اسپیشل پرسنز  میں نیکی کی دعوت کا جذبہ بڑھانے اور انہیں علمِ دین سکھانے کے لئے 2، 3 اور 4 دسمبر 2025ء کو 3 دن کا قافلہ اسلام آباد کے علاقے CDA اسٹاپ، آئی جی پی روڈ کی جامع مسجد عائشہ صدیقہ پہنچا جس میں مختلف شعبوں سے وابستہ اسپیشل پرسنز کی شرکت ہوئی۔

صوبائی ذمہ دار کامران عطاری نے قافلے کے دوران اسپیشل پرسنز کو رسولِ کریم صلَّی اللہ علیہ واٰلہٖ وسلَّم کے اخلاقِ کریمہ اپنانے، درودِ پاک کی کثرت کرنے، فرض علوم سیکھنے اور اسلامی تعلیمات کے مطابق زندگی گزارنے کا ذہن دیا۔

علاوہ ازیں صوبائی ذمہ دار نے اس پُرفتن دور میں اللہ پاک کی نعمت دعوتِ اسلامی سے وابستہ ہونے کی اہمیت و افادیت کے حوالے سے اسپیشل پرسنز کی تربیت و رہنمائی کی جس پر انہوں نے اچھی اچھی نیتوں کا اظہار کیا۔(رپورٹ:اسپیشل پرسنز ڈیپارٹمنٹ ، کانٹینٹ:غیاث الدین عطاری)

پچھلے دنوں دعوتِ اسلامی کے  تحت اسپیشل پرسنز ڈیپارٹمنٹ کے ذمہ دار اسلامی بھائیوں نے اسلام آباد کے علاقے بھارہ کہو میں قائم مدرسۃالمدینہ بوائز میں قاری صاحبان، ناظم صاحب اور اسٹاف کے دیگر اسلامی بھائیوں سے ملاقات کی۔

اس دوران صوبائی ذمہ دار کامران عطاری نے بچوں کے درمیان سیکھنے سکھانے کا حلقہ لگایا جس میں انہوں نے بچوں سمیت قاری صاحبان کو اسپیشل پرسنز کے ساتھ نرمی کرنے اور اُن کے درمیان نیکی کی دعوت عام کرنے کا ذہن دیا۔(رپورٹ:اسپیشل پرسنز ڈیپارٹمنٹ ، کانٹینٹ:غیاث الدین عطاری)

اسپیشل پرسنز ڈیپارٹمنٹ دعوتِ اسلامی کے تحت 7 دسمبر 2025ء کو وفاقی دارالحکومت اسلام آبا دکے علاقے آدم جی روڈ، ہاتھی چوک نذیر ریلوے اسٹیشن میں واقع سیّد اعجاز حسین عطاری (نابینا) کی رہائش گاہ پر اسپیشل پرسنز کے لئے اجتماعِ ذکر و نعت کا اہتمام کیا گیا۔

معلومات کے مطابق اجتماعِ ذکر و نعت کا آغاز تلاوتِ قراٰن سے کیا گیا جس کے بعد نعت خواں اسلامی بھائیوں نے حضور سرورِ کونین حضرت محمد صلَّی اللہ علیہ واٰلہٖ وسلَّم کی بارگاہِ اقدس میں نعت شریف کا نذرانہ پیش کیا۔

تلاوت و نعت کے بعد مبلغِ دعوتِ اسلامی بلال عطاری نے ”اللہ پاک کی رضا“ کے موضوع پر بیان کیا اور وہاں موجود اسپیشل پرسنز کی دینی و اخلاقی اعتبار سے تربیت کی۔

بعدازاں اسپیشل پرسنز کے لئے لنگرِ رضویہ کا بھی اہتمام کیا گیا۔اس موقع پر ڈیپارٹمنٹ کے صوبائی ذمہ دار کامران عطاری اور اسپیشل پرسنز سمیت دیگر ذمہ داران بھی موجود تھے۔(رپورٹ:اسپیشل پرسنز ڈیپارٹمنٹ ، کانٹینٹ:غیاث الدین عطاری)

تصوّف دراصل دل کی دنیا کو سنوارنے اور باطن کو پاکیزہ بنانے کا نام ہے۔ یہ اسلام کی روحانی تعلیمات کا وہ حسین پہلو ہے جو انسان کو اللہ تعالیٰ کی قربت، عاجزی، محبت اور اخلاقِ حسنہ کی طرف لے جاتا ہے۔ اگر شریعت ظاہر کا نظام ہے تو تصوف اس کی روح ہے، جو عبادتوں میں اخلاص، معاملات میں سچائی، اور انسانیت کے ساتھ حسنِ سلوک پیدا کرتا ہے۔

تصوف کے موضوع پر بزرگانِ دین رحمہم اللہ کی بہت ساری تصانیف موجود ہیں جن میں سےامام اجلّ حضرت سیدنا شیخ ابو طالب مکی علیہ رحمۃ اللہ القوی کی ایک مشہور تصنیف ”قوتُ القلوب“ بھی ہے۔

اسلامک ریسرچ سینٹر (المدینۃ العلمیۃ) کا ذیلی شعبہ ”شعبہ ہفتہ وار رسالہ“ نے اپنی محنت و کوشش سے اس کتاب سے چند مدنی پھول اخذ کرکے 17 صفحات پر مشتمل ایک رسالہ بنام ”قوتُ القلوب سے 57 مدنی پھول“ تیار کیا ہے۔ شیخ طریقت امیر اہلسنت حضرت علامہ مولانا محمد الیاس عطار قادری دامت بَرَکَاتُہمُ العالیہ نے اس ہفتے عاشقانِ رسول کو رسالہ پڑھنے/سننے کی ترغیب دلائی ہے اور پڑھنے/سننے والوں کو اپنی دعاؤں سے بھی نوازا ہے۔

دعائے عطار

یاربّ کریم! جو کوئی 17 صفحات کا رسالہ ” قوتُ القلوب سے 57 مدنی پھول “پڑھ یا سن لے اُس کو اپنی عبادت کا جذبہ دے، اُسے ماں باپ اور خاندان سمیت جنت الفردوس میں بے حساب داخلہ نصیب فرما۔ اٰمین

یہ رسالہ آڈیو میں سننے اور اردو سمیت کئی زبانوں میں ڈاؤن لوڈ کرنے کے لئے نیچے دیئے گئے لنک پر کلک کیجئے:

Download

اسلام آباد کے علاقے فیض آباد کے قریب ادارے انجمن فیض السلام میں VSP (Voice of Special Persons) کے تحت 3 دسمبر 2025ء کو معذور افراد کے عالمی دن (International Day of Persons with Disabilities) کے موقع پر پروگرام کا انعقاد کیا گیا۔

اسپیشل پرسنز ڈیپارٹمنٹ دعوتِ اسلامی کی جانب سے اس پروگرام میں صوبائی ذمہ دار نابینا افراد کامران عطاری نے دیگر ذمہ دار اسلامی بھائیوں کے ہمراہ شرکت کی جبکہ نابینا افراد، اسپیشل پرسنز کے حوالے سے کام کرنے والے مختلف تنظیموں اور سوشل ویلفیئر زکے افراد بھی موجود تھے۔

اس دوران صوبائی ذمہ دار نے مختلف شعبوں سے تعلق رکھنے والے نابینا افراد سے ملاقات کی اور انہیں نیکی کی دعوت پیش کرتے ہوئے پاکستان سمیت عالمی سطح پر ہونے والے اسپیشل پرسنز ڈیپارٹمنٹ کی ایکٹیویٹیز کے بارے میں بتایا۔(رپورٹ: اسپیشل پرسنز ڈیپارٹمنٹ ، کانٹینٹ:غیاث الدین عطاری) 

اورنگی ڈسٹرکٹ، کراچی کے مومن آباد ٹاؤن میں واقع جامع مسجد گلزارِ مدینہ میں اسپیشل پرسنز ڈیپارٹمنٹ دعوتِ اسلامی کے تحت 7 دن پر مشتمل اشاروں کی زبان کا کورس جاری ہے جس میں اہلِ علاقہ سمیت ذمہ داران شریک ہوتے ہیں۔

دعوتِ اسلامی کے مدنی مرکز فیضان مدینہ جوہر ٹاؤن لاہور میں اسپیشل پرسنز ڈیپارٹمنٹ کے تحت 12 ماہ کے قافلے میں سفر کرنے والے عاشقان رسول کے لئے  6 دسمبر 2025ء کو ”سائن لینگویج کورس“ کا انعقاد کیا گیا۔

کورس کے دوران ڈیپارٹمنٹ کے لاہور سٹی ذمہ دار حاجی عبدالوارث عطاری اور اسپیشل پرسنز انٹر نیشنل افیئرز ڈیپارٹمنٹ کے ذمہ دار محمد حنیف عطاری نے شرکائے قافلہ کو اسپیشل پرسنز ڈیپارٹمنٹ کا تفصیلی تعارف کرواتے ہوئے دینی کام کرنے کی افادیت پر کلام کیا نیز اسپیشل پرسنز میں ہونے والے مخصوص 12 دینی کاموں کے بارے میں بھی بتایا۔

اس کے علاوہ دعوتِ اسلامی کے اسپیشل پرسنز ڈیپارٹمنٹ کے تحت نابینا افراد کے لئے قائم ”مدرسۃالمدینہ برائے نابینا افراد“ کے بارے میں بتایا گیا۔

علاوہ ازیں ڈسٹرکٹ لاہور جنوبی کے ذمہ دار محمد ارسلان عطاری نے اسپیشل پرسنز ڈیپارٹمنٹ کی مکتبۃالمدینہ سے شائع ہونے والی کُتُب کے بارے میں آگاہی دیتے ہوئے کہا کہ اسپیشل پرسنز کے لئے اشاروں کی زبان میں مدنی قاعدہ اور امیرِ اہلِ سنت دامت بَرَکَاتُہمُ العالیہ کے مختلف رسائل مثلاً بڈھا پجاری ،احترامِ مسلم ، فرائض علوم میں غسل کا طریقہ اور دیگر رسائل کا بریل ترجمہ (Braille translation) بھی کیا جا چکا ہے۔(رپورٹ: اسپیشل پرسنز ڈیپارٹمنٹ ، کانٹینٹ:غیاث الدین عطاری)

7 دسمبر 2025ء کو شعبہ مزاراتِ اولیاء دعوتِ اسلامی کے زیرِ اہتمام کھارادر ٹاؤن، کراچی میں قائم حضرت سیّدنا محمد شاہ بخاری المعروف دولہا شاہ سبزواری علیہ الرحمہ کے مزار کے قریب ماہانہ مزار اجتماع کا انعقاد کیا گیا۔

شعبہ مزاراتِ اولیاء دعوتِ اسلامی کے تحت 5 دسمبر 2025ء کواعلیٰ حضرت امام احمد رضا خان کے پَرپوتے مولانا حماد رضا خان بریلوی (نعمانی میاں) رحمۃاللہ علیہ کے مزارِ پُرانوار کے قریب جامع مسجد گلزارِ اولیاء، خاموش کالونی، لیاقت آباد ٹاؤن کراچی میں ماہانہ مزار اجتماع کا انعقاد کیا گیا۔

اجتماع کا باقاعدہ آغاز تلاوتِ قراٰن و نعتِ رسولِ مقبول صلَّی اللہ علیہ واٰلہٖ وسلَّم سے کیا گیا جس کے بعد مبلغِ دعوتِ اسلامی مولانا راشد عطاری مدنی نے ”مسلمانوں کے پہلے خلیفہ، امیرُ المومنین حضرت سیّدنا صدیق اکبر رضی اللہ عنہ کی مبارک سیرت“کے موضوع پر سنتوں بھرا بیان کیا اور وہاں موجود عاشقانِ رسول کو سیرتِ مبارکہ پر عمل کرنے کی ترغیب دلائی۔

اس اجتماعِ پاک میں شعبہ مزاراتِ اولیاء کے سٹی و ٹاؤن ذمہ داران اور عاشقانِ اعلیٰ حضرت نے شرکت کرنے کی سعادت حاصل کی۔(رپورٹ: شہزاد احمد عطاری شعبہ مزاراتِ اولیاء کراچی سٹی ذمہ دار، کانٹینٹ:غیاث الدین عطاری)

دعوتِ اسلامی کے تحت 9 دسمبر 2025ء کو شعبہ تحفظِ اوراقِ مقدسہ کے دینی کاموں کا فالو اپ لینے کے لئے مدنی مرکز فیضانِ مدینہ کامونکی میں مدنی مشورہ ہوا جس میں ڈسٹرکٹ و تحصیل نگران اور ذمہ دار اسلامی بھائیوں نے شرکت کی۔

مدنی مشورے کے دوران نگرانِ ڈسٹرکٹ حاجی عمران عطاری نے ابتداءً سابقہ 3 ماہ کی کارکردگی کا جائزہ لیا اور نمایاں کارکردگی کے حامل ذمہ دار اسلامی بھائیوں کی حوصلہ افزائی کی۔

اسی طرح نگرانِ ڈسٹرکٹ نے ذمہ دار اسلامی بھائیوں سے گفتگو کرتے ہوئے انہیں آئندہ کے اہداف دیئے اور اوراقِ مقدسہ کی حفاظت کرنے کا ذہن دیا۔

اس کے علاوہ نگرانِ ڈسٹرکٹ نے ذمہ دار اسلامی بھائیوں کو دعوتِ اسلامی کے تحت قافلوں میں سفر کرنے اور مختلف کورسز کرنے کی بھی ترغیب دلائی جس پر انہوں نے اچھی اچھی نیتیں کیں۔اس موقع پر ڈسٹرکٹ ذمہ دار محمد آفتاب عطاری بھی موجود تھے۔(رپورٹ: محمد آفتاب عطاری شعبہ تحفظِ اوراقِ مقدسہ، کانٹینٹ:غیاث الدین عطاری)

3 دسمبر 2025ء کو شعبہ تحفظِ اوراقِ مقدسہ کی آگاہی مہم کے سلسلے میں ڈویژن، ڈسٹرکٹ، تحصیل اور ٹاؤن ذمہ داران سمیت اہلِ علاقہ نے ملکر نارووال شہر کے مختلف مقامات پر نئے باکسز اور تاجروں کے درمیان سیکھنے سکھانے کے حلقے لگائے۔

شعبے کے ذمہ دار محمد فہیم عطاری نے اوراقِ مقدسہ کے فضائل و برکات بتاتے ہوئے تاجروں کو اوراقِ مقدسہ کی حفاظت کرنے کا ذہن دیا جس پر انہوں نے اچھی اچھی نیتوں کا اظہار کیا۔بعدازاں تمام ذمہ دار اسلامی بھائیوں نے لاری اڈوں اور سبزی منڈی میں بھی باکسز لگائے۔(رپورٹ: غلام الیاس عطاری ، کانٹینٹ:غیاث الدین عطاری)

دعوتِ اسلامی کا ہفتہ وار سنتوں بھرا اجتماع ایک ایسی روح پرور اور ایمان افروز محفل ہے جو دلوں میں نیکی کی چنگاری روشن کرتی ہے۔ یہ اجتماع نہ صرف اصلاحِ اعمال کا ذریعہ بنتا ہے بلکہ زندگی کے مختلف پہلوؤں میں سنتِ رسول صلَّی اللہ علیہ واٰلہٖ وسلَّم کی روشنی پھیلانے کا اہم سبب بھی ہے۔ ہر ہفتے ہزاروں اسلامی بھائی مسجدوں، مدنی مراکز اور اوپن گراؤنڈز میں جمع ہوکر اس بابرکت محفل کا حصہ بنتے ہیں جہاں دلوں کی دنیا بدلتی ہے اور ایمان تازہ ہوتا ہے۔

اس اجتماع میں علم و حکمت سے بھرپور بیانات ہوتے ہیں جن میں نماز، روزہ، معاملات، اخلاق اور گھریلو زندگی سمیت انسان کی عملی زندگی کے کئی اہم موضوعات پر روشنی ڈالی جاتی ہے۔ قرآن و حدیث کی روشنی میں اصلاحِ نفس کی ترغیب دی جاتی ہے، ناپسندیدہ عادتوں سے بچنے اور نیکیاں اپنانے کی طرف رہنمائی کی جاتی ہے۔

اسی سلسلے میں آج مؤرخہ 11 دسمبر 2025ء بروز جمعرات دعوتِ اسلامی کے زیر اہتمام دنیا بھر میں ہفتہ وار سنتوں بھرے اجتماعات کا انعقاد کیا جائے گا جن میں اراکین شوریٰ و مبلغین دعوتِ اسلامی تلاوت و نعت کے بعد سنتوں بھرے بیانات فرمائیں گے۔

تفصیلات کے مطابق آج رات ہاکی گراؤنڈ نزد ریلوے اسٹیشن کوٹ رادھا کشن (شیخوپورہ ڈویژن) سے مدنی چینل پر لائیو ہونے والے ہفتہ وار سنتوں بھرے اجتماع میں رکن شوریٰ مولانا حاجی عبد الحبیب عطاری سنتوں بھرا بیان فرمائیں گے۔

اس کے علاوہ فیضانِ جیلان مسجد کلفٹن کراچی میں رکن شوریٰ حاجی محمد علی عطاری، مدینہ مسجد پنجابی کلب کھارادر کراچی میں رکن شوریٰ حاجی فضیل عطاری، مدنی مرکز فیضانِ مدینہ محبوب ٹاؤن اوکاڑہ میں رکنِ شوریٰ حاجی یعفور رضا عطاری، مدنی مرکز فیضان مدینہ آفندی ٹاؤن حیدر آباد میں رکن شوریٰ حاجی محمد امین عطاری، جامع مسجد فیضان مدینہ تلہ گنگ میں رکن شوریٰ مولانا حاجی محمد اسد عطاری مدنی، جامع مسجد حنفیہ محمدیہ سوڈیوال لاہور میں رکن شوریٰ حاجی منصور عطاری، عثمانیہ مسجد مین نیشنل ہائی وے نزد رزاق آباد پولیس ٹریننگ سینٹر کراچی میں رکن شوریٰ عبد الوہاب عطاری، جامع مسجد سیداں اگوکی سیالکوٹ میں رکن شوریٰ حاجی محمد اظہر عطاری، ہزارہ پتن اولیا شاہی جامع مسجدچٹاگانگ بنگلہ دیش میں رکن شوریٰ عبد المبین عطاری سنتوں بھرا بیان فرمائیں گے۔

قرب و جوار کے تمام عاشقانِ رسول سے ہفتہ وار اجتماع میں شرکت کی درخواست ہے۔