مجاہد صحابی وہ خوش نصیب لوگ تھے جنہوں نے نبی کریم ﷺ کے ساتھ مل کر اللہ کے دین کی حفاظت کی۔ مجاہد اسے کہتے ہیں جو اللہ کی رضا کے لیے ہر مشکل برداشت کرے۔

اللہ پاک نے قرآن مجید میں مجاہدین کی تعریف بیان کرتے ہوئے ارشاد فرمایا: اِنَّ اللّٰهَ یُحِبُّ الَّذِیْنَ یُقَاتِلُوْنَ فِیْ سَبِیْلِهٖ صَفًّا كَاَنَّهُمْ بُنْیَانٌ مَّرْصُوْصٌ(۴) (پ 28، الصف: 4) ترجمہ: بیشک اللہ ان لوگوں سے محبت کرتا ہے جو اس کی راہ میں (یوں) صف بستہ ہو کر لڑتے ہیں گویا وہ ایک ایسسہ پلائی ہوئی دیوار ہیں۔

نبی کریم ﷺ مجاہدین صحابہ سے بہت محبت فرماتے تھے اس کی بڑی وجہ یہ تھی کہ یہ صحابہ ہر غم اور خوشی میں نبی کریم ﷺ کے ساتھ تھے۔ انہوں نے اپنا گھر، مال اور جان سب کچھ دین کے لیے قربان کر دیا۔ آپ ﷺ ان کی قربانی دیکھ کر بہت خوش ہوتے اور ان کے حق میں دعائیں فرماتے تھے۔

غزوہ بدر کی دعا: غزوہ بدر میں مسلمان صرف 313 تھے اور دشمن ہزار سے زیادہ تھے۔ اس موقع پر نبی کریم ﷺ نے سجدے میں رو کر دعا کی: یا اللہ! یہ تیرے چند مجاہد ہیں۔اگر آج یہ شہید ہو گئے تو زمین پر تیرا نام لینے والا کوئی نہ رہے گا۔ یہ دعا ثابت کرتی ہے کہ آقا علیہ السلام مجاہدین صحابہ سے کتنا پیار کرتے تھے۔

حضرت سعد بن ابی وقاص: غزوہ احد کے دن جب دشمن بہت قریب آگیا تو آپ ﷺ نے حضرت سعد کو اپنا تیر کا ترکش دیا اور فرمایا: اے سعد! تیر چلاؤ! میرے ماں باپ تم پر قربان۔ (بخاری، 3/37، حدیث: 4055)

احادیث میں مجاہدین کا مقام: آقا علیہ السلام نے مجاہدین صحابہ کے مرتبے کے بارے میں بہت سی باتیں ارشاد فرمائیں: آپ ﷺ نے فرمایا: اللہ کے راستے کا مجاہد اس بندے کی طرح ہے جو روزہ رکھے اور رات بھر نماز پڑھے۔ (مسلم، ص 804، حدیث: 4869)

آپ ﷺ نے فرمایا: جو شخص اللہ کے راستے میں زخمی ہو،وہ قیامت کے دن اس حال میں آئے گا کہ اس کے زخم سے خون بہہ رہا ہوگا۔اس کا رنگ خون کا ہوگا اور خوشبو کستوری کی ہوگی۔ (بخاری، 2/254، حدیث: 2803)

ان تمام دلائل سے پتہ چلتا ہے کہ نبی کریم ﷺ کے دل میں مجاہدین صحابہ کے لیے بہت عزت محبت اور شفقت تھی۔ مجاہد امت کا محافظ اور دین کا ستون ہے۔ آج ہم میدان جنگ نہیں جا سکتے،لیکن ہم علم کا جہاد، نفس کا جہاد اور برائی کے خلاف آواز اٹھانے کا جہاد کر سکتے ہیں۔اللہ پاک ہمیں صحابہ کرام کے نقشِ قدم پر چلنے کی توفیق عطا فرمائے۔ آمین