مدنی مرکز فیضانِ مدینہ فیصل آباد میں دعوتِ اسلامی کے دینی کاموں کے سلسلے میں ایک اہم میٹنگ ہوئی جس میں فیصل آباد ڈویژن کے نگران، شعبہ جات ذمہ داران، ڈسٹرکٹ نگران، تحصیل نگران، سب تحصیل نگران، ٹاؤن نگران اور سب ٹاؤن نگران اسلامی بھائیوں نے شرکت کی۔

میٹنگ کے اہم پوائنٹس:

٭24 جون کو ایک ماہ اور 12 دن کے قافلے٭12 دینی کاموں کا جائزہ ٭تقرری کرنٹ رپورٹ پر تبادلہ خیال۔

مرکزی مجلسِ شوریٰ کے رکن و نگرانِ پاکستان مشاورت حاجی محمد شاہد عطاری نے 12 دینی کاموں کی کارکردگی کا تفصیلی جائزہ لیتے ہوئے 24 جون 2025ء کو سفر کرنے والے ایک ماہ اور 12 دن کے قافلوں کے بارے میں گفتگو کی نیز اسلامی بھائیوں کو زیادہ سے زیادہ قافلوں میں سفر کرنے کی ترغیب بھی دلائی تاکہ دین کی خدمت میں اضافہ ہو سکے۔

اہلِ  بیتِ اطہار کے گھرانے سے تعلق رکھنے والے کراچی کے مشہور بزرگ حضرت سید عبد اللہ شاہ غازی رحمۃ اللہ علیہ کے سالانہ عرس کے سلسلے میں آج بروز بدھ 18 جون 2025ء کی شب کلفٹن کراچی (مزار شریف کے احاطے میں) میں عظیم الشان ”محفلِ نعت“ کا انعقاد کیا جائے گا جس کا مقصد آپ رحمۃ اللہ علیہ سے محبت و عقیدت کا اظہار کرنا ہے۔

اس عظیم الشان تقریب کا آغاز بعد نمازِ عشا تلاوتِ قراٰن و نعتِ رسولِ مقبول صلَّی اللہ علیہ واٰلہٖ وسلَّم سے کیا جائےگا جس کے بعد تقریباً 11:30 PM پر دارالافتاء اہلسنت (دعوتِ اسلامی) کے مفتی شفیق عطاری مدنی سنتوں بھرا بیان کریں گے اور آپ رحمۃ اللہ علیہ کی سیرت و تعلیمات پر روشنی ڈالتے ہوئے آپ رحمۃ اللہ علیہ کی ذاتِ مبارکہ کے دیگر پہلو کو بیان کریں گے۔

معلومات کے مطابق اس تقریب میں علمائے کرام، طلبۂ کرام اور مختلف شعبہ ہائے زندگی سے تعلق رکھنے والے عاشقانِ رسول اور زائرین کی بڑی تعداد شریک ہو گی۔ (کانٹینٹ:غیاث الدین عطاری)

دعوتِ اسلامی کے زیر اہتمام 14 جون 2025ء کی شب عالمی مدنی مرکز فیضانِ مدینہ کراچی میں ہفتہ وار مدنی مذاکرہ ہوا جس میں شہر کراچی کے عاشقانِ رسول براہِ راست جبکہ ملک و بیرونِ ملک ہزاروں عاشقانِ رسول مدنی چینل کے ذریعے شریک ہوئے۔ مدنی مذاکرے میں عاشقانِ رسول کی جانب سے دینی و معاشرتی سوالات کئے گئے جن کے امیر اہلسنت حضرت علامہ مولانا محمد الیاس عطار قادری دامت بَرَکَاتُہمُ العالیہ نے علم و حکمت سے بھر پور جوابات دیئے۔

مدنی مذاکرے کے چند مدنی پھول ملاحظہ کیجئے:

سوال: حکیم ترمذی کامزارکہاں ہے ؟انہیں علم کی دولت کیسے حاصل ہوئی؟

جواب: عارف بِاللہ حکیم محمدبن علی ترمذی کا مزارترمذ،ازبکستان میں ہے ۔یہ علم حاصل کرنے کے لیے جانے لگے تو بوڑھی ماں نے کہاکہ میری خدمت کون کرے گا؟آپ رک گئے اوران کی خدمت میں مصروف ہوگئے ۔اللہ پاک نے ماں کی خدمت کی برکت سے انہیں علم کی دولت عطافرمادی ۔

سوال:اپنی والدہ کے بارے میں آپ کیا فرماتے ہیں؟

جواب: ماں باپ کی خدمت اوران کا راضی ہونا بہت بڑی سعادت ہے ۔میری ماں بھی آخری وقت مجھ سے خوش تھیں۔آخری رات خلافِ معمول مجھے کہاکہ اپنے ہاتھ میرے نزدیک کروکہ میں اِسے چُوموں۔میں نے بڑھ کر اِن کے ہاتھ چُوم لئے ،پھر انہوں نے میرے ہاتھ بھی چُوم لئے ۔

سوال: آپ کے والدِ محترم کیسے تھے؟

جواب: میرے والدصاحب حاجی عبدالرحمٰن قادِری مذہبی آدمی تھے ،پوری داڑھی شریف تھی۔حج کے لیےگئے اورحج کے بعد جدہ (عرب شریف) میں لُولگنے سے وفات پاگئے ۔قصیدہ غوثیہ پڑھا کرتے تھے ۔جب قصیدہ غوثیہ پڑھتے تو چارپائی بلندہوجایا کرتی تھی۔ بھولے بھالے تھے۔نگائیں جھکا کرچلاکرتے تھے ۔

سوال: کیاہرایک سے حُسنِ اَخلاق سے پیش آنا چاہئے؟

جواب:جی ہاں! ایک آدمی کی اِصلاح گویا پورے خاندان کی اِصلاح ہے ۔اس لیے ایک ایک کوراضی رکھنا چاہئے، کسی سے بےرُخی اوربداخلاقی نہ کی جائے تاکہ کوئی ہم سے بچھڑکر کہیں اورنہ نکل جائے کیونکہ آجکل طرح طرح کے فتنے ہیں ۔

سوال: گوشت کھانے کے بعدکولڈ ڈرنک پی جاتی ہے ،اس بارے میں آپ کیا فرماتے ہیں ؟

جواب: کولڈ ڈرنک(ٹھنڈی بوتل) مجموعی طورپرصحت ومعدے کے لیے نقصان دہ ہے ۔ان کا استعمال شوگرکا مرض پیداکرتاہے ،وزن بڑھاتاہے ۔ان میں چینی کی مقداربہت زیادہ ہوتی ہے جس سے جسم میں چربی چڑھتی ہے ، ان کے استعمال سے پیشاب میں شوگرآنا شروع ہوجاتی ہے ۔ان میں موجودمٹھاس اورتیزابیت سے دانتوں کو نقصان پہنچتاہے ،ان کے استعمال سے کیلشیم جسم سے خارج ہوناشروع ہوجاتا ہے جس سے ہڈیاں کمزور ہوتی ہیں ۔ ان کی جگہ بغیر نمک اوربغیرچینی کے کچی لسی یا لیموں پانی استعمال کیا جائے ۔

سوال: زیادہ نمک کے استعمال کے بارے میں آپ کیا فرماتے ہیں ؟

جواب : نمک زیادہ استعمال کریں گے تو گُردوں کو زیادہ محنت کرنا پڑے گی ،یہ فیل بھی ہوسکتے ہیں ۔تربوز،کھیرے وغیرہ کھاتے ہوئے نمک استعمال نہ کرنا مناسب ہے ۔ Pink Salt (لاہوری نمک)استعمال کرنا چاہئے ۔کالانمک بھی مفیدہے ۔عبادت پر قوت حاصل کرنے کے لیے اپنی صحت کا خیال رکھیں گے تواس سے بڑھاپے میں بھی آسانی ہوگی ۔

سوال: چینی کے استعمال کے بارے میں کچھ ارشادفرمادیں ۔

جواب: سفیدچینی(White Sugar) کا استعمال بہت زیادہ ہے ۔دیسی گُڑاستعمال کیا جائے ۔میں حتی الامکان چینی سے بچتاہوں ۔دعوت اسلامی کے تمام مدارس المدینہ اورجامعۃ المدینہ میں چینی کی جگہ دیسی گُڑ استعمال کیا جائے ۔

سوال: اس مدنی مذاکرے میں امیرِ اہلسنت دامت برکاتہم العالیہ نے کن کے ایصالِ ثواب کے لیے نیاز کرنے کی ترغیب ارشاد فرمائی؟

جواب: مسلمانوں کے تیسرے خلیفہ، امیرالمؤمنین حضرت عثمانِ غنی رضی اللہ عنہ کے ایصالِ ثواب کی۔ان کا یوم شہادت 18ذی الحج شریف ہے ۔

سوال: اِس ہفتے کارِسالہ ” باپ کی عظمت وشان “ پڑھنے یاسُننے والوں کوامیراہل سنت نے کیا دُعا دی ؟

جواب: یا اللہ پاک!جو کوئی رسالہ ”باپ کی عظمت وشان“ کے 22 صفحات پڑھ یا سُن لے، اُس کے ماں باپ اس سے ہمیشہ راضی رہیں اور وہ والدین کو ساتھ لئے بے حساب جنت الفردوس میں داخل ہونے کی سعادت پائے۔اٰمِیْن بِجَاہِ خاتم النَّبیین صلَّی اللہ علیہ واٰلہٖ وسلَّم

اسلام آباد: (13 جون 2025ء) شعبہ فیضان آن لائن اکیڈمی گرلز کا ماہانہ مدنی مشورہ دعوتِ اسلامی کے مدنی مرکز فیضان مدینہ اسلام آباد میں منعقد ہوا جس میں نگرانِ شعبہ مولاناسیّد غلام الیاس عطاری مدنی نے ”آخرت کی تیاری“ کے موضوع پر رہنمائی کی۔

گجرات: (13 جون 2025ء) دعوتِ اسلامی کے مدنی مرکز فیضانِ مدینہ گجرات میں نگرانِ شعبہ مدنی کورسز قاری محمد سعید عطاری ، نگرانِ ڈویژن مشاورت حاجی اقبال عطاری اور صوبائی ذمہ دار محمد عرفان مکی عطاری نے گجرات ڈویژن میں شعبہ مدنی کورسز کا اہم مدنی مشورہ لیا جس میں ڈسٹرکٹ ذمہ داران، تحصیل ذمہ داران اور یوسی ذمہ داران نے شرکت کی۔

اس موقع پر مختلف اہم امور پر تبادلہ خیال کیا گیا جن میں درج ذیل چیزیں شامل تھیں:

٭ذمہ داران کی فعالیت اور کارکردگی کا جائزہ لینا٭غیر فعال ذمہ داران کو فعال بنانے کے اقدامات طے کرنا٭ہر ماہ ڈسٹرکٹ نگران اور تحصیل ذمہ داران کے درمیان مشورہ کرنے کا نظام٭ہفتہ وار اجتماعات میں شعبہ مدنی کورسز کے لئے عارضی آفس کا قیام ٭ہفتہ اجتماع میں کورسز کرنے والے اسلامی بھائیوں کے لئے علیحدہ حلقہ لگانا٭کورسز کرنے والے اسلامی بھائیوں کے لئے خصوصی اجتماعات٭پیشگی اور عملی شیڈول ترتیب دینا٭مختصر وقت میں معلم کورس کروانا٭ماہانہ قافلے میں سفر٭ماہانہ کارکردگی کی بروقت انٹری و جائزہ۔

اس کے علاوہ شعبہ مدنی کورسز کے تحت کارکردگی کو بہتر بنانے اور دیگر شعبہ جات کے امور میں تربیت بھی دی گئی نیز نمایاں کارکردگی پر شرکا کو تحائف دیئے گئے۔(رپورٹ: محمد رضوان شعبہ مدنی کورسز گجرات ڈویژن، کانٹینٹ:غیاث الدین عطاری)

ملتان: (10 جون 2025ء) پنجاب، پاکستان کے شہرِ ملتان کی معروف سیاسی و سماجی شخصیت مرحوم مختار علی انصاری کے ایصالِ ثواب کے لئے مدنی مرکز فیضانِ مدینہ میں محفلِ نعت منعقد ہوئی جس میں علاقے بھر سے مختلف شخصیات اور لوگوں کی بڑی تعداد نے شرکت کی۔

اس موقع پر مہمانِ خصوصی کے طور پر حضرت علامہ مولانا پروفیسر سید مظہر سعید کاظمی شاہ صاحب، دعوتِ اسلامی کی مرکزی مجلسِ شوریٰ کے رکن حاجی قاری محمد سلیم عطاری، سابق MPA اور وزیرِ صحت ڈاکٹر اختر ملک، سابق MNA اور میئر ملتان شیخ طارق رشید، MPA ملک عدنان ڈوگر، حاجی سعید انصاریاور دیگر اہم سیاسی رہنماؤں نے شرکت کی۔

دعوتِ اسلامی کے شعبہ معاونت برائے اسلامی بہنیں کے دینی کاموں کا فالو اپ لینے اور دینی کاموں میں مزید بہتری لانے کے لئے 12 جون 2025ء کو ملتان، پنجاب میں ڈسٹرکٹ و تحصیل ذمہ دار اسلامی بھائیوں کا مدنی مشورہ ہوا۔

اس موقع پر نگرانِ شعبہ غلام الیاس عطاری اور صوبائی ذمہ دار محمد اقبال عطاری نے ذمہ داران سے گفتگو کرتے ہوئے جن نکات پر مشاورت کی اُن میں سے بعض یہ ہیں:٭ہفتہ وار سنتوں بھرا اجتماع٭گلی گلی مدرسۃالمدینہ٭مدرسۃالمدینہ بالغات ٭فیضانِ صحابیات۔

علاوہ ازیں نگرانِ شعبہ نے ذمہ دار اسلامی بھائیوں کی 12 دینی کاموں کے حوالے سے ذہن سازی کی جس پر انہوں نے اچھی اچھی نیتیں کیں۔(رپورٹ: محمد علی شعبہ معاونت برائے اسلامی بہنیں صوبہ پنجاب آفس ، کانٹینٹ:غیاث الدین عطاری)

راہِ خدا عزوجل میں سفر کرنے ولے 12 ماہ قافلے کے عاشقانِ رسول کے لئے 2 دن کا سنتوں بھرا اجتماع دعوتِ اسلامی کے مدنی مرکز فیضانِ مدینہ حیدرآباد میں منعقد ہوا جس میں 12 ماہ قافلے کے صوبائی و ڈویژن ذمہ داران کی بھی شرکت ہوئی۔

اجتماع کے دونوں دن عاشقانِ رسول کی مختلف امور پر رہنمائی کی گئی جبکہ صوبائی ذمہ دار علی حسن عطاری نے قافلے کے شیڈول پر عمل کرنے، 12 ماہ قافلے کے مقاصد اور 12 دینی کاموں پر شرکا کی ذہن سازی کی۔

لاہور کے علاقے گوالمنڈی میں میڈیا ڈیپارٹمنٹ دعوتِ اسلامی کے ذمہ داران نے معروف سینئر اینکر پرسن اور تجزیہ نگار مبشر لقمان سے اُن کے دفتر میں ملاقات کی جس میں دعوتِ اسلامی کی دینی و فلاحی سرگرمیوں کے حوالے سے تبادلۂ خیال کیا گیا۔

ملاقات کے دوران مبشر لقمان کو دعوتِ اسلامی کے مدنی مرکز فیضانِ مدینہ جوہر ٹاؤن لاہور کا دورہ کرنے کی دعوت بھی دی گئی تاکہ وہ دعوتِ اسلامی کی خدمات کا براہِ راست مشاہدہ کرسکیں۔

میڈیا ڈیپارٹمنٹ دعوتِ اسلامی  کے ذمہ دار اسلامی بھائیوں کی لاہور، پنجاب میں سینئر صحافی و تجزیہ نگار اوریا مقبول جان سے ان کی رہائش گاہ پر ملاقات ہوئی۔

اس ملاقات میں ذمہ داران اور اوریا مقبول جان کے درمیان دعوتِ اسلامی کی دینی و فلاحی سرگرمیوں کے حوالے سے تفصیلی گفتگو ہوئی نیز ذمہ داران کی جانب سے اوریا مقبول جان کو مکتبۃ المدینہ کی دو اہم کتابیں ”آدابِ زندگی“ اور”اے لوگو!“ تحفے میں پیش کی گئیں۔

بعدازاں ذمہ داران میں موجود نگرانِ ڈیپارٹمنٹ محمد عثمان عطاری نے اوریا مقبول جان کو مدنی مرکز فیضانِ مدینہ جوہر ٹاؤن لاہو رکا وزٹ کرنے کی دعوت دی جس پر انہوں نے دعوتِ اسلامی کی خدمات کو سراہا اور اپنی نیک خواہشات کا اظہار کیا۔ (کانٹینٹ:غیاث الدین عطاری)

علمِ دین کے فروغ اور اصلاحِ معاشرہ کے لئے  ایجوکیشن ڈیپارٹمنٹ گرلز دعوتِ اسلامی کے تحت لاہور، پنجاب میں ”قائد اعظم کالج آف آلائیڈ ہیلتھ سائنسز اینڈ نرسنگ“ میں ایک اہم سیشن کا انعقاد کیا گیا جس میں کالج کی طالبات نے شرکت کی۔

سیشن کا آغاز تلاوتِ قراٰن اور نعتِ شریف سے ہوا جس کے بعد مبلغۂ دعوتِ اسلامی نے کامیابی کے راز اور کامیابی کے بنیادی عوامل پر روشنی ڈالی۔ اس دوران ذمہ دار اسلامی بہن نے شرعی مسائل اور اصلاحی نکات پر بھی گفتگو کی تاکہ طالبات دینی و دنیاوی دونوں میدانوں میں کامیابی حاصل کرسکیں۔

پنجاب کی معروف سیاسی شخصیت، سابق ایم پی اے جاوید اختر انصاری کے چچا  مختیار انصاری قضائے الہی سے انتقال کر گئے۔ اِنَّا لِلہِ وَاِنَّا اِلَیْہِ رٰجِعُوْن۔ مرحوم کی نماز جنازہ پنجاب کے شہر ملتان میں ادا کی گئی جس میں علاقے بھر سے لوگوں کی بڑی تعداد نے شرکت کی۔