ہرہفتے کی طرح 12 مارچ 2022ء کو بھی عالمی مدنی مرکز فیضان مدینہ کراچی سے براہ راست مدنی چینل پر مدنی مذاکرے کا سلسلہ ہوا جس میں کثیر عاشقان رسول فیضان مدینہ کراچی آکر جبکہ سینکڑوں مقامات پر ہزاروں اسلامی بھائی بذریعہ مدنی چینل شریک ہوئے۔

مدنی مذاکرے میں شیخِ طریقت، امیر اہل سنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے ہونے والے سوالات کے بیرونِ ملک سے آن لائن مدنی چینل کے ذریعے جوابات دیئے اور مدنی پھول ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال : قرآن ِکریم میں مور(Peacock)کا پَررکھنا کیسا؟

جواب : بچپن سے دیکھا ہے کہ قرآنِ کریم میں مورکا پَررکھا جاتاہے ،اس کا عرف یعنی معمول بھی ہے ،اس سے قرآنِ کریم کی جلدبھی متائژنہیں ہوتی ، اس کو رکھنے میں حرج نہیں ۔

سوال: بُرے لوگوں کی صحبت سےبچنے کے لیے کہاجاتاہے کہ ان کا رنگ تم پر چڑھ جائے گا،یہ کیوں نہیں کہاجاتاکہ تمہاری نیکی کا رنگ اُن پرچڑھ جائے گا؟

جواب: گُناہ میں لذّت ہوتی ہے اورنیکی میں امتحان ہوتاہے،اس لیے گُنا ہ کا رنگ زیادہ اثراندازہوتاہے، حدیث پاک میں بھی بُری صحبت کی مثال لوہارکی بھٹی سے دے کربُروں کی دوستی اورصحبت سے بچنے کا حکم دیا گیا ہے ۔بُروں کے ساتھ وہی بیٹھنے کا معمول بنائے گا جو اندرسے اُن کی باتوں کو پسندکرتاہوگا عربی محاورہ ہے اَلْجِنْسُ یَمِیْلُ اِلَی الْجِنْس یعنی جنس اپنی ہم جنس کی طرف مائل ہوتی ہے ،البتہ اگرکوئی عالم دین یا منجھے ہوئے مبلغِ دعوت ِ اسلامی ہوں گے تواُن کا رنگ بُروں پر چڑھے گا ،کیونکہ وہ ان کے پاس جاکر ان کی خوش گپیوں میں شریک ہونے کے بجائے نیکی کی دعوت دیں گے ۔

سوال: اگرکسی کے گھر بوڑھے افراد بیمارہوں تواُن گھروالوں کا ان سے اندازکیساہونا چاہئے ؟

جواب : یہ سخت کڑااورامتحان کا وقت ہوتاہے ،بوڑھوں کی خوب خدمت کی جائے ،اگروہ کوئی آپ کے مزاج کے خلاف بات کردیں تو آپ کو صبرکا پیمانہ پینا ہوگا،انہیں "اُف" بھی کہنے کی اجازت نہیں ،ان سے عاجزی کریں،نرمی سے پیش آئیں، ان کی خدمت بوجھ سمجھ کر نہیں بلکہ خوش دلی کے ساتھ کریں۔ یہ تمنا بھی نہ کریں کہ یہ(بوڑھے مریض) اس دنیا سے چلے جائیں بلکہ اُن کی عافیت،صحت ا ورسلامتی کی دعاکریں ۔

پارہ 15،سورۂ بنی اسرائیل کی آیت نمبر23 میں اِرشادہوتاہے:

وَ بِالْوَالِدَیْنِ اِحْسَانًا ؕاِمَّا یَبْلُغَنَّ عِنْدَكَ الْكِبَرَ اَحَدُهُمَاۤ اَوْ كِلٰهُمَا فَلَا تَقُلْ لَّهُمَاۤ اُفٍّ وَّ لَا تَنْهَرْهُمَا وَ قُلْ لَّهُمَا قَوْلًا كَرِیْمًا۔

(ترجمۂ کنزالعرفان:اور ماں باپ کے ساتھ اچھا سلوک کرو اگر تیرے سامنے ان میں سے کوئی ایک یا دونوں بڑھاپے کو پہنچ جائیں تو ان سے اُف تک نہ کہنا اور انہیں نہ جھڑکنا اور ان سے خوبصورت ، نرم بات کہنا )

سوال: شبِ براءَت میں قبرستان جانا کیسا؟

جواب: شبِ براءَت میں قبرستان جانا مستحب ہے ،سُنّت سے ثابت ہے مگرعبرت حاصل کرنے کے لیے جائے،اپنی موت کو یا دکرے، اپنی زندگی کو شریعت کے سانچے میں ڈھالنے کی ترکیب کرے ،صرف رسم کے طورپر نہ جائے ،قبرستان میں جاکر قبروالوں کو سلام کرے، یہ دعا پڑھے : اَلسَّلَامُ عَلَیْکُمْ یَا أَهْلَ الْقُبُوْرِ یَغْفِرُ اللهُ لَنَا وَلَکُمْ اَنْتُمْ سَلَفُنَا وَنَحْنُ بِالْأَثَرِ۔

( ترجمہ:اے قبرستان والو! تم پر سلامتی ہو،اﷲ پاک ہماری اورتمہاری مغفرت فرمائے ،تم ہم سے پہلے چلے گئے اورہم تمہارے پیچھے آنے والے ہیں)اس دُعاکے ترجمے پر غورکرے ،اس میں بھی عبرت اورموت کی یادہے۔

سوال: اصل بزرگ کون ہوتاہے ؟

جواب: اصل بزرگ عالِم ہوتاہے، اگرچہ وہ جوان ہو،عالِم علم سے بنتاہے، شکل وصورت اورعمر سے نہیں۔

سوال : شبِ براءَت کس طرح گزاریں ؟

جواب :14 شعبان اعمال نامے کا آخری دن ہوگالہٰذا تمام گناہوں سے سچی توبہ کریں ، لوگوں سے معافی بھی مانگ لیں ،معافی مانگنے سے محبتیں بڑھیں گی ،14شعبان کا روزہ رکھ لیں ،بلکہ اس بارتو14 شعبان(18مارچ2022) جمعہ کو ہے، اس لیے جمعرات کا بھی روزہ رکھ لیں کہ جمعرات کو روزہ رکھنا سُنّت ہے ،14 شعبان(بروزجمعہ) کو نمازِمغرب سے پہلے ہی مسجدمیں آجائیں،بعدنمازِ مغرب بزرگوں سے ثابت 6 نوافل پڑھ لیں ، اس کی تفصیل مکتبۃ المدینہ کے رسالے ’’آقاکا مہینا ‘‘سے دیکھ لیں ،ساری رات دعوتِ اسلامی کے اجتماعِ شب براءَت میں گزاریں ۔یہ عبادت کی رات ہے،پٹاخے پھوڑنے کی رات نہیں بلکہ یہ پٹاخے پھوڑنا تو اِسراف اورگُناہ ہے ،یہ شبِ براءَت یعنی جہنم سے چھٹکارے کی رات ہے ۔ہوسکے تو15شعبان کا بھی روزہ رکھ لیں،اس کی بھی بہت زیادہ فضیلت ہے۔ 

سوال: اِس ہفتے کارِسالہ ” مریض طبیب بن گیا “ پڑھنے یاسُننے والوں کوجانشینِ امیرِاہلِ ِسُنّت دامت برکاتہم العالیہ نے کیا دُعا دی ؟

جواب: یاربَّ المصطفٰے! جو کوئی 21 صفحات کا رسالہ”مریض طبیب بن گیا“ پڑھ یا سُن لے،اُسے گُناہوں کی بیماری سے شِفا دے، جہنّم سے بچا اور جنتُ الفردَوس میں بے حساب داخلہ نصیب فرما۔اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔ 

عالمی مدنی مرکز فیضان مدینہ کراچی میں 5 مارچ 2022ء کو ہفتہ وار مدنی مذاکرے کا انعقاد کیا گیا جس میں کثیر عاشقان رسول فیضان مدینہ کراچی آکر جبکہ سینکڑوں مقامات پر ہزاروں اسلامی بھائی بذریعہ مدنی چینل شریک ہوئے۔

مدنی مذاکرے میں شیخِ طریقت، امیر اہل سنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے ہونے والے سوالات کے بیرونِ ملک سے آن لائن مدنی چینل کے ذریعے جوابات دیئے اور مدنی پھول ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال : امام اعظم ابوحنیفہ نعمان بن ثابت رحمۃ اللہ علیہ کا یوم ِعرس کیا ہے ؟

جواب : آپ کا یوم عرس 2 شَعبان 150ھ ہے۔(نزہۃ القاری،1 169/،  219) 

سوال: مسجدِنبوی میں کس مقام پرامام اعظم رحمۃ اللہ علیہ کا نام لکھا ہواہے ؟

جواب: امام اعظم ابوحنیفہ رحمۃ اللہ علیہ کا نام مبارک ’’نعمان بن ثابت ‘‘مسجدِنبوی شریف میں پہلی چھتری کے نیچے لکھاہواہے ۔

سوال: مہنگائی میں گھرکی خواتین کیاکرداراداکرسکتی ہیں ؟

جواب : کھانے پینے میں اِسراف سے بچیں ،حساب لگا کر کھانا اورروٹیاں پکائیں تاکہ روٹیاں بچ نہ جائیں کیونکہ باسی روٹیاں بچے اوربڑے نہیں کھاتے ،دعوت میں ہونے والے اِسراف سے بھی بچیں ،مہنگائی کوکم کرنے کا ایک طریقہ یہ بھی ہے کہ جو چیز مہنگی ہوجائے وہ خریدنا چھوڑدیں ،یہ سستی ہوجائے گی۔

سوال: مہنگائی کوکم کرنے میں تاجراپنا کیا رول اداکرسکتے ہیں ؟

جواب: تاجرحضرات لوگوں سے ہمدردی کریں اورنفع کم رکھیں ۔

سوال: شادی کی مبارکباد کن الفاظ سے دی جائے ؟

جواب : اچھے الفاظ کے ساتھ مبارکباددی جائے مثلاً ماشاءا للہ !آپ کو شادی مبارک ہو ۔

سوال : کیا اِمام اعظم ابوحنیفہ نعمان بن ثابت رحمۃ اللہ علیہ نے کسی صحابی رضی اللہ عنہ کی زیارت کی ہے ؟

جواب : جی ہاں ! آپ نے کئی صحابۂ کرام علیہم الرضوان کی زیارت کی ہے ،آپ تابعی ہیں ۔ 

سوال: اِس ہفتے کارِسالہ ” فیضانِ امام شافعی “ پڑھنے یاسُننے والوں کوجانشینِ امیرِاہلِ ِسُنّت دامت براکاتہم العالیہ نے کیا دُعا دی ؟

جواب: یاربَّ المصطفٰے! جو کوئی 17 صفحات کا رسالہ” فیضان ِامام شافعی “ پڑھ یا سُن لے اُسےعلمِ دین کی لازوال دولت سے مالامال فرماکر بے حساب بخش دے۔اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

دعوتِ اسلامی عاشقانِ رسول کے دلوں میں   جہاں صحابۂ کرام کی محبت پیدا کرتی ہے وہاں آلِ نبی و اہلِ بیتِ اطہار سے عشق و محبت کے جام بھی بھر بھر کر پلاتی ہے۔ اہلِ بیتِ اطہار نجات کی کشتی اور صحابۂ کرام آسمان ہدایت کے روشن ستارے ہیں۔ ایمان والے ،اہلِ بیت کی کشتی میں سوار ہوکر نجومِ رسالت کی پیروی کرتے ہوئے اپنے ایمان کو سلامت رکھتے ہیں۔

اہلِ بیتِ اطہار میں بہت بڑا نام نواسۂ رسول ، امام عالی مقام ، شہیدِ کربلا حضرت سیدنا امام حسین رضی اللہُ عنہ کا ملتا ہے ۔ آپ رحمۃُ اللہِ علیہ کا یومِ ولادت 5 شعبان المعظم کو آتا ہے۔ اسی مناسبت سے آج 8 مارچ کی شب 5 شعبا ن المعظم کی مناسبت سے دعوتِ اسلامی کے عالمی مدنی مرکز فیضانِ مدینہ کراچی میں ”مدنی مذاکرہ بسلسلہ جشنِ ولادت امام حسین رضی اللہُ عنہ“ منعقد ہوگا۔

مدنی مذاکرے کا آغاز تلاوت و نعت سے ہوگاجس کے بعد جلوسِ حسینی نکالا جائے گا، جلوس کے بعد شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہبیرونِ ملک سے بذریعہ ویڈیو لنک عاشقانِ رسول کے سوالات کے جوابات ارشاد فرمائیں گے۔

ثناخوان حضرات حضرت سیدنا امام حسین رضی اللہُ عنہ کی شان میں منقبتیں بھی پیش کریں گے جبکہ اختتام پر لنگر کا اہتمام بھی ہوگا۔

تمام عاشقانِ رسول سے گزارش ہے کہ جن سے ممکن ہو وہ فیضانِ مدینہ آکرشرکت فرمائیں، علاوہ ازیں مدنی چینل پر بھی یہ پروگرام نشر کیاجائے گا ،آپ مدنی چینل کے ذریعے گھر بیٹھے بھی علمِ دین حاصل کرسکتے ہیں۔ 

عالمی مدنی مرکز فیضان مدینہ کراچی میں 25رجب المرجب 1443ھ بمطابق 26فروری 2022ء کو ہفتہ وار مدنی مذاکرے کا انعقاد کیا گیا جس میں عاشقان رسول کی بڑی تعداد شریک ہوئی۔

مدنی مذاکرے میں شیخِ طریقت، امیر اہل سنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے ہونے والے سوالات کے بیرونِ ملک سے آن لائن مدنی چینل کے ذریعے جوابات دیئے اور مدنی پھول ارشاد فرمائے۔

مدنی مذاکرے کے چند نکات ملاحظہ کیجئے:

سوال: سوشل میڈیا کا کس طرح استعمال کیاجائے ؟

جواب :سوشل میڈیا کے فائدے کم اورنقصانات زیادہ ہیں ،سوشل میڈیا سے اس طرح فائدہ حاصل کیا جاسکتاہے کہ بندہ مستندعالم دین سے کوئی شرعی مسئلہ سیکھ لےیا بیان کے کلپ سے استفادہ کرے یا خود عالم دین ہے تو اپنی خدمات سوشل میڈیا کے ذریعے پیش کرے، دعوتِ اسلامی کی ویب سائٹ(www.dawateislami.net) پر دینی مواداپ لوڈ کیا جاتاہے ،اس سے بھی فائدہ اٹھایا جا سکتاہے تاہم سوشل میڈیا کے نقصانا ت غالب ہیں ،اس کے نقصانات کیا، کیا ہیں؟ اس کے یوزر(user) اس بات کو خوب سمجھتے ہیں ،اگرکوئی اسے رکھتابھی ہے تو وہی استعمال کرے جو مَیں نے بیان کیا ۔

سوال: جب دینی باتیں بیان ہورہی ہوں تو ہمارااندازکیساہو نا چاہئے ؟

جواب: جب دین کی بات کی جارہی ہوتو موبائل سمیت تمام کام چھوڑکر اسے غورسےسنا جائے تاکہ کوئی غلط مسئلہ ذہن میں نہ بیٹھ جائے،طلبہ ٔ علم دین بھی جب اپنے استاذصاحب کے پاس پڑھیں تو یہی اندازہوناچاہئے ۔

سوال: مدنی اسلامی بھائی معاشرے میں کیا کرداراداکرسکتے ہیں اورآپ ان کے بارے میں کیا توقعات رکھتے ہیں ؟

جواب : ایک بات یادرکھیں ،آپ نے جو پڑھا ہے اسے پڑھتے اورپڑھاتے رہیں گے تو یہ یادرہے گا، باقی رہے گا اوراس میں اضافہ بھی ہوتارہے گا ورنہ بھول جائیں گے،جس سے بَن پڑے وہ ضرورپڑھاتارہے اگرچہ تدریس کا موقع نہ بھی ملے،چھوٹے بھائی یا محلے میں کسی کو پڑھاتارہے، پڑھانے میں نیت ثواب کی ہونی چاہئے، مزید دین کی خدمت کا ذہن بنائیں،مسجدمیں امامت وخطابت کریں ،امامت کا منصب کم نہیں ہے بہت اعلیٰ ہے ،اس سے ہرگزنہ ہٹئے گا، امامت کرنے سے مساجد محفوظ ہوں گی ، دین کی خدمت ہوگی، اگرایک سلجھاہوا عاشقِ رسول امام ہواور حکمتِ عملی سے چلے تو پورامحلہ اس کے اندازمیں چلتاہے،یادرکھئے ! جو دین کی خدمت کرتاہے وہ دنیا سے کٹ آف نہیں ہوتا،جو اس فیلڈ میں ہوتے ہیں،ا نکی معاشرے میں بہت عزت ہوتی ہے،عموماً حج وعمرہ کی سعادت نصیب ہوتی ہے ،مدنی اسلامی بھائی اپنے اخلاق درست رکھیں گے، مال سے بے رغبت ہوں گے، عادات بہترہوں گی،بداخلاقی وجھگڑوں سے بچیں گے تو اپنے علاقے کے بے تاج بادشاہ ہوں گے، بہرحال آپ کے پاس علم کا اعزازہے جسے آپ نے نبھانا ہے۔

سوال: اس مرتبہ کتنے طلبہ و طالبات جامعۃ المدینہ میں دورہ ٔحدیث کرکے فارغ التحصیل ہوئے ہیں؟

جواب: ان کی کل تعداد3 ہزار5 سو33ہے(3533) ،اس میں طالبات 2ہزارایک سو95(2195)،اورطلبہ ایک ہزار3 سو38(1338) ہیں، اللہ کرے یہ تعدادبڑھتی رہے،دعوتِ اسلامی کے دینی کام بڑھائیں گے ، تو اس سے دعوت ِ اسلامی مضبوط ہوگی،دعوت ِ اسلامی مضبوط ہوگی تو ان شاءاللہ الکریم یہ تعداد بھی بڑھے گی ۔

سوال: ٹریننگ کتنی ضروری ہے ہم ٹریننگ کیسے حاصل کرسکتے ہیں ؟

جواب:بندے کی ترقی میں تربیت کا بڑادخل ہوتاہے، دیکھنا ہوگا کہ تربیت دینے والاکون ہے ؟سب سے پہلی تربیت تو ماں کی گود میں ہوتی ہے،یہاں سے تربیت ہوتو بچہ بہت ترقی کرسکتاہے، ماؤں کی تربیت کا فقدان یعنی نہ ہونے کے برابرہے ، دینی ادارہ ہویا دنیاوی ادارہ ہرجگہ اخلاقی تربیت کی حاجت ہے، تھوڑا سامزاج کے خلاف کوئی کام ہوتاہے تو عقل گھوم جاتی اورزبان کے ذریعے بداخلاقی شروع ہوجاتی ہے، اگرکوئی اپنے آپ کو بااخلاق سمجھتاہے تو غصے کے وقت اپنی کیفیت دیکھ لے،کسی بزرگ کا قول ہے کہ کسی کے حسنِ اخلاق کی گواہی اس وقت نہ دوجب تک اسے غصے میں نہ دیکھ لو، جب غصہ آتاہے تو بندہ بداخلاقی کے سابقہ سارے ریکارڈ توڑدیتاہے، جوگالیاں دے اسے کون بااخلاق کہہ سکتاہے۔ (مکتبۃ المدینہ کی کتاب ”حسن اخلاق“ کا مطالعہ بھی ان شاء اللہ بے حد مفید رہے گا ۔)

سوال: اِس ہفتے کارِسالہ ” جنگل کا بادشاہ “ پڑھنے یاسُننے والوں کوجانشینِ امیرِاہلِ ِسُنّت دامت براکاتہم العالیہ نے کیا دُعا دی ؟

جواب: یاربَّ المصطفٰے! جو کوئی 21 صفحات کا رسالہ”جنگل کا بادشاہ“ پڑھ یا سُن لے اُس کو صرف اپنا خوف عطا فرمااور اُس سے ہمیشہ ہمیشہ کےلئے راضی ہوجا۔اٰمِیْن بِجَاہِ خاتَمِ النَّبیّن صلَّی اللہ علیہ واٰلہٖ وسلَّم ۔

آج رات ہفتہ وار مدنی مذاکرے کا انعقاد کیا جائیگا، امیر اہل سنت مدنی پھول ارشاد فرمائیں گے

عاشقانِ رسول کو علم دین کی جستجو دلانے، معاشرتی حوالے سے تربیت کرنے اور ان کے قلوب کو خوفِ خدا و عشق رسول اور محبتِ صحابہ و اولیاء کرام سے روشن کرنے کے لئے آج رات عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا جائیگا۔

اس مدنی مذاکرے میں بانی دعوت اسلامی حضرت علامہ محمد الیاس عطار قادری دامت بَرَکَاتُہمُ العالیہ بیرونِ ملک سے بذریعہ ویڈیو لنک مدنی پھول ارشار فرماتے ہوئے عاشقان رسول کی جانب سے ہونے والے سوالات کے جوابات ارشاد فرمائیں گے۔ اس پروگرام کو مدنی چینل پر بھی براہ راست نشر کیا جائیگا۔

تمام عاشقان رسول سے اس مدنی مذاکرے میں شرکت کرنے کی درخواست ہے۔

18رجب المرجب 1443ھ بمطابق 19فروری 2022ء کو عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں عاشقان رسول کی بڑی تعداد شریک ہوئی۔

مدنی مذاکرے میں شیخ طریقت، امیر اہلسنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے ہونے والے سوالات کے بیرونِ ملک سے آن لائن مدنی چینل کے ذریعے جوابات دیئے اور مدنی پھول ارشاد فرمائے۔

مدنی مذاکرے چند مدنی پھول ملاحظہ کیجئے:

سوال: بزرگوں کو ایصالِ ثواب کرنے کا کیا فائدہ ہوتا ہے؟

جواب: جسے تحفہ دیا جائے وہ خوش ہوتاہے ،جوفوت ہوجاتاہے اس کے لیے تحفہ ایصالِ ثواب ہے ،جب بزرگانِ دین کو ایصالِ ثواب کیا جائے گا تو وہ خوش ہوں گے ، ہماری طرف ان کی توجہ ہو گی،ہمیں دنیا وآخرت میں اس کی برکتیں ملیں گی،یہ کارِ ثواب ہے ،عام لوگوں کوفوت ہونے والے دن سالانہ ایصالِ ثواب کیا جائے تو فاتحہ وبرسی کہتے ہیں ،بزرگوں کے یوم وصال کو ایصالِ ثواب کرتے ہیں تو عرس کہاجاتاہے ۔ ایصالِ ثواب قرآن وحدیث سے ثابت ہے۔

سوال: سکون کی بہترین دواکیا ہے ؟

جواب: بے شک اللہ پاک کا ذِکر ہی دلوں کے اطمینان کا ذریعہ ہے ،مادی دوا کے لیے ڈاکٹرسے رابطہ کیاجائے ۔

پارہ 13،سُورۂ رعد کی آیت نمبر28میں ارشاد ہوتاہے"اَلَا بِذِكْرِ اللّٰهِ تَطْمَىٕنُّ الْقُلُوْبُ"۔ترجمۂ کنزالعرفان:سُن لو! اللہ کی یاد ہی سے دل چین پاتے ہیں۔

سوال: رات کے سنّاٹے میں قبرستان جانا کیسا؟

جواب: عام طور پر سنّاٹے میں وحشت وگھبراہٹ ہوتی ہے اورقبرستان میں تو اور زیادہ ہوتی ہے ۔اس لیے رات کے سنّاٹے میں قبرستان نہیں جانا چاہئے ۔

سوال: بزرگانِ دین سےزیادہ عشق ہونا کیسا؟

جواب: بزرگانِ دین اوردینی چیزوں سے زیادہ عشق ہونا اچھی بات ہے جب تک شریعت سے نہ ٹکرائے ۔

سوال: کیا بُروں کے ساتھ بُرائی سے پیش آنا چاہئے؟

جواب: جی نہیں !بُرائی کا جواب بُرائی سے دینا ہماراکام نہیں ،بعض اوقات بُرائی کا بدلہ لینے جائیں تو بندہ ظالم بن جاتاہے ،ہم دعوت ِاسلامی والوں کو نیکوں کے ساتھ نیک اوربدمعاشوں کے ساتھ بھی نیک برتاؤ کرنا ہے۔ پارہ 18،سُورۂ مؤمنون کی آیت نمبر96میں ارشاد ہوتاہے اِدْفَعْ بِالَّتِیْ هِیَ اَحْسَنُ السَّیِّئَةَ ۔ ترجمۂ کنزالعرفان:سب سے اچھی بھلائی سے بُرائی کو دفع کرو۔

سوال: یا اللہ پاک اوراُس کے رسول صلی اللہ علیہ واٰلہ وسلم کو راضی کرنا ضروری ہے ؟

جواب: جی ہاں ! اللہ پاک اوراُس کے پیارے رسول صلی اللہ علیہ واٰلہ وسلم کو راضی کرنا ہرمسلمان پر لازم ہے ۔

سوال: اِس ہفتے کارِسالہ ” امیر ہل سُنّت سے شاعری کے بارے میں سوال جواب “ پڑھنے یاسُننے والوں کوجانشینِ امیرِاہلِ ِسُنّت دامت برکاتہم العالیہ نے کیا دُعا دی ؟

جواب: یااللہ پاک! جو کوئی 17 صفحات کا رسالہ ” امیر ہل سُنّت سے شاعری کے بارے میں سوال جواب“ پڑھ یا سُن لے اسے فضولیات سے بچاکر اپنے ربّ اور اپنے محبوب صلَّی اللہ علیہ واٰلہٖ وسلَّم کے ذِکر میں مشغول رہنے والی زبان عطا فرما۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

11رجب المرجب 1443ھ بمطابق 12فروری 2022ء کو عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں شہر کراچی اور بیرون شہر سے عاشقان رسول کی کثیر تعداد نے شرکت کی۔

مدنی مذاکرے میں شیخ طریقت، امیر اہلسنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے ہونے والے سوالات کے بیرونِ ملک سے آن لائن مدنی چینل کے ذریعے جوابات دیئے اور مدنی پھول ارشاد فرمائے۔

مدنی مذاکرے چند مدنی پھول ملاحظہ کیجئے:

سوال: خوشامد وچاپلوسی کے بارے میں آپ کیا فرماتے ہیں ؟

جواب :آجکل ہمارے معاشرے میں ملازم سیٹھ کی ،کم عہدے والابڑے عہدے والے کی ،غریب امیرکی خوشامدکرتاہے ،عموماًاس میں جھوٹ ہوتاہے ،ڈرپوک کو شیر،کنجوس کو سخی ،فاسق کو اچھا ،جمعہ کی نمازبھی نہ پڑھنے والے اورظلم کرنے والے کی تعریفیں کی جارہی ہوتی ہیں ،بعض اوقات ضمیربھی ملامت کررہا ہوتا ہوگا مگرپھر بھی لوگ ایساکررہے ہوتے ہیں ،خوشامدکرنا مؤمن کے اخلاق سے نہیں ،فرمانِ مصطفی صلی اللہ علیہ والہ وسلم ہے:جب فاسق کی تعریف کی جاتی ہے تواللہ پاک غضب فرماتا(یعنی ناراض ہوتا)ہے۔ (شعب الایمان ،4/230، حدیث،4885) البتہ حوصلہ افزائی کے لیےدرست تعریف کی جاسکتی ہے۔

سوال:13اور15رجب میں کیا اہم بات ہے ؟

جواب: 13رجب اسلام کے چوتھے خلیفہ،امیر المومنین حضرت مولیٰ علی مشکل کشا رضی اللہ عنہ کا یوم ِولادت اور15رجب حضرت امام جعفرصادق رحمۃ اللہ علیہ کا یومِ عرس ہے ۔

سوال:پہلے کے بزرگ صاحبِ علم تھے ،انہیں علم یادرہتاتھا مگرآجکل علم حاصل کرنا پہلے کے دورسے آسان ہے مگرعلم یادنہیں رہتا۔اگرکوئی پہلے کے بزرگانِ دین جیسابنناچاہے تو کیا کرے ؟

جواب : پہلے کے بزرگانِ دین کے حافظے بہت مضبوط ہوتے تھے ،چلتے چلتے بھی مطالعہ کرلیتے تھے ،اپنے ہاتھ سے کتابیں لکھتے تھے ،ان کے ہاتھ سے لکھی ہوئی کتاب کومخطوطہ کہا جاتا ہے ،یہ علم کی باتوں کوہی سنا کرتے تھے ،ایک بزرگ کے بارے میں ہے کہ جب لوگوں کی باتیں ان کے کان میں پڑتیں تو کان بندکرلیتے تھے کہ کہیں لوگوں کی بداخلاقی والی باتیں یاد نہ ہو جائیں ،آجکل اخلاق بہت خراب ہیں بالخصوص گھر میں ہونے والی گفتگومیں کُھردراپن زیادہ ہوتاہے،بہرحال ہرشے کی زکوٰۃ ہوتی ہے علم کی زکوٰۃ علم پر عمل کرنا ہے ،جو علم پر عمل کرتاہے تو اس میں برکت ہوتی ہے ،اسی طرح علم نورہےاور یہ اس کے پاس نہیں رہتاجو علم پر عمل نہیں کرتا۔

سوال: توکل یعنی اللہ پاک پر بھروسا کیسے پیداہو،توکل نہ ہونے کی وجہ سے کئی برائیاں سرزد ہوجاتی ہیں ؟

جواب: توکل کا معنیٰ ہے اسباب پربھروسا کرنے کے بجائے اللہ پاک پر بھروساکیا جائے ۔اللہ پاک پر توکل کرنا فرضِ عین ہے ،توکل کے بغیرتوچارہ ہی نہیں ہے۔اگریہ ذہن بن جائے گا کہ روزی دینا اللہ پاک نے اپنے ذمہ ٔ کر م پر لیا ہوا ہے، بندہ جتنا زندہ رہے گا اسے روزی ملے گی ،پرندوں پر غورکرےکہ پرندے صبح خالی پیٹ نکلتے ہیں اورواپس پیٹ بھرکر آتے ہیں ،یہ کل کے لیے کچھ نہیں بچاکررکھتے ،آجکل تو لوگ اپنا مال بڑھانے کے بارے میں سوچتے رہتے ہیں مگرنیکیاں بڑھیں اس کے بارے میں نہیں سوچا جاتا،جبکہ نیکیاں بڑھنے سے جنت میں درجے بڑھتے ہیں ۔ مکتبۃ المدینہ کی کتاب ’’توکل ‘اورنجات دلانے والے اعمال “میں توکل کے باب کا مطالعہ کیجئے ۔

سوال: کون سی مخلوق کل یااس کے بعد کے لیے خوراک بچاکررکھتی ہے ؟

جواب :  صرف انسان ،چیونٹی اورچوہا ہی خوراک بچاکررکھتے ہیں۔

سوال : افضل ترین عبادت کونسی ہے ؟

جواب:علمِ دین میں غورکرنا افضل ترین عبادت ہے،اسی طرح آخرت کے بارے میں غوروفکر کرنا بھی اچھا ہے۔حدیث پاک میں ہے : گھڑی بھرغوروفکرکرنا60 سال کی عبادت سے بہترہے ۔ (جامع صغیرللسیوطی،ص365 )

سوال: جس نے مرتے وقت کلمہ پڑھا،اس کے بارے میں آپ کیا فرماتے ہیں ؟

جواب: مرتے وقت کلمہ شریف پڑھنے کی توفیق مل جانا ، بہت بڑی سعادت ہے ،فرمانِ مصطفی صلی اللہ علیہ والہ وسلم ہے : مَنْ كَانَ آخِرُ كَلَامِهِ لَاۤ اِلٰهَ اِلَّا اللَّهُ دَخَلَ الْجَنَّةَ یعنی جس کا آخری کلمہ لَاۤ اِلٰهَ اِلَّا اللَّهُ ہو،وہ جنت میں جائےگا۔ ( أبو داود،حدیث ، 3116 )

سوال: رمضان شریف آنے والاہے، اعتکا ف کی بھی بہاریں ہوں گی ،آپ کیا فرماتے ہیں ؟

جواب: ماہِ رمضان کا سنتاہوں کہ آنے والاہے تو دل جھوم جاتاہے ،رمضان اعتکا ف کا سُن کرتو مزے کو بھی مزہ آجاتاہے ۔

سوال: کیا رنگوں کے بھی اثرات ہوتے ہیں؟

جواب: سبزہ یاسبزرنگ(Green Color) دیکھنے سے نظرتیز ہوتی ہے، حضرتِ سَیِّدُناامام شافعی رحمۃ اللہ علیہ  فرماتے ہیں:4چیزیں آنکھوں کی (بینائی کی)تقویَّت کاباعِث ہیں (1)قبلہ رُخ بیٹھنا(2)سوتے وقت سُرمہ لگانا (3)سبزے کی طرف نظر کرنا اور(4)لباس کو پاک و صاف رکھنا۔ (احیاء العلوم،ج2، ص27)

کالے رنگ کے جوتے سے غم زیادہ ہوتے ہیں ،یہ کہنا کہ فلاں رنگ کے لباس پہننے سے مصیبتیں آتی ہیں یہ غلط ہے ۔اپنی اپنی پسند ہوتی ہے مجھے سفیدرنگ پسندہے،اس میں مزہ آتاہے کہ نبیِ کریم صلی اللہ علیہ والہ وسلم نے اکثرسفیدرنگ استعمال فرمایا ،دعوتِ اسلامی میں سفیدیا لائٹ کلرکالباس پہننے کی ترغیب ہے ۔

سوال: دِینی رسائل تقسیم کرنے کے کیافوائد ہیں ؟

جواب: دِینی رسالے تقسیم کرنے چاہئیں ،کئی ایسے ہوں گے کہ جو کوئی رسالہ پڑھ کر گناہوں سے تائب ہوئے ہوں گےاوردعوت اسلامی کے دینی ماحول میں آگئے ہوں گے ۔تمام کاروباری اوردیگرشعبوں والوں کو چاہئے کہ مکتبۃ المدینہ کے رسائل تقسیم کریں ،دعوتِ اسلامی کے شعبے تقسیمِ رسائل سے رابطہ کرکے صحابہ واولیا اوراپنے مرحومین کے ایصال ِثواب کے لیے رسائل تقسیم کریں ،رشتہ داروں کی برسی وغیرہ کے مواقع پر رسائل تقسیم کریں ،خوشی وغمی کے مواقع پرمکتبۃ المدینہ کے بستے(Stall) لگوائیں ۔

سوال: اِس ہفتے کارِسالہ ” فیضانِ امام جعفر صادِق “ پڑھنے یاسُننے والوں کو امیرِاہلِ ِسُنّت دامت برکاتہم العالیہ نے کیا دُعا دی ؟

جواب: یاربَّ المصطفٰے! جو کوئی 21 صفحات کا رسالہ ”فیضانِ امام جعفر صادِق “پڑھ یا سُن لے اُسے تمام صحابہ و اہلِ بیت کا سچا غلام بنااور اسے امام جعفر صادق کے پیارے پیارے نانا جان صلَّی اللہ علیہ واٰلہٖ وسلَّم کی قیامت میں شفاعت نصیب فرما۔ اٰمِیْن بِجَاہِ خاتم النَّبییّن صلَّی اللہ علیہ واٰلہٖ وسلَّم۔

13 رجب المرجب کو اسلام کے چوتھے خلیفہ   امیر المؤمنین ، دامادِ رسول حضرت سیدنا مولا علی شیرِ خدا کرم اللہ وجہہ الکریم کا یومِ ولادت ہے۔ اسی مناسبت سے آج رات 14 فروری 2022ء ، 13 رجب المرجب 1443ھ کو ”جشن ولادت مولاعلی مشکل کشا رضی اللہُ عنہ“کے پُرمسرت موقع پر عالمی مدنی مرکز فیضان مدینہ کراچی میں سنتوں بھرے اجتماع کا انعقاد کیا جائیگا۔

اجتماع کا آغاز تلاوت قرآن مجید سے کیا جائیگا جبکہ نعت خواں اسلامی بھائی بارگاہ مصطفٰے صلَّی اللہ علیہ واٰلہٖ وسلَّم میں ہدیۂ نعت پیش کرتے ہوئے مولا علی رضی اللہُ عنہ کی شان میں منقبتیں بھی پڑھیں گے۔ دوران اجتماع مرکزی مجلس شوریٰ کے نگران حاجی مولانا محمد عمران عطاری مُدَّ ظِلُّہُ العالی ”مولانا علی کی شان“ میں سنتوں بھرا بیان فرمائیں گے۔ بیان کے بعد مدنی مذاکرے کا سلسلہ بھی ہوگا جس میں شیخ طریقت امیر اہل سنت علامہ محمد الیاس عطار قادری دامت بَرَکَاتُہمُ العالیہ سیرت مولا علی رضی اللہُ عنہ پر گفتگو فرماتے ہوئے مدنی پھول ارشاد فرمائیں گے۔

اجتماع کے آغاز میں جلوس علویہ جبکہ اختتام پر لنگر علویہ کا بھی اہتمام کیا جائیگا۔

دعوت اسلامی کے زیر اہتمام ہر ہفتے پابندی کے ساتھ اور بعض مہینوں میں ایونٹس کی مناسبت سے  6دن، 10دن، 11 اور 12 دن تک مدنی مذاکرے کا سلسلہ ہوتا ہے جس میں کثیر تعداد میں عاشقان رسول شریک ہوتے ہیں۔ ان مدنی مذاکروں میں شیخ طریقت امیر اہلسنت علامہ محمد الیاس عطار قادری دامت بَرَکَاتُہمُ العالیہشرعی، تنظیمی، اخلاقی، طبی اور معاشرتی اعتبار سے عاشقان رسول کی رہنمائی فرماتے ہیں۔

ہر ہفتے کی طرح آج بھی 12 فروری 2022ء بعد نماز عشاء عالمی مدنی مرکز فیضان مدینہ کراچی سے براہ راست مدنی چینل پر مدنی مذاکرے کا انعقاد کیا جائیگا۔ مدنی مذاکرے میں امیراہلسنت دامت بَرَکَاتُہمُ العالیہ شرعی مسائل کے حوالے سے گفتگو فرماتے ہوئے عاشقان رسول کی رہنمائی فرمائیں گے۔

تمام عاشقان رسول سے اس مدنی مذاکرے میں شرکت کرنے کی درخواست ہے۔ 

اَلَاۤ اِنَّ اَوْلِیَآءَ اللّٰهِ لَا خَوْفٌ عَلَیْهِمْ وَ لَا هُمْ یَحْزَنُوْنَۚۖ(۶۲)الَّذِیْنَ اٰمَنُوْا وَ كَانُوْا یَتَّقُوْنَؕ(۶۳)

ترجمہ کنز الایمان: سن لو بےشک اللہ کے ولیوں پر نہ کچھ خو ف ہے نہ کچھ غم، وہ جو ایمان لائے اور پرہیزگاری کرتے ہیں۔ (سورہ یونس، آیت 62، 63)

ماہ رجب المرجب 1443ھ کا عنقریب آغاز ہونے والا ہے۔ ہجری سال میں یہ ماہ بہت اہمیت کا حامل ہے کیونکہ ماہ رجب کی جہاں بہت ساری خصوصیات ہے اس کی ایک خوبی یہ بھی ہے یہ ماہ ہمیں رمضان المبارک سے مزید قریب کردیتا ہے۔

اس ماہ میں جہاں بہت سے اللہ پاک کے برگزیدہ بندوں کا یوم پیدائش و یوم وفات ہے وہاں اولیائے کرام میں ایک بڑا نام سلطان الہند، آقائے چشت، حضرت سیدنا خواجہ معین الدین حسن سنجری اجمیری چشتی (المعروف حضرت خواجہ غریب نواز) رحمۃ اللہ علیہ کا بھی ہے جن کا عرس دنیا بھر میں ہر سال رجب المرجب کے مہینے میں نہایت مذہبی عقیدت واحترام سے منایا جاتا ہے۔

فیضان اولیاء، دنیائے اسلام کی عالمگیر تحریک دعوت اسلامی بھی اولیائے کرام کے اعراس منانے میں سر فہرست ہے۔ حضرت خواجہ غریب رحمۃ اللہ علیہ کے 810 ویں عرس کے موقع پر 2 فروری 2022ء سے رجب شریف کی چھٹی رات تک مدنی مذاکرے کا انعقاد کیا جائیگا جو کہ مدنی چینل پر براہ راست نشر ہوگا۔

ان مدنی مذاکروں کے آغاز میں جلوس غریب نواز کا اہتمام ہوگا، نعت خواں حضرات بارگاہِ رسالت صلَّی اللہ علیہ واٰلہٖ وسلَّم میں ہدیۂ نعت پیش کرنے کے ساتھ ساتھ منقبت غریب نواز پڑھیں گے۔ مدنی مذاکروں میں امیراہلسنت علامہ محمد الیاس عطار قادری دامت بَرَکَاتُہمُ العالیہ سیرت خواجہ غریب نواز رحمۃ اللہ علیہ اور دینی خدمات بیان کرنے کے علاوہ اعراس منانے کے حوالے سے عاشقان رسول کی شرعی رہنمائی فرمائیں گے۔

اولیائے کرام کی محبت کو اپنے دلوں میں اجاگر کرنے کے لئے تمام عاشقان رسول کو ان مدنی مذاکروں میں شرکت کرنے کی دعوت دی جاتی ہے۔

18جماد الثانی 1443ھ بمطابق 22 جنوری 2022ء کو عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں شہر کراچی اور بیرون شہر سے عاشقان رسول نے کثیر تعداد میں شرکت کی۔

مدنی مذاکرے میں شیخ طریقت، امیر اہلسنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے ہونے والے سوالات کے جوابات دیئے اور مدنی پھول ارشاد فرمائے۔

مدنی مذاکرے چند مدنی پھول ملاحظہ کیجئے:

سوال : عام مؤمن اورمؤمنِ کامل میں کیا فرق ہے ؟

جواب : ایمان کے مختلف درجے ہیں، فرمانِ مصطفےٰ صلَّی اللہ علیہ واٰلہٖ وسلَّم ہے: جو خود پیٹ بھرکرسوئے اور اس کاپڑوسی بھوکا ہو وہ مؤمن کامل نہيں۔ (معجمِ کبیر،ج 12،ص119، حدیث: 12741)

اِس لیے ہراُس عمل سے بچناچاہئے جس سے ایمان میں کوئی کمزوری آئے ۔

سوال: تکبرسے کیا مرادہے اورتکبرکرنے والوں کاکیا عذاب ہے ؟

جواب: اگرکوئی اپنے آپ کو دوسرے سے افضل سمجھے تویہ تکبرہے ۔رسول اللہ صلی اللہ علیہ والہ وسلم نے فرمایا :متکبرین کا حشرقیامت کے دن چیونٹیوں کے برابرجسموں میں ہوگا اوران کی صورتیں آدمیوں کی ہوں گی ،ہرطرف سے ان پر ذِلّت چھائےہوئے ہوگی ،ان کو کھینچ کرجہنم کے قیدخانے کی طرف لے جایا جائے گا۔جس کا نام بُولس ہے۔ان کے اوپرآگوں کی آگ ہوگی ،اُنہیں جہنمیوں کا نچوڑ پلایا جائے گا جس کوطِیْنَۃُ الْخَبَال کہتے ہیں ۔ (ترمذی،4/221،حدیث :2500)

(تکبر کی تباہ کاریوں ،اس کی علامات اوراس کا علاج جاننے کے لیے مکتبۃ المدینہ کی کتاب”تکَبُّر“کا مطالعہ بے حد مفید رہے گا۔ان شاۤء اللہُ الکریم)

Download

سوال: آندھی اورتنگ دستی کا اندیشہ ہوتو کون ساوظیفہ پڑھناچاہئے ؟

جواب :چلتے پھرتےوضوبے وضو’’ یَاوَکِیْلُ ‘‘پڑھتےرہیں ،حاجتیں پوری ہوں گی ،مصیبتیں حل ہوں گی ، رزق اوربھلائی کے دروازے کھلیں گے۔

سوال: جب نبیِ کریم صلی اللہ علیہ والہ وسلم حضرت ابوبکرصدیق رضی اللہ عنہ کے ساتھ غارِثورمیں تھے تو وہاں کھاناکون لے کر جاتاتھا؟

جواب: حضرت ابوبکرصدیق رضی اللہ عنہ کی بیٹی حضرت اسماءرضی اللہ عنہا ۔

سوال: مکتبۃ المدینہ کی کتاب ’’با طنی بیماریوں کا علاج‘‘کے بارے میں آپ کیا فرماتے ہیں۔

جواب : ’’باطنی بیماریوں کا علاج‘‘ مکتبۃ المدینہ کی منفردکتاب ہے جو کئی فرض علوم پر مشتمل ہے ،سب کو اس کا مطالعہ کرنا چاہئے ۔

Download

سوال : کیا دل بدلتارہتاہے ؟

جواب: جی ہاں ! دل کو قلب کہتے ہیں یہ مُنقَلِب ہوتارہتاہے یعنی بدلتارہتاہے ۔

سوال: اِس ہفتے کارِسالہ ” اقوالِ صدیقِ اکبر رضی اللہ عنہ “ پڑھنے یاسُننے والوں کو امیرِاہلِ ِسُنّت نے کیا دُعا دی ؟

جواب: یا ربَ المصطفےٰ! جو کوئی 17 صفحات کا رسالہ’’ اقوالِ صدیقِ اکبر رضی اللہ عنہ‘‘ پڑھ یا سن لے اُسے اور اُس کی نسلوں کو صحابہ و اہلِ بیت کی سچی غلامی نصیب فرما اور اسے عشقِ رسول کی لازوال دولت سے مالا مال فرما کر بےحساب بخش دے ۔ اٰمِیْن بِجَاہِ خاتمِ النَّبیّن صلَّی اللہ علیہ واٰلہٖ وسلَّم ۔

عالمی مدنی مرکز فیضان مدینہ کراچی میں 15 جنوری 2022ء کو ہفتہ وار مدنی مذاکرے کا انعقاد کیا گیا جس میں کثیر عاشقان رسول فیضان مدینہ کراچی آکر براہ راست اور جبکہ دیگر مقامات پر اسلامی بھائیوں کی بڑی تعداد نے بذریعہ مدنی چینل شرکت کی۔

بانی دعوت اسلامی حضرت علامہ محمد الیاس عطار قادری دامت بَرَکَاتُہمُ العالیہ نے دینی و معاشرتی اعتبار سے شرکا کی تربیت کرتے ہوئے عاشقان رسول کی جانب سے ہونے والے سوالات کے جوابات دیئےاور مدنی پھول ارشاد فرمائے۔

مدنی مذاکرے چند مدنی پھول ملاحظہ کیجئے:

سوال:ایک مسلمان کو کتنا علمِ دین ہونا چاہیے؟

جواب:حدیث پاک میں ہے کہ علم حاصل کرنا ہر مسلمان پر فرض ہے۔ (سنن ابن ماجہ1/146)

اس سے مراد ضروری صحیح عقائد، دیگر علوم مثلاً نماز کا فرض ہونا، روزے ، حج، زکوٰة وغیرہ کےضروری مسائل اوران کی ادائیگی کے طریقے کا علم ہونا ضروری ہے،اسی طرح تاجر کے لیے تجارت کے ضروری مسائل،و علیٰ ھذا القیاس

ظاہری گناہوں اور باطنی امراض کے بارے میں بھی معلومات ہونی چاہئیں۔

سوال:کوئی غیر ضروری سوال کرے تو اس کو کیا جواب دیا جائے؟

جواب:گناہ والی بات نہ ہو تو سچ سچ بتادیا جائے،اگر بات بتا نے والی نہ ہوتو یہ کہہ دیا جائے:" معاف کردیجئے میں نہیں بتاسکتا"۔ بہرحال فضول اور غیر ضروری سوالات کرنے والے کی اصلاح ہونی چاہئےتا کہ وہ اس طرح کے سوالات ہی نہ کرے ۔

سوال:کیا یہ درست ہے کہ دائیں ہا تھ (Right Hand)میں خارِش ہو تو دولت آتی ہے اوربائیں ہاتھ(Left Hand) میں ہوتو دولت جاتی ہے ؟

جواب :ایسی کوئی بات نہیں ۔

سوال:صدیق اکبر کا کیا معنیٰ ہے۔

جواب : صدیق کا معنی ہے ’’سچا‘‘اور اکبر کا معنی ہے" سب سے بڑا"،یہ مسلمانوں کے پہلے خلیفہ ،صحابیِ رسول حضرت ابوبکر صدیق رضی اللہ عنہ کا لقب ہے۔

سوال:کیا بال سفید ہوجائیں توبندہ بوڑھا ہوجاتا ہے؟

جواب: نہیں،ایسا نہیں ہے! بال بیماری کی وجہ سے بھی سفید ہوجاتے ہیں’’ بوڑھے‘‘ کی تعریف یہ ہے کہ بندہ 60سال کا ہوجائے تو مکمل بوڑھاہوجاتاہے۔

سوال:موت کے تذکرے کوبعض لوگ سنجیدہ نہیں لیتےیا اس کو پسند نہیں کرتے، اس کی کیا وجوہات ہیں؟

جواب : یہ نفس اور شیطان کا دھوکہ ہے،لوگ مرنے کے لیے تیار نہیں ہیں، یہ مانتے ہیں کہ موت نے آنا ہے مگر کام ایسے ہیں کہ جیسے مرنا ہی نہیں۔

سوال:جب ہم لوگوں کے ساتھ ہوں تواس وقت کیا احتیاط کرنی چاہئے ؟

جواب:ایسے کاموں سے بچا جائے جس سے لوگوں کو گِھن آتی ہے، مثلاً بار بار ناک میں اُنگلی ڈالنا، بدن سے میل اُتارناوغیرہ۔

سوال:مہمان کے ساتھ کیسا سلوک کرنا چاہئے؟

جواب :مہمان آتا ہے تو اپنا رزق ساتھ لاتا ہے اور جاتا ہے تو میزبان کے گناہوں کی مغفرت کا باعث بنتا ہے، مہمان آئے تو خوش دلی سے پیش آنا چاہیے، مہمان کو مان دیا جائے، مہمان کے مرتبے کے مطابق سلوک ہونا چاہئے، ایسی کوئی حرکت نہ کریں جس سے مہمان کی دل آزاری ہو، مہمان کو چاہیے کہ مروت و حیا کو پیش نظر رکھے اور کھانے کے اوقات میں نہ جائے۔

سوال: اِس ہفتے کارِسالہ ” بُخار کے فضائل “ پڑھنے یاسُننے والوں کو امیرِاہلِ ِسُنّت نے کیا دُعا دی ؟

جواب: یاربَّ المصطفٰے! جو کوئی 21 صفحات کا رسالہ ”بُخار کے فضائل“ پڑھ یا سُن لے اُسے بیماری میں شکوہ و شکایت کرنے سے بچا کر اپنی رضا پر راضی رہنے کی توفیق عطا فرمااور اُسے بے حساب بخش دے۔ اٰمِیْن بِجَاہِ خاتمِ النَّبیّن صلَّی اللہ علیہ واٰلہٖ وسلَّم ۔