شیخ طریقت امیر اہل سنت حضرت علامہ مولانا محمد الیاس عطار قادری دامت بَرَکَاتُہمُ العالیہ ایک عظیم دینی رہنما، مبلغِ اسلام اور عالمی تبلیغی و اصلاحی تحریک دعوتِ اسلامی کے بانی ہیں۔ آپ نے اپنی زندگی اسلام کی تبلیغ، سنتوں کے فروغ اور مسلمانوں کی اصلاح کے لیے وقف کر رکھی ہے۔ آپ کی محنت اور اخلاص کے نتیجے میں دعوتِ اسلامی آج دنیا کے کئی ممالک میں دینِ اسلام کی خدمت انجام دے رہی ہے۔

مولانا الیاس عطار قادری کی تعلیمات کا بنیادی مقصد مسلمانوں کو قرآن و سنت کے مطابق زندگی گزارنے کی ترغیب دینا، اخلاق و کردار کو سنوارنا اور معاشرے میں نیکی کو عام کرنا ہے۔ آپ کی تحریری و تقریری خدمات، بالخصوص فیضانِ سنت جیسی کتب اور اصلاحی بیانات نے لاکھوں افراد کی زندگیوں میں مثبت تبدیلی پیدا کی ہے۔ آپ کی سادہ طرزِ زندگی، عاجزی اور دین کے لئے مسلسل جدوجہد انہیں عصرِ حاضر کی ایک نمایاں روحانی و اصلاحی شخصیت بناتی ہے۔

26 رمضان المبارک امیر اہل سنت دامت بَرَکَاتُہمُ العالیہ کی یومِ ولادت ہے۔دنیا بھر میں موجود آپ کے مریدین و محبین انتہائی مہذب عقیدت و احترام کے ساتھ اس دن کوخوشی کے طور پر مناتے ہیں۔ آپ دامت بَرَکَاتُہمُ العالیہ کی یوم ولادت کی مناسبت سے خلیفۂ امیر اہل سنت مولانا حاجی عبید رضا عطاری مدنی مُدَّ ظِلُّہُ العالی نے عاشقان رسول کو اس ہفتے 36 صفحات کا رسالہ”امیر ِاہلِ سنّت کا بچپن“ پڑھنے / سننے کی ترغیب دلائی ہے اور پڑھنے / سننے والوں کو اپنی دعاؤں سے بھی نوازا ہے۔

دعائے خلیفۂ امیر اہلسنت

یااللہ پاک! جوکوئی 36 صفحات کا رسالہ ”امیر ِاہلِ سنّت کا بچپن“ پڑھ یا سن لے اُسے اپنے پیارے پیارے آخری نبی صلَّی اللہ علیہ واٰلہٖ وسلَّم کے بچپن شریف کے صدقے نیک نمازی اور سچا عاشق رسول بنااور اُس سے ہمیشہ ہمیشہ کے لئے راضی ہوجا۔ اٰمین بجاہِ خاتم النبیین صلی اللہ علیہ وآلہ وسلم

یہ رسالہ دعوتِ اسلامی کی ویب سائٹ پر اردو سمیت مختلف زبانوں میں ڈاؤن لوڈ کرنے کے لیے دستیاب ہے۔

Download

اسپیشل پرسنز ڈیپارٹمنٹ دعوتِ اسلامی کے تحت وفاقی دارالحکومت اسلام آباد میں واقع جامع مسجد  صدیقِ اکبر I-8 میں ”افطار اجتماع“ منعقد ہوا جس میں صوبائی مہ دار کامران عطاری نے کثیر اسپیشل پرسنز کے ہمراہ شرکت کی۔

تفصیلی معلومات کے مطابق اجتماع کا آغاز تلاوتِ قرآنِ پاک سے ہوا اور نعت شریف کے بعد صوبائی ذمہ دار بدر شفیق عطاری نے ”ماہِ رمضان نیکیوں کا مہینہ“ کے موضوع پر اشاروں کی زبان میں بیان کیا۔

دعوتِ اسلامی کے شعبہ مدرسۃالمدینہ بالغان کے تحت 8 مارچ 2026ء کو مدینہ مارکیٹ مظفرآباد، کشمیر میں ”افطار اجتماع“ کا اہتمام کیا گیا جس میں تاجران سمیت دیگر اسلامی بھائیوں کی بھی شرکت ہوئی۔

معلومات کے مطابق ”افطار اجتماع“ کے موقع پر مرکزی مجلسِ شوریٰ کے رکن مولانا حاجی محمد عقیل عطاری مدنی نے تاجران کو ”احکامِ زکوٰۃ کورس“ کروایا اور اُن کی جانب سے ہونے والے مختلف سوالات کے جوابات دیئے۔

بعدازاں رکنِ شوریٰ نے شعبہ مدرسۃالمدینہ بالغان کے دینی کاموں میں مزید بہتری لانے کی ترغیب دلائی جبکہ تمام تاجران نے رکنِ شوریٰ سے ملاقات کی۔(رپورٹ: مولانا محمد عابد عطاری مدنی معاون رکن شوری مولانا حاجی محمد عقیل عطاری مدنی، کانٹینٹ:غیاث الدین عطاری)

8 مارچ 2026ء کو بعد نمازِ عشا مدنی مرکز فیضانِ مدینہ گڑی حبیب اللہ، ضلع مانسہرہ، صوبہ خیبرپختونخوا میں شعبہ امام مساجد دعوتِ اسلامی کے تحت سنتوں بھرا اجتماع منعقد کیا گیا جس میں مقامی ذمہ داران اور ایک ماہ کا اعتکاف کرنے والے عاشقانِ رسول نے شرکت کی۔

تلاوت و نعت کے بعد دعوتِ اسلامی کی مرکزی مجلسِ شوریٰ کے رکن مولانا حاجی محمد عقیل عطاری مدنی نے عبادات اور نیکی کے کاموں کا حریص بننے کے حوالے سے بیان کرتے ہوئے حاضرین کو اپنی زکوٰۃ و فطرہ دعوتِ اسلامی کو دینے کی ترغیب دلائی۔

اسی طرح رکنِ شوریٰ نے اپنے بیان کے دوران وہاں موجود تمام اسلامی بھائیوں کو مدرسۃالمدینہ بالغان کو مزید بہتر و مضبوط بنانے کا ذہن دیا جس پر انہوں نے اچھی اچھی نیتیں کیں۔

اس دوران نگرانِ مجلس حاجی قاری غلام عابد عطاری اور صوبائی ذمہ دار اسلامی بھائی بھی موجود تھے۔(رپورٹ: مولانا محمد عابد عطاری مدنی معاون رکن شوری مولانا حاجی محمد عقیل عطاری مدنی، کانٹینٹ:غیاث الدین عطاری)

شعبہ امام مساجد دعوتِ اسلامی کے تحت 9 مارچ 2026ء کو مدنی مرکز فیضانِ مدینہ مظفرآباد، کشمیر میں ایک مدنی مشورے کا انعقاد ہوا جس میں مختلف مساجد کے  امام صاحبان اور ذمہ داران نے شرکت کی۔

اس مدنی مشورے میں مرکزی مجلسِ شوریٰ کے رکن مولانا حاجی محمد عقیل عطاری مدنی نے تمام ذمہ داران اور امام صاحبان کی نیکی پر حریص ہونے کے حوالے سے تربیت و رہنمائی کی اور شعبے کے متعلق انہیں مدنی پھولوں سے نوازا۔

اس موقع پر نگرانِ شعبہ مولانا محبوب عطاری مدنی، نگرانِ ڈویژن مولانا منیر عطاری مدنی، صوبائی ذمہ دار مولانا ساجد حسین عطاری مدنی، ڈویژن ذمہ دار نصر اللہ برکاتی عطاری اور ڈسٹرکٹ ذمہ دار نسیم عطاری بھی موجود تھے۔(رپورٹ: مولانا محمد عابد عطاری مدنی معاون رکن شوری مولانا حاجی محمد عقیل عطاری مدنی، کانٹینٹ:غیاث الدین عطاری)

7 مارچ 2026ء بمطابق 18 رمضانُ المبارک 1447ھ کی شب دعوتِ اسلامی کے عالمی مدنی مرکز فیضانِ مدینہ کراچی میں ہفتہ وار مدنی مذاکرے کا انعقاد کیا گیا جس میں مختلف شہروں سے آئے ہوئے معتکفین سمیت دیگر عاشقانِ رسول نے شرکت کی۔

تفصیلات کے مطابق مدنی مذاکرے کا آغاز بعد نمازِ تراویح ہوا جس میں تلاوتِ قرآنِ پاک کی گئی اور نعت شریف پڑھی گئی جبکہ وقتِ مناسب پر شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ کی آمد بھی ہوئی۔

امیرِ اہلِ سنت دامت بَرَکَاتُہمُ العالیہ نے مدنی مذاکرے میں شریک تمام لوگوں کی دینی و اخلاقی تربیت کرتے ہوئے انہیں مختلف مدنی پھولوں سے نوازا اور اُن کی جانب سے ہونے والے سوالات کے جوابات ارشاد فرمائے جن میں سے بعض درج ذیل ہیں:

سوال:ایک پوسٹ میں لکھا تھا:” ہمارے معاشرے میں صلح کی بیٹھک کا مقصد کمزور کو اپنا حق چھوڑنے پر مجبور یا راضی کرنا ہوتا ہے“، اس کے بارے میں آپ کیا فرماتے ہیں ؟

جواب:یہ صلح نہیں ہے ،یہ تو ظلم ہے ،صلح کروانے کی قرآنِ پاک میں پذیرائی ہے ،اس کو خیرکہاگیا ہے ۔صلح کروانا سُنّتِ مصطفیٰ صلَّی اللہ علیہ واٰلہٖ وسلَّم بھی ہے۔نبیِ کریم صلی اللہ علیہ والہ وسلم نے فرمایا:کیا میں تمہیں روزہ، نماز اور صدقہ سے بھی افضل عمل نہ بتاؤں؟ صحابہ ٔکرام علیہم الرضوان نے عرض کی: یا رسولَ اللہ! صَلَّی اللہ عَلَیْہِ وَاٰلِہٖ وَسَلَّمَ، ضرور بتایئے۔ ارشاد فرمایا: وہ عمل آپس میں رُوٹھنے والوں میں صلح کرادینا ہے کیونکہ رُوٹھنے والوں میں ہونے والا فساد بھلائی کو ختم کردیتا ہے۔ (سنن ابو داؤد، 4 / 365،حدیث: 4919) فرمانِ مصطفیٰ صلی اللہ علیہ والہ وسلم:سب سے افضل صدقہ رُوٹھے ہوئے لوگوں میں صلح کرادینا ہے۔(الترغیب و الترہیب، 3/321) صلح کروانے کی بہت اہمیت ہے ،صلح کروانے کےہرجملے پر ایک غلام آزادکرنے کا ثواب اورمغفرت کی خوشخبری ہے۔جوصلح کرواسکتاہو تو اُسے ضرور صلح کروانی چاہیئے ۔

سوال:صلح کروانے والا کیسا ہونا چاہیئے؟

جواب:صلح کروانے والے کو صلح کروانا آنا چاہیئے،خود ہی غصہ میں آجاتا ہو تو صلح کیسے کروائے گا؟ کسی کی رُو رَعایت نہ کرے ،کسی جانب جھکاؤ نہ ہو۔ہمیشہ حق کی حمایت کرے ۔

سوال:باون(52) کا عدد کس کی یاددلاتاہے ؟

جواب: امام عالی مقام حضرت امام حسین رضی اللہ عنہ کی یاددلاتاہے ۔بوقت ِشہادت آپ کی عمرمبارک 52سال تھی ۔

سوال: ادب کی کیااہمیت ہے؟

جواب: ادب کابول بالاہے، بے ادبی کا منہ کالاہے ۔قول ہے: وَلَا دِينَ لِمَنْ لَا أَدَبَ لَهُ یعنی جو باادب نہیں اس کا کوئی دِین نہیں۔(فتاویٰ رضویہ، 28/ 158)ہم ادب کرنے والوں (اولیائے کرام وعلمائے کرام) کے پیچھے پیچھے ہیں اوریہ نبیِ کریم صلی اللہ علیہ والہ وسلم کے پیچھے پیچھے ہیں،اسی طرح جنت میں داخل ہوں گے۔ان شآء اللہ الکریم

سوال : کون سے نبی علیہ السلام مچھلی کے پیٹ میں 40 دن رہے؟

جواب: حضرت یونس علیہ السلام ۔

سوال: اِس ہفتے کارِسالہ’’ سکون بخش آیتیں‘‘ پڑھنے یا سُننے والوں کو امیر اہل سنت دامت برکاتہم العالیہ نے کیا دُعا دی ؟

فیصل آباد، پنجاب میں 6 مارچ 2026ء کو اسپیشل پرسنز ڈیپارٹمنٹ دعوتِ اسلامی کے تحت عظیم الشان ”افطار اجتماع“ کا اہتمام کیا گیا جس میں اسپیشل پرسنز کی کثیر تعداد نے شرکت کی۔

تلاوت و نعت سے اجتماع کا آغاز کرنے کے بعد ڈویژن ذمہ دار نے اشاروں کی زبان میں اصلاحی بیان کیا اور اسپیشل پرسنز کو رمضانُ المبارک کی اہمیت کو سمجھنے اور رمضانُ المبارک کے آخری عشرے کا سنت اعتکاف کرنے کا ذہن دیا۔

4 مارچ 2026ء کو ایجوکیشن ڈیپارٹمنٹ دعوتِ اسلامی کے تحت ایم این ایس یونیورسٹی آف انجینئرنگ اینڈ ٹیکنالوجی ملتان میں رمضانُ المبارک کے حوالے سے ایک سیشن کا انعقاد کیا گیا۔

سیشن کے آغاز میں مرکزی مجلسِ شوریٰ کے رکن عبدالوہاب عطاری نے ”روزہ اور روحانیت“ کے موضوع پر بیان کیا جس میں انہوں نے حاضرین کو بتایا کہ رمضان کیسے گزاریں؟ اور رمضانُ المبارک کی فضیلت کیا ہے؟ نیز رمضان میں اپنی نیکیوں کی عادت کو پورا سال اپنانے کے حوالے سے اُن کی ذہن سازی کی۔

اس کے علاوہ رکنِ شوریٰ نے وہاں موجود تمام عاشقانِ رسول کو گناہوں سے بچتے ہوئے زندگی گزارنے اور رمضانُ المبارک کے آخری عشرے کا اعتکاف کرنے کی ترغیب دلائی۔

اس موقع پر رجسٹرار، پروفیسرز، یونیورسٹی فیکلٹی ممبران اور اسٹوڈنٹس سمیت دیگر اسٹاف موجود تھے جبکہ آخر میں رکنِ شوریٰ کی یونیورسٹی کے وائس چانسلر سے ملاقات بھی ہوئی۔(رپورٹ: مولانا حافظ حسیب الرحمٰن عطاری مدنی شعبہ تعلیم ملتان ڈویژن ، کانٹینٹ:غیاث الدین عطاری)

لوگوں کو دینِ اسلام کے شرعی مسائل سکھانے کے لئے 6 مارچ 2026ء کو  اسلام آباد، D-13 کی جامع مسجد فیضانِ قرآن میں ”غسلِ میت و کفن کورس “منعقد ہوا جس میں تاجران سمیت کثیر عاشقانِ رسول نے شرکت کی۔

معلومات کے مطابق یہ کورس صوبائی ذمہ دار مولانا محمد مزمل عطاری مدنی نے کروایا جس میں انہوں نے غسلِ میت کی چند احتیاطیں بتاتے ہوئے مختلف موضوعات پر حاضرین کی رہنمائی کی جن میں سے بعض درج ذیل ہیں:

٭غسلِ میت میں پانی کا اسراف کرنے سے بچنا٭غسلِ میت کے وقت پانی مستعمل ہونے سے بچانا٭حدیثِ مبارکہ میں غسلِ میت کی فضیلت کیا ہے؟٭غسلِ میت کا شرعی حکم کیا ہے٭سنت کے مطابق غسلِ میت دینے کے 7 مراحل٭عوام الناس میں پائی جانے والی غلطیوں کی نشاندہی۔

اورنگی ٹاؤن یوسی 4، کراچی کی جامع مسجد فیضانِ صحابہ و اہلبیت میں 1 مارچ 2026ء کو شعبہ کفن دفن دعوتِ اسلامی کے تحت ”غسلِ میت و کفن دفن کورس“ منعقد کیا گیا جس میں مؤذن صاحب اور نمازی حضرات نے شرکت کی۔

شعبے کے ڈسٹرکٹ اورنگی ذمہ دار مولانا فہیم عطاری مدنی نے شرعی اصولوں کے مطابق غسلِ میت دینے، کفن کاٹنے اور پہنانے کا طریقہ بتایا نیز اس کی فضیلت و اہمیت کے متعلق بھی آگاہی دی۔

آخر میں ڈسٹرکٹ اورنگی ذمہ دار نے وہاں موجود عاشقانِ رسول کو دعوتِ اسلامی کے 12 دینی کاموں میں حصہ لینے کی ترغیب دلائی جس پر انہوں نے اچھی اچھی نیتیں کیں۔(رپورٹ: عزیر عطاری ڈسٹرکٹ ذمہ دار ، کانٹینٹ:غیاث الدین عطاری)

عاشقانِ رسول کو ماہِ رمضان کی ساعتوں سے فیضیاب کرنے اور انہیں دینِ مسائل سے آگاہ کرنے کے لئے 28 فروری 2026ء بمطابق 10 رمضانُ المبارک کی شب عالمی مدنی مرکز فیضانِ مدینہ کراچی میں دعوتِ اسلامی کے تحت مدنی مذاکرے کا اہتمام کیا گیا جس میں معتکفین (یعنی اعتکاف کرنے والے) سمیت کثیر اسلامی بھائی شریک ہوئے۔

مدنی مذاکرے کا آغاز بعد نمازِ تراویح رات تقریباً 10:45 پر تلاوتِ قراٰن سے کیا گیا جس کے بعد نعت خواں اسلامی بھائیوں نے حضور نبیِ کریم صلَّی اللہ علیہ واٰلہٖ وسلَّم کی بارگاہ میں نعت شریف کا نذرانہ پیش کیا۔

تلاوت و نعت کے بعد شیخِ طریقت، امیرِ اَہلِ سنّت، بانیِ دعوتِ اسلامی حضرت علّامہ مولانا ابوبلال محمد الیاس عطّاؔر قادری رضوی دامت بَرَکَاتُہمُ العالیہ نے حاضرین و ناظرین کی جانب سے ہونے والے سوالات کے علم و حکمت بھرے انداز میں جوابات ارشاد فرمائے۔

مدنی مذاکرے کے چند مدنی پھول ملاحظہ کیجئے:

سوال:ایک پوسٹ میں لکھا تھا:” زیادہ جینا ہے تو کم کھائیں“، اس بارے میں آپ کیا فرماتے ہیں ؟

جواب:یہ بات طبّی طورپر دُرست ہے ،زیادہ کھانے سے جان بنتی نہیں بلکہ بگڑتی ہے ، زیادہ کھانے والے کوطرح طرح کی بیماریاں لگ جاتی ہیں ،حدیث پاک کے مطابق پیٹ کے 3 حصے کرنے چاہئیں ، ایک حصہ کھانے،ایک حصہ پانی اورایک حصہ سانس کے لیے مختص کیاجائے ۔فرمانِ مصطفےٰ (صلی اللہ علیہ والہ وسلم):آدمی اپنے پیٹ سے زیادہ بُرابرتن نہیں بھرتا،انسان کے لیے چندلقمے کافی ہیں ،جو اس کی پیٹھ کوسیدھا رکھیں ،اگرایسانہ کرسکے تو تِہائی (3/1)کھانے کے لیے ،تہائی پانی کے لیے اورایک تِہائی سانس کے لیے ہو۔(ابن ماجہ ،4/48،رقم، 3349 ) جوباوجودِخواہش اللہ پاک کی رضاکے لیے ایک نوالہ کم کردے تو اس کا ایک درجہ بلند ہوجاتاہے ۔

سوال:تکبُّراورخود پسندی میں کیا فرق ہے؟

جواب:اپنے سے دُوسرے کوگھٹیا جانناتکبرہے، خود پسندی یہ ہے کہ کسی کو کوئی نعمت حاصل ہو تو اسے اپناکمال جانے اوراس کے زوال سے توجہ ہٹ جائے ۔دونوں بڑی آفتیں ہیں ،جس کے دل میں ذرّہ برابرتکبُّرہوگا اسے جہنم میں داخل کردیا جائے گا ۔یہ بہت بڑی بلاہے ، بندہ اس سے اللہ پاک کی پناہ مانگے۔ تکبرکے بارے میں معلومات ہونا فرض علم سے ہے ،اس کے لیے مکتبۃ المدینہ کی کتاب ’’تکبُّر‘‘کا مطالعہ کریں ۔

سوال:دوسرے کے بارےمیں رائے قائم کرلینا کہ فلاں متکبِرہے،اس کے بارے آپ کیافرماتےہیں ؟

جواب: بغیر قرینے اوردلیل کےکسی کے متکبِرہونے کی رائے قائم کرلینا بدگمانی ہے، اس سے بچناضروری ہے ،تکبردل کی کیفیت ہے،یہ باطنی بیماری ہے،اسے معلوم کرنےکے لیے کوئی مشین نہیں ہے ۔اس طرح رائے قائم کرنے والا تہمت وغیبت میں مبتلا ہوجاتاہے۔گھروں میں بھی تہمتوں کا سلسلہ ہے ۔اسکی معافی تلافی مشکل کام ہے۔ پیارے آقا صلی اللہ علیہ والہ وسلم نے زبان سےلٹکے لوگ دیکھے ،بتایاگیا یہ گناہ کاالزام لگانے والوں کی سزاہے۔بظاہر نیک نظرآنے والابھی اس میں مبتلاہوجاتاہے ۔اس کی وجہ یہ ہےکہ لوگ فرض علوم سے ناواقف ہیں ۔

سوال:جھوٹ اورغیبت کی تعریف کیا ہے؟

جواب: سچ کا اُلٹ جھوٹ ہے اوربطورِبُرائی کسی کا عیب اُس کی غیر موجودگی میں بیان کرنا غیبت ہے۔

سوال : دُعاکے وقت کیسااندازہوناچاہئے؟

جواب: دُعاکے وقت رونا آئے تو سعادت کی بات ہے،ورنہ رونے کی سی صورت بنائی جائے کہ اچھوں کی نقل بھی ا چھی ہوتی ہے ،دعا کے وقت آنکھوں میں آنسوآجانااسے قبولیت کے قریب کردیتاہے ۔یہ کہاگیا ہے کہ غموں سے بھرے دل کی دعا قبول ہوتی ہے

سوال: بزرگ یعنی بڑی عمروالے دُوسروں کو نمازکی دعوت کیسے دیں ؟

جواب:بزرگ بھی لوگوں کو پہلےسلام کریں ،پھر مختصرانداز میں نمازکی دعوت دیں ، بزرگوں اورامام صاحبان کا اپنا اثرہوتاہے۔ہم سب نمازکی دعوت دینے والے بن جائیں تو مساجدآبادہوجائیں ۔مساجدکی ویرانی کی ایک وجہ نمازیوں کانمازکی دعوت نہ دینا بھی ہے۔ ہرمسلمان مبلغ ہے جس کو جتنا آتاہے ،دُوسروں کو نیکی کی دعوت دے ۔

سوال: اِس ہفتے کارِسالہ  ”رمضان الکریم منانے کے پُرکیف انداز“ پڑھنے یا سُننے والوں کو امیر اہل سنت دامت برکاتہم العالیہ نے کیا دُعا دی ؟

جواب:یااللہ پاک! جو کوئی 24 صفحات کا رسالہ”رمضان الکریم منانے کے پُرکیف انداز“ پڑھ یا سُن لے، اُسے ماہِ رمضان کی محبت سے مشرف فرماکر خوب نیکیاں کرنے کی توفیق عطا فرما اور اس کو والدین سمیت جنت الفردوس میں بے حساب داخلہ دے کر سب سے آخری نبی صلَّی اللہ علیہ واٰلہٖ وسلَّم کا پڑوس نصیب فرما ۔اٰمِیْن بِجَاہِ خاتم النَّبیّن صلَّی اللہ علیہ واٰلہٖ وسلَّم

قرآنِ مجید اللہ پاک کی وہ عظیم کتاب ہے جس کی ہر آیت انسان کے دل کو سکون اور اطمینان عطا کرتی ہے۔ جب انسان پریشانیوں، دکھوں اور مشکلات میں گھِر جاتا ہے تو قرآنِ پاک کی آیات اس کے دل کو قرار اور امید فراہم کرتی ہیں۔ اللہ تعالیٰ نے اپنی کتاب میں ایسی بے شمار آیات نازل فرمائی ہیں جو بندے کو یہ احساس دلاتی ہیں کہ اللہ اس کے ساتھ ہے اور وہی ہر مشکل کو آسان کرنے والا ہے۔

قرآنِ کریم کی تلاوت نہ صرف روح کو تازگی دیتی ہے بلکہ دل کی بے چینی کو بھی ختم کرتی ہے۔ جب انسان اخلاص کے ساتھ اللہ کی آیات پڑھتا یا سنتا ہے تو اس کے دل پر ایک عجیب سا سکون طاری ہو جاتا ہے۔ اسی لئے قرآنِ مجید کو ہدایت، رحمت اور دلوں کے لیے شفا قرار دیا گیا ہے۔

شیخ طریقت امیر اہلسنت حضرت علامہ مولانا محمد الیاس عطار قادری دامت بَرَکَاتُہمُ العالیہ نے عاشقانِ رسول کو اس ہفتے 20 صفحات کا رسالہ ”سکون بخش آیتیں“ پڑھنے / سننے کی ترغیب دلائی ہے اور پڑھنے / سننے والوں کو اپنی دعاؤں سے بھی نوازا ہے۔

دعائے عطار

یاربّ کریم! جو کوئی 20 صفحات کا رسالہ ”سکون بخش آیتیں“ پڑھ یا سن لے اُس کی زندگی سکون اور خوشیوں سے بھر دے اور اس کو ماں باپ اور خاندان سمیت جنت الفردوس میں بے حساب داخلہ نصیب فرما۔ اٰمین

یہ رسالہ آڈیو میں سننے اور اردو سمیت کئی زبانوں میں ڈاؤن لوڈ کرنے کے لئے نیچے دیئے گئے لنک پر کلک کیجئے:

Download