اللہ پاک نے انسانوں کیلئے ہدایت کیلئے کم وبیش ایک لاکھ چوبیس ہزار انبیائے کرام کو بھیجا اور ان کو بہت سے معجزات و صفات اور دیگر کمالات سے نوازا۔ اور ان میں سے کچھ انبیائے کر ام کا قراٰن پاک میں تذکرہ بھی فرمایا۔ اور ان انبیائے کرام میں سے حضرت عیسی (علیہ السلام) بھی ہیں۔ کہ جن کا قراٰن پاک میں متعدد مقامات پر ذکر آیا ہے۔ آپ (علیہ اسلام) اولوالعزم رسولوں میں سے ہیں۔ اللہ پاک نے آپ (علیہ السّلام) کو بہت سے معجزات وصفات عطا کیئے۔

آئیے معزز قارئین کرام ان صفات میں سے چند صفات ملاحظہ ہوں:۔

بغیر باپ کے پیدا ہونا : حضرت عیسیٰ علیہ السّلام کی ایک بڑی خوبی یہ ہے کہ آپ بغیر باپ کے پیدا ہوئے کہ جب حضرت مریم رضی اللہ عنہا کو فرشتے نے بیٹے کی خوشخبری سنائی تو آپ رضی الله عنہا نے فرمایا: قَالَتْ اَنّٰى یَكُوْنُ لِیْ غُلٰمٌ وَّ لَمْ یَمْسَسْنِیْ بَشَرٌ ترجَمۂ کنزُالایمان: بولی میرے لڑکا کہاں سے ہوگا مجھے تو نہ کسی آدمی نے ہاتھ لگایا ۔(پ16،مریم:20)

بچپن میں کلام کرنا : جب لوگوں نے حضرت مریم (رضی اللہ عنہا) پر تہمت لگائی تو آپ (علیہ السّلام) نے اپنی والدہ کا دودھ‎ پینا چھوڑ دیا اور لوگوں کی طرف توجہ ہو کر بات کرنا شروع کی۔ اور فرمایا : قَالَ اِنِّیْ عَبْدُ اللّٰهِ ﳴ اٰتٰىنِیَ الْكِتٰبَ وَ جَعَلَنِیْ نَبِیًّاۙ(۳۰) ترجمۂ کنزُالعِرفان: بچے نے فرمایا: بیشک میں اللہ کا بندہ ہوں ، اس نے مجھے کتاب دی ہے اور مجھے نبی بنایا ہے ۔ (پ16،مریم:30)

پرندے بنانا : ارشاد باری ہے : اَنِّیْۤ اَخْلُقُ لَكُمْ مِّنَ الطِّیْنِ كَهَیْــٴَـةِ الطَّیْرِ ترجمۂ کنزُالعِرفان: میں تمہارے لئے مٹی سے پرندے جیسی ایک شکل بناتا ہوں۔(پ3،اٰل عمرٰن‏: 49)

جب حضرت عیسیٰ (علیہ السّلام) نے نبوت کا دعوی کیا تو آپ نے لوگوں کی درخواست پر مٹی سے چمگادڑ کی صورت بنائی اور اس میں پھونک ماری تو وہ اڑنے لگی۔ (تفسیر خازن اٰل عمرٰن‏)

بیماروں کو شفا دینا : ارشاد باری ہے: وَ اُبْرِئُ الْاَكْمَهَ وَ الْاَبْرَصَ ترجَمۂ کنزُالایمان: اور میں شفا دیتا ہوں مادر زاد اندھے اور سپید داغ والے کو ۔(پ3،اٰل عمرٰن‏:49)

حضرت عیسیٰ (علیہ السّلام) کے پاس ایک دن میں پچاس پچاس ہزار مریضوں کا اجتماع ہو جاتا تھا۔ آپ (علیہ اسلام) دعا فرما کر ان کو تندرست کرتے اور اپنی رسالت پر ایمان لانے کی شرط کر لیتے۔ (تفسیر خازن)

مُردوں کو زندہ کرنا : ارشاد باری ہے: وَ اُحْیِ الْمَوْتٰى بِاِذْنِ اللّٰهِۚ ترجَمۂ کنزُالایمان: اور میں مُردے جلاتا ہوں اللہ کے حکم سے۔(پ3،اٰل عمرٰن‏:49) حضرت عبداللہ بن عباس (رضی اللہ عنہ) نے فرمایا کہ حضرت عیسیٰ (علیہ السلام) نے چار شخصوں کو زندہ کیا۔ (1) عازر (2) ایک بڑھیا کا لڑکا (3) ایک لڑکی جو شام کے وقت مری (4) سام بن نوح۔( تفسیر قرطبی، اٰل عمرٰن‏ )

غیب کی خبر دینا : ارشاد باری ہے : وَ اُنَبِّئُكُمْ بِمَا تَاْكُلُوْنَ وَ مَا تَدَّخِرُوْنَۙ-فِیْ بُیُوْتِكُمْؕ ترجَمۂ کنزُالایمان: اور تمہیں بتاتا ہوں جو تم کھاتے اور جو اپنے گھروں میں جمع کر رکھتے ہو۔(پ3،اٰل عمرٰن‏:49)آپ علیہ السّلام آدمی کو بتا دیتے تھے جو وہ کل کھا چکا اور جو آج کھائے گا اور جو اگلے وقت کے لیے تیار کر رکھا ہوتا۔(تفسیر جمل)

کلمۃُ الله : ارشاد باری ہے: اِذْ قَالَتِ الْمَلٰٓىٕكَةُ یٰمَرْیَمُ اِنَّ اللّٰهَ یُبَشِّرُكِ بِكَلِمَةٍ مِّنْهُۙ- ترجمۂ کنزالعرفان: اور یاد کرو جب فرشتو ں نے مریم سے کہا، اے مریم! اللہ تجھے اپنی طرف سے ایک خاص کلمے کی بشارت دیتا ہے ۔ (پ3، آلِ عمرٰن :45)حضرت عیسیٰ (علیہ السّلام) کو کلمۃ اللہ اس لئے کہا جاتا ہے کہ آپ علیہ السّلام کے جسم شریف کی پیدائش کلمہ "کن " سے ہوئی ۔ (تفسیر صراط الجنان)

اس کے علاوہ آپ (علیہ السّلام) کی اور بہت سی صفات کا قراٰن پاک میں تذکرہ آیا ہے۔ جہا کہ آپ کو روح الله ،وجیہ فی الدنیا فر مایا گیا۔ اللہ پاک سے دعا ہے کہ وہ ہمیں انبیائے کرام سے سچی محبت عطا فرمائے۔ اٰمین بجاہ النبی الامین صلَّی اللہ علیہ واٰلہٖ وسلَّم

ابتدائے دنیا سے لے کر انتہاء دنیا تک اللہ پاک نے مختلف قوموں کے لیے مختلف انبیا و رسولوں کو بھیجا جو اللہ پاک کی طرف بلاتے اور نیکی کا حکم دیتے اور برائی سے منع کرتے تھے یہ سلسلہ حضرت آدم (علیہ الصلاة والسّلام) سے شروع ہوا اور ہمارے پیارے آقا ( صلَّی اللہ علیہ واٰلہٖ وسلَّم) تک ختم ہوا۔ تمام انبیا و رسولوں کے الگ الگ مراتب و مناقب ہیں۔ ان میں سے جو بِن باپ کے پیدا ہوئے یعنی حضرت عیسیٰ (علیہ الصلاۃ والسّلام)۔ ان کی بھی قراٰنِ پاک میں کثیر صفات و معجزات ذکر کیئے گئے ہیں ۔

حضرت عیسیٰ (علیہ الصلاة والسّلام آسمان پر :

جب حضرت عیسیٰ (علیہ السّلام) نے یہودیوں کے سامنے اپنی نبوت کا اعلان کیا تو چونکہ یہودی تورات میں پڑھ چکے تھے کہ حضرت عیسیٰ (علیہ السّلام) ان کے دین کو منسوخ کردیں گے۔ اس لئے یہودی آپ کے دشمن ہو گئے ۔یہاں تک کہ جب حضرت عیسیٰ (علیہ السّلام) نے یہ محسوس فرما لیا کہ یہودی اپنے کفر پر اڑے رہیں گے اور وہ مجھے قتل کردیں گے۔ تو ایک دن آپ نے لوگوں کو مخاطب کرکے فرمایا : مَنْ اَنْصَارِیْۤ اِلَى اللّٰهِؕ- ترجَمۂ کنزُالایمان: کون میرے مددگار ہوتے ہیں اللہ کی طرف۔(پ3، آلِ عمرٰن:52) حواریوں نے یہ کہا: نَحْنُ اَنْصَارُ اللّٰهِۚ-اٰمَنَّا بِاللّٰهِۚ-وَ اشْهَدْ بِاَنَّا مُسْلِمُوْنَ(۵۲) ترجَمۂ کنزُالایمان: ہم دینِ خدا کے مددگار ہیں ہم اللہ پر ایمان لائے، اور آپ گواہ ہوجائیں کہ ہم مسلمان ہیں۔(پ3، آلِ عمرٰن:52)

باقی تمام یہودی اپنے کفر پر جمے رہے یہاں تک کہ جوشِ عداوت (دشمنی) میں ان یہودیوں نے آپ کے قتل کا منصوبہ بنا لیا اور ایک شخص کو یہودیوں نے جس کا نام "ططیانوس" تھا آپ کے گھر میں آپ کو قتل کر دینے کے لیے بھیجا۔ اتنے میں اچانک الله پاک نے حضرت جبرئیل (علیہ السّلام) کو ایک بدلی کے ساتھ بھیجا اور اس بدلی نے آپ کو آسمان کی طرف اٹھا لیا آپ کی والدہ جوش محبت میں آپ کے ساتھ چمٹ گئیں تو آپ نے فرمایا: اماں جان! اب قیامت کے دن ہماری اور آپ کی ملاقات ہوگی اور بدلی نے آپ کو آسمان پر پہنچا دیا اور یہ واقعہ بیت المقدس میں شب قدر کی مبارک رات میں وقوع پذیر ہوا۔

اس وقت آپ کی عمر شریف بقول علامہ جلالدین سیوطی (رحمۃُ اللہ علیہ) (33) برس کی تھی ۔ بقول علامہ زرقانی شارح مواہب (رحمۃُ اللہ علیہ) اس وقت آپ کی عمر شریف (120) برس کی تھی۔

جب "ططیانوس" بہت دیر مکان سے باہر نہیں آیا تو یہودیوں نے مکان میں گھس کر دیکھا تو اللہ پاک نے "ططیانوس " کو حضرت عیسی (علیہ السّلام) کی شکل بنا دیا اور یہودیوں نے "ططیانوس " کو حضرت عیسی سمجھ کر قتل کر دیا۔ اس کے بعد جب "ططیانوس " کے گھر والوں نے ۔ غور سے دیکھا تو صرف چہرہ حضرت عیسی (علیہ الصلاة والسّلام) کا تھا باقی سارا بدن " ططیانوس " ہی کا تھا تو اس کے اہل خاندان نے کہا کہ اگر یہ مقتول عیسی (علیہ السّلام) ہے تو ہمارا آدمی ططیانوس کہاں ہیں؟ اور اگر یہ ططیانوس ہے تو حضرت عیسی (علیہ السّلام) کہاں ہیں ؟ اس پر خود یہودیوں میں جنگ و جدال کی نوبت آگئی اور خود یہودیوں نے ایک دوسرے کو قتل کرنا شروع کر دیا۔ اور بہت سے یہودی قتل ہو گئے۔ قراٰن پاک میں اللہ پاک نے اس واقعہ کو بیان فرمایا ۔ ( عجائب القراٰن و غرائب القراٰن ،ص 75،74)

وَ مَكَرُوْا وَ مَكَرَ اللّٰهُؕ-وَ اللّٰهُ خَیْرُ الْمٰكِرِیْنَ۠(۵۴) اِذْ قَالَ اللّٰهُ یٰعِیْسٰۤى اِنِّیْ مُتَوَفِّیْكَ وَ رَافِعُكَ اِلَیَّ وَ مُطَهِّرُكَ مِنَ الَّذِیْنَ كَفَرُوْا وَ جَاعِلُ الَّذِیْنَ اتَّبَعُوْكَ فَوْقَ الَّذِیْنَ كَفَرُوْۤا اِلٰى یَوْمِ الْقِیٰمَةِۚ-ثُمَّ اِلَیَّ مَرْجِعُكُمْ فَاَحْكُمُ بَیْنَكُمْ فِیْمَا كُنْتُمْ فِیْهِ تَخْتَلِفُوْنَ(۵۵) ترجمہ کنز الایمان : اور کافروں نے مکر کیا ا ور اللہ نے ان کے ہلاک کی خفیہ تدبیر فرمائی اور اللہ سب سے بہتر چھپی تدبیر والا ہے۔ یاد کرو جب اللہ نے فرمایا اے عیسٰی میں تجھے پوری عمر تک پہنچاؤں گا۔اور تجھے اپنی طرف اٹھالوں گا اور تجھے کافروں سے پاک کردوں گا اور تیرے پیروؤں کو قیامت تک تیرے منکروں پر غلبہ دوں گا پھر تم سب میری طرف پلٹ کر آؤگے تو میں تم میں فیصلہ فرمادوں گا جس بات میں جھگڑتے ہو۔(پ3، آلِ عمرٰن:55،54)

آپ کے آسمان پر چلے جانے کے بعد حضرت مریم (رضی اللہ عنہا) نے چھ (6) برس دنیا میں رہ کر وفات پائی ہے۔ (عجائب القراٰن وغرائب القراٰن ،ص75)

(بخاری و مسلم) کی روایت ہے کہ قرب قیامت کے وقت۔ حضرت (عیسی علیہ السّلام) زمین پر اتریں گے اور حضور(علیہ الصلاۃ و السّلام) کی شریعت پر عمل کریں گے اور دجال، خنزیر کو قتل کریں گے اور صلیب کو ٹوریں گے اور سات برس تک دنیا میں عدل فرما کر وفات پائیں گے اور مدینہ منورہ میں گنبد خضراء میں مدفون ہونگے۔ ( تفسیر جمل علی الجلالین، 1/ 427 )

الله پاک سےدعا ہے حضرت عیسیٰ (علیہ السّلام) کے صدقہ ہم سب کی پریشانیاں دور فرمائے۔ اٰمین بجاہ النبی الکریم (صلَّی اللہ علیہ واٰلہٖ وسلَّم)

آپ علیہ السّلام کا نام عیسیٰ ہے اور آپ کا نسب حضرت داؤد علیہ السّلام سے جا ملتا ہے۔ آپ علیہ السّلام کی کنیت ابن مریم جبکہ آپ کے القاب مسیح کلمۃُ اللہ اور روحُ الله ہیں۔ آپ علیہ السّلام اللہ کے مقبول بندے ، برگزیدہ نبی اور اولو العزم والے رسول ہیں۔ آپ علیہ السّلام کی ولادت قدرت الہی کا حیرت انگیز نمونہ ہے۔ آپ علیہ السّلام حضرت مریم سے بغیر باپ کے پیدا ہوئے، بنی اسرائیل کی طرف رسول بنا کر بھیجے گئے۔ یہودیوں نے آپ کے قتل کی سازش کی تو اللہ نے آپ کو آسمان پر زندہ اٹھا لیا اور اب قربِ قیامت میں دوبارہ زمین میں تشریف لائیں گے، ہمارے نبی کی شریعت پر عمل کریں گے، صلیب کو توڑیں گے ،خنزیر اور دجال کو قتل کریں گے ،40 سال تک زمین پر قیام فرمائیں گے پھر وصال کے بعد مدینہ منورہ میں حضور کے حجرے میں مدفون ہوں گے۔ اللہ نے اپنے کلام میں ان کی صفات کو ذکر کیا ہے جن کا بیان ذیل میں کیا جائے گا۔

(2،1)اللہ کے معزز اور مقرب بندے: حضرت عیسی علیہ السّلام اللہ پاک کے معزز اور مقرب بندے ہیں۔ جیسا کہ ارشاد باری ہے : وَجِیْهًا فِی الدُّنْیَا وَ الْاٰخِرَةِ وَ مِنَ الْمُقَرَّبِیْنَۙ(۴۵) ترجمۂ کنزالعرفان: وہ دنیا و آخرت میں بڑی عزت والا ہوگا اور اللہ کے مقرب بندوں میں سے ہوگا۔(پ3،اٰل عمرٰن‏:45)

(3) چھوٹی عمر میں کلام کرنے والا: حضرت عیسی علیہ السّلام نے بڑی عمر کے ساتھ ساتھ چھوٹی عمر میں بھی کلام کیا۔ جس کے بارے میں ارشادِ الہی ہے : وَ یُكَلِّمُ النَّاسَ فِی الْمَهْدِ وَ كَهْلًا ترجمۂ کنزالعرفان: اور وہ لوگوں سے جھولے میں اور بڑی عمر میں بات کرے گا ۔(پ3،اٰل عمرٰن‏: 46)

(4) خاص بندے : حضرت عیسیٰ علیہ السّلام اللہ کے خاص بندوں میں سے ہیں جس کا ذکر کلامُ اللہ میں اس طرح ہے : وَّ مِنَ الصّٰلِحِیْنَ(۴۶) ترجمۂ کنزالعرفان: اور خاص بندوں میں سے ہوگا۔(پ3،اٰل عمرٰن‏: 46)

(6،5)نماز اور زکوٰۃ کے پابند: حضرت عیسیٰ علیہ السّلام کو اللہ نے نماز اور زکوٰۃ کا حکم دیا۔ وَ اَوْصٰنِیْ بِالصَّلٰوةِ وَ الزَّكٰوةِ مَا دُمْتُ حَیًّاﳚ(۳۱) ترجَمۂ کنزُالایمان: اور مجھے نماز و زکوٰۃ کی تاکید فرمائی جب تک جیوں۔(پ16،مریم:31)

(7) ماں سے اچھا سلوک کرنا ۔ حضرت عیسیٰ علیہ السّلام کا ایک وصف یہ ہے کہ وہ اپنی ماں سے اچھا سلوک کرتے تھے جو قراٰن میں اس طرح مذکور ہے۔ وَّ بَرًّۢا بِوَالِدَتِیْ٘ ترجَمۂ کنزُالایمان: اور اپنی ماں سے اچھا سلوک کرنے والا۔(پ16،مریم:32)

(8) تکبر اور شقاوت سے محفوظ : حضرت عیسیٰ علیہ السّلام مذموم صفات سے محفوظ تھے۔ وَ لَمْ یَجْعَلْنِیْ جَبَّارًا شَقِیًّا(۳۲) ترجَمۂ کنزُالایمان: اور مجھے زبردست بدبخت نہ کیا۔(پ16 ، مریم:32)

(9) عاجزی اور انکساری: حضرت عیسیٰ علیہ السّلام محمود صفات کے پیکر تھے۔ اللہ پاک نے اس کے بارے میں بھی ارشاد فرمایا: لَنْ یَّسْتَنْكِفَ الْمَسِیْحُ اَنْ یَّكُوْنَ عَبْدًا لِّلّٰهِ ترجمۂ کنزُالعِرفان: نہ تو مسیح اللہ کا بندہ بننے سے کچھ عار کرتا ہے۔ (پ6،النسآء : 172)

(10) صاحب انجیل : چار مشہور آسمانی کتابوں میں سے ایک کتاب انجیل حضرت عیسیٰ علیہ السّلام پر نازل ہوئی۔ جس کا ذکر قراٰن مجید میں یوں ہے : وَ اٰتَیْنٰهُ الْاِنْجِیْلَ ترجَمۂ کنزُالایمان: اور ہم نے اسے انجیل عطا کی ۔ (پ 6 ، المآئدۃ : 46 )

تمام انبیائے کرام علیہم السّلام اعلٰی صفات کے جامع ہوتے جس سے لوگوں کو یہ سبق ملتا کہ نبی علیہ السّلام کی اعلی صفات کو اپنا کر اپنی زندگی و معاشرے کو سنوارنے میں اعلٰی کردار ادا کریں۔ ہر نبی کو طرح طرح کی صفات سے نوازا گیا، کسی کو تمام انسانوں کے والد ہونے کا شرف حاصل تو کوئی آدمِ ثانی(یعنی دوسرے والد)، کسی سے خدا ہم کلام ہوا اور کسی کو جنت و جہنم کی سیر کرائی، کسی کو آبِ حیات پلایا اور کوئی وہ جسے شیرنی نے دودھ پلایا، کسی کی آواز دلنشین تو کسی کو حسین صورت سے نوازا گیا، الغرض طرح طرح کی صفات سے نوازا گیا۔ اسی طرح اللہ پاک نے اپنے پیارے نبی حضرت عیسٰی علیہ السّلام کو بھی بہت سی صفات سے نوازا۔ وہ صفاتِ عیسٰی علیہ السّلام جن کا ذکر قراٰن مجید میں ہوا مندرجہ ذیل ہیں:

(1) حضرتِ عیسٰی علیہ السّلام بندۂ خدا ہونے پر کوئی شرم و عار فرمانے والے نہیں تھے، اللہ پاک ارشاد فرماتا ہے: لَنْ یَّسْتَنْكِفَ الْمَسِیْحُ اَنْ یَّكُوْنَ عَبْدًا لِّلّٰهِ ترجمۂ کنزُالعِرفان: نہ تو مسیح اللہ کا بندہ بننے سے کچھ عار کرتا ہے۔ (پ6،النسآء : 172) تفسیر صراط الجنان میں ہے : عیسائی حضرت عیسیٰ علیہ السّلام کو اللہ کا بندہ کہنے کو عیسیٰ علیہ السّلام پر عیب لگانا کہتے تھے تو اس کے جواب میں یہ آیت نازل ہوئی۔ نیز اللہ پاک کا بندہ ہونا باعثِ فخر ہے نہ کہ باعثِ شرم۔ (صراط الجنان،2/410 ، ملخصاً)

(2تا5) آپ علیہ السّلام کَلِمة اللہ، بغیر باپ کے حضرتِ مریم رضی اللہ عنہا کے بیٹے، مسیح اور معزز و مقرب تھے، جیسا کہ فرمانِ باری ہے : اِذْ قَالَتِ الْمَلٰٓىٕكَةُ یٰمَرْیَمُ اِنَّ اللّٰهَ یُبَشِّرُكِ بِكَلِمَةٍ مِّنْهُۙ-اسْمُهُ الْمَسِیْحُ عِیْسَى ابْنُ مَرْیَمَ وَجِیْهًا فِی الدُّنْیَا وَ الْاٰخِرَةِ وَ مِنَ الْمُقَرَّبِیْنَۙ(۴۵) ترجمۂ کنزالعرفان: اور یاد کرو جب فرشتو ں نے مریم سے کہا، اے مریم! اللہ تجھے اپنی طرف سے ایک خاص کلمے کی بشارت دیتا ہے جس کا نام مسیح ،عیسیٰ بن مریم ہوگا۔ وہ دنیا و آخرت میں بڑی عزت والا ہوگا اور اللہ کے مقرب بندوں میں سے ہوگا۔(پ3،اٰل عمرٰن‏:45) تفسیر صراط الجنان میں ہے : حضرت عیسیٰ علیہ السّلام کے بارے میں فرمایا کہ وہ اللہ پاک کا کلمہ ہیں ، نام مبارک عیسیٰ ہے، لقب مسیح ہے کیونکہ آپ علیہ السّلام مَس کر کے یعنی چھو کر شفا دیتے تھے، دنیا و آخرت میں عزت و وجاہت والے ہیں اور رب کریم کے مقرب بندے ہیں۔ اس آیت میں حضرت علیہ السّلام کی نسبت باپ کی بجائے ماں کی طرف کی گئی ،اس سے معلوم ہوا کہ حضرت عیسیٰ علیہ السّلام بغیر باپ کے صر ف ماں سے پیدا ہوئے ہیں کیونکہ اگر آپ علیہ السّلام کا کوئی باپ ہوتا تو یہاں آپ علیہ السّلام کی نسبت ماں کی طرف نہ ہوتی بلکہ باپ کی طرف ہوتی ۔(صراط الجنان،1/546 )

(6تا8) آپ علیہ السّلام چھوٹی عمر میں اور بڑی عمر میں کلام فرمانے والے تھے اور اللہ پاک کے خاص بندوں میں سے تھے ، جیسا کہ کلامِ پاک میں ذکر ہے: وَ یُكَلِّمُ النَّاسَ فِی الْمَهْدِ وَ كَهْلًا وَّ مِنَ الصّٰلِحِیْنَ(۴۶) ترجمۂ کنز الایمان: اور لوگوں سے بات کرے گا پالنے میں اور پکی عمر میں اور خاصوں میں ہوگا۔ (پ3 ،آل عمران:46) صراط الجنان میں ہے: حضرت عیسیٰ علیہ السّلام کی تین صفات یہاں بیان ہوئیں۔(1) بات کرنے کی عمر سے پہلے ہی کلام کریں گے۔(2) پکی عمر میں لوگوں سے کلام فرمائیں گے اور وہ یوں کہ آسمان سے اترنے کے بعد آپ علیہ السّلام لوگوں سے کلام فرمائیں گے، اور دَجال کو قتل کریں گے۔ (3)اللہ پاک کے خاص بندوں میں سے ہیں۔(صراط الجنان، 1/546،547،ملخصاً)

(9تا11) آپ علیہ السّلام مبارک تھے، نماز کے پابند اور زکوة کی ادائیگی پر تاکید فرمانے والے تھے۔ جیسا کہ آپ کا قول قراٰن مجید میں ذکر : وَّ جَعَلَنِیْ مُبٰرَكًا اَیْنَ مَا كُنْتُ۪-وَ اَوْصٰنِیْ بِالصَّلٰوةِ وَ الزَّكٰوةِ مَا دُمْتُ حَیًّاﳚ(۳۱) ترجمۂ کنز العرفان : اور اس نے مجھے مبارک بنایا ہے خواہ میں کہیں بھی ہوں اور اس نے مجھے نماز اور زکوٰۃ کی تاکید فرمائی ہے جب تک میں زندہ رہوں ۔ (پ16، مریم:31)صراط الجنان میں ہے: حضرت عیسیٰ علیہ السّلام نے فرمایا کہ مجھے نبوت عطا کرنے کے ساتھ ساتھ اللہ پاک نے مجھے لوگوں کے لئے نفع پہنچانے والا، خیر کی تعلیم دینے والا ، اللہ پاک کی طرف بلانے والا اور اس کی توحید اور عبادت کی دعوت دینے والا بنایا ہے خواہ میں کہیں بھی ہوں۔(صراط الجنان،6/95)

(13،12) آپ علیہ السّلام اپنی والدہ سے اچھا سلوک فرمانے والے تھے اور متکبر و بدنصیب نہ تھے جیسا کہ خود آپ علیہ السّلام فرماتے ہیں : وَّ بَرًّۢا بِوَالِدَتِیْ٘-وَ لَمْ یَجْعَلْنِیْ جَبَّارًا شَقِیًّا(۳۲) ترجمۂ کنزُالعِرفان: اور (مجھے) اپنی ماں سے اچھا سلوک کرنے والا (بنایا) اور مجھے متکبر، بدنصیب نہ بنایا۔ (پ16، مریم:32)

مذکورہ صفات میں سے چند نبوت کے ساتھ خاص ہیں اور کچھ ایسی ہیں جنہیں ہر مسلمان کو اپنانا چاہیے، جیسا کہ والدین کی فرمانبرداری،نماز و زکوٰة کی پابندی سے ادائیگی، متکبر نہ ہونا اور عاجزی و انکساری اختیار کرنا وغیرہ۔ انبیائے کرام کی صفات کو پڑھنے کا ایک مقصد یہ بھی ہے کہ ان کو سمجھیں اور جن پر امتی عمل کر سکتا ہو ان پر عمل پیرا ہو کر اپنی زندگی سنواریں۔

اللہ پاک ہمیں انبیائے کرام کے نقشِ قدم پر عمل پیرا ہونے کی توفیق مرحمت فرمائے۔ اٰمین

اللہ پاک قراٰن مجید فرقان حمید میں ارشاد فرماتا ہے : تِلْكَ الرُّسُلُ فَضَّلْنَا بَعْضَهُمْ عَلٰى بَعْضٍۘ ترجمۂ کنزالایمان: یہ رسول ہیں کہ ہم نے ان میں ایک کو دوسرے پر افضل کیا۔ (پ3،البقرۃ:253)

قراٰن پاک میں اللہ رب العزت نے اپنے رسولوں کے بارے میں فرمایا کہ ہم نے اپنے رسولوں میں بعض کو بعض پر فضیلت دی۔ نفسِ رسالت میں تمام مرسلین برابر ہیں مگر ان کے مراتب میں ان کو فضیلت حاصل ہے اور ان فضیلت والے رسولوں میں سے بھی بعض کو اللہ رب العزت نے اولو العزم کے لقب سے قراٰن مجید میں ذکر فرمایا اور انہی اولو العزم میں سے ایک رسول حضرت عیسیٰ علیہ السّلام ہیں کہ جن کو اللہ رب العزت نے بڑے مقام و مرتبے سے نوازا اور آپ بھی اولو العزم رسولوں میں سے ایک ہیں ۔

قراٰن مجید میں بھی اللہ رب العزت نے آپ کے بہت سے مقامات پر فضائل بیان فرمائے ان شاء اللہ ان ہی فضائل میں سے چند کو یہاں قراٰن مجید کی روشنی میں ذکر کیا جائے گا۔

وَ اٰتَیْنَا عِیْسَى ابْنَ مَرْیَمَ الْبَیِّنٰتِ وَ اَیَّدْنٰهُ بِرُوْحِ الْقُدُسِؕ ترجمۂ کنزالایمان: اور ہم نے عیسیٰ بن مریم کو کھلی نشانیاں عطا فرمائیں اور پاک روح سے اس کی مدد کی۔(پ 3،البقرۃ : 253)

دوسرے مقام پر فرمایا: وَ رَسُوْلًا اِلٰى بَنِیْۤ اِسْرَآءِیْلَ ﳔ اَنِّیْ قَدْ جِئْتُكُمْ بِاٰیَةٍ مِّنْ رَّبِّكُمْ ﳐ اَنِّیْۤ اَخْلُقُ لَكُمْ مِّنَ الطِّیْنِ كَهَیْــٴَـةِ الطَّیْرِ فَاَنْفُخُ فِیْهِ فَیَكُوْنُ طَیْرًۢا بِاِذْنِ اللّٰهِۚ-وَ اُبْرِئُ الْاَكْمَهَ وَ الْاَبْرَصَ وَ اُحْیِ الْمَوْتٰى بِاِذْنِ اللّٰهِۚ-وَ اُنَبِّئُكُمْ بِمَا تَاْكُلُوْنَ وَ مَا تَدَّخِرُوْنَۙ-فِیْ بُیُوْتِكُمْؕ-اِنَّ فِیْ ذٰلِكَ لَاٰیَةً لَّكُمْ اِنْ كُنْتُمْ مُّؤْمِنِیْنَۚ(۴۹) ترجمۂ کنز الایمان: بنی اسرائیل کی طرف یہ فرماتا ہوا کہ میں تمہارے پاس ایک نشانی لایا ہوں تمہارے رب کی طرف سے کہ میں تمہارے لیے مٹی سے پرند کی سی مورت بناتا ہوں پھر اس میں پھونک مارتا ہوں تو وہ فوراً پرند ہو جاتی ہے اللہ کے حکم سے اور میں شفا دیتا ہوں مادر زاد اندھے اور سپید داغ والے کو اور میں مُردے جلاتا ہوں اللہ کے حکم سے اور تمہیں بتاتا ہوں جو تم کھاتے اور جو اپنے گھروں میں جمع کر رکھتے ہو بے شک ان باتوں میں تمہارے لیے بڑی نشانی ہے اگر تم ایمان رکھتے ہو۔(پ3، آلِ عمرٰن :49)

پیارے اسلامی بھائیو! ان آیاتِ بینات میں رب جل جلالہ نے بیان فرما دیا کہ اے بنی اسرائیل تمہاری طرف جو نبی مبعوث فرمایا وہ عیسیٰ بن مریم ہیں اور وہ تمہاری طرح نہیں بلکہ وہ اللہ کے رسول اور اس کی نشانیوں میں سے ایک نشانی ہیں اور پھر ان کی شان بیان فرمائی کہ عیسیٰ علیہ السّلام وہ نبی ہیں کہ جنہیں ان کے رب نے بینات بھی عطا فرمائے اور ان کی روح القدس کے ذریعے مدد بھی فرمائی۔ بینات سے مراد آپ کے معجزات، دلائل ہیں یا تو تورات و انجیل ہے اور روح القدس سے مراد حضرت جبرئیل علیہ السّلام ہیں۔

اللہ پاک نے جو آپ کو معجزات عطا فرمائے جن کو آپ کی نبوت پر دلیل بنایا اس کو بھی اللہ پاک نے قراٰن مجید میں بیان فرمایا کہ یہ عیسیٰ بن مریم علیہ السّلام ہیں جو کہ تمہاری ( بنی اسرائیل کی ) طرف مبعوث کئے گئے اور ان کی شان یہ ہے کہ یہ مٹی سے ایک پرندے کے ہیئت پر ایک پرندہ بناتے ہیں پھر اس میں پھونکتے ہیں تو اللہ رب العزت کے حکم سے وہ ایک پرندہ بن جاتا ہے ۔ اور اللہ پاک نے ان کو یہ شان بھی عطا فرمائی ہے کہ یہ مادر زاد (پیدائشی)اندھے کو اور برص (کوڑھ) کے مریض کو شفا دے دیتے ہیں اور یہ مُردوں کو اللہ کے حکم سے زندہ کر دیتے ہیں حتی کہ یہ تمہیں اس کے بارے میں خبر دیتے ہیں جو تم کھاتے ہو اور جو تم اپنے گھروں میں جمع کر کے رکھتے ہو ۔

ان تمام معجزات و فضائل کو بیان کرنے کا مقصد یہ تھا کہ حضرت عیسیٰ علیہ السّلام اللہ پاک کے نبی و رسول ہیں تم ان کی اطاعت کرو ان پر ایمان لاؤ اور جس کا یہ حکم دیں ان کو پورا کرو اور اگر تم ان کی نبوت میں ان کی رسالت میں شک ہو تو ان کے معجزات میں ان کے کمالات میں غور کرو کہ اللہ رب العزت جس کو اتنی شانیں عطا فرما رہا ہے وہ یقیناً ہماری طرح نہیں اور یقیناً اس پر ایمان لانا اور اس کی اطاعت و فرمانبرداری کرنا ضروری ہے پھر فرمایا کہ اے بنی اسرائیلیوں اس میں تمہارے لیے بڑی نشانی ہے اگر تم ایمان رکھتے ہو تو۔

اللہ پاک کی شان یہ ہے کہ اپنے نبیوں کو معجزات بھی ان کے زمانے کے مطابق عطا فرماتا ہے جیسا کہ جب حضرت موسیٰ علیہ السّلام کو مبعوث فرمایا تو جب جادو کو عظیم سمجھنے کا دور تھا تو آپ کو معجزات بھی اس کے مطابق عطا فرمائے اور جب حضرت عیسیٰ علیہ السّلام کو مبعوث فرمایا تب اطباء اور علم طب کا دور تھا تو اللہ رب العزت نے آپ کو ایسے معجزات عطا فرمائے کہ جس سے تمام اطباء کی عقلیں دنگ رہ جائیں اور وہ یہ دیکھے کہ جو ان لوگوں کے لیے ناممکن تھا اور جس کو وہ کبھی نہ کر سکتے تھے اللہ پاک کا رسول وہ بھی کر سکتا ہے۔ اللہ پاک نے اپنے رسول کو اس کی بھی شان عطا فرمائی ہے۔ جیسے مردوں کو زندہ کرنا اور مادر زاد اندھوں کو بینا کرنا وغیرہ اور اسی طرح جب نبی کریم صلَّی اللہ علیہ واٰلہٖ وسلَّم کو مبعوث فرمایا تب فصحاء و بلغاءِ عرب کا دور تھا اس لیے اللہ رب العزت نے حضور صلَّی اللہ علیہ واٰلہٖ وسلَّم کو قراٰن مجید جیسا عظیم معجزہ عطا فرمایا کہ قیامت تک کفار کو چیلنج فرمادیا کہ اگر تم قراٰن مجید کے بارے میں شک میں ہو تو اس جیسی ایک آیت لے آؤ لیکن صدیاں گزر چکیں آج تک کوئی اس جیسی ایک آیت نہ لا پایا اور نہ قیامت تک لا پائے گا۔ (ماخوذ از تفسیر کبیر )

اور حضرت عیسیٰ علیہ السّلام کے بارے میں افراط و تفریط کی گئی اس طرح کہ نصرانیوں نے حد سے زیادہ محبت میں آکر آپ کو آپ کی شان سے بہت بڑا کردیا اور یہودیوں نے آپ سے شدید بغض کے وجہ سے آپ کی اور آپ کی والدہ حضرت بی بی مریم رضی اللہ عنہا کی بہت گستاخیاں کی۔ اس کا اللہ رب العزت نے قراٰن مجید میں ہی رد فرما دیا اور حضرت عیسیٰ علیہ السّلام کی حقیقی شان کو بھی بیان فرما دیا ۔ اللہ رب العزت فرماتا ہے: اِنَّمَا الْمَسِیْحُ عِیْسَى ابْنُ مَرْیَمَ رَسُوْلُ اللّٰهِ وَ كَلِمَتُهٗۚ-اَلْقٰىهَاۤ اِلٰى مَرْیَمَ وَ رُوْحٌ مِّنْهُ٘-فَاٰمِنُوْا بِاللّٰهِ وَ رُسُلِهٖ ۚ۫-وَ لَا تَقُوْلُوْا ثَلٰثَةٌؕ-اِنْتَهُوْا خَیْرًا لَّكُمْؕ-اِنَّمَا اللّٰهُ اِلٰهٌ وَّاحِدٌؕ-سُبْحٰنَهٗۤ اَنْ یَّكُوْنَ لَهٗ وَلَدٌۘ-لَهٗ مَا فِی السَّمٰوٰتِ وَ مَا فِی الْاَرْضِؕ-وَ كَفٰى بِاللّٰهِ وَكِیْلًا۠(۱۷۱) ترجمۂ کنزالایمان: مسیح عیسیٰ مریم کا بیٹا اللہ کا رسول ہی ہے اور اس کا ایک کلمہ کہ مریم کی طرف بھیجا اور اس کے یہاں کی ایک روح تو اللہ اور اس کے رسولوں پر ایمان لاؤ اور تین نہ کہو باز رہو اپنے بھلے کو اللہ تو ایک ہی خدا ہے پاکی اُسے اس سے کہ اس کے کوئی بچہ ہو اُسی کا مال ہے جو آسمانوں میں ہے اور جو کچھ زمین میں اور اللہ کافی کارساز(کام بنانے والا) ہے۔(پ6 ،النسآء : 171)

پیارے پیارے اسلامی بھائیو! دیکھا آپ نے کہ اللہ پاک نے اپنے انبیاء علیہم السّلام کو کس طرح شانیں عطا فرماتا ہے کیونکہ وہ تمام لوگوں میں سب سے بہترین لوگ ہوتے ہیں اللہ پاک کے قریب تر ہوتے ہیں اس لیے اللہ جل جلالہ ان کے مقامات کو بھی تمام لوگوں سے اعلی رکھتا ہے اور جو ان سے بغض رکھے یا ان کی بے ادبی و گستاخی کرے اللہ پاک اس کو نشان عبرت بنا دیتا ہے ۔

اللہ رب العزت ہمیں اپنے تمام انبیاء علیہم السّلام کا ادب کرنے اور ان کے مقام کو سمجھنے کی توفیق عطا فرمائے اور ان کے صدقے ہماری بخشش و مغفرت فرمائے۔

الله پاک نے انبیائے کرام میں بعض کو بعض پر فضیلت عطا فرمائی۔ جیساکہ قراٰن پاک میں ارشادِ رب العباد ہے: تِلْكَ الرُّسُلُ فَضَّلْنَا بَعْضَهُمْ عَلٰى بَعْضٍۘ ترجمۂ کنزالایمان: یہ رسول ہیں کہ ہم نے ان میں ایک کو دوسرے پر افضل کیا۔(پ3،البقرۃ:253) بالخصوص 5 اولو العزم رسل(محمد مصطفی، ابراھیم، موسیٰ ،عیسیٰ اور نوح علی نبینا وعلیہم الصلوۃ والسّلام) کو سب پر فائق فرمایا، انہی میں سے حضرت عیسی علیہ السّلام کا ذکر قراٰنِ پاک سے پڑھنے کی سعادت حاصل کرتے ہیں۔

قراٰن پاک میں کثرت سے عیسیٰ علیہ السّلام کا ذکر موجود ہے۔ جو آپ کے بلند و بالا مقام کو مزید واضح کرتا ہے یہاں چند مقامات حصول برکت کیلئے ذکر کیے جاتے ہیں۔

(1)آمد سے قبل آمد کی خبر : حضرت عیسیٰ علیہ السّلام کی تشریف آوری سے قبل ہی فرشتوں نے آپ کی والدہ کو آمد کی خبر سنا دی تھی جس کو قراٰن پاک نے یوں حکایت کیا۔

وَ اِذْ قَالَتِ الْمَلٰٓىٕكَةُ یٰمَرْیَمُ اِنَّ اللّٰهَ اصْطَفٰىكِ وَ طَهَّرَكِ وَ اصْطَفٰىكِ عَلٰى نِسَآءِ الْعٰلَمِیْنَ(۴۲) ترجمۂ کنزالایمان: اور جب فرشتوں نے کہا، اے مریم بیشک اللہ نے تجھے چن لیا اور خوب ستھرا کیا اور آج سارے جہاں کی عورتوں سے تجھے پسند کیا۔

(2)بغیر باپ کے پیدائش :قراٰن پاک میں حضرت عیسیٰ علیہ السّلام کو آدم علیہ السّلام سے تشبیہ دی گئی جس کی مفسرین نے یہ وجہ ارشاد فرمائی کہ جیسے آدم علیہ السّلام بغیر ماں باپ کے پیدا ہوئے تھے اسی طرح عیسیٰ علیہ السّلام بغیر باپ کے پیدا کیے گئے۔ قراٰن پاک میں ارشاد ربانی ہے: اِنَّ مَثَلَ عِیْسٰى عِنْدَ اللّٰهِ كَمَثَلِ اٰدَمَؕ-خَلَقَهٗ مِنْ تُرَابٍ ثُمَّ قَالَ لَهٗ كُنْ فَیَكُوْنُ(۵۹) ترجمۂ کنزالایمان: عیسیٰ کی کہاوت اللہ کے نزدیک آدم کی طرح ہے اسے مٹی سے بنایا پھر فرمایا ہو جا وہ فوراً ہو جاتا ہے۔(پ 3 ، آل عمران : 59)

(3)جھولے میں کلام: عیسیٰ علیہ السّلام کا ایک وصف اور شرف قراٰن نے یہ بھی بیان کیا کہ آپ نے بات کرنے کی عمر سے قبل ہی کلام کیا۔ جس کو حکایتًا یوں بیان کیا گیا: وَ یُكَلِّمُ النَّاسَ فِی الْمَهْدِ وَ كَهْلًا وَّ مِنَ الصّٰلِحِیْنَ(۴۶) ترجمۂ کنز الایمان: اور لوگوں سے بات کرے گا پالنے میں اور پکی عمر میں اور خاصوں میں ہوگا۔ (پ3 ،آل عمران:46)

(4)روحِ قدس کی تائید : قراٰنِ پاک میں ارشاد ربِّ لم یزل ہے: وَ اٰتَیْنَا عِیْسَى ابْنَ مَرْیَمَ الْبَیِّنٰتِ وَ اَیَّدْنٰهُ بِرُوْحِ الْقُدُسِؕ ترجمۂ کنزالایمان: اور ہم نے عیسیٰ بن مریم کو کھلی نشانیاں عطا فرمائیں اور پاک روح سے اس کی مدد کی۔(پ3،البقرۃ :253) تفسیر صراط الجنان میں ہے۔ حضرت عیسیٰ علیہ السّلام کے آسمان پر اٹھائے جانے تک حضرت جبرئیل علیہ السّلام سفر و حضر میں کبھی آپ سے جدا نہ ہوئے اور حضرت جبرئیل امین علیہ السّلام کی تائید حضرت عیسیٰ علیہ السّلام کی بہت بڑی فضیلت ہے۔(صراط الجنان)

(5)سرکار صلَّی اللہ علیہ واٰلہٖ وسلَّم کی آمد کی خبر :حضرت عیسیٰ علیہ السّلام نے نام لیکر ہمارے پیارے آقا صلَّی اللہ علیہ واٰلہٖ وسلَّم کی آمد کی خوشخبری سنائی۔ جس کو رب کریم نے خود قراٰن میں حکایت فرمایا۔ چنانچہ ارشاد ہوا: وَ مُبَشِّرًۢا بِرَسُوْلٍ یَّاْتِیْ مِنْۢ بَعْدِی اسْمُهٗۤ اَحْمَدُؕ ترجمۂ کنزالایمان: اور ان رسول کی بشارت سناتا ہوا جو میرے بعد تشریف لائیں گے اُن کا نام احمد ہے ۔(پ28،الصف:6)

(6) رب تعالیٰ کا اپنی جانب اٹھا لینا: آپ علیہ السّلام کو رب کریم نے اپنی طرف اٹھا لیا اور قرب قیامت میں آپ دوبارہ نزول فرمائیں گے اور نبی پاک صلَّی اللہ علیہ واٰلہٖ وسلَّم کے دین ہی کی تبلیغ فرمائیں گے۔ آپ کا اٹھایا جانا قراٰنِ پاک میں ذکر ہوا چنانچہ ارشاد ہوا: بَلْ رَّفَعَهُ اللّٰهُ اِلَیْهِؕ-وَ كَانَ اللّٰهُ عَزِیْزًا حَكِیْمًا(۱۵۸) ترجمۂ کنزالایمان: بلکہ اللہ نے اسے اپنی طرف اٹھالیا اور اللہ غالب حکمت والا ہے۔(پ6،النسآء:158)

الله پاک قابل اعتقاد باتوں کا عقیدہ رکھنا، قابلِ حفظ باتوں کو یاد کرنے اور قابل عمل باتوں پر عمل کرنے کی توفیق عطا فرمائے۔ اٰمین

بنی نوع انسان کی اصلاح کے لیے اللہ پاک نے اپنے برگزیدہ انبیائے کرام و رسل عظام کو مبعوث فرمایا تاکہ یہ لوگ ہدایت پا کر ایک اللہ وحدہٗ لاشریک کی عبادت کریں۔ اللہ پاک نے اپنے ان برگزیدہ انبیائے کرام علیہم السّلام و رسل عظام کو مختلف ادوار میں مختلف بستیوں اور مختلف قوموں کی طرف بھیجا۔ان انبیائے کرام علیہم السّلام میں بعض کو بعض پر فضیلت عطا فرمائی جیسا کہ اس کا بیان قراٰن پاک کے تیسرے پارے میں کے شروع میں ملتا ہے۔ ان بزرگ ہستیوں بعض ہستیاں انبیاء و رسل کے مقام پر فائز ہیں اور بعض صرف نبوت کے درجے پر فائز ہیں لیکن ان میں سے ادنیٰ کوئی نہیں سب اعلی اعلی درجوں پر فائز ہیں۔ اور ان میں پانچ انبیائے کرام علیہم السّلام ایسے ہیں کہ جو اولوالعزم انبیائے کرام علیہم السّلام کے درجے پر فائز ہیں۔

اور سب میں افضل ہمارے آقا و مولیٰ سیّدالمرسلین صلَّی اللہ علیہ واٰلہٖ وسلَّم ہیں حضور (صلَّی اللہ علیہ واٰلہٖ وسلَّم) کے بعد سب سے بڑا مرتبہ حضرت ابراہیم خلیل اﷲ علیہ السّلام کا ہے،پھر حضرت موسیٰ علیہ السّلام، پھر حضرت عیسیٰ علیہ السّلام اور حضرت نوح علیہ السّلام کا، اِن حضرات کو مرسلین اُولو العزم کہتے ہیں، اور یہ پانچوں حضرات باقی تمام انبیا و مرسلین انس و مَلَک و جن و جمیع مخلوقاتِ الٰہی سے افضل ہیں ۔ جس طرح حضور (صلَّی اللہ علیہ واٰلہٖ وسلَّم) تمام رسولوں کے سردار اور سب سے افضل ہیں ، بلا تشبیہ حضور (صلَّی اللہ علیہ واٰلہٖ وسلَّم) کے صدقہ میں حضور (صلَّی اللہ علیہ واٰلہٖ وسلَّم) کی اُمت تمام اُمتوں سے افضل۔ بالخصوص یہاں پر حضرت عیسٰی علیہ السّلام کے بارے میں گفتگو کرنی ہے۔ حضرت عیسٰی علیہ السّلام اولوالعزم انبیائے کرام علیہم السّلام میں سے تیسرے نمبر پر ہیں۔ حضرت عیسٰی علیہ السّلام اللہ پاک کی بارگاہ میں بڑی شان والے نبی ہیں اللہ پاک نے حضرت عیسٰی علیہ السّلام کو مختلف اوصاف و معجزات سے نوازا ہے۔

قراٰن پاک میں جہاں جہاں اللہ کریم نے حضرت عیسیٰ علیہ السّلام کے اوصاف کا ذکر کیا ہے۔ ان آیات کے ذریعے سے آپ کے اوصاف ملاحظہ ہوں۔

آپ علیہ السّلام کا نامِ مبارک عیسی اور آپ کا نسب حضرت داؤد علیہ السّلام سے جا ملتا ہے۔

آپ علیہ السّلام کی کنیت ابن مریم اور اس کے علاوہ آپ کے تین القاب ہیں۔

( 1)مسیح : آپ علیہ السّلام چونکہ مریضوں کو چھو کر ٹھیک کر دیتے تھے اس لیے آپ علیہ السّلام کو مسیح کہا جاتا ہے۔

(2) کلمۃُ اللہ: آپ علیہ السّلام کے جسم شریف کی پیدائش کلمہ” کن“ سے ہوئی ماں اور باپ کے نطفہ سے نہ ہوئی اس لیے آپ علیہ السّلام کو کلمۃُ اللہ کہا جاتا ہے۔ فرمان باری ہے: اِنَّ مَثَلَ عِیْسٰى عِنْدَ اللّٰهِ كَمَثَلِ اٰدَمَؕ-خَلَقَهٗ مِنْ تُرَابٍ ثُمَّ قَالَ لَهٗ كُنْ فَیَكُوْنُ(۵۹) ترجمۂ کنز العرفان :بیشک عیسیٰ کی مثال اللہ کے نزدیک آدم کی طرح ہے جسے اللہ نے مٹی سے بنایا پھر اسے فرمایا: ’’ ہوجا ‘‘ تووہ فوراً ہو گیا۔(پ 3 ، آل عمران : 59)

(3)روح اللہ: اللہ پاک نے آپ علیہ السّلام کو اپنی طرف سے ایک خاص روح عطا فرمایا اس بناء پر آپ علیہ السّلام کو اللہ پاک نے روح اللہ فرمایا۔ فرمان باری ہے: اِنَّمَا الْمَسِیْحُ عِیْسَى ابْنُ مَرْیَمَ رَسُوْلُ اللّٰهِ وَ كَلِمَتُهٗۚ-اَلْقٰىهَاۤ اِلٰى مَرْیَمَ وَ رُوْحٌ مِّنْهُ٘ ترجمۂ کنز العرفان: بیشک مسیح ، مریم کا بیٹا عیسیٰ صرف اللہ کا رسول اور اس کا ایک کلمہ ہے جو اس نے مریم کی طرف بھیجا اور اس کی طرف سے ایک خاص روح ہے۔(پ6 ،النسآء : 171) اللہ کریم حضرت عیسیٰ علیہ السّلام کو بے شمار اوصاف و کمالات سے نوازا ہے جن کا بیان قراٰن پاک میں موجود ہے۔

اوصاف: (1تا4) آپ علیہ السّلام اللہ رب العالمین کی بارگاہ میں دنیا و آخرت میں بڑے مقرب اور عزت والے ہیں۔ آپ علیہ السّلام نے بڑی عمر کے علاوہ بہت جھوٹی عمر میں بھی لوگوں سے کلام فرمایا۔ اور آپ علیہ السّلام اللہ پاک کے خاص بندوں میں سے ہیں۔ ارشاد باری ہے: وَجِیْهًا فِی الدُّنْیَا وَ الْاٰخِرَةِ وَ مِنَ الْمُقَرَّبِیْنَۙ(۴۵) وَ یُكَلِّمُ النَّاسَ فِی الْمَهْدِ وَ كَهْلًا وَّ مِنَ الصّٰلِحِیْنَ(۴۶) ترجمۂ کنزالعرفان: وہ دنیا و آخرت میں بڑی عزت والا ہوگا اور اللہ کے مقرب بندوں میں سے ہوگا۔ اور وہ لوگوں سے جھولے میں اور بڑی عمر میں بات کرے گا اور خاص بندوں میں سے ہوگا۔(پ3،اٰل عمرٰن‏: 45، 46)

(5تا9)آپ علیہ السّلام نماز کی پابندی فرمانے والے اور امت کو زکوۃ ادا کرنے کی تاکید کرنے والے تھے۔ آپ کی ذات گرامی بڑی برکت والی تھی۔ آپ علیہ السّلام والدہ محترمہ سے بہت اچھا سلوک کرنے والے تھے۔ آپ تکبر سے محفوظ اور شقاوت سے دور تھے۔ قراٰن پاک میں اللہ کریم نے ارشاد فرمایا :وَّ جَعَلَنِیْ مُبٰرَكًا اَیْنَ مَا كُنْتُ۪-وَ اَوْصٰنِیْ بِالصَّلٰوةِ وَ الزَّكٰوةِ مَا دُمْتُ حَیًّاﳚ(۳۱) ترجمۂ کنز العرفان : اور اس نے مجھے مبارک بنایا ہے خواہ میں کہیں بھی ہوں اور اس نے مجھے نماز اور زکوٰۃ کی تاکید فرمائی ہے جب تک میں زندہ رہوں ۔ (پ16، مریم:31) وَّ بَرًّۢا بِوَالِدَتِیْ٘-وَ لَمْ یَجْعَلْنِیْ جَبَّارًا شَقِیًّا(۳۲) ترجمۂ کنزُالعِرفان: اور (مجھے) اپنی ماں سے اچھا سلوک کرنے والا (بنایا) اور مجھے متکبر، بدنصیب نہ بنایا۔ (پ16، مریم:32)

(10) آپ علیہ السّلام اللہ پاک کا بندہ بنے میں کسی قسم کی شرم و وار محسوس نہیں کرتے تھے۔ ارشاد باری ہے : لَنْ یَّسْتَنْكِفَ الْمَسِیْحُ اَنْ یَّكُوْنَ عَبْدًا لِّلّٰهِ وَ لَا الْمَلٰٓىٕكَةُ الْمُقَرَّبُوْنَؕ-وَ مَنْ یَّسْتَنْكِفْ عَنْ عِبَادَتِهٖ وَ یَسْتَكْبِرْ فَسَیَحْشُرُهُمْ اِلَیْهِ جَمِیْعًا(۱۷۲)ترجمۂ کنزُالعِرفان: نہ تو مسیح اللہ کا بندہ بننے سے کچھ عار کرتا ہے اور نہ مقرب فرشتے اور جو اللہ کی بندگی سے نفرت اور تکبر کرے تو عنقریب وہ ان سب کو اپنے پاس جمع کرے گا۔ (پ6،النسآء : 172)

انبیائے علیہم السّلام کائنات کی عظیم ترین ہستیاں اور انسانوں میں ہیروں موتیوں کی طرح جگمگاتی شخصیات ہیں جنہیں خدا نے وحی کے نور سے روشنی بخشی حکمتوں کے سر چشمے ان کے دلوں میں جاری فرمائے انبیائے کرام علیہم السّلام کی سیرت کا مطالعہ آنکھوں کو بصیرت روح کو روحانیت دلوں کو چین عقل کو ہدایت سوچ کو وسعت کردار کو حسن زندگی کو تعاون بندوں کو کامیابی اور قوموں کو عروج بخشتا ہےانبیا و مرسلین علیہم السّلام انتہائی اعلیٰ اور عمدہ اوصاف کے مالک تھے قراٰن و حدیث میں انبیا و مرسلین علیہم السّلام کے انفرادی اور مجموعی بے شمار فضائل بیان ہوئے ہیں ان انبیائے کرام علیہم السّلام میں سے ایک حضرت عیسیٰ علیہ السّلام بھی ہیں آپ علیہ السّلام اللہ پاک کے مقبول بندے برگزیدہ نبی اور اولو العزم یعنی عزم و ہمت والے رسول ہیں۔

حضرت عیسیٰ علیہ السّلام کی قراٰنی صفات:۔(1) نبی: قَالَ اِنِّیْ عَبْدُ اللّٰهِ ﳴ اٰتٰىنِیَ الْكِتٰبَ وَ جَعَلَنِیْ نَبِیًّاۙ(۳۰)ترجمۂ کنز الایمان : بچہ نے فرمایا میں ہوں اللہ کا بندہ اس نے مجھے کتاب دی اور مجھے غیب کی خبریں بتانے والا(نبی) کیا ۔(پ19، مریم، 30) حضرت حسن رضی اللہ عنہ کا قول ہے کہ آپ والدہ کے پیٹ ہی میں تھے کہ آپ کو توریت کا اِلہام فرما دیا گیا تھا اور جھولے میں تھے جب آپ علیہ السّلام کو نبوت عطا کردی گئی اور اس حالت میں آپ علیہ السّلام کا کلام فرمانا آپ کا معجزہ ہے۔ (صراط الجنان مریم تحت الآیۃ 30)

(2) روح: اَلْقٰىهَاۤ اِلٰى مَرْیَمَ وَ رُوْحٌ مِّنْهُ٘ ترجمہ کنز العرفان: جو اس نے مریم کی طرف بھیجا اور اس کی طرف سے ایک خاص روح ہے۔(پ6 ،النسآء : 171) حضرت عیسیٰ علیہ السّلام مردوں کو زندہ کرتے تھے اس لیے آپ کو روح کہا جاتا ہے۔ (مدارک النسآء تحت الآیۃ 171)

(3) کلمۃ اللہ: عِیْسَى ابْنُ مَرْیَمَ رَسُوْلُ اللّٰهِ وَ كَلِمَتُهٗۚ ترجمہ کنز العرفان: مریم کا بیٹا عیسیٰ صرف اللہ کا رسول اور اس کا ایک کلمہ ہے۔ (پ6،النسآء: 171) آپ علیہ السّلام کو کلمہ بھی کہا جاتا ہے کیونکہ جس طرح کلام سے ہدایت حاصل کی جاتی ہے اسی طرح آپ سے بھی ہدایت حاصل کی گئی۔ (مدارک ،النسآء تحت الآیۃ 171) اور حضرت عیسیٰ علیہ السّلام کو کلمۃُ اللہ اس لئے بھی کہا جاتا ہے کہ آپ علیہ السّلام کے جسم شریف کی پیدائش کلمہ’’ کُن‘‘ سے ہوئی، باپ اور ماں کے نطفہ سے نہ ہوئی۔ (صراط الجنان، آل عمران تحت الآیۃ 45)

(4) مسیح: اِنَّمَا الْمَسِیْحُ عِیْسَى ابْنُ مَرْیَمَ رَسُوْلُ اللّٰهِ ترجمہ کنز العرفان: مسیح عیسیٰ مریم کا بیٹا اللہ کا رسول ہی ہے۔ آپ علیہ السّلام کا لقب مسیح ہے کیونکہ آپ علیہ السّلام مَس کرکے یعنی چھو کر شفا دیتے تھے۔ (صراط الجنان آل عمران تحت الآیۃ 45)

حضرت عیسیٰ علیہ السّلام اللہ پاک کا کلمہ ہیں ، نام عیسیٰ ہے، لقب مسیح ہے کیونکہ آپ علیہ السّلام مَس کرکے یعنی چھو کر شفا دیتے تھے، دنیا و آخرت میں عزت و وجاہت والے ہیں اور رب کریم کے مقرب بندے ہیں اس کے علاوہ بھی کئی اوصاف حضرت عیسیٰ علیہ السّلام کے قراٰن مجید میں مذکور ہیں۔ اللہ پاک ہمیں انبیائے کرام علیہم السّلام کی سیرت کا مطالعہ کر کے ان کے نقشِ قدم پر چلنے کی توفیق عطا فرمائے۔

حضرات انبیائے کرام وہ عظیم ہستیاں ہیں کہ جن کو اللہ پاک نے مخلوق کی ہدایت کے لئے مبعوث فرمایا اور ان کو بہت ساری صفات سے نوازا ۔آج ہم جس عظیم ہستی کا ذکر کریں گے ان کا نام حضرت عیسیٰ روح اللہ علیہ السّلام ہے۔ آپ بنی اسرائیل کی طرف نبی بنا کر بھیجے گے تھے۔ اللہ پاک نے آپ کو بہت ساری صفات سے نوازا آج ہم ان صفات کا ذکر کریں گے جن کا ذکر قراٰن مجید میں آیا ہے۔

پہلا وصف :کلمۃُ اللہ ہونا: سورہ اٰل عمران آیت نمبر42 میں اللہ پاک نے حضرت عیسیٰ علیہ السّلام کے اس وصف کو بیان کرتے ہوئے ارشاد فرماتا ہے: وَ اِذْ قَالَتِ الْمَلٰٓىٕكَةُ یٰمَرْیَمُ اِنَّ اللّٰهَ اصْطَفٰىكِ وَ طَهَّرَكِ وَ اصْطَفٰىكِ عَلٰى نِسَآءِ الْعٰلَمِیْنَ(۴۲) ترجمۂ کنزُالعِرفان: اور (یاد کرو) جب فرشتوں نے کہا، اے مریم، بیشک اللہ نے تمہیں چن لیا ہے اور تمہیں خوب پاکیزہ کر دیا ہے اور تمہیں سارے جہان کی عورتوں پر منتخب کر لیا ہے۔

تفسیر صراط الجنان میں اس کے تحت لکھا ہے کہ حضرت عیسیٰ علیہ السّلام کو کلمۃُ اللہ اس لئے کہتے ہیں کہ آپ علیہ السّلام کے جسم شریف کی پیدائش کلمہ "کُن" سے ہوئی، باپ اور ماں کے نطفہ سے نہ ہوئی۔

دوسرا وصف: مسیح ہونا۔ حضرت عیسیٰ علیہ السّلام کا ایک اور وصف مسیح ہونا بیان کیا گیا ہے۔ چنانچہ ارشاد فرمایا:ترجمۂ کنزالایمان: جس کا نام مسیح ،عیسیٰ بن مریم ہوگا ۔( پ۳،اٰل عمران: 45)تفسیر صراط الجنان میں اس کے تحت لکھا ہے کہ، حضرت عیسیٰ علیہ السّلام کو مسیح اس لئے کہتے ہیں کہ آپ چھو(touch) کر شفا دیتے تھے۔

تیسرا وصف: بغیر باپ کے پیدا ہونا: سورہ اٰل عمرٰن‏ آیت نمبر 59میں اللہ پاک ارشاد فرما تا ہے: ترجمۂ کنز الایمان: بیشک عیسیٰ کی مثال اللہ کے نزدیک آدم کی ہے۔ اسے مٹی سے پیدا کیا اور اسے فرمایا "ہو جا" تو ہو گیا۔اس آیت کی تفسیر میں صراط الجنا ن میں ہے کہ حضرت عیسیٰ علیہ السّلام کی پیدائش نطفہ سے نہیں ہوئی ۔اللہ پاک نے آپ کو کلمہ 'کن' سے پیدا فرمایا۔

چوتھا وصف: تمام انسانوں کا آپ پر ایمان لے آنا۔ حضرت عیسیٰ علیہ السّلام کے اس وصف کا بیان سورۃ النسآء کی آیت نمبر 159 میں اس طرح ہے۔ ترجمہ کنز الایمان: کوئی کتابی ایسا نہیں جو اس کی موت سے پہلے اس پر ایمان نہ لائے، اور قیامت کے دن وہ ان پر گواہ ہے۔ اس آیت کے تحت تفسیر صراط الجنان میں تفسیر بغوی کے حوالے سے لکھا ہے کہ حضرت عیسیٰ علیہ السّلام کی وفات سے پہلے ہر یہودی اور عیسائی اور ہر وہ شخص جو غیرِ خدا کی عبادت کرتے ہوں گے حضرت عیسیٰ علیہ السّلام پر ایمان لے آ ئیں گے۔

پانچواں وصف: بات کرنے کی عمر سے پہلے کلام کرنا ۔ حضرت عیسیٰ علیہ السّلام کے اس وصف کا ذکر سورہ اٰل عمران آیت نمبر 46 میں یوں ہے ۔ ترجمہ کنز العرفان: اور وہ لوگوں سے جھولے میں اور بڑی عمر میں کلام کرے گا اور خاص بندوں میں سے ہو گا۔سورہ مریم آیت نمبر 30 میں آپ کا کلام موجود ہے ۔ترجمہ کنز الایمان: بچہ نے فرمایا میں ہوں اللہ کا بندہ اس نے مجھے کتاب دی اور مجھے غیب کی خبریں بتانے والا کیا۔

اللہ پاک سے دعا ہے کہ ہمیں حضرت عیسیٰ علیہ السّلام کی سیرت پر چلنے کی توفیق عطا فرمائے۔ اٰمین بجاہ النبی الامین صلَّی اللہ علیہ واٰلہٖ وسلَّم

حافظ محمد فاروق اعظم ساقی (درجۂ سابعہ جامعۃُ المدینہ لاہور پاکستان)

اسلام بمقابلہ یہود و نصرانیت :سیدنا عیسیٰ علیہ السّلام کے بارے میں اہل اسلام کا عقیدہ یہ ہے ‏کہ وہ اللہ پاک کے برگزیدہ بندے اور رسول ہیں، ان کی والدہ محترمہ حضرت مریم رضی اللہ ‏عنہا پاک دامن اور نیک سیرت خاتون بلکہ سیدنا زکریا علیہ السّلام کی صحابیہ تھیں، جن سے اللہ ‏پاک نے اپنی قدرت سے بغیر باپ کے سیدنا عیسیٰ علیہ السّلام کو پیدا کیا اور نبوت اور رسالت ‏سے نوازا۔ سیدنا عیسیٰ علیہ السّلام بنی اسرائیل کے آخری پیغمبر تھے، انہیں چار بڑی آسمانی ‏کتابوں میں سے ایک کتاب انجیل دی گئی۔ یہودیوں نے دشمنی میں انہیں قتل کرنا چاہا مگر وہ اس ‏میں کامیاب نہ ہوئے بلکہ اللہ پاک نے انہیں زندہ آسمانوں پر اٹھا لیا۔ انہیں ابھی تک موت ‏نہیں آئی اور نہ وہ سولی پر چڑھائے گئے بلکہ وہ اسی دنیوی حیات کے ساتھ آسمانوں پر موجود ہیں ‏اگرچہ بحیثیت نبی وہ اپنا وقت دنیا میں مکمل کر گئے ہیں لیکن قیامت سے پہلے دنیا میں اپنی نبوی حیثیت کیساتھ ہی بحیثیت ‏امتی دوبارہ تشریف لائیں گے، دجال اکبر کا مقابلہ کر کے اسے شکست دیں گے اور اسے اپنے ‏ہاتھوں سے قتل کریں گے۔ مسلمانوں کے اس وقت کے امیر حضرت امام مہدی کے ساتھ مل ‏کر دنیا میں پھر سے نظامِ مصطفیٰ صلَّی اللہ علیہ واٰلہٖ وسلَّم کی حکمرانی، جسے مسلمانوں کی اصطلاح میں خلافت کہا جاتا ‏ہے، قائم کریں گے۔ سیدنا عیسیٰ علیہ السّلام کچھ عرصہ حیات رہیں گے، ان کی شادی ہوگی، بچے ‏ہوں گے اور پھر وہ وفات پائیں گے جس کے بعد انہیں جناب نبی اکرم صلَّی اللہ علیہ واٰلہٖ وسلَّم کے روضۂ اطہر میں ‏سپرد خاک کر دیا جائے گا۔ آنحضرت صلَّی اللہ علیہ واٰلہٖ وسلَّم، حضرت ابوبکر صدیق اور حضرت عمر فاروق ‏رضی اللہ عنہما کی تین قبروں کے ساتھ روضہ اطہر میں ایک قبر کی خالی جگہ موجود ہے جسے سیدنا ‏عیسیٰ علیہ السّلام کی قبر کے لیے مخصوص رکھا گیا ہے۔

قراٰن کریم میں مختلف مقامات پر حضرت سیدنا عیسیٰ علیہ السّلام کا تذکرہ موجود ہے جن میں سے ‏چند درج ذیل ہیں‎:‎ اہل ایمان کسی نبی کے درمیان(ایمان لانے کے اعتبار سے) فرق نہیں کرتے۔ لہذا فرمایا: ‏ یوں کہو کہ ہم ایمان لائے اللہ پر اور اس پر جو ہماری طرف اُترا اور جو اُتارا گیا ابراہیم و اسمٰعیل و اسحق و یعقوب اور ان کی اولاد پر اور جو عطا کیے گئے موسیٰ و عیسیٰ اور جو عطا کیے گئے باقی انبیاء اپنے رب کے پاس سے ہم ان میں کسی پر ایمان میں فرق نہیں کرتے اور ہم اللہ کے حضور گردن رکھے ہیں ۔ (سورۃالبقرۃ: 136)‏

رسولوں میں سے بعض کو بعض پر درجے کے اعتبار سے فضیلت: رسولوں میں سے بعض کو ‏بعض پر درجے کے اعتبار سے فضیلت دی گئی ہے اور عیسٰی علیہ السّلام کا رسولوں میں ایک الگ ‏اور نمایاں مقام ہے چنانچہ فرمایا: یہ رسول ہیں کہ ہم نے ان میں ایک کو دوسرے پر افضل کیا ‏ان میں کسی سے اللہ نے کلام فرمایا اور کوئی وہ ہے جسے سب پر درجوں بلند کیا اور ہم نے مریم ‏کے بیٹے عیسیٰ(علیہ السّلام) کو کھلی نشانیاں دیں اور پاکیزہ روح سے اس کی مدد کی۔( البقرۃ: ‏‏253)‏

حضرت مریم رضی اللہ عنہا و عیسیٰ علیہ السّلام کی ولادت و پرورش کے متعلق سورہ اٰل ‏عمران کی آیات 35 تا 60 کا خلاصہ: ان آیات میں حضرت مریم رضی اللہ عنہا کی ولادت و ‏پرورش اور پھر اس کے بعد سیدنا عیسیٰ علیہ السّلام کی ولادت و نبوت کا تذکرہ کیا گیا ہے جس کا ‏خلاصہ یہ ہے‎:‎ حضرت مریم رضی اللہ عنہا کی والدہ محترمہ نے نذر مانی کے اے اللہ! میرے پیٹ میں جو بچہ ‏ہے میں اسے بیت المقدس کی خدمت کے لیے وقف کرتی ہوں۔ مگر جب بچہ پیدا ہوا تو وہ لڑکی ‏‏(مریم) تھی، ان کی والدہ نے اللہ پاک سے عرض کیا کہ یہ تو بچی ہے اور بچی کا معاملہ تو بچے سے ‏جدا ہے اور میں نے اس کا نام مریم رکھا ہے اور میں اسے تیری پناہ میں دیتی ہوں اور اس کی ‏اولاد کو بھی مردود شیطان کے شر سے۔ اللہ پاک نے یہ نذر قبول کر لی اور اسے اچھی پرورش ‏کے ساتھ بڑھایا جبکہ حضرت زکریا علیہ السّلام نے اس بچی کی کفالت کا۔

فرشتوں نے حضرت مریم رضی اللہ عنہا سے کہا کہ اللہ پاک نے تجھے چن لیا اور پاکیزگی بخشی ‏ہے اور تجھے جہانوں کی عورتوں میں سے چنا ہے اس لیے تم اللہ پاک کی بندگی کرو اور اس کے ‏لیے رکوع اور سجدہ کرو۔ پھر فرشتوں نے حضرت مریم رضی اللہ عنہا کو خوشخبری دی کہ اللہ ‏پاک تجھے اپنے کلمہ کی بشارت دیتے ہیں جس کا نام مسیح اور عیسیٰ بن مریم ہوگا، وہ دنیا و آخرت ‏میں باوقار ہوگا، اللہ پاک کے مقرب بندوں میں سے ہوگا، ماں کی گود میں اور پختہ عمر میں ‏یکساں کلام کرے گا اور نیکوکاروں میں سے ہوگا۔ حضرت مریم رضی اللہ عنہا نے کہا کہ مجھے تو ‏ابھی تک کسی مرد نے چھوا تک نہیں، میرا بیٹا کیسے پیدا ہوگا؟ فرشتوں نے کہا کہ اسی کیفیت ‏میں ہوگا، اللہ پاک جب کسی کام کا فیصلہ کر لیتا ہے تو صرف اتنا کہتا ہے کہ ’’ہو جا‘‘(جیسا اس کی ‏شان کے لائق ہے)تو وہ ہو جاتا ہے، اور اللہ پاک اسے کتاب و حکمت اور تورات و انجیل کی تعلیم ‏دے گا اور اسے بنی اسرائیل کی طرف رسول بنائے گا۔

معجزات سیدنا عیسیٰ علیہ السّلام : حضرت عیسیٰ علیہ السّلام نے اپنی قوم سے کہا کہ میں تمہارے ‏پاس تمہارے رب کی طرف سے نشانیاں لے کر آیا ہوں، میں مٹی سے پرندے کا مجسمہ بناتا ‏ہوں اور اس میں پھونک مارتا ہوں تو وہ اللہ پاک کے حکم سے اڑنے لگتا ہے، میں مادر زاد اندھے ‏اور کوڑھی کو اللہ پاک کے حکم سے تندرست بنا دیتا ہوں، میں مردے کو اللہ پاک کے حکم سے ‏زندہ کرتا ہوں، جو کھانا تم کھاتے ہو اور جو گھروں میں ذخیرہ کرتے ہو میں اس کی تمہیں خبر ‏دے سکتا ہوں، میں اپنے سے پہلی کتاب تورات کی تصدیق کرنے والا ہوں، بعض چیزیں جو تم پر ‏پہلے حرام کی گئی تھیں انہیں حلال کرنے آیا ہوں اور تمہارے رب کی طرف سے کھلی نشانی لایا ‏ہوں۔ اس لیے تم اللہ پاک سے ڈرو اور میری پیروی کرو، بے شک اللہ پاک ہی میرا اور تمہارا ‏رب ہے، بس اسی کی عبادت کرو کیونکہ یہی صراط مستقیم ہے۔

جب سیدنا عیسیٰ علیہ السّلام نے اپنی قوم کی طرف سے جھٹلائے جانے کا خطرہ محسوس کیا تو کہا کہ ‏اللہ کی راہ میں میرے مددگار کون ہیں؟ ان کے حواریوں نے کہا کہ ہم اللہ پاک کے مددگار ہیں ‏ہم اس پر ایمان لاتے ہیں اور آپ گواہ رہیں کہ ہم مسلمان ہیں۔ اے اللہ! ہم آپ کے اتارے ‏ہوئے احکام پر ایمان لاتے ہیں اور ہم نے آپ کے رسول (حضرت عیسیٰ علیہ السّلام) کی پیروی ‏اختیار کی ہے اس لیے ہمیں حق کی گواہی دینے والوں میں شمار فرما۔ جب سیدنا عیسیٰ علیہ السّلام ‏کے منکروں نے ایک چال چلی اور اللہ پاک نے تدبیر کی(جیسا اس کی شان کے لائق ہے) اور ‏اللہ پاک سب سے بہتر تدبیر کرنے والا ہے۔

پھر اللہ پاک نے سیدنا عیسیٰ علیہ السّلام سے کہا کہ میں تجھے وصول کرنے والا ہوں اور اپنی طرف ‏اٹھا لینے والا ہوں اور تجھے کافروں سے نجات دینے والا ہوں اور تیرے(حقیقی) پیروکاروں کو ‏قیامت تک تیرے دشمنوں پر غلبہ دینے والا ہوں۔

سیدنا آدم و عیسیٰ علیہما السّلام میں تخلیق کے اعتبار سے مشابہت: بے شک حضرت عیسٰی علیہ ‏السّلام کی مثال آدم علیہ السّلام کی طرح ہے جنہیں اللہ پاک نے مٹی سے بنایا اور پھر فرمایا کہ ہو ‏جا تو وہ (ایک زندہ انسان) ہو گیا۔ یہ تیرے رب کی طرف سے حق ہے، بس ہرگز تم شک ‏کرنے والوں میں نہ ہونا۔(اور اگر نصاریٰ کے بقول عیسیٰ بن باپ کے پیدا ہونے کے سبب خدا ‏کے بیٹے ثابت ہوتے ہیں معاذ اللہ، تو پھر سیدنا آدم علیہ السّلام کے بارے میں کیا حکم لگائیں گے ‏جو نہ صرف بن باپ ہیں بلکہ بن ماں کے بھی ہیں ۔)‏

آیات مباہلہ: پھر اے محبوب! جو تم سے عیسیٰ کے بارے میں حجت(جھگڑا)کریں بعد اس کے ‏کہ تمہیں علم آ چکا تو ان سے فرما دو آؤ ہم بلائیں اپنے بیٹے اور تمہارے بیٹے اور اپنی عورتیں اور ‏تمہاری عورتیں اور اپنی جانیں اور تمہاری جانیں ، پھر مباہلہ کریں تو جھوٹوں پر اللہ کی لعنت ‏ڈالیں۔

یہود کے دلوں پر مہر گستاخی نبوت کی وجہ سے ہے: سورۃ النسآء کی آیت 155 تا 159 میں اللہ ‏پاک نے یہود بنی اسرائیل کے دلوں پر کفر کی مہر لگا دینے کے اسباب بیان کرتے ہوئے ایک ‏سبب یہ بھی ذکر کیا کہ انہوں نے سیدنا عیسیٰ علیہ السّلام‎ ‎کا انکار کر دیا اور حضرت مریم رضی اللہ ‏عنہا پر (حضرت عیسیٰ علیہ السّلام کی بغیر باپ ولادت کے حوالے سے) بہتان عظیم باندھ دیا اور ‏یہ کہا کہ ہم نے مسیح عیسیٰ علیہ السّلام بن مریم رضی اللہ عنہا کو قتل کر دیا ہے۔ حالانکہ نہ انہوں ‏نے اسے قتل کیا اور نہ سولی پر لٹکایا بلکہ وہ شبہہ میں ڈال دیے گئے اور جس بات میں وہ اختلاف ‏کرتے ہیں وہ شک کی بنیاد پر کرتے ہیں، ان کے پاس اس کے بارے میں کوئی علم نہیں اور وہ ‏صرف گمان کی پیروی کرتے ہیں کیونکہ یقینی بات ہے کہ انہوں نے سیدنا عیسیٰ علیہ السّلام کو ‏قتل نہیں کیا بلکہ اللہ پاک نے اسے اپنی طرف اٹھا لیا تھا اور اللہ پاک زبردست اور حکمت والا ‏ہے۔ اور اہل کتاب میں کوئی بھی نہیں ہے مگر وہ سب سیدنا عیسیٰ علیہ السّلام پر ان کی موت سے ‏پہلے ایمان لائیں گے۔

روح اللہ ہونے سے ابن اللہ ثابت نہیں ہوتا کیونکہ آدم علیہ السّلام بھی روح اللہ ہیں: ‏سورۃ النسآء آیت 171 میں فرمایا: اے کتاب والو! اپنے دین میں زیادتی نہ کرو اور اللہ پر نہ کہو مگر ‏سچ، مسیح عیسیٰ مریم کا بیٹا اور اللہ کا رسول ہی ہے اور اس کا ایک کلمہ کہ مریم کی طرف بھیجا اور ‏اس کے یہاں کی ایک روح تو اللہ اور اس کے رسولوں پر ایمان لاؤ اور تین نہ کہو، باز رہو اپنے ‏بھلے کو، اللہ تو ایک ہی خدا ہے پاکی اسے اس سے کہ اس کے کوئی بچہ ہو اسی کا مال ہے جو کچھ ‏آسمانوں میں ہے اور جو کچھ زمین میں اور اللہ کافی کارساز ۔

اور سورۃ الحجر آیت29 میں سیدنا آدم علیہ السّلام کے حوالے سے ارشاد ہے کہ " جب میں اس کو ‏‏(انسانی صورت) میں ڈھال لوں اور اس میں (اپنی پسندیدہ) روح پھونک دوں تو تم سب اس ‏کیلیے سجدہ میں گر جانا"۔

سورۃ النسآء کی آیت 172 میں ہے کہ سیدنا عیسیٰ علیہ السّلام نے کبھی اس بات سے عار محسوس ‏نہیں کی کہ وہ اللہ پاک کے بندے ہیں اور جو بھی اللہ پاک کی بندگی سے عار محسوس کرتا ہے اور تکبر کرتا ہے اللہ پاک ان ‏سب کو اپنے پاس جمع کرے گا۔

یہود و نصاریٰ کافر و مشرک ہیں: سورۃالمائدہ کی آیت 17 میں اللہ پاک فرماتا ہے کہ ان ‏لوگوں نے کفر اختیار کیا جنہوں نے کہا کہ مسیح بن مریم علیہ السّلام و رضی اللہ عنہا ہی خدا ہیں۔ ‏آپ ان سے کہہ دیں کہ اگر اللہ پاک حضرت عیسیٰ علیہ السّلام، ان کی والدہ اور روئے زمین کے ‏سب لوگوں کو موت دے دیں تو اللہ پاک کے سامنے کس کا بس چل سکتا ہے؟

سورۃ المائدہ کی آیت 46 میں ارشاد باری ہے کہ ہم نے موسی علیہ السّلام کے بعد ان کے ‏نقش قدم پر عیسیٰ علیہ السّلام بن مریم رضی اللہ عنہا کو بھیجا، وہ اس سے پہلے کی کتاب تورات کی ‏تصدیق کرنے والے تھے اور ہم نے ان کو انجیل دی جس میں ہدایت اور نور تھا اور وہ تورات کی ‏تصدیق کرتی تھی اور متیقن کے لیے ہدایت اور نصیحت تھی۔

سورۃ المائدہ کی آیت 72 تا 75 میں ارشاد خداوندی ہے کہ ان لوگوں نے کفر اختیار کیا جنہوں ‏نے کہا کہ سیدنا عیسیٰ علیہ السّلام بن مریم رضی اللہ عنہا ہی خداوند ہیں۔ حالانکہ سیدنا عیسیٰ علیہ ‏السّلام نے فرمایا تھا کہ اے بنی اسرائیل! اللہ پاک کی عبادت کرو جو میرا اور تمہارا رب ہے۔ اور ‏بے شک جس نے اس کے ساتھ شرک کیا اس پر اللہ پاک نے جنت حرام کر دی ہے اور اس کا ‏ٹھکانہ آگ ہے۔ اور ان لوگوں نے کفر کیا جنہوں نے کہا کہ اللہ پاک تین میں سے ایک ہے ‏کیونکہ اللہ پاک کے سوا کوئی خدا نہیں ہے۔ اور اگر وہ اس سے باز نہ آئے تو انہیں دردناک ‏عذاب پہنچے گا۔ سیدنا عیسیٰ علیہ السّلام صرف اللہ پاک کے رسول تھے ان سے پہلے کئی رسول ‏گزر چکے اور ان کی والدہ (حضرت مریم رضی اللہ عنہا) سچی خاتون تھیں اور وہ دونوں ماں بیٹا ‏کھانا کھایا کرتے تھے۔

امر بالمعروف و نہی عن المنکر سے کوتاہی کا انجام : سورۃ المائدہ کی آیت نمبر 78 تا 80 میں ‏ہے کہ بنی اسرائیل میں سے جو لوگ کافر ہوئے ان پر حضرت داؤد علیہ السّلام اور حضرت عیسیٰ ‏علیہ السّلام کی زبان پر (ان کے ذریعے) لعنت کی گئی اس لیے کہ وہ نافرمانی میں حد سے بڑھ گئے ‏تھے، وہ ایک دوسرے کو برائی سے نہیں روکتے تھے جس کا وہ ارتکاب کرتے تھے اور کافروں ‏کے ساتھ دوستی کیا کرتے تھے۔

تذکیر بآلاءاللہ: سورہ المائدہ کی آیت 109 تا 118 میں اللہ پاک سیدنا عیسیٰ علیہ السّلام کو اپنی ‏نعمتیں یاد دلائی ہیں کہ میری ان نعمتوں کو یاد کرو جو میں نے تم پر اور تمہاری والدہ پر کیں، جب ‏روح القدس (جبرائیل علیہ السّلام) کے ساتھ تمہاری مدد کی، جب تم ماں کی گود میں اور پختہ عمر ‏میں یکساں کلام کرتے تھے، جب میں نے تمہیں کتاب و حکمت اور تورات و انجیل کی تعلیم دی، ‏جب تم مٹی سے پرندوں کے مجسمے بنا کر ان میں پھونک مارتے تھے تو وہ میرے حکم سے اڑنے ‏لگتے تھے، تم اندھے اور کوڑھی کو میرے حکم سے تندرست بنا دیا کرتے تھے، جب تم قبروں ‏سے مردوں کو زندہ اٹھا لیا کرتے تھے، جب میں نے بنی اسرائیل کو تمہیں نقصان پہنچانے سے ‏روک دیا، جب تم ان کے پاس واضح دلیلیں لے کر آئے تھے اور انہوں نے انہیں جھٹلاتے ‏ہوئے کہا تھا کہ یہ تو کھلا جادو ہے، جب میں نے حواریوں سے کہا کہ مجھ پر اور میرے رسول پر ‏ایمان لاؤ تو وہ ایمان لے آئے، جب حواریوں نے کہا کہ اے عیسٰی علیہ السّلام بن مریم کیا آپ ‏کا رب اس بات کی طاقت رکھتا ہے کہ ہم پر آسمان سے (تیار کھانے کا) دستر خوان اتارے؟ ‏

انہوں نے کہا کہ اللہ پاک سے ڈرو اگر تم ایمان رکھتے ہو۔ حواریوں نے کہا ہم یہ چاہتے ہیں کہ ‏ہم (آسمانی کھانا) کھائیں اور ہمارے دلوں کو اطمینان حاصل ہو اور ہم جان لیں کہ آپ نے ہم ‏سے سچ کہا ہے اور ہم اس پر گواہ ہو جائیں۔

نعمت خداوندی ملنے کے دن کو عید کا دن بنانا :سورة المائدة114میں فرمایا، عیسیٰ بن مریم ‏نے عرض کی ، اے اللہ ! اے رب ہمارے! ہم پر آسمان سے ایک خوان اتار کہ وہ ہمارے لیے ‏عید ہو ہمارے اگلے پچھلوں کی اور تیری طرف سے نشانی اور ہمیں رزق دے اور تو سب سے ‏بہتر روزی دینے والا ہے ۔

‏(چنانچہ جس دن اللہ کی طرف سے نعمت عظمیٰ میسر آئی یعنی ولادت سرور کونین ہوئی اس دن کو ‏عید کہنا یا اسے عید کی طرح منانے میں کوئی حرج نہیں) ‏

‏ اللہ پاک نے فرمایا کہ میں تم پر دستر خوان اتارنے والا ہوں لیکن اس کے بعد جس نے کفر کیا ‏اسے ایسا عذاب دوں گا کہ سارے جہانوں میں ایسا عذاب کسی اور کو نہیں دوں گا۔

سورۃ المائدہ کی انہی آیات کے مطابق اللہ پاک سیدنا عیسیٰ علیہ السّلام سے قیامت کے دن پوچھے ‏گا کہ کیا تم نے لوگوں سے کہا تھا کہ مجھے اور میری ماں کو اللہ پاک کے سوا خدا بنا لینا؟ سیدنا عیسیٰ ‏علیہ السّلام جواب دیں گے کہ اے اللہ تیری ذات ان باتوں سے پاک ہے، مجھے ایسی بات کہنے کا ‏کوئی حق ہی نہیں تھا اور اگر یہ بات میں نے کہی ہوتی تو آپ کے علم میں ہوتی، میں نے تو انہیں ‏وہی کہا تھا جس کا آپ نے مجھے حکم دیا کہ اللہ پاک کی عبادت کرو جو میرا اور تمہارا رب ہے۔

علما و مشائخ سے دلیل طلب کرنا انکی توہین نہیں: سورۃ التوبہ آیت 29 و 30 میں اللہ پاک ‏ارشاد فرماتا ہے کہ یہود نے کہا کہ حضرت عزیر علیہ السّلام اللہ پاک کے بیٹے ہیں اور نصاریٰ نے ‏کہا کہ حضرت عیسیٰ علیہ السّلام اللہ پاک کے بیٹے ہیں۔ یہ ان کی خود ساختہ باتیں ہیں اور وہ پہلے ‏کافروں کی طرح کی باتیں کر رہے ہیں۔ انہوں نے اپنے پادریوں اور جوگیوں کو اللہ پاک کے سوا ‏رب بنا رکھا ہے(کہ انکی بے دلیل باتوں پر ایمان رکھتے ہیں) اور عیسیٰ بن مریم علیہ السّلام و ‏رضی اللہ عنہا کو بھی خدا بنا لیا ہے۔ حالانکہ انہیں اس بات کا حکم دیا گیا تھا کہ وہ صرف اللہ پاک کی عبادت کریں جو ایک ہی خدا ہے، اللہ پاک کی ذات اس سے پاک ہے جو وہ شرک کرتے ‏ہیں۔

عیسیٰ علیہ السّلام کی بن باپ پیدائش پر سوال اٹھانا دراصل قدرتِ خداوندی پر شک ‏کرنا ہے: سورہ مریم آیت 16 تا 40 میں اللہ پاک نے سیدنا عیسیٰ علیہ السّلام کی ولادت کا تفصیل ‏کے ساتھ ذکر کیا ہے جس کا خلاصہ یہ ہے: جب حضرت مریم رضی اللہ عنہا اپنے گھر والوں سے ‏مشرقی جگہ میں الگ ہو کر اوٹ میں ہو گئیں تو ہم نے روح القدس کو بھیجا جس نے ایک کامل ‏انسان کی شکل اختیار کر لی۔ حضرت مریم رضی اللہ عنہا نے اسے دیکھتے ہی کہا کہ میں تجھ سے ‏اللہ پاک کی پناہ مانگتی ہوں اگر تو خدا خوفی رکھنے والا ہے۔ اس نے کہا کہ میں تیرے رب کا بھیجا ‏ہوا ہوں تاکہ تجھے ایک پاکیزہ لڑکا عطا کروں۔ حضرت مریم رضی اللہ عنہا نے کہا کہ میرا لڑکا ‏کہاں سے ہوگا جبکہ مجھے کسی انسان نے چھوا تک نہیں اور میں بدکار عورت بھی نہیں ہوں۔ ‏فرشتے نے کہا کہ اسی کیفیت میں ہوگا، تیرا رب کہتا ہے کہ یہ بات میرے لیے آسان ہے ‏اور میں اس لڑکے کو اپنی قدرت کی نشانی بناؤں گا اور وہ رحمت ہوگا اور یہ بات تو طے ‏شدہ ہے۔ پس وہ حاملہ ہوئی اور اسے لے کر الگ دور جگہ میں چلی گئی، جب اسے درد زہ ایک ‏کھجور کے تنے کے پاس لے گیا تو اس نے (بدنامی کے خوف سے) کہا کہ اے کاش! میں اس سے ‏قبل مر چکی ہوتی اور بھولی بسری ہو جاتی۔ فرشتے نے آواز دی کہ گھبراؤ نہیں تمہارے رب نے ‏تمہارے قدموں میں پانی کا چشمہ نکال دیا ہے اور کھجور کے تنے کو حرکت دو تم پر تروتازہ ‏کھجوریں گریں گی، پس کھاؤ ، پیو اور اپنی آنکھوں کو ٹھنڈا کرو۔ اور اگر کسی انسان کو دیکھو تو اسے ‏بتاؤ(اشارے سے) کہ میں نے اللہ پاک کے لیے کلام نہ کرنے کا روزہ رکھا ہوا ہے اس لیے آج ‏کا دن میں کسی سے کلام نہیں کروں گی۔ پس وہ اپنے بچے کو لے کر قوم کے پاس آئی، وہ اسے ‏اٹھائے ہوئے تھی، لوگوں نے کہا کہ اے مریم رضی اللہ عنہا! تم تو یہ بہت بری چیز لے آئی ہو، ‏نہ تو تمہارا باپ برا شخص تھا اور نہ ہی تمہاری ماں بدکار تھی۔

حضرت مریم رضی اللہ عنہا نے بچے کی طرف اشارہ کیا کہ اسی سے پوچھو۔ انہوں نے کہا کہ گود ‏کے بچے سے ہم کیسے کلام کریں؟ اس پر سیدنا عیسیٰ علیہ السّلام(ماں کی گود میں) بول پڑے ‏کہ بے شک میں اللہ پاک کا بندہ ہوں، مجھے اس نے کتاب دی ہے اور مجھے نبی بنایا ہے، مجھے ‏برکت والا بنایا ہے، میں جہاں بھی ہوں مجھے نماز اور زکوٰۃ کا حکم دیا ہے، مجھے اپنی ماں کے لیے ‏فرمانبردار بنایا ہے اور تندخو اور بدنصیب نہیں بنایا، مجھ پر سلامتی ہو جس دن میں پیدا ہوا اور ‏جس دن میں مروں گا اور جس دن دوبارہ زندہ کر کے اٹھایا جاؤں گا۔

یہ تفصیل بیان کر کے اللہ پاک ان آیات میں یہ فیصلہ سناتا ہے کہ عیسیٰ بن مریم علیہ السّلام ‏و رضی اللہ عنہا یہی ہیں، یہی حق ہے جس کے بارے میں یہ لوگ شک میں پڑے ہوئے ہیں۔ ‏اللہ پاک کی یہ شان نہیں کہ وہ کسی کو بیٹا بنائے، اس کی ذات پاک ہے، وہ جب کسی کام کا فیصلہ ‏کرتا ہے تو کہتا ہے کہ ’’ہو جا‘‘ تو وہ ہو جاتا ہے (یعنی اس کو کسی مددگار/واسطے/وسیلے /ذریعے ‏اور اسباب پیدا کی محتاجی نہیں ہوتی)۔‏‎ ‎

سورۃ الزخرف آیت 60 میں فرمایا ہے کہ سیدنا عیسیٰ علیہ السّلام قیامت کی نشانیوں میں سے ہیں، ‏اس بات میں ہرگز شک میں نہ پڑنا اور میری پیروی کرنا یہی صراط مستقیم ہے۔

بدعت حسنہ کی اجازت لیکن مفاسد سے اجتناب ضروری: سورۃ الحدید آیت 27 میں ارشاد ‏ہے:پھر ہم نے ان کے پیچھے اسی راہ پر اپنے اور رسول بھیجے اور ان کے پیچھے عیسیٰ بن مریم کو بھیجا ‏اور اسے انجیل عطا فرمائی اور اس کے پیرووں کے دل میں نرمی اور رحمت رکھی اور راہب بننا تو ‏یہ بات انہوں نے دین میں اپنی طرف سے نکالی ہم نے ان پر مقرر نہ کی تھی ہاں یہ بدعت ‏انہوں نے اللہ کی رضا چاہنے کو پیدا کی پھر اسے نہ نباہا جیسا اس کے نباہنے کا حق تھا تو ان کے ‏ایمان والوں کو ہم نے ان کا ثواب عطا کیا ، اور ان میں سے بہتیرے فاسق ہیں ۔یعنی رہبانیت بدعت حسنہ تھی انکی شریعت میں لیکن رہبانیت کو صفات خداوندی سے متصف ‏کر کے توحید باری سے منکر ہو بیٹھے نیز راہبوں کو خدا کا درجہ دینے لگے وغیرہ وغیرہ۔

دینِ خدا کے مددگار ہونے کا حکم اہل ایمان کو بھی ہے: چنانچہ سورۃ الصف آیت 6،14 میں ‏ہے کہ جب سیدنا عیسیٰ علیہ السّلام نے اپنی قوم سے کہا کہ میں تمہاری طرف اللہ پاک کا رسول ‏ہوں، مجھ سے پہلے کتاب تورات ہے اس کی تصدیق کرنے والا ہوں اور میرے بعد آنے والے ‏نبی کی بشارت دینے والا ہوں جس کا نام احمد صلَّی اللہ علیہ واٰلہٖ وسلَّم ہوگا۔

نیز فرمایا: اے ایمان والو دین خدا کے مددگار بن جاؤ جیسے عیسیٰ بن مریم(علیہ السّلام و رضی اللہ ‏عنہا ) نے حواریوں سے کہا تھا کہ کون ہے جو اللہ کی طرف ہو کر میری مدد کرے؟ حواری ‏بولے ہم دین خدا کے مددگار ہیں تو بنی اسرائیل سے ایک گروہ ایمان لایا اور ایک گروہ نے کفر ‏کیا تو ہم نے ایمان والوں کو ان کے دشمنوں پر مدد دی تو غالب ہو گئے۔

یہ ایک خلاصہ ہے جو قراٰن کریم کے بیسیوں مقامات میں سے سیدنا عیسیٰ علیہ السّلام اور حضرت ‏مریم رضی اللہ عنہا کے تذکروں میں سے پیش کیا گیا ہے امید واثق ہے کہ اللہ رب العالمین بہ ‏طفیل رحمۃ اللعالمین پڑھنے، سننے اور لکھنے لکھوانے والوں کے لیے ہدایت اور ثواب کا ذریعہ بنائے ‏گا ، ان شاء اللہ ۔

حضرات انبیائے کرام وہ عظیم ہستیاں ہیں کہ جن کو اللہ پاک نے مخلوق کی ہدایت کے لئے مبعوث فرمایا اور ان کو بہت ساری صفات سے نوازا ۔آج ہم جس عظیم ہستی کا ذکر کریں گے ان کا نام حضرت عیسیٰ روح اللہ علیہ السّلام ہے۔ آپ بنی اسرائیل کی طرف نبی بنا کر بھیجے گے تھے۔ اللہ پاک نے آپ کو بہت ساری صفات سے نوازا آج ہم ان صفات کا ذکر کریں گے جن کا ذکر قراٰن مجید میں آیا ہے۔

پہلا وصف :کلمۃُ اللہ ہونا: سورہ اٰل عمران آیت نمبر42 میں اللہ پاک نے حضرت عیسیٰ علیہ السّلام کے اس وصف کو بیان کرتے ہوئے ارشاد فرماتا ہے: وَ اِذْ قَالَتِ الْمَلٰٓىٕكَةُ یٰمَرْیَمُ اِنَّ اللّٰهَ اصْطَفٰىكِ وَ طَهَّرَكِ وَ اصْطَفٰىكِ عَلٰى نِسَآءِ الْعٰلَمِیْنَ(۴۲) ترجمۂ کنزُالعِرفان: اور (یاد کرو) جب فرشتوں نے کہا، اے مریم، بیشک اللہ نے تمہیں چن لیا ہے اور تمہیں خوب پاکیزہ کر دیا ہے اور تمہیں سارے جہان کی عورتوں پر منتخب کر لیا ہے۔

تفسیر صراط الجنان میں اس کے تحت لکھا ہے کہ حضرت عیسیٰ علیہ السّلام کو کلمۃُ اللہ اس لئے کہتے ہیں کہ آپ علیہ السّلام کے جسم شریف کی پیدائش کلمہ "کُن" سے ہوئی، باپ اور ماں کے نطفہ سے نہ ہوئی۔

دوسرا وصف: مسیح ہونا۔ حضرت عیسیٰ علیہ السّلام کا ایک اور وصف مسیح ہونا بیان کیا گیا ہے۔ چنانچہ ارشاد فرمایا:ترجمۂ کنزالایمان: جس کا نام مسیح ،عیسیٰ بن مریم ہوگا ۔( پ۳،اٰل عمران: 45)تفسیر صراط الجنان میں اس کے تحت لکھا ہے کہ، حضرت عیسیٰ علیہ السّلام کو مسیح اس لئے کہتے ہیں کہ آپ چھو(touch) کر شفا دیتے تھے۔

تیسرا وصف: بغیر باپ کے پیدا ہونا: سورہ اٰل عمرٰن‏ آیت نمبر 59میں اللہ پاک ارشاد فرما تا ہے: ترجمۂ کنز الایمان: بیشک عیسیٰ کی مثال اللہ کے نزدیک آدم کی ہے۔ اسے مٹی سے پیدا کیا اور اسے فرمایا "ہو جا" تو ہو گیا۔اس آیت کی تفسیر میں صراط الجنا ن میں ہے کہ حضرت عیسیٰ علیہ السّلام کی پیدائش نطفہ سے نہیں ہوئی ۔اللہ پاک نے آپ کو کلمہ 'کن' سے پیدا فرمایا۔

چوتھا وصف: تمام انسانوں کا آپ پر ایمان لے آنا۔ حضرت عیسیٰ علیہ السّلام کے اس وصف کا بیان سورۃ النسآء کی آیت نمبر 159 میں اس طرح ہے۔ ترجمہ کنز الایمان: کوئی کتابی ایسا نہیں جو اس کی موت سے پہلے اس پر ایمان نہ لائے، اور قیامت کے دن وہ ان پر گواہ ہے۔ اس آیت کے تحت تفسیر صراط الجنان میں تفسیر بغوی کے حوالے سے لکھا ہے کہ حضرت عیسیٰ علیہ السّلام کی وفات سے پہلے ہر یہودی اور عیسائی اور ہر وہ شخص جو غیرِ خدا کی عبادت کرتے ہوں گے حضرت عیسیٰ علیہ السّلام پر ایمان لے آ ئیں گے۔

پانچواں وصف: بات کرنے کی عمر سے پہلے کلام کرنا ۔ حضرت عیسیٰ علیہ السّلام کے اس وصف کا ذکر سورہ اٰل عمران آیت نمبر 46 میں یوں ہے ۔ ترجمہ کنز العرفان: اور وہ لوگوں سے جھولے میں اور بڑی عمر میں کلام کرے گا اور خاص بندوں میں سے ہو گا۔سورہ مریم آیت نمبر 30 میں آپ کا کلام موجود ہے ۔ترجمہ کنز الایمان: بچہ نے فرمایا میں ہوں اللہ کا بندہ اس نے مجھے کتاب دی اور مجھے غیب کی خبریں بتانے والا کیا۔

اللہ پاک سے دعا ہے کہ ہمیں حضرت عیسیٰ علیہ السّلام کی سیرت پر چلنے کی توفیق عطا فرمائے۔ اٰمین بجاہ النبی الامین صلَّی اللہ علیہ واٰلہٖ وسلَّم

اللہ پاک نے انسان کی ہدایت و رہنمائی کے لئے مختلف زمانوں میں متعدد انبیا ئے کرام بھیجے۔ یہ انبیائے کرام لوگوں کو ایمان و نیکی کی دعوت دیتے اور ان کی ہدایت و رہنمائی فرماتے۔ بہت سے انبیائے کرام دنیا میں تشریف لائے انہیں انبیائے کرام میں سے حضرت عیسی علیہ السّلام بھی ہیں ۔ آپ اللہ پاک کے نبی و رسول ہیں ۔ اللہ پاک نے آپ کو بہت کمال و خوبی سے نوازا تھا، انہیں میں پانچ صفات بیان کی جاتی ہیں۔

(1) آپ علیہ السّلام دنیا و آخرت میں بہت معزز اور مقرب بندے ہیں۔ آپ علیہ السّلام نے بڑی عمر کے علاوہ چھوٹی عمر میں بھی کلام فرمایا۔ آپ علیہ السّلام اللہ پاک کے خاص بندوں میں سے ہیں ۔ ارشاد باری ہے: وَجِیْهًا فِی الدُّنْیَا وَ الْاٰخِرَةِ وَ مِنَ الْمُقَرَّبِیْنَۙ(۴۵) وَ یُكَلِّمُ النَّاسَ فِی الْمَهْدِ وَ كَهْلًا وَّ مِنَ الصّٰلِحِیْنَ(۴۶) ترجمۂ کنزالعرفان: وہ دنیا و آخرت میں بڑی عزت والا ہوگا اور اللہ کے مقرب بندوں میں سے ہوگا۔اور وہ لوگوں سے جھولے میں اور بڑی عمر میں بات کرے گا اور خاص بندوں میں سے ہوگا۔(پ3،اٰل عمرٰن‏: 45، 46)

(2) اللہ پاک نے آپ کو مخلص حواری عطا فرمائے جو آپ کا حکم دل و جان سے تسلیم کرتے تھے۔ ارشاد باری ہے: وَ اِذْ اَوْحَیْتُ اِلَى الْحَوَارِیّٖنَ اَنْ اٰمِنُوْا بِیْ وَ بِرَسُوْلِیْۚ-قَالُوْۤا اٰمَنَّا وَ اشْهَدْ بِاَنَّنَا مُسْلِمُوْنَ(۱۱۱) ترجمۂ کنزُالعِرفان: اور جب میں نے حواریوں کے دل میں یہ بات ڈالی کہ مجھ پر اور میرے رسول پر ایمان لاؤ تو انہوں نے کہا :ہم ایمان لائے اور (اے عیسیٰ!) آپ گواہ ہوجائیں کہ ہم مسلمان ہیں۔ (پ 7 ، المآ ئدة : 111)

(3) اللہ پاک نے آپ کو کتاب انجیل عطا فرمائی۔ چنانچہ ارشاد باری ہے: وَ قَفَّیْنَا عَلٰۤى اٰثَارِهِمْ بِعِیْسَى ابْنِ مَرْیَمَ مُصَدِّقًا لِّمَا بَیْنَ یَدَیْهِ مِنَ التَّوْرٰىةِ۪-وَ اٰتَیْنٰهُ الْاِنْجِیْلَ فِیْهِ هُدًى وَّ نُوْرٌۙ-وَّ مُصَدِّقًا لِّمَا بَیْنَ یَدَیْهِ مِنَ التَّوْرٰىةِ وَ هُدًى وَّ مَوْعِظَةً لِّلْمُتَّقِیْنَؕ(۴۶) ترجمۂ کنزُالعِرفان: اور ہم نے ان نبیوں کے پیچھے ان کے نقشِ قدم پر عیسیٰ بن مریم کو بھیجا اُس تورات کی تصدیق کرتے ہوئے جو اس سے پہلے موجود تھی اور ہم نے اسے انجیل عطا کی جس میں ہدایت اور نور تھا اور وہ (انجیل) اس سے پہلے موجود تورات کی تصدیق فرمانے والی تھی اور پرہیز گاروں کے لئے ہدایت اور نصیحت تھی۔ (پ 6 ، المآ ئدۃ : 46 )

(4) آپ علیہ السّلام کے جسم کی پیدائش کلمہ "کن" سے ہوئی باپ ماں کے نطفہ سے نہ ہوئی اس لئے آپ کو کلمۃُ اللہ کہا جاتا ہے۔ فرمان باری ہے: اِنَّ مَثَلَ عِیْسٰى عِنْدَ اللّٰهِ كَمَثَلِ اٰدَمَؕ-خَلَقَهٗ مِنْ تُرَابٍ ثُمَّ قَالَ لَهٗ كُنْ فَیَكُوْنُ(۵۹) ترجمۂ کنزالعرفان: بیشک عیسیٰ کی مثال اللہ کے نزدیک آدم کی طرح ہے جسے اللہ نے مٹی سے بنایا پھر اسے فرمایا: ’’ ہوجا ‘‘ تووہ فوراً ہوگیا۔ ( پ 3 ، اٰل عمرٰن‏ : 59)

(5) روحُ الله : اللہ پاک نے آپ علیہ السّلام کو ایک خاص روح فرمایا۔ اس بنا پر آپ علیہ السّلام کو روحُ الله بھی کہا جاتا ہے۔ فرمان باری ہے: اِنَّمَا الْمَسِیْحُ عِیْسَى ابْنُ مَرْیَمَ رَسُوْلُ اللّٰهِ وَ كَلِمَتُهٗۚ-اَلْقٰىهَاۤ اِلٰى مَرْیَمَ وَ رُوْحٌ مِّنْهُ٘ ترجمۂ کنز العرفان: بیشک مسیح ، مریم کا بیٹا عیسیٰ صرف اللہ کا رسول اور اس کا ایک کلمہ ہے جو اس نے مریم کی طرف بھیجا اور اس کی طرف سے ایک خاص روح ہے۔(پ6 ،النسآء : 171)

حضرت عیسیٰ علیہ السّلام اللہ پاک کے مقبول بندے اولوالعزم یعنی عزم و ہمت والے رسول ہیں، آپ علیہ السّلام حضرت مریم رضی اللہ عنہا سے بغیر باپ کے پیدا ہوئے ، آپ علیہ السّلام کو بنی اسرائیل کی طرف رسول بنا کر بھیجا گیا۔ یہودیوں نے آپ علیہ السّلام کے قتل کی سازش کی تو اللہ پاک نے آپ کو ان کے شر سے بچا کر آسمان پر زندہ اٹھا لیا ،قربِ قیامت میں دوبارہ زمین پر تشریف لائیں گے، اور آپ علیہ السّلام ہمارے پیارے نبی حضرت محمد مصطفیٰ صلی اللہ علیہ و سلم کی شریعت پر عمل کریں گے، اور آپ علیہ السّلام وصال کے بعد مدینہ منورہ میں حضور صلَّی اللہ علیہ واٰلہٖ وسلَّم کے حجرہ میں مدفون ہوں گے۔

انعامات الٰہی: الله پاک نے حضرت عیسیٰ علیہ السّلام کو انجیل عطا فرمائی اور آپ علیہ السّلام کو اللہ پاک نے بہت سے معجزات عطا فرمائے ان معجزات میں سے ایک یہ ہے کہ آپ علیہ السّلام مٹی سے بنے پرندے کو پھونک مار کر حقیقی پرندہ بنا دیتے۔

اللہ پاک نے آپ علیہ السّلام کو بے شمار انعامات عطا فر مائے جن میں سے دو انعام یہ ہیں:

نمبر2،1:ولادت سے پہلے ہی آپ علیہ السّلام کی بشارت دی گئی اور نام و لقب دیا گیا، اللہ پاک ارشاد فرماتا ہے: اِذْ قَالَتِ الْمَلٰٓىٕكَةُ یٰمَرْیَمُ اِنَّ اللّٰهَ یُبَشِّرُكِ بِكَلِمَةٍ مِّنْهُۙ-اسْمُهُ الْمَسِیْحُ عِیْسَى ابْنُ مَرْیَمَ ترجمۂ کنزالعرفان: اور یاد کرو جب فرشتو ں نے مریم سے کہا، اے مریم! اللہ تجھے اپنی طرف سے ایک خاص کلمے کی بشارت دیتا ہے جس کا نام مسیح ،عیسیٰ بن مریم ہوگا۔ (پ3، اٰلِ عمرٰن :45)