دوسروں کے معاملات میں بےجا مداخلت ایک انتہائی نا پسندیدہ عمل ہے جو سماجی اور معاشرتی طور پر بہت نقصان دہ ہے دوسروں کے معاملات میں مداخلت کرنے سے انسان کو بسااوقات بہت شرمندگی کا سامنا کرنا پڑتا ہے اور لوگوں کی مذمت کا سامنا بھی کرنا پڑتا ہے جو ذہنی بے سکونی اور بے چینی کا سامنا کرواتی ہے۔

دوسروں کے معاملات میں مداخلت کرنے کا ایک سبب ان کے معاملات میں غیر ضروری دلچسپی ہے انکے پوشیدہ باتوں کو جاننے کی دلچسپی ہے قرآن کریم میں اس سے سختی سے منع کیا گیا ہے، جیسا کہ ارشاد باری تعالیٰ ہے: یٰۤاَیُّهَا الَّذِیْنَ اٰمَنُوا اجْتَنِبُوْا كَثِیْرًا مِّنَ الظَّنِّ٘-اِنَّ بَعْضَ الظَّنِّ اِثْمٌ وَّ لَا تَجَسَّسُوْا (پ 26، الحجرات: 12) ترجمہ: اے ایمان والو! بہت گمانوں سے بچو، بے شک بعض گمان گناہ ہوتے ہیں، اور عیب نہ ڈھونڈو۔

اس آیت کے تحت تفسیر صراط الجنان میں ہے کہ اس آیت میں حکم دیا گیا ہے کہ مسلمانوں کی عیب جوئی نہ کرو اور ان کے پوشیدہ حال کی جستجو میں نہ رہو جسے اللہ نے اپنی ستاری سے چھپایا ہے۔

اس آیت مبارکہ میں لوگوں کے معاملات میں تجسس اور بے جا مداخلت سے منع کیا گیا ہے اسی طرح لوگوں کے معاملات میں دخل اندازی کا سبب حسد بوریت وغیرہ بھی ہے جس سے مسلمانوں کو بچنے کی کوشش کرنی چاہیے لوگوں کے معاملات میں مداخلت کرنے سے رشتے اور دوستیاں کمزور پڑ جاتی ہیں بدگمانیاں بھڑ جاتی ہیں جبکہ اچھا گمان کرنا بھی نیکی ہے لہذا خود کو اور لوگوں کو برے گمان سے بچائے دوسروں کے کام میں بے جا مداخلت کرنے والے کی توجہ صرف دوسروں پر رہتی ہیں انکے حالات پر رہتی ہیں اور اپنے کاموں پر توجہ نہ دینے کی وجہ سے اسکے بہت سے کام خراب ہو جاتے ہیں اور کئی مشکلات کا سامنا کرنا پڑتا ہے الغرض لوگوں کے کاموں میں مداخلت سے بچا جائے کہ یہ ایک ممنوع کام ہے اور قرآن کریم میں بھی اس سے منع فرمایا گیا ہے۔

دوسروں کے کام میں مداخلت (دخل اندازی) سے بچنا انتہائی اہم اخلاقی اصول ہے۔ اسلام اور بزرگانِ دین نے ہمیشہ اس بات کی تلقین کی ہے کہ انسان کو اپنی اصلاح پر توجہ دینی چاہیے اور بلاوجہ دوسروں کے معاملات میں ٹانگ نہیں اڑانی چاہیے۔

نقصانات:

باہمی اعتماد کا خاتمہ: مسلسل دخل اندازی سے دوسرے شخص کو لگتا ہے کہ آپ اس کی صلاحیتوں پر شک کر رہے ہیں، جس سے رشتے میں دراڑ آ جاتی ہے۔

ذہنی دباؤ اور تناؤ: جب آپ ہر وقت دوسروں کے کاموں پر نظر رکھیں گے اور انہیں اپنی مرضی کے مطابق چلانے کی کوشش کریں گے، تو لامحالہ آپ خود بھی مستقل ذہنی تناؤ کا شکار رہیں گے۔

صلاحیتوں میں کمی: اگر آپ ہر کام خود سنبھالنے کی کوشش کریں گے تو دوسرے افراد کی اپنی صلاحیتیں نکھر کر سامنے نہیں آتیں اور وہ کبھی خود مختار نہیں بن پاتے۔

وقت کا ضیاع: اپنی بنیادی ذمہ داریوں پر توجہ دینے کے بجائے دوسروں کے کاموں میں الجھنے سے آپ کا قیمتی وقت برباد ہوتا ہے۔معاشرتی اور پیشہ ورانہ زندگی میں بہتری لانے کے لیے اس عادت سے بچنا نہایت ضروری ہے۔

حقیقی مسلمان کی پہچان: حدیثِ مبارکہ کے مطابق انسان کے اچھے مسلمان ہونے کی یہ نشانی ہے کہ وہ لایعنی (فضول اور غیر متعلقہ) باتوں کو چھوڑ دے۔ (ترمذی، 4/ 142، حدیث:2324)

حقِ تلفی اور گناہ: کسی کے ذاتی کام یا ذمہ داریوں میں دخل دینا، عیب جوئی کرنا یا بلااجازت مشورے دینا ناپسندیدہ اور حق تلفی کے زمرے میں آتا ہے۔

مداخلت نہ کرنے کے فائدے:

اعتماد میں اضافہ: جب آپ لوگوں کو ان کا کام خود کرنے دیتے ہیں، تو ان کی صلاحیتوں اور اعتماد میں اضافہ ہوتا ہے۔

تناؤ میں کمی: دوسروں کے کام میں ٹانگ اڑانے سے پیدا ہونے والی غیر ضروری بحث اور کشیدگی سے بچاؤ ممکن ہوتا ہے۔

وقت کی بچت: آپ اپنا قیمتی وقت اپنے اہداف اور ذاتی ترقی پر صرف کر سکتے ہیں۔

حدیث ِ مبارک میں ارشاد فرمایا: تم لوگوں کو (اپنے)شر سے محفوظ رکھو، یہ ایک صدَقہ ہے جو تم اپنے نفس پر کرو گے۔ (بخاری،2/150، حدیث:2518)

ایک دوسری روایت میں ہے کہ سرکارِدو عالم ﷺ نے صحابۂ کرام سے سوال کیا: کیا تم جانتے ہو کہ مسلمان کون ہے؟ انہوں نے عرض کی: اللہ اور اس کا رسول زیادہ جانتے ہیں۔ ارشاد فرمایا: مسلمان وہ ہے جس کی زبان اور ہاتھ سے(دوسرے) مسلمان محفوظ رہیں۔ ارشاد فرمایا: تم جانتے ہو کہ مومن کون ہے؟ صحابۂ کرام نے عرض کی: اللہ تعالیٰ اور اس کا رسول زیادہ جانتے ہیں۔ ارشاد فرمایا: مومن وہ ہے جس سے ایمان والے اپنی جانیں اور اموال محفوظ سمجھیں۔ (مسند امام احمد، 2/654، حدیث:6942)

اس سے ثابت ہوتا ہے کہ دوسروں کے کام میں مداخلت سے معاشرے میں بہت سے غلط نتائج نکلتے ہیں اور اللہ اور اس کے رسول کے نزدیک سب سے ناپسندیدہ عمل ہے لہذا ہمیں اس سے بچنے کی ضرورت ہے۔

اسلام ہمیں اچھے اخلاق حسن معاشرہ اور دوسروں کے حقوق کا خیال رکھنے کی تعلیم دیتا ہے انہی تعلیمات میں سے ایک تعلیم یہ ہے کہ بلا ضرورت دوسروں کے معاملات میں مداخلت نہ کی جائے ہر شخص کی اپنی نجی زندگی اور ذاتی معاملات ہوتے ہیں جن کا احترام کرنا ایک مسلمان کی ذمہ داری ہے بلا وجہ کسی کے معاملات میں دخل اندازی کرنا اکثر غلط فہمیوں جھگڑوں اور دل آزاری کا سبب بنتا ہے۔ نبی کریم ﷺ نے ارشاد فرمایا: آدمی کے اسلام کے حسن میں سے ہے کہ وہ ایسی بات چھوڑ دے جو اس کے متعلق نہ ہو۔(ترمذی، 4/ 142، حدیث:2324)

امیر اہل سنت حضرت علامہ مولانا محمد الیاس عطار قادری اپنی کتب و رسائل اور اپنے ملفوظات میں اپنی اصلاح کی فکر کرنے اور دوسروں کی خامیاں تلاش کرنے سے بچنے کی ترغیب دیتے ہیں جب انسان اپنی صلاح میں مصروف رہتا ہے تو اس کے پاس دوسروں کے معاملات میں مداخلت کرنے کا وقت نہیں رہتا اور معاشرے میں محبت امن اور بھائی چارہ فروغ پاتا ہے۔

اگر کسی مسلمان سے کوئی غلطی سرزد ہو رہی ہو تو اس کی اصلاح نرمی حکمت اور خیر خواہی کے ساتھ کرنی چاہیے نہ کہ تجسس غیبت یا بیجا مداخلت کے ذریعے۔

اللہ پاک نے ہمیں دوسروں کے عیب تلاش کرنے اور بدگمانی سے بچنے کی تعلیم دی ہے اس لیے ہر مسلمان کو چاہیے کہ وہ دوسروں کی عزت پردہ پوشی اور رازداری کا خیال رکھے۔

آئیے ہم عہد کریں کہ بلاوجہ دوسروں کے معاملات میں مداخلت نہیں کریں گے اور اپنی اصلاح کی کوشش کریں گے اور نیکی محبت اور حسن اخلاق کو عام کریں گے۔

قران پاک کی سورۃ الحجرات میں اللہ پاک کا ارشاد ہے: یٰۤاَیُّهَا الَّذِیْنَ اٰمَنُوا اجْتَنِبُوْا كَثِیْرًا مِّنَ الظَّنِّ٘-اِنَّ بَعْضَ الظَّنِّ اِثْمٌ وَّ لَا تَجَسَّسُوْا (پ 26، الحجرات: 12) ترجمہ: اے ایمان والو! بہت گمانوں سے بچو، بے شک بعض گمان گناہ ہوتے ہیں، اور عیب نہ ڈھونڈو۔ یہ آیت واضح کرتی ہے کہ دوسروں کے معاملات کی ٹوہ میں لگنا، ان کی زندگی میں جھانکنا اور بلا وجہ دخل دینا منع ہے۔

احادیث مبارکہ کی روشنی میں:

آقا جان ﷺ نے فرمایا کہ آدمی کے اسلام کی خوبی یہ ہے کہ وہ بےفائدہ چیزوں کو چھوڑ دے۔ (ترمذی، 4/ 142، حدیث:2324) اس حدیث سے معلوم ہوا کہ جس چیز سے ہمارا کوئی تعلق ہی نہیں ہے تو اس میں الجھنا بھی بالکل بے فائدہ ہے۔

لہذا انسان کو چاہیے کہ وہ دوسروں کے معاملات میں مداخلت کرنے کے بجائے اللہ نے جو اس پر فرائض مقرر کیے ہیں جس مقصد کے لیے وہ دنیا میں آیا ہے اس کی طرف اپنا دھیان دے۔ اگر وہ دوسروں کے عیب کی تلاش میں لگا رہے گا تو اللہ پاک اس کے عیب ظاہر کر دے گا۔اس لیے اس کے لیے بہترین یہی ہے کہ وہ دوسروں کے کام میں مداخلت سے بچے۔

اسلام ہمیں سکھاتا ہے کہ ہم دوسروں کے کام میں مداخلت کرنے سے بچیں۔کیونکہ اس کے بہت سارے نقصانات ہوتے ہیں۔اگر ہم کسی کے کام میں مداخلت کریں گے یعنی کسی کے عیب ظاہر کریں گے تو اللہ پاک بروز قیامت ہمارا عیب ظاہر کرے گا۔انسان کو ہر وقت اپنے معاملے میں اللہ پاک سے ڈرنا چاہیے نہ کہ دوسروں کے معاملے پر توجہ دے۔

انسان کو چاہیے کہ وہ اپنے مقصد پر دھیان دے کہ جس مقصد کے لیے وہ اس دنیا میں آیا ہے اس مقصد کو پورا کرے اگر وہ اپنے مقصد کی طرف دھیان دے گا تو دنیاوی لوگوں کے معاملات میں مداخلت کرنے سے بچ سکتا ہے۔

ہم اہل سنت ہیں تو ہمارا کام یہ ہونا چاہیے کہ ہم آقا ﷺ کی ہر ہر سنت پر عمل کرنے والے ہوں تو آقا علیہ السلام کا طریقہ مبارک یہ ہے کہ آپ نے کبھی بھی بے فائدہ بات نہیں کی۔

دوسروں کے کام میں مداخلت کرنے سے بچنے کے لیے ایک طریقہ یہ بھی ہے کہ انسان اپنے دل میں خوف خدا پیدا کرے کہ خوف خدا سے انسان دوسروں کے معاملے میں مداخلت کرنے سے بچتا ہے وہ ہر اس کام سے پرہیز کرتا ہے جو بے فائدہ ہوتی ہے اور ہر اس کام کو پسند کرتا ہے جس میں اللہ پاک کی مرضی ہو۔

ایک مسلمان کی شان یہ ہے کہ وہ اپنی ذمہ داریوں کو پورا کرے اور بلا ضرورت دوسروں کے معاملات میں مداخلت نہ کرے۔ بے جا مداخلت نہ صرف دل آزاری کا سبب بنتی ہے بلکہ گھروں، رشتوں اور معاشرے میں اختلافات بھی پیدا کرتی ہے۔

قرآنِ کریم میں اللہ پاک ارشاد فرماتا ہے: یٰۤاَیُّهَا الَّذِیْنَ اٰمَنُوا اجْتَنِبُوْا كَثِیْرًا مِّنَ الظَّنِّ٘-اِنَّ بَعْضَ الظَّنِّ اِثْمٌ وَّ لَا تَجَسَّسُوْا (پ 26، الحجرات: 12) ترجمہ: اے ایمان والو! بہت گمانوں سے بچو، بے شک بعض گمان گناہ ہوتے ہیں، اور عیب نہ ڈھونڈو۔

اسی طرح ایک اور مقام پر اللہ پاک ارشاد فرماتا ہے: وَ الَّذِیْنَ یُؤْذُوْنَ الْمُؤْمِنِیْنَ وَ الْمُؤْمِنٰتِ بِغَیْرِ مَا اكْتَسَبُوْا فَقَدِ احْتَمَلُوْا بُهْتَانًا وَّ اِثْمًا مُّبِیْنًا۠(۵۸) (پ 22، الاحزاب: 58) ترجمہ: اور جو ایمان والے مردوں اور عورتوں کو بے کیے ستاتے ہیں، انہوں نے بہتان اور کھلا گناہ اپنے سر لیا۔

رسولِ اکرم ﷺ نے فرمایا: مسلمان وہ ہے جس کی زبان اور ہاتھ سے دوسرے مسلمان محفوظ رہیں۔ (بخاری، 1/11، حدیث:9)

حضرت ابوذر رضی اللہ عنہ سے روایت ہے کہ رسولِ اکرم ﷺ نے فرمایا: تم لوگوں کو اپنے شر سے محفوظ رکھو، یہ ایک صدقہ ہے جو تم اپنے نفس پر کرو گے۔ (بخاری، 3/ 144، حدیث: 2518)

قرآنِ کریم اور احادیثِ مبارکہ سے معلوم ہوتا ہے کہ اسلام دوسروں کے معاملات میں بے جا مداخلت اور انہیں تکلیف پہنچانے سے منع فرماتا ہے۔ بے جا مداخلت بھی دوسروں کو اذیت پہنچانے کی ایک صورت ہے۔ دوسروں کو تکلیف دینا ناجائز و حرام اور جہنم میں لے جانے والا کام ہے۔ آج سوشل میڈیا نے بھی بے جا مداخلت کو آسان بنا دیا ہے۔ بغیر تحقیق تبصرے کرنا، دوسروں کی نجی زندگی پر رائے دینا، ہر خبر کو آگے پھیلانا اور لوگوں کی کمزوریاں تلاش کرنا ایک مسلمان کے شایانِ شان نہیں۔ ہمیں اپنی زبان، قلم اور سوشل میڈیا کے استعمال میں بھی اللہ تعالیٰ سے ڈرتے رہنا چاہیے۔

مداخلت یا دوسروں کے معاملات میں بےجا دخل اندازی ایک ایسا عمل ہے جو نہ صرف معاشرتی ناہمواریاں کو جنم دیتا ہے بلکہ اسلامی تعلیمات کے بھی خلاف ہے۔ قرآن اور حدیث میں واضح طور پر انسانوں کو انفرادی حقوق اور ذاتی امور کی حفاظت کی تاکید کی گئی ہے۔ اللہ تعالی نے ہر انسان کو اپنی زندگی گزارنے کی آزادی دی ہے۔ اور دوسروں کے معاملے میں بے جا دخل اندازی اس آزادی کی خلاف ورزی ہے۔ قرآن کریم کی تعلیمات میں انسانوں کو احترام،عدل اور مساوات کے ساتھ پیش آنے کا حکم دیا گیا ہے۔کسی کے معاملات میں بے جا مداخلت اس اصول کی نفی کرتا ہے۔اللہ تعالیٰ نے قرآن مجید کے پارہ 15 کی سورۃ بنی اسرائیل (اسراء)میں ارشاد فرمایا: وَ لَا تَقْفُ مَا لَیْسَ لَكَ بِهٖ عِلْمٌؕ-اِنَّ السَّمْعَ وَ الْبَصَرَ وَ الْفُؤَادَ كُلُّ اُولٰٓىٕكَ كَانَ عَنْهُ مَسْـٴُـوْلًا (۳۶) (پ 15، بنی اسرائیل: 36) ترجمہ کنز الایمان: اور اس بات کے پیچھے نہ پڑ جس کا تجھے علم نہیں بےشک کان اور آنکھ اور دل ان سب سے سوال ہونا ہے۔

مداخلت کے معاشرتی اثرات: اسلامی معاشرہ احسان عدل اور بھائی چارے پر مبنی ہے۔اگر کوئی دوسروں کے معاملے میں بے جا مداخلت کرتا ہے تو یہ معاشرتی توازن کو بگاڑ دیتا ہے۔بےجا مداخلت سے لوگوں کے دلوں میں ایک دوسرے کے خلاف بغض پیدا ہوتا ہے۔رشتے خراب ہوتے ہیں اور معاشرتی ناہمواریاں جنم لیتی ہیں۔دوسروں کے معاملات میں مداخلت بعض اوقات جھگڑوں اور اختلافات کا سبب بھی بنتی ہے۔جو معاشرے میں فساد کا باعث بن سکتا ہے۔اسلام ہمیں دوسروں کی مدد اور خیر خواہی کی ترغیب دیتا ہے۔لیکن یہ خیر خواہی اس وقت ہونی چاہیے جس وقت ضرورت ہو اور جب دوسرے فرد نے مدد کی درخواست کی ہو۔

نبی کریم ﷺ نے ارشاد فرمایا: خادمِ رسول ابو حمزہ حضرت انس بن مالک رضی اللہ عنہ سے روایت ہے کہ حضور نبی پاک ﷺ نے ارشاد فرمایا: تم میں سے کوئی اس وقت تک (کامل) ایمان والا نہیں ہوسکتا جب تک کہ اپنے (مسلمان)بھائی کے لئے بھی وہی چیز پسند نہ کرے جووہ اپنے لئے پسند کرتا ہے۔ (بخاری، 1/16، حدیث:13)

یہ حدیث ہمیں اس بات کی تاکید کرتی ہے کہ دوسروں کے ساتھ بھلائی اور خیر خواہی سے پیش آنا چاہیے۔لیکن اس بھلائی کے لیے حدود کا خیال رکھنا ضروری ہے۔مدد اور خیر خواہی کا معنی یہ نہیں کہ دوسروں کے معاملات میں بنا اجازت دخل دیا جائے۔

دیگر احادیث نبوی ﷺ میں بھی اس موضوع پر واضح ہدایات موجود ہیں۔ حضرت ابوہریرہ رضی اللہ عنہ بیان کرتے ہیں کہ رسولُ اللہ ﷺ نے ارشاد فرمایا: آدمی کے اسلام کی خوبی میں سے یہ بھی ہے کہ وہ بے فائدہ کاموں کو چھوڑ دے۔ (ترمذی، 4/ 142، حدیث:2324)

یہ حدیث مسلمانوں کے لیے واضح رہنمائی فراہم کرتی ہے۔اگر کوئی معاملہ آپ سے متعلق نہیں تو اسے چھوڑ دو یعنی اس معاملے میں مداخلت نہ کرو۔رسول اللہ کے اس فرمان میں حکمت یہ ہے کہ جب انسان دوسروں کے معاملات میں دخل اندازی کرتے ہیں تو وہ فتنہ بغض اور ناچاکی کا سبب بنتے ہیں۔

مداخلت اور آج کا معاشرہ: موجودہ دور میں مداخلت کے بہت سے مسائل درپیش ہیں۔ سوشل میڈیا اور دیگر موصلاتی ذرائع سے لوگ دوسروں کی ذاتی زندگیوں میں بلا وجہ دخل دیتے ہیں۔اسلام ہمیں اس بات کی تاکید کرتا ہے کہ ہم ایک دوسرے کی ذاتی معاملات کی عزت کریں اور بنا وجہ کسی کے معاملات میں دخل اندازی کرنے سے گریز کریں۔ بےجا مداخلت کے کئی منفی اثرات مرتب ہوتے ہیں۔ جو فرد معاشرت اور رشتوں پر براہِ راست اثر انداز ہوتے ہیں۔کچھ نتائج درج ذیل ہیں:

رشتوں میں خرابی: جب کوئی شخص دوسرے کے معاملات میں بے جا مداخلت کرتا ہے تو اس سے رشتوں میں تناؤ اور اختلافات پیدا ہوتے ہیں۔اور بعض اوقات غیر ضروری مداخلت غلط فہمیاں اور دوریاں پیدا کرتی ہیں۔ جو رشتوں کو نقصان پہنچانے کا سبب بنتی ہے۔

اعتماد کی کمی: دوسروں کے معاملات میں بے جا مداخلت سے ایک دوسرے میں اعتماد کم ہو جاتا ہے کیونکہ جب بار بار بغیر کسی وجہ کے دوسروں کے معاملات میں دخل اندازی کریں گے تو وہ شخص آپ سے دور رہنے لگتا ہے۔

ذہنی تناؤ: مداخلت کرنے سے نہ صرف جس شخص کے معاملات میں دخل دیا جاتا ہے وہ متاثر ہوتا ہے۔بلکہ مداخلت کرنے والے کے لیے بھی ذہنی دباؤ بڑھتا ہے۔لوگوں کے معاملات میں بے جا مداخلت کرنا بلا وجہ کی فکری پریشانی کا سبب بن سکتا ہے۔

وقت کا ضیاع: دوسروں کے معاملات میں مداخلت کرنے والے اکثر اپنے وقت اور توانائی کو ضائع کر دیتے ہیں۔کیونکہ وہ اپنے معاملات اور ذمہ داریوں کی بجائے دوسروں کے معاملات کی فکر میں لگے رہتے ہیں۔

نبی کریم ﷺ نے تمام صحابۂ کرام رضی اللہ عنہم سے بے پناہ محبت فرمائی، خصوصاً ان خوش نصیب مجاہدین سے جنہوں نے اللہ تعالیٰ کے دین کی سربلندی کے لیے اپنی جان، مال، گھر بار اور ہر محبوب چیز قربان کر دی۔ نبی کریم ﷺ بھی ان مجاہدین کے ساتھ نہایت شفقت، محبت اور حسنِ سلوک سے پیش آتے تھے۔

ربِ کریم قرآنِ مجید میں بھی مجاہدین کی فضیلت بیان کرتے ہوئے ارشاد فرماتا ہے: لَا یَسْتَوِی الْقٰعِدُوْنَ مِنَ الْمُؤْمِنِیْنَ غَیْرُ اُولِی الضَّرَرِ وَ الْمُجٰهِدُوْنَ فِیْ سَبِیْلِ اللّٰهِ بِاَمْوَالِهِمْ وَ اَنْفُسِهِمْؕ- (پ 5، النساء: 95) ترجمہ کنز العرفان: مسلمانوں میں سے جو لوگ بغیر کسی عذر کے (جہاد سے) بیٹھ رہیں اور وہ جو اللہ کی راہ میں اپنے مالوں اور اپنی جانوں کے ساتھ جہاد کریں، یہ دونوں برابر نہیں۔

قرآنِ کریم کے بعد احادیثِ مبارکہ میں بھی کئی مقامات پر نبی کریم ﷺ نے مجاہدین کی عظمت اور ان سے اپنی محبت کا اظہار فرمایا۔

غزوۂ تبوک کے مجاہدین کی فضیلت: حضرت عثمان بن عفان رضی اللہ عنہ نے غزوۂ تبوک کے لیے بے مثال مالی مدد پیش کی۔ اس پر رسول اللہ ﷺ نے فرمایا: آج کے بعد عثمان جو بھی عمل کریں، یہ (عظیم خدمت) ان کے لیے کافی ہے۔ (ترمذی، 5/391، حدیث: 3720)

اللہ کی راہ میں ایک صبح یا شام کی فضیلت: رسول اللہ ﷺ نے مجاہدین کی عظمت بیان کرتے ہوئے فرمایا: اللہ کی راہ میں ایک صبح یا ایک شام گزارنا دنیا اور اس کی تمام چیزوں سے بہتر ہے۔ (بخاری، 2/251، حدیث: 2792)

حضرت جعفر بن ابی طالب کی شہادت پر محبت کا اظہار: غزوہ مؤتہ میں حضرت جعفر بن ابی طالب نے اسلامی لشکر کا علم سنبھالا۔ جب ایک ہاتھ کٹ گیا تو دوسرے ہاتھ سے جھنڈا پکڑا، دوسرا بھی کٹ گیا تو بازوؤں سے تھام لیا، یہاں تک کہ شہید ہوگئے۔

جب ان کی شہادت کی خبر آئی تو رسول اللہ ﷺ ان کے گھر تشریف لے گئے، ان کے بچوں کو اپنے سینے سے لگایا، ان کے سروں پر شفقت سے ہاتھ پھیرا اور ان کے لیے دعا فرمائی۔ پھر فرمایا: میں نے جعفر کو جنت میں فرشتوں کے ساتھ پرواز کرتے دیکھا۔ اسی وجہ سے انہیں جعفرِ طیار کہا جاتا ہے۔ (شرح زرقانی،3/356)

مجاہدین پر نبی کریم ﷺ کی شفقت و محبت: غزوۂ بدر کے موقع پر رسول اللہ ﷺ مجاہدین کی صفیں درست فرما رہے تھے۔ حضرت اسود بن غزیہ رضی اللہ عنہ صف سے کچھ آگے تھے۔ آپ ﷺ نے اپنے دستِ مبارک میں موجود ایک باریک لکڑی سے نہایت نرمی کے ساتھ انہیں صف میں برابر ہونے کا اشارہ فرمایا۔ حضرت اسود رضی اللہ عنہ نے عرض کیا: یارسول اللہ! آپ سے مجھے تکلیف پہنچی ہے، مجھے بدلہ لینے کی اجازت دیجیے۔ آپ ﷺ نے فوراً اپنا شکمِ مبارک کھول دیا اور فرمایا: بدلہ لے لو۔ حضرت اسود رضی اللہ عنہ آگے بڑھے، مگر بدلہ لینے کے بجائے آپ ﷺ کے شکمِ اقدس سے لپٹ گئے، اسے بوسہ دیا اور عرض کیا: یارسول اللہ! جنگ کا وقت ہے، معلوم نہیں کیا ہونے والا ہے، اس لیے میری خواہش تھی کہ میرا آخری عہد آپ کے جسمِ مبارک سے ہو۔ نبی کریم ﷺ نے ان کے لیے دعائے خیر فرمائی۔ یہ واقعہ اس بات کی روشن دلیل ہے کہ آپ ﷺ اپنے مجاہد صحابہ کرام رضی اللہ عنہم سے کس قدر محبت، شفقت اور حسنِ اخلاق کا معاملہ فرماتے تھے۔ (سیرۃ ابن ہشام، 2/626)

اللہ تعالی نے اپنے محبوب نبی حضرت محمد مصطفی ﷺ کو تمام جہانوں کے لیے رحمت بنا کر بھیجا آپ ﷺ کی مبارک زندگی محبت اور شفقت کا بہترین نمونہ ہے آپ ﷺ جس طرح بچوں سے عورتوں کمزوروں اور بزرگوں سے محبت فرماتے اسی طرح اللہ پاک کی راہ میں جہاد کرنے والوں سے بھی محبت فرماتے ہیں ان کی قربانی کی قدر فرماتے ان کی حوصلہ افزائی کرتے ہیں ان کی خدمت کرتے ہیں ان کے ساتھ جنگ میں شرکت کرتے حضور ﷺ کی مجاہدین سے محبت آپ کی مبارک ارشادات عملی زندگی ہی سے ظاہر نہیں بلکہ اللہ تعالی نے بھی قران کریم میں اپنی راہ میں جان و مال کو قربان کرنے والے اہل ایمان کا عظیم مقام بیان فرمایا ہے۔

ارشاد باری تعالی ہے: اِنَّ اللّٰهَ اشْتَرٰى مِنَ الْمُؤْمِنِیْنَ اَنْفُسَهُمْ وَ اَمْوَالَهُمْ بِاَنَّ لَهُمُ الْجَنَّةَؕ- (پ 11، التوبۃ: 111) ترجمہ: بے شک اللہ تعالیٰ نے مومنوں سے ان کی جانیں اور ان کے مال جنت کے بدلے خرید لی ہے۔

اس آیت مبارکہ میں اللہ تعالی نے مجاہدین کی عظیم شان بیان فرمائی کہ اس فرمان سے ہمیں یہ بھی پتہ چلا کہ جو لوگ اللہ پاک کی راہ میں جہاد کرتے ہیں اپنی جان اور مال کی قربانی دیتے ہیں وہ اللہ کے محبوب بندے ہیں اللہ تعالی نے ان کو جنت کی خوشخبری سنائی یہی وہ عظیم لوگ تھے جن سے ہمارے مکے مدنی مصطفی ﷺ بے حد محبت فرماتے تھے آپ ان کی ہمت بڑھاتے ہیں خوشی اور غمی میں ان کا ساتھ دیتے مجاہدین کا مقام رسول پاک ﷺ کے نزدیک بہت بلند ہے، جیسا کہ حضرت ابو ہریرہ رضی اللہ عنہ سے روایت ہےکہ رسول اللہ ﷺ نے فرمایا: اگر میری امت پر دشواری نہ ہوتی تو میں اس لشکر سے پیچھے نہ رہتا جو اللہ کی راہ میں جہاد کے لیے نکلتا ہے لیکن میرے پاس اتنی سواریاں نہیں کہ ان کو مہیا کر سکوں اور نہ ان کے پاس ہیں مجھے یہ بات ناگوار گزرتی کہ میں ان سے پیچھے رہ جاؤں۔ (ابن ماجہ،3/335، حدیث: 2753)

اس سے ثابت ہوا کہ حضور ﷺ مجاہدین سے کتنی محبت فرماتے ان سے جدا رہنا پسند نہ فرماتے الغرض حضور ﷺ کی حیات طیبہ مجاہدین سے محبت شفقت اور حوصلہ افزائی کا روشن نمونہ ہے آپ نے نہ صرف اللہ کی راہ میں نکلنے والوں کے لیے دل جوائی فرمائی بلکہ امت کو بھی ان کی عزت مدد اور قدر کرنے کی تعلیم دی آج ہماری بھی ذمہ داری ہے کہ اسلام کی سربلندی کے لیے اخلاص کے ساتھ دین کی خدمت کرنے والوں کی قدر کریں ان کے لیے دعا کریں اور اپنی زندگی کو رسول اللہ ﷺ کی سیرت کے مطابق گزارنے کی کوشش کریں۔

اللہ تعالی ہمیں اپنے محبوب ﷺ کی تعلیمات پر عمل کرنے اور ان کے نقش قدم پر چلنے کی توفیق عطا مرمائے۔ آمین

جن خوش نصیبوں نے ایمان کی حالت میں حضور ﷺ سے ملاقات کی اور ایمان پر ہی ان کا خاتمہ ہوا ان خوش نصیبوں کو صحابی کہتے ہیں۔ (نخبۃ الفکر، ص 11)

صحابی رسول ہونا اللہ پاک کی بہت بڑی نعمت ہے، کوئی بڑے سے بڑا ولی بھی کسی صحابی کے درجے کو نہیں پہنچ سکتا۔

آیت مبارکہ ہے: لَا یَسْتَوِیْ مِنْكُمْ مَّنْ اَنْفَقَ مِنْ قَبْلِ الْفَتْحِ وَ قٰتَلَؕ-اُولٰٓىٕكَ اَعْظَمُ دَرَجَةً مِّنَ الَّذِیْنَ اَنْفَقُوْا مِنْۢ بَعْدُ وَ قٰتَلُوْاؕ-وَ كُلًّا وَّعَدَ اللّٰهُ الْحُسْنٰىؕ- (پ 27، الحدید: 10) ترجمہ کنز الایمان: تم میں برابر نہیں وہ جنہوں نے فتحِ مکہ سے قبل خرچ اور جہاد کیا وہ مرتبہ میں اُن سے بڑے ہیں جنہوں نے بعد فتح کے خرچ اور جہاد کیا اور ان سب سے اللہ جنت کا وعدہ فرماچکا ہے۔

اس آیت مبارکہ میں اللہ پاک نے تمام صحابہ کرام سے جنت کا وعدہ فرمایا ہے۔

حضور ﷺ کی مجاہدین صحابہ سے محبت: نبی کریم ﷺ اپنے تمام صحابہ کرام سے محبت فرماتے تھے چنانچہ حضور ﷺ نے جنگ خندق کے موقع پر جب کفار مدینہ کا محاصرہ کیے ہوئے تھے اور کسی کے لئے شہر سے باہر نکلنا دشوار تھا تین بار ارشاد فرمایا کہ کون ہے جو قوم کفار کی خبر لائے تینوں مرتبہ حضرت زبیر بن عوام نے جو حضور ﷺ کی پھوپھی کے فرزند ہیں یہ کہا کہ میں یا رسول اللہ ﷺ خبر لاؤں گا حضرت زبیر کی جان نثاری سے خوش ہوکر حضور ﷺ نے فرمایا کہ ہر نبی کے لیے حواری ہوتے ہیں اور میرا حواری زبیر ہے اسی طرح حضرت زبیر کو بارگاہ رسالت سے حواری کا خطاب ملا جو کسی دوسرے صحابی کو نہیں ملا۔ (بخاری، 3/54، حدیث: 4113)

اسی طرح حضرت سعد رضی اللہ عنہ فرماتے ہیں کہ حضور ﷺ نے یوم احد میں میرے لئے اپنے والدین کو جمع فرمایا یعنی فرمایا تم پر میرے ماں باپ قربان اسی طرح اسی طرح جو صحابہ کرام جنگ بدر کے جہاد میں شریک ہو گئے اور تمام صحابہ میں ایک خصوصی شرف کے ساتھ ممتاز ہیں اور ان خوش نصیبوں کے فضائل میں ایک بہت ہی عظیم الشان فضیلت یہ ہے کہ ان سعادت مندوں کے بارے میں حضور ﷺ نے فرمایا کہ بے شک اللہ تعالی اہل بدرسے واقف ہے اور اس نے یہ فرما دیا ہے کہ تم اب جو عمل کرو بلاشبہ تمہارے لئے جنت واجب ہو چکی ہے یا یہ فرمایا کہ میں نے تمہیں بخش دیا۔ (بخاری، 3/12، حدیث: 3983)

حضرت ہلال بن انس سے روایت ہے کہ نبی کریم ﷺ نے حضرت زید و جعفر اور ابن رواحہ کے وصال کی خبر آنے سے پہلے ہی ان کی وفات کی خبر دی اور فرمایا: زید نے جھنڈا لیا وہ شہید ہو گئے پھر جعفر نے جھنڈا لیا وہ بھی شہید ہوگئے پھر ابن رواحہ نے جھنڈا لیا وہ بھی شہید ہو گئے اور آپ ﷺ کی آنکھوں سے آنسو جاری تھے یہاں تک کہ جھنڈا اس شخص نے لیا جو اللہ کی تلواروں میں سے ایک تلوار ہیں اور اللہ پاک نے انہیں فتح عطا فرمائی یعنی خالد بن ولید رضی اللہ عنہ۔ (بخاری، 2/548، حدیث: 3757)

جنگ احد کے موقع پر ایک شخص ابو عامر واحب کفار کی طرف سے لڑ رہا تھا اگر اس کے بیٹے حضرت حنظلہ پرچم اسلام کے نیچے جہاد کر رہے تھے حضرت حنظلہ نے حضور ﷺ عرض کی رسول اللہ ﷺ مجھے اجازت دیجئے کہ میں اپنی تلوار سے اپنے باپ ابو عامر کا سر کاٹ لوں مگر حضور ﷺ کی رحمت نہیں گوارا نہ فرمایا کہ بیٹے کی تلوار باپ کا سر کاٹے حضرت حنظلہ اس قدر جوش میں بھرے تھے کہ سر ہتھیلی پر رکھ کر انتہائی جانبازی کے ساتھ لڑتے ہوئے قلب لشکر تک پہنچ گئے اور کفار کے سپہ سالار ابو سفیان پر حملہ کردیا قریب تھا کہ حضرت حنظلہ کی تلوار ابو سفیان کا فیصلہ کر دے کہ اچانک پیچھے سے شداد بن اسود نے جھپٹ کر وار کو روکا اور حضرت حنظلہ کو شہید کر دیا حضرت حنظلہ کے بارے میں حضور ﷺ نے ارشاد فرمایا کہ فرشتے حنظلہ کو غسل دے رہے ہیں ان کی زوجہ سے دریافت کیا تو اس نے کہا کہ جنگ احد کی کی رات وہ اپنی بیوی کے ساتھ سوئےغسل کی حاجت تھی مگر جب دعوت جنگ کی آواز کان میں پڑی تو وہ اسی حالت میں شریک جنگ ہو گئے یہ سن کر حضور ﷺ نے فرمایا: یہی وجہ ہے جو فرشتوں نے انہیں غسل دیا اسی واقعہ کی بنا پر حضرت حنظلہ کو غسیل الملائکہ کے لقب سے یاد کیا جاتا ہے۔ (سیرت مصطفی، ص 263)

ان واقعات سے معلوم ہوا کہ حضور ﷺ اپنے صحابہ کرام سے محبت فرماتے ہیں اور اسی محبت کی بنا پر انہیں مختلف خطابات سے نوازتے۔

اسلام کی تاریخ قربانیوں کی تاریخ ہے اور اس تاریخ کے روشن ترین باب مجاہدین کے نام ہیں مجاہدین وہ ہستی ہیں جنہوں نے اپنا مال جان گھربار سب اللہ کی راہ میں قربان کیا اور دین اسلام کی اشاعت کے لیے اپنی تلواروں سے جہاد کیا اور کفر کو خاک میں ملایا اسلام نے بھی ان مجاہدین کو تنہا نہیں چھوڑا بلکہ اگر ہم تاریخ اسلام کو پڑھیں تو ہمیں ایسی بہت سی احادیث کریمہ ملیں گی جن میں مجاہدین کی حوصلہ افزائی کی گئی ہے اور ان کو بشارتوں سے نوازا گیا ہے۔

پیارے آقا ﷺ جب بھی کسی لشکر کو کسی علاقے کی طرف بھیجتے تو پہلے ان کے امیر کو بلاتے اور اسے وصیت فرماتے، جیسا کہ حضرت سلیمان بن بریدہ رضی اللہ عنہ اپنے والد سے روایت کرتے ہوئے فرماتے ہیں کہ پیارے آقا ﷺ جب کسی آدمی کو کسی لشکر یا سریّہ کا امیر بناتے تو آپ ﷺ اسے خاص طور پر اللہ سے ڈرنے اور جو ان کے ساتھ مسلمان (مجاہدین) ہوں ان کے ساتھ بھلائی کرنے کی وصیت فرماتے۔ (مسلم،ص 738، حدیث: 4522)

حضرت ابو تیمی رحمۃ اللہ علیہ اپنے والد سے روایت کرتے ہیں کہ ہم حضرت حذیفہ رضی اللہ عنہ کے پاس تھے کہ ایک آدمی نے کہا کہ اگر میں آقا علیہ السلام کا زمانہ پا لیتا تو آپ ﷺ کے ساتھ جہاد کرتا، حضرت حذیفہ رضی اللہ عنہ نے کہا: تم ایسا کرتے۔ تحقیق ہم آقا ﷺ کے ساتھ غزوہ احزاب کی رات سخت ہوا اور سردی دیکھ چکے ہیں، پیارے آقا نے ارشاد فرمایا: کیا تم میں سے کوئی ایسا آدمی نہیں جو اس قوم کی خبر میرے پاس لائے؟ اللہ اسے قیامت کے دن میرا ساتھ نصیب فرمائے، پیارے آقا نے تین مرتبہ یوں ہی ارشاد فرمایا: ہم خاموش رہے اور ہم میں سے کسی نے بھی پیارے آقا کو جواب نہ دیا تو آپ ﷺ نے ارشاد فرمایا: اے حذیفہ! کھڑے ہو جاؤ اور ہمارے پاس قوم کی خبر لے آؤ جب آپ ﷺ نے میرا نام لیا تو میرے لیے سوائے اٹھنے کے کوئی چارہ نہیں تھا، آقا نے فرمایا: جاؤ اور قوم کی میرے پاس خبر لے کر آؤ حضرت حذیفہ فرماتے ہیں کہ جب میں پیارے آقا کی طرف پشت پھیر کر چلنے لگا تو مجھے محسوس ہوا گویا کہ میں حمام میں چل رہا ہوں فرماتے ہیں میں خبر لے کر واپس آیا اور پیارے آقا کو خبر دی جب میں خبر دے کرفارغ ہو گیا تو مجھے سردی محسوس ہونے لگی تو پیارے آقا ﷺ نے مجھے اپنی بقیہ چادر اوڑھا دی جسے آپ اوڑھ کر نماز ادا کر رہے تھے اور میں صبح تک نیند کرتا رہا پس جب صبح ہو گئی تو آپ ﷺ نے فرمایا اے بہت سونے والے!اٹھ جاؤ۔ (مسلم، ص 763، حدیث: 4640)

حضرت انس بن مالک رضی اللہ عنہ سے روایت ہے فرماتے ہیں غزوہ احد کے دن پیارے آقا ﷺ سات انصاریوں اور قریش کے دو آدمیوں کے ہمراہ اکیلے رہ گئے جب پیارے آقا کو کفار نے گھیر دیا تو آپ ﷺ نے فرمایا: جو انہیں ہم سے ہٹائے گا اس کے لیے جنت ہے یا وہ جنت میں میرا رفیق ہوگا تو انصار میں ایک آدمی آگے بڑھا اور جنگ کی یہاں تک کہ شہید ہو گیا پھر بھی کافروں نے آپ ﷺ کو گھیرے رکھا تو پیارے آقا الصلٰوۃ والسلام نے دوبارہ وہی الفاظ ارشاد فرمائے پس انصار میں سے ایک آدمی آگے بڑھ کر لڑا یہاں تک کہ وہ شہید ہو گیا یہ سلسلہ برابر اسی طرح چلتا رہا یہاں تک کہ ساتوں انصاری شہید ہو گئے تو پیارے آقا نے اپنے قریشی ساتھیوں سے فرمایا: ہم نے اپنے ساتھیوں سے انصاف نہیں کیا۔ (مسلم، ص 764، حدیث: 4641)

غزوہ خندق کے دن پیارے آقا ﷺ نے لوگوں کو جہاد کے لیے بلایا اور اس کی ترغیب دی، تین بار پیارے آقا نے پکارا تینوں مرتبہ حضرت زبیر رضی اللہ عنہ نے آپ کی دعوت کو قبول کیا اور لبیک کہا تو پیارے آقا نے ارشاد فرمایا:ہر نبی کے کچھ خاص حواری ہوتے ہیں اور میرے حواری زبیر (رضی اللہ عنہ) ہیں۔ (بخاری، 3/54، حدیث: 4113)

حضرت سعد بن ابی وقاص رضی اللہ عنہ فرماتے ہیں کہ پیارے آقا علیہ السلام نے احد کے روز میرے لیے اپنے والدین کو جمع فرما دیا (یعنی فرمایا تھا کہ میرے ماں باپ تم پر قربان ہوں)۔ (مسلم، ص 1009، حدیث: 6235)

حضرت سہل بن سعد رضی اللہ عنہ فرماتے ہیں کہ پیارے آقا ﷺ ہمارے پاس تشریف لائے اور حال یہ کہ ہم خندق کھود رہے تھے اور اپنے کندھوں پر مٹی اٹھا رہے تھے تو پیارے آقا ﷺ نے ارشاد فرمایا: اے اللہ! زندگی تو صرف آخرت کی زندگی ہے بس تو مہاجرین اور انصار کی مغفرت فرما۔ (بخاری،2/264، حدیث: 2835)

صحابہ کرام علیہم الرضوان وہ ہستی ہیں کہ ان کی نیکیاں رب تعالی کی بارگاہ میں قبول ہیں ان کے جہاد رب تعالی کی بارگاہ میں قبول ہیں اللہ پاک ہمیں بھی مجاہدین والا ایمان اور جذبہ عطا فرمائے اور ہمیں ان کے نقش قدم پر چلنے والا بنائے۔ آمین

کریم ﷺ اپنے ساتھیوں (صحابہ کرام) سے بے پناہ پیار کرتے تھےآپﷺ نے فرمایا: جو مجھ سے محبت کرتا ہے اسے میرے صحابہ سے بھی محبت کرنی چاہیے۔ اسلام کی حفاظت کے لیے لڑنے والے مجاہدینِ صحابہ کے لیے آپ کے دل میں خاص شفقت، قدرومنزلت اور محبت تھی۔

یہ محبت چند عملی اور تاریخی مثالوں سے واضح ہوتی ہے:

خصوصی القابات: آپ ﷺ نے بہادر مجاہدین کو اللہ کی تلوار (جیسے حضرت خالد بن ولید) اور امت کا امین (جیسے حضرت ابوعبیدہ بن جراح) جیسے القابات سے نوازا۔

دعا اور تشویش: غزوات اور جنگوں کے دوران آپ ﷺ مجاہدین کی حفاظت کے لیے راتوں کو اٹھ کر دعائیں مانگتے۔ جنگِ بدر کے دن آپ ﷺ نے سجدے میں گڑگڑا کر ان کی کامیابی کے لیے دعا کی۔

فوجیوں کی ذاتی دیکھ بھال: آپ ﷺ جنگوں میں زخمی ہونے والے مجاہدین کی خود مرہم پٹی کرتے، ان کے اہل خانہ کا حال پوچھتے اور شہدا کے خاندانوں کی مالی معاونت فرماتے۔نبیِ کریم ﷺ نے مسلمانوں کو حکم دیا کہ وہ کبھی مجاہدینِ صحابہ کی توہین نہ کریں کیونکہ ان کا مقام و مرتبہ عام لوگوں سے بہت بلند ہے۔ ان کی قدر اور ان سے عقیدت ایمان کا لازمی حصہ ہے۔

نبیِ کریم ﷺ کی کئی صفات ہیں،آپ کی ایک صفت محبت بھی ہے جو ایک عظیم صفت ہے۔آقا ﷺ بچوں اور تمام صحابہ کرام علیہم الرضوان سے محبت فرماتے تھے۔ آئیے! آقا ﷺ کی صحابہ سے محبت کے چند واقعات پڑھتی ہیں۔

حضرت عبد اللہ بن مغفل رضی اللہ عنہ سے روایت ہے،رسولِ کریم ﷺ نے ارشاد فرمایا:میرے صحابہ کے متعلق اللہ سے ڈرو،اللہ سے ڈرو۔میرے صحابہ رضی اللہ عنہم کے بارے میں اللہ سے ڈرو،اللہ سے ڈرو، میرے بعد انہیں نشانہ نہ بناؤ کیونکہ جس نے ان سے محبت کی تو میری محبت کی وجہ سے ان سے محبت کی اور جس نے ان سے بغض رکھا تو میرے بغض کی وجہ سے ان سے بغض رکھا اور جس نے انہیں ستایا اس نے مجھے ستایا اور جس نے مجھے ستایا اس نے اللہ پاک کو تکلیف دی اور جس نے اللہ کو تکلیف دی تو قریب ہے کہ اللہ پاک اسے پکڑے۔ (ترمذی، 5 /302،حدیث:3864)

حضرت علامہ مولانا سید مفتی محمد نعیم الدین مراد آبادی رحمۃ اللہ علیہ فرماتے ہیں: مسلمان کو چاہیے کہ صحابہ کرام کا نہایت ادب رکھے،دل میں ان کی عقیدت و محبت کو جگہ دے،ان کی محبت حضور ﷺ کی محبت ہے اور جو بد نصیب صحابہ کرام کی شان میں بےادبی کے ساتھ زبان کھولے وہ دشمنِ خدا و رسول ﷺ ہیں۔ مسلمان ایسے شخص کے پاس نہ بیٹھیں۔(سوانحِ کربلا، ص 31)

اعلیٰ حضرت امامِ اہلِ سنت مولانا شاہ امام احمد رضا خان رحمۃ اللہ علیہ فرماتے ہیں:

اہلِ سنت کا ہے بیڑا پار اصحابِ حضور نجم ہیں اور ناؤ ہے عترت رسول اللہ کی

اسی طرح سرکار نے دیگر صحابہ کے فضائل بھی بیان فرمائے۔ ہمیں بھی تمام صحابہ سے پیار ہے ان شاءاللہ ان کے صدقے اپنا بیڑا پار ہے۔

اللہ پاک ہمیں ان نفوسِ قدسیہ کی سیرت کا مطالعہ کرنے اور ان کی سیرت پر عمل کرنے کی توفیق عطا فرمائے۔ آمین بجاہ خاتم النبیین ﷺ

مجاہد صحابہ کرام رضی اللہ عنہم وہ ہستیاں تھیں جنہوں نے دین کے لیے اپنی جان، مال، گھربار سب کچھ قربان کر دیا۔ رسول اللہ ﷺ کو ایسے جانبازوں سے بے پناہ محبت تھی۔ آج ہم اسی محبت کی ایک جھلک سنتی ہیں۔

ایک صحابی حضرت سعد رضی اللہ عنہ تھے، رنگ کالا تھا، ایک دن بارگاہِ رسالت میں حاضر ہو کر عرض کیا: یا رسول اللہ ﷺ! کیا میرے کالے رنگ کی وجہ سے مجھے جنت میں جانے سے روک دیا جائے گا؟ آپ ﷺ نے فرمایا: کیا تم اللہ اور رسول پر ایمان رکھتے ہو؟ عرض کیا: جی ہاں! میں 8 ماہ پہلے ہی مسلمان ہوا ہوں، فرمایا: خدا کی قسم! پھر تمہارا رنگ تمہیں جنت سے نہیں روکے گا۔ پھر عرض کیا: یا رسول اللہ ﷺ! جب بات ایسی ہے تو پھر مجھے کوئی رشتہ کیوں نہیں دیتا؟ آپ ﷺ نے فرمایا: تم فلاں صحابی کے ہاں جاؤ اور کہو کہ اللہ کے رسول ﷺ نے تمہاری بیٹی کا نکاح مجھ سے کر دیا ہے۔

وہ صحابی فوراً راضی ہو گئے اور نکاح کر دیا۔ آپ ﷺ نے حضرت سعد رضی اللہ عنہ کے لیے گھر کا سامان بھی خریدوایا۔ شادی کے فوراً بعد جہاد کا اعلان ہوا، حضرت سعد سب چھوڑ کر میدان میں پہنچ گئے اور بہادری سے لڑتے ہوئے شہید ہو گئے۔ جب آپ ﷺ کو خبر ملی تو خود تشریف لے گئے، ان کا سر اپنی گود میں رکھا، چہرہ صاف کیا اور فرمایا: اے سعد! تمہاری خوشبو کتنی پیاری ہے، تم اللہ و رسول کے کتنے پیارے ہو۔

اللہ اکبر! کیسا نرالا نصیب ہے۔ زمانہ جن کو دیکھنے کے لیے ترستا ہے وہ اپنے غلاموں پر کیسی شفقت فرما رہے ہیں۔ اللہ بھی جہاد کرنے والوں سے بہت محبت فرماتا ہے۔

فَالَّذِیْنَ هَاجَرُوْا وَ اُخْرِجُوْا مِنْ دِیَارِهِمْ وَ اُوْذُوْا فِیْ سَبِیْلِیْ وَ قٰتَلُوْا وَ قُتِلُوْا لَاُكَفِّرَنَّ عَنْهُمْ سَیِّاٰتِهِمْ وَ لَاُدْخِلَنَّهُمْ جَنّٰتٍ تَجْرِیْ مِنْ تَحْتِهَا الْاَنْهٰرُۚ-ثَوَابًا مِّنْ عِنْدِ اللّٰهِؕ-وَ اللّٰهُ عِنْدَهٗ حُسْنُ الثَّوَابِ(۱۹۵) (پ 4، آل عمران: 195) ترجمہ کنز العرفان: پس جنہوں نے ہجرت کی اور اپنے گھروں سے نکالے گئے اور میری راہ میں انہیں ستایا گیا اور انہوں نے جہاد کیا اور قتل کر دیے گئے تو میں ضرور ان کے سب گناہ ان سے مٹا دوں گا اور ضرور انہیں ایسے باغات میں داخل کروں گا جن کے نیچے نہریں جاری ہیں۔ یہ اللہ کی بارگاہ سے اجر ہے اور اللہ ہی کے پاس اچھا ثواب ہے۔

پیاری بہنو! اس واقعے سے ہمیں سبق ملتا ہے کہ صحابہ کرام نے اپنی خواہشات کو دین پر قربان کر دیا اس لیے اللہ نے انہیں دنیا و آخرت کی کامیابی عطا فرمائی۔ ہمیں بھی چاہیے کہ ہم اپنی زندگی دین کے مطابق گزاریں، نماز کی پابندی کریں، پردے کا اہتمام کریں اور دین کی خدمت کے لیے ہر وقت تیار رہیں۔ اگر ہم سچے دل سے اللہ اور رسول ﷺ سے محبت کریں گے تو ان شاء اللہ ہمیں بھی جنت کا بہترین اجر ملے گا۔

اللہ ہمیں بھی صحابہ جیسا ایمان اور قربانی کا جذبہ عطا فرمائے۔