کتابوں سے رغبت رکھنے والے اور مطالعہ کے شوقین  افراد کے لئے صوبہ بلوچستان کے شہر گوادر میں ”گوادر بُک فیسٹیول 2026ء“ کا انعقاد ہونے جارہا ہے جس میں مکتبۃالمدینہ دعوتِ اسلامی بھی اپنی تمام تر Products کے ساتھ حصہ لے گا۔

مختلف ذرائع سے ملنے والی معلومات کے مطابق یہ فیسٹیول آر سی ڈی کونسل گوادر، بلوچستان (RCD Counsil Gwadar, Balochistan) میں منعقد کیا جائے گا جوکہ 29 جنوری 2026ء سے شروع ہوکر 1 فروری 2026ء تک جاری رہے گا۔

مکتبۃالمدینہ اس فیسٹیول میں اپنی تمام Products (جن میں قراٰنِ پاک، پارہ سیٹ، اردو و انگلش قراٰنِ پاک کے تراجم و تفاسیر، فقہی مسائل پر مشتمل کتابیں، اصلاحی رسالے، پمفلیٹ، بیجز، مسکی عِطر اور پرفیومز سمیت دیگر آئیٹمس) میں 20% خصوصی ڈسکاؤنٹ دے گا۔

بارہ کہو زون 3، اسلام آباد میں قائم فیضان اسلامک سینٹر میں 27 جنوری 2026ء کو شعبہ کفن دفن دعوتِ اسلامی کے تحت ”غسلِ میت و کفن کورس“ کا انعقاد کیا گیا جس میں قرب و جوار کے عاشقانِ رسول نے شرکت کی جن میں تاجران بھی کثیر تعداد میں شامل تھے۔

کورس کے دوران صوبائی ذمہ دار مولانا محمد مزمل عطاری مدنی نے مختلف موضوعات کے متعلق حاضرین کی رہنمائی کی جن میں سے بعض درج ذیل ہیں:

٭غسلِ میت کے دوران اسراف سے بچنا٭غسل دیتے وقت پانی مستعمل ہونے سے بچانا اور اس کی احتیاطیں٭حدیثِ پاک میں غسلِ میت کی فضیلت٭غسلِ میت کا شرعی حکم٭سنت کے مطابق غسلِ میت دینے کے 7 مراحل٭عوام الناس میں پائی جانے والی غلطیوں کی نشاندہی٭غسلِ میت کا طریقہ۔

بعدازاں سوال و جواب کا سیشن بھی ہوا اور صوبائی ذمہ دار نے شرکائے کورس کو دعوتِ اسلامی کے سنتوں بھرے اجتماعات میں شرکت کرنے کی ترغیب دلائی جس پر انہوں نے اچھی اچھی نیتیں کیں۔(رپورٹ: شعبہ کفن دفن ، کانٹینٹ:غیاث الدین عطاری)

دعوتِ اسلامی کے شعبہ کفن دفن کے تحت کل بروز منگل 27 جنوری 2026ء کو یوسی 5A، وارڈ نمبر 2، مومن آباد سیکٹر 4/F کراچی کی جامع مسجد فیضانِ امام جعفر صادق میں ”حاضریِ قبرستان کورس“ کا اہتمام کیا گیا جس میں مقامی اسلامی بھائیوں نے شرکت کی۔

مبلغِ دعوتِ اسلامی مولانا غیاث الدین عطاری مدنی نے کورس کرواتے ہوئے وہاں موجود تمام اسلامی بھائیوں کو قبروں کی زیارت سے متعلق چند اہم باتیں بتائیں نیز قبروں کی زیارت کے حوالے سے حضور صلَّی اللہ علیہ واٰلہٖ وسلَّم کا عمل اور آپ صلَّی اللہ علیہ واٰلہٖ وسلَّم کے فرامین سے بھی آگاہ کیا۔

اس کے علاوہ مبلغِ دعوتِ اسلامی نے دیگر موضوعات پر بھی اسلامی بھائیوں کی رہنمائی کی جن میں سے بعض درج ذیل ہیں:

٭دنیا میں کس کی قبر پہلے بنی؟٭کس دن قبرستان جانا افضل ہے؟٭ولی کی کرامت سے مُردوں کا زندہ ہونا٭قیامت میں سب سے پہلے کس ہستی کی قبر کھلے گی؟٭قبرستان جانے کی سنتیں و آداب٭قبر پر حاضری کا طریقہ٭قبرستان میں داخلے کی دعا اور بہت کچھ۔

آخر میں میں مبلغِ دعوتِ اسلامی نے شرکائے کورس کو دعوتِ اسلامی کے 12 دینی کاموں میں عملی طور پر حصہ لینے بالخصوص ہفتہ وار اجتماع و ہفتہ وار مدنی مذاکرے میں شرکت کرنے کی ترغیب دلائی جس پر انہوں نے اچھی اچھی نیتیں کیں۔

اس موقع پر جامع مسجد فیضانِ امام جعفر صادق کے امام مولانا عادل صاحب، نگرانِ یوسی 5A مومن آباد محمد نعیم عطاری اور نگران وارڈ 2 محمد شاہد عطاری بھی موجود تھے۔(رپورٹ: محمد نعیم عطاری نگرانِ یوسی 5A مومن آباد ، کانٹینٹ:غیاث الدین عطاری)

ملتان ڈسٹرکٹ، تحصیل جلالپور کے علاقے صبرہ میں 26 جنوری 2026ء کو شعبہ کفن دفن دعوتِ اسلامی کے تحت بیمار و پریشان حال مسلمان بھائیوں کے لئے  ”دعائے شفاء اجتماع“ کا اہتمام کیا گیا جس میں مقامی اسلامی بھائیوں نے شرکت کی۔

شعبے کے ڈسٹرکٹ ذمہ دار سیّد ذوالنورین عطاری نے تلاوت و نعت کے بعد ”صبر کرنے کا ذہن کیسے بنے؟“ کے موضوع پر بیان کیا اور وہاں موجود اسلامی بھائیوں کو اس کی فضیلت و اہمیت کے بارے میں بتایا۔بعدِ اجتماع اسلامی بھائیوں کو اُن کے مریضوں کے لئے تعویذاتِ عطاریہ دیئے گئے اور اُن کا استخارہ کرکے کاٹ کا عمل بھی کیا گیا۔(رپورٹ: محمدوسیم عطاری صوبائی آفس ذمہ دار شعبہ روحانی علاج پنجاب ، کانٹینٹ:غیاث الدین عطاری)

حال ہی میں ہونے والے ”سانحہ گُل پلازہ“ میں شہید اور زخمی ہوجانے والے مسلمان بھائیوں کی عیادت و تعزیت کے سلسلے میں 25 جنوری 2026ء کو مرکزی مجلسِ شوریٰ کے رکن حاجی منصور عطاری نے شعبہ کفن دفن کے ذمہ داران کے ہمراہ کراچی کے علاقے عثمان آباد کا دورہ کیا۔

اس دوران رکنِ شوریٰ نے اس سانحہ میں شہید ہوجانے والے مسلمان بھائیوں کے گھروں میں جاکر اُن کے لواحقین سے تعزیت کی جبکہ زخمی ہوجانے والے اسلامی بھائیوں سے عیادت کرتے ہوئے انہیں اس آزمائش میں صبر کرنے کا ذہن دیا۔

اس موقع پر نگرانِ شعبہ کفن دفن صابر عطاری، سٹی ذمہ دار مولانا یاسر عطاری مدنی اور ڈسٹرکٹ ذمہ دار اسماعیل عطاری سمیت دیگر عاشقانِ رسول موجود تھے۔(رپورٹ: عزیر عطاری ڈسٹرکٹ ذمہ دار شعبہ کفن دفن، کانٹینٹ:غیاث الدین عطاری)

امام ابو عبد اللہ محمد بن محمد علی کاشغری (متوفی 705ھ) کی کتاب ’’منیۃ المصلی‘‘ کو طہارت ونماز کے مسائل میں بہت اہمیت وشہرت حاصل ہے، متاخرین فقہائے احناف جیساکہ ابن نجیم حنفی (متوفی970ھ)، محشی شلبی (متوفی 947ھ)، در مختار کے مصنف امام حصکفی (1088ھ) اور علامہ ابن عابدین شامی (متوفی 1252ھ) رحمہم اللہ تعالیٰ نے کئی مسائل میں اس کو ماخذ بنایا ہے، اس کتاب کی بہت سی شروحات لکھی گئی جن میں امام ابراہیم محمد بن ابراہیم حلبی (متوفی 956ھ) رحمۃ اللہ علیہ کی شرح ’’غنیۃ المتملی‘‘ اور امام محمد بن محمد ابن امیر الحاج (متوفی879ھ ) رحمۃاللہ علیہ کی شروح بہت معروف ہیں اور انہی کی ایک اور شرح حلبی صغیر کے نام سے بھی ہے اس کے علاوہ محمد بن ابراہیم سیاح رومی (متوفی 1080ھ)کی شرح ’’زخر النجاۃ‘‘، مستقیم زادہ رومی(متوفی 1202ھ) کی شرح ’’وسیلۃ التعلی‘‘، قاضی محمد بن محمد قاضی زادہ(متوفی 1143ھ) کی شرح ’’حلیۃ المحلی‘‘ اسی طرح عمر بن سلیمان اور یحی صاروخانی کی شروحات مزید امام اہلسنّت کی تعلیقات اور محدث وصی احمد سورتی (متوفی 1334ھ) رحمہم اللہ تعالیٰ کا حاشیہ ’’التعلیق المجلی‘‘ (جس پر مفتی حسان رضا عطاری مدنی سلمہ اللہ تعالیٰ کی نگرانی وسرپرستی میں کام جاری ہے) ہیں، ’’غنیۃ المتملی‘‘ تو عرصۂ دراز سے چھپتی رہی ہے لیکن ’’حلبۃ المجلی‘‘ مخطوط کی شکل میں تھی، 2015ء میں دنیائے عرب کے مشہور مکتبہ دار الکتب العلمیۃ نے اسے 2 جلدوں میں شائع کیا لیکن اس طبع شدہ کتاب میں کئی جگہ یجوز لایجوز کی نوعیت کی اغلاط تھیں جس کا اظہار ہم نے کچھ مقامات کا جدول الخطا بناکردار تراث العلمی کے نگران مولانا احمد رضا گھانچی صاحب کے ذریعے مکتبہ والوں سے کیا اور ساتھ یہ بھی کہا کہ اگر اس کی اوریجنل فائلیں مل جائیں تو دعوتِ اسلامی کے ادارے المدینۃ العلمیۃ کا شعبہ کتب اعلیٰ حضرت اس کتاب کو محقق ومحشی کرکے دے گا، جواب میں مکتبہ والوں نے وہ فائلیں بھیجیں جس کے بعد ہم نے اس پر باقاعدہ کام کا آغاز کیا اور الحمد للہ یہ کام 3 جلدوں (753+756+701=2210 صفحات) پر مکمل ہوا، اس پر جو کام کئے گئے اس کی کچھ تفصیل درج ذیل ہے:

تصحیح متن وشرح:

صرف شرح کی تحقیق وتصحیح کا اہتمام نہیں کیا بلکہ متن منیۃ المصلی کی تحقیق وتصحیح کیلئے ہم نے 3 مطبوعہ اور 2 مخطوط نسخوں کو مد نظر رکھاجس کی تفصیل یہ ہے:

(1)مطبع ہوپ لاہور پاکستان، سن طباعت:1283ھ (2)دارالطباعۃ العامرۃ مصر ،سن طباعت: 1284ھ (3)دار القلم دمشق، سن طباعت: 1428ھ (4)مخطوط بخط محمد بن اسماعیل (5)مخطوط محمد علاء الدین ۔

اور حلبۃ المجلی میں بھی 5 مخطوطوں کو مدنظر رکھا جو درج ذیل ہیں:

(1)نسخۂ فاضل احمد، صحت عبارت کی وجہ سے اسے نسخۂ ام قرار دیا (2)نسخۂ ولی الدین جار اللہ (3) نسخہ ملکیت علی بن حسام (4)نسخہ جو مکتبہ سلیمانیہ استنبول ترکی میں ہے (5)نسخۂ وقف خلیل احمد پاشا۔ ان کے علاوہ محقق اہلسنّت مفتی علی اصغر صاحب دام ظلہ العالی نے بھی ایک مخطوط فراہم کیا تھا جسے بھی پیش نظر رکھا گیا۔

تحشی وتعلیقات امام اہلسنّت رحمۃ اللہ علیہ:

اس کتاب کی سب سے اہم خصوصیت یہ ہے کہ اس میں امام اہلسنّت امام احمد رضا خان حنفی ماتریدی (متوفی: 1340ھ) رحمۃ اللہ علیہ کے اس کتاب پرتعلیقات کو شامل کیا گیا ہے جو کہ مخطوط کی صورت میں تھیں اوراس سے پہلے شائع نہیں ہوئی تھیں اس کے ساتھ ساتھ امام کی دیگر تصانیف جد الممتار، فتاوی رضویہ وغیرہ سے بھی حواشی لگائے گئے ہیں۔

فتاوی المحشی :

اس کام کی ایک اہم خصوصیت یہ بھی ہے کہ کتاب کے آخر میں امام اہلسنّت رحمۃ اللہ علیہ کے فتاوی رضویہ میں طہارت اور نماز کے مسائل سے متعلق جو عربی فتاوی ہیں ان کا اضافہ کیا گیا ہے۔

تقابل:

ایک سے زیادہ مرتبہ متن وشرح کا تقابل کیا گیا ہے ۔

پروف ریڈنگ:

لفظی ومعنوی اغلاط سے کتاب کو محفوظ رکھنے کیلئے کئی مرتبہ اس کی پروف ریڈنگ کی گئی ہے۔

جدید رسم الخط وعلامات ترقیم:

جدید عربی انداز سے ہم آہنگ کرنے کیلئے جدید رسم الخط کا اہتمام کیا گیا ہے نیز فہم میں آسانی کیلئے علاماتِ ترقیم (کالن، سیمی کالن، کاما، فل اسٹاپ، انورٹڈ کاماز وغیرہ) کا بھی اہتمام رکھا گیا ہے۔

تخریج:

فقہ حنفی کی مجلدات پر مشتمل کتابوں پر تخریج کا اہتمام رائج نہیں ہے نیز یہ کام کرنے کی صورت میں کام کے دورانیے اور جلدوں کی تعداد میں بھی بہت اضافہ ہوجاتااس لئے صرف امام اہلسنّت رحمۃ اللہ علیہ کی تعلیقات وحواشی کی تخاریج کی گئی ہیں۔

آیات واحادیث:

قرآنی آیت کو عرب میں رائج مصحف عثمانی میں رکھا گیاہے اور ساتھ اس کا حوالہ بھی دیا گیا ہے اور احادیثِ قولیہ یعنی اللہ پاک کے آخری نبی صلی اللہ علیہ وسلم کے فرامین کو ڈبل بریکٹ میں ذکر کیا گیا ہے ، آیات واحادیثِ قولیہ دونوں کو الگ رنگ دیا گیا ہے۔

متن منیۃ المصلی:

ہر جلد کے شروع میں جتنا اس جلد میں منیۃ المصلی کا کلام تھا صرف اتنا متن بھی علیحدہ سے ذکر کردیا گیا تاکہ اگر کوئی صرف متن کا مطالعہ کرنا چاہے تو اس کو آسانی ہو۔

تقدیم وفہارس:

شروع میں مقدمہ لکھا گیا جس میں کام کا انداز، نسخوں کے عکس، منیۃ المصلی کے مصنف کے حالات اور اس کتاب کا انداز واسلوب، حلبۃ المجلی کے مصنف ابن امیر الحاج کا تعارف اور ان کی شرح کی تفصیل اور امام اہلسنّت کے حالات بیان کئے گئے ہیں۔

اسی طرح ہر جلد کے آخر میں فہرست موضوعات بنائی گئی ہے اور آخری جلد میں مصادر التحقیق کی فہرست بھی تیار کی گئی ہے۔

معاون افراد:

اس کتاب میں وقتاً فوقتاً جن اسلامی بھائیوں کا تقابل پروف ریڈنگ وغیرہ کاموں میں تعاون رہا ان کے نام یہ ہیں:

مولانا شعیب رئیس عطاری مدنی ، مولانا حسین کھتری عطاری مدنی، مولانا ندیم حنفی عطاری مدنی، مولانا عدیل ذاکر اشرفی، مولانا شہروز عطاری مدنی ، ابو الحقائق مولانا راشد عطاری مدنی اور مولانا اسد عطاری مدنی۔

اللہ کریم اس کوشش کو قبول فرمائے اور اس کام میں جوکوتاہیاں ہوئیں انہیں معاف فرمائے اور ہمیں دونوں جہاں میں برکتیں اور اخلاص کی دولت عطا فرمائے اور دینِ متین کی مزید خدمت کی توفیق عطا فرمائے۔آمین

یہ سب بانیٔ دعوتِ اسلامی شیخ طریقت امیر اہلسنّت ابو بلال مولانا محمد الیاس عطار قادری رضوی ضیائی دامت برکاتہم العالیہ کی برکتیں اور ان کا فیضان ہےکہ انہوں نے ہمیں دعوتِ اسلامی جیسی عظیم نعمت عطا فرمائی اور اس کے شعبہ المدینۃ العلمیۃ کے کتب اعلیٰ حضرت میں خدمت کا موقع فراہم کیا، اللہ کریم میرے شیخ طریقت کو صحت وعافیت کے ساتھ لمبی عمر عطا فرمائے اور دعوتِ اسلامی کو مزید ترقیاں اور عروج عطا فرمائے۔ اٰمین بجاہ خاتم النبیین صلی اللہ علیہ وسلم

کاشف سلیم عطاری مدنی

23/01/2026

دعوت اسلامی کا ایک انتہائی اہم شعبہ ”مجلس تحقیقات شرعیہ“ بھی ہے جو کہ دارُ الافتاء اہلسنت کے مفتیانِ کرام، نائب مفتیان کرام اور سینئر متخصصین پر مشتمل ہے۔دینی مسائل کی تحقیق کے لئے وقتاً فوقتاً اس مجلس کے تحت مختلف سیشن اور مدنی مشورے منعقد ہوتے رہتے ہیں۔

ایسا ہی ایک مشورہ 13 تا 15 جنوری 2026ء کو عالمی مدنی مرکز فیضانِ مدینہ کراچی میں منعقد ہوا جس میں شیخ الحدیث والتفسیر مفتی محمد قاسم عطاری مُدَّ ظِلُّہُ العالی ، مفتی فضیل رضا عطاری مُدَّ ظِلُّہُ العالی ، مفتی علی اصغر عطاری مُدَّ ظِلُّہُ العالی ، مفتی محمد ہاشم خان عطاری مُدَّ ظِلُّہُ العالی ، مفتی محمد حسان عطاری مُدَّ ظِلُّہُ العالی ، مفتی محمد سجاد عطاری مُدَّ ظِلُّہُ العالی ، مفتی محمد کفیل رضا عطاری مُدَّ ظِلُّہُ العالی ، مفتی جمیل احمد عطاری مُدَّ ظِلُّہُ العالی ، مفتی محمد نوید چشتی مُدَّ ظِلُّہُ العالی ، مفتی انس عطاری مُدَّ ظِلُّہُ العالی ، مفتی سرفراز عطاری مُدَّ ظِلُّہُ العالی ، مفتی ساجد عطاری مُدَّ ظِلُّہُ العالی اور مفتی محمد ماجد رضا عطاری مُدَّ ظِلُّہُ العالی شریک ہوئے۔

تین دن کے اس مشورے میں بالخصوص چار اہم موضوعات اور دور جدید کے مسائل زیرِ بحث آئی جس پر مفتیانِ کرام نے اپنے مقالے اور تحقیقات پیش کیں۔

مشورے کے متعلق گفتگو کرتے ہوئے مفتی علی اصغر عطاری مُدَّ ظِلُّہُ العالی نے فرمایا کہ مجلس تحقیقات شرعیہ کے مشورے میں دور جدید کے مسائل اور بالخصوص چار موضوعات زیر بحث آئے۔ (1) Salary plus commission (2)پیکٹ کا گوشت (3)شرعی یا غیر شرعی سفر (4)آج کے دور میں انسان کے نصف اعلیٰ کی تصویر کا حکم، ان موضوعات پر مفتیانِ کرام نے مقالہ جات لکھے جو دلائل پر مبنی تھے۔

نوٹ: مجلس تحقیقات شرعیہ کے تین دن کے مشورے میں جن اہم جدید اور تحقیقی سوالات کے جوابات پر مفتیانِ کرام متفق ہوئےانہیں دارُ الافتاء اہلسنت سے جلدعوام الناس کی رہنمائی کے لئے جاری کردیا جائے گا۔

گوجرانوالہ، پنجاب میں خیرخواہیِ امت کرنے اور لوگوں کے مسائل و پریشانی کو دور کرنے کے لئے شعبہ روحانی علاج دعوتِ اسلامی کے تحت 25 جنوری 2026ء کو”دعائے شفاء اجتماع“ کا اہتمام کیا گیا جس میں مقامی ذمہ داران اور عاشقانِ رسول نے شرکت کی۔

اجتماع کا آغاز تلاوت و نعت سے کیا گیا جس کے بعد ڈویژن ذمہ دار مولانا ثقلین عطاری مدنی نے ”صبر کرنے کا ذہن کیسے بنے؟“ کے موضوع پر بیان کیا اور عاشقانِ رسول کی رہنمائی کی۔

شعبہ روحانی علاج دعوتِ اسلامی کے تحت 25 جنوری 2026ء کو لوگوں کے مسائل و پریشانی کو دور کرنے  اور اُن کی خیرخواہی کے لئے سرگودھا ڈسٹرکٹ کی تحصیل شاہ پور میں روحانی علاج کے نئے بستے کا آغاز ہوا جس میں مقامی عاشقانِ رسول نے شرکت کی۔

نئے بستے کے آغاز کے موقع پر بستہ ذمہ دار سرفراز عطاری نے ”صبر کرنے کا ذہن کیسے بنے؟“ کے موضوع پر بیان کرتے ہوئےوہاں موجود عاشقانِ رسول کی رہنمائی کی۔

علاوہ ازیں عاشقانِ رسول کو اُن کے مریضوں کے لئےتعویذاتِ عطاریہ دیئے گئے جبکہ پریشان حال و مصیبت میں مبتلا اسلامی بھائیوں کا استخارہ کرکے کاٹ کا عمل بھی کیا گیا۔(رپورٹ: محمدوسیم عطاری صوبائی آفس ذمہ دار شعبہ روحانی علاج پنجاب ، کانٹینٹ:غیاث الدین عطاری)

25 جنوری 2026ء کو خیرخواہیِ امت کرنے اور لوگوں کے مسائل و پریشانی کو دور کرنے کے لئے شعبہ روحانی علاج دعوتِ اسلامی کے تحت ملتان ڈسٹرکٹ کی تحصیل جلالپور کوٹلہ پل میں ”دعائے شفاء اجتماع“ کا اہتمام کیا گیا۔

معلومات کے مطابق اس اجتماعِ پاک میں تلاوت و نعت کے بعد ڈسٹرکٹ ذمہ دار سیّد ذوالنورین عطاری نے ”صبر کرنے کا ذہن کیسے بنے؟“ کے موضوع پر بیان کیا اور وہاں موجود عاشقانِ رسول کی رہنمائی کی۔

علاوہ ازیں عاشقانِ رسول کو اُن کے مریضوں کے لئےتعویذاتِ عطاریہ دیئے گئے جبکہ پریشان حال و مصیبت میں مبتلا اسلامی بھائیوں کا استخارہ کرکے کاٹ کا عمل بھی کیا گیا۔(رپورٹ: محمدوسیم عطاری صوبائی آفس ذمہ دار شعبہ روحانی علاج پنجاب ، کانٹینٹ:غیاث الدین عطاری)

امتِ مسلمہ کی خیرخواہی کرنے اور اُن کے مسائل و پریشانی کو دور کرنے کے لئے 24 جنوری 2026ء کو شعبہ روحانی علاج دعوتِ اسلامی کے تحت ملتان ڈسٹرکٹ کی تحصیل جلالپور حویلی لانگ میں ”دعائے شفاء اجتماع“ منعقد ہوا۔

تلاوت و نعت کے بعد اس اجتماعِ پاک میں ڈسٹرکٹ ذمہ دار سیّد ذوالنورین عطاری نے ”صبر کرنے کا ذہن کیسے بنے؟“ کے موضوع پر بیان کیا جبکہ وہاں موجود عاشقانِ رسول کو اُن کے مریضوں کے لئےتعویذاتِ عطاریہ دیئے گئے ۔اس کے علاوہ پریشان حال و مصیبت میں مبتلا اسلامی بھائیوں کا استخارہ کرکے کاٹ کا عمل بھی کیا گیا۔(رپورٹ: محمدوسیم عطاری صوبائی آفس ذمہ دار شعبہ روحانی علاج پنجاب ، کانٹینٹ:غیاث الدین عطاری)

فیصل آباد ڈسٹرکٹ کی تحصیل فیصل آباد صدر میں ہونے والے دعوتِ اسلامی کے دینی کاموں کا فالو اپ لینے کے لئے 26 جنوری 2026ء کو ذمہ داران کے مدنی مشورے کا انعقاد کیا گیا جس میں نگرانِ فیصل آباد ڈویژن حاجی محمد سلیم عطاری اور نگرانِ فیصل آباد میٹروپولیٹن مولانا مظہر عطاری مدنی نے شرکا کی رہنمائی کی۔

اس دوران نگرانِ فیصل آباد ڈویژن حاجی محمد سلیم عطاری نے ذمہ داران کی اپ ڈیٹ تقرری اور نئے ذمہ داران کے اعلانات کے حوالے سے کلام کرتے ہوئے انہیں دعوتِ اسلامی کے 12 دینی کاموں میں بڑھ چڑھ کر حصہ لینے کی ترغیب دلائی۔