صبح ہوتی ہے شام ہوتی ہے۔عمر یوں ہی تمام ہوتی ہے۔سال 2021 اختتام پزیر ہونے کو ہے اور عنقریب سال 2022 کا آغاز ہو جائے گا۔بحیثیتِ مسلمان ہمیں یہ غور کرنا چاہیے کہ ہم نے سال 2021 کس طرح گزارا؟نیکیاں کی یا معاذَاللہ گناہوں میں ہی پورا سال گزر گیا۔اس میں کوئی شک نہیں کہ جب موت آتی ہے تو گھر والے یہیں رہ جاتے ہیں۔صرف میّت کو تنگ و اندھیری قبر میں اتار دیا جاتا ہے۔ ہاں! صرف نیک عمل ہی قبر میں کام آتا ہے۔ عمومی صورت یہ ہوتی ہے کہ ہر فرد بس اسی فکر میں مبتلا ہو جاتا ہے کہ میرا کیا بنے گا؟اس بات کی فکر شاید کسی کو نہیں ہوتی کہ میّت کے ساتھ کیا ہو گا؟ اے کاش! میّت سے عبرت حاصل کرتے ہوئے ہم اپنی موت کی تیاری کرنے میں لگ جائیں۔ آج وقت ہے، ہمیں اپنے آنے والے کل کی فکر کرنی چاہیے۔نیک عمل کی صورت میں قبر و آخرت میں کام آنے والی نیکیاں اکٹھی کر لینی چاہئیں۔اس بات کو ذہن نشین کر لینا چاہیے کہ مرنے کے بعد صرف اور صرف نیک عمل کام آئے گا۔بلند و بالا کوٹھیاں،عالی شان محلات،اونچے اونچے مکانات، مال و دولت کی کثرت، بینک بیلنس، بڑے بڑے پلاٹ، لہلہاتے کھیت اور خوب صورت باغات،ان میں سے کچھ بھی قبر میں ساتھ نہیں جائے گا۔ بلکہ یہ سب کا سب ادھر ہی رہ جائے گا۔لہٰذا ہمیں چاہیے کہ آنے والے سال 2022 کو ہم نیکیاں کرتے ہوئے اور گناہوں سے بچتے ہوئے گزاریں۔گناہوں سے توبہ: ہمیں چاہیے کہ سب سے پہلے اپنے سابقہ گناہوں سے توبہ کریں اور یہ عزم کریں کہ آئندہ گناہ نہیں کریں گی۔ ان شاء اللہ۔ اپنا جائزہ لیں:محاسبہ کریں کہ گزشتہ سال ہم نے کس طرح گزارا؟ اگر ایسے امور کیے جو گناہوں پر مشتمل تھے تو اُن سے بچنے کی نیت کریں اور جو نیکیوں پر مشتمل کام کیے ان پر مزید استقامت کے ساتھ عمل کرنے کی نیت کریں۔نمازوں کی پابندی کریں:نماز ہر عاقل و بالغ، مرد و عورت مسلمان پر فرض ہے۔ لہٰذا! اگر نمازوں کی پابندی نہیں تھی تو نیت کریں کہ ان شاء اللہ اب میری کوئی نماز قضا نہیں ہو گی۔تلاوتِ قرآن:یہ بھی نیت کریں کہ روزانہ تلاوتِ قرآن کا معمول بنائے گی۔ اگر درست مخارج کے ساتھ تلاوت کرنا نہیں آتی تو اس سال ضرور سیکھیں گی۔درودِ پاک کی کثرت:درودِ پاک پڑھنے کے بے شمار فضائل و برکات ہیں۔ لہٰذا یہ زہن بنائے کہ اس سال سے روزانہ پابندی کے ساتھ درودِ پاک کی کثرت کریں گے۔حقوق العباد:یہ نیت بھی کریں کہ آنے والے سال میں حقوق العباد کا خیال رکھیں گی کہ ہماری وجہ سے کسی بھی مسلمان کی کوئی حق تلفی نہ ہو۔الغرض ہمارا یہ ذہن ہونا چاہیے کہ 2022 اور ہمارا زندگی کا آنے والا ہر سال اللہ پاک و رسول صلی اللہُ علیہ واٰلہٖ وسلم کی اطاعت و فرما ں برداری میں گزرے۔اللہ پاک ہمیں اپنی زندگی شریعت کے مطابق گزارنے کی توفیق عطا فرمائے اور ہمارا خاتمہ ایمان پر فرمائے۔اٰمین بجاہِ النبی الکریم صلی اللہُ علیہ واٰلہٖ وسلم