دنیا بھر میں قرآن پاک کی تعلیمات اللہ اور اس کےآخری نبی ﷺ کے احکامات کو عام کرنے والی عاشقان رسول کی مدنی تحریک دعوت اسلامی کے پاکستان سمیت دنیا بھر میں کم و بیش392 مدنی مراکز بنام فیضان مدینہ قائم ہیں جہاں دین اسلام کی خدمت کا سلسلہ جاری و ساری ہے۔ ملتان میں قائم دعوت اسلامی کے مدنی مرکز فیضان مدینہ میں فرسٹ فلور کے بعد اب سیکنڈ فلور کی تعمیرات جلد ہی شروع کردی جائیں گی۔

اسی سلسلے میں ذمہ داران کا مدنی مشورہ ہوا جس میں انجینئرز اسلامی بھائیوں نے رکن شوریٰ حاجی محمد اسلم عطاری اور رکن شوریٰ حاجی محمد سلیم عطاری سمیت دیگر ذمہ داران کو بذریعہ ویڈیومدنی مرکز فیضان مدینہ کا ڈیمو دکھایا اور اس حوالے سے بریفنگ بھی دی۔ اراکین شوریٰ نےمتعلقہ ذمہ داران و انجینئرز اسلامی بھائیوں کو تعمیرات جلد شروع کرنے کے حوالے سے اہداف بھی دئیے۔

پچھلے دنوں دعوت اسلامی کے عالمی مدنی مرکز فیضان مدینہ کراچی سے مجلس مزارات اولیاء کے ذمہ داران کا  بذریعہ ویڈیو لنک مدنی مشورہ ہوا۔مدنی مشورے میں مرکزی مجلس شوریٰ کے نگران حاجی محمد عمران عطاری مَدَّظِلُّہُ الْعَالِی نے شرکا کی تربیت کی اور ذمہ داران سے گفتگو کرتے ہوئے کہا کہ کسی بھی کام کے شروع کرنے سے پہلے اس کے شر کو جاننا بہت ضروری ہے کہ اس کام میں شر کیا ہے، اس کام کو کرنے میں نقصان کیا ہے، اس کام میں وہ کون کون سے کام ہیں جو حرام و ناجائزہیں، ان تمام ترچیزوں کے تعلق سے تفصیل ہوکہ کون کون سے کام کرنے کے ہیں اور ان کا طریقہ کیا ہونا چاہیئے۔

نگران شوریٰ نے شعبہ کے مدنی کاموں کے حوالے سے مدنی پھول بھی ارشاد فرمائے۔اس موقع پر رکن شوریٰ حاجی ابو ماجد محمد شاہد عطاری مدنی بھی موجود تھے۔

گزشتہ دنوں مرکزی مجلس شوریٰ کے رکن حاجی وقار المدینہ عطاری نے مدنی مرکز فیضان مدینہ اسلام آباد کا دورہ  کیا اور مدنی مرکز میں قائم مختلف شعبہ جات اور تعمیراتی پروجیکٹس کا جائزہ لیا۔

فیضان مدینہ اسلام آباد میں قائم جامعۃ المدینہ کے ناظم محمد عمران عطاری نے رکن شوریٰ کو تعمیراتی پروجیکٹس اور دیگر اہم کاموں کے حوالے سے اپڈیٹس دیں۔

رکن شوریٰ نے انہیں فیضان مدینہ کو مزید خوبصورت بنانے اور جامعۃ المدینہ اور مدرسۃ المدینہ کے طلبہ کو زیادہ سے زیادہ سہولیات کی فراہمی کو یقینی بنانے پر مدنی پھول ارشاد فرمائے۔

دعوت اسلامی کی مجلس تاجران کے تحت گجرانوالہ میں قائم مدنی مرکزفیضان مدینہ میں مقامی تاجر اسلامی بھائیوں کے درمیان مدنی حلقے کا سلسلہ ہوا جس میں مختلف شعبہ جات سے تعلق رکھنے والے تاجروں اور دیگر اسلامی بھائیوں نے شرکت کی۔

نگران مجلس تاجران پاکستان نے سنتوں بھرا بیان کیا اور انہیں نیکی کی دعوت پیش کرتے ہوئے انہیں بھی دین اسلام کی خدمت کا جذبہ دیا اور انہیں جنت میں لے جانے والے اعمال کے بارے میں بتایا۔ مدنی حلقے میں شریک تاجر اسلامی بھائیوں نے اچھی اچھی نیتیں بھی کیں ۔

ملتان میں قائم مدنی مرکزفیضان مدینہ میں  مدرسۃ المدینہ ملتان کے ناظمین کا مدنی مشورہ ہوا۔ جس میں مدرسۃ المدینہ ملتان ریجن کےذمہ دار، نگران زون اور مدرسۃ المدینہ ملتان زون کے ناظمین نے شرکت کی۔ مدنی مشورے میں موجودہ صورت حال میں بچوں کو آن لائن دی جانے والی تعلیم کی کارکردگی کا جائزہ لیاگیا اور اس کو مزید بہتر بنانے کے حوالے سے اہداف بھی مقرر کئے گئے۔ ریجن ذمہ دار نے ان اسلامی بھائیوں کی رہنمائی کرتے ہوئے تعلیمی سرگرمیوں کے ساتھ ساتھ دیگر مدنی کاموں کو بھی مزید بہتر انداز میں انجام دینے کا ذہن دیا۔ اس مدنی مشورے میں عید قرباں پر مدرسۃ المدینہ میں اجتماعی قربانیاں کرنے کے حوالے سے بھی گفتگو ہوئی اور اہداف بھی مقرر کئے گئے۔

اَلْحَمْدُ لِلّٰہِ عَزَّ وَجَلَّ ہر سال کی طرح اس سال بھی دعوت اسلامی کے تحت ملک بھر میں اجتماعی قربانی کا اہتمام کیا جائے گا۔ اس سے قبل عالمی مدنی مرکزفیضان مدینہ کراچی میں مجلس اجتماعی قربانی کے ذمہ داران کی تربیت کا سلسلہ ہوا جس میں دارالافتاء اہل سنت کے مولانا محمد سجاد عطاری مدنی ، اراکین شوریٰ حاجی محمدامین عطاری اور حاجی محمد اظہر عطاری نے ان اسلامی بھائیوں کی تربیت فرمائی اور ان میں سنتوں بھرا بیان فرمایا۔بعد بیان نگران مجلس اجتماعی قربانی نے اجتماعی قربانی کے حوالے سے ان اسلامی بھائیوں کی رہنمائی کی اور انہیں اجتماعی قربانی کے وکالت نامے کے مطابق قواعد و ضوابط پر عمل کرنے کا ذہن دیا۔

اسی طرح ملتان میں بھی مجلس اجتماعی کے ذمہ داران کا تربیتی سیشن ہوا جس میں مختلف شعبہ جات سے تعلق رکھنے والے اسلامی بھائیوں نے شرکت کی جن کی بذریعہ ویڈیولنک تربیت کا سلسلہ ہوا ۔ ریجن ذمہ دار نے تربیتی سیشن کے حوالے سے بتایا کہ اس کا مقصد امت مسلمہ کی قربانی صحیح معنوں میں شرعی اصولوں کے مطابق کرنا ہے ۔

پچھلے دنوں مدنی مرکز فیضان مدینہ اسلام آباد میں جمیلہ سلطانہ فاؤنڈیشن کے ڈائریکٹر کرنل رسید توقیر عباس کی آمدہوئی۔ رسید توقیر عباس نے رکن شوریٰ حاجی وقار المدینہ عطاری سے ملاقات کی ۔ رکن شوریٰ نے انہیں مکتبۃ المدینہ، ڈیجیٹل سروسز، مختلف ایپلیکیشن اور کڈز مدنی چینل کا تعارف پیش کیا اور موجودہ صورتحال میں دعوت اسلامی کی فلاحی کاموں کے متعلق تفصیلی بریفنگ دی۔

حاجی وقار المدینہ عطاری نے لاک ڈاؤن میں تھیلسیمیا اور دیگر مریضوں کے لئے دعوت اسلامی کے تحت لگنے والے بلڈ کیمپس کے بارے میں بتایا جس پر رسید عباس نے دعوت اسلامی اور امیر اہل سنت دَامَتْ بَرَکَاتُہُمُ الْعَالِیَہ کا شکریہ ادا کیا۔

اس موقع پر رسید توقیر عباس کا کہنا تھا کہ دعوت اسلامی ہمارے ادارے جمیلہ سلطانہ فاؤنڈیشن کو اپنا ذیلی حلقہ سمجھے اور بلڈ ڈونیشن کیمپس میں ہمیں بھی اپنے ساتھ تعاون کرنے کا موقع دے۔

گزشتہ دنوں دعوت اسلامی کی مجلس مدنی چینل عام کریں کے تحت مدنی مرکز فیضان مدینہ جوہر ٹاؤن میں مدنی مشورہ ہوا جس میں لاہور جنوبی اور شمالی زون کے ذمہ داران نے شرکت کی۔ نگران مجلس مدنی چینل عام کریں انجم رضا عطاری نے شرکا کی تربیت کی اور کارکردگی کا جائزہ لیتے ہوئے شعبے کے حوالے سے مدنی پھول ارشاد فرمائے۔

دعوت اسلامی کے تحت ہر سال اجتماعی قربانی  اور دعوت اسلامی کے جملہ اخرجات کے لیے قربانی کی کھالوں کو جمع کرنے کا سلسلہ ہوتا ہے۔ کھالوں کو جمع کرنے کے لیے کثیر گاڑیوں، رکشوں اور دیگر ٹرانسپورٹ کی ضرورت پیش آتی ہےجس میں ٹرانسپورٹ کے اخراجات ہوتے ہیں۔

اسی سلسلے میں مدنی مرکز فیضان مدینہ اسلام آباد میں مجلس ٹرانسپورٹ کے ذمہ داران کا بذریعہ انٹرنیٹ مدنی مشورہ ہوا جس میں مجلس ٹرانسپورٹ پاکستان کے نگران ، کراچی، لاہور، ملتان، فیصل آباد اورحیدر آبادریجنز کے رکن ریجن، اراکین زون اور اراکین کابینہ نے شرکت کی۔ مرکزی مجلس شوری کے رکن حاجی وقار المدینہ عطاری نے ذمہ داران کی تنظیمی و اخلاقی تربیت کی اور کھالوں کے سلسلے میں آنے والے ٹرانسپورٹ کے اخراجات کو خود کفیل کرنے کے اہداف دیئے۔ رکن شوریٰ نے ذمہ داران کو مختلف شخصیات کے ہاں مدنی حلقہ لگانے کا ذہن بھی دیا۔

دعوت اسلامی دنیا بھر میں 12مدنی کاموں کےذریعے نیکی کی دعوت عام کرنے میں مصروف عمل ہےان مدنی کاموں میں  روزانہ کاایک مدنی کام بعد فجر مدنی حلقہ بھی ہے جس میں فجر کی نماز کے بعد تفسیرقرآن اور شجرہ عالیہ قادریہ رضویہ سمیت فیضان سنت کے 4صفحات پڑھے جاتے ہیں۔

اسی سلسلے میں فیصل آباد کے علاقے مدینہ ٹاؤن میں قائم مدنی مرکزفیضان مدینہ میں ختم تفسیر قرآن کا سلسلہ ہوا۔نگران پاکستان انتظامی کابینہ حاجی محمد شاہد عطاری نے امام مسجد فیضان مدینہ عبدالرحمن عطاری مدنی کو مبارکباد پیش کی اور ان کی مزید رہنمائی و حوصلہ افزائی بھی فرمائی۔ 

سندھ کے شہر پنوں عاقل میں دعوت اسلامی کے مدنی مرکزفیضان مدینہ کی تعمیرات کے سلسلے میں سنگ بنیاد رکھا گیا۔ رکن شوریٰ حاجی محمد فاروق جیلانی عطاری نےدیگر ذمہ داران کے ہمراہ  سنگ بنیاد رکھا۔ اس موقع پر نگران حیدرآبادزون ،نگران سکھر کابینہ اور پنوں عاقل کے ذمہ داران سمیت دیگر شخصیات بھی موجود تھیں۔ رکن شوریٰ نے مقامی اسلامی بھائیوں کو ذہن دیا کہ آپ لوگ فیضان مدینہ کی تعمیرات میں اپنا اپنا حصہ ملائیں جس پر اسلامی بھائیوں نے ہاتھوں ہاتھ عطیات جمع کروائے۔رکن شوری نے مزیدکہاکہ مدنی مرکز فیضان مدینہ کی جامع مسجد کو آباد رکھنے کیلئے نمازوں کی پابندی کرنی ہے اور مدرسۃ المدینہ و جامعۃ المدینہ میں بچوں کو داخل کروانا ہے۔

مدنی مرکز فیضان مدینہ ملتان میں ذمہ داران کا تربیتی سیشن ہوا جس میں دعوت اسلامی کی مختلف مجالس سے تعلق رکھنے والے اراکین زون اور نگران کابینہ نے شرکت کی۔ تربیتی سیشن کا آغاز شیخ الحدیث والتفسیر مفتی محمد قاسم عطاری مَدَّظِلُّہُ الْعَالِی کے بیان ”وقت کی قدر“ سے ہوا۔ بعد ازاں مرکزی مجلس شوریٰ کے رکن قاری سلیم عطاری اور نگران زون نے شرکا کی تربیت کی۔ اس تربیتی سیشن میں اراکین زون کے پیشگی اور عملی جدول کا جائزہ لیا گیا جبکہ اجتماعی قربانی کے مقامات، قربانی کی کھالیں، 12مدنی کام، گھریلو صدقہ بکس، کھالوں کے اجازت نامے، گودام کے انتظامات، گودام کی خود کفالت، مدنی مراکز کی تعمیرات اور دیگر اہم امور پر گفتگو ہوئی۔