حدیث نمبر:2178)

اللہ پاک ہم سب کو اپنے تمام کام اخلاص کے ساتھ کرنے کی توفیق عطا فرمائے امین بجاہ النبی الامین صلی اللہ تعالی علیہ وسلم