یکم نومبر 2025ء بمطابق09 جماد الاولیٰ 1447ھ کو بعد نمازِ عشا دعوتِ اسلامی کے عالمی مدنی مرکز فیضانِ مدینہ کرچی میں ہفتہ وار مدنی مذاکرے کا انعقاد کیا گیا جس میں براہِ راست اور بذریعہ مدنی چینل عاشقانِ رسول کی کثیر تعداد نے شرکت کی۔

تلاوت و نعت سے شروع ہونے والے اس مدنی مذاکرے میں شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے حاضرین و ناظرین کی جانب سے ہونے والے مختلف سوالات کے جوابات ارشاد فرمائے۔

مدنی مذاکرے میں ہونے والے بعض سوال و جواب

سوال:سوشل میڈیا پر ایک پوسٹ میں لکھا تھا کہ "پیٹ میں گیا زہر ایک جان لیتا ہے، مگر کان میں گیا زہر کئی رشتوں کی جان لیتا ہے۔"آپ اس کے بارے میں کیا فرماتے ہیں؟

جواب: اگر کسی نے کسی کو زہر کھلا دیا، یا پیٹ میں کوئی زہر چلا گیا تو ایک جان جا سکتی ہے بشرط یہ کہ وہ زہر اصلی ہو اور اس کا اثر ہو۔ لیکن کان کا زہر یعنی چغلی، غیبت، یا کسی کے خلاف کان بھرنا کئی رشتوں کی جان لے لیتا ہے۔ اس سے لوگوں میں فساد پیدا ہوتا ہے، دلوں میں نفرت آتی ہے، رشتے ٹُوٹ جاتے ہیں اور گناہوں کے دروازے کھل جاتے ہیں۔ اس اعتبار سے یہ ظاہری زہر سے کہیں زیادہ خطرناک ہے۔

سوال:کسی کی بُرائی سننا کیسا ؟

جواب:اگر کوئی کسی کے سامنے کسی کی بُرائی بیان کرنے لگے تو سننے والے کو فوراً روک دینا چاہئے۔کسی کی بُرائی سننی ہی نہیں چاہئے۔ اگر کسی طرح کان میں وہ بات پڑ ہی جائے تو جب تک شرعی ثبوت نہ ہو، اس پر اعتبار نہ کیا جائے۔بعض لوگ صرف سُنی سنائی باتوں پر ہنگامہ برپا کر دیتے ہیں۔اول تو ایسی گفتگو کرنی ہی نہیں چاہئے اور اگر کسی کی بُرائی کان میں چلی گئی ہو تو اسے آگے نہیں بڑھانا چاہئے، نہ دل میں اتارنا چاہئے۔اگر ہم حُسنِ ظن (اچھا گمان) کا جام پئیں اور مسلمانوں کے بارے میں بدگمانی سے بچیں، تو ان شآء اللہ الکریم اس میں بڑا فائدہ ہے۔کسی کے بارے میں اچھا گمان رکھنا اور اچھی سوچ اپنانا بھی ایک عبادت ہے۔ہمارے معاشرے سے اگر غیبت اور چغلی ختم ہو جائیں تو یہ معاشرہ بہترین اسلامی معاشرہ بن جائے۔غیبت ہی سے گھر تباہ ہوتے ہیں، کاروبار برباد ہوتے ہیں اور ہمسایوں میں جھگڑے پیدا ہو جاتے ہیں۔

سوال:آپ کے گھر کا نام کیا ہے؟

جواب:میرے گھر کا نام بیتِ رمضان ہے۔

سوال:آلو کی چپس کھانے کے کیا فوائد اور کیا نقصانات ہیں؟

جواب:چپس تیل میں تل کر بنائے جاتے ہیں۔ جب تیل کو بہت زیادہ گرم (کڑکڑایا) دیا جاتا ہے تو اس میں فری ریڈیکل بنتے ہیں جو صحت کے لیے نقصان دہ ہیں اور بالآخر کینسر کا سبب بن سکتے ہیں۔چپس میں نمک ڈالا جاتا ہے۔ نمک انسانی صحت کے لیے ضروری ہے مگر اس کا زیادہ استعمال نقصان دہ ہے، کیونکہ گُردوں کو زائد نمک خارج کرنے کے لیے زیادہ محنت کرنی پڑتی ہے، جس سے گُردے متأثر ہوتے ہیں۔آلو بذاتِ خود ایک سبزی ہے اس کے فوائد بھی ہیں اور نقصانات بھی۔آلو وزن بڑھاتا ہے اور شُوگر کے مریضوں کے لیے مناسب نہیں۔جو سبزیاں زمین کے اندر اُگتی ہیں وہ اکثر بادی ہوتی ہیں، اس لیے بعض لوگوں کو منع کی جاتی ہیں۔چپس میں مسالوں کا زیادہ استعمال معدے کو خراب کرتا ہے۔بعض لوگ تیکھا کھانا پسند کرتے ہیں اور زیادہ مرچ کھانے کو بہادری سمجھتے ہیں، حالانکہ یہ معدے کے السر (زخم) کا سبب بنتا ہے۔السر کا علاج نہ کیا جائے تو یہ ناسور (کینسر) بن سکتا ہے۔بازاری چیزوں میں صفائی کا خیال کم رکھا جاتا ہے اور سستا و ناقص میٹریل استعمال ہوتا ہے، اس لیے ان چیزوں کے استعمال سے حتی الامکان بچنا ہی چاہئے۔

سوال:مدنی چینل پر مکے مدینے کی محبت میں رونا، جدائی پر غم کرنا اور تڑپنا نظر آتا ہے۔ یہ غم کیوں پیدا ہوتا ہے؟

جواب:جس سے جتنی محبت زیادہ ہو، جُدا ہوتے وقت اتنا ہی رونا آتا ہے۔جیسے کوئی شخص روزگار کے لیے دو سال بیرونِ ملک جا رہا ہو تو اس کے اہلِ خانہ روتے ہوئے رخصت کرتے ہیں۔ یہ جُدائی کا رونا ہے۔اور جب وہ واپس آتا ہے تو ملاقات کے وقت خوشی کے آنسو بہتے ہیں، یہ وصال کا رونا ہے۔اسی طرح مکہ مکرمہ سے جُدائی پر رونا اس لیے ہے کہ مسلمان مکہ پاک سے محبت کرتے ہیں کیونکہ وہاں بیتُ اللہ (کعبہ شریف) ہے، جہاں اللہ پاک کی رحمتیں نازل ہوتی ہیں۔یہ وہ مقدس شہر ہے جہاں ہمارے آقا محمدِ عربی صلی اللہ علیہ والہ وسلم کی ولادت ہوئی اور آپ نے ظاہری زندگی کے 53 سال وہیں گزارے۔یہاں غارِ حرا ہے جہاں آپ صلی اللہ علیہ والہ وسلم عبادت کیا کرتے تھے اور پہلی وحی نازل ہوئی۔یہاں غارِ ثور ہے جہاں ہجرت سے قبل آپ صلی اللہ علیہ والہ وسلم نے قیام فرمایا۔ اسی طرح مدینہ منورہ وہ شہر ہے جہاں آپ صلی اللہ علیہ والہ وسلم نے سکونت اختیار فرمائی اور جہاں آپ کا جسمِ اطہر آرام فرما ہے۔یہ جگہ کعبہ، عرش، کُرسی، جنت اور بیتُ الْمَعْمُور سے بھی افضل ہے۔یوں مکہ و مدینہ دونوں شہر اپنی جگہ رحمتوں اور برکتوں سے بھرپور ہیں۔ان کی حاضری ہر کسی کے بس میں نہیں۔ بُلانا بھی اللہ کا کام ہے اور اخراجات کا انتظام بھی۔ہر باذوق مسلمان کی تمنا ہوتی ہے کہ کم از کم زندگی میں ایک بار وہاں حاضری نصیب ہو۔مدینہ نہ دیکھا تو کچھ نہ دیکھا۔جب زیارت کے بعد واپس آنا پڑتا ہے تو دل میں غم ہوتا ہے اور آنکھیں اشکبار ہو جاتی ہیں۔اگر کسی کو مدینے کی جدائی کا غم نہیں تو اسے اس پر غم کرنا چاہئے کہ اسے یہ غم کیوں نہیں۔بزرگانِ دین کی صحبت اور نیک ماحول سے یہ کیفیت پیدا ہوتی ہے۔ذکرِ مدینہ کے ساتھ سوز و گداز بھی ہونا چاہئے۔دنیا کے غم دور ہونے کی دعا کی جاتی ہے، مگر مدینے کے غم کے لیے بندہ دعا کرتا ہے کہ یہ غم بڑھتا رہے۔یہ وہ غم ہے جو دنیا اور آخرت دونوں کے غم مٹا دیتا ہے۔یہی غم جنت میں لے جانے والا ہے۔اللہ پاک ہم سب کو مکہ و مدینہ کا غم اور غمِ مصطفی صلی اللہ علیہ والہ وسلم عطا فرمائے۔

سوال:کمر نہ جھکے، اس کے لیے کیا تدبیر ہے؟

جواب:بعض اوقات بیماری، کمزوری یا عمر کے بڑھنے سے کمر جھک جاتی ہے۔بہرحال، چاہے بوڑھا ہو یا جوان، کوشش کرے کہ جھک کر نہ چلے۔میں جوانوں کو بھی سمجھاتا ہوں کہ قدرے جھک کر نہ چلیں، کیونکہ ایک بار جسم جھک گیا تو سیدھا کرنا مشکل ہو جاتا ہے۔ایک پاؤں پر وزن دے کر نہ چلیں، سیڑھی پر دونوں پاؤں سے چڑھیں۔اگر تکلیف بھی ہو تو دونوں پاؤں پر وزن برابر رکھ کر چلیں۔تکریم والے کام سیدھے ہاتھ سے کرنے چاہئیں مگر الٹے ہاتھ کو بھی کچھ نہ کچھ کام میں لاتے رہیں تاکہ وہ فعال (ایکٹو) رہے۔الٹے ہاتھ کی حرکت دل کی شریانوں کو ورزش دیتی ہے جس سے خون کی روانی بہتر ہوتی ہے۔اسی طرح دونوں ہاتھوں کو حرکت میں رکھیں۔عمر رسیدہ افراد ہلکی پھلکی ورزش کرتے رہیں، کچھ نہ کچھ اُٹھاتے رہیں، پیدل چلنے کی عادت رکھیں۔روزانہ کم از کم پون گھنٹہ(45منٹ) یا ایک گھنٹہ صبح و شام پیدل چلیں، ورنہ آدھا گھنٹہ(30منٹ) ہی سہی۔کمر پر ہاتھ رکھ کر چلنے سے بھی فائدہ ہوتا ہے مگر ہاتھ ہلاتے رہیں تاکہ پورا جسم متحرک رہے۔ایک ہی جگہ بیٹھے رہنا نقصان دہ ہے۔اگرچہ جی چاہتا ہے کہ آرام سے لیٹے رہیں مگر اس کی عادت نہ ڈالیں، ورنہ وقت اور صحت دونوں ضائع ہوں گے۔لمبے عرصے تک بستر پر رہنے سے بدن پر زخم بن جاتے ہیں جو تکلیف دہ ہوتے ہیں اور دماغ پر بھی اثر ڈالتے ہیں۔ہم لوگ لمبی عمر تو مانگتے ہیں مگر عافیت نہیں مانگتے۔بڑھاپا بھی ایک آزمائش ہے۔ اگر اس عمر میں زبان غلط استعمال کرنے کی عادت بن جائے تو آزمائش بڑھ جاتی ہے۔بوڑھوں کو خاموشی کی عادت بنانی چاہئے، ضرورت کے وقت بولیں، ورنہ مسکراہتے رہیں۔جوانوں کی خوشیوں میں شامل رہیں، بلاوجہ روک ٹوک نہ کریں تو ان کے دلوں میں محبوب رہیں گے۔

سوال: اِس ہفتے کا رِسالہ ” بے حساب مغفرت کے اعمال (قسط :1)“ پڑھنے یا سُننے والوں کو امیر اہل سنت دامت برکاتہم العالیہ نے کیا دُعا دی ؟

جواب:یااللہ پاک!جوکوئی 17 صفحات کا رسالہ ” بے حساب مغفرت کے اعمال (قسط :1)“ پڑھ یا سُن لے، اُسے ایسے اعمال کی توفیق دے کہ ایمان پر فوت ہو اور ماں باپ سمیت بے حساب مغفرت سے نوازا جائے ۔اٰمِیْن بِجَاہِ خاتم النَّبیّن صلَّی اللہ علیہ و اٰلہٖ وسلَّم ۔

اپنی اصلاح کرنے اور شریعتِ مطہرہ کی تعلیمات سے آگاہی حاصل کرنے کا ایک بہترین ذریعہ علمِ دین کی مجلس میں بیٹھنا ہے جہاں لوگوں کی دینی و اخلاقی تربیت کی جاتی ہے۔

اسی سلسلے میں 25 اکتوبر 2025ء بمطابق 02 جمادی الاولیٰ 1447ھ کو بعد نمازِ عشا دعوتِ اسلامی کے عالمی مدنی مرکز فیضانِ مدینہ کراچی میں ہفتہ وار مدنی مذاکرے کا انعقاد کیا گیا جس میں براہِ راست اور بذریعہ مدنی چینل عاشقانِ رسول کی کثیر تعداد نے شرکت کی۔

تلاوت و نعت سے شروع ہونے والے اس ہفتہ وار مدنی مذاکرے میں شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے حاضرین و ناظرین کی جانب سے ہونے والے مختلف سوالات کے جوابات ارشاد فرمائے۔

مدنی مذاکرے کے چند مدنی پھول

سوال:سوشل میڈیا میں یہ آیا تھا کہ بہترین زندگی جینے کے لیے اس حقیقت کو تسلیم کرنا پڑتاہے کہ سب کو سب کچھ نہیں مل سکتا۔آپ اس کے بارے میں کیا ارشادفرماتے ہیں ؟

جواب: ماشاء اللہ !بڑی معقول بات ہے ۔ہرچیز کی حرص کی جائے کہ یہ بھی مل جائے وہ بھی مل جائے ،تویہ نہیں ہوسکتاکیونکہ ہرچیز ہرایک کومل جائے ناممکن ہے۔ اس لیے اللہ پاک نے جتنا دیا ہے بندہ اسی پر قناعت کرے۔اسی کوکافی سمجھے،شکرگزار رہے تو پُرسکون زندگی گزارے گا۔ورنہ ٹینشن فل رہے گا اوراس کا ٹینشن کبھی بھی ختم نہیں ہوگا۔

سوال: بعض لوگ نیاکاروبارشروع کرتے ہیں تو اس میں نقصان کی وجہ سے پہلے سال میں ہی وہ کاروباربندکردیتے ہیں،اس کا کیا حل ہے، مزیدکاروبارمیں ترقی کے لیے کیا کرنا چاہئے؟

جواب: بندہ اللہ پاک پرتوکل کرے اوریہ یقین رکھے کہ جو میرے مقدرمیں ہے وہ مل کررہے گااورجتنا مقدرمیں ہے اتنا ہی ملے گا،نہ اس سے زیادہ ملے گااورنہ ہی کم ملے گا۔بندے کو معلوم نہیں کہ میرے مقدرمیں کتنا ہے اس لیے وہ ہاتھ پاؤں مارتاہے اور اس حرج بھی نہیں ۔ دنیاوی طورپر کاروبارمیں کامیابی نہ ہونے کی بھی کئی وجوہات ہیں مثلا کئی دوکاندارغصے والے ہوتے ہیں یاگاہکوں کی جانب کم توجہ کرتے ہیں یا ان کا رویہ ان کے ساتھ اچھا نہیں ہوتا،اسی طرح ایک ہی گاہک سے ساراکمالینا چاہتے ہیں ،اس لیے ناکام ہوجاتےہیں۔ اگرگاہکوں سے حسن اخلاق سے پیش آئیں گے ،کتنا ہی کم نفع ہوکسی گاہک کوجانے نہیں دیں گے توکاروبارمیں برکت ہوگی ۔کچھ لوگ جلدبازہوتے ہیں وہ چاہتے ہیں کہ راتوں رات امیرہوجائیں تو ایساہوتانہیں، کاروبارمیں استقامت کی حاجت ہے، کاروباربندکرنے کے بجائے غورکرتارہے کہ کس طرح یہ اچھا ہوسکتاہے ۔عموما ًکاروبارآہستہ آہستہ جمتاہے۔سچی بات یہ ہے کہ یہ سب مقدرسے ہی ہوگا۔

سوال: کسی نے دوسرے سے ادھارلیا ،ادھارلیتے وقت دینے کی نیت تھی مگراپنی محتاجی کی وجہ واپس نہیں کرپا رہا تو کیا وہ قرض دینے والے سے کہہ سکتاہے کہ مجھے معاف کردو؟

جواب : اگرواقعی ہی وہ محتاج ہے اس میں قرض واپس کرنے کی طاقت نہیں ہے تو وہ قرض دینے والے سے معاف کرنے کی درخواست کرسکتاہے ۔قرض دینے والے پر تنگدست کو مہلت دینے کا حکم ہے ،چاہے تو مہلت دے اورچاہے تو معاف کردے۔کربھلا،ہوبھلا۔ورنہ بندہ ٹینشن میں رہتاہے اورٹینشن کی وجہ سے بندے کا ہارٹ فیل ہوسکتاہے۔معاف کرنے کے لیے بھی جگرا چاہئے ۔مال کی محبت اس طرح چپکی ہوتی ہے کہ جان چھوڑتی ہی نہیں ۔بندے کوچاہئے کہ وہ آخرت پر نظرکرے کہ مَیں معاف کروں گا تو اللہ میرے گنا ہ معاف کرے گا۔عفو و دَرگُزرسے کام لینا مفیدہے قرآن وحدیث میں اس کی فضیلت وترغیب موجودہے ۔معاف کرناسنت مصطفیصلی اللہ علیہ والہ وسلم ہے۔

سوال: کیا آپ نے بھی کاروبارکیا ہے ؟

جواب: جی ہاں !مَیں بیوپاری ہوں ،کئی لوگوں نے میرامال کھا لیا ،ان پر میری رقمیں آتی تھیں، انہوں نے واپس نہیں کیں۔مَیں نے سب کو معاف کردیا ہے ۔اللہ کا کرم ہے مَیں آپ کے سامنے بیٹھا ہوں، کھاتاپیتاہوں ،میرے بال بچے ہیں ۔دونوالے بچ ہی جاتے ہیں۔کہاجاتاہے کہ رب بھوکا اٹھاتاہے بھوکا سلاتانہیں ہے۔ظاہر ہےمَیں لوگوں سے لڑائی جھگڑے اورماردھاڑ کرتاتو یہاں نہ بیٹھا ہوتا۔بُرا آدمی اپنی بُرائی کو کچھ عرصے کے لیے چھپا بھی لے تو ایک دن اس کی برائی ظاہر ہوہی جاتی ہے اوروہ بدنام ہوجاتاہے ۔اللہ کا کرم ہے کہ اس نے بھرم رکھا ہواہے ۔

سوال: ہمیں دنیا میں کس طرح رہنا چاہئے ؟

جواب: دنیا میں اس طرح رہیں کہ آخرت کا نقصان نہ ہو۔ہمیں دنیا میں رہتے ہوئے آخرت کی تیاری کرنی ہے ۔دنیا وہ بری ہے جس سے آخرت کو نقصان پہنچے ۔ بندہ دنیا کے کام گناہوں سے بچ کر کرتارہے گا تو آخرت کا نقصان نہیں ہوگا۔ نیک کام جو ہزاروں ہیں ،انہیں کرکے ہم اپنی آخرت بناسکتے ہیں ۔

سوال: نکاح مسجدمیں کرناچاہئے یا شادی ہال میں ؟

جواب:مسجدمیں نکاح مستحب ہے،اس لیے مسجدمیں نکاح کرنا شادی ہال میں نکاح سے بہترہے مگرمسجدکے آداب کا خیال رکھنا ضروری ہے ۔مسجدمیں شورکیا،چوپال لگایا، قہقے بلند کئے، دنیا کی باتیں اوربحثیں کیں، بہت چھوٹے بچوں کو لائے جو مسجدمیں بھاگتے اور شور کرتے رہے ۔ پھول کی پتیاں مسجدمیں گرائیں جس سے مسجدمیں داغ دھبے ہوئے ،یہ سب کام غلط کئے۔اگران ساری چیزوں سے بچ کر مسجدمیں نکاح کیا تو مستحب ہےورنہ نہیں ۔

سوال : کیاہرانارمیں جنت کا دانا بھی ہوتاہے ؟

جواب : جی ہاں اس طرح کی راویت ہے ۔صحت کے موافق ہوتو اَنارکھا ناچاہئے،انارکے اندر(دانوں کے درمیان)جوپردہ ہوتا ہے اُسے بھی کھا لینا چاہئے ۔یہ پیٹ کے لیے مفیدہے۔اللہ پاک مدینہ منورہ کا انارکھلائے۔علاج کے لیے کوئی چیز کھائیں تو اپنے طبیب سے مشورہ ضرورکرلیں ۔

سوال: نہر زُبیدہ کہاں ہے اوراسے کس نے بنوایا تھا ؟

جواب: نہرزُبیدہ مکہ مکرمہ میں ہے۔ اسے ہارون الرشیدہ کی بیوی ملکہ زُبیدہ نے تعمیرکروایاتھا ۔حاجیوں کو منٰی شریف میں پانی کی قلت کے مسائل رہتے تھے ، ملکہ زبیدہ نے اس تکلیف کو دورکرنے کے لیے خیرخواہی ِاُمّت کی نیت سے اس نہرکی تعمیرکروائی ۔مرنے کے بعد کسی نے اسے خواب میں دیکھ کر پوچھا کہ اللہ پاک نے تیرے ساتھ کیا معاملہ فرمایا ،جواب دیا کہ نہرزُبیدہ کے لیے جنہوں نے چندہ دیا ،اللہ پاک نے ان کواَجْردیا مجھے یہ نہر بنانے کی نیت پر بخش دیا ۔

سوال: بعض لوگ کوئی انہونی بات ہوجاتی ہے تو کہتے ہیں کہ معجزہ ہوگیا ،کیا یہ کہنا درست ہے ؟

جواب: یہ نہیں کہنا چاہئے معجزہ تو نبی سے بعدِ اعلانِ نبوت ہوتاہے ،اس کے بجائے یہ کہہ دیا جائے کہ کرشمہ ہوگیا ۔

سوال: علامہ ابن حجرمکی کو ابن حجرکیوں کہتے ہیں ؟

جواب: علامہ ابن حجرمکی رحمۃ اللہ علیہ بہت بڑے محدث یعنی حدیث پاک کا علم رکھنے والے تھے،ان کے آباء و اَجداد میں ایک بزرگ بہت کم بولتے تھے،اس وجہ سے انہیں حجریعنی پتھرکہا جاتا تھا ۔اُن کی وجہ سے علامہ ابن حجر کی یہ نسبت ہے ۔

سوال: اِس ہفتے کارِسالہ ” اچھی گفتگو کیجئے (قسط: 1) “ پڑھنے یاسُننے والوں کو امیراہل سنت دامت برکاتہم العالیہ نے کیا دُعا دی ؟

جواب: ياربَّ المصطفٰے ! جو کوئی 17 صفحات کارسالہ ” اچھی گفتگو کیجئے (قسط: 1)“ پڑھ یاسُن لے اُسے سنت کے مطابق بات چیت کرنا آجائے اور اُس کی ماں باپ سمیت بے حساب مغفرت ہو۔اٰمِیْن بِجَاہِ خاتَم ِالنَّبیّٖن صلَّی اللہ علیہ واٰلہٖ وسلَّم

اپنی اصلاح کرنے اور شریعتِ مطہرہ کی تعلیمات سے آگاہی حاصل کرنے کا ایک بہترین ذریعہ علمِ دین کی مجلس میں بیٹھنا ہے جہاں لوگوں کی دینی و اخلاقی تربیت کی جاتی ہے۔

اسی سلسلے میں 18 اکتوبر 2025ء کو بعد نمازِ عشا دعوتِ اسلامی کے عالمی مدنی مرکز فیضانِ مدینہ کراچی میں ہفتہ وار مدنی مذاکرے کا انعقاد کیا گیا جس میں براہِ راست اور بذریعہ مدنی چینل عاشقانِ رسول کی کثیر تعداد نے شرکت کی۔

تلاوت و نعت سے شروع ہونے والے اس ہفتہ وار مدنی مذاکرے میں شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے حاضرین و ناظرین کی جانب سے ہونے والے مختلف سوالات کے جوابات ارشاد فرمائے۔

مدنی مذاکرے کے چند مدنی پھول

سوال: سوشل میڈیا پر یہ پوسٹ وائرل ہوئی ہے کہ ہمیں تو دنیا میں رہ کر آخرت کمانی تھی، مگر ہم دنیا میں رہ کر دنیا کمانے لگ گئے ۔ آپ اس بارے میں کیا فرماتے ہیں؟

جواب: بے شک اللہ پاک نے ہمیں دنیا میں اپنی عبادت کے لیے بھیجا ہے۔ ہمیں چاہئے کہ ہم اللہ پاک کی عبادت کریں اور اللہ و رسول صلی اللہ علیہ والہ وسلم کی فرمانبرداری میں زندگی گزاریں۔ اگر ایسا نہ کیا تو اللہ و رسول کی ناراضی اور آخرت کے عذاب میں مبتلا ہونے کا خطرہ ہے۔ لہٰذا ہمیں چاہئے کہ گناہوں سے سچی توبہ کریں اور اپنی زندگی اللہ و رسول صلی اللہ علیہ والہ وسلم کو راضی کرنے کی کوشش میں گزاریں۔

سوال: اگر کسی کا حجِ بدل کروانا ہو تو کس کا انتخاب کیا جائے؟

جواب: عموماً لوگوں کو حجِ بدل کے مسائل کا علم نہیں ہوتا، اس لیے بہتر یہ ہے کہ کسی نیک، دیانت دار اور عالمِ دین کا انتخاب کیا جائے جو حجِ بدل کے مسائل کو سمجھتا ہو، مطالعہ رکھتا ہو اور اسے صحیح طریقے سے ادا کر سکے۔ دعوتِ اسلامی کے شعبہ حج و عمرہ کے ذریعے بھی حجِ بدل کروایا جاسکتا ہے، جہاں سے دارالافتاء اہلِ سنت کے مدنی علمائے کرام اور مبلغین کو بھیجا جاتا ہے۔(نوٹ:شعبہ حج و عمرہ کے ان آفیشل نمبرز سے صبح 09:00 تا رات 10:00بجے مزید معلومات حاصل کی جاسکتی ہیں۔0370-5065072***0370-0032626)

سوال: بعض لوگوں پر حج فرض ہوتا ہے مگر وہ عمرہ کر لیتے ہیں اور حج میں سستی کرتے ہیں،ان کےبارے میں آپ کیا فرماتے ہیں؟

جواب: یقیناً حج میں کچھ مشقت ضرور ہوتی ہے، مگر اس میں لطف و لذت بھی بے حد ہے۔ عمرہ چونکہ آسان ہے، اس لیے نازک مزاج لوگ حج سے محروم رہ جاتے ہیں۔ یاد رکھیں ! جس پر حج فرض ہو اور وہ ادا نہ کرے تو اس کے بُرے خاتمے یعنی بُری موت سے مرنے کا خطرہ ہے۔ حج جنت میں لے جانے والا عمل ہے، لہٰذا ہمیں چاہئے کہ حج سمیت وہ تمام اعمال کریں جو ہمیں جنت میں داخل کرنے والے ہیں۔

سوال: کیا اپنی چیزوں کو اپنی ہی نظر بھی لگ سکتی ہے؟

جواب: جی ہاں، اپنی چیزوں کو اپنی نظر بھی لگ سکتی ہے۔ اگر کوئی چیز پسند آجائے تو مآ شاء اللہ یا بارَک اللہ کہنا چاہئے، اس سے نظر نہیں لگے گی۔ نظر عموماً تعجب یا تعریف کے ساتھ دیکھنے سے لگتی ہے۔ اگر اپنے آپ کو آئینے میں دیکھ کر اچھا لگے تو بھی مآ شاء اللہ کہنا چاہئے۔ انسان کی اپنے آپ کو، اپنی چیزوں، اولاد یا والدین کو بھی نظر لگ سکتی ہے۔

سوال: جب کسی کے ساتھ بھلائی کریں تو نیت کیا ہونی چاہئے؟ اور اگر وہ شخص بدلے میں بھلائی نہ کرے تو کیا کرنا چاہئے؟

جواب: بھلائی ہمیشہ اللہ پاک کی رضا کے لیے کرنی چاہئے، نہ کہ کسی کے بدلے یا تعریف کی خواہش میں۔ اگر دوسرا شخص بدلے میں اچھا سلوک نہ کرے تو ہمیں رنجیدہ نہیں ہونا چاہئے، کیونکہ حقیقی بدلہ اورصِلہ تو اللہ پاک ہی عطا فرماتا ہے، جو بندہ ہرگز نہیں دے سکتا۔ اس لیے نیک عمل جاری رکھیں۔ کہا گیا ہے کہ جس کا عمل ہو بے غرض ہو، اُس کی جزا کچھ اور ہے!!!۔

سوال: اِس ہفتے کا رِسالہ ”حضرت بایزید بسطامی“ پڑھنے یا سُننے والوں کو امیر اہل سنت دامت برکاتہم العالیہ نے کیا دُعا دی ؟

جواب: یا اللہ پاک! جو کوئی 17 صفحات کا رسالہ”حضرت بایزید بسطامی“ پڑھ یا سُن لے ،اُسے ہمیشہ اپنے نیک بندوں سے محبت کرنے والا بنا اور اس کو ماں باپ سمیت بے حساب بخش دے۔ اٰمِیْن بِجَاہِ خاتم النَّبیّین صلَّی اللہ علیہ واٰلہٖ وسلَّم

04 اکتوبر 2024ء بمطابق 11 ربیع الاوّل 1445ھ کو عالمی مدنی مرکز فیضانِ مدینہ کراچی میں بڑی گیارہویں شریف کے موقع پر عظیم الشان ”اجتماع غوثیہ“ کا انعقاد کیا گیا جس میں کثیرتعداد میں عاشقانِ رسول براہِ راست اور ہزاروں اسلامی بھائی مدنی چینل کے ذریعے دنیا بھر میں شریک تھے۔

اجتماعِ پاک آغاز تلاوتِ قرآن، ہدیۂ نعت اور منقبت سے ہوا جس کے بعد مرکزی مجلس شوریٰ کے نگران مولانا حاجی محمد عمران عطاری مُدَّ ظِلُّہُ العالی نے سنتوں بھرا بیان کیا۔ اجتماع میں مدنی مذاکرے کا سلسلہ ہوا جس میں عاشقِ غوثِ اعظم شیخ طریقت امیر اہلسنت حضرت علامہ محمد الیاس عطار قادری دامت بَرَکَاتُہمُ العالیہ نے سیرت غوث اعظم رحمۃُ اللہِ علیہ اور آپ کی دینی خدمات پر گفتگو کرتے ہوئے عاشقانِ رسول کی جانب سے ہونے والے سوالات کئے جوابات ارشاد فرمائے۔

مدنی مذاکرے میں ہونے والے چند سوال و جواب

سوال: حضورغوث ِاعظم رحمۃ اللہ علیہ کے اس فرمان ”میرایہ قدم تمام اولیائے کرام کی گردن پر ہے“ کی کچھ تفصیل بیان فرمادیں۔

جواب: حضرت شیخ عبدالقادرجیلانی ،غوثِ صمدانی ،قطبِ ربّانی ،محبوبِ سبحانی، شہنشاہِ جیلانی ،حسنی حسینی رحمۃ اللہ علیہ نے بغدادِمعلیٰ میں اپنےمنبرپریہ اعلان کیاتھا : قَدَمِیْ ھٰذِہٖ عَلٰی رَقَبَۃِ کُلِّ وَلِیِّ اللہِ یعنی میرایہ قدم تمام اولیائے کرام کی گردن پر ہے ۔(بہجۃالاسرار، ص14)مجلس میں موجوداوردیگردُوردرازکے بے شمار اولیائے کرام نے اپنی گردن جھکالی ۔کیونکہ حضورغوثِ اعظم کا بیان ریلے(Relay) ہوتاتھا اور اولیائے کرام روحانی کنکشن سے سُنا کرتے تھے ۔جنہوں نےآپ کے فرمان پر گردن نہ جھکائی ان کی ولایت چھن گئی پھر توبہ کی اور غوثِ پاک کی فضیلت کو مانا تو ان کی ولایت بحال ہوگئی ۔حضرت عددی بن مسافررحمۃ اللہ علیہ فرماتے ہیں کہ حضورغوثِ پاک نے یہ اعلان اللہ پاک کے حکم سے کیاتھااورکسی نے نہیں کیا یعنی یہ حضور غوث ِپاک کی خصوصیت ہے ۔

سوال : حضرت عدی بن مسافرکون تھے ؟

جواب : حضرت عدی بن مسافررحمۃ اللہ علیہ بہت بڑے ولی اللہ ،متقی اورپرہیزگاربزرگ تھے ،حضور غوثِ پاک ان کے بارے میں فرماتے ہیں: اگرنبوت ریاضت ومجاہدے سے حاصل ہوتی تو حضرت عدی بن مسافرنبی ہوتے ۔مگریادرکھئے! نبوت ریاضت سے نہیں اللہ پاک کے فضل سے ملتی ہے اورنبوت کا دروازہ بندہوگیا ہے۔ہمارے پیارےآقاصلی اللہ علیہ والہ وسلم آخری نبی ہیں ۔

سوال:کیا ولایت مل کر چھن بھی سکتی ہے ؟

جواب:جی ہاں! ولایت مل کر چھن بھی سکتی ہے اور واپس بھی ہوسکتی ہے البتہ نبوت واپس نہیں ہوتی،نبوت کو زوال مانناکہ نبوت ملی اورپھر واپس چلی گئی ،یہ کفرہے ، اللہ پاک نے جس کو نبی بنایاوہ ہمیشہ ہمیشہ کے لیےنبی ہے ۔ہمارےپیارےآقاصلی اللہ علیہ والہ وسلم اللہ پاک کےآخری نبی ہیں ،ان کے بعد کوئی نیا نبی نہیں آئے گا۔حضرت عیسی علیہ السلام آسمانوں سے زمین پر آئیں گے مگرانجیلِ مقدس کی تبلیغ نہیں فرمائیں گے بلکہ قرآن پاک کی تبلیغ فرمائیں گے ۔پیارے آقاصلی اللہ علیہ والہ وسلم کے اُمتی کی حیثیت سے سنتیں عام کریں گے۔

سوال: حضور غوث ِاعظم رحمۃ اللہ علیہ کا عمل کیساتھا ؟

جواب: آپ کا ہرعمل اللہ ورسول کی اطاعت میں ہوتاتھا ،آپ تمام کام اللہ پاک کے حکم سے کیا کرتے تھے ۔

سوال: جنت کب تک رہے گی ؟

جواب: جنت ہمیشہ کے لیےرہے گی ،جس کو ایک مرتبہ جنت میں داخل کردیا گیا تو اسے پھر نکالانہیں جائے گا۔

سوال:حضورغوث اعظم رحمۃ اللہ علیہ کا مسلمانوں کے ساتھ اخلاقی رویہ اورخیرخواہی کا اندازکیساتھا؟

جواب: حضورغوث اعظم رحمۃ اللہ علیہ کا اخلاق نہایت ہی عمدہ تھا،ملنسارطبیعت ،نرم انداز،شفقت، حیا،مہمان نوازی ،مساکین پر مہربانی،سخاوت، بے حیائی وبیہودہ باتوں سے دُوری،اپنی ذات کے لیے غصہ نہ کرنا ،رقیق القلب یعنی نرم دل والے اوراس جیسی وہ تمام صفات موجودتھیں جس سے لوگ متاثرہوتے اورقریب آتے ہیں ۔حدیث پاک کہ وَبَشِّرُوا وَلَا تُنَفِّرُوا یعنی خوش خبری دواور لوگوں کو متنفر نہ کرو۔(صحیح مسلم ،حدیث 4525) پر عمل کرتے ہوئے آپ لوگوں کو بشارتیں یعنی خوشخبریاں دیا کرتے تھے۔

سوال: غوث پاک رحمۃ اللہ علیہ کے کتنے بھائی اوربہنیں تھیں ؟

جواب : آپ کے ایک بھائی سیداحمد جیلانی تھے۔یہ غوث پاک سے ایک سال چھوٹے تھے ،جوانی میں فوت ہوئے اورجیلان میں دفن کئے گئے۔

(فتاویٰ شارح بخاری ،جلد2،صفحہ 134)

سوال: اِس ہفتے کارِسالہ ” 25 ارشاداتِ غوثِ اعظم “ پڑھنے یاسُننے والوں کوامیراہل سنت دامت برکاتہم العالیہ نے کیا دُعا دی ؟

جواب: یااللہ پاک! جو کوئی رسالہ’’25 ارشاداتِ غوث اعظم“ پڑھ یا سُن لے، اُسے فیضانِ غوثِ اعظم سے مالا مال فرما اور اُس کو ماں باپ سمیت بے حساب بخش دے ۔اٰمِیْن بِجَاہِ خاتم النَّبیّین صلَّی اللہ علیہ واٰلہٖ وسلَّم ۔

اپنی اصلاح کرنے اور شریعتِ مطہرہ کی تعلیمات سے آگاہی حاصل کرنے کا ایک بہترین ذریعہ علمِ دین کی مجلس میں بیٹھنا ہے جہاں لوگوں کی دینی و اخلاقی تربیت کی جاتی ہے۔

اسی سلسلے میں 06 ستمبر 2025ء بمطابق 13 ربیع الاوّل 1447ھ کو بعد نمازِ عشا دعوتِ اسلامی کے عالمی مدنی مرکز فیضانِ مدینہ کرچی میں ہفتہ وار مدنی مذاکرے کا انعقاد کیا گیا جس میں براہِ راست اور بذریعہ مدنی چینل عاشقانِ رسول کی کثیر تعداد نے شرکت کی۔

تلاوت و نعت سے شروع ہونے والے اس ہفتہ وار مدنی مذاکرے میں شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے حاضرین و ناظرین کی جانب سے ہونے والے مختلف سوالات کے جوابات ارشاد فرمائے۔

مدنی مذاکرے کے چند مدنی پھول

سوال: دعوتِ اسلامی کے دِینی ماحول میں” عقیدہ ٔختم نبوت کورس“ کروایا جاتاہے،اس کورس کے بارے میں آپ کیا فرماتے ہیں؟

جواب: عقیدۂ ختمِ نبوت کورس ایک خاص(Unique) کورس ہے ،یہ دعوتِ اسلامی کی برکت ہے ۔بچے بچے کو یہ بات گھول کر پلانی ہے کہ ہم سب سے آخری نبی صلی اللہ علیہ والہ وسلم کی اُمّت ہیں۔ اَب کو ئی نیا نبی نہیں آئے گا ۔یہ فائنل فائنل اورفائنل ہے ،نیانبی آنے کی بالکل ہی گنجائش نہیں۔ ہاں! حضرت عیسی علیہ السلام قیامت کے قریب تشریف لائیں گے مگروہ نئے نبی نہیں ہیں ۔اس وقت آسمانوں پر تشریف فرماہیں ۔یہ زمین پر آکر انجیلِ مقدس کی تعلیمات عام نہیں کریں گے ،قرآن پاک اوردین اسلام کی تعلیمات یعنی سنتِ رسول (صلی اللہ علیہ والہ وسلم) عام کریں گے ۔اس کورس کا کم ازکم فائدہ یہ ہے کہ عقیدۂ ختم نبوت مضبوط ہوجاتاہے ،مزید دعوتِ اسلامی کے تحت کورس میں شرکاء ایک ماہ ،12ماہ کے قافلوں میں سفرکی نیت بھی کرتے ہیں ۔

سوال: مدنی مرکز فیضانِ مدینہ فیصل آباد میں” ٔختمِ نبوت کورس“کرنے والوں کی رہنمائی فرمائیں کہ وہ اپنی اچھی نیتوں پر استقامات کیسے حاصل کریں ؟

جواب: اچھی نیتوں پراستقامت کے لیے انہیں یاد رکھا جائے ،یاد کروایا جائے،ذہن بناتے رہیں کہ یہ کام مجھے کرنا ہے ۔بندہ جوکام مسلسل کرتارہے تو اس کام کا عادی ہوجاتاہے ۔کبھی کبھی کرے تو استقامت مشکل ہوجاتی ہے ، جیسے ا حافظ قرآن، روزانہ قرآن ِ کریم یادکرتارہے گا تو حافظ رہے گا ورنہ اسے قرآن پاک بھلادیا جائے گا۔حفظِ قرآن کرنا آسان ہے مگراسے حفظ رکھنا مشکل ہے ۔حافظ صاحب قرآن پاک روزانہ پڑھتے رہیں، زہے نصیب! روزانہ ایک منزل تلاوت کریں ،گویا ان کے لیے سواری تیارہے ،بیٹھیں اورسفرشروع۔اگرایک منزل نہیں پڑھ سکتے تو کم ازکم ایک پارے کی تلاوت کسی صورت نہ چھوڑیں۔ غیرحافظ کوبھی روزانہ 1پارہ پڑھناچاہئے ،ایک مہینے میں ایک ختم قرآن کرلیں تو کیا بات ہے ۔

سوال: اگرکسی نے بچپن میں قرآنِ کریم نہ پڑھاہوتو وہ کیا کرے ؟

جواب: ایک مسلمان کے لیے یہ کہنا تو عجیب ہے کہ قرآنِ پاک دیکھ کر بھی پڑھنا نہیں آتا۔ لوگ دنیاوی تعلیم کے اعتبارسے پڑھے لکھے کہلواتے ہیں مگرقرآن پاک دیکھ کر بھی پڑھنا نہیں آتا ،کیا انہیں پڑھا لکھاکہا جاسکتاہے؟اصل پڑھالکھا تو وہی ہے جو قرآن پڑھنا جانتاہو اورحدیثیں جانتاہو۔ہرمسلمان کو قرآن پاک پڑھنا سیکھنا چاہئے ، مخارِج کے ساتھ دُرست قرآنِ کریم پڑھنے کے لیے اسلامی بھائی دعوت اسلامی کے مدرسۃ المدینہ بالغان میں اوراسلامی بہنیں مدرسۃ المدینہ بالغات میں داخلہ لیں ۔

سوال: دعوت اسلامی کے دِینی ماحول میں ذکرِ رسول (صلی اللہ علیہ والہ وسلم )پر آپ ،خلیفۂ امیراہل سنت اوردیگرعاشقانِ رسول کی آنکھیں نم ہوجاتی ہیں ،ہم کیا کریں کہ ہمیں سوز و رِقّت اورمحبتِ رسول نصیب ہوجائے؟

جواب: اللہ پاک کی خصوصی عطاہےکہ رِقّتِ قلبی نصیب ہوجائے ۔جسے نہیں وہ عاشقانِ رسول کی صحبت اختیارکرے ،دعوت اسلامی میں لاکھوں اسلامی بھائی اوراسلامی بہنیں ہیں،یہ میرے ساتھ اتفاق کریں گے کہ پہلے پتاہی نہیں تھا کہ یہ کیا ہوتاہے ۔دعوتِ اسلامی کے دِینی ماحول میں معلوم ہواکہ عشقِ رسول میں رویا بھی جاتاہے ،مدینے شریف کی محبت میں تڑپا بھی جاتاہے ۔لوگوں میں عموماً مدینے شریف جانے کا شوق بھی نہیں ہوتا ،جیسے سکولوں میں بچوں کی چھٹیاں ہیں ،کچھ تو وہ بھی ہوتے کہ جو عمرہ اورزیارتِ مدینہ کے لیے بچوں کے ساتھ وہاں جاکرچھٹیاں گزاریں گے اورکچھ وہ ہیں جو مختلف ملکوں میں جائیں گے، ہوٹلوں میں ٹھہریں گے اورتفریحی مقامات پر جائیں گے۔مکے مدینے جانے والانیکیاں کماتاہے اورتفریحی مقامات پر جو ماحول ہے وہ سب سمجھتے ہیں، بے پردگی اور دیگرکئی ایک معاملات کی وجہ سے کئی گناہوں میں جا پڑتے ہوں گے ۔ایک تعدادہے کہ پیسے بھی ہوتے ہیں لیکن حج پر نہیں جاتے مگرجب وہ دعوت اسلامی کے دینی ماحول میں آتے ہیں اورپیسے والے ہیں تو وہ ہرسال حج کرتے ہوں گے ۔عشقِ رسول بہت بڑی نعمت ہے، جسے مل جائے وہ خوش نصیب ہے ۔ اس کے لیے بتکلف کوشش بھی کی جاسکتی ہے مَنْ جَدَّ وَجَدَ( جس نے کوشش کی اُس نے پالیا) ،جب نعت شریف پڑھی جائے تو آنکھیں بندکرکے سرکارصلی اللہ علیہ والہ وسلم کا تصورکرے ، مدینے کا تصورباندھے ،رونا نہ آئے تو رونے کی سی صورت بنائے ،بتکلف روئے کہ کس کا ذکر سُن رہا ہوں ؟کس کی بات ہورہی ہے ؟وہ اللہ پاک کےحبیب ،ساری مخلوق میں سب سے افضل ،شفیق ہیں کہ شفاعت کریں گے ،رؤف و رحیم ہیں ،پھر ان کے احسانات پر غورکرے ،یوں سوزپیداہوگا ،رِقَّت طاری ہوگی ،آنسوجاری ہوں گے ۔پہلے خشک لکڑی کی طرح ہوں گے اَب تربترہوگئے ،دعوت اسلامی کے دینی ماحول میں بہت ایسے ملیں گے ۔بلکہ عشقِ مصطفی(صلی اللہ علیہ والہ سلم )بانٹ رہے ہیں انہیں بھی عاشقِ رسول بنارہے ہیں ۔

سوال: بعض مرتبہ سوزوتڑپ ہوتی ہے مگر آنسونہیں نکلتے ،اس کی کیاوجہ ہے ؟

جواب: طبی طورپر بعض مرتبہ جسم سے آنسوختم ہوجاتے ہیں جس طرح پانی کی کمی کی وجہ سے منہ خشک ہونے لگتاہے ،عمرکی وجہ سے بھی ہوتاہے ،جس طرح بوڑھوں میں ایسا ہوتاہے وہ رو رہے ہوتے ہیں مگر ان کے آنسونہیں نکلتے ،مسورکی چھلکے والی دال میں لحمیات ہوتے ہیں ،جس سے سوز اورآنسومیں اضافہ ہوتاہے ۔ آنسونہ نکلنے میں ریا کاری سے بچت ہوجاتی ہے ۔

سوال: 7 ستمبر، یوم ِتحفظِ عقیدۂ ختم نبوت کے موقع پر آپ کیا فرماتے ہیں ؟

جواب: الحمد لله! 7 ستمبر کو یوم تحفظِ عقیدۂ ختم نبوت ہے، درخواست ہے کہ تمام تاجران 7 ستمبر کو اللہ پاک اور اس کے سب سے آخری نبی، محمدِ عربی صلی اللہ علیہ والہ وسلم کو خوش کرنے کی نیت سے ہر چیز 7% ڈسکاؤنٹ(Discount) پر سیل(Sale) کریں ۔ یا اللہ پاک! جو میری درخواست پر عمل کرے ،اُس کی روزی میں خیر و برکت دے اور انتقال کے وقت اُس کو اپنے آخری نبی صلی اللہ علیہ والہ وسلم کا دیدار نصیب فرما۔ امین بجاہِ خاتم النبیین صلی اللہ علیہ والہ و سلم

سوال: کیا ڈسکاؤنٹ(Discount) کرنے والالکھ کر بھی لگا دے ؟

جواب : جی ہاں ،یہ لکھ کرلگا دے : 7ستمبر کو یوم تحفظِ عقیدۂ ختم نبوت کے سلسلے میں یہاں سے ہر چیز 7% ڈسکاؤ نٹ پر خرید فرمائیے ۔

سوال: اِس ہفتے کارِسالہ ” امیر اہل سنت کی دُعائیں “ پڑھنے یا سُننے والوں کوخلیفہ ٔامیر اہل سنت دامت برکاتہم العالیہ نے کیا دُعا دی ؟

جواب: یا اللہ پاک! جو کوئی 33 صفحات کا رسالہ” امیر اہل سنت کی دُعائیں“ پڑھ یا سُن لے ،اُس سے اپنے پیارے حبیب صلَّی اللہ علیہ واٰلہٖ وسلَّم کے دِین کی خوب خدمت لے اور اُس کا خاتمہ ایمان پر فرما کر اُسے ماں باپ اور خاندان سمیت بے حساب بخش دے۔اٰمِیْن بِجَاہِ خاتم النَّبیین صلَّی اللہ علیہ واٰلہٖ وسلَّم

30 اگست 2025ء بمطابق06 ربیع الاوّل شریف 1447ھ کو بعد نمازِ عشا دعوتِ اسلامی کے عالمی مدنی مرکز فیضانِ مدینہ کرچی میں ہفتہ وار مدنی مذاکرے کا انعقاد کیا گیا جس میں براہِ راست اور بذریعہ مدنی چینل عاشقانِ رسول کی کثیر تعداد نے شرکت کی۔

تلاوت و نعت سے شروع ہونے والے اس مدنی مذاکرے میں شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے حاضرین و ناظرین کی جانب سے ہونے والے مختلف سوالات کے جوابات ارشاد فرمائے۔

مدنی مذاکرے میں ہونے والے بعض سوال و جواب

سوال: کیا یہ بات درست ہے کہ دنیاوی معاملات میں اختلاف جتنا بھی ہوجائے تو دوحدیں پارنہ کریں (1):کسی کے رزق پروارنہ کریں (2):کسی کی عزت کو نشانہ نہ بنائیں ؟

جواب: یہ بات درست ہے ،ان دوچیزوں پروارنہ کریں اوربھی بہت کچھ ہے جن پر وارنہیں کرنا چاہئے ،اختلاف ہو یا موافقت، کسی مسلمان کی عزت پرحملہ کرنے کی اجازت نہیں ۔رزق پر حملہ کرنا مثلاً دونوں دوکاندارہیں۔ ایک دوسرے کے گاہک نہ توڑیں،کسی کی بے عزتی کرنا یا کسی کی روزی کے لیے رکاوٹ پیداکرنا دونوں بُری حرکتیں ہیں ،ان سے ہرایک کوبچنا ہے ۔

سوال: عموماً سوشل میڈیا کا استعمال غلط اندازسے بھی ہورہا ہوتاہے ،اس بارے میں آپ کیافرماتے ہیں ؟

جواب: عموماً اس کا درست استعمال بہت کم ہے ،کسی کو اجاڑنا ہوتو اسے سوشل میڈیا کا عادی بنادیا جائے ۔بندہ اس کے استعمال میں اس طرح گم ہوجاتاہے کہ دِین اور دنیا دونوں کے کام کانہیں رہتا ،یہ بھی نشے کی طرح ہے ،بندہ آگے ہی آگے بڑھتاچلاجاتاہے کہ بعض اوقات کھانے پینے کا ہوش بھی نہیں رہتا۔ اس کے ذریعے لوگ گناہوں میں پڑجاتے ہیں ۔

سوال: نبیِ کریم صلی اللہ علیہ والہ وسلم کے درازگوش (گدھے)اور اُونٹنی کا نام کیا ہے؟

جواب : دراز گوش کا نام یعفوراوراُونٹنی کا نام قصویٰ تھا ،دونوں کو نبی کریم صلی اللہ علیہ والہ وسلم سے عشق تھا ۔

سوال: 5ربیع الاول شریف کن کا یوم شہادت ویوم عرس ہے ؟

جواب: 5ربیع الاول نواسۂ رسول، حضرت امام حسن مجتبیٰ رضی اللہ عنہ کایوم شہادت ہے، یہ نبی کریم صلی اللہ علیہ والہ وسلم کے نواسے ،حضرت امام حسین رضی اللہ عنہ کے بڑے بھائی ،جنتیوں کے سردار،سخی الاسخیا(یعنی سخیوں کے بھی سردار)مسلمانوں کی دوبڑی جماعتوں میں صلح کروانے والے اوربڑی شان والے ہیں ۔

سوال: مریضوں کے لیے خون کا عطیہ دینے کا کیا فائدہ ہوتاہے ؟

جواب: دعوت اسلامی کے شعبے FGRF کے تحت مریضوں کے لیے Blood کیمپ لگائے جاتے ہیں ،جس کو کوئی بیماری یا پرابلم نہ ہوتو تو پیارے آقاصلی اللہ علیہ والہ وسلم کی دُکھیاری اُمّت کے لیے ضرور خون کا عطیہ دیں ۔مردہر 3مہینے کے بعد خون دے سکتاہے ۔خون دینا دل کے لیے بھی مفیدہے ،آپ خون دیں گے تو بدن میں اورخون بنناشروع ہوجائے گا۔بلڈ پریشربھی کنٹرول رہتاہے اوراس سے ہارٹ اٹیک (Heart Attack)کا خطرہ کم ہوجاتا ہے ۔

سوال:آپ نےپہلابیان کہاں اورکب کیا ؟

جواب:مَیں نےدعوتِ اسلامی کے شروع ہونے سے بہت پہلے اپنی زندگی کا پہلابیان مبارک مسجد،اولڈ سٹی کراچی میں کیا ۔

سوال: اِس ہفتے کارِسالہ”محبتِ رسول صلَّی اللہ علیہ واٰلہٖ وسلَّم“ پڑھنے یاسُننے والوں کوامیراہل سنت دامت برکاتہم العالیہ نے کیا دُعا دی ؟

جواب: یاربِّ کریم! جو کوئی 17 صفحات کا رسالہ ”محبتِ رسول صلَّی اللہ علیہ واٰلہٖ وسلَّم“ پڑھ یا سُن لے، اُسے حقیقی مُحبَّتِ رسول نصیب فرما اور اُسے ماں باپ اور خاندان سمیت بے حساب بخش دے۔اٰمِیْن بِجَاہِ خاتم النَّبیین صلَّی اللہ علیہ واٰلہٖ وسلَّم

23 اگست 2025ء بمطابق 29 صفرالمظفر 1447ھ کی شب دعوتِ اسلامی کے عالمی مدنی مرکز فیضانِ مدینہ کراچی میں علمِ دین سے بھرپور مدنی مذاکرے کا انعقاد کیا گیا جس میں کراچی اور دیگر شہروں سے آئے ہوئے کثیر عاشقانِ رسول نے براہِ راست جبکہ بیرونِ ملک کے عاشقانِ رسول نے بذریعہ مدنی چینل شرکت کی۔

تلاوتِ قراٰن و نعتِ رسولِ مقبول صلَّی اللہ علیہ واٰلہٖ وسلَّم کے بعد شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے عاشقانِ رسول کی جانب سے ہونے والے سوالات کے جوابات ارشاد فرمائے اور ولادتِ مصطفیٰ صلَّی اللہ علیہ واٰلہٖ وسلَّم کے بارے میں بتایا۔

بعض سوال و جواب:

سوال: چاندنبیِ کریم صلَّی اللہ علیہ واٰلہٖ وسلَّم سے روشنی لئے ہوئے ہے ،کیا ہم اسی لئے جشنِ ولادت کے موقع پر روشنی(چراغاں) کرتے ہیں؟

جواب:یہ بات تودرست ہے کہ چاندنبی کریم صلَّی اللہ علیہ واٰلہٖ وسلَّم سے روشنی لئے ہوئے ہے جیساکہ حضرت شاہ عبدالعزیزمحدث دہلوی رحمۃ اللہ علیہ نے تحریرفرمایا ہے۔بہرحال روشنی کرنا ،لائٹیں لگانا یہ سب خوشی کے اظہارکے طریقے ہیں، جشنِ ولادت میں خوشی کرنا جائز اوربزرگوں،علماوصلحا سے ثابت ہے بلکہ حقیقت یہ کے کہ ہمیں اس موقع پر روشنی کرنا علمائے کرام نے ہی سکھایاہے۔اچھی نیت جس میں دکھاوا، رِیا وغیرہ ذاتی مفاد نہ ہو جائز طریقے سے ضرور روشنی (چراغاں) کیجئے۔اپنی عمارت، گھر، صحن اورگلیوں کو لائٹوں سے سجائیں ،اپنے دل کو توبہ ،نمازوں کی پابندی ،سنتوں پر عمل کرکے سجائیں ،چہرے کو نبی کریم صلَّی اللہ علیہ واٰلہٖ وسلَّم کی سنت ایک مٹھی داڑھی شریف رکھ کرسجائیں ۔سرکو زلفیں رکھ کر اورعمامہ شریف کا تاج پہن کرسجائیں ،بدن کو سنتوں بھرا لباس پہن کرسجائیں ،بدن کا ظاہربھی سجاناہے اورباطن بھی سجانا ہے ۔اس سال ”1500 واں جشنِ ولادت“ اس دُھوم دھام سے منانا ہے کہ شیطان کو کہیں منہ چھپانے کی جگہ نہ ملے ۔اس کے لئے دعوتِ اسلامی کے دِینی ماحول سے وابستہ ہوجائیں۔

سوال:مشاہدہ اورخبرمیں کیافرق ہے ؟

جواب:مشاہدہ یعنی دیکھنا ،خبریعنی بات جو ہم سنتے ہیں ،مشاہدہ خبرسے معتبراورزیادہ قابلِ قبول ہے ۔

سوال:سیدی اعلیٰ حضرت ،امامِ اہلسنت امام احمدرضا خان رحمۃ اللہ علیہ اپنے گھروالوں کے ساتھ کیسے تھے ؟

جواب:سیدی اعلیٰ حضرت رحمۃ اللہ علیہ ولی اللہ ،مفتیِ اسلام اورمجتہدفی المسائل تھے۔آپ کروڑوں مسلمانوں کے پیشوا ہیں۔علمائے کرام نے انہیں چودہویں صدی کا مجددلکھا ہے، ظاہرہے ان کا گھر میں کردار بھی اعلیٰ تھا ،اس لئے آپ کے بیٹے اور پوتے بھی بڑے بڑے نامور علما بنے ۔آپ کے دونوں صاحبزادے حجۃ ُالاسلام حضرت علامہ حامدرضا خان رحمۃ اللہ علیہ اورمفتی اعظم ہند مفتی محمد مصطفی رضا خان رحمۃ اللہ علیہ بہت بڑے عالم اور مفتی تھے ۔ میں اعلیٰ حضرت والا ہوں ،مجھے اعلیٰ حضرت والارہنا اورمرنا ہے ،میں مسلکِ اعلیٰ حضرت سے ہٹنے کے لئے کسی قیمت پر تیارنہیں ۔آپ سب بھی ہمیشہ اعلیٰ حضرت والے رہنا ،ان شاء اللہ الکریم دونوں جہاں میں بیڑا پارہوگا۔

سوال: کیا علم کی تعظیم کا بھی کوئی فائدہ ہے ؟

جواب:جی ہاں!علم کی تعظیم کے بہت فوائدہیں ، علامہ شمس حلوانی حنفی رحمۃ اللہ علیہ فرماتے ہیں: مجھے جو مقام ملا ہے وہ علم کی تعظیم کی وجہ سے مِلاہے، میں نے کبھی بھی کسی کاغذکو بے وضو ہاتھ نہیں لگایا ۔

سوال:ربیع الاول شریف میں سیرتِ مصطفی صلَّی اللہ علیہ واٰلہٖ وسلَّم کے بارے میں کتابیں پڑھنے کا جذبہ کیسے ملے ؟

جواب: دِل میں نبیِ کریم صلَّی اللہ علیہ واٰلہٖ وسلَّم کی محبت اُجاگرکریں ،سُستی اُڑائیں اورباوضوہوکر پڑھا کریں ۔آپ صلَّی اللہ علیہ واٰلہٖ وسلَّم کی سیرت کا مطالعہ کرنے سےمعلومات میں بے حد اضافہ ہوگا ، جتنی معلومات زیادہ ہوں گی تو اتناہی جذبۂ محبتِ رسول بھی بڑھے گا ۔

سوال:سادگی میں عظمت ہے ،سادگی کس کس میں ہے ؟

جواب:سادگی رہن سہن،لباس ،مکان ،کھانے پینےسب میں ہونی چاہیئے ۔سادگی نہ ہونے کی وجہ سے آج مہنگائی ہے ،اس لئے بزرگوں کاقول ہے کہ جوچیز مہنگی ہوجائے اسے خریدناچھوڑدیں ۔اس کے کئی فوائد ہیں مثلاً سادہ غذاکھانے والا کم بیمارہوتاہے اورمُرغَّن یعنی تیل مصالحہ والی غذاکا عادی زیادہ بیمارہوتاہے۔

سوال: 14 اگست اور 31 دسمبر وغیرہ کی راتوں میں کیااحتیاط کی جائے ؟

جواب:ہمارے ملکِ پاکستان میں 14 اگست اور 31 دسمبر کو بالخصوص رات کے وقت چھت اورسڑکوں پر نہیں آنا چاہیئے، ہوائی فائرنگ سے کوئی نقصان ہوسکتاہے۔

سوال: اِس ہفتے کارِسالہ ” اَرْبَعینِ عطاّر ^{(قسط 3)}“ پڑھنے یاسُننے والوں کوامیراہل سنت دامت بَرَکَاتُہمُ العالیہ نے کیا دُعا دی ؟

16 اگست 2025ء بمطابق 22صفر المظفر 1447ھ کو بعد نمازِ عشا دعوتِ اسلامی کے عالمی مدنی مرکز فیضانِ مدینہ کرچی میں ہفتہ وار مدنی مذاکرے کا انعقاد کیا گیا جس میں براہِ راست اور بذریعہ مدنی چینل عاشقانِ رسول کی کثیر تعداد نے شرکت کی۔

تلاوت و نعت سے شروع ہونے والے اس ہفتہ وار مدنی مذاکرے میں شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے حاضرین و ناظرین کی جانب سے ہونے والے مختلف سوالات کے جوابات ارشاد فرمائےجن میں سے بعض درج ذیل ہیں:

مدنی مذاکرے میں ہونے والے بعض سوال و جواب

سوال: ہم ہرسال اللہ پاک کے آخری نبی صلی اللہ علیہ واٰلہ وسلم کا جشنِ ولادت مناتے ہیں، اس مرتبہ 15سواں جشن ِولادت کس طرح منائیں؟

جواب:سارے گناہوں سے توبہ کرکے منائیں ،جونمازوں کی پابندی نہیں کرتے وہ نمازوں کے پابندہوجائیں ۔روزانہ 1500مرتبہ درودشریف پڑھیں ،12 جھنڈے لگاتے تھے تواس سال 15 جھنڈے لگائیں ،لائٹنگ میں اضافہ کردیں ،نفل اعمال میں بھی اضافہ کردیں۔ 12ربیع الاول کوروزہ نہیں رکھتے تھے تو روزہ رکھ لیں ،بلکہ 1ربیع الاول سے 12 تک 12 روزے رکھ لیں ۔شعبہ اصلاح اعمال کے ہاں اس موقع پر 12روزے رکھنا ممتاز،7 روزے رکھیں تو اچھا اور3 رکھیں تو مناسب درجہ ہے ۔اس موقع پردعوت اسلامی کے عاشقانِ رسول کے ساتھ کم ازکم 3دن کے قافلے میں سفرکریں ۔دعوت اسلامی والوں کا 1500 فیضانِ میلاد مساجدبنانے کا ہدف ہے،اس میں حصہ لیں ۔

سوال: مالی صدقہ کرنے کا کیافائدہ ہے ؟

جواب: مالی صدقے کے بھی اپنے فضائل اور فوائد ہیں مثلا صدقہ بَلا کےلیے رکاوٹ بن جاتاہے ۔

سوال: لفظ جہنم کا درست تلفظ کیا ہے ؟

جواب: اس کا درست تلفظ جَہَنَّم ہے یعنی لفظ نون پر زبرہے۔

سوال: کسی سے دوستی کس نیت سے کریں ؟

جواب: دوستی اللہ پاک کی رِضا کے لیے ہونی چاہئے ۔دوست اُسے بنائیں جسے دیکھ کرخدایاد آجائے ۔اس دوستی سے ہماری آخرت کی تیاری کا سامان ہو۔ دوست سےروزروزنہ ملیں ۔اللہ کے لیے دوستی ہوگی تو ثواب ملے گا اوراس کے فوائد بھی ہوں گے ۔کہاگیا ہے کہ دوست تمہارے ساتھ وفا کرے یا نہ کرے تم اس سے وفاکرتے رہو۔دوست کے بارے میں دل بڑارکھنا اوردرگزرکرناچاہئے ،اُس کی زیادتیوں اورغلطیوں کویادرکھیں گے تو خواہ مخواہ دل جلتارہے گا۔

سوال: اعلیٰ حضرت ،امامِ اہلسنت امام احمدرضا خان رحمۃ اللہ علیہ کیسے تھے؟

جواب: میرے آقااعلیٰ حضرت ولی اللہ ،پرہیز گار،متقی ،عالمِ باعمل ، مفتیِ اسلام ،بہت بڑے عالمِ دین اورنعت گو شاعرتھے ۔

سوال: اسلام نے بیٹی کوکیاعزت دی ہے ؟

جواب: اسلام نے بیٹی کو عظمت بخشی اوراس کا وقاربلندکیا ہے ۔بندہ اللہ پاک کے احکامات کاپابندہوتاہے ،بیٹاملے یا بیٹی ملے یا بے اولاد رہے، ہرحالت میں اسے راضی بارضا رہناچاہئے ۔ نبیِ کریم صلی اللہ علیہ والہ وسلم کی خدمت میں آپ کی پیاری بیٹی سیدہ خاتونِ جنت حضرت فاطمۃ الزہرارضی اللہ عنہا حاضرہوتیں تو آپ کھڑے ہوکران کی طرف متوجہ ہوجاتے ،پھراپنے پیارے پیارے ہاتھ میں ان کا ہاتھ لے کر بوسہ دیتے ،پھرانہیں اپنے بیٹھنے کی جگہ پر بٹھاتے ،اسی طرح جب آپ صلی اللہ علیہ والہ وسلم ان کےہاں تشریف لے جاتے تو حضرت فاطمہ رضی اللہ عنہابھی اسی طرح کرتیں ۔بیٹی بھی اللہ پاک کی بہت بڑی نعمت ہے ۔ بیٹی بھی اچھی اوربیٹا بھی اچھا ہے مگربیٹی فرسٹ(1st) ہے ۔نبیِ کریم صلی اللہ علیہ والہ وسلم کے ہاں بیٹوں سے پہلے بیٹی تشریف لائیں تھیں۔

سوال: اِس ہفتے کارِسالہ ” امام احمد رضا خان رحمۃ اللہ علیہ کی 25 باتیں ایک عاشق کے قلم سے “ پڑھنے یاسُننے والوں کوجانشینِ امیراہلسنت مدظلہ العالی نے کیا دُعا دی ؟

جواب: یااللہ پاک! جو کوئی 28 صفحات کا رسالہ ”امام احمد رضا خان رحمۃ اللہ علیہ کی 25 باتیں ایک عاشق کے قلم سے“ پڑھ یا سُن لے، اُسے مسلکِ اعلیٰ حضرت پر استقامت عطا فرما کر اُس کا خاتمہ بِالخیر فرما اور اُسے ماں باپ سمیت بےحساب بخش دے۔اٰمِیْن بِجَاہِ خاتم النَّبیین صلَّی اللہ علیہ واٰلہٖ وسلَّم ۔

14 اگست 1947ء کا دن پاکستان کی تاریخ کا سنہرا باب ہے۔ یہ وہ دن ہے جب لاکھوں قربانیوں، جدوجہد، عزم اور ایمان کے نتیجے میں ایک آزاد مملکت وجود میں آئی۔ یہ دن ہمیں تحریکِ آزادی کے تمام علماء، رہنماؤں اور مسلمانوں کی انتھک محنت و قربانیوں کی یاد دلاتا ہے۔ پاکستان کا قیام محض ایک جغرافیائی تبدیلی نہ تھا بلکہ یہ ایک نظریئے کی جیت تھی۔ ایک ایسا نظریہ جو برصغیر کے مسلمانوں کے لئے اپنی تہذیب، ثقافت، مذہب اور اقدار کے مطابق زندگی گزارنے کا حق مانگتا تھا۔ لاکھوں لوگ اپنا گھر بار چھوڑ کر، جان و مال کی قربانی دے کر اس پاک دھرتی تک پہنچے۔

یومِ آزادی نہ صرف خوشی کا دن ہے بلکہ یہ ہمارے لیے تجدیدِ عہد کا موقع بھی ہے کہ ہم اس وطن کو ترقی، امن اور خوشحالی کی راہ پر گامزن کریں۔ ہمیں اپنی ذمہ داریوں کو سمجھتے ہوئے پاکستان میں ناانصافی،بے حیائی، بُرے کاموں اور نفرت سے پاک کر کے امن، محبت اور بھائی چارے کا گہوارہ بنانا ہے۔

13 اگست 2025ء بروز بدھ رات 9:30 پر انتہائی منظم اور ملّی جوش و خروش کے ساتھ 78 واں یومِ آزادی منانے کے لئے عاشقانِ رسول کی دینی تحریک دعو تِ اسلامی کے تحت عالمی مدنی مرکز فیضانِ مدینہ کراچی میں ”مدنی مذاکرہ“ منعقد ہونے جارہا ہے۔

خوشی کے اس موقع پر محبِّ وطن شخصیت شیخ طریقت امیر اہلسنت بانی دعوت ِاسلامی حضرت علامہ محمد الیاس عطار قادری دامت بَرَکَاتُہمُ العالیہ مہذب انداز میں یومِ آزادی منانے، اللہ پاک کی اس نعمت کا شکر ادا کرنے، امن و محبت کے ساتھ ایک دوسرے کے ساتھ رہنے، گناہوں سے نفرت اور نیکیوں بھری زندگی گزارنے اور ایک اچھا سچا پاکستانی مسلمان بننے کے حوالے سے عاشقانِ رسول کی تربیت فرمائیں گے۔اس موقع پر عاشقانِ رسول کی جانب سے ہونے والے سوالات کے جوابات بھی دیئے جائیں گے۔ یہ مدنی مذاکرہ مدنی چینل پر بھی براہِ راست نشر کیاجائے گا۔

عاشقانِ رسول منظم انداز میں یوم آزادی منانے کے لئے اس مدنی مذاکرے میں ضرور بالضرور شرکت کریں۔

اپنی اصلاح کرنے اور شریعتِ مطہرہ کی تعلیمات سے آگاہی حاصل کرنے کا ایک بہترین ذریعہ علمِ دین کی مجلس میں بیٹھنا ہے جہاں لوگوں کی دینی و اخلاقی تربیت کی جاتی ہے۔

اسی سلسلے میں 2 اگست 2025ء بمطابق 8 صفر المظفر 1447ھ کو بعد نمازِ عشا دعوتِ اسلامی کے عالمی مدنی مرکز فیضانِ مدینہ کرچی میں ہفتہ وار مدنی مذاکرے کا انعقاد کیا گیا جس میں براہِ راست اور بذریعہ مدنی چینل عاشقانِ رسول کی کثیر تعداد نے شرکت کی۔

تلاوت و نعت سے شروع ہونے والے اس ہفتہ وار مدنی مذاکرے میں شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے حاضرین و ناظرین کی جانب سے ہونے والے مختلف سوالات کے جوابات ارشاد فرمائےجن میں سے بعض درج ذیل ہیں:

سوال: 7 صفر شریف کون سی عظیم ہستیوں کایوم عرس ہے ؟

جواب: صحابی ابن صحابی حضرت عماربن یاسررضی اللہ عنہما،شیخ الاسلام حضرت بہاؤالدین زکریاملتانی اورپیرپٹھان حضرت خواجہ سلیمان تونسوی رحمۃ اللہ علیہما۔

سوال:شجرکاری کے بارے میں آپ کیا فرماتے ہیں ؟

جواب:شجرکاری کی بہت اہمیت ہے ۔بہت سارے درخت روزانہ کاٹے جاتے ہیں ،لگائے نہیں جاتے جس کی وجہ سے ہوا میں آلودگی زیادہ ہوتی جارہی ہے ۔اس لئے ہمیں بھی درخت لگانے چاہئیں ۔

سوال : شادی میں ولیمہ اوردیگردعوت کس طرح ہونی چاہیئے ؟

جواب : شادی میں عاشقانِ رسول علمائے کرام کوبھی بلایاجائے، کم ازکم ایک تو ضرور ہوں ۔ان کی برکتیں لی جائیں، انہیں اور سادات ِکرام کو اچھی جگہ بٹھائیں ۔غریبوں کوبھی مان دیں ۔فخروتفاخر اوردکھاوامثلاً فلاں نے اتنی ڈشیں د ی ہیں تو میں اس سے بڑھ کر اتنی دوں گا وغیرہ شامل نہ ہونے دیں ۔شادی میں شریعت کے خلاف کوئی کام نہ کیا جائے ۔آج کل کئی خرابیاں شادیوں میں آگئی ہیں، شایداسی وجہ سے شادی کے بعد گھروں میں لڑائیاں ہوتی ہیں ۔

سوال : نبیِ کریم صلَّی اللہ علیہ واٰلہٖ وسلَّم کا سب سے بڑاولیمہ کون ساہوا؟

جواب : آپ صلَّی اللہ علیہ واٰلہٖ وسلَّم کا سب سے بڑاولیمہ وہ ہوا جس میں ایک بکر ی ذبح کی گئی ۔(سنن ابن ماجہ ،حدیث: 1908)

سوال: مؤمن وعدہ کرتے وقت ،چھینک اورجماہی کے وقت کیا پڑھتاہے؟

جواب: مومن وعدہ کرتے ہوئے اِن شآء اللہ ،چھینک کے وقت اَلْحَمْدُلِلّٰہ اورجماہی کے وقت لَاحَوْلَ وَلاقُوَّۃَ اِلاباللہ کہتاہے ۔

سوال: بعض بچے گھر کا کھانا نہیں کھاتے، اس کا کیا حل ہے ؟

جواب: بچے کو میٹھی گولیاں ،چاکلیٹ ،چپس وغیرہ کھانے سے بچائیں گے تووہ گھرکا کھانا،کھاناشروع کردے گا ۔ورنہ ان چیزوں کےکھانے سے بھوک ختم ہوجاتی ہے ۔ان چیزوں کے کھانے سے صحت بھی خراب ہوتی ہے۔

سوال:کینسرکی کیاوجہ ہے ؟

جواب: ایک ڈاکٹرنے بتایا تھا کہ سبزیوں اورپھلوں میں کیمیکل کھاد کے استعمال کی وجہ سے کینسر ہوتاہے ۔

سوال: کیا کھانے پینے میں بے احتیاطی کی وجہ سے امراض ہوتے ہیں ؟

جواب: 80%امراض کھانےکی وجہ سے ہوتے ہیں ۔جیسے زیادہ میٹھا کھانے سے شوگر،زیادہ تیل گھی کھانے سےکولیسٹرول ،زیادہ کھانے سے پیٹ کے امراض وغیرہ ہوتے ہیں ۔

سوال: اِس ہفتے کارِسالہ ”تفسیر نور العرفان سے 95 مدنی پھول (قسط: 6) “ پڑھنے یاسُننے والوں کوامیراہل سنت دامت بَرَکَاتُہمُ العالیہ نے کیا دُعا دی ؟

عالمی مدنی مرکز فیضانِ مدینہ، کراچی میں بروز ہفتہ کی شب یکم صفر المظفر 1447ھ بمطابق 26 جولائی  2025ء کو دعوتِ اسلامی کے زیرِ اہتمام ہفتہ وار مدنی مذاکرے کا انعقاد کیا گیا۔ اس مبارک اجتماع میں کراچی کے مختلف علاقوں سے بڑی تعداد میں عاشقانِ رسول نے براہِ راست شرکت کی جبکہ پاکستان سمیت دنیا بھر سے لاکھوں اسلامی بھائیوں نے مدنی چینل کے ذریعے آن لائن شریک ہوئے۔

اس موقع پر بانیِ دعوتِ اسلامی، شیخِ طریقت، امیرِ اہلِ سنّت حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے حاضرین و ناظرین کے سوالات کے جوابات دیئے۔ آپ نے نہ صرف شرعی و دینی مسائل کی وضاحت کی بلکہ اخلاقی، تنظیمی اور معاشرتی موضوعات پر بھی قیمتی نصیحتیں فرمائیں جو سننے والوں کے لیے مشعلِ راہ بنیں۔

مدنی مذاکرے میں ہونے والے بعض سوال و جواب

سوال: کہا جاتاہے کہ بُرےوقت کندھے پرہاتھ رکھنا خوشی کے وقت تالیوں سے زیادہ قیمتی ہوتاہے ؟ اس بارے میں آپ کیا فرماتے ہیں ؟

جواب: یہ حقیقت ہےکہ کسی کی خوشی میں ساتھ نہ دیں تو اتنا مسئلہ نہیں ہوتا،جوہمارے غم میں شریک نہ ہووہ زیادہ یادرہتاہے ،ہوسکتاہے آپ کو بھی تجربہ ہو۔دُکھ کے وقت کندھے پر ہاتھ رکھنا بڑاکارآمدہوتاہے ۔اس میں خوشی کے وقت تالیاں بجانا کہا گیا ہے ،کسی کی خوشی میں تو شامل ہونا چاہئے مگرتالیاں بجانے کی ہرگزاجازت نہیں ۔

سوال:خواب میں مدینہ کیسے دیکھیں ؟

جواب:دُرود وسلام کی کثرت کریں ،مدینۂ منورہ یادکرتےر ہیں ،جلدہی خواب میں مدینہ ٔپاک پہنچ جائیں گے ۔ان شاء اللہ الکریم ۔جن چیزوں کا ذہن میں خیال آتارہتاہے بعض اوقات وہ خواب میں بھی آجاتی ہیں ۔خواب میں دیکھنے کے بعد اللہ پاک چاہے گا تو حقیقت میں بھی مدینہ شریف پہنچ جائیں گے ۔ اس کے لیے دعا بھی کرتے رہیں اور اسباب بھی اختیارکریں ،رقم جمع کریں ،ویزہ لگوائیں اورمدینے پہنچ جائیں ۔

سوال: کوئی سوشل میڈیا میں زیادہ مشہورہوجائے اور اس کے لائیکس زیادہ ہوں تو اسے دیکھ کر اپنے آپ کوکمترسمجھنا یا اس کی ترقی دیکھ کرجلنا کیسا؟

جواب : اس پر دل جلاناتو کھوٹا(بُرا)ہے ،کسی کی سوشل میڈیا کی ترقی بعض اوقات جھوٹ بولنے اورزیادہ ایکٹنگ (Acting) کی وجہ سے ہوتی ہےاوریہ ترقی بلبلے کی طرح ہے ۔بعضوں کی ختم بھی ہوجاتی ہے۔ اس پر دل نہ جلایا جائے،اصل کامیابی توآخرت کی کامیابی ہے ،ہاں کسی نیک شخص کو دیکھ کر کُڑھنا چاہئےکہ میں نیک نہ بن سکا،اپنے عمل میں بہتری لانے کی سوچ اچھی ہے ۔

سوال: 15سویں جشن ِولادت کی تیاری کیسےکریں؟

جواب: مسجددرس /چوک درس اوردیگردینی کاموں میں 15فیصد اضافہ کریں ۔فرسٹ(1) ربیع الاول سے 12ربیع الاول تک بلکہ پورےماہ ِربیع الاول میں روزانہ 15سومرتبہ درودپاک پڑھیں ۔کاروباری حضرات ربیع الاول میں چاندرات سے 12 ربیع الاول تک ساداتِ کرام کو 50فیصدڈسکاؤنٹ دیں ،اتنا نہ دے سکیں تو حسب ِ توفیق دے دیں ،غریبوں کو 25% ڈسکاؤنٹ دیں، باقی ہرایک کو 15% ڈسکاؤنٹ دیں ۔حفاظ ابھی سے قرآن پاک پڑھنا شروع کریں اور12 ربیع الاول تک15قرآن پاک ختم کرکے پیارے آقاصلی اللہ علیہ والہ وسلم کو ایصالِ ثواب کریں ۔اسی طرح 12 ربیع الاول تک 15سونوافل اداکرلیں ۔15غریبوں کو راشن دلادیں ، وغیرہ

سوال: ماہِ صفر میں کتنی مرتبہ سورہ اخلاص پڑھیں ؟

جواب: سیدی اعلیٰ حضرت،امامِ اہلسنت مولانا شاہ امام احمد رضا خان رحمۃ اللہ علیہ کے یومِ عرس 25صفرکی نسبت سے ماہِ صفرمیں روزانہ 25مرتبہ سورہ اخلاص پڑھیں اوراس کی کارکردگی شعبہ اصلاحِ اعمال کے ذمہ دارکو جمع کروائیں ۔

سوال: اِس ہفتے کارِسالہ ”شکر کی برکتیں“ پڑھنے یاسُننے والوں کوامیراہل سنت دامت برکاتہم العالیہ نے کیا دُعا دی ؟

جواب: یاربِّ کریم! جو کوئی 16 صفحات کا رسالہ ”شکر کی برکتیں“ پڑھ یا سن لے اُسے ہر حال میں صبر و شکر کرنےوالا بنا اور اُسے ماں باپ اور خاندان سمیت بے حساب بخش دے۔ اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم ۔

دعوتِ اسلامی کے زیرِ اہتمام ہر ہفتہ ہونے والا مدنی مذاکرہ آج بروز ہفتہ، یکم صفرالمظفر 1447ھ مطابق 26 جولائی 2025ء کو عالمی مدنی مرکز فیضانِ مدینہ کراچی میں منعقد کیا جائے گا۔ اس مدنی مذاکرے کا آغاز ان شاء اللہ رات 09:45 بجے ہوگا۔

مدنی مذاکرے میں بانی دعوتِ اسلامی، شیخِ طریقت، امیرِ اہلِ سنت حضرت علامہ مولانا محمد الیاس عطّار قادری دامت بَرَکَاتُہمُ العالیہ خصوصی شرکت فرمائیں گے۔ اس روحانی اجتماع میں دینی و اصلاحی موضوعات پر سیر حاصل گفتگو کی جائے گی نیز شرکا کی جانب سے پوچھے گئے سوالات کے جوابات بھی دیے جائیں گے۔

عاشقان رسول سے مدنی مذاکرے میں شرکت کی درخواست ہے۔