13 رجب المرجب 1444ھ بمطابق 4 فروری 2023ء بروز ہفتے کی شب عاشقانِ رسول کی دینی تحریک دعوتِ اسلامی کے تحت عالمی مدنی مرکز فیضانِ مدینہ کراچی میں مدنی مذاکرہ منعقد ہوا جس میں شہرِ کراچی کے مختلف علاقوں سے عاشقانِ رسول نےفیضانِ مدینہ کراچی آکر جبکہ دیگر شہروں اور ملکوں سے کثیر اسلامی بھائی بذریعہ مدنی چینل شریک ہوئے۔

اس مدنی مذاکرے میں عاشقانِ رسول کی جانب سے مختلف موضوعات پر سوالات کئے گئے جس کے امیرِ اہلِ سنت حضرت علامہ مولانا محمد الیاس عطار قادری رضوی دامت بَرَکَاتُہمُ العالیہ نے علم و حکمت سے بھرپور جوابات ارشاد فرمائے۔

ان سوال و جواب میں سے بعض درج ذیل ہیں:

سوال:اولیائے کرا م رحمہم اللہ علیہم کے مزارات پر حاضری دینے کا کیا طریقہ ہے؟

جواب:قدموں کی طرف سے حاضرہوں ،پُشت قبلے کی جانب اورچہرہ ولی اللہ کے مزارکی جانب ہو،پھرسلام عرض کریں، ہاتھ اٹھا کر کچھ کلام مثلاً فاتحہ پڑھ کر انہیں ایصالِ ثواب کریں اور اللہ پاک سے دعا کریں۔

سوال:گناہوں سے کیسےبچا جائے؟

جواب:گناہوں سے بچنے کے لئے سب سے پہلے تمام گناہوں سے توبہ کریں،گناہوں کے عذابات اورگناہوں سے بچنے کے فضائل کا مطالعہ کیجئے۔

سوال:نظرِبداوردیگربیماریوں سے بچنے کا کوئی وظیفہ ارشاد فرمادیجئے؟

جواب:سورۂ فاتحہ 41 بارپڑھ کر کسی بھی مریض کو یا خودمریض ہوں تو اپنے اوپردم کرلیں ،پانی پر دم کرکے بھی پیتےرہیں، اِنْ شآءَ اللہُ الکریم فائدہ ہوگا۔

سوال:اہلِ سنت وجماعت کہاجائے یا اہلسنت والجماعت؟

جواب:اہلِ سنت وجماعت کہاجائے، ہمارے علما اسی طرح کہتے ہیں۔

سوال:غوثِ پاک حضرت شیخ عبدالقادرجیلانی رحمۃ اللہ علیہ کو گیارہویں والا پیرکیوں کہتے ہیں؟

جواب:آپ کاوصال 11 ربیع الاخرکو ہوا،اس وجہ سے گیارہویں والا پیر مشہورہوگئے اورانہیں اس طرح کہنے میں حرج بھی نہیں۔

سوال :سفروحضرمیں نمازقضا نہ ہو،اس کے لئے کیا کریں؟

جواب :نمازپڑھنے کاجذبہ مل جائے اوربندہ نمازپڑھنے کے معاملے میں سنجیدہ (Serious) ہو جائے تو نمازقضا نہیں ہوگی۔ اِنْ شاۤءَ اللہُ الکریم۔

سوال:فیضانِ قرآن ڈیجیٹل پین (Faizan e Quran Digital Pen) لینے اور تقسیم کرنے والوں کوامیراہل سنت دامت برکاتہم العالیہ نے کیادُعادی؟

جواب:یااللہ پاک !جو فیضانِ قرآن ڈیجیٹل پین اپنے گھرمیں بسائے، اسے خریدے اورتحفے میں دے، علمائے کرام کو پیش کرے، ائمہ کرام کو دے، اپنے دوستوں اوررشتہ داروں کو پیش کرے، اپنے سسرال کودے، شادیوں میں جوتحفے دئیے جاتے ہیں اس کی جگہ یہ تحفہ دے، یااللہ پاک !جوجس طرح بھی اسے آگے بڑھائے،اس کوفیضانِ قرآن سے مالامال کر۔اس کی، اس کے ماں باپ اورآل اولادکی بے حساب مغفرت کردے۔ اٰمِیْن بِجَاہِ خاتم النَّبِیِّیْن صلَّی اللہ علیہ واٰلہٖ وسلَّم

سوال:سردی کی وجہ سے ہفتہ واراجتماع میں شرکت میں سُستی ہوتو کیا کریں؟

جواب:افضل ترین عمل وہ ہے جس میں زحمت زیادہ ہو، جو عمل دنیا میں جتنا مشکل ہوگا، میزانِ عمل میں اتناہی وزن دارہوگا، ان فضائل پرنظر رکھیں، سخت سردی اورسخت گرمی میں ہفتہ واراجتماع میں حاضر ہوتے رہیں اور ہفتہ واراجتماع میں ہی رات گزاریں۔

سوال:رمضان شریف آنے سے پہلےرمضان کی تیاری کیسے کریں؟

جواب:جتنا ممکن ہونفل روزے رکھیں اوریہ نیت کریں کہ ماہِ رمضان کے سارے روزے رکھوں گا۔ اِنْ شاۤءَ اللہُ الکریم

سوال:کیا اسلامی بہنیں بھی مفتیہ بن سکتی ہیں؟

جواب:جی ہاں! مفتیہ بن سکتی ہیں، اُمُّ المؤمنین حضرت عائشہ صدیقہ رضی اللہ عنہا بہترین مفتیہ تھیں، کراچی میں دعوتِ اسلامی کے تحت اسلامی بہنوں کا مفتیہ کورس شروع ہوگیا ہے۔

سوال:اِس ہفتے کارِسالہ ”افضل ترین اعمال“ پڑھنے یاسُننے والوں کو امیرِاہلِ ِسُنّت مدظلہ العالی نے کیا دُعا دی؟

جواب:یارَبَّ المصطفٰے!جو کوئی 17 صفحات کا رسالہ ”افضل ترین اعمال“ پڑھ یا سُن لے اُس کو پانچوں نمازیں باجماعت پہلی صف میں ادا کرنے کی توفیق دے اور اس کی بے حساب مغفرت فرما۔اٰمِیْن بِجَاہِ خاتم النَّبِیِّیْن صلَّی اللہ علیہ واٰلہٖ وسلَّم

6 رجب المرجب 1444ھ بمطابق 28 جنوری 2023ء بروز ہفتے کی شب خواجہ معینُ الدِّین چشتیرحمۃُ اللہِ علیہ کے عرس کے موقع پر دعوتِ اسلامی کے عالمی مدنی مرکز فیضانِ مدینہ کراچی میں مدنی مذاکرے کا انعقاد کیا گیا جس میں عاشقانِ رسول نے مختلف شعبہ ہائے زندگی سے متعلق سوالات کئے جس کے امیرِ اہلِ سنت دامت بَرَکَاتُہمُ العالیہ نے علم و حکمت سے بھرپور جوابات ارشاد فرمائے۔

ان سوالات میں سے بعض درج ذیل ہیں:

سوال:6 رجب المرجب کی نسبت سلسلہ ٔعالیہ چشتیہ کی کس عظیم ہستی سے ہے، ان کےالقابات اورپیدائش ووفات کے بارے میں بھی کچھ بتا دیجئے۔

جواب:6 رجب المرجب کوخواجۂ خواجگان، سلطان ُالہند، عطائے رسول، غریب نواز، معینُ الدین حضرت خواجہ سیّدحسن سنجری رحمۃ اللہ علیہ سےنسبت ہے، 6 رجب المرجب آپ کا یومِ عرس ہے، اسے چَھٹی شریف بھی کہاجاتاہے، آپ کی پیدائش (Birth)14رجب 537ھ بمطابق 1142ء سیستان، ایران کے علاقے سنجر میں اور وفات (Death) 6 رجب633ھ کو اجمیر (ہند) میں ہوئی ۔آپ حسنی سیّدتھے، اعلیٰ حضرت امام احمدرضا خان رحمۃ اللہ علیہ فرماتے ہیں کہ خواجہ غریب نواز کے مزارسے فیوضات و برکات حاصل ہوتے ہیں، خواجہ صاحب عاشقِ قرآن اورحافظِ قرآن تھے، آپ دن میں ایک اور رات میں ایک قرآن کریم ختم کرتے تھے ۔ہرختمِ قرآن پر غیب سے آوازآتی : اے معینُ الدین ہم نےتیراختم ِقرآن قبول کیا۔

سوال:خواجہ کا کیامعنیٰ ہے؟

جواب:خواجہ فارسی زبان کا لفظ ہے ،اس کا لفظی معنیٰ سرداراورآقاہے ۔

سوال:قرآن ِکریم کی زیارت کاکیافائدہ ہے؟

جواب:حضرت خواجہ غریب نوازرحمۃ اللہ علیہ فرماتے ہیں:"جو بندہ ہر روز قرآنِ کریم دیکھتا ہے اس کی بینائی یعنی نظرتیزہوجاتی ہے اور اس کی آنکھ کبھی نہیں دُکھتی اورنہ خشک ہوتی ہے"۔

سوال:تلاوتِ قرآن اوردُرست قرآنِ کریم پڑھنے والے کی کیا فضیلت ہے؟

جواب:تلاوتِ قرآن افضل ترین عبادت ہے، مگرستم تو یہ ہے کہ ہماری اکثریت کو دیکھ کر بھی قرآن کریم پڑھنا نہیں آتا، یہ کتنا بڑا المیہ ہے، دنیاکی بڑی بڑی ڈِگریاں موجود ہیں مگرقرآن دیکھ کرپڑھنا نہیں آتا، جب مَیں کبھی کسی قاری کے بارے میں سنتاہوں تو رَشک آتاہے کہ اسے درست قرآن پڑھناآتاہے، اربوں کھربوں پتی ایک طرف اوردرست قرآن پڑھنے والاایک طرف ۔یہ میری واعظانہ اورجذباتی باتیں نہیں بلکہ دل کے احساسات ہیں، درست قرآن پڑھنے والے پر مجھے رشک آتاہے۔

سوال:نمازی کے بارے میں خواجہ غریب نوازرحمۃ اللہ علیہ کا کیافرمان ہے؟

جواب:آپ فرماتے ہیں :بندہ صرف نمازسے ہی قابلِ عزت ہوسکتاہے، اس لئے کہ نمازمؤمن کی معراج ہے، تمام عبادات سے بڑھ کر نمازہے، اللہ پاک سے ملاقات کا سب سے پہلا ذریعہ نمازہی ہے، نماز ایک امانت ہے، بندے کو چاہئے کہ اس میں کسی قسم کی خیانت نہ کرے ۔ان فرامین سے معلوم ہواکہ اصل عزت والاوہ ہے جو نمازی ہے، دین میں ترقی اسے ملے گی جو نمازی ہوگا،نمازکو مضبوطی سے پکڑ لیں ،ہماری کوئی نمازقضانہیں ہونی چاہئے ،کتنی ڈرانے والی بات ہے کہ جو ایک نمازنہیں پڑھتا تو اس کانام جہنم کے دروازے پر لکھ دیا جاتاہے اوریہ شخص اس دروازے سے جہنم میں داخل ہوگا، جوجان بوجھ کر ایک نمازترک کردے وہ ایک ہزارسال جہنم کے عذاب کا حق دارہے ،یہ کتنا خطرناک معاملہ ہے ،یہ کبیرہ یعنی بڑاگنا ہ ہے۔

سوال:آپ کی کتنی مرتبہ اجمیرشریف حاضری ہوئی ہے؟

جواب:اللہ کی رحمت سے 2مرتبہ میری حاضری ہوئی ہے ،یہاں دومنقبتیں لکھی ہیں، ایک سفر10دسمبر1998ء کو ہواتھا۔

سوال:پاک وہند میں ادب وعشق کیساہے؟

جواب:پاک وہندکے مسلمانوں میں جو ادب وعشق ہے، دنیامیں کم دیکھا جاتاہے۔ شایداس کی وجہ یہ ہے کہ نبیِ کریم صلی اللہ علیہ والہ وسلم کے قدم مبارک کی جانب پاک وہند ہے، سُنیّوں میں ادب بہت ہے ہمارا مذہب ’’مذہبِ مہذَّب اہلسنت و الجماعت“ ہے،مہذَّب کا مطلب تہذیب والا، ادب والا، یادرہے! ہمارے ہاں، اہلسنت والجماعت اوراہلِ سنت وجماعت دونوں الفاظ رائج ہیں۔

سوال:ادب کیا ہے؟

جواب:اعلیٰ حضرت امام احمدرضا خان رحمۃ اللہ علیہ تحریر فرماتے ہیں:مَیں نے عقل سے پوچھا کہ ایمان کیا ہے؟تو عقل نے میرے دل کے کان میں کہا:ایمان سراپاادب ہے، یادرکھیں یہ حکمت کا مدنی پھول ہے۔

سوال:جب کوئی پریشانی، مصیبت یا بیماری آجائے تو کیا کرنا چاہئے؟

جواب:ظاہری اسباب کے ساتھ ساتھ اللہ پاک کی بارگاہ میں دعا بھی کریں، آجکل دعامیں غفلت کی جاتی ہے۔

سوال:جس گھر میں فوتگی ہوجائے تو کیا ان کے ہاں لائٹ نہیں چلانی چاہئے؟

جواب:لائٹ چلانے میں کوئی حرج نہیں ،جس گھرکوئی فوت ہواہو تو وہاں نفسیاتی طورپر خوف ہوتاہے،اگرلائٹ بھی نہیں چلائیں گے توخوف میں مزید اضافہ ہوگا۔

سوال:کیاغسلِ میت کا کوئی طے شدہ وقت بھی ہے؟اورکیا کھلے آسمان کے نیچے غسل دے سکتے ہیں؟

جواب:دن رات میں کسی وقت بھی غسلِ میت دیا جاسکتا ہے اور کھلے آسمان کے نیچے بھی غسل دے سکتے ہیں۔

سوال:اِس ہفتے کارِسالہ ” نفل روزوں کے فضائل “ پڑھنے یاسُننے والوں کو امیرِاہلِ ِسُنّت دامت برکاتہم العالیہ نے کیا دُعا دی ؟

علمِ دین کی مجالس کا انعقاد کرنا سرکارِ دوعالم  صلی اللہ علیہ و سلم اور صحابۂ کرام علیہم الرضوان کی تعلیمات میں سے ایک ہے۔

اسی سلسلے میں 21 جنوری 2023ء بمطابق 29 جمادی الاخریٰ 1444ھ بروز ہفتہ بعد نمازِ عشا عالمی مدنی مرکز فیضانِ مدینہ کراچی میں ہفتہ وار مدنی مذاکرے کا انعقاد کیا گیا جس میں شہرِ کراچی کے عاشقانِ رسول نے فیضانِ مدینہ کراچی آکر جبکہ دیگر مقامات پر اسلامی بھائی بذریعہ مدنی چینل شریک ہوئے۔

دورانِ مدنی مذاکرہ شیخِ طریقت امیرِ اہلِ سنت علامہ محمد الیاس عطار قادری رضوی ضیائی دامت برکاتہم العالیہ نے مختلف شعبہ ہائے زندگی سے متعلق سوالات کے علم و حکمت سے بھرپور جوابات دیئے اور مسلمانوں کی دینی، اخلاقی، تنظیمی اور شرعی رہنمائی کے لئے مدنی پھولوں سے نوازا۔

مدنی مذاکرے کے چند مدنی پھول ملاحظہ کیجئے:

سوال:اللہ پاک کی راہ میں مال خرچ کرنے کا کیا فائدہ ہے؟

جواب:اللہ پاک کی راہ میں مال خرچ کرنے سے کم نہیں ہوتا بلکہ بڑھتاہی ہے۔

سوال:غم ِمدینہ ہمارے دل میں کیسے پیداہو؟

جواب:غمِ مدینہ بہت بڑی سعادت ،بہت بڑاشرف بلکہ انمول خزانہ ہے ،یہ اللہ پاک کے کرم سے ملتاہے ،کسی دکان سے نہیں ملتا،غمِ مدینہ کے حصول کے لئے ایسے عاشقانِ رسول کی صحبت میں رہیں جن کو غمِ مدینہ نصیب ہے،اللہ پاک کی رحمت سے دعوتِ اسلامی کے دینی ماحول میں ایسوں کی کثرت ہے، نعتیں سنیں، جو مدینہ شریف جائیں انہیں الوداع کرنے اورلینے جائیں، بعض اوقات ان کی زبان سے کوئی ایساجملہ نکل جاتاہے جس سے غم ِمدینہ نصیب ہوتاہے۔

سوال:اگرخانہ کعبہ پراچانک نظرپڑجائے تو کیا اسی وقت دعامانگی جائےیامطاف (جہاں طواف کیا جاتاہے) میں جاکردعامانگنی چاہئے؟

جواب:جب کعبہ شریف پر پہلی نگاہ پڑے اگرچہ اچانک ہی ہوتو اسی وقت دعامانگ لی جائے ،درودوسلام پڑھ لئے جائیں۔

سوال:اسلامی احکام سنِ ہجری کے اعتبارسے ہیں یا سنِ عیسوی سے؟

جواب:جتنے بھی اسلامی احکام ہیں مثلاًحج،روزہ،زکوٰۃ وغیرہ یہ سب سنِ ہجری کے حساب سے ہیں، ہمارے معاشرے میں ایک تعدادہے جنہیں اسلامی مہینوں کے نام نہیں آتے،ایسانہیں ہونا چاہئے ،اسلامی مہینوں کے نام بھی یادکرلیں ۔(اسلامی مہینوں کی مزید معلومات جاننے کے لیے مکتبۃ المدینہ کے رِسالے"اِسلامی مہینوں کے فضائل"کا مطالعہ کیجئے)

سوال:ماہِ رجب کیسامہینا ہے؟

جواب:رجب المرجب عبادت کا بیج بونے کا مہینا ہے،یہ ماہِ حُرمت یعنی احترام والامہینا ہے ، مَیں اسے رمضان شریف کا پھاٹک کہتاہوں، اب عبادت پرکمرباندھ لیں ،نفل روزے بھی رکھیں ۔ جَنَّت کی ایک نَہْر کا نام ”رَجَب“ ہے جس کا پانی دودھ سے زيادہ سفید،شَہد سے زیادہ میٹھا اور بَرْف سے زيادہ ٹھنڈا ہے، اِ س نَہْرسے وُہی شَخْص پانی پئے گا جو رجَب کے مہینے میں روزے رکھے گا۔( مُکاشَفۃ القُلُوب ص 301)

سوال:سردی سے بچنے کے لئے کیا احتیاط کی جائے؟

جواب:سردی کے موسم میں سینے کو ٹھنڈی ہواسے بچائیں ،اپنی حفاظت کرنی چاہئے ،جہاں سردی لگنے کا زیادہ چانس ہوتاہے وہاں زیادہ احتیاط کریں ،سانپ کےبِل میں ہاتھ ڈالنا بہادری نہیں ،سانپ کو قابوکرنا بہادری ہے۔بہرحال موقع کی مناسبت سے ملبوسات (گرم کپڑے، سویٹر جرسی وغیرہ) پہننے چاہئیں، اللہ پاک کی عبادت پرقوت حاصل کرنے کے لئے اپنی صحت کا خیال رکھیں۔ اللہ پاک ہمیں سردی وگرمی کے نقصانات سےبچائے۔

سوال:اِس ہفتے کارِسالہ ”فیضانِ امام موسٰی کاظم “ پڑھنے یاسُننے والوں کو امیرِاہلِ ِسُنّت دامت برکاتہم العالیہ نے کیا دُعا دی؟

شہنشاہِ چشت، تاجُ الاولیا، سلطان الہند، خواجۂ خواجگاں حضرت خواجہ معینُ الدِّین سید حسن سنجری اجمیری (المعروف حضور خواجہ غریب نواز) رحمۃُ اللہِ علیہ کا سالانہ عرس انتہائی عقیدت واحترام سے منانے کے لئے 21 جنوری 2023ء بروز ہفتہ سے 6 رجب المرجب 1444ھ تک دعوت اسلامی کے زیر اہتمام عالمی مدنی مرکز فیضان مدینہ کراچی میں مدنی مذاکروں کا انعقاد کیا جائیگا۔

مدنی مذاکروں کے آغاز میں جلوس غریب نواز کا اہتمام ہوگا جبکہ شیخ طریقت امیر اہلسنت علامہ محمد الیاس عطار قادری دامت بَرَکَاتُہمُ العالیہ شہنشاہِ چشت، تاجُ الاولیا، سلطان الہند، خواجۂ خواجگاں حضور خواجہ غریب نواز رحمۃُ اللہِ علیہ کی سیرت و دینی خدمات پر گفتگو کرتے ہوئے عاشقان رسول کی جانب سے ہونے والے سوالات کے جوابات ارشاد فرمائیں گے۔

تمام عاشقان اولیاء سے ان مدنی مذاکروں میں شرکت کرنے کی درخواست ہے۔

افضلُ البشر بعد الانبیاء، خلیفۃ الرسول حضرت سیدنا صدیق اکبر رضی اللہُ عنہ کے عرس شریف کے موقع پر 14 جنوری 2023ء کو عالمی مدنی مرکز فیضان مدینہ کراچی میں مدنی مذاکرے کا انعقاد کیا گیا جس میں شہر بھر سے کثیر تعداد میں عاشقان رسول نے شرکت کی۔

شیخ طریقت امیر اہلسنت علامہ محمد الیاس عطار قادری دامت بَرَکَاتُہمُ العالیہنے” سیرتِ صدیق اکبر رضی اللہُ عنہ“ پر گفتگو فرمائی اور عاشقان رسول کی جانب سے ہونے والے سوالات کے جوابات ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال: سمجھانے والے کااندازکیساہوناچاہئے؟

جواب:سمجھانے والے کا اندازانتہائی نرم اوراس کامقصدسامنے والےکی اصلاح ہوناچاہئے ،محض کسی کو نیچادکھانا نہ ہو،ورنہ جس کو سمجھایا جا رہاہے، اُ س میں ضدپیداہوسکتی ہے۔

سوال: ایسی سوچ رکھنا کیساکہ" فُلاں کی بے عزتی ہوگی تو میری عزت ہوگی "۔؟

جواب: یہ بہت خطرناک جذبہ ہے ،اس طرح سے ہرگز نہیں سوچنا چاہئے ،عزت دینے والی ذات تو اللہ پاک کی ہے ،اگرکسی کوسوال میں بیان کی گئی سوچ کے ساتھ عزت مل بھی گئی تو اس کی مدت بہت کم ہوگی ،کوئی اچھا اورعزت والا ہےتو اسے بُراکہہ کراپنی آخرت داؤ پر نہیں لگانی چاہئے۔

سوال : صدیقِ اکبرکا کیا معنی ہے؟

جواب : صدیق کا معنیٰ ہے بہت سچا،اکبر کا معنی ہے بہت بڑا،صدیق ِاکبر کا معنی ہوا،بہت ہی بڑے سچے ،بہت زیادہ سچائی والے۔

سوال: حضرت صدیقِ اکبر رضی اللہ عنہ کا اورآپ کے والدصاحب کا نام کیا تھا ؟

جواب: حضرت صدیقِ اکبر رضی اللہ عنہ کا نام عبداللہاورآپ کے والدصاحب کا نام عثمان تھا مگریہ(حضرت) ابوقُحافہ(رضی اللہ عنہ) کی کنیت سے مشہورتھے ۔

سوال: کیا آپ کبھی غارِ ثورمیں حاضرہوئے ہیں؟

جواب:جبلِ ثورکی زیارت تو کی ہے مگرغارِ ثورمیں حاضری نہیں ہوئی کیونکہ اس کی بلندی بہت زیادہ ہےَ

سوال:جب نبیِ کریم صلی اللہ علیہ والہ وسلم اورحضرت ابوبکرصدیق رضی اللہ عنہ سفرہجرت میں جب غارِ ثور میں ٹھہرے تھےتو کھا ناکون لے کرآتاتھا؟

جواب:ہجرت کے ایام میں کھانا حضرت اسماءبنتِ ابوبکرصدیق رضی اللہ عنہا لے کرآتیں اورحضرت ابوبکر رضی اللہ عنہ کے غلام حضرت عامربن فہیرہ رضی اللہ عنہ دودھ کے لیے بکریاں یہاں لایاکرتے تھے۔

سوال: حضرت ابوبکرصدیق رضی اللہ عنہ کی محبتِ اہلِ بیت کے بارے میں کچھ مدنی پھول عنایت فرمائیں۔

جواب: حضرت ابوبکرصدیق رضی اللہ عنہ سچے مُحبِ اہلِ بیت تھے ،ایک مرتبہ آپ کے سامنے اہلِ بیت کا ذکر ہواتو آپ نے فرمایا کہ مجھے قسم ہے! اُس ذات کی جس کے قبضۂ قدرت میں میری جان ہے! رسولِ کریم صلی اللہ علیہ والہ وسلم کے قرابت داروں یعنی رشتہ داروں کے ساتھ حُسن ِسلوک کرنا مجھے اپنے رشتے داروں سے صلۂ رحمی (حُسنِ سلوک)کرنے سے زیادہ پیارااورپسندیدہ ہے ،آپ کا ایک قول ہے کہ نبیِ کریم صلی اللہ علیہ والہ وسلم کے اِکرام کی وجہ سے اہلِ بیت کا اِکرام کرو۔

سوال: "اَفْضلُ الْبَشربعدَالانبِیَاء"کا کیا معنی ہے ؟

جواب: اس کا معنی ہے کہ تمام نبیوں کے بعد تمام انسانوں میں افضل اوریہ الفاظ حضرت صدیق ِاکبررضی اللہ عنہ کے ساتھ خاص ہیں ۔

سوال: پیارے آقاصلی اللہ علیہ والہ وسلم نے حضرت ابوبکرصدیق رضی اللہ عنہ کی مؤاخات(یعنی بھائی چارگی) کس سے فرمائی؟

جواب: مؤاخات کا معنی ہے بھائی بنانا ، حضرت ابوبکرصدیق رضی اللہ عنہ کی مؤاخات مہاجرین میں حضرت عمرفاروق ِاعظم رضی اللہ عنہ کے ساتھ اورانصارمیں حضرت خارجہ بن زید رضی اللہ عنہ کے سا تھ تھی۔

سوال : بیمارِمدینہ سے کیا مرادہے؟

جواب : جو مدینہ شریف کے عشق میں مست ہووہ بیمارِ مدینہ ہے ،نہ اس میں سردُکھتاہے نہ ہی پیٹ میں دردہوتاہے، مریضِ مصطفیٰ کا تو معاملہ ہی کچھ اورہے،عشق ِرسول کی بیماری وہ بیماری ہے جسے مل جائے اس کا بیڑاپارہوجائے ،اللہ پاک ہمیں دنیا کی بیماریوں اورغموں سے بچالے اوربیمارِمدینہ بنادے۔

سوال: اِس ہفتے کارِسالہ ” دُعا مانگنے کے 17 مدنی پھول “ پڑھنے یاسُننے والوں کو امیرِاہلِ ِسُنّت دامت برکاتہم العالیہ نے کیا دُعا دی ؟

جواب: یارَبَّ المصطفےٰ! جو کوئی 17 صفحات کا رسالہ ” دُعا مانگنے کے 17 مدنی پھول “ پڑھ یا سُن لے اُس کی نیک و جائز دعائیں مقبول ہوا کریں اور اُس کی بے حساب مغفرت ہوجائے ۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم۔ 

اَفضلُ البشر بعدَ الانیباء، یارِ غار و جانثارِ مصطفٰے صلَّی اللہ علیہ واٰلہٖ وسلَّم، سالار صحابہ، اسلام کے پہلے خلیفہ حضرت سیدنا ابو بکر صدیق رضی اللہُ عنہ کے عرس شریف کے موقع پر 14 جنوری 2023ء بروز ہفتہ بعد نماز عشاء رات 8:30 بجے دعوت اسلامی کے عالمی مدنی مرکز فیضان مدینہ کراچی میں مدنی مذاکرے کا انعقاد کیا جائے گا۔

مدنی مذاکرے کا آغاز تلاوت قرآن و نعت مقبول صلَّی اللہ علیہ واٰلہٖ وسلَّم سے ہوگا جبکہ عاشق صحابہ و اہل بیت، بانیٔ دعوت اسلامی شیخ طریقت امیر اہلسنت علامہ محمد الیاس عطاری قادری دامت بَرَکَاتُہمُ العالیہ سیرت صدیق اکبر رضی اللہُ عنہ پر گفتگو فرماتے ہوئے عاشقان رسول کی جانب سے ہونے والے سوالات کے جوابات ارشاد فرمائیں گے۔

مدنی مذاکرے کے آغاز میں جلوس صدیقی جبکہ آخر میں لنگر صدیقی کا بھی اہتمام کیا گیا جائیگا ۔ اس کے علاوہ یہ پروگرام مدنی چینل پر براہ راست نشر ہوگا۔

تمام عاشقان رسول سے بھر پور انداز میں شرکت کرنے کی درخواست ہے۔

مسلمانوں کو گناہوں سے بچانےاور نیکیوں سے بھرے لمحات سے نئے سال کا آغاز کرنے کے لئے دعوتِ اسلامی  ہر سال کی طرح اس سال بھی New year Night کے موقع پر محفلِ نعت و مدنی مذاکرے کا انعقاد کرنے جارہی ہے۔

31 دسمبر 2022ء بروز ہفتہ کی شب 08:30 بجے (پاکستانی ٹائم کے مطابق)عالمی مدنی مرکز فیضانِ مدینہ کراچی میں مدنی مذاکرے کا آغاز تلاوتِ قرآنِ پاک و نعتِ رسولِ مقبول صلَّی اللہ علیہ واٰلہٖ وسلَّم سے کیا جائے گا۔

اس کے بعد مدنی مذاکرے کا سلسلہ ہوگا جس میں بانی دعوتِ اسلامی حضرت علامہ مولانا محمد الیاس عطارقادری دَامَتْ بَرَکَاتُہُمُ الْعَالِیَہ قرآن و سنت اور بزرگانِ دین کے اقوال کی روشنی میں عاشقانِ رسول کی جانب سے کئے جانے والے سوالات کے جوابات دینگے۔

12 بجتے ہی درود و سلام کے ساتھ نئے سال کا آغاز کیا جائے گا۔عاشقانِ رسول سے درخواست کی جاتی ہے کہ New year Nightامیرِ اہلِ سنت دَامَتْ بَرَکَاتُہُمُ الْعَالِیَہ کے ساتھ گزاریں اور نیکیاں کرتے ہوئے نئے سال کا آغاز کریں۔

واضح رہے کہ! اس پروگرام کو مدنی چینل پر بھی براہِ راست نشر کیا جائیگا۔ (رپوٹ:رمضان رضا عطاری)

17 دسمبر 2022ء بمطابق 23جمادی الاولیٰ 1444ھ بروز ہفتہ بعد نماز عشاء دعوتِ اسلامی کے عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں شہر کراچی کے عاشقان رسول نے فیضان مدینہ آکر جبکہ دیگر مقامات پر ہزاروں عاشقان رسول بذریعہ مدنی چینل شریک ہوئے۔

مدنی مذاکرے میں شیخ طریقت، امیر اہلِ سنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے کئے گئے سوالات کے علم و حکمت سے بھر پور جوابات دیئے اور مسلمانوں کی دینی و معاشرتی رہنمائی کے لئے مدنی پھول ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال:بعض اوقات کسی کو معاف کردینے کے بعد بھی دل اس کی طر ف مائل نہیں ہوتا ،اس صورت میں کیا کیا جائے؟

جواب: دوستی تو اللہ پاک کوراضی کرنے کے لیے کی جاتی ہے، ایسے دوست کو معاف کرنے کے باوجود دل میں نفرت باقی رہ جاتی ہوتو اسے دورکرنے کی کوشش کی جائے ،یہ نفرت اچھی نہیں ،اس کی وجہ سے بھی کئی خرابیاں پیداہوتی ہیں،اپنے دوست کی دینی خصوصیات کو یادکیا جائے ،کوشش کرنے سے بھی کامیابی ہوجاتی ہے۔

سوال: صبرکی توفیق کے ساتھ مصیبت کی دعاکرنا کیسا؟

جواب: ایسی دعانہیں کرنی چاہیے کہ اگرمصیبت کے ساتھ صبرکی توفیق بھی مل گئی تو تکلیف تو ہوگی، حدیث پاک میں صبر کے بجائے عافیت کی دعامانگنے کی ترغیب دلائی گئی ہے۔

سوال:ضمیرکسے کہتے ہیں؟

جواب: بندے کے اندرکی ایک کیفیت کا نام ہے جو درست رہنمائی کرتی ہے ۔

سوال: باطنی بیماریوں کا علاج کیسےکیا جائے؟

جواب:باطنی بیماریوں کا تعلق دل سے ہوتاہے جیسے ریا،حسد،کینہ وغیرہ، باطنی بیماریوں کی معلومات ہونی چاہئیں،ان کے عذابات پڑھے جائیں،ان سے بچنے کے فضائل کا مطالعہ کیا جائے تو ان سے بچنے کا ذہن بن سکتاہے،اس کے بچنے کے اسباب بھی اختیارکیے جائیں ،اس نیک بندے کی صحبت اختیارکی جائے جوان کی معلومات بھی رکھتاہو اوران سے بچنےکی بھی کوشش کرتاہو،ایسے کی صحبت ہزارکتابوں کے مطالعہ سے زیادہ فائدہ دے گی،دعوتِ اسلامی کے دینی ماحول سے وابستہ ہوجائیں گے تو باطنی بیماریوں کے علاج میں آسانی ہوگی ۔اِن شاۤء اللہُ الکریم

سوال: تنہائی میں ڈرلگتاہو تو کیا کریں؟

جواب:یَارَءُوْفُ یَارَءُوْفُ پڑھتے رہنے سے خوف دورہوگا؟

سوال: اعلیٰ حضرت امام احمدرضا خان رحمۃ اللہ علیہ کادربارکہاں ہے؟

جواب: بریلی شریف(ہند) میں ہے۔

سوال: کیا نیک خیالات اورنیک دوستیاں کام آتی ہیں؟

جواب: جی ہاں! اگربندے کے خیالات اچھے ہوں توخواب بھی اچھے آتے ہیں، اگرخیالات بُرے ہوں تو خواب بھی بُرے آتے ہیں، اسی طرح اچھی صحبت اوراچھے دوست مرتے وقت کام آتے ہیں ،ہوسکتاہے وہ اس کے سامنے کردیے جائیں اوراس کا خاتمہ اچھا ہوجائے،اگربندے کی دوستی شرابیوں جواریوں،گالیاں بکنے والوں اوربُرے لوگوں سے ہوں گی تو مرتے وقت بُراخاتمہ ہونے کا خوف بڑھ جاتاہے، دوستی اچھے اورنیک لوگوں سے کرنی چاہئے۔

سوال: اِس ہفتے کارِسالہ ”امیرِ اہلِ سنّت سے جِنّات کے بارے میں سوال جواب “ پڑھنے یاسُننے والوں کوجانشینِ امیرِاہلِ ِسُنّت مدظلہ العالی نے کیا دُعا دی ؟

جواب: ياربّ المصطفےٰ !جو کو ئی 17 صفحات کا رسالہ ” امیرِاہلِ سنّت سے جِنّات کے بارے میں سوال جواب“پڑھ یا سن لے اُسے ہر طرح کی آفات وبلیات اور شریر جِنّات کے شر سے محفوظ فرما ۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

قراٰن و حدیث کی باتیں سیکھنے سکھانے، بزرگانِ دین کے واقعات اور اُن کے حکمت بھرے فرامین سے اپنی اور لوگوں کی اصلاح کرنے کے لئے عاشقانِ رسول کی دینی تحریک دعوتِ اسلامی کے زیرِا ہتمام مدنی مذاکرے کا انعقاد کیا جاتا ہےجس میں کراچی کے اسلامی بھائی براہِ راست جبکہ دیگر شہروں سے بذریعہ مدنی چینل عاشقانِ رسول شریک ہوتے ہیں۔

10 دسمبر 2022ء بمطابق 16 جمادی الاولیٰ 1444ھ بروز ہفتہ بعد نماز عشاء دعوتِ اسلامی کے عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں شہر کراچی کے عاشقان رسول نے فیضان مدینہ آکر جبکہ دیگر مقامات پر ہزاروں عاشقان رسول بذریعہ مدنی چینل شریک ہوئے۔

مدنی مذاکرے میں شیخ طریقت، امیر اہلِ سنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے کئے گئے سوالات کے علم و حکمت سے بھر پور جوابات دیئے اور مسلمانوں کی دینی و معاشرتی رہنمائی کے لئے مدنی پھول ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال: حلال کھانے کےکیا فوائدہیں؟

جواب: بہت فوائدہیں ،حلال کھائیں اگرچہ تھوڑاہی ہو،اس تھوڑے میں بھی برکت ہوگی ،اگرکسی نے حرام کمایاتو نہ تو سب کھا سکیں گے اورنہ ہی ساراپہن سکیں گے ،اولادکےلیے چھوڑجائیں گے ،ان کےلیے ترلقمے ہوں گے مگرمرنے والے کے لیے قبرمیں سانپ بچھوہوسکتے ہیں ،زندگی چنددن کی ہے،حرام کمانے والے توبہ کریں اورمعافی تلافی کرلیں۔

سوال: نیک اعمال کا رسالہ جمع کروانے کے بارے میں آپ کیا فرماتے ہیں؟

جواب: اگر کوئی دعوتِ اسلامی کا ذمہ دارہے یانہیں،نیکیاں تو سب کوہی کرنی چاہئیں ،نیکیاں کرنے کے لیے سب اپنےاعمال کا جائزلے کر روزانہ نیک اعمال کا رسالہ پرکریں اورہر عیسوی مہینے کی پہلی(1st ) تاریخ کو اپنے ذمہ دارکو جمع کروائیں ، خواہ اسلامی بھائی ہویا اسلامی بہن ،کسی ذمہ داری پر ہویانہ ہو،مجھے بھی چاہئے مَیں جمع کرواؤں،اراکین شوریٰ کو بھی جمع کروانا چاہئے ۔یہ بھی جنت میں لے جانے والانسخہ ہے ،اسے دیکھ کر ،پڑھ کر نیک اعمال کرنے کا ذہن بنتاہے، جس طرح ہاتھ میں تسبیح ہو تو ذکر واذکار کرنے،دُرود شریف پڑھنے کا ذہن بنتاہے۔

سوال:جب کوئی مدینہ شریف سے ہوکرآئے تو اس سے کیا سوال کیا جائے؟

جواب: جب کوئی مدینہ شریف جارہا ہوتو سرکارِمدینہ صلی اللہ علیہ والہ وسلم کو اپناسلام عرض کرنے کا کہاجائےاورجب واپس آئے تو یہ نہ پوچھا جائے کہ میراسلام عرض کیاتھا یا نہیں ؟یہ آزمائش کا باعث ہوسکتاہے،اس طرح کےاور سوالات بھی پوچھے جاتے ہیں مثلاً میرے گھرکا کھانا کیسالگاوغیرہ ،اس طرح کے سوالات نہ کئے جائیں جس سے سامنے والا جھوٹ میں مبتلاہوجائے ۔

سوال: کیاپیارے آقاصلی اللہ علیہ والہ وسلم نے اذان دی ہے؟

جواب: جی ہاں ایک مرتبہ اذان دی ہے ۔

سوال: اپنے والدین کو کس طرح نمازکی دعوت دی جائے؟

جواب: اگروالدین نمازنہ پڑھیں تو اچھے اندازسے،عاجزی سے، نرم اندازمیں نمازپڑھنے کا کہیں اورجب ان کو غصہ آجائے تو اب نہ کہیں ،ان کے ساتھ ہرگزبحث نہ کریں اورنہ ہی سختی کریں۔

سوال: حضرت خضرعلیہ السلام کون ہیں؟

جواب: حضرت خضرعلیہ السلام اللہ پاک کے نبی ہیں ،یہ حیاتِ ظاہری کے ساتھ زندہ ہیں اورسمندرکی حفاظت کرتے ہیں۔

سوال: آپ حسن رضا(امیرِ اہلسنت کے رضاعی پوتے) کوپیا رسے کس نام سے پکارتے ہیں؟

جواب: میں حسن رضا کو مٹھوکہتاہوں۔

سوال: مدنی مذاکرے میں جانشین وخلیفۂ امیراہلسنت مولانا عبیدرضا عطاری مدنی مدظلہ العالی کے کن استاذصاحب کا ذکر ہوا،امیراہل سنت نے ان کے بارے میں کیا فرمایا؟

جواب: حضرت مولانا مفتی محمدامین عطاری ،جانشینِ امیرِ اہلسنّت مولانا عبید رضا عطاری مدنی کے استاذ صاحب تھے ،یہ بچپن سے ہی دعوتِ اسلامی سے وابستہ تھے ،پکے دعوت اسلامی تھے ،کچھ سال پہلے وفات پاگئےہیں،اللہ پاک ان کی بے حساب بخشش و مغفرت فرمائے۔

سوال: خوفِ خداکیسے پیداہو؟

جواب: خوفِ خداکے فضائل پڑھیں ،مکتبۃ المدینہ کی کتاب ”خوفِ خدا“پڑھئے ،خائفین (خوفِ خدارکھنے والوں )کی صحبت میں رہیں ،یوں تو ہر مسلمان اللہ پاک سے ڈرتاہے کوئی کم اورکوئی زیادہ،اس وصف کو بڑھاناچاہئے ،دعوت اسلامی کے دینی ماحول سے وابستہ رہیں گے تو خوفِ خدامیں اضافہ ہوگا۔

سوال: اِس ہفتے کارِسالہ ” نماز پڑھنے کے باوُجُود گناہ کیوں ہوجاتے ہیں؟ “ پڑھنے یاسُننے والوں کو امیرِاہلِ ِسُنّت مدظلہ العالی نے کیا دُعا دی ؟

جواب: یارَبَّ المصطفےٰ! جو کوئی 17 صفحات کا رسالہ ”نماز پڑھنے کے باوُجُود گناہ کیوں ہوجاتے ہیں؟“ پڑھ یا سن لے اُسے مخلص نمازی بناکر ہر گناہ سے بچا اور اُسے جنت الفردوس میں اپنے پیارے پیارے سب سے آخری نبی صلَّی اللہ علیہ واٰلہٖ وسلَّم کا پڑوسی بنا۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم

3 دسمبر 2022ء بمطابق 09 جمادی الاولیٰ 1444ھ بروز ہفتہ بعد نماز عشاء دعوتِ اسلامی کے عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں شہر کراچی کے عاشقان رسول نے فیضان مدینہ آکر جبکہ دیگر مقامات پر ہزاروں عاشقان رسول بذریعہ مدنی چینل شریک ہوئے۔

مدنی مذاکرے میں شیخ طریقت، امیر اہلِ سنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے کئے گئے سوالات کے علم و حکمت سے بھر پور جوابات دیئے اور مسلمانوں کی دینی و معاشرتی رہنمائی کے لئے مدنی پھول ارشاد فرمائے۔

سوال:رحم دلی کس چیزکا نام ہے اوریہ کیسے حاصل ہوسکتی ہے؟

جواب:اللہ پاک کے آخری نبی، محمدعربی صلی اللہ علیہ والہ وسلم کا فرمان ہے:تم اس وقت تک ہرگز مؤمن نہیں ہوسکتے جب تک آپس میں رحم نہ کرنے لگو،صحابہ ٔکرام علیہم الرضوان نے عرض کی کہ ہم میں سے ہرایک رحم دل ہے ،اس پر آپ صلی اللہ علیہ والہ وسلم نے فرمایا:اپنے دوست پر رحم کرنا مرادنہیں بلکہ عام رحم دلی مرادہے۔(مجمع الزوائد،8/340،حدیث13671)رحم دلی سے مرادیہ ہے کہ تمام مخلوق انسان ،جانور،مکھی چیونٹی وغیرہ سب کے لیے رحم دل ہوجائیں،رحم دلی ایک اچھی صفت ہے ،یہ ہرایک میں اعلیٰ درجے کی ہونی چاہئے۔

سوال:ہم کسی پرکتنا رحم کریں؟

جواب:امام شعرانی رحمۃ اللہ علیہ تحریرفرماتے ہیں کہ بندہ مخلوق میں جتنا رحم دل اپنے حق میں ہوتا ہے ہم اُس کے حق میں اُس سے بڑھ کر رحم دل ہوجائیں ،اگریہ صفت ہمارے اندرآجائے توہمارے معاشرے میں ظلم، لڑائی جھگڑے، دھوکہ دہی جیسی برائیاں ختم ہوجائیں۔

سوال:حُبِّ جاہ جیسی برائی دل سے نکل جائے، اس کے لئے کیا کرنا چاہئے؟

جواب:عزت وشہرت کی خواہش چاہنا حبِّ جاہ ہے، اس کے بارے میں معلومات حاصل کریں گے اوراس کوختم کرنے کے طریقے پڑھیں گے تو یہ بُری صفت دورہوجائے گی۔(حُبِّ جاہ سے متعلق مزیدمفید معلومات جاننےکے لیے "باطنی بیماریوں کی معلومات"ص 62تا70کامطالعہ کیجئے)

سوال:توحیدسے کیا مرادہے؟

جواب:اللہ پاک کا ایک ہونا،اللہ پاک واحد یعنی ایک ہے۔

سوال:بچوں کو نمازی کیسے بنائیں؟

جواب:ایک طریقہ یہ بھی ہے کہ ہم خودبھی نمازپڑھیں، جب بچہ آپ کو نمازیں پڑھتے دیکھے گا تو وہ بھی نمازپڑھنے والابن جائے گا،ترغیب کے لئے سراپاترغیب بنناپڑتاہے، مزید نمازپڑھنے پر بچے کو تحفہ دیا جائے، ایک بزرگ بچوں سے کہا کرتے تھے کہ نمازپڑھوگے تو مَیں اخروٹ دوں گا۔

سوال:گھرمیں لڑائی نہ ہو،اس کے لئے کیا کریں؟

جواب:شریعت کی پابندی کریں گے تو گھرمیں لڑائی نہیں ہوگی۔

سوال:سردی سے بچنے کے لئے کیا کرنا چاہئے؟

جواب:گرم کپڑے پہنیں، ٹھنڈاپانی موافق نہ ہوتو گرم پانی استعمال کریں، جن غذاؤں کی تاثیرٹھنڈی ہوتی ہے وہ نہ کھائیں اورجن کی تاثیرگرم یعنی سردی کے موافق ہو، وہ استعمال کریں، خوب سبزیاں کھائیں، بڑھاپے میں بھی گھوڑے کی طرح بھاگیں گے۔

سوال:جس طرح بُری نظرلگتی ہے، کیا اسی طرح اچھی نظربھی لگتی ہے؟

جواب:جی ہاں! پہلے تو یہ لوگوں میں سُنا تھا کہ بچے کے بارے میں کہتے تھے کہ اس پر امام صاحب یا فلاں پیر صاحب کی نظرڈلوالاؤ، کروڑوں مسلمانوں کے عظیم پیشوا،سلسلۂ سہروردیہ کے بانی حضرت شیخ شہاب الدین سہروردی رحمۃ اللہ علیہ مسجدخَیف کی صفوں میں دورہ کررہے تھے، کسی نے پوچھا کہ اس میں کیاحکمت ہے؟ جواب دیا کہ میں چاہتاہوں کہ کسی اللہ والے کی مجھ پر نظرپڑجائے ۔نظربڑی چیزہے، بُری نظرخانہ خراب کردیتی ہے اوراچھی نظرگھرآبادکرتی ہے۔

سوال:مدنی قافلے میں سفرکی کیا برکات ہیں؟

جواب:کئی برکات ہیں، مثلاً مدنی قافلے جہاں جاتے ہیں وہاں علمِ دین پھیلتاہے، خود اپنے علمِ دین میں اضافہ ہوتاہے، مطالعہ کا شوق پیداہوتاہے۔

سوال:اِس ہفتے کارِسالہ ”علمِ دین کے فضائل“ پڑھنے یاسُننے والوں کوجانشینِ امیرِاہلِ ِسُنّت مدظلہ العالی نے کیا دُعا دی؟

26 نومبر 2022ء بمطابق 2 جماد الاولیٰ 1444ھ بروز ہفتہ بعد نماز عشاء عالمی مدنی مرکز فیضان مدینہ کراچی میں ہفتہ وار مدنی مذاکرے کا انعقاد کیا گیا جس میں شہر کراچی کے عاشقان رسول نے فیضان مدینہ آکر جبکہ دیگر مقامات پر ہزاروں عاشقان رسول بذریعہ مدنی چینل شریک ہوئے۔

مدنی مذاکرے میں شیخ طریقت، امیر اہلسنت علامہ محمد الیاس عطار قادری دامت بَرَکَاتُہمُ العالیہ نے عاشقان رسول کی جانب سے کئے گئے سوالات کے علم و حکمت سے بھر پور جوابات دیئے اور مسلمانوں کی دینی ومعاشرتی رہنمائی کے لئے مدنی پھول ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال: فضول کاموں سے چھٹکاراکیسے حاصل کیا جائے ؟

جواب: فرمانِ مصطفیٰ صلی اللہ علیہ والہ وسلم :کسی شخص کے اسلام کی خوبی یہ ہے کہ وہ اسے چھوڑدے جواُسے نفع نہ دے یعنی لایعنی چیز کو چھوڑدے ۔ (مسندامام احمد 6/959حدیث1737)

یہ حدیث پاک ان حادیث میں سے ہے جن پر اسلام کا دارومدارہے ،کامل مسلمان وہ ہے جوایسے کلام ،ایسی حرکات وسکنات سے بچے جو اسے دین یا دنیا میں مفیدنہ ہوں ،وہ کام یا کلام کرے جو اسے دنیا و آخرت میں فائدہ دے، ہمارے ہاں کسی کے پاس کوئی نئی چیز دیکھ کربلاضرورت پوچھتے ہیں ،یہ کتنے کی لی؟اس گاڑی کا ماڈل کون ساہے؟ کہاں پہنچے ہو؟کہاں گئے تھے ؟وغیرہ،اس طرح کی فضول باتیں بہت کی جاتی ہیں ،ا ن کی ضرورت نہیں ہوتی ،ایک بزرگ رحمۃ اللہ علیہ نے کسی کا نیامکان دیکھ کر پوچھا کہ یہ کب بنایا ؟پھرفوراًاحساس ہواکہ یہ فضول بات ہوئی ،اس پر انہوں نے فیصلہ کیا کہ میں ایک سال کے روزے رکھوں گا۔ مفتی احمدیارخان رحمۃ اللہ علیہ کا قول ہے :دنیامیں اپنے نفس کا حساب کروتاکہ قیامت کا حساب آسان ہو۔

سوال: عمامہ شریف کس طرح باندھنا سُنّت ہے؟

جواب: فتاویٰ رضویہ میں سیدی اعلیٰ حضرت امام احمد رضا خان رحمۃ اللہ علیہ نے گنبدنما عمامہ باندھنے کو سنّت لکھا ہے ۔

سوال: چھٹی کے دن کیا کرنا چاہئے؟

جواب :دنیا کے کاموں سے چھٹی ہے تو بندہ اللہ پاک کی عبادت کرے ، قضا نمازیں ہیں تو وہ پڑھے ،زیادہ نفل پڑھ لے،دُرودشریف پڑھ لے ،جوکچھ بھی کرے وہ اللہ پاک کی رضا والے کاموں سے ہو،حدیث پاک میں ہے کہ مصروفیت سے پہلے فرصت کو غنیمت جانو۔فرصت میں بندہ آخرت میں کام آنے والے کاموں میں مصروف رہے ۔12دینی کاموں میں سے ان دِینی کاموں”یومِ تعطیل اعتکاف/علاقائی دورہ برائے نیکی کی دعوت“میں شرکت کی سعادت حاصل کی جائے۔

سوال: باطنی بیماریوں کے علاج کے لیے کیاکرنا چاہئے؟

جواب: اس کے لیے علمِ دین ہوناضروری ہے ،شیطان گناہوں کو بھی اچھا کرکے دکھاتاہے ،علمِ دین ہوگاتو گناہوں کی پہچان ہوگی ،علمِ دین کے حصول کے ساتھ ساتھ عاشقانِ رسول،نمازی،پرہیزگار کی صحبت بھی چاہئے ،دعوت ِاسلامی کے دِینی ماحول سے وابستہ ہوں گے تو باطنی بیماریوں کے علاج کی بھی صورتیں بنتی رہیں گی۔ ان شاء اللہ الکریم

سوال: شماتت کیا ہے ؟

جواب: یہ بھی ایک باطنی یعنی دل کی بیماری ہے ،اس کی تعریف یہ ہے کہ کوئی مسلمان تکلیف میں مبتلاہوجائے ،اس کا کوئی عہدہ ختم ہوجائے،اس کی ٹانگ ٹوٹ جائے تو اس پر دوسرے کوخوشی ہو ،اس خوشی کو شماتت کہتے ہیں ،یہ بھی بُری چیز ہے کہ جس کوتکلیف ہوئی وہ تودرست ہوجائے اوریہ خوش ہونے ولااس تکلیف میں مبتلاہوجائے،اس سے بچنابھی ضروری ہے ۔

شَماتت کی تعریف:اپنے کسی بھی نسبی یا مسلمان بھائی کے نقصان یا اُس کو ملنی والی مصیبت وبلا کو دیکھ کر خوش ہونے کو شَماتت کہتے ہیں۔

(باطنی بیماریوں کی معلومات)

سوال: کیا کتاب بھی اثررکھتی ہے ؟

جواب: جی ہاں ! کتاب لکھنے والانیک ہوگااورجو کتاب جتنے اخلاص کے ساتھ لکھی ہوگی تو اس کا اثر بھی زیادہ ہوگا ،اس کو پڑھنے سے علم اوراس کا نورحاصل ہوگا،جیسے احیاء العلوم کے اپنے اثرات ہیں ،پڑھنے والے کو ایسالگتاہے کہ کان پکڑکرمجھے ہی سمجھایا جا رہاہے ،کتاب اپنے اوراچھے لوگوں کی پڑھنی چاہئے ،ایک بزرگ آدم برکاتی تھے ،ان کی صحبت سے مجھے بہت فائدہ ہوتاتھا ،عقیدے میں بہت مضبوط تھے، ان سے مَیں نے ایک سے زیادہ بارسُنا تھاکہ کتاب اپنے بزرگوں کی پڑھنی چاہئے کہ جتنا ہم پڑھیں گے تو اس کتاب پڑھنے کا ثواب لکھنے والے بزرگ کو ملے گا۔

سوال: آپ نےفیضانِ سنّت میں میڈیکل ٹیسٹ کروانےکا مشورہ دیا ہے ،اگرٹیسٹ میں کولیسٹرول آئے تو کیاکیا احتیاطیں کی جائیں ؟

جواب: کولیسٹرول والاچکنائی والی چیزیں مثلاً گھی،ملائی وغیرہ استعمال نہ کرے ،بہتریہ ہے کہ کچے زیتوں کا تیل(Olive Oil) استعمال کرے، یعنی جو چیز بھی بنائی جائے وہ بغیرتیل یاگھی کے ہو اوراس پر کچے زیتون کا تیل ڈال کرکھائے ،اس سے پریشانی نہیں ہوتی یعنی یہ چیزکھائی جاسکتی ہے ۔

سوال : بچوں کو اپنے والداوروالدہ کو کیا کہہ کر بُلانا چاہئے؟

جواب : مجھے یہ پسندہے کہ بچے اپنے والدکو ابو اوروالدہ کوامی کہاکریں ۔

سوال: اِس ہفتے کارِسالہ ” نام رکھنے کی 18 سنّتیں اور آداب “ پڑھنے یاسُننے والوں کو امیرِاہلِ ِسُنّت دامت برکاتہم العالیہ نے کیا دُعا دی ؟

جواب: یارَبَّ المصطفٰے! جو کوئی 17 صفحات کا رسالہ ” نام رکھنے کی 18 سنّتیں اور آداب “ پڑھ یا سُن لے، اُسے ہر کام سنت کے مطابق کرنے کی سعادت دے اور اُسے اپنے سب سے آخری نبی صلَّی اللہ علیہ واٰلہٖ وسلَّم کی سنتوں کی چلتی پھرتی تصویر بنا اور اُس کی بے حساب مغفرت فرما۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔