عاشقانِ رسول کی دینی تحریک دعوتِ اسلامی کے تحت 28 دسمبر 2023ء کو جامعۃ المدینہ بوائز فیضانِ مدینہ G-11اسلام آباد میں تخصصات آگاہی سیشن کا انعقاد کیا گیا جس میں دورۂ حدیث شریف کے طلبۂ کرام شریک ہوئے۔

تفصیلات کے مطابق اس سیشن میں دارالافتاء اہلسنت کے مفتی محمد ساجد عطاری مدنی نے تخصص کرنے کی اہمیت و ضرورت کیا ہے؟ اس حوالے سے طلبۂ کرام کی تربیت کی اور اس کے فوائد و ثمرات بتائے۔

سیشن کے دوران مفتی محمد ساجد عطاری مدنی کا کہنا تھا: لوگوں کے لئے بہتر شرعی رہنما بننے کے لئے ضروری ہے کہ ہم اپنے درسِ نظامی میں پڑھے ہوئے علوم کو up to date رکھیں۔ موجودہ زمانے میں پیش آنے والے نئے سے نئے مسائل پر ہماری نظر ہونی چاہیئے۔ ہمیں ان مسائل کا اور لوگوں کے درمیان رائج اصطلاحات و عقود و معاملات کا ادراک ہونا چاہیئے تاکہ ہم سے جب کوئی موجودہ زمانے کا مسئلہ پوچھے تو ہمیں اس کی بنیادی معلومات پہلے سے معلوم ہوں اور ہم اس کی رہنمائی کر سکیں۔

مفتی محمد ساجد عطاری مدنی کا مزید کہنا تھا کہ درس نظامی میں پڑھے گئے علوم کے انطباق (implementation) کا فن ہر طالب علم کو آنا چاہیئے۔ یہ دونوں چیزیں ہمیں تخصص کرنے سے حاصل ہوتی ہیں۔ ہمارا علمup to date بھی ہوتاہے اور انطباق کا فن بھی آجاتا ہے اس لئے طلبۂ کرام کو تخصص ضرور کرنا چاہیئے۔