زندگی اللہ تعالیٰ کی طرف سے ایک خوبصورت نعمت ہے، لیکن یہ زندگی ہمیشہ خوشیوں اور آسانیوں سے بھری نہیں رہتی۔ کبھی انسان خوش ہوتا ہے اور کبھی غمگین، کبھی کامیابی اس کے قدم چومتی ہے اور کبھی ناکامی کا سامنا کرنا پڑتا ہے۔ کبھی انسان خود کو مضبوط محسوس کرتا ہے اور کبھی حالات اسے اندر سے توڑ دیتے ہیں۔ ایسے مشکل وقت میں انسان کو کسی ایسے شخص کی ضرورت ہوتی ہے جو اس کا ہاتھ تھامے، اس کی بات سنے، اسے سمجھنے کی کوشش کرے اور اسے یہ احساس دلائے کہ وہ اکیلا نہیں ہے۔

کسی انسان کا سہارا بننا بہت بڑی نیکی ہے۔ سہارا صرف مالی مدد کا نام نہیں، بلکہ کسی پریشان شخص کو تسلی دینا، غم زدہ انسان کی بات سننا، مایوس شخص کو امید دلانا، کمزور انسان کا حوصلہ بڑھانا اور مشکل وقت میں اس کے ساتھ کھڑے رہنا بھی سہارا دینا ہے۔ بعض اوقات انسان کو کسی بڑے حل کی نہیں بلکہ صرف ایک ایسے شخص کی ضرورت ہوتی ہے جو خاموشی سے اس کے ساتھ کھڑا رہے۔

اللہ تعالیٰ قرآن کریم میں ارشاد فرماتا ہے: وَ تَعَاوَنُوْا عَلَى الْبِرِّ وَ التَّقْوٰى ۪- (پ 6، المائدۃ: 2) ترجمہ: نیکی اور پرہیزگاری کے کاموں میں ایک دوسرے کی مدد کرو۔

اسلام ہمیں محبت، ہمدردی، تعاون اور ایک دوسرے کی مدد کا درس دیتا ہے۔ ہمیں چاہیے کہ ہم اپنے اردگرد موجود لوگوں کے حالات کو سمجھیں۔ ہر مسکراتا ہوا انسان ضروری نہیں کہ اندر سے بھی خوش ہو۔ بعض لوگ اپنے دل کا دکھ چھپا کر دوسروں کے سامنے مسکراتے رہتے ہیں۔ اس لیے ہمیں دوسروں کے ساتھ نرمی، محبت اور اچھے اخلاق سے پیش آنا چاہیے۔

رسول اللہ ﷺ نے فرمایا: ترجمہ: جو شخص کسی مؤمن کی دنیاوی تکلیفوں میں سے کوئی تکلیف دور کرے گا، اللہ تعالیٰ قیامت کے دن اس کی تکلیفوں میں سے ایک تکلیف دور فرمائے گا، اور اللہ تعالیٰ بندے کی مدد میں رہتا ہے جب تک بندہ اپنے بھائی کی مدد میں رہتا ہے۔ (مسلم، ص 1110، حدیث: 6853)

اس حدیث سے ہمیں یہ سبق ملتا ہے کہ جو انسان دوسروں کی مدد کرتا ہے، اللہ تعالیٰ بھی اس کی مدد فرماتا ہے۔ اس لیے ہمیں کبھی کسی کی مدد کرنے کو معمولی نہیں سمجھنا چاہیے۔ کبھی ہماری ایک چھوٹی سی کوشش کسی انسان کے لیے بہت بڑی امید بن سکتی ہے۔ ہماری ایک اچھی بات کسی کے دل کو سکون دے سکتی ہے، ہماری ایک دعا کسی کے لیے طاقت بن سکتی ہے اور ہمارا مشکل وقت میں ساتھ دینا کسی کو دوبارہ کھڑے ہونے کا حوصلہ دے سکتا ہے۔

زندگی میں ہر انسان کو کبھی نہ کبھی سہارے کی ضرورت پڑتی ہے۔ آج اگر کوئی شخص مضبوط ہے تو ضروری نہیں کہ وہ ہمیشہ مضبوط ہی رہے۔ حالات بدلتے دیر نہیں لگتی۔ اس لیے ہمیں دوسروں کو کمزور سمجھ کر ان کا مذاق نہیں اڑانا چاہیے، بلکہ ان کے مشکل وقت میں ان کا سہارا بننا چاہیے۔ کیونکہ انسان کی اصل خوبصورتی اس بات میں نہیں کہ وہ صرف اپنی زندگی آسان بنائے، بلکہ اس بات میں ہے کہ وہ دوسروں کی زندگی میں بھی آسانی پیدا کرے۔

ہمیں چاہیے کہ ہم اپنے والدین، بہن بھائیوں، دوستوں، رشتہ داروں اور اپنے اردگرد کے لوگوں کے لیے محبت اور سہارا بنیں۔ کسی کے غم کو سنیں، کسی کی پریشانی میں اس کا ساتھ دیں، کسی کی غلطی پر اسے نرمی سے سمجھائیں اور کسی مایوس انسان کو امید دلائیں۔ یاد رکھیں، انسان کو ہمیشہ بڑے بڑے کاموں سے نہیں پہچانا جاتا، بلکہ کبھی کبھی چھوٹی چھوٹی نیکیوں سے بھی دلوں میں جگہ بن جاتی ہے۔

دین اسلام ہمیں صرف عبادات کا ہی نہیں بلکہ انسانیت کا درس بھی دیتا ہے۔ اسلام کی بنیاد ہی بھائی چارے، ہمدردی اور ایک دوسرے کے سہارے پر ہے۔دین اسلام ہمیں سکھاتا ہے کہ اصل نیکی یہ ہے کہ ہم زندہ لوگوں کا خیال رکھیں۔ کسی غریب کا بوجھ ہلکا کریں، کسی یتیم کے سر پر ہاتھ رکھیں، کسی ٹوٹے دل کو تسلی دیں۔ مرنے کے بعد کی رسمیں اپنی جگہ، لیکن اسلام کا تقاضا ہے کہ سہارا زندگی میں دیا جائے۔

سہارا دینا ہو تو زندگی میں دیجئے، اک پل کا سہارا تو جنازہ اٹھانے والے بھی دیا کرتے ہیں!

اللہ تعالیٰ قرآن میں فرماتا ہے: وَ تَعَاوَنُوْا عَلَى الْبِرِّ وَ التَّقْوٰى ۪- (پ 6، المائدۃ: 2) ترجمہ: نیکی اور پرہیزگاری کے کاموں میں ایک دوسرے کی مدد کرو۔

اس آیت سے ہمیں یہ سبق ملتا ہے کہ دین اسلام ہمیں اکیلا جینے کا حکم نہیں دیتا بلکہ ایک دوسرے کا سہارا بننے کا درس دیتا ہے۔ ہمیں چاہیے کہ نیکی کے کام میں سب مل کر ہاتھ بٹائیں۔ کسی غریب کی مدد کرنا، یتیم کی کفالت کرنا، مریض کی عیادت کرنا، غمزدہ کو تسلی دینا؛ یہ سب بر یعنی نیکی میں شامل ہیں۔

اس آیت میں اللہ پاک نے واضح فرمایا کہ جس طرح نیکی میں تعاون کرنا ہے، اسی طرح گناہ اور ظلم میں کسی کا ساتھ مت دو۔ اگر ہم برائی میں ساتھ دے کر کہیں کہ ہم نے سہارا دیا تو یہ غلط ہے جو کہ ہمیں اس آیت سے معلوم ہوا۔

نبی کریم ﷺ نے فرمایا: مومن مومن کے لیے دیوار کی مانند ہے، جس کا ایک حصہ دوسرے حصے کو مضبوط کرتا ہے۔ (بخاری، 2/127،حديث:2446)

ہمیں نہیں معلوم کے ہمارا کوئی چھوٹا سا لفظ، کوئی چھوٹا سا فعل کسی کے ٹوٹے ہوئے دل کو جوڑ سکتا ہے اور کسی کے لیے جینے کا سہارا بن سکتا ہے لہٰذا ہمیں چاہیے کہ حسن اخلاق سے پیش آئیں کیونکہ بعض دفعہ الفاظ کا سہارا بہت مضبوط سہارا ہوتا ہے۔ دین اسلام درس دیتا ہے کہ اگر کسی کا سہارا بننا ہے تو ابھی بن جاؤ۔ کیونکہ کل کا انتظار کرنے والا نہیں، بلکہ آج عمل کرنے والا ہی سچا مسلمان ہے۔

نبی ﷺ نے ہمیں سکھایا کہ اصل عبادت زندوں کی خبر گیری ہے۔ بھوکے کو کھانا کھلانا، غمزدہ کے آنسو پونچھنا، کمزور کا ہاتھ تھامنا یہی دین ہے۔اس لیے سہارا دینا ہے تو زندگی میں دیجئے۔ کل کے وعدوں سے بہتر آج کا ایک قدم ہے۔ ہو سکتا ہے آپ کا دیا ہوا حوصلہ کسی کی زندگی بچا لے۔

نبی کریم ﷺ نے بھی فرمایا: جو اپنے مسلمان بھائی کی ضرورت پوری کرے، اللہ اس کی ضرورت پوری فرماتا ہے۔ (مسلم، ص 1110، حدیث: 6853)

ایسا نہیں کہ کوئی غریب کسی کو سہارا نہیں دے سکتا کیونکہ سہارا دینا صرف مالی طور پر ہی نہیں کہ بلکہ بعض اوقات ہمارے الفاظ بھی کسی کے لیے سہارا بن جاتے ہیں۔ سب کو مالی طور پر سہارے کی ضرورت نہیں ہوتی۔ کچھ لوگوں کے پاس بہت مال ہوتا ہے مگر ان کو انسانی سہارے کی ضرورت ہوتی ہے لہٰذا ہمیں چاہیے کہ جس قدر ہو سکے اللہ کی رضا کے لیے اس کی مخلوق کا سہارا بنیں۔ ظاہر ہے اگر ہم اس کی مخلوق کا خیال رکھیں گے تو وہ بھی بروز محشر ہمارا بھرم رکھے گا۔

بہتر یہی ہے کہ ہم کسی کے چلے جانے کے بعد تعریفوں کے پل نہ باندھیں، بلکہ زندگی میں ہی کسی کے آنسو پونچھیں، کسی کا بوجھ ہلکا کریں۔کیونکہ زندگی میں دیا گیا ایک سہارا، مرنے کے بعد کی ہزار مبالغے کے ساتھ کی ہوئی جھوٹی تعریفوں سے زیادہ قیمتی ہے۔

زندگی بہت مختصر ہے، محاورتاً اس کے لیے چار دن کے الفاظ بھی استعمال کیے جاتے ہیں۔ لیکن اس مختصر سی زندگی میں آنے والا ہر دن قوس و قزح کی طرح ہے یعنی ہر دن دوسرے سے مختلف ہے۔ مقولہ ہے کہ ”انسان معاشرتی حیوان ہے“ یعنی، انسان کا اکیلے زندگی گزارنا محال ہے اسے دیگر لوگوں کی ضرورت ہوتی ہے۔

اس بات میں کوئی شک نہیں کہ زندگی کے بعد دیئے جانے والے کندھے کی فضیلت ہے اور یہ نبی کریم ﷺ کے عمل سے ثابت ہے چنانچہ حدیث مبارکہ میں ہے: نبی کریم ﷺ نے حضرت سعد بن معاذ رضی اللہ عنہ کا جنازہ اٹھایا تھا۔ (طبقات کبریٰ لابن سعد، 3 / 329 و بنایۃ،3/ 242 ملخصًا)

لیکن زندگی میں دیا جانے والا سہارا،ان کے متعلق قرآن و حدیث میں بھی ذکر ملتا ہے۔ قرآن کریم میں حضرت موسیٰ علیہ السلام کی اپنے بھائی کے متعلق درخواست کچھ یوں ہے:

وَ اجْعَلْ لِّیْ وَزِیْرًا مِّنْ اَهْلِیْۙ(۲۹) هٰرُوْنَ اَخِیۙ(۳۰) اشْدُدْ بِهٖۤ اَزْرِیْۙ(۳۱) وَ اَشْرِكْهُ فِیْۤ اَمْرِیْۙ(۳۲) (پ 16، طہ: 29 تا 32) ترجمہ: اور میرے لیے میرے گھر والوں میں سے ایک وزیر کردے۔ میرے بھائی ہارون کو ۔ اس کے ذریعے میری کمر مضبوط فرما۔ اور اسے میرے کام میں شریک کردے۔

اس آیت مبارکہ میں عرض کی: میری کمر مضبوط فرما۔ (تاکہ کوئی ایسا ہو، جو معاون و معتمد ہو) اور مومن کو ایسا ہی ہونا چاہیے ہر خوشی و غمی میں پیش پیش رہے۔ زندگی میں بھی سہارا دے نہ کہ صرف مرنے کے بعد۔

عمر بھر کا سہارا بنو تو بنو دو گھڑی کا سہارا سہارا نہیں

لیکن آہ! یہاں لوگ جن میں عزیز و اقربا بھی شامل ہوتے ہیں صرف دو گھڑی سہارا دیتے ہیں وہ بھی مرنے کے بعد، اگر یہی سہارا زندگی میں جیتے جی دیا جاتا تو شاید وہ شخص آج اپنوں کے درمیان ہوتا۔ کسی شکستہ دل کو سہارا دینا، اس کی مدد کرنا، غمزدہ کی ڈھارس بندھانا اور کسی کی پریشانی میں اس کے کام آنا ہے۔ اسلام میں اسے بلند ترین اخلاقیات اور بہترین عبادتوں میں شمار کیا گیا ہے۔ اس متعلق دو حدیث مبارکہ ذکر کی جاتی ہیں:

1) رسولِ کریم ﷺ نے فرمایا: جو کسی مسلمان کی ایک پریشانی دور کرے گا، اللہ پاک قیامت کی پریشانیوں میں سے اس کی ایک پریشانی دور فرمائے گا۔ (مسلم، ص 1049، حدیث: 2580)

2) فرمانِ مصطفےٰ ﷺ ہے: اپنے بھائی کی مدد کرو، خواہ وہ ظالم ہو یا مظلوم۔ ایک شخص نے عرض کی: یا رسول اللہ! مظلوم کی تو میں مدد کرتا ہوں لیکن ظالم کی مدد کس طرح کروں؟ ارشاد فرمایا: اسے روکو یا ظلم کرنے سے منع کرو کیونکہ یہی اس کی مدد ہے۔ بخاری، 4/ 389 ، حدیث:6952)

حاصلِ کلام یہ کہ زندگی میں سہارا دیں اور مرنے کے بعد بھی۔ زندگی میں دیا جانے والا سہارا، موت کے بعد دیئے جانے والے سہارے سے کئی گنا بہتر ہے۔

زندگی کا سفر انسان اکیلے بھی طے کر لیتا ہے اور اللہ تبارک وتعالیٰ نے انسان کو اتنی صلاحیت دی ہے کہ وہ اپنی ہمت سے تمام منزلیں طے کر سکتا ہے۔ لیکن اس سفر میں کوئی ایسا موڑ بھی ضرور آتا ہے جہاں انسان کو اپنے کسی ہم سفر، دوست یا اپنوں کے حقیقی سہارے اور ایک محبت بھرے بول کی اشد ضرورت ہوتی ہے۔

مگر ہمارے معاشرے کا ایک تلخ اور انتہائی افسوسناک سچ یہ ہے کہ ہم اپنے اردگرد موجود زندہ اور حقیقی انسانوں کی قدر کرنے سے بالکل عاری ہیں۔ جب تک کوئی شخص اس دنیا میں موجود ہوتا ہے، مشکلات میں گرا ہوتا ہے، اور اپنوں سے مدد یا دو بول تسلی کے مانگنے آتا ہے، تو اسے بری طرح دھتکار دیا جاتا ہے۔ اس کی فریاد کو نظر انداز کر دیا جاتا ہے، اس کی مجبوریوں کا مذاق اڑایا جاتا ہے، اور اسے تنہا چھوڑ دیا جاتا ہے۔

لیکن دیکھیے کہ جیسے ہی وہی انسان اس دنیا سے رخصت ہو جاتا ہے، سب کے رویے اچانک بدل جاتے ہیں۔ وہی لوگ جو جیتے جی اس کا منہ دیکھنا پسند نہیں کرتے تھے، اب اس کی تعریفوں کے طویل پل باندھتے ہیں۔ سوشل میڈیا پر اس کی یاد میں طویل پوسٹس شیئر کی جاتی ہیں، اس کی تعریفوں کی ویڈیوز ریکارڈ کی جاتی ہیں، اور اس کے احسانات کو بڑھ چڑھ کر بیان کیا جاتا ہے۔ ہر محفل میں یہ نعرہ بلند ہوتا ہے کہ وہ بہت ہی نیک تھا ہر کسی کے کام آتا تھا کوئی بھی اس کی تعریفیں کرتے نہیں تھکتا کیوں؟

یہ منافقت اور دہرا معیار انتہائی شرمناک ہے۔ سوال یہ پیدا ہوتا ہے کہ اس انسان کو مرنے کے بعد آپ کی ان تعریفوں، ویڈیو ریکارڈنگز اور قصیدوں کا کیا فائدہ جو زندگی بھر ایک ایک نوالے، ایک ایک محبت بھرے بول اور ذرا سا سہارے کے لیے ترس گیا؟ جس شخص کو جیتے جی آپ نے ایک گلاس پانی یا وقت کا سہارا نہیں دیا، اس کی قبر پر پھول چڑھانے یا اس کی موت کے بعد اسٹیٹس لگانے سے اسے کیا سکون ملے گا؟

اسلام اور شریعت مطہرہ ہمیں یہ درس دیتی ہے کہ نیکی، اخوت اور باہمی تعاون کا اصل وقت وہی ہے جب انسان دنیا میں موجود ہو۔ شریعت میں اس بات پر زور دیا گیا ہے کہ ضرورت مندوں کی حاجت روائی ان کی زندگی میں کی جائے۔

قرآن کریم میں اللہ پاک کا ارشاد ہے: وَ اٰتَى الْمَالَ عَلٰى حُبِّهٖ ذَوِی الْقُرْبٰى وَ الْیَتٰمٰى وَ الْمَسٰكِیْنَ وَ ابْنَ السَّبِیْلِۙ-وَ السَّآىٕلِیْنَ وَ فِی الرِّقَابِۚ- (پ 2، البقرۃ: 177) ترجمہ کنز الایمان: اللہ کی محبت میں اپنا عزیز مال دے رشتہ داروں اور یتیموں اور مسکینوں اور راہ گیر اور سائلوں کو اور گردنیں چھوڑانے میں۔

اس آیت میں اس بات کی صریح دلیل موجود ہے کہ حقیقی نیکی انسانوں کے جیتے جی ان کی مالی و اخلاقی امداد کرنے میں مضمر ہے۔

نبی کریم ﷺ نے جیتے جی انسانوں کا بوجھ ہلکا کرنے اور ان کے کام آنے کو دنیا و آخرت کی کامیابی کا ذریعہ قرار دیا ہے: جو شخص کسی مومن کی دنیا کی مصیبتوں میں سے کوئی مصیبت دور کرے، اللہ تعالیٰ قیامت کے دن اس کی مصیبتوں میں سے کوئی مصیبت دور فرمائے گا، اور جو شخص کسی تنگ دست کے لیے آسانی پیدا کرے، اللہ تعالیٰ دنیا اور آخرت میں اس کے لیے آسانی پیدا فرمائے گا، اور اللہ تعالیٰ بندے کی مدد میں رہتا ہے جب تک بندہ اپنے بھائی کی مدد میں لگا رہتا ہے۔ (مسلم، ص 1110، حدیث: 6853)

ایک اور مقام پر آپ ﷺ نے مسلمان کو تنہا اور بے سہارا چھوڑنے سے سختی سے منع فرمایا ہے: مسلمان مسلمان کا بھائی ہے، نہ اس پر ظلم کرے اور نہ اسے بے سہارا چھوڑے۔ اور جو شخص اپنے بھائی کی ضرورت پوری کرنے میں لگا رہتا ہے، اللہ تعالیٰ اس کی ضرورت پوری فرماتا ہے۔ (مسلم، ص 1069، حدیث: 6578)

اس حدیث پاک کا جملہ یعنی اسے بے سہارا نہ چھوڑے، اس بات کی روشن دلیل ہے کہ جب کوئی انسان مدد کا طلبگار ہو، تو اسے تنہا چھوڑنا یا دھتکار دینا اسلامی تعلیمات کے منافی ہے۔

اصل نیکی یہ ہے کہ جیتے جی کسی ٹوٹے ہوئے دل کو جوڑا جائے، کسی روتے ہوئے کے آنسو پونچھے جائیں، اور کسی بے سہارا کا ہاتھ تھاما جائے۔ نہ کہ اس کے جانے کے بعد دنیا کو دکھانے کے لیے آنسو بہائے جائیں۔

وَ اصْبِرْ نَفْسَكَ مَعَ الَّذِیْنَ یَدْعُوْنَ رَبَّهُمْ بِالْغَدٰوةِ وَ الْعَشِیِّ یُرِیْدُوْنَ وَجْهَهٗ (پ 15، الکہف: 28) ترجمہ کنز الایمان: اور اپنی جان ان سے مانوس رکھو جو صبح و شام اپنے رب کو پکارتے ہیں اس کی رضا چاہتے۔یہ آیت مبارکہ ان مفلس و نادار صحابہ کرام کے شان میں نازل ہوئی جو دنیاوی اعتبار سے مال و منال اور اہل و عیال نہ رکھتے تھے ورنہ حقیقت میں تو انہیں دونوں جہانوں کے سردار ﷺ کا قرب اور رفاقت میسر تھی جس سے بڑھ کر اور کوئی دولت نہیں ہو سکتی۔ اس آیت میں اللہ نے حکم فرمایا کہ اے حبیب ﷺ اگرچہ اہل دنیا اور مالدار طبقے کے لوگ انہیں اپنی مجالس سے دھتکارتے ہیں لیکن آپ اپنی جان کو ان لوگوں سے مانوس رکھیں جو صبح و شام اپنے رب کو پکارتے ہیں اس کی رضا چاہتے ہوئے۔

لہذا حضور علیہ الصلوۃ والسلام جو کہ غریبوں اور مسکینوں کے حامی و یاور تھے اللہ پاک کے اس فرمان پر عمل کرتے ہوئے ان صحابہ کرام سے بہت مودت و محبت فرماتے تھے نیز ان حضرات پر آپ کی خصوصی نظر عنایت رہتی تھی چنانچہ مکہ مکرمہ سے مدینہ منورہ کی طرف ہجرت کے وقت چونکہ مہاجرین صحابہ اپنے اہل و عیال اور بھائی بندوں کو چھوڑ کر بے سر و سامان تارک الوطن ہو گئے تھے لہذا حضور علیہ الصلوۃ والسلام نے مسجد جامع کی تعمیر کے بعد مہاجرین و انصار کے درمیان رشتہ اخوت و تعلق برادری قائم کیا تاکہ مہاجرین غربت کی وحشت اور بال بچوں کی جدائی اور مفارقت محسوس نہ کریں نیز وہ ایک دوسرے کے ممد و معاون بن جائیں اور سبحان اللہ ہوا بھی ایسا ہی کہ صرف حضور علیہ الصلوۃ والسلام کا عقد مواخات فرمانا تھا اور وہ حضرات درحقیقت بھائی بھائی بن گئے۔ (سیرت رسول عربی، ص 79)

یہ مفتقرین صحابہ اپنی تنگ حالی کے باوجود کسی کے آگے دست سوال دراز نہیں کرتے تھے لیکن غیب دان نبی تو اپنے غلاموں کے مطالب و حاجات کو بے کہے ہی نہ صرف جان لیا کرتے تھے بلکہ ان کی حاجت روائی بھی فرما دیا کرتے تھے چنانچہ حضرت ابوہریرہ فرماتے ہیں کہ اللہ کی قسم بھوک کی زیادتی کی وجہ سے میرا پیٹ زمین سے لگ جایا کرتا تھا اور بھوک کی شدت کی وجہ سے میرا یہ حال ہوتا تھا کہ میں نے اپنے پیٹ کو پتھر سے لپیٹا ہوا ہوتا تھا چنانچہ اسی کیفیت میں ایک دن میں گزرگاہ عام پر بیٹھ گیا جہاں سے صحابہ کرام کی آمد و رفت رہتی تھی پس جب سب سے پہلے وہاں سے صدیق اکبر رضی اللہ عنہ کا گزر ہوا تو میں نے ان سے قرآن پاک کی ایک آیت کے بارے میں سوال کیا اور میری ان سے سوال پوچھنے کی غرض فقط یہ تھی کہ وہ میری حالت سے آشنا ہو کر مجھے کھانا کھلا کر سیر کر دیں لیکن وہ میری کیفیت کو نہ سمجھ سکے اور تشریف لے گئے پھر فاروق کے اعظم رضی اللہ عنہ اس راستے سے گزرے میں نے ان سے اسی منشا و خواہش کے تحت کتاب اللہ کی ایک آیت کے متعلق سوال کیا لیکن میں اس بار بھی فائز المرام نہ ہو پایا کہ فاروق اعظم رضی اللہ عنہ بھی بغیر میری حاجت روائی کیے گزر گئے۔

پھر میرے سامنے رحمت عالمیان ﷺ رونق افروز ہوئے آپ مجھے دیکھ کر مسکرائے اور میرے چہرے پر بھوک کی وجہ سے جو آثار نمایاں تھے اسے بھانپ گئے چنانچہ لب ہائے قدس کو جنبش دے کر فرمایا اے ابو ہریرہ میں نے عرض کی لبیک یا رسول اللہ ﷺ فرمایا ساتھ آؤ چنانچہ میں آپ کے فرمان کی تابعداری کرتے ہوئے آپ کے پیچھے ہو لیا یہاں تک کہ آپ کے ساتھ کاشانہ اقدس میں داخل ہو گیا حضور علیہ الصلوۃ والسلام نے وہاں ایک دودھ کا پیالہ پایا جو ان کی طرف کسی نے تحفتًا بھیجا تھا چنانچہ مجھ سے فرمایا اے ابو ہریرہ تم جاؤ اور اصحاب صفہ کو بلا آؤ اس پر آپ فرماتے ہیں کہ یہ بات مجھ پر ناگوار گزری فرط حیرت سے میں سوچنے لگا کہ ایک پیالہ دودھ ہے میں بھوک کی شدت سے بے حال و نڈھال ہوں اور آپ یہ مجھے پلانے کی بجائے فرما رہے ہیں کہ اصحاب صفہ کو بلا لاؤ اگر وہ سب آگئے تو مجھے امید نہیں کہ مجھے اس دودھ کا کچھ حصہ بھی مل سکے گا لیکن اللہ اور رسول ﷺ کی اتباع و اطاعت کے سوا کیا چارہ تھا۔

بہرحال میں ان لوگوں کو بلا کر لے آیا جب وہ سب اپنی اپنی جگہوں پر بیٹھ گئے تو سرکار ابد قرار نے مجھ سے فرمایا اے ابو ہریرہ پیالہ پکڑو اور باری باری سب کو پلاتے جاؤ میں پیالہ ہر ایک کو دیتا گیا یہاں تک کہ سب نے جی بھر کر دودھ پی لیا تو میں نے پیالہ رسول اللہ ﷺ کے سامنے رکھ دیا آپ نے مسکراتے ہوئے میری طرف دیکھا اور فرمایا اب صرف ہم دونوں ہی باقی رہ گئے ہیں میں نے عرض کی حضور آپ نے سچ فرمایا تو فرمایا بیٹھ جاؤ اور پیو پس میں نے پینا شروع کیا جب میں پیالہ رکھنا چاہتا تو آپ مجھ سے فرماتے اور پیو پس میں پیتا رہا پس آپ مسلسل یہی فرماتے رہے یہاں تک کہ جب میں پوری طرح شکم سیر ہو گیا تو عرض کی حضور اللہ کی قسم اب بالکل گنجائش نہیں تب آپ ﷺ نے پیالہ لے کر باقی ماندہ کو دودھ بسم اللہ پڑھ کر خود نوش فرما لیا۔ (بخاری،4/223، حدیث:6452)

سبحان اللہ قربان جائیں پیارے آقا ﷺ کی شان کریمی پر کہ کس ادائے دل نوازی سے اپنے پیارے صحابی کی درپردہ کیفیت و حاجت کو جان کر ان کو بہر مند فرما دیا پیاری بہنوں معلوم ہوا کہ یقیناً غریبوں اور مسکینوں کے ساتھ دل جوئی کرنا اور ان کی حاجت روائی کرنا کریم آقا ﷺ کی سنت ہے لہذا اس سنت کو ادا کرتے جائیں اور اپنے لئے سرمایہ آخرت حاصل کرتے جائیں اور اس کے لیے جتنی بھی عاجزی کرنی پڑے اس میں اپنی کسر شان سمجھیں، چنانچہ روایتوں میں آتا ہے کہ ایک سیاہ فام عورت جو مسجد نبوی میں جھاڑ پونچھ کا کام کرتی تھی ایک بار حضور علیہ الصلوۃ والسلام نے اسے غائب پا کر اس کے بارے میں استفسار فرمایا چنانچہ اس کی فوتگی کے بارے میں اطلاع دی گئی اس پر رحمت عالم ﷺ نے فرمایا کہ تم لوگوں نے مجھے اس کے فوت ہونے کی خبر پہلے کیوں نہ دی، چنانچہ جب اس کی قبر کے بارے میں رہنمائی کی گئی تو آپ نے ازراہ رحمت و شفقت اس پر نماز جنازہ پڑھی اور ان کی گور تاریک کو بقعہ نور سے تبدیل کر دیا۔ سبحان اللہ

ذرا غور کریں کہ مطلع ہونے کے بعد آقا علیہ الصلوۃ والسلام وہیں سے بھی ان صحابیہ کے لیے دعائے مغفرت فرما سکتے تھے لیکن آپ کمال تواضع و انکساری کرتے ہوئے بذات خود ان کی قبر پر تشریف لے گئے۔

اللہ سے دعا ہے کہ اللہ پاک ہمیں پیارے حبیب ﷺ کی اس سنت کی اتباع کی توفیق عطا فرمائے۔ آمین

ہمارے پیارے آقا ﷺ نے جب اعلان نبوت فرمایا تو اس وقت امرا کی بنسبت غریب اور نادار لوگ زیادہ اسلام کے قریب ہوئے اور انکو زیادہ حضور علیہ السلام کا قرب نصیب ہوا جب حضور علیہ الصلاۃ والسلام نے ہجرت کا حکم ارشاد فرمایا تو تمام صحابہ کرام اپنا مال چھوڑ کر آپکے فرمان عالی پر عمل کر کے ہجرت کرکے مدینہ طیبہ آ گئے۔

مہاجرین فقرا آقائے دو جہاں ﷺ کی بارگاہ میں شکایت کی کہ ان پر اغنیا مسلمانوں کو فضیلت حاصل ہے پس حضور خاتم النبیین ﷺ نے فرمایا کہ اے فقرا کے گروہ! کیا میں تمہیں خوشخبری نہ سناؤ کہ فقرا مومنین اغنیا سے پانچ سو سال قبل جنت میں داخل ہوں گے۔

سبحان اللہ دیکھا آپ لوگوں نے حضور علیہ الصلاۃ والسلام نے فقرا کو کس قدر بڑی خوشخبری سنائی یہ آپکی ان سے محبت ہے اور اللہ بھی اس بات کو محبوب رکھتا ہے۔

سرور عالم ﷺ کی غریبوں سے محبت کا اندازہ اس بات سے لگایا جا سکتا ہے کہ:

حضرت ابو سعید خدری رضی اللہ عنہ سے روایت ہے، فرماتے ہیں: تم مساکین سے محبت رکھو پس بے شک میں نے حضور علیہ الصلاۃ والسلام کو یہ دعا مانگتے ہوئے سنا: اے اللہ مجھے مسکین زندہ رکھ، اور مجھے مسکینی کی حالت میں اس دنیا فانی سے اٹھانا،اور میرا حشر مسکینوں کے ساتھ کرنا۔ (ترمذی، 4/157، حديث:2359)

کیا کسی سے محبت کے لیے اتنا کافی نہیں کہ دنیا اور آخرت دونوں میں اسکی بھلائی چاہی جائے اور اسکے ساتھ رہا جائے آپکی مجالس اکثر غریب صحابہ کرام سے بھری ہوتی تھیں، غریب صحابہ کرام تو اللہ کو بھی محبوب ہیں کی انکی شان میں قرآن کی آیت نازل فرمائی: وَ لَا تَطْرُدِ الَّذِیْنَ یَدْعُوْنَ رَبَّهُمْ بِالْغَدٰوةِ وَ الْعَشِیِّ یُرِیْدُوْنَ وَجْهَهٗؕ- (پ 7، الانعام: 52)ترجمہ: اور دور نہ کرو انہیں جو اپنے رب کو پکارتے ہیں صبح اور شام اس کی رضا چاہتے۔

اقرع بن حابس تیمی اور عیینہ بن حصن الفزاری حضور کے پاس آئے تو آپ کے پاس حضرت صہیب، بلال، عمار، خباب، کو پایا جو مومنوں میں سے غریب تھے مالی اعتبار سے پس جب ان دونوں نے انکو حضور کے پاس دیکھا تو انہیں حقیر جانا وہ تنہا پیارے آقا ﷺ کے پاس آئے اور ان سے کہا: ہم چاہتے ہیں کہ آپ ہمارے لیے ان سے الگ مجلس رکھیں لوگ ہمیں عرب کے فضلا سے جانتے ہیں جب آپکے پاس عرب کا کوئی قاصد آئے اور ہمیں ان غلاموں کے ساتھ دیکھیں تو ہمیں اس بات سے حیا آتی ہے، جب ہم آپ کے پاس آئیں تو آپ ان سے دور ہو جائیں اور جب ہم چلے جائیں تو آپ ان کے ساتھ بیٹھ جائیں اگر چاہیں فرمایا: ہاں، تو وہ مسجد کے ایک کنارے پر بیٹھے کہ حضرت جبرائیل علیہ السلام یہ آیت مبارکہ لیکر آئے۔

اس میں اقرع بن حابس اور عیینہ بن حصن کا ذکر تھا پھر اسی سورت سورہ انعام کی آیت 53 اور 54 بھی نازل ہوئی اسکے بعد وہ دونوں ان سے قریب ہوئے یہاں تک کہ انکے گھٹنے آپس میں ملے اور وہ تمام حضرات حضور علیہ الصلاۃ والسلام کی مجلس میں ساتھ تھے۔

اللہ اکبر کیا کہنے حضور خاتم النبیین ﷺ کے کہ آپ صرف امیروں ہی نہیں بلکہ غریبوں کی مجلس کو بھی اختیار فرماتے بلکہ انکی مجالس کو زیادہ محبوب رکھتے اور امیروں کی وجہ سے غریب صحابہ کرام کو دور نہ بھگاتے نہ انکی دل آزاری کرتے۔

اللہ ان کا صدقہ ہمیں بھی خلد میں آقا علیہ الصلاۃ والسلام کا پڑوس نصیب کرے۔آمین

اصحاب صفہ مسجد نبوی کے چبوترے پر رہنے والے 70 غریب صحابہ تھے حضور علیہ الصلاۃ والسلام خود ان کے پاس تشریف لے جاتے، ان کا حال پوچھتے، اور کبھی کبھی اپنے دست مبارک سے کھانا کھلاتے۔

اللہ اللہ حضور علیہ السلام کی عاجزی! کہ دونوں جہانوں کے مالک ہونے کے باوجود بھی غربا سے محبت کا اظہار۔

حضرت بلال رضی اللہ عنہ حبشی غلام تھے۔ امیر نہ تھے نہ ظاہری حسن مگر حضور ﷺ نے فرمایا بلال! جنت میں میں نے تمہارے جوتوں کی آواز سنی۔ یہی غریبوں سے محبت ہے۔

مسجدنبوی شریف میں ایک چبوترا تھا، جہاں (مختلف اوقات میں) تقریباً 400 یا 500 فقرائے مہاجرین بیٹھا کرتے تھے، ا نہیں اصحاب صفّہ کہتے ہیں۔  ان کے پاس گھر تھا نہ دنیوی سازو سامان اور نہ ہی کوئی کاروبار،غربت کاعالم یہ تھا کہ ان میں سے70 کے پاس ستر پو شی کے لیے پورا کپڑا بھی نہ تھا۔ان کی تعداد میں کمی بیشی ہوتی رہتی تھی۔مدینۂ منورہ میں آنے والے کا شہر میں کوئی جان پہچان والا نہ ہوتا تو وہ بھی اہل صفّہ میں شامل ہو جایا کرتا۔ (تفسیر نعیمی،3/137)

نبی کریم ﷺ نے انہیں ہدایت کے ستارے قرار دیا۔

حضرت ابو ہریرہ فرماتے ہیں بھوک کی شدت کی وجہ سے ایک دن اس راستے پر بیٹھ گئے جس سے لوگ باہر جاتے تھے جانے دو عالم ﷺ میرے پاس سے گزرے تو مجھے دیکھ کر مسکرائے اور میرا چہرہ دیکھ کر میری حالت سمجھ گئے فرمایا اے ابو ہریرہ میں نے اس کی لبیک یا رسول اللہ فرمایا میرے ساتھ آ جاؤ میں پیچھے پیچھے چل دیا جب حضور علیہ السلام اپنے مبارک گھر پر جلوہ گر ہوئے تو اجازت لے کر میں بھی اندر داخل ہو گیا سرور کائنات ﷺ نے ایک پیالے میں دودھ دیکھا تو فرمایا یہ دودھ کہاں سے آیا ہے اہل خانہ نے عرض کی فلاں صحابی یا صحابیہ نے آپ کے لیے ہدیہ بھیجا ہے فرمایا ابو ہریرہ میں نے عرض کی لبیک یا رسول اللہ فرمایا جا کر اہل صفہ کو بلا لاؤ حضرت ابو ہریرہ فرماتے ہیں اہل صفہ اسلام کے مہمان ہیں نہ ان کو گھر بار سے رغبت ہے نہ مال و دولت سے اور نہ وہ کسی شخص کا سہارا لیتے ہیں۔

جب محبوب رب ذوالجلال کے پاس صدقہ آتا تو آپ ﷺ وہ مال ان اصحاب صفہ کی طرف بھیج دیتے تھے اور خود اس میں سے کچھ نہیں لیتے تھے اور جب آپ ﷺ کے پاس کوئی ہدیہ آتا تو آپ ﷺ ان کے پاس بھیجتے اس میں سے خود بھی استعمال کرتے اور ان کو بھی شریک فرماتے مجھے یہ بات گراں گزری اور دل میں خیال آیا اہلِ صفہ کا اس دودھ سے کیا بنے گا میں اس کا زیادہ مستحق تھا کہ اس دودھ سے چند گھونٹ پیتا اور کچھ قوت حاصل کرتا جب اصحاب صفہ آ جائیں گے تو سرکار نامدار ﷺ مجھے ہی ارشاد فرمائیں گے کہ ان کو دودھ پیش کرو اس صورت میں بہت مشکل ہے کہ دودھ کے چند گھونٹ مجھے میسر ہوں لیکن اللہ پاک اور اس کے رسول ﷺ کی طاعت کے بغیر چارہ نہ تھا میں اصحاب صفہ کے پاس گیا اور ان کو بلایا وہ آئے انہوں نے شہنشاہ عرب ﷺ سے اجازت طلب کی آپ ﷺ نے اجازت عطا فرمائی اور وہ گھر میں حاضر ہو کر بیٹھ گئے۔

پیارے آقا ﷺ نے فرمایا: ابو ہریرہ میں نے عرض کی لبیک یا رسول اللہ ﷺ فرمایا پیالہ پکڑو اور ان کو دودھ پلاؤ حضرت ابوہریرہ فرماتے ہیں میں نے پیالہ پکڑا میں وہ پیالہ ایک شخص کو دیتا وہ سیر ہو کر پیتا اور پھر وہ پیالہ مجھے لوٹا دیتا حتی کہ میں بلاتا پلاتا پیارے آقا ﷺ تک پہنچا اور تمام لوگ سیر ہو چکے تھے سرکار نامدار ﷺ نے پیالہ لے کر اپنے دست اقدس پر رکھا پھر میری طرف دیکھ کر تبسم فرمایا اور فرمایا ابو ہریرہ میں نے عرض کی لبیک یا رسول اللہ ﷺ فرمایا اب میں اور تم باقی رہ گئے ہیں عرض کی یا رسول اللہ ﷺ آپ ﷺ نے سچ فرمایا فرمایا بیٹھو اور پیو میں بیٹھ گیا اور دودھ پینے لگا آپ ﷺ نے فرمایا پیو میں نے پیا آپ مسلسل فرماتے رہے پیو حتی کہ میں نے عرض کی نہیں قسم مگر اس ذات کی جس نے آپ ﷺ کو حق کے ساتھ مبعوث فرمایا اور مزید گنجائش نہیں فرمایا فرمایا مجھے دکھاؤ میں نے پیالہ پیش کر دیا آپ ﷺ نے اللہ پاک کی حمد بیان کی بسم اللہ پڑھی اور باقی دودھ نوش فرما لیا۔ (بخاری،4/223، حدیث:6452)

حضرت ابو سعیدخدری رضی اللہ عنہ فرماتے ہیں کہ ایک بار ہم ضعیف اور نادار لوگ بیٹھے ہوئے تھے کہ حضور ہمارے پاس تشریف لائے،اس وقت ایک شخص قرآن کریم کی تلاوت کر رہا تھا اور ہمارے لئے دعا کر رہا تھا۔ تو آپ نے ارشاد فرمایا:سب تعریفیں الله کے لئے جس نے میری امّت میں ایسے نیک سیرت بندے پیدا کئے، جن کے ساتھ مجھے رہنے کا حکم دیا گیا ہے۔پھر ارشاد فرمایا:فقرا مسلمین کو قیامت کے روز کامل نور کی بشارت ہو کہ وہ غنی لوگوں سے آدھا دن پہلے جنت میں داخل ہوں گے یعنی پانچ سو (500) سال کی مقدار پہلے داخل ہوں گے یہ فقرا جنت میں نعمتوں سے لطف اندوز ہو رہے ہوں گے اور غنی لوگوں کا محاسبہ کیا جا رہا ہو گا۔ (در منثور،5/382)

حضرت ابوذر غفاری رضی اللہ عنہ فرماتے ہیں حضور اقدس ﷺ جب غزوہ تبوک کے لئے روانہ ہوئے تو میرا اونٹ بہت لاغر اور ضعیف تھا۔ میرا خیال تھا کہ چند روز مزید ٹھہرکر حضور ﷺ سے جا ملوں گا۔ میں نے کئی روز تک اپنے اونٹ کو چارا کھلایا بعدازاں میں عازم سفر ہوا۔ جب ایک جگہ پہنچا تو میرے اونٹ کی ٹانگ ٹوٹ گئی جس کے باعث وہ آگے نہ چل سکا میں نے اپنا مال و متاع اپنی پشت پر رکھا اور چل دیا۔ راستے میں سخت گرمی سے دوچار ہونا پڑا۔ لشکر اسلام کے پاس پہنچا تو لوگوں نے حضور ﷺ سے عرض کیا کوئی شخص پیدل چلا آرہا ہے۔ سرکار ﷺ نے فرمایا: ابو ذر غفاری ہوں گے۔ جب میں حضور ﷺ کی خدمت میں حاضر ہوا تو آپ ﷺ نے قیام کی حالت میں فرمایا: خوش رہو ابو ذر! رضی اللہ عنہ تم تنہا سفر کرتے ہو تنہا ہی اس دنیا سے جاؤ گے اور تنہا ہی بروز حشر اٹھوگے۔ (شواہد النبوۃ، رکن رابع، ص 125)

حضرت عمار بن یاسر رضی اللہ عنہ کو پہلے چوب اور کوڑوں کی مار سے کفار نے نڈھال کردیا۔ پھر آگ کے دہکتے ہوئے کوئلو ں پر پیٹھ کے بل لٹا دیا۔ مگر یہ استقامت کا پہاڑ بن کر اسلام پر ثابت قدم رہے۔ اس حالت میں حضورﷺ ان کے قریب سے گزرے تو حضرت عمار رضی اللہ عنہ نے یا رسول اللہ ﷺ کہہ کر پکارا، عمار کی یہ مصیبت دیکھ کر رحمت عالم ﷺ کا دل صدموں سے چور چور ہوگیا اور فرمایا: یا نار کونی بردًا وّ سلٰمًا علٰی عمّارٍ کما کنت علٰی ابراھیم یعنی اے آگ! تو عمار پر اس طرح ٹھنڈک او رسلامتی بن جا جس طرح تو حضرت ابراہیم علیہ السّلام پر ٹھنڈک اور سلامتی بن گئی تھی۔ (طبقات کبری لابن سعد، 3/188) رحمت عالم ﷺ حضرت عمار کے زخموں پر اپنا دست شفقت پھیرتے ہوئے فرماتے کہ عمار طیب و مطیب یعنی عمار پاکیزہ اور خوشبودار ہے۔ (صحابہ کرام کا عشق رسول، ص 120)

آیت مبارکہ ہے: وَ لَا تَطْرُدِ الَّذِیْنَ یَدْعُوْنَ رَبَّهُمْ بِالْغَدٰوةِ وَ الْعَشِیِّ یُرِیْدُوْنَ وَجْهَهٗؕ- (پ 7، الانعام: 52)ترجمہ: اور دور نہ کرو انہیں جو اپنے رب کو پکارتے ہیں صبح اور شام اس کی رضا چاہتے۔

اس آیت کا شان نزول یہ ہے کہ کفار کی ایک جماعت حضور علیہ السلام کی خدمت میں آئی انہوں نے دیکھا کہ تاجدار رسالت ﷺ کے ارد گرد غریب صحابہ رضی اللہ عنہ کی ایک جماعت حاضر ہے جو ادنیٰ درجے کے لباس پہنے ہوئے ہیں یہ دیکھ کر وہ کہنے لگے کہ ہمیں ان لوگوں کے پاس بیٹھتے شرم آتی ہے اگر آپ انہیں اپنی مجلس سے نکال دیں تو ہم آپ پر ایمان لے آئیں اور آپ کی خدمت میں حاضر رہیں حضور علیہ السلام نے اس بات کو منظور نہ فرمایا اس پر یہ آیت نازل ہوئی اور فرمایا گیا کہ ان مخلص و غریب صحابہ کرام کو اپنی بارگاہ سے دور نہ کرو جو صبح شام اپنے رب کی رضا چاہتے ہوئے پکارتے ہیں ان غریب صحابہ کا رزق آپ علیہ السلام پر نہیں کہ غربت کی وجہ سے انہیں دور کر دیا جائے اور نہ آپ کی ذمہ داری ان پر ہے سب کا حساب اللہ پر ہے وہی تمام خلق کو روزی دینے والا ہے اور اس کے سوا کسی کا ذمہ حساب کا نہیں۔

حضور علیہ الصلاۃ والسلام غریب اور فقرا صحابہ سے محبت فرماتے تھے، ابن ماجہ شریف کی حدیث ہے: حضرت ابو سعید خدری نے فرمایا کہ مسکینوں سے محبت کرو بے شک میں نے رسول اللہ ﷺ کو اپنی دعا میں فرماتے ہوئے سنا اللّٰهمّ أحيني مسكينًا، وأمتني مسكينًا، واحشرني في زمرة المساكين ترجمہ: اے اللہ مجھے مسکینی کی حالت میں زندہ رکھ مسکین کی حالت میں وفات عطا فرما اور میرا حشر مساکین کے گروہ میں فرما۔ (ترمذی، 4/157، حديث:2359)

حضرت ابو ہریرہ فرماتے ہیں بھوک کی شدت کی وجہ سے ایک دن اس راستے پر بیٹھ گئے جس سے لوگ باہر جاتے تھے جانے دو عالم ﷺ میرے پاس سے گزرے تو مجھے دیکھ کر مسکرائے اور میرا چہرہ دیکھ کر میری حالت سمجھ گئے فرمایا اے ابو ہریرہ میں نے اس کی لبیک یا رسول اللہ فرمایا میرے ساتھ آ جاؤ میں پیچھے پیچھے چل دیا جب حضور علیہ السلام اپنے مبارک گھر پر جلوہ گر ہوئے تو اجازت لے کر میں بھی اندر داخل ہو گیا سرور کائنات ﷺ نے ایک پیالے میں دودھ دیکھا تو فرمایا یہ دودھ کہاں سے آیا ہے اہل خانہ نے عرض کی فلاں صحابی یا صحابیہ نے آپ کے لیے ہدیہ بھیجا ہے فرمایا ابو ہریرہ میں نے عرض کی لبیک یا رسول اللہ فرمایا جا کر اہل صفہ کو بلا لاؤ حضرت ابو ہریرہ فرماتے ہیں اہل صفہ اسلام کے مہمان ہیں نہ ان کو گھر بار سے رغبت ہے نہ مال و دولت سے اور نہ وہ کسی شخص کا سہارا لیتے ہیں۔

جب محبوب رب ذوالجلال کے پاس صدقہ آتا تو آپ ﷺ وہ مال ان اصحاب صفہ کی طرف بھیج دیتے تھے اور خود اس میں سے کچھ نہیں لیتے تھے اور جب آپ ﷺ کے پاس کوئی ہدیہ آتا تو آپ ﷺ ان کے پاس بھیجتے اس میں سے خود بھی استعمال کرتے اور ان کو بھی شریک فرماتے مجھے یہ بات گراں گزری اور دل میں خیال آیا اہلِ صفہ کا اس دودھ سے کیا بنے گا میں اس کا زیادہ مستحق تھا کہ اس دودھ سے چند گھونٹ پیتا اور کچھ قوت حاصل کرتا جب اصحاب صفہ آ جائیں گے تو سرکار نامدار ﷺ مجھے ہی ارشاد فرمائیں گے کہ ان کو دودھ پیش کرو اس صورت میں بہت مشکل ہے کہ دودھ کے چند گھونٹ مجھے میسر ہوں لیکن اللہ پاک اور اس کے رسول ﷺ کی طاعت کے بغیر چارہ نہ تھا میں اصحاب صفہ کے پاس گیا اور ان کو بلایا وہ آئے انہوں نے شہنشاہ عرب ﷺ سے اجازت طلب کی آپ ﷺ نے اجازت عطا فرمائی اور وہ گھر میں حاضر ہو کر بیٹھ گئے۔

پیارے آقا ﷺ نے فرمایا: ابو ہریرہ میں نے عرض کی لبیک یا رسول اللہ ﷺ فرمایا پیالہ پکڑو اور ان کو دودھ پلاؤ حضرت ابوہریرہ فرماتے ہیں میں نے پیالہ پکڑا میں وہ پیالہ ایک شخص کو دیتا وہ سیر ہو کر پیتا اور پھر وہ پیالہ مجھے لوٹا دیتا حتی کہ میں بلاتا پلاتا پیارے آقا ﷺ تک پہنچا اور تمام لوگ سیر ہو چکے تھے سرکار نامدار ﷺ نے پیالہ لے کر اپنے دست اقدس پر رکھا پھر میری طرف دیکھ کر تبسم فرمایا اور فرمایا ابو ہریرہ میں نے عرض کی لبیک یا رسول اللہ ﷺ فرمایا اب میں اور تم باقی رہ گئے ہیں عرض کی یا رسول اللہ ﷺ آپ ﷺ نے سچ فرمایا فرمایا بیٹھو اور پیو میں بیٹھ گیا اور دودھ پینے لگا آپ ﷺ نے فرمایا پیو میں نے پیا آپ مسلسل فرماتے رہے پیو حتی کہ میں نے عرض کی نہیں قسم مگر اس ذات کی جس نے آپ ﷺ کو حق کے ساتھ مبعوث فرمایا اور مزید گنجائش نہیں فرمایا فرمایا مجھے دکھاؤ میں نے پیالہ پیش کر دیا آپ ﷺ نے اللہ پاک کی حمد بیان کی بسم اللہ پڑھی اور باقی دودھ نوش فرما لیا۔ (بخاری،4/223، حدیث:6452)

حضور ﷺ اصحاب صفہ اور دیگر غریب اور نادار صحابہ کرام سے محبت فرماتے اس بارے میں بخاری شریف اور دیگرصحاح ستہ میں واضح احادیث مبارکہ موجود ہیں آپ اکثر اصحاب صفہ اور مساکین کے ساتھ زمین پر بیٹھتے انکے دکھ درد میں شریک ہوتے اور خود کو ان سے الگ نہ سمجھتے تھے۔

غریب اور نادار صحابہ کرام سے حضور ﷺ کی محبت کا اندازہ اس بات سے لگایا جا سکتا ہے کہ آپ نے انکو اپنا مقرب بنایا ہوا تھا انکے ساتھ بیٹھنا پسند فرمایا اور امت کو انکی وجہ سے رزق ونصرت ملنے کی نوید سنائی۔

امام بخاری نے بخاری شریف میں حضرت سعد بن ابی وقاص کی روایت نقل کی ہے کہ جب انہوں نے خود کو مال و دولت یا شجاعت کی بناء پر کچھ سمجھا تو حضور ﷺ نے ان سے فرمایا: تمہیں تمہارے کمزوروں کی وجہ سے رزق اور مدد دی جاتی ہے۔ (ابوداود، 3/39، حدیث: 2594)

ان روایات سے معلوم ہوتا ہے کہ آپ ﷺ ان حضرات سے کتنی محبت فرماتے لہذا ہمیں بھی چاہیے کہ تمام صحابہ کرام سے محبت کریں۔

اللہ کریم ہمیں ان حضرات سے حقیقی محبت نصیب فرمائے اور انکا صدقہ ہمیں عطا فرمائے۔ آمین

حضور نبی کریم ﷺ کی غریب، مسکین، اور نادار صحابہ کرام خصوصا اصحاب صفہ سے محبت اور شفقت بے مثال تھی۔ آپ ﷺ ان کے ساتھ بیٹھتے، ان کی دل جوئی فرماتے اور ان کو اپنے پر ترجیح دیتے تھے۔

اللہ تبارک و تعالیٰ فرماتا ہے: وَ اصْبِرْ نَفْسَكَ مَعَ الَّذِیْنَ یَدْعُوْنَ رَبَّهُمْ بِالْغَدٰوةِ وَ الْعَشِیِّ یُرِیْدُوْنَ وَجْهَهٗ (پ 15، الکہف: 28) ترجمہ کنز الایمان: اور اپنی جان ان سے مانوس رکھو جو صبح و شام اپنے رب کو پکارتے ہیں اس کی رضا چاہتے۔

تفسیر نعیمی میں اس آیت کریمہ کے تحت ہے: (اللہ پاک یہ فرما رہا ہے کہ) اے حبیب مکرم ﷺ! آپ اپنے آپ کو تمام عمر، ہر محفل، ہر مجلس، ہر گھڑی، دن رات، صبح شام، انہی لوگوں کے ساتھ رہیے رکھیے جو مخلص(sincere) ہیں، جو مسکین ہیں، جو فقیر ہیں، جو غریب ہیں، جو سیدھے سادے ہیں، جو نہایت خلوص سے اپنے رب کی عبادت کرتے ہیں، الغرض! ہر وقت ہی، ہر سانس میں ہر کروٹ میں ذکر الہی کرتے ہیں۔ ساری دنیا سے منہ موڑ کر بس اپنے مولا کی ذات کا ہی ارادہ رکھتے ہیں۔ (اور اے حبیب مکرم!) ان کفار سے دور ہی رہیے جو مختلف وفد بن کر آپ کے پاس آتے ہیں اور آپ کو اپنے ایمان لانے کے لیے طرح طرح کی شرطیں لگاتے ہیں کہ ہم اور ہمارا قبیلہ آپ پر ایمان تب لائیں گے جب آپ اپنے پاس سے ان غریب اصحاب صفہ کو ہٹا دیں گے ہمیں ان کے ساتھ بیٹھتے ہوئے شرم آتی ہے اور ہماری سرداری پر فرق آتا ہے بس یہی ایک رکاوٹ ہے جو ہم آپ کی نبوت و رسالت، صداقت، امانت اور دیانت پر ابھی ایمان تک نا لا سکے۔ (اس پر اللہ پاک ارشاد فرما رہا ہے) اے محبوب! ان مکاروں کی باتوں میں نہ آنا، اور اپنی رحمت و عافیت والی نگاہوں کو ان پاکیزہ باطن والوں سے مت ہٹانا کیونکہ آپ کی یہ معرفت والی نظریں ہی تو ان حضرات کی کل کائنات ہیں، آپ کی جدائی ان کے لیے تکلیف کا باعث ہے،اس موقع پر یہ آیت کریمہ نازل ہوئی اور نبی کریم ﷺ کو فرمایا گیا کہ اپنی جان کو ان لوگوں کے ساتھ مانوس رکھو جو صبح و شام اپنے رب کو پکارتے ہیں، اور اس کی رضا چاہتے ہیں یعنی جو اخلاص کے ساتھ ہر وقت اللہ پاک کی فرمانبرداری میں مشغول رہتے ہیں (تفسیر نعیمی، 15/576 بتغیر)

غریب صحابہ کرام سے محبت کے واقعات:

1) حضرت فضالہ بن عبید رضی اللہ عنہ فرماتے ہیں حبیب کبریا ﷺ جب لوگوں کو نماز پڑھاتے تو کچھ صحابہ کرام نماز کے اندر حالت قیام میں بھوک کی شدت کے سبب گر پڑتے اور یہ اصحاب صفہ تھے، حتی کہ کچھ لوگ کہنے لگتے یہ دیوانے ہیں، جب سرکار مدینہ ﷺ نماز سے فارغ ہوتے تو ان کی طرف متوجہ ہو کر فرماتے اے اصحاب صفہ اگر تمہیں معلوم ہو جائے کہ تمہارے لیے اللہ کے ہاں کیا اجر و ثواب ہے تو تم اس بات کو پسند کرو کہ تمہارے فاقے اور حاجت مندی میں مزید اضافہ ہو۔ (بخاری، 4/162، حدیث: 2375)

2) حضرت ابوہریرہ رضی اللہ عنہ جو اصحاب صفہ میں سے تھے یہ فرماتے ہیں میں نے بھوک کے سبب اپنی یہ حالت بھی دیکھی کہ مدینے کے تاجور، محبوب رب اکبر ﷺ کے منبر منور اور ام المومنین حضرت سیدنا عائشہ صدیقہ رضی اللہ عنہا کے حجرہ مطہرہ کے درمیان بے ہوش ہو کر گر پڑتا کوئی آدمی آتا اور میری گردن پر پاؤں رکھ دیتا، وہ سمجھتا کہ مجھ پر جنون کی کیفیت طاری ہے، حالانکہ مجھے جنون وغیرہ کچھ نہ ہوتا یہ حالت بھوک کی وجہ سے ہوتی تھی۔ (بخاری، 4/515، حدیث: 7324)

حضور ﷺ کی اپنے خاندان پر ترجیح

جب بھی نبی کریم ﷺ کے پاس بحرین یا دیگر علاقوں سے مال غنیمت یا فتوحات کا مال آتا تو آپ ﷺ سب سے پہلے اصحاب صفہ کی خبر گیری فرماتے۔ ایک بار سیدہ فاطمہ رضی اللہ عنہا نے گھر کے کاموں کی مشقت کا ذکر کر کے آپ ﷺ سے ایک خادم مانگا تو آپ ﷺ نے صاف انکار فرما دیا: میں تمہیں خادم کیسے دے دوں جبکہ صحابہ صفہ کے پیٹ بھوک کی وجہ سے مڑے جا رہے ہیں؟ (مسند امام احمد، 1/106)

مالک کونین ہیں گو پاس کچھ رکھتے نہیں

دو جہاں کی نعمتیں ہیں ان کے خالی ہاتھ میں

ان واقعات سے حضور ﷺ کی اپنے غریب و نادار صحابہ کرام سے بے پناہ محبت کا ثبوت ملتا ہے۔

جن نے جان جاناں ﷺ کو حالت ایمان میں دیکھا یا آپ ﷺ کی صحبت پائی اور اسلام ہی پر وفات پائی، وہ صحابی ہے۔

اللہ پاک نے اپنے محبوب ﷺ کو ایسی عظیم صفات سے نوازا کہ آپ ﷺ ہر طبقے کے لوگوں سے محبت فرماتے، خصوصاً غریب، مسکین اور نادار مسلمانوں کے ساتھ آپ کی شفقت و محبت بے مثال تھی۔ آپ ﷺ کے نزدیک کسی انسان کی عزت کا معیار مال و دولت نہیں بلکہ ایمان، تقویٰ اور اخلاص تھا۔

قرآن کریم میں ارشاد باری تعالیٰ ہے: وَ اصْبِرْ نَفْسَكَ مَعَ الَّذِیْنَ یَدْعُوْنَ رَبَّهُمْ بِالْغَدٰوةِ وَ الْعَشِیِّ یُرِیْدُوْنَ وَجْهَهٗ (پ 15، الکہف: 28) ترجمہ کنز الایمان: اور اپنی جان ان سے مانوس رکھو جو صبح و شام اپنے رب کو پکارتے ہیں اس کی رضا چاہتے۔

کفار کے سرداروں نے حضور اکرم ﷺ سے عرض کیا کہ ہمیں غریب اور شکستہ حال لوگوں کے ساتھ بیٹھنے میں شرم آتی ہے، اگر آپ انہیں اپنی مجلس سے جدا کردیں تو ہم اسلام لے آئیں گے۔ مگر رحمت عالم ﷺ نے غریب صحابۂ کرام رضی اللہ عنہم کو اپنی مجلس سے جدا کرنا پسند نہ فرمایا۔

اس واقعے سے معلوم ہوتا ہے کہ اسلام میں غربت کوئی عیب نہیں۔ غریب صحابۂ کرام رضی اللہ عنہم اگرچہ دنیاوی اعتبار سے کمزور اور نادار تھے، مگر اللہ پاک کے نزدیک ان کا مقام بہت بلند تھا۔ وہ صبح و شام اللہ پاک کو یاد کرتے اور اس کی رضا کے طلبگار رہتے تھے۔ اسی لیے حضور اکرم ﷺ ان سے محبت فرماتے اور انہیں اپنی صحبت سے نوازتے تھے۔

ایک اور موقع پر قبیلۂ مضر کے فقروفاقہ والے صحابۂ کرام رضی اللہ عنہم کی حالت دیکھ کر حضور اکرم ﷺ بہت غمگین ہوئے اور صحابۂ کرام کو ان کی مدد کرنے اور راہ خدا میں خرچ کرنے کی ترغیب دی۔ جب صحابۂ کرام نے ان کی مدد کی تو حضور اکرم ﷺ بہت خوش ہوئے۔

لہٰذا ہمیں بھی چاہیے کہ غریبوں اور نادار مسلمانوں کو حقیر نہ سمجھیں، ان کے ساتھ محبت و شفقت سے پیش آئیں، ان کی ضروریات پوری کرنے کی کوشش کریں اور ان کی عزت نفس کا خیال رکھیں۔

یاد رکھیں! مال و دولت انسان کو اللہ پاک کا محبوب نہیں بناتی بلکہ ایمان، تقوی، اخلاص اور نیکی انسان کا مقام بلند کرتے ہیں۔ اللہ پاک ہمیں حضور اکرم ﷺ کی سنت پر عمل کرتے ہوئے غریب و نادار مسلمانوں سے محبت کرنے اور ان کی مدد کرنے کی توفیق عطا فرمائے۔

نبی کریم ﷺ کی کئی صفات ہیں،آپ کی ایک صفت محبت بھی ہے جو ایک عظیم صفت ہے۔آقا ﷺ بچوں اور تمام صحابہ کرام علیہم الرضوان سے محبت فرماتے۔حضرت علامہ مولانا سید مفتی محمد نعیم الدین مراد آبادی رحمۃ اللہ علیہ فرماتے ہیں: مسلمان کو چاہیے کہ صحابہ کرام کا نہایت ادب رکھے،دل میں ان کی عقیدت و محبت کو جگہ دے،ان کی محبت حضور ﷺ کی محبت ہے اور جو بد نصیب صحابہ کرام کی شان میں بے ادبی کے ساتھ زبان کھولے وہ دشمن خدا و رسول ﷺ ہیں۔ مسلمان ایسے شخص کے پاس نہ بیٹھیں۔ (سوانح کربلا، ص 31)

اعلیٰ حضرت امام اہل سنت مولانا شاہ امام احمد رضا خان رحمۃ اللہ علیہ فرماتے ہیں:

اہل سنت کا ہے بیڑا پار اصحاب حضور نجم ہیں اور ناؤ ہے عترت رسول اللہ کی

حضرت محمد ﷺ تمام انسانوں سے بے حد محبت کرتے تھے، لیکن غریب اور نادار صحابہ سے آپ ﷺ کی خاص شفقت تھی۔ آپ ﷺ ان کے ساتھ بیٹھتے، ان کی خیریت دریافت کرتے، ان کی مدد فرماتے اور انہیں کبھی حقیر نہیں سمجھتے تھے۔ آپ ﷺ نے فرمایا کہ بہترین انسان وہ ہے جو دوسروں کے لیے زیادہ فائدہ مند ہو۔آپ ﷺ نے مسلمانوں کو غریبوں، یتیموں اور مسکینوں کی مدد کرنے کی تلقین فرمائی۔ آپ ﷺ خود بھی سادہ زندگی گزارتے تھے اور جو کچھ ملتا، ضرورت مندوں میں تقسیم کر دیتے تھے۔ اسی لیے غریب صحابہ کرام رضی اللہ عنہم آپ ﷺ سے بے حد محبت کرتے تھے۔مدینہ منورہ میں بہت سے غریب صحابہ مسجد نبوی کے چبوترے پر رہتے تھے، جنہیں اصحاب صفہ کہا جاتا تھا۔ حضور ﷺ ان سے بہت محبت کرتے تھے۔ آپ ﷺ ان کے پاس تشریف لے جاتے، ان کی تعلیم و تربیت فرماتے، ان کے ساتھ کھانا کھاتے اور جب کہیں سے کھانا یا تحفہ آتا تو پہلے ان کا خیال رکھتے تھے۔‏

قرآن کریم میں اللہ تعالیٰ نے ارشاد فرمایا: وَ اصْبِرْ نَفْسَكَ مَعَ الَّذِیْنَ یَدْعُوْنَ رَبَّهُمْ بِالْغَدٰوةِ وَ الْعَشِیِّ یُرِیْدُوْنَ وَجْهَهٗ (پ 15، الکہف: 28) ترجمہ کنز الایمان: اور اپنی جان ان سے مانوس رکھو جو صبح و شام اپنے رب کو پکارتے ہیں اس کی رضا چاہتے۔

اس آیت کا شان نزول یہ ہے کہ سرداران کفار کی ایک جماعت نے سرکار دوعالم ﷺ سے عرض کیا کہ ہمیں غربا اور شکستہ حالوں کے ساتھ بیٹھتے شرم آتی ہے۔ اگر آپ انہیں اپنی صحبت سے جدا کردیں تو ہم اسلام لے آئیں اور ہمارے اسلام لانے سے خلق کثیر اسلام لے آئے گی۔ اس پر یہ آیت کریمہ نازل ہوئی۔ (روح البیان، 5/238)

اور نبی کریم ﷺ کو فرمایا گیا کہ اپنی جان کو ان لوگوں کے ساتھ مانوس رکھ جو صبح و شام اپنے رب کو پکارتے ہیں اس کی رضا چاہتے ہیں یعنی جو اخلاص کے ساتھ ہر وقت اللہ کی طاعت میں مشغول رہتے ہیں۔

نبی کریم ﷺ کی تربیت خود ربّ العالمین فرماتا ہے جیسے یہاں ہوا کہ ایک معاملہ در پیش ہوا تو اللہ نے اپنے حبیب ﷺ کی خود تربیت فرمائی اور آپ کی کمال کی طرف رہنمائی فرمائی۔

یہ بھی معلوم ہوا کہ اچھوں کے ساتھ رہنا اچھا ہے اگرچہ وہ فقرا ہوں اور بروں کے ساتھ رہنا برا ہے اگرچہ وہ مالدار ہوں۔

اللہ تعالیٰ نے اپنے محبوب نبی حضرت محمد مصطفیٰ ﷺ کو سراپا رحمت بنا کر دنیا میں بھیجا۔ آپ ﷺ کی مبارک زندگی محبت، شفقت، عفو و درگزر اور حسن اخلاق کا حسین نمونہ ہے۔ آپ ﷺ تمام صحابۂ کرام رضی اللہ عنہم سے بے حد محبت فرماتے تھے، لیکن غریب، نادار اور کمزور صحابہ کرام رضی اللہ عنہم پر آپ ﷺ کی خصوصی شفقت ہوتی تھی۔ آپ ﷺ کبھی کسی کی عزت و مرتبے کا معیار مال و دولت کو نہیں بناتے تھے بلکہ تقویٰ، اخلاص اور اللہ تعالیٰ کی اطاعت کو اصل فضیلت قرار دیتے تھے۔ یہی وجہ ہے کہ غریب صحابہ کرام رضی اللہ عنہم بھی آپ ﷺ کی بارگاہ میں بے حد عزت و محبت پاتے تھے اور آپ ﷺ انہیں اپنے خاندان کے افراد کی طرح عزیز رکھتے تھے۔

اللہ تعالیٰ ارشاد فرماتا ہے: وَ اصْبِرْ نَفْسَكَ مَعَ الَّذِیْنَ یَدْعُوْنَ رَبَّهُمْ بِالْغَدٰوةِ وَ الْعَشِیِّ یُرِیْدُوْنَ وَجْهَهٗ (پ 15، الکہف: 28) ترجمہ کنز الایمان: اور اپنی جان ان سے مانوس رکھو جو صبح و شام اپنے رب کو پکارتے ہیں اس کی رضا چاہتے۔

حضور اکرم ﷺ کی محبت کا انداز یہ تھا کہ آپ ﷺ غریب صحابہ کرام کے ساتھ بیٹھنے میں کبھی عار محسوس نہ فرماتے۔ ان کی خیریت دریافت کرتے، ان کی ضرورتوں کا خیال رکھتے، ان کے ساتھ نہایت محبت سے گفتگو فرماتے اور ان کے دلوں کو خوش کرنے کی کوشش فرماتے۔ اصحاب صفہ جو انتہائی غریب تھے، حضور ﷺ ان کا خاص خیال رکھتے تھے۔ جب کبھی کھانا آتا تو پہلے انہیں یاد فرماتے، اگر کچھ ہدیہ آتا تو ان میں تقسیم فرما دیتے اور صحابۂ کرام رضی اللہ عنہم کو بھی ان کی خدمت کی ترغیب دیتے تھے۔

ایک نہایت ایمان افروز واقعہ حضرت بلال حبشی رضی اللہ عنہ کا ہے۔ آپ رضی اللہ عنہ پہلے غلام تھے اور دنیاوی اعتبار سے غریب تھے، لیکن حضور ﷺ کے نزدیک ان کا مقام بہت بلند تھا۔ ایک مرتبہ رسول اللہ ﷺ نے حضرت بلال رضی اللہ عنہ سے فرمایا: اے بلال! میں نے جنت میں اپنے آگے تمہارے قدموں کی آہٹ سنی۔ یہ سن کر حضرت بلال رضی اللہ عنہ کی خوشی کی انتہا نہ رہی۔ اس واقعے سے معلوم ہوتا ہے کہ اللہ تعالیٰ کے ہاں عزت و مرتبہ مال و دولت سے نہیں بلکہ ایمان، اخلاص اور نیک اعمال سے حاصل ہوتا ہے۔ (بخاری، 1/393، حدیث: 1149)

حضرت ابو ہریرہ رضی اللہ عنہ بھی فقر و تنگ دستی میں زندگی گزارتے تھے، مگر حضور ﷺ ان سے بڑی محبت فرماتے، ان کی تعلیم و تربیت فرماتے اور ان کے لیے دعائیں بھی کرتے تھے۔ اسی محبت کی برکت سے حضرت ابو ہریرہ رضی اللہ عنہ امت کے سب سے زیادہ احادیث روایت کرنے والے صحابی بنے۔

حضور نبی کریم ﷺ نے فرمایا: تمہیں رزق اور مدد تمہارے کمزور لوگوں کی وجہ سے ملتی ہے۔ (ابوداود، 3/39، حدیث: 2594)

آج ہمیں بھی چاہیے کہ اپنے پیارے آقا ﷺ کی اس مبارک سنت کو اپنائیں، غریبوں اور ناداروں سے محبت کریں، ان کی مدد کریں، ان کی دلجوئی کریں اور انہیں کبھی حقیر نہ سمجھیں۔ یہی حقیقی عشق رسول ﷺ اور سنت نبوی پر عمل ہے۔

اللہ تعالیٰ ہمیں حضور نبی کریم ﷺ کی محبت اور آپ ﷺ کی سنتوں پر عمل کرنے کی توفیق عطا فرما۔ آمین بجاہ خاتم النبیین ﷺ