مولانامحمد عمیر عطاری مدنی زِیْدَشَرْفُہ

(ناظم ُالامور”مرکز خدمۃ الحدیث وعلومہ(دعوتِ اسلامی)“)

کتابُ اللہ کے بعد حدیثِ رسول پرہی ہمارے دین کی بنیاد ہے، بلکہ حدیثِ رسول کے بغیر کتاب اللہ کو کما حقہ نہیں سمجھا جا سکتا۔ حدیث کا علم جتنا اہم ہےاتنا ہی مشکل بھی ہےاِس کے باوجود اسے حاصل کرنے کے لیے ہمارے اسلاف نے اپنی زندگیاں وقف کیں ۔ محدثین کی کاوشوں کا نتیجہ ہے کہ آج ہمیں علومِ حدیث کا خزانہ حاصل ہے۔

علمِ حدیث کی دوقسمیں:

حدیث بظاہر ایک لفظ ہےلیکن یہ ایسا ہی ہے جیسے سمندر کو کوزے میں بند کر دیا گیا ہو۔ اہلِ علم اس بات کو بخوبی جانتے ہیں کہ ہر علم وفن کے اپنے اصول وضوابط ہوتے ہیں، اسی طرح علم حدیث کے بھی ہیں۔

علم حدیث کو بنیادی طور پر دو حصوں میں تقسیم کیا گیا ہے:

(1) روایتِ حدیث: یعنی وہ علم جو نبی کریم صلی اللہ علیہ واٰلہٖ وسلم کے اقوال، افعال، تقاریر، احوال واوصاف پر مشتمل ہو۔اِس علم کے ذریعے ہم حدیث کے معانی واستباط اورمعمول بہ ہونے کا علم حاصل کرتے ہیں۔

(2) درایت حدیث: یہ اُن قوانین کا علم ہےجن کے ذریعے”سند ومتن کےاحوال“جانے جاتے ہیں۔ اسی کو اصولِ حدیث یا مصطلح الحدیث کہتے ہیں۔یہ علم صحیح کو سقیم سےجدا کرکےدینِ اسلام کی روشن تعلیمات کی حفاظت کرتا ہے ۔

علم ِدرایت ِ حدیث کاثمرہ ”تحکیمِ حدیث“ ہے:

سند و متن کے احوال جاننے کے بعد باری آتی ہے حدیث پر حکم لگانے کی، بلکہ اگر یوں کہا جائے تو غلط نہ ہوگا کہ علمِ اصولِ حدیث کی غایت و انتہا یہی ہے کہ حدیث کے حکم کو جان لیا جائے، نہ صرف علم اصول حدیث بلکہ علم جرح وتعدیل، علم الرجال، علم التاریخ، علمِ عللِ حدیث اور وہ سارے علوم جن کا مقصد صحت و ضعف کے اعتبار سے حدیث کا حال جاننا ہوتا ہے، ان سب علوم کی انتہایہیں پر ہوتی ہے کہ مذکورہ قول حدیث ہے یا نہیں اور اگر ہے تو کس درجے کی؟

تحکیم حدیث کی اقسام

حدیث پر حکم لگانے کے تین طریقے ہو سکتے ہیں:

(1) نقلی (2) درایتی (3) نقلی و درایتی

(1)نقلی

اس میں حکمِ حدیث معتبر ائمہ کرام سے اخذ کیے جاتے ہیں کہ انہوں نے احادیث پر حکم لگا کر صحیح کو ضعیف سے ممتاز کر دیا ہے، تو اگر منقولی حکم تک رسائی میسّر ہو تو اسی کو اختیار کرنا چاہیے کیونکہ دیگرخوبیوں کے ساتھ ساتھ درایت کے اعتبار سے بھی یہ حضرات ہم سے کہیں زیادہ فائق ہیں۔

(2)درایتی

کئی بار ایسا ہو جاتا ہے کہ منقولی حکم نہیں مل پاتا تو یہ ”کَمْ تَرکَ المُتَقَدِّمُ لِلّمُتَأخِّر“ کے قبیل سے ہوتا ہے، تو ایسی صورت میں ہم پر یہ ذمّہ داری عائد ہوتی ہے کہ علومِ درایت کو پیشِ نظر رکھ کر حدیث کے حال کا دراسہ کریں تاکہ حکم تک پہنچ سکیں۔

(3)نقلی و درایتی

کئی بار ایسا بھی ہوتا ہے کہ منقولی حکم مل تو جاتا ہے لیکن اقوالِ ائمہ اس میں مختلف ہوتے ہیں، اس صورت میں علومِ درایت کے مطابق تطبیق وترجیح کا طریقہ اختیار کیا جائے۔

ہمارا مقصد چونکہ منقولی احکام سے متعلق ہے اس لئے ہم اسی پر اپنی گفتگو جاری رکھتے ہیں:

حکمِ حدیث کن کتابوں سے نقل کیا جائے؟

ذیل میں مختلف عنوانات کے تحت کتب ذکر کیے جا رہے ہیں:

جوامع ، سنن وغیرہ:

(1)مستدرک علی الصحیحین از امام ابو عبد اللہ محمد بن عبد اللہ حاکم شافعی : اس کے ساتھ امام ذہبی کی تلخیص لازمی دیکھنا چاہیے کہ امام ذہبی نے حکم کی موافقت کی ، تعقب کیا یا سکوت فرمایا۔

(2)الاحادیث المختارۃ از امام ضیاء الدین محمد بن عبد الواحد مقدسی حنبلی: عموماً متقدمین سے نقل کرتے ہیں لیکن کئی مرتبہ مناقشہ بھی کرتے ہیں۔

(3)سنن ابی داود از امام ابو داود سلیمان بن اشعث سجستانی:اس کی احادیث کی بات کی جائے تو امام منذری نے اس کا (مختصر) لکھا اور کئی احادیث پر حکم بھی لگایا۔ اسی طرح امام یحی بن شرف نووی شافعی نے بھی (الإيجاز في شرح سنن أبي داود) کے نام سے ایک کتاب لکھی جس میں طہارت سے متعلق سو (۱۰۰) سے کچھ زائد احادیث پر حکم بیان کیا۔

(4)جامع الاصول از امام ابن الاَثیر مبارک بن محمد جزری: اس میں بھی کئی مقامات پر احادیث و رواۃ کے متعلق کلام موجود ہے۔

(5)سنن ترمذی از امام ابو عیسی محمد بن عیسی ترمذی:جہاں تک تعلق ہے اس کتاب کاتو مصنف نے خود احکام ذکر فرمائے ہیں، مزید تحقیق کے لئے ابو الفتح ابن سید الناس کی شرح (النفح الشذی فی شرح جامع الترمذی) کا مطالعہ فرمائیں۔احادیث الباب وغیرہ پر کلام موجود ہے۔

(6)سنن ابن ماجہ از امام ابو عبد اللہ محمد بن یزید قزوینی: اس میں دو طرح کی احادیث ہیں، ایک وہ جو صحیحین اور دیگر سنن میں ہیں تو اس کا حکم مذکورہ کتب میں اگر ہوں تو وہاں سے دیکھ لیا جائے۔ دوسری وہ جو زوائد کہلاتی ہیں، ان زوائد کو امام احمد بن ابو بکر بوصیری شافعی نے ”مصباح الزجاجہ فی زوائد ابن ماجہ“ کے نام سے جمع کیا ہےاور حکم سے متعلق کلام بھی کیا ہے۔

(7)القول المسدّد فی الذّبّ عن مسند احمدازامام ابن حجراحمد بن علی عسقلانی شافعی

(8)حاشیۃ السندی علی ابن ماجہ والنسائی از امام ابو الحسن محمد بن عبد الھادی سندی

احادیثِ احکام پر حکم:

(1)نصب الرایہ ازامام عبد اللہ بن یوسف زیلعی حنفی

(2)الدرایہ فی تخریج احادیث الہدایہ از امام ابن حجراحمد بن علی عسقلانی شافعی: یہ کتاب در اصل نصب الرایہ للزیلعی کی تلخیص ہیں لیکن اضافی فوائد ونکات پر مشتمل ہے۔

(3)البدر المنیر فی تخریج احادیث الشرح الکبیر از امام ابن ملقن عمر بن علی شافعی: امام غزالی نے فقہ شافعی پر ایک کتاب (الوجیز) لکھی، امام رافعی نے (فتح العزیز) کے نام سے اس کی شرح لکھی، پھر ابن ملقن نے اس شرح کی احادیث کی تخریج کی اور ساتھ احکام بھی بیان کیے۔

(4)التلخیص الحبیر فی تخریج احادیث الرافعی الکبیر از امام ابن حجراحمد بن علی عسقلانی شافعی: در اصل ابن حجر نے اپنے شیخ ابن ملقن کی ہی کتاب (البدر المنیر)کی تلخیص کی ہے اور مزید چند کتابوں کی احادیث کو بھی شامل کیا ہےاور ساتھ احکام پر گفتگو بھی فرمائی۔

(5)الاحکام الوسطی از امام عبد الحق بن عبد الرحمن الاشبیلی: عموما بغیر سند کے احادیث ذکر کرتے ہیں سوائے پہلے راوی کے پھر حدیث کے حکم سے متعلق کلام کرتے ہیں ۔

(6)السنن الکبری از امام احمد بن حسین بیہقی شافعی

(۷)خلاصۃ الاحکام از امام یحی بن شرف نووی شافعی

(۸)المجموع شرح المھذب از امام یحی بن شرف نووی شافعی

کتبِ دعوات:

(1)الترغیب والترھیب از امام عبد العظیم بن عبد القوی منذری شافعی

(۲)الاذکار از امام یحی بن شرف نووی شافعی

(۳)نتائج الافکار فی تخریج احادیث الاذکار از امام ابن حجراحمد بن علی عسقلانی شافعی

کتبِ شروحات:

(1)شرح السنۃ از امام حسین بن مسعود بغوی شافعی

(2)فیض القدیر شرح الجامع الصغیر از علامہ محمد عبد الرؤوف مناوی

(3)التیسیر بشرح الجامع الصغیر از امام محمد عبد الرؤوف مناوی

(4)السراج المنیر شرح الجامع الصغیر از امام علی بن احمد عزیزی شافعی

(5)مرقاۃ المفاتیخ شرح مشکاۃ المصابیح از امام علی بن سلطان محمدالقاری حنفی

(۶)شرح صحیح مسلم از امام یحی بن شرف نووی شافعی

(۷)فتح الباری از امام ابن حجراحمد بن علی عسقلانی شافعی

کتبِ تخریج وزوائد:

(1)الجامع الصغیر از امام جلال الدین عبد الرحمن بن ابو بکرسیوطی

(2)الجامع الکبیر/جمع الجوامع از امام جلال الدین عبد الرحمن بن ابو بکرسیوطی

(3)مجمع الزوائد از امام نور الدین علی بن ابو بکرہیثمی

(4)اتحاف الخیرۃ المہرۃ از امام احمد بن ابو بکر بوصیری شافعی

(5)المطالب العالیہ از امام ابن حجراحمد بن علی عسقلانی شافعی

(۶)المغنی عن حمل الاسفار از علامہ عبد الرحیم بن حسین عراقی شافعی: یہ امام غزالی کی کتاب احیاء العلوم کی احادیث کی تخریج سے متعلق ہے۔

(۷)جامع الاحادیث از مفتی حنیف رضوی صاحب:اعلی حضرت کی تالیفات میں موجود حدیثوں کو اس کتاب میں جمع کیا اور امام اہلسنت نے جو حکم لگائے اسے بیان کیااور بعض اوقات اپنی طرف سے حکم ذکر کیا۔

کتب الرجال:

(1)الضعفاء الکبیر از امام محمد بن عمروعُقَیلی: راوی کے ترجمہ کے تحت اسی راوی کی سند سے حدیث ذکر کرتے ہیں تو راوی جس درجے کا ہوگا حدیث پر بھی وہی حکم لگے گا۔بعض اوقات حدیث سے راوی کا درجہ معلوم ہوتا ہے۔

(2)المجروحین از امام محمد بن حبان بُستی

(3)الکامل فی ضعفاء الرجال از امام عبد اللہ بن عدی جرجانی

(4)میزان الاعتدال از امام شمس الدین محمد بن احمد ذہبی

(5)لسان المیزان از امام ابن حجراحمد بن علی عسقلانی شافعی

کتبِ موضوعات وغیرہ

(1)الموضوعات از امام ابن جوزی عبد الرحمن بن علی حنبلی

(2)تعقبات ابن جوزی از امام جلال الدین عبد الرحمن بن ابو بکرسیوطی

(3)اللآلی المصنوعۃ از امام جلال الدین عبد الرحمن بن ابو بکرسیوطی

(4)ذیل اللآلی از امام جلال الدین عبد الرحمن بن ابو بکرسیوطی

(5)الموضوعات از امام حسن بن محمد صغانی حنفی

(۶)جزء فیہ الرد علی الصغانی از علامہ عبد الرحیم بن حسین عراقی شافعی

(۷)تنزیہ الشریعہ از امام ابن عَرّاق علی بن محمد شافعی

(۸)کشف الخفاءاز امام اسماعیل بن محمدعجلونی

(۹)العلل المتناہیہ از امام ابن جوزی عبد الرحمن بن علی حنبلی

(۱۰)سِفر السعادۃ از امام محمد بن یعقوب فیروزآبادی

(۱۱)شرح سفر السعادۃ از امام عبد الحق محدث دہلوی حنفی، فارسی

(۱۲)المقاصد الحسنہ از امام محمد بن عبد الرحمن سخاوی شافعی

علل حدیث سے متعلق کتابوں سے بھی احکام اخذ کیے جا سکتے ہیں، مزید یہ کہ خاص خاص موضوع پر لکھی گئی کتابیں یا اجزاء وغیرہ بھی ہیں جن میں حکم ہوتا ہےجیسے:

فضائل خلفاء راشدین و اہل بیت سے متعلق کتب:

(1)الصواعق المحرقہ از امام ابن حجراحمد بن محمد ہیتمی شافعی

(2)استجلاب ارتقاء الغرف از امام محمد بن عبد الرحمن سخاوی شافعی

(3)تاریخ الخلفاء از امام جلال الدین عبد الرحمن بن ابو بکرسیوطی

درود شریف سے متعلق کتب:

(1)القول البدیع از امام محمد بن عبد الرحمن سخاوی شافعی

(2)الدر المنضود از امام ابن حجراحمد بن محمد ہیتمی شافعی

یہاں احاطہ مقصود نہیں ،اگر مزیدنام شامل کیے جائیں تو ایک طویل فہرست تیار ہو سکتی ہے۔

وضاحت:

لیکن یہ بات ذہن نشین رہے کہ نقلی حکم کئی بار صرف خاص سند کے اعتبار سے ہوتا ہےلہذا متنِ حدیث پر حکم جمیع جہات کو پیش نظر رکھ کر لگایا جائے گا، سند کے ضعیف ہونے سے حدیث کا ضعیف ہونا لازم نہیں آتا اسی طرح سند کے صحیح ہونے سے متنِ حدیث کا صحیح ہونا لازم نہیں آتاکہ کبھی متن شاذ یا معلل ہوتی ہے۔

مذکورہ کلام صرف اُن معروف کتب کی نشاندہی کے لیے ہے جن سے منقولی احکام مل سکتے ہیں، باقی رہا اصلِ حدیث پر حکم کیسے لگے گا؟ متابع و شواہدات کے کیا اصول ہیں؟ ضعیف ہونے کی صورت میں کس کا ضعف کا پوراہو سکے گا اور کس کا نہیں؟ان سب کی تفصیل کے لیے متعلقہ کتب کا مطالعہ فرمائیں۔

28 ربیعُ الاخر1447مطابق22اکتوبر2025

مسلمانوں کے دلوں میں عشقِ رسول صلَّی اللہ علیہ واٰلہٖ وسلَّم ، محبتِ صحابۂ کرام اور اولیائے کرام کی عقیدت پیدا کرنے والی عاشقانِ رسول کی دینی تحریک دعوتِ اسلامی کے زیر اہتمام آج مؤرخہ 02 اکتوبر 2025ء کو دنیا بھر میں ہفتہ وار سنتوں بھرے اجتماعات کا انعقاد کیا جائے گا جن میں اراکین شوریٰ و مبلغین دعوتِ اسلامی سنتوں بھرے بیانات فرمائیں گے۔ہفتہ وار اجتماعات میں بیانات کے ذریعے کردار سازی اور معاشرے کی اصلاح کے ساتھ ساتھ گناہوں سے توبہ اور روحانی ترقی کے لئے ذکر و اذکار اور دعاؤں کا سلسلہ ہوتا ہے۔

تفصیلات کے مطابق آج رات مدنی چینل پر براہ راست نشر ہونے والے ہفتہ وار اجتماع میں رکنِ شوریٰ حاجی محمد اظہر عطاری، شاہین گراؤنڈ فاروق آباد ڈسٹرکٹ شیخوپورہ سے سنتوں بھرا بیان فرمائیں گے۔

اس کے علاوہ عالمی مدنی مرکز فیضانِ مدینہ کراچی میں رکنِ شوریٰ حاجی محمد امین عطاری، مدنی مرکز فیضان مدینہ کامونکی مدینہ ٹاؤن میں رکنِ شوریٰ مولانا حاجی محمد اسد عطاری مدنی، بابری مسجد نزد غازی آباد تھانہ تاجپورہ سکیم لاہور (عزیز بھٹی ٹاؤن) میں رکنِ شوریٰ حاجی یعفور رضا عطاری، مدنی مرکز فیضانِ مدینہ آفندی ٹاؤن حیدر آباد میں رکنِ شوریٰ حاجی محمد علی عطاری، جامع مسجد عبدالرشید کرنافولی چٹاگانگ بنگلہ دیش میں رکن شوریٰ عبد المبین عطاری اور مدنی مرکز فیضان مدینہ Old Firth Library Sheffield S5 6WSمیں رکن شوریٰ حاجی محمد خالد عطاری سنتوں بھرا بیان فرمائیں گے۔

ہر طبقہ فکر کے افراد کو ہفتہ وار اجتماع میں شرکت کرنے کی درخواست ہے۔

جوہر ٹاؤن لاہور، پنجاب میں موجود دعوتِ اسلامی کے مدنی مرکز فیضانِ مدینہ میں شعبہ کفن دفن کے تحت 29 دسمبر 2024ء کو ایک ٹریننگ سیشن ہوا جس میں صوبائی ذمہ دار اسلامی بھائیوں نے شرکت  کی۔

دورانِ سیشن ایچ آر ڈیپارٹمنٹ دعوتِ اسلامی کے GM محمد مبشر عطاری نے ذمہ دار اسلامی بھائیوں سے مختلف امور پر گفتگو کرتے ہوئے انہیں مسائل حل کرنے، نظام کو مزید بہتر بنانے اور کم وقت میں زیادہ کام کرنے کے حوالے سے ٹریننگ دی۔

اس موقع پر دعوتِ اسلامی کی مرکزی مجلسِ شوریٰ کے رکن حاجی منصور عطاری بھی موجود تھے۔(رپورٹ: عمیر عطاری معاون رکن شوری حاجی منصور عطاری ، کانٹینٹ:غیاث الدین عطاری)

شعبہ معاونت برائے اسلامی بہنیں دعوتِ اسلامی کے تحت پچھلے دنوں تھانہ سوات میں مدنی مشورے کا انعقاد کیا گیا جس میں شعبے کے ڈسٹرکٹ و ڈویژن ذمہ دار اسلامی بھائیوں نے شرکت کی۔

اس مدنی مشورے میں نگرانِ شعبہ غلام الیاس عطاری نے ذمہ دار اسلامی بھائیوں سے گفتگو کرتے ہوئے گلی گلی مدرسۃ المدینہ، غیر رہائشی کورسز اور ماہانہ اجتماع شروع کروانے نیز دعوتِ اسلامی کے 12 دینی کاموں کو مضبوط کرنے کا ذہن دیا۔

بعد ازاں مدنی مشورے میں موجود ذمہ دار اسلامی بھائیوں نے دعوتِ اسلامی کے دینی کاموں میں مزید بہتری و ترقی لانے کے لئے اچھی اچھی نیتوں کا اظہار کیا۔(رپورٹ: مومن عطاری شعبہ معاونت برائےا سلامی بہنیں صوبائی ذمہ دار کے پی کے ، کانٹینٹ:غیاث الدین عطاری)

ہر طبقے کے لوگوں کو علمِ دین سکھانے اور انہیں دینِ اسلام کی تعلیمات دینے والی عاشقانِ رسول کی دینی تحریک دعوتِ اسلامی کے اسپیشل پرسنز ڈیپارٹمنٹ کے تحت آج مؤرخہ 01 جنوری 2025ء سے مدنی مرکز فیضانِ مدینہ جوہرٹاؤن لاہور میں  رہائشی ”سائن لینگویج کورس“ (اشاروں کی زبان کا کورس) کا انعقاد کردیا گیا ہے جوکہ 7 دنوں تک جاری رہے گا۔

معلومات کے مطابق اس کورس میں مختلف نکات پر شرکا کی رہنمائی کی جائے گی جن میں سے بعض یہ ہیں: ٭اسپیشل پرسنز (گونگے اور بہرے اسلامی بھائیوں) سے گفتگو کا طریقہ٭فضول گوئی سے حفاظت٭کم بولنے کی عادت٭مسلمانوں کی دل جوئی٭امر بالمعروف و النہی عن المنکر۔(رپورٹ: سید عمیر عطاری نگران شعبہ اسپیشل پرسنز ، کانٹینٹ:غیاث الدین عطاری)

علمِ دین حاصل کرنے اور اس کورس میں داخلہ لینے کے لئے اس نمبر پر رابطہ کریں:

03134817492

عالمی سطح کی دینی تحریک دعوتِ اسلامی کے تحت صوبہ پنجاب، پاکستان کے  مدنی مرکز فیضانِ مدینہ جوہر ٹاؤن لاہور میں 29 دسمبر 2024ء کو شعبہ کفن دفن کا مدنی مشورہ منعقد کیا گیا جس میں صوبائی ذمہ دار اسلامی بھائیوں نے شرکت کی۔

مدنی مشورے میں مرکزی مجلسِ شوریٰ کے رکن حاجی منصور عطاری نے ابتداءً ”اصولوں کی پاسداری“ کے موضوع پر بیان کیا اور وہاں موجود اسلامی بھائیوں کی تربیت و رہنمائی کی۔

رکنِ شوریٰ نے اس دوران ذمہ دار اسلامی بھائیوں سے شعبے کی سابقہ 5 ماہ کی کارکردگی کا جائزہ لیا اور اس میں نمایاں کارکردگی والے اسلامی بھائیوں کی حوصلہ افزائی بھی کی جس پر انہوں نے اچھی اچھی نیتیں کیں۔(رپورٹ: عمیر عطاری معاون رکن شوری حاجی منصور عطاری ، کانٹینٹ:غیاث الدین عطاری)

پنجاب پاکستان کے شہر  نارو وال میں قائم دعوتِ اسلامی کے مدنی مرکز فیضانِ مدینہ میں 31 دسمبر 2024ء کو شعبہ مدنی کورسز کے تحت معلم کورس ہوا جس میں شعبہ جامعۃ المدینہ کے طلبۂ کرام، شعبہ مدرسۃ المدینہ کے مدرسین، شعبہ مدرسۃ المدینہ بالغان اور شعبہ مدنی کورسز کے ذمہ داران کی شرکت ہوئی۔

تفصیلات کے مطابق معلم کورس میں مبلغینِ دعوتِ اسلامی نے مختلف موضوعات پر شرکا کی رہنمائی کی جن میں سے بعض درج ذیل ہیں:٭معلم کو کیسا ہونا چاہیئے؟٭معلم کی خصوصیات٭کامیاب معلم کے اوصاف٭کورس تیار کرنے کا طریقہ٭ ڈیٹا انٹری کی اہمیت و افادیت٭ایپلیکیشن میں ڈیٹا انٹری کرنا٭کورس کے ذریعے 12 دینی کام کو مضبوط کرنا٭کورس میں کارکردگی جمع کرنے کا طریقہ٭رہائشی کورسز کے لئے اسلامی بھائیوں کو تیار کرنا٭کورس کے اختتام پر اختتامی نشست کا انعقاد کرنا ٭اختتامی نشست کا شیڈول٭دورانِ کورس فرض علوم کیسے سکھائے جائیں؟٭فیضانِ نماز کورس کا اجمالی شیڈول٭سبق سننے کا انداز کیا ہو؟۔

اس موقع پر کورس میں شریک طلبۂ کرام، مدرسین اور ذمہ دار اسلامی بھائیوں نےدعوتِ اسلامی کے مختلف دینی کاموں میں حصہ لیا جن میں صدائے مدینہ، تفسیر سننے / سنانے کا حلقہ اور مسجد درس شامل تھا۔

معلم کورس کے اختتام پر وہاں موجود تمام ذمہ دار اسلامی بھائیوں کا ٹیسٹ لیا گیا اور اسلامی بھائیوں نے مدنی چینل کو اپنے تأثرات دیتے ہوئے اچھی اچھی نیتوں کا اظہار کیا۔(رپورٹ: محمد ابوبکر عطاری گلبرگ ٹاؤن لاہور ڈویژن، کانٹینٹ:غیاث الدین عطاری)

اسلامی تعلیمات عام کرنے والی عاشقانِ رسول کی دینی تحریک دعوتِ اسلامی کے تحت 22 دسمبر 2024ء کو  لاہور، پنجاب میں موجود فیضانِ صحابیات میں ایک میٹنگ ہوئی جس میں اسٹاف کی اسلامی بہنیں شریک ہوئیں۔

دورانِ میٹنگ نگرانِ پاکستان مجلسِ مشاورت اسلامی بہن نے فیضانِ صحابیات میں داخلوں کو بڑھانے کے حوالے سے مدنی پھول بیان کئے اور ذمہ دار اسلامی بہنوں کی تربیت و رہنمائی کی۔مدنی مشورے کے اختتام پر ذمہ دار اسلامی بہنوں نے دینی کاموں کو مزید بہتر انداز سے کرنے کے لئے اچھی اچھی نیتوں کا اظہار کیا۔

دعوتِ اسلامی کے تحت 22 دسمبر 2024ء کو   لاہور سٹی کی تنظیمی ذمہ داران کا مدنی مشورہ منعقد ہوا جس میں سٹی تا یوسی نگران اور سٹی تا ٹاؤن سطح کی شعبہ ذمہ دار اسلامی بہنوں کی شرکت ہوئی۔

تفصیلات کے مطابق دعوتِ اسلامی کی نگرانِ پاکستان مشاورت اسلامی بہن نے ذمہ داران کو نیکی کی دعوت دیتے ہوئے کہا کہ ہمیں نیکی کی دعوت کا کام اللہ پاک کی رضا کے لئے ثوابِ آخرت کی امید پر خیر خواہی امت کے جذبے کے تحت کرنا ہے ۔

نگرانِ پاکستان مجلسِ مشاورت نے دعوتِ اسلامی کے لئے ڈونیشن جمع کرنے کی اہمیت بیان کرتے ہوئے بتایا کہ ڈونیشن دعوتِ اسلامی کے دینی کام کو آگے بڑھانے کا ذریعہ ہے لہذا ہمیں اپنی ذہنی و جسمانی صلاحیتوں کو بروئے کار لاتے ہوئے اپنے آرام و نیند کی قربانی دے کر رجب، شعبان اور رمضان میں اپنی دعوتِ اسلامی کو مضبوط بنانے کے لئے کوشش کرنی ہے۔

نگرانِ پاکستان مجلسِ مشاورت نے دورانِ مدنی مشورہ رمضان عطیات، منسلکین کا ڈیٹا انٹر کروانے ، اجتماعات کی لوکیشن گوگل میپ میں اپلوڈ کروانے، ماہنامہ فیضانِ مدینہ کی سالانہ بکنگ کروانے اور رہائشی کورسز میں ایڈمیشن بڑھانے کے متعلق اہداف دیئے جس پر ذمہ دار اسلامی بہنوں نے اپنی اچھی اچھی نیتوں کا اظہار کیا ۔

22 دسمبر 2024ء کو   شعبہ 8 دینی کام (اسلامی بہنیں)دعوتِ اسلامی کے تحت عباس پور شہر میں نیکی کی دعوت عام کرنے کے لئے ایک سیشن منعقد ہوا جس میں عباس پور تحصیل اور دیگر اطراف کے علاقوں سے اسلامی بہنوں نے شرکت کی۔

تلاوت و نعت کے بعد صوبہ کشمیر کی نگران اسلامی بہن نے ”قافلہ“ کے موضوع پر بیان کیا اور کہا کہ راہ ِخدا میں سفر کرنا سنت انبیاء ہے کہ کئی انبیائے کرام علیہم السلام نے دعوت و تبلیغ کے لئے راہ خدا میں سفر کیا جبکہ اللہ پاک کے آخری نبی صلی اللہ علیہ وآلہ وسلم نے بھی صحابہ کرام علیہم الرضوان کو راہِ خدا میں سفر کے لئے روانہ کیا۔

صوبہ کشمیر کی نگران اسلامی بہن نے حاضرین کو ترغیب دلائی کہ تمام اسلامی بہنیں اپنے محارم پر انفرادی کوشش کرتے ہوئے انہیں 3 دن،12 دن اور ایک ماہ کے لئے راہ ِخدا کا مسافر بنائیں نیز اس کی کارکردگی اپنی شعبہ محارم قافلہ ذمہ دار کو جمع کروائیں۔

بعدِ بیان نگران اسلامی بہن نے پونچھ ڈسٹر کٹ کی حالیہ کارکردگی کا جائزہ لیا اور ذمہ دار اسلامی بہنوں کو آئندہ کے اہداف دیتے ہوئے وہاں موجود اسلامی بہنوں کو دعوتِ اسلامی کے ساتھ مل کر دینی کاموں میں بڑھ چڑھ حصہ لینے کی ترغیب دلائی۔آخر میں مبلغۂ دعوتِ ا سلامی نے دعا کروائی اور تحائف تقسیم کرنے کا سلسلہ بھی ہوا۔

دعوتِ اسلامی کے تحت 21 دسمبر 2024ء کو  DHA کلفٹن ڈویژن کے تنظیمی اسٹرکچر کے حوالے سے آن لائن مدنی مشورہ منعقد کیا گیا جس میں عالمی مشاورت کی بعض اراکین ، DHA ، کلفٹن ڈویژن نگران اور کراچی سٹی نگران اسلامی بہنیں شریک ہوئیں۔

اوکاڑہ شہر سے بذریعہ انٹرنیٹ گفتگو کرتے ہوئے نگرانِ پاکستان مجلسِ مشاورت اسلامی بہن نے 8 دینی کاموں کی کارکردگی کا جائزہ لیا اور ان میں مزید بہتری لانے کے لئے مدنی پھولوں سے نوازا۔

مدنی مشورے میں شریک اسلامی بہنوں نے دعوتِ اسلامی کے دینی کاموں میں ترقی کے لئے اچھی اچھی نیتیں کیں۔ اپنے اہداف کا اظہار کیا۔

نیکی کی دعوت عام کرنے والی عالمی سطح کی دینی تحریک دعوتِ اسلامی کے تحت 21 دسمبر 2024ء کو  بعد نماز ِ عصر اوکاڑہ میں قائم فیضان صحابیات میں اسٹاف کی ذمہ دار اسلامی بہنوں کا مدنی مشورہ منعقد ہوا۔

اس دوران پاکستان مجلسِ مشاورت کی نگران اسلامی بہن نے فیضانِ صحابیات میں داخلوں کو بڑھانے کے حوالے سے مدنی پھول بیان کئے اور اُن کی تربیت و رہنمائی کی۔مدنی مشورے کے اختتام پر ذمہ دار اسلامی بہنوں نے دینی کاموں کو مزید بہتر انداز سے کرنے کے لئے اچھی اچھی نیتوں کا اظہار کیا۔