علمِ دین سکھانےاور لوگوں کی دینی، اخلاقی و تنظیمی تربیت کرنے والی عاشقانِ رسول کی دینی تحریک دعوتِ اسلامی کے تحت 28ذیقعدۃالحرام 1444ھ بمطابق 17 جون 2023ء بروز ہفتہ کی شب عالمی مدنی مرکز فیضانِ مدینہ کراچی میں مدنی مذاکرے کا انعقاد کیا گیا۔

معمول کے مطابق تلاوتِ قراٰن و نعتِ رسولِ مقبول صلی اللہ علیہ و سلم کے بعد ملک و بیرونِ ملک کے عاشقانِ رسول کی جانب سے امیرِ اہلِ سنت حضرت علامہ مولانا ابوبلال محمد الیاس عطار قادری ضیائی دامت بَرَکَاتُہمُ العالیہ سے مختلف سولات ہوئے جن کے آپ دامت بَرَکَاتُہمُ العالیہ نے علم و حکمت بھرے جوابات ارشاد فرمائے۔ان میں سے بعض درج ذیل ہیں:

سوال: بندہ اپنے نفس کو کیسے پہچانے؟

جواب:حضرت یحییٰ معاذرازی رحمۃ اللہ علیہ فرماتے ہیں:جس نے اپنے نفس کو پہچانا اس نے اپنے ربّ کو پہچانا۔نفس کو پہچاننے سے مرادیہ ہے کہ اپنی ذات میں پائی جانے والی کمی، کوتاہی اور زندگی گزارنے میں چیزوں میں محتاج رہنے پر نظرکرے ، اس کے برعکس اللہ پاک ان تمام خامیوں، کمزوریوں ،کمی ،کوتاہی سے پاک ہے اورکسی کا محتاج نہیں بلکہ سب اس کے رحم وکرم کے محتاج ہیں ۔بس یہ غورکرکے اپنی کمزوری وکوتاہی اور اپنی محتاجی پر نظررکھےاوریوں اپنے نفس کو پہچانے کہ مَیں تو کچھ بھی نہیں ہوں،بہت کمزور اور ناتواں ہوں مگرمیراربّ قادرِمطلق ہے ۔

سوال:اتنا زیادہ سوچنا کہ جس سے دماغ پر بوجھ پڑے،ا س سے کیسے بچا جائے؟

جواب:جب زیادہ سوچ بِچار اور پریشان کن خیالات کا سلسلہ ہوتاہے جس میں منفی(Negative)سوچیں آتی ہیں اوربندے پرحاوی ہوجاتی ہیں تو بندہ کسی معاملے کےبُرے نتیجے کے بارے میں سوچنے لگتاہے۔حالانکہ اس کے سامنے وہ نتیجہ ہوتا نہیں۔جب بندہ اپنی سوچوں کو قابونہیں کرتاتو وہ ذہنی مریض بھی بن سکتاہے ۔کھوٹی کھوٹی سوچیں بندے کوڈبودیتی ہیں ۔اس لئے اچھی باتیں سوچنی چاہئیں۔منفی(Negative) نہ سوچیں ،اللہ پاک کی رحمت پرنظررکھیں ، منفی سوچوں کو اچھی سوچوں میں بدل دیں ،منفی سوچوں سے توجہ ہٹائیں ،مدینہ شریف کی یادوں میں مگن ہوجائیں۔کبھی تصورمیں طواف کریں تو کبھی بارگاہِ رسالت میں حاضری کا تصورکریں ۔اس طرح اچھی اچھی سوچیں لائیں تو اس کے نتائج بھی اچھے ہوں گے۔جب منفی سوچیں آئیں تو اچھے اورنیکی کے کاموں میں مصروف ہوجائیں۔کلمہ شریف، درودِپاک اور دیگر اذکار میں مصروف ہوجائیں، اس سے پاکیزگی حاصل ہوگی، دل بھی صاف ہوگااور مدینہ مدینہ ہوجائے گا۔اِنْ شاۤءَ اللہُ الکریم

سوال: دعوتِ اسلامی کے" رابطہ برائے ٹرانسپورٹ ڈیپارٹمنٹ "کے بارے میں امیرِاہلِ سنت دامت برکاتہم العالیہ نے کیا ارشاد فرمایا؟

جواب : اَلْحَمْدُللہ !یہ شعبہ بھی کافی آگےبڑھ رہا ہے، یہاں تک کہ لاری اڈّوں وغیرہ پر جائے نمازبھی بن رہی ہیں ،اللہ پاک برکت دے ،خوشی ہوئی ۔

سوال: حاجی حج کرنے کے لئے حرمینِ طیبین کے لئے روانہ ہوچکے ہیں ، جواس سال نہیں جا سکے، ان کی کیاکیفیت ہونی چاہیئے ؟

جواب: بس حسرت آتی ہے،اللہ پاک ہمیں بھی پہنچادے ۔جس کو حسرت ہو،دل میں افسوس کی کیفیت ہوکہ کاش!!! میں بھی حج کے لئے جاتاتو یہ بھی ثواب کاکام ہے ۔یہ اچھی سوچیں اورخیالات ہیں اورہونے بھی چاہئیں ۔اللہ پاک نصیب فرمائے ۔

سوال: اِس ہفتے کارِسالہ ” امیر اہلسنت کے 150 ارشادات “ پڑھنے یاسُننے والوں کوجانشینِ امیراہل سنت مدظلہ العالی نے کیا دُعا دی ؟

ماہِ ذو الحجہ کی آمد آمد ہے، دنیا بھر سے حاجیوں کا قافلہ جوق در جوق مکۃ المکرمہ زادھَا اللہُ شرفاً وَّ تعظیماً پہنچ رہا ہے جبکہ دیگر ممالک میں مسلمان سنتِ ابراہیمی کو ادا کرنے کے لئے قربانی کی تیاریوں میں مصروف ہیں۔دینِ اسلام میں یہ دونوں ایسی عبادت ہیں جنہیں ماہِ ذو الحجہ کے مخصوص دنوں کے علاوہ سال کے کسی اور دن ادا نہیں کیاجاسکتا ہے۔ ان عبادات کو ادا کرنے والے بالخصوص اور بالعموم ہر مسلمان کو ان کے تمام مسائل شرعیہ کا علم ہونا ضروری ہے۔

حج و قربانی کے مسائل اور دیگر Topic سے متعلق عاشقان رسول کو رہنمائی فراہم کرنے کے لئے 19 جون 2023ء بروز پیر سے 10 ذوالحجہ تک روزانہ رات تقریباً 9:45 بجے عالمی مدنی مرکز فیضان مدینہ کراچی سے براہِ راست (Live) مدنی چینل پر مدنی مذاکرے کا انعقاد کیا جائے گا۔مدنی مذاکرے میں شیخ طریقت امیر اہلسنت حضرت علامہ مولانا محمد الیاس عطار قادری دامت بَرَکَاتُہمُ العالیہ حج و قربانی کے مسائل کے متعلق گفتگو کرتے ہوئے عاشقان رسول کی جانب سے ہونے والے سوالات کے جوابات ارشادفرمائیں گے۔

علم دین کے سمندر سے موتیوں کو اپنے دامن میں سمیٹنے کے لئے عاشقان رسول سے ان مدنی مذاکروں میں شرکت کی درخواست ہے۔ 

21 ذیقعدہ 1444ھ بمطابق 10 جون 2023ء بروز ہفتہ کی شب عالمی مدنی مرکز فیضانِ مدینہ کراچی میں علمِ دین سے بھرپور مدنی مذاکرے کا انعقاد کیا گیا جس میں کثیر عاشقانِ رسول کی براہِ راست اور بذریعہ مدنی چینل شرکت رہی۔

معمول کے مطابق مدنی مذاکرے کا آغاز تلاوتِ قراٰن اور نعت شریف سے کرنے کے بعد سوال و جواب کا سلسلہ ہوا جس میں شیخ طریقت، امیرِ اہلِ سنت حضرت علامہ مولانا محمد الیاس عطار قادری رضوی ضیائی دامت بَرَکَاتُہمُ العالیہنے عاشقانِ رسول کی جانب سے ہونے والے سوالات کے علم و حکمت بھرے جوابات ارشاد فرمائے۔

ان سوال و جواب میں سے بعض درج ذیل ہیں:

سوال: بعض لو گ ٹینکی میں پانی بھرنے کے لئے موٹرچلا کربھول جاتے ہیں اورٹینکی بھرنے کے بعد پانی ضائع ہوتارہتاہے ۔وہ پانی کسی کے گھر یا گلی میں جمع ہوتاہے ،گلی میں پانی بہنے سے گزرنے والوں کو تکلیف ہوتی ہے ۔ آپ اس بارے میں کیا فرماتے ہیں ؟

جواب:ہر کام میں اعتدال ہونا چاہئے۔اس طرح کی شکایت ہے کہ پانی چھت سے گرتارہتاہے ،یہ نہیں ہونا چاہیئے۔ بغیر ضرورت جان بوجھ کر پانی ضائع کرنا گنا ہ ہے ۔اپنا ایک معیارمقررکرلیں،مثلاً معلوم ہے کہ ٹینکی ایک گھنٹے میں بھر جاتی ہے تو اُتنی دیر موٹر چلائی جائے، جب وقت ہوجائے تو پانی کے چھلکنے کا انتظار نہ کریں اور موٹر بند کردیں۔اس سے پانی ضائع ہونے اور دیگر بہت ساری خرابیوں سے بچت ہوگی اور اس میں موٹرکی بھی بچت ہے۔ہرچیز کی لمٹ ہوتی ہے ۔موٹرزیادہ چلے گی تو اس کا لائف ٹائم کم ہوجائے گا۔موٹر چلانے میں احتیاط کرنے سے بجلی کی بھی بچت ہوگی اوربل بھی کم آئے گا۔موٹرچلاکرجان بوجھ کر بند نہ کرنا بھی غفلت میں شامل ہے۔اللہ پاک ہمیں اس طرح کی غفلتوں سے بچائےاور اللہ ورسول کے احکامات پرچلنے کی توفیق عطافرمائے ۔

توجہ فرمائیں:بجلی استعمال کرنے سے متعلق امیرِ اہلِ سنت حضرت علامہ مولانامحمدالیاس عطارقادِری دامت برکاتہم العالیہ کا بہت ہی معلوماتی رسالہ"بجلی اِستعمال کرنے کے مدنی پھول" خود بھی پڑھئے،گھر کے تمام افراد کو بھی پڑھنے اور اس کے مطابق عمل کرنے کا ذہن دیجئے۔

سوال: مصیبت کیوں آتی ہے ؟

جواب:مصیبت کے ذریعے اللہ پاک اپنے بندوں کوآزماتاہے ۔ گنہگاروں کے گناہ مٹاتاہے ،نیک لوگوں کے درجات بلندہوتے ہیں ۔ مصیبت کسی نہ کسی حوالے سے فائدہ پہنچاتی ہے ۔بندے کو لگام رہتی ہے ۔مصیبت آئے گی تو اللہ پاک کی یادآتی ہے ،غفلت دورہوتی ہے ۔یہ اللہ پاک کی مصلحت ومشیّت ہے ،اس لئے مصیبت پر صبرکیا جائے ۔اس سے اجرملے گا ۔بے صبری سے مصیبت دورنہیں ہوتی بلکہ آتاہواثواب بھی ضائع ہوجاتاہے ۔

سوال: پہلوان کون ہے ؟

جواب:پہلوان وہ نہیں جو دوسرے کوپچھاڑدے بلکہ پہلوان وہ ہے جو غُصّہ کنٹرول کرے۔بعض اوقات ایک شخص حُسنِ اخلاق کا پیکر معلوم ہوتاہے لیکن اگر کبھی اس کی طبیعت/مزاج کے خلاف کوئی کام ہوجائے،کوئی بے عزتی کردے تو جیسے ہی اُسے غُصّہ آتاہےتو اس کے حُسنِ اخلاق کی ساری عمارت زمین بوس ہوجاتی ہے۔مکتبۃ المدینہ کی کتاب”حُسنِ اخلاق“ میں جو لکھاہے،کاش! وہ ہمارے کردارمیں آجائے ۔ہم لوگوں کے سامنے توحُسنِ اخلاق کے پیکربنتے ہیں ،بچھ بچھ جاتے ہیں اور جب گھرمیں جاتے ہیں تو ببرشیرکی طرح دھاڑتے ہیں ۔عوام کودکھانے کے لئے اخلاق کچھ اورگھرمیں کچھ اور ۔ہاتھی کے دانت کھانے کے اور، دکھانے کے اور ۔گھروالوں ،ماں باپ ،بچوں کی امی اوربچوں کے ساتھ بھی حُسنِ اخلاق سے پیش آنا چاہیئے ۔اللہ کرے کہ ہم دورنگی چھوڑکر ایک رنگی اختیارکریں(یعنی ہماراظاہر و باطن ایک ہو جائے،ہماری گفتار اور ہمارا کردار ایک ہو جائے) ۔ہمارااخلاق اندرباہرہرجگہ اچھا ہو۔یوں واقعی ہم بااخلاق ہوجائیں ۔

سوال: سب سے زیادہ مُوذی یعنی نقصان دینے والاکون ہے ؟

جواب: نفسِ امَّارہ مُوذی یعنی نقصان دینے والاہے ۔جونفس برائیوں پر اُبھارتاہے وہ نفسِ اَمّارہ کہلاتاہے ۔نفسِ امّارہ کو ہرادیاجائے،اسے ماردیا جائے تَوتُومردکا بچہ ہے ۔

سوال: ہاتھ ملانے کا درست طریقہ کیا ہے؟

جواب: سُنّت یہ ہے کہ دونوں ہاتھوں کو اس طرح ملایا جائے کہ ہتھیلی سے ہتھیلی ملے اوردرمیان میں کوئی چیز نہ ہو ۔اس پر خود بھی عمل کریں اوردوسروں کو بھی عمل کی ترغیب دلائیں ۔

سوال:پروفیشنل افراد کا کا م زیادہ ہوتاہے، اس لئے ان کی فیملی لائف متاثرہوتی ہے ۔گھروالوں کو کم وقت دے پاتے ہیں اس کاکیاحل ہے ؟

جواب:سارامسئلہ حرص کا ہے ۔کھانااتناہی ہے جتنا پیٹ ہے اورپہننااتناہی ہے جتنا بدن ہے ۔باقی چھوڑکے ہی مرنا ہے ۔بندے کو چاہیئے کہ وہ کام کا اپنا ٹائم ٹیبل بنائے ۔جوسمجھدارہوتے ہیں وہ بناتے بھی ہیں مثلاًاتنے گھنٹے کام کرنا ہے اس کے بعد کام نہیں کرنا۔ اپنے آپ کو منظم(Manage)تو کرنا پڑے گا۔دماغ کے لئے آرام کی ضرورت ہے ۔اسے آرام نہیں ملے گا تو یہ کام کیسے کرےگا۔ورنہ ڈاکٹرکے پاس جانا پڑے گا۔اپنی حرص کوختم کرنا چاہیئے ۔اس طرح بندہ سوچے کہ جن لوگوں کے پاس مال تھاوہ اب کہاں ہیں ،دنیاسے چلے گئے ۔قارون جو بہت زیادہ مالدارتھا وہ بھی اپنے خزانے سمیت زمین میں دھنسادیا گیا۔ کام آ نے والاخزانہ تو نیکیاں ہیں ۔مال بھی کام آتاہے بس اللہ پاک اپنامحتاج رکھے دنیاکی محتاجی سے بچائے ۔بندہ ضرورت کے مطابق کمائے۔پیسہ پیسہ کرتارہے گا تو کہیں کا نہیں رہے گا اورایساکرنے والے لوگ کہیں کے نہیں رہتے ۔ٹینشن سے کئی لوگوں کی جانیں چلی جاتی ہیں ۔

سوال:کیا ہمیں ایک ہی ڈاکٹرسے علاج کروانا چاہئے ؟

جواب : جی ہاں ! اس کے بارے میں، میں کہتارہتاہوں ،کیونکہ ایک ڈاکٹرآپ کی طبیعت سے واقف ہوجائے گا اوراس کے مطابق آپ کا علاج کرے گا یوں دوائیوں کے نقصان سے بچت کی بھی صورت ہوگی،ورنہ نئے نئے ڈاکٹرزکے پاس جائیں گے تو وہ آپ پرتجربے کرتے رہیں گے اوردوائی(Medicine) سے مضر اثرات(Side Effects) بھی ہوسکتے ہیں ۔

سوال:مُتَفَقٌّ عَلَیْہ کون سی حدیث ہوتی ہے ؟

جواب:وہ حدیثِ پاک جو امام بخاری اورامام مسلم(رحمۃ اللہ علیہم اجمعین) دونوں نے روایت کی ہو۔

سوال: ماہِ ذُوالْحَج کے کیافضائل ہیں ؟

جواب:ماہِ ذُوالْحَج کے کئی فضائل ہیں :اس کے پہلے10 دنوں سے زیادہ کسی دن کا نیک عمل اللہ پاک کومحبوب نہیں۔اس کے ہردن کا روزہ 1 سال کے روزوں اورہررات کا قیام شبِ قَدرکے برابرہے ۔9 ذُوالْحَج (یوم عرفہ)کا روزہ 1 سال قبل اور 1 سال کے بعد کے گناہ مٹادیتاہے نیز یہ ہزار روزوں کے برابرہے ،البتہ حج کرنے والے پرجوعرفات میں ہوتاہے اسے 9 ذُوالْحَج کا روزہ رکھنامکروہ ہے ۔(فیضان سنت جلد1ص565تا567)

سوال:اِس ہفتے کارِسالہ ” نمازِ فجر کے فضائل “ پڑھنے یاسُننے والوں کوامیرِاہلِ سنت دامت برکاتہم العالیہ نے کیا دُعا دی ؟

قراٰن و حدیث میں علمِ دین حاصل کرنے کے بےشمار فضائل موجود ہیں نیز صحابۂ کرام علیہم الرضوان اور بزرگانِ دین رحمہم اللہ المبین کا یہ معمول تھا کہ وہ ہر وقت علمِ دین حاصل کرنے کی تلاش میں لگے رہتے تھے۔

علمِ دین کی جستجو کو برقرار رکھتے ہوئے آج 27 مئی 2023ء بروز ہفتہ عالمی مدنی مرکز فیضانِ مدینہ کراچی میں مدنی مذاکرے کا انعقاد کیا جائے گاجس میں کراچی کے کثیر عاشقانِ رسول براہِ راست اور پاکستان کے دیگر شہروں سمیت بیرونِ ملک کے اسلامی بھائی بذریعہ مدنی چینل شریک ہوں گے۔

مدنی مذاکرے کا آغاز پاکستانی وقت کے مطابق تقریباً 9:30 بجے تلاوتِ قراٰنِ پاک سےکیا جائے گا اور نعت خواں اسلامی بھائی حضور صلی اللہ علیہ و سلم کی بارگاہ میں نذرانۂ عقیدت پیش کریں گے۔

اس کےبعد امیرِ اہلِ سنت حضرت علامہ محمد الیاس عطار قادری رضوی ضیائی دامت بَرَکَاتُہمُ العالیہعاشقانِ رسول کی جانب سے ہونے والے مختلف سوالات کے علم و حکمت بھرے جوابات ارشاد فرمائیں گے۔

تمام عاشقانِ رسول وقت کی پابندی کے ساتھ اس مدنی مذاکرے میں براہِ راست یا بذریعہ مدنی چینل شرکت کرکے اپنے لئے علمِ دین کا خزانہ حاصل کریں۔

عاشقانِ رسول کی دینی تحریک دعوتِ اسلامی کے تحت 20 مئی 2023ء بمطابق 30 شوال المکرم 1444ھ کی شب عالمی مدنی مرکز فیضانِ مدینہ کراچی میں مدنی مذاکرے کا انعقاد کیا گیا جسے بذریعہ مدنی چینل پاکستان سمیت  دنیا بھر میں دکھایا گیاجبکہ کراچی کے مختلف علاقوں سے کثیر اسلامی بھائیوں نے براہِ راست اس مدنی مذاکرے میں شرکت کی۔

اس مدنی مذاکرے میں عاشقانِ رسول نے شیخِ طریقت امیرِ اہلِ سنت علامہ محمد الیاس عطار قادری دامت بَرَکَاتُہمُ العالیہ سے دینی و دنیاوی معاملات کے حوالے سے سوالات کئے جس کے امیرِ اہلِ سنت نے علمِ و حکمت سے بھر پور جوابات دیئے۔

ان سوال و جواب میں سے بعض درج ذیل ہیں:

سوال: بندے میں کتنی قوتِ برداشت ہونی چاہیئے ؟

جواب: جب کوئی مشکل ومصیبت آئے تو بندہ صبرکرے ،اپنے اندرقوتِ برداشت پیداکرے ۔جتنا صبرمشکل ہوگا اتناثواب بھی زیادہ ہوگا۔

سوال:کیا جنت میں ہرخواہش پوری ہوگی ؟

جواب:جی ہاں !جنت اللہ پاک کی رحمت وکرم کا مظہر ہے ۔جنت میں رنج وغم نہیں ۔جنت میں ہرنعمت ہوگی ۔جنّتی جس چیز کی خواہش کرے گا وہ اسے حاصل ہوگی ۔جنّتی کو سب سے بڑی نعمت یہ حاصل ہوگی کہ اُسے اللہ پاک کا دِیدار نصیب ہوگا۔

سوال : آم(Mango) کھانے کے کیاکیافوائدہیں ؟

جواب : آم پھلوں کا بادشاہ ہے،آم کھانا جلد بوڑھا ہونے سے بچاتاہے ۔یہ ہرقسم کے کینسراوردمے سے بچاسکتاہے ۔یہ ہڈیوں کے امراض دورکرتاہے ۔ آم جسمانی کمزوری کودورکرتااوراسے موٹاکرتاہے۔یہ پٹھوں کو سخت گرمی اورلُوسےبچاتاہے ۔اس کے کھانے سے سفیدبالوں میں کالک آسکتی ہے ۔ پہلے سیزن کا آم نہ کھایا جائے،کیونکہ یہ طبّی طورپر(Medically) مناسب نہیں۔

سوال: وضوکے بعد داڑھی میں کنگھی کرنے کاکیا فائدہ ہے ؟

جواب: وضوکے بعد داڑھی میں کنگھی کرنا تنگدستی کودورکرتاہے ،امام جلال الدین سیوطی رحمۃ اللہ علیہ لکھتے ہیں :حضرت وہب بن منبہ رحمۃ اللہ علیہ فرماتے ہیں : کھڑے ہوکرکنگھی کرنے سے قرض چڑھتاہے اوربیٹھ کر کنگھی کرنا قرض کودورکرتاہے ۔(الحاوی للفتاویٰ جلد2ص46،47،بیروت )

سوال: نبیِ کریم صلی اللہ علیہ والہ وسلم کاشجرۂ نسب یادکرنا کیسا؟

جواب: اچھا ہے ۔

سوال:شجرے سے کیا مرادہے، اوراس کے پڑھنے کے کیافائدے ہیں ؟

جواب:شجرکامعنی درخت ہے،شجرہ کامعنی بھی درخت ہی ہے ۔جس طرح حدیث کی سندیں ہوتی ہیں،اسی طرح سلسلۂ پیری مُریدی کابھی شجرہ ہوتاہے ۔شجرہ مشائخ کا نبیِ کریم صلی اللہ علیہ والہ وسلم سے ملنے کی سندہے ۔شجرہ پڑھنے سے نیک لوگوں کا ذکر کرنے کی سعادت حاصل ہوتی ہے ۔نیک لوگوں کے ذکرکے وقت اللہ پاک کی رحمت نازل ہوتی ہے اورایک روایت میں ہے کہ نیک لوگوں کاذکر گناہوں کا کفارہ ہے ۔ یعنی شجرہ پڑھنے کےبہت فوائد ہیں، مثلاً اوّل(1)۔ رسولُ اﷲ صلَّی اللہ علیہ وسلَّم تک اپنے اِتصال( یعنی سلسلہ کے ملنے )  کی سند کاحفظ۔دُوُم(2) :صالحین( یعنی نیک بندوں )  کا ذکر کہ مُوجِب نُزولِ رحمت( یعنی رَحمت کے نازل ہونے کا سبب )  ہے۔سِوُم (3): نام بنام اپنے آقایانِ نعمت( یعنی سلسلے کے مشائخِ کرام رحمۃُ اللہ علیہ  )  کو ایصالِ ثواب کہ اُن کی بارگاہ سے موجبِ نظر عنایت( یعنی نظر ِکرم ہونے کا سبب )ہے۔چہارم(4) :جب یہ( یعنی شَجَرَہ عالیہ پڑھنے والا )اوقاتِ سلامت( یعنی راحت )  میں ان کا( یعنی اپنے سلسلے کے مشائخِ کرام  رحمۃُ اللہ علیہم اجمعین کا )نام لیوا رہے گا تو وہ اوقاتِ مصیبت( یعنی کسی بھی پریشانی اور مشکل کے وقت )  میں اس کے دستگیر ہوں گے( یعنی اس کی مدد فرمائیں گے ) ۔ رسول اﷲ صلَّی اللہ تعالیٰ علیہ وسلَّم فرماتے ہیں : تُو خوشحالی میں اﷲ پاک کو پہچان وہ مصیبت میں تجھ پر نظر ِکرم فرمائے گا۔(جامع صغیر ، ص199 ، حدیث : 3317 ۔ فتاویٰ رضویہ ، 26 / 590 ، 591 )

سوال : نیکی کی دعوت/ دعوتِ اسلامی کے کسی دینی کام یاشعبے کے تعارف کا ویڈیو کلپ کس طرح بنایا جائے ؟

جواب : ہمیشہ خیال رکھیں کہ جب کوئی کلپ بنایاجائے تو اس کی ابتدامیں نیکی کی دعوت کے موضوع پر کوئی حدیث پاک یاکوئی روایت بیان کی جائے اورشروع میں کسی مجلس یاشعبے کا ذکر نہ کیاجائے تاکہ تمام لوگ اسے دیکھیں ۔

سوال: کیا مریضوں سے دعاکروانی چاہیئے ؟

جواب: مریض سے دعاکروانی چاہیئے کہ اس سے دعاکروانافرشتوں کی دعاکی طرح ہے ۔

سوال: اِس ہفتے کارِسالہ ” لوحِ محفوظ کے بارے میں دلچسپ معلومات “ پڑھنے یاسُننے والوں کوامیرِاہل سنت نے کیا دُعا دی ؟

عاشقانِ رسول کی دینی تحریک دعوتِ اسلامی کے تحت 13 مئی 2023ء بمطابق 23 شوال المکرم 1444ھ کی شب عالمی مدنی مرکز فیضانِ مدینہ کراچی میں مدنی مذاکرے کا انعقاد کیا گیا جسے بذریعہ مدنی چینل پاکستان سمیت دنیا بھر میں دکھایا گیاجبکہ کراچی کے مختلف علاقوں سے کثیر اسلامی بھائیوں نے براہِ راست اس مدنی مذاکرے میں شرکت کی۔

اس مدنی مذاکرے میں عاشقانِ رسول نے شیخِ طریقت امیرِ اہلِ سنت علامہ محمد الیاس عطار قادری دامت بَرَکَاتُہمُ العالیہ سے دینی و دنیاوی معاملات کے حوالے سے سوالات کئے جس کے امیرِ اہلِ سنت نے علمِ و حکمت سے بھر پور جوابات دیئے۔

ان سوال و جواب میں سے بعض درج ذیل ہیں:

سوال: اُولُوالْعزم رسول کون کون سے ہیں ؟

جواب: اُولُوالْعزم رسول 5 ہیں : پیارے آقا محمد رسول اللہ صلی اللہ علیہ واٰلہ وسلم ،حضرت ابراہیم خلیل اللہ ،حضرت موسیٰ کلیم اللہ، حضرت عیسٰی روح اللہ اورحضرت نوح نجی اللہ علیہم السلام ۔(بہارِشریعت ،1/54)

سوال:ہم نیک بننے کی کوشش کرتے ہیں مگر پھر بھی گنا ہ ہوجاتاہے ،اس کا کیا حل ہے ؟

جواب:معصوم توانبیائے کرام اورفرشتے ہیں ۔ہم عام انسان گنہگارہیں ،جب کبھی گناہ ہوجائے تو آئندہ گناہ نہ کرنے کے عزم کے ساتھ فوراً سچی توبہ کریں اور اللہ کی رحمت پر نظررکھیں ۔اس احساس ِکمتری میں مبتلاہوناکہ مَیں گنا ہ سے بچ ہی نہیں پاتا،یہ درست نہیں بلکہ دوبارہ گنا ہ ہوجائے تو پھر سچی توبہ کریں ، اِنْ شآء اللہ الکریم یہ توبہ کرنا ہمیں کبھی نہ کبھی گناہوں سے روک دے گا۔ہمیں ہمیشہ اللہ پاک کی رحمت پر نظررکھ کرگناہوں سے بچنے کی کوشش جاری رکھنی چاہیئے ۔

سوال : رمضان المبارک میں عموماً گناہوں سے بچت رہتی ہے ،عبادت میں بھی ذوق ہوتاہے ،نیکیاں کرنے کا جذبہ ملتا ہےمگر رمضان المبارک کے بعدیہ سب کچھ نہیں ملتا،نیکیاں کرتے رہنے کا جذبہ کس طرح سلامت رہے ؟

جواب : رمضان المبارک کی اپنی بہاریں ہیں ،اس میں عبادت کی طرف دل مائل ہوتاہے،گناہوں سے نفرت ہوتی ہے ،بعد میں یہ کیفیت بدل جاتی ہے ۔جب گناہ کرنے کا دل نہ کرے تو گناہ سے بچنااورجب دل کرتاہوتو اس وقت بچنادونوں میں فرق ہے ۔بہرحال دونوں صورتوں میں گناہوں سے تو بچنا ہی ہے۔گناہوں سے بچنے کے لئے دعوتِ اسلامی کے دینی ماحول سے وابستہ رہیں ،اسلامی بھائی ذیلی حلقے کے12 دینی کاموں اوراسلامی بہنیں 8 دینی کاموں میں مصروف رہیں۔اسلامی بھائی مدنی قافلے میں سفرکریں،نیک اعمال کے مطابق روزانہ جائزہ لیتے رہیں گے تو گناہوں سے بچنے کی صورتیں نکل آئیں گی ،ان شآء اللہُ الکریم ۔

سوال: اگرنیکی کی دعوت دینے کے دوران کوئی مذاق اُڑائے یا ڈانٹ دے تو اس پر ہمیں کیا کرنا چاہیئے؟۔

جواب: ایساکم ہی ہوتاہوگا۔کئی نوجوان سنجیدہ اوربڑی عمرکے لوگ سمجھدارہوتے ہیں،یہ نیکی کی دعوت سنتےہوں گے۔ اگرکوئی نوجوان مذاق اڑائے یا کوئی بوڑھا شخص ڈانٹ دے تو آپ پیچھے نہ ہٹیں بلکہ نیکی کی دعوت کاسلسلہ جاری رکھیں ۔میرے ساتھ بھی کئی واقعات ہوئے ہیں مگرمیں نے نیکی کی دعوت کاسلسلہ جاری رکھا۔کام کرنا ہے تو لوگ کمزورباتیں کرتے ہی ہیں، جیسے گاہک ایساکرے تو دکاندارمیٹھامیٹھا بنتاہے،کیونکہ اسے اپنا مال بیچنا ہے ۔ہمیں ایساہی بنناہےکیونکہ ہمیں نیکی کی دعوت کا ثواب حاصل کرناہے اوراپنی آخرت بہتربنانی ہے ۔اللہ پاک چاہے تو ایک شخص استقامت کے ساتھ دین کا کام کرے تو اس کی کوشش سے ایک گاؤں یا ایک شہرکا نقشہ ہی بدل سکتاہے ۔

سوال: اِس ہفتے کارِسالہ ” امیرِ اہلِ سنّت  سے قرآنِ پاک  کے بارے میں سوال جواب “ پڑھنے یاسُننے والوں کوجانشینِ امیرِ اہلِ سنت مدظلہ العالی نے کیا دُعا دی ؟

جواب: ‫یااللہ پاک جو کوئی17 صفحات کا رسالہ ”امیرِ اہلِ سنّت  سے قرآنِ پاک  کے بارے میں سوال جواب “پڑھ یا سُن لے،اس کے دل کو نورِ قرآن سے منوّر فرما اور اس کی بے حساب بخشش فرما ۔اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم۔

دینِ اسلام کی تعلیمات کو عام کرنے کے لئے آج رات مؤرخہ 13 مئی 2023ء کو عالمی مدنی مرکز فیضان مدینہ کراچی سے براہِ راست مدنی چینل پر ہفتہ وار مدنی مذاکرے کا انعقاد کیا جائیگا۔

مدنی مذاکرے میں شیخ طریقت امیر اہلسنت علامہ محمد الیاس عطار قادری دامت بَرَکَاتُہمُ العالیہ عاشقان رسول کی جانب سے ہونے والے سوالات کے علم و حکمت سے بھر پور جوابات ارشاد فرمائیں گے۔

تمام عاشقان رسول سے آج رات ہونے والے مدنی مذاکرے میں شرکت کرنے کی درخواست ہے۔

حضور سرورِ کائنات حضرت محمد صلی اللہ علیہ و سلم اور صحابۂ کرام علیہم الرضوان سمیت کثیر بزرگانِ دین رحمہم المبین کا یہ معمول تھا کہ وہ لوگوں کی دینی و اخلاقی تربیت کرنے اور اور انہیں دینِ اسلام کی تعلیمات دینے کے لئے دینی و علمی حلقوں کا انعقاد کیا کرتے تھے۔

اسی طریقۂ کار کو برقرار رکھتے ہوئے آج 6 مئی 2023ء بروز ہفتہ دعوتِ اسلامی کے عالمی مدنی مرکز فیضانِ مدینہ کراچی میں علمِ دین سے بھرپور مدنی مذاکرے کا انعقاد کیا جائے گا۔

تفصیلات کے مطابق مدنی مذاکرے کا آغاز بعد نمازِ عشاء تقریباً 9:15 پر تلاوتِ قراٰن سے کیا جائے گا اور نعت خواں اسلامی بھائی حضور صلی اللہ علیہ و سلم کی بارگاہِ اقدس میں نذرانۂ عقیدت پیش کرکے حاضرین کے دلوں کو منور کریں گےجبکہ کثیر اسلامی بھائی امیرِ اہلِ سنت دامت بَرَکَاتُہمُ العالیہ کے ہمراہ جلوسِ بیادِ امیرِ حمزہ رضی اللہ عنہ میں شرکت کریں گے۔

بعدازاں عاشقِ اعلیٰ حضرت، بانیٔ دعوتِ اسلامی حضرت علامہ محمد الیاس عطار قادری رضوی دامت بَرَکَاتُہمُ العالیہمدنی مذاکرے میں شریک عاشقانِ رسول کی جانب سے ہونے والے مختلف سوالات کے علم و حکمت سے بھرے جوابات ارشاد فرمائیں گے۔

واضح رہے یہ مدنی مذاکرہ عالمی مدنی مرکز فیضانِ مدینہ کراچی سے براہِ راست (Live)نشر کیا جائے گا جسے ملک و بیرونِ ملک سے کثیر عاشقانِ رسول بذریعہ مدنی چینل دیکھ سکیں گے۔(کانٹینٹ:غیاث الدین عطاری)

9  شوال المکرم 1444ھ بمطابق 29 اپریل 2023ء بروز ہفتے کی شب عاشقانِ رسول کی دینی تحریک دعوتِ اسلامی کے تحت عالمی مدنی مرکز فیضانِ مدینہ کراچی میں مدنی مذاکرہ منعقد ہوا جس میں شہرِ کراچی کے مختلف علاقوں سے عاشقانِ رسول نےفیضانِ مدینہ کراچی آکر جبکہ دیگر شہروں اور ملکوں سے کثیر اسلامی بھائی بذریعہ مدنی چینل شریک ہوئے۔

اس مدنی مذاکرے میں عاشقانِ رسول کی جانب سے مختلف موضوعات پر سوالات کئے گئے جس کے امیرِ اہلِ سنت حضرت علامہ مولانا محمد الیاس عطار قادری رضوی دامت بَرَکَاتُہمُ العالیہ نے علم و حکمت سے بھرپور جوابات ارشاد فرمائے جن میں سے بعض درج ذیل ہیں:

سوال: اگر کسی رشتہ دارکے ہاں جانے پر وہ لفٹ نہ کروائے توایسے موقع پر کیا کرنا چاہئے ؟

جواب: حُسنِ ظن(اچھا گُمان) رکھیں کہ وہ کسی ٹینشن میں ہوگاجس کی وجہ سےتوجہ نہیں دے پایا۔ہمیں اپنی طرف سے رشتہ نہیں توڑنا چاہیئے اورصبر کرنا چاہیئے ۔اگرکوئی ہمیں لفٹ نہیں کرواتاتَوہم اسے لفٹ کروائیں ،اسلام کی یہی تعلیم ہے ۔برائی کو بھلائی سے ہی تبدیل کیاجاسکتاہے ۔نجاست پانی سےہی پاک ہوتی ہے ۔ہم آج لفٹ کروائیں گے تو کل وہ بھی اچھا سلوک کرے گا۔

سوال:مہمان کے آنے پر کیا اندازہوناچاہئے،بعض اوقات لوگ اس وقت موبائل میں لگے رہتے ہیں ؟

جواب:حدیث پاک میں ہے: جواللہ پاک اور قِیامت کے دن پر ایمان رکھتا ہے تو اسے چاہیئے کہ مہمان کا اِکرام کرے ۔(بخاری، 4/105،حدیث:6019)دِین اسلام میں اس کی بہت اہمیت ہے ،مہمان آتاہےتو اپنارزق لے کرآتاہے اورجب جاتاہے تو میزبان کے گناہ بخشے جانے کا سبب بنتاہے ۔ہمیں چاہیئے کہ مہمان کی خاطرداری(آؤ بھگت) خودکریں کہ یہ حضرت ابراہیم خلیل اللہ علیہ السلام کی سنت ہے ۔ہم قدرکرنے والے بنیں تو مہمان حقیقت میں اللہ پاک کی رحمت ہے ۔ میزبان کو چاہیئے کہ مہمان کا خوش دلی کے ساتھ استقبال کیا جائے ،آؤ بھگت کرے ۔کچھ کھلاپلانہیں سکتاتو دومیٹھے بول ہی بول دے ۔ اس میں کوئی رقم نہیں لگتی ،خرچ نہیں ہوتا،اگرآپ کسی سے مسکراکرپرتپاک طریقے سے ملیں گے، حال احوال معلوم کریں گے تو اس کادل خوش ہوجائے گا ۔میزبان کو چاہیئے کہ ایسااندازاختیارکرے کہ مہمان کا دل خوش ہو۔اس کادل بجھ نہ جائےاور واپسی پر اس کے قدم بھاری نہ ہوں ۔

سوال : بات کرتے ہوئے اگر اس طرف توجہ جائے کہ یہ بات تو فضول ہے،ایسی صورت میں کیا کرناچاہیئے ؟

جواب : فوراًدُرُودشریف پڑھ لیں،ایک بارپڑھاہوا دُرودشریف ہمیں جنت میں پہنچاسکتاہے ۔ہرنیکی جنت میں لے جانے والی ہے ۔ہرگناہ جہنم میں لے جانے والاہے۔نیکی اگرچہ کتنی ہی چھوٹی ہو،اسے چھوٹاسمجھ کر چھوڑنا نہیں چاہیئے اورگناہ کتناہی چھوٹاہومعمولی سمجھ کر کرنا نہیں چاہیئے بلکہ معمولی سمجھے ہی کیوں، گناہ کومعمولی سمجھنا بھی گناہ ہے ۔ہرنیکی بندے کی عزت کوبڑھاتی ہے ،رزق میں برکت کا باعث ہوتی ہے ،ہر برائی بندے کے لئے نحوست،بے برکتی اوردنیاآخرت میں ذِلّت کے اسباب مہیاکرتی ہے ۔

سوال: ذِکرُاللہ اوردُرودشریف پڑھنے میں کامیابی پانے کے لئےکیاکرنا چاہیئے ؟

جواب: ڈیجیٹل(Digital) تسبیح لے لیں، اسے ہاتھ میں رکھیں، جب جب وقت ملے، ریاکاری سےبچ کر اللہ پاک کا ذکر اوردُرودشریف پڑھتے رہیں،یہ آپ کو فضولیات سے بچائے گا اور نیکیوں میں لگائے گا ،جب درودشریف وغیرہ کی تعداددیکھیں گےتو قلبی طورپر خوشی ہوگی ۔

سوال: پہنے ہوئے کپڑوں سے ہاتھ منہ صاف کرنا کیسا؟

جواب: اسلاف یعنی بزرگانِ دین بیان کرتے ہیں کہ پہنے ہوئے کپڑوں سے ہاتھ منہ صاف کرنے سےحافظہ کمزورہوتاہے ۔

سوال:کیا دانتوں سے ناخن کترنا بے برکتی لاتاہے ؟

جواب:اس سے برص ہونے کا اندیشہ ہے اوربے برکتی بھی آتی ہے ۔بعض لوگوں کی عادت ہوتی ہے ،اگرایساہوتو اس عادت کونکالنا ہوگا۔سنجیدہ ہوں گے تو یہ عادت نکل جائے گی ۔

سوال : برکت کاکیامعنیٰ ہے ؟

جواب : برکت کا معنیٰ ہے: جم جانایاکثرت ہونا،زیادتی خیریعنی بھلائی کا بڑھنا اوراس کا ہمیشہ رہنا برکت کہلاتا ہے، یعنی بھلائی بڑھے اس میں اضافہ ہویا بھلائی باقی رہے ۔برکت کی ایک صورت ہے کہ چیزخود ختم نہ ہو اور نہ ہی اس کا فائدہ ،کثرت توکفارکوبھی مل جاتی ہےلیکن برکت کسی کسی کو نصیب ہوتی ہے ۔بے نمازی کے پاس دولت کا زیادہ ہونا برکت نہیں بلکہ کثرت ہے ۔

سوال: اِس ہفتے کارِسالہ ” نیک بندوں کی شان “ پڑھنے یاسُننے والوں کوامیرِ اہلِ سنت مولانا محمد الیاس عطارقادری دامت بَرَکَاتُہمُ العالیہ نے کیا دُعا دی ؟

05 شعبان المعظم 1444ھ بمطابق 25 فروری 2023ء بروز ہفتہ، نواسۂ  رسول امام حسین رضی اللہ عنہ کی ولادت کے سلسلے میں دعوتِ اسلامی کے عالمی مدنی مرکز فیضانِ مدینہ کراچی میں مدنی مذاکرے کا اہتمام کیا گیا جس میں کثیر عاشقانِ رسول فیضان مدینہ کراچی میں براہِ راست اور ملک و بیرون ملک سے ہزاروں اسلامی بھائی بذریعہ مدنی چینل شریک ہوئے۔

شیخ طریقت امیراہلسنت علامہ محمد الیاس عطار قادری دامت بَرَکَاتُہمُ العالیہ نے امام حسین رضی اللہ عنہ کے متعلق گفتگو کرتے ہوئے عاشقانِ رسول کی جانب سے ہونے والے سوالات کے جوابات دیئے۔

مدنی مذاکرے کے چند سوالات مع جوابات ملاحظہ کیجئے:

سوال: حضرت امام حسین رضی اللہ عنہ حضرت فاطمۃ الزہرا رضی اللہ عنہاکے چھوٹے بیٹے ہیں یا بڑے ؟

جواب: بڑے بیٹے تو حضرت امام حسن رضی اللہ عنہ ہیں ،حضرت امام حسین رضی اللہ عنہ ان کے چھوٹےبھائی ہیں ۔

سوال:تعزیت کن الفاظ سے کرنی چاہئے ،اس طرح کہنا کیساکہ بڑاافسوس ہوا ،جبکہ حقیقت میں ایسا نہ ہو؟

جواب: مصیبت زدہ آدمی کو صبر کی تلقین کرناتعزیت ہے،یہ سنّت ہے۔(بہارِ شریعت،ج1،ص852 ماخوذاً)تعزیت کرتے ہوئے یہ الفاظ ’’بڑاافسوس ہوا‘‘اِستعمال نہ کرنا بہتر ہے،کیونکہ ہرکسی کی وفات پرہرایک کو افسوس ہونا ضروری نہیں ۔یوں کہاجائے کہ فلاں کے فوت ہونے کی خبرملی ،اللہ پاک ان کی مغفرت فرمائے ،آپ کوصبرعطافرمائے وغیرہ ۔تعزیت میں جھوٹ شامل نہ ہونے پائے ۔ لوگوں کے دکھوں اورتکلیفوں میں تعزیت کرنی چاہئے ،اسی طرح بیماری میں عیادت کی جائے ،اس سے محبتوں میں اضافہ ہوتاہےاوریہ ثواب کا کام بھی ہے ۔

سوال : کیا ماہِ رمضان میں چیزیں سستی بیچنی چاہئیں ؟

جواب :جی ہاں!ماہِ رمضان میں تمام دکانداردام(قیمت) کم کردیں ،اگرپیچھے سے کوئی چیز مہنگی ملے تو مناسب نفع رکھ لیں ،زیادہ نفع نہ لیں،ہمیں ان پر رحم کرنا چاہئے بلکہ غریبوں کو تلاش کرکے انہیں نوازیں ۔ساداتِ کرام کی خدمت کرنا اپنی سعادت سمجھیں اوراس طرح دیں کہ پتاہی نہ چلے کہ کس نے مددکی ہے ، عرب دنیا میں ماہِ رمضان میں چیزوں کی قیمتیں کم ہوجاتی ہیں ۔

سوال: کیا دوسروں کے عیب بیان کرنے کے بجائے اپنے عیبوں پر نظرڈالنی چاہئے ؟

جواب: جی ہاں !مسلمانوں کے عیب بیان کرنے کے بجائے اپنے عیبوں پرنظر رکھنی چاہئے ۔

سوال:آدھے سر درد کا کوئی روحانی علاج ارشاد فرمادیں ؟

جواب: سورۂ اخلاص(قُلْ ھُوَاللہُ اَحَدْ) ،اوّل وآخردرودشریف،1بارپڑھ کردم کریں ،یہ عمل 11 بارکرنے سے مرض چلاجائے گا۔ان شاء اللہ الکریم۔ناریل (Coconut)کا پانی پینے سے آدھے سراورپورے سرکے دردمیں کمی واقع ہوتی ہے ۔

سوال: مسجددیکھ کر کیا پڑھناچاہئے ؟

جواب: مسجدکو دیکھنااوراسے دیکھ کر درودشریف پڑھنا دونوں ثواب کے کام ہیں ۔حضرت مولیٰ مشکل کُشا،علی المرتضیٰ رضی اللہ عنہ کا فرمان ہے کہ مسجدکو دیکھ کر درودشریف پڑھناچاہئے۔

سوال: امام صاحب کوکوئی کھانادےیا چائے پلائے تو کیاانہیں یہ کھانا پینادرست ہے ؟

جواب: جی ہاں ! امام صاحب کو کھانا اورچائے وغیرہ دینا بہت ثواب کا کام ہے اوریہ کرنابھی چاہئے ۔

سوال:اس طرح کہنا کیسا ہےکہ ’’اللہ پاک ہمارے گناہوں کی سزا دنیامیں ہی دے دے ‘‘۔ ؟

جواب: یہ نہیں کہنا چاہئے، اس کے بجائے اللہ پاک سے دنیاوآخرت کی خیروسلامتی ورحمت اورعافیت کی دعاکرنی چاہئے ۔جوربّ سزادینے پر قادرہے وہ عافیت دینے پر بھی قادرہے ۔

سوال : اگرکوئی بڑی عمروالا علمِ دین حاصل کرے تو اس کے لیے کیاخوشخبری ہے ؟

جواب : علمِ دین حاصل کرنا عبادت ہے ۔2فرامینِ مصطفی (صلی اللہ علیہ والہ وسلم ):جوبچپن میں علمِ دین حاصل نہ کرسکا،وہ بڑی عمرمیں علم حاصل کرے تو اسے مرنے کے بعدشہیدکا رتبہ ملے گا۔(کنزالعمال ،10/162) خیریعنی بھلائی کی باتیں سیکھنے سے مؤمن کا دل نہیں بھرے گا یہاں تک کہ وہ آخرکار جنت میں داخل ہوجائے گا۔(سنن ترمذی 4/348) اس حدیث کی شرح کا خلاصہ یہ ہے کہ علم کے حریص کےلیے ایمان پر خاتمے کی خوشخبری ہے ۔

سوال: جسم میں کسی جگہ دردہوتو اس کا کوئی روحانی علاج ارشاد فرمادیں ؟

جواب: یَامُغْنِیْ پڑھ کر دردکی جگہ دم کرلیں ،چلتے پھرتے یَاغَنِیْ پڑھتے رہیں ۔

سوال: اِس ہفتے کارِسالہ ” نماز کی برکتیں “ پڑھنے یاسُننے والوں کو امیرِاہلِ ِسُنّت دامت برکاتہم العالیہ نے کیا دُعا دی ؟

جواب: یااللہ پاک! جوکوئی 17 صفحات کا رسالہ ”نماز کی برکتیں“ پڑھ یا سُن لے اُس کو مکّے مدینےمیں نمازیں پڑھنے کی سعادت دے اور اُس کی والدین سمیت بے حساب مغفرت فرما ۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

جشن ولادت نواسۂ  رسول، امام عالی مقام امام حسین رضی اللہ عنہ کے موقع پر 05 شعبان المعظم 1444ھ بمطابق 25 فروری 2023ء بروز ہفتہ دعوتِ اسلامی کے عالمی مدنی مرکز فیضانِ مدینہ کراچی میں مدنی مذاکرے کا اہتمام کیا گیا ہے۔

مدنی مذاکرے کا آغاز بعد نمازِ عشا رات تقریباً 8:45 پر کیا جائے گا جس میں تلاوتِ قراٰن، نعت خوانی، جلوس، بیان، دعا اور لنگر کا اہتمام ہوگا۔

شیخ طریقت امیر اہلِ سنت حضرت علامہ مولانا محمد الیاس عطار قادری ’’سیرت امام حسین رضی اللہ عنہ‘‘ کے موضوع پر سنتوں بھرا بیان فرمائیں گے اور عاشقانِ رسول کی جانب سے کئے جانے والے سوالات کے جوابات ارشاد فرمائیں گے۔ تمام اسلامی بھائیوں سے اس مدنی مذاکرے میں شرکت کی درخواست ہے۔(کانٹینٹ:رمضان رضا عطاری)

18 فروری 2023ء کی شب عالمی مدنی مرکز فیضان مدینہ کراچی میں اجتماع معراج مصطفٰے صلَّی اللہ علیہ واٰلہٖ وسلَّم کے موقع پر مدنی مذاکرے کا انعقاد کیا گیا جس میں کثیر عاشقانِ رسول فیضان مدینہ کراچی میں براہِ راست اور ملک و بیرون ملک ہزاروں اسلامی بھائی بذریعہ مدنی چینل شریک ہوئے۔

شیخ طریقت امیراہلسنت علامہ محمد الیاس عطار قادری دامت بَرَکَاتُہمُ العالیہ سفر معراج کے متعلق گفتگو کرتے ہوئے عاشقان رسول کی جانب سے ہونے والے سوالات کے جوابات دیئے۔

مدنی مذاکرے کے چند مدنی پھول ملاحظہ کیجئے:

سوال: سفرمعراج کے کتنے حصے ہیں ؟

جواب: سفرمعراج امامُ الانبیا صلی اللہ علیہ والہ وسلم کا بے مثال معجزہ ہے ،آپ صلی اللہ علیہ والہ وسلم مکۂ مکرمہ سے مسجدِاقصیٰ اورپھروہاں سے ساتوں آسمانوں اورمقام قُرب پرتشریف لے گئے ،سفرمعراج کے 3حصے ہیں: (1)پہلاحصہ اَسراء ۔رات کے تھوڑے سے حصےمیں مکۂ مکرمہ سے بیتُ المقدس کےسفرکو اَسراء کہتے ہیں۔ (2)دوسراحصہ معراج۔مسجدِاقصیٰ سے ساتوں آسمانوں تک جانے کومعراج کہتے ہیں۔ (3)تیسرحصہ اِعراج ۔آسمانوں سےآگے لامکاں تک جانے کواِعراج کہاجاتاہے۔

سوال: تہمت وبہتان لگانے کاکیا عذاب ہے ؟

جواب: تہمت و بہتان یعنی کسی میں بُرائی یاعیب نہ ہواوراس کی وہ برائی یاعیب بیان کیا جائے ۔اس کے بارےمیں وعیدہے کہ جو کسی کی ایسی بُرائی بیان کرے جو اس میں نہیں پائی جاتی تو اس کو اللہ پاک اُس وقت تکرَدْغَۃُ الْخَبال (یعنی جہنم میں وہ جگہ جہاں دوزخیوں کا پیپ جمع ہوگا)میں رکھے گا، جب تک اس کے گناہ کی سزا پوری نہ ہوجائے۔ (ابو داود،3 / 427، حدیث: 3597)

سوال : معراج میں نبیِ کریم صلی اللہ علیہ والہ وسلم کی کتنی سواریاں تھیں؟

جواب : نبی کریم صلی اللہ علیہ والہ وسلم مکۂ مکرمہ سے بیتُ المقدس بُراق پر ،بیتُ المقدس سے پہلے آسمانِ دنیاتک نُورکی سیڑھیوں پر ،وہاں سے ساتویں آسمان تک فرشتوں کے بازؤں پر،وہاں سے حضرت جبرائیل امین علیہ السلام کے بازؤں پر ،قابَ قوسین سے لامکاں تک رفر ف یعنی قدرتی تخت پر۔ اس کے بعد بغیرسواری کے تشریف لے گئے ۔

سوال: کون سامہینا آقاصلی اللہ علیہ والہ وسلم کا اور درودوسلام کا مہینا کہلاتا ہے؟

جواب: شعبا ن المعظم ۔

سوال: جب کوئی آفت آجائے مثلاً زلزلہ وغیرہ تو اس وقت کیا کرنا چاہئے؟

جواب: ہائے اوہ کرنے کے بجائے اللہ پاک کا ذکر کیا جائے،بندے کی تدبیریں ناکام ہوجاتی ہیں اوراللہ کی قدرت کے نظارے ہوتےہیں، جسے اللہ رکھے اسے کون چکھے کے مصداق معاملات سامنے آجاتے ہیں ،اس میں ہمارے لیے درس بھی ہے کہ تمہاری ٹیکنالوجی وغیرہ سب ناکام ہیں ،تم کچھ نہیں کرسکتے جب تک ربّ نہیں چاہےگا ۔ربّ چاہے گا تو سب ہوجائے گا،ربّ نہیں چاہے گاتو کچھ بھی نہیں ہوگا۔اس طرح کے واقعات سے اللہ پاک کی قدرت پر ایمان مضبوط ہوتاہے ۔

سوال: معراج کی رات اُمّتِ مصطفیٰ (صلی اللہ علیہ والہ وسلم )پر پنج وقتہ نمازفرض ہوئی ،اس کے بارے میں آپ کیافرماتے ہیں؟

جواب: پنج وقتہ (یعنی پانچوں وقت کی)نمازاُمتِ مصطفیٰ (صلی اللہ علیہ والہ وسلم )کے لیے بہت بڑی سعادت ،بہت بڑاشرف وانعام ،اللہ پاک کی نعمت اورجنت کی کنجی ہے ۔

سوال: نمازکے لیے مسجد جاتے ہوئے کیا دُوسروں کو بھی نماز کی دعوت دے کر ساتھ لیتے جانا چاہئے؟

جواب: جی ہاں ضرور!نمازِباجماعت کی دعوت دینی چاہئے ،حدیث پاک میں ہے : بَلِّغُوْا عَنِّي وَلَوْآيَةً یعنی پہنچادواگرچہ ایک ہی آیت ہو۔ہرشخص اپنی اپنی جگہ مبلغ ہے ۔جب نمازکے لیے جائیں تو دوسروں کو نمازکا کہہ کراپنے ساتھ لیتے جائیں ،یہ کہنے سے ہی ہوگا،دعوتِ اسلامی نے کام شروع کیا ،نمازکی دعوت کاسلسلہ ہواتو لاکھوں وہ لوگ جونمازنہیں پڑھتے تھے، اللہ کے کرم سے نمازی بن گئے ۔سمجھانے کا فائدہ ہوتاہے ۔جب ہم انفرادی کوشش کریں گے،ایک ایک کوسمجھائیں گے تو وہ نمازی بن جائیں گے ،جنہیں ہم نمازکی دعوت کاذہن دیں گے تو وہ بھی دیگرلوگوں کو سمجھائیں گے،یوں نمازیوں میں اضافہ ہوتا چلاجائےگا ،البتہ نمازکی دعوت دینے میں طنزاور سختی نہ کی جائے ،شفقت ،محبت اورپیارسے نماز کی دعوت دینی ہے ،اگرکوئی100بارکہنے سے بھی نمازنہیں پڑھتا تو اسے بھی نمازکی دعوت دیتے رہیں ۔اسی طرح ماہِ رمضان کے روزے رکھنے کی بھی ترغیب دلائیں ۔اسلامی بہنیں بھی نمازاورروزے کی دعوت کی تحریک جاری رکھیں ۔روزے کی اہمیت پر مکتبۃ المدینہ کے پمفلٹ حاصل کرکے تقسیم کریں ۔

سوال: اِس ہفتے کارِسالہ ” امیرِ اہلِ سنت سے زکوٰۃ کے بارے میں سوال جواب “ پڑھنے یاسُننے والوں کوجانشینِ امیرِاہلِ ِسُنّت مدظلہ العالی نے کیا دُعا دی ؟

جواب: یارَبَّ المصطفٰے! جو کوئی 17 صفحات کا رِسالہ ”امیرِ اہلِ سنت سے زکوٰۃ کے بارے میں سوال جواب“ پڑھ یا سُن لے،اُسے صَدَقاتِ واجبہ و نافلہ ادا کرنے کی توفیق عطا فرما اور اس کے مال وعمر میں برکت عطا فرما۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔