4جون 2020ء برو زجمعرات 9:30 بجے مدنی چینل پر  ہفتہ وارسنتوں بھرے اجتماع کا انعقاد کیا جائیگا جس میں خصوصی بیان مرکزی مجلس شوریٰ کے رکن حاجی محمد اظہر عطاری” محبت رسول کے تقاضے “ کے موضوع پر سنتوں بھرا بیان فرمائیں گے۔

واضح رہے! پاکستان سمیت دنیا بھر میں ہر جمعرات کو دعوت اسلامی کے زیر اہتمام ہفتہ وار اجتماعات کا سلسلہ ہوتاہے جن میں شرکت کرنے والے عاشقان رسول تلاوت، نعت، بیانات اور رقت انگیز دعاؤں سے فیض یاب ہوتے ہیں لیکن موجودہ ملکی صورت حال کے باعث یہ اجتماعات گیدرنگ کی صورت میں منعقد نہیں ہورہے، فقط مدنی چینل پر سنتوں بھرا بیان نشر کیا جاتا ہے جسے عاشقانِ رسول گھر بیٹھے ملاحظہ کرتے ہیں۔

دعوتِ اسلامی کے زیر اہتمام لانڈھی کابینہ کورنگی نمبر 4 میں میں تھیلیسیمیا اور دیگرخون کی بیماریوں میں مبتلا مریضوں کیلئےخون کے عطیات جمع کرنے کے لئے بلڈکیمپ کا انعقاد کیا گیا جس میں عاشقان رسول نے آکر اپنے خون کے عطیات جمع کرائے۔

گردے ہمارے جسم کے فاضل مواد کوصاف کرنے کا کام کرتے ہیں اگر آپ کو بلند فشار خون، ذیابیطس، یا شریانوں میں کھنچاؤ کا مرض ہے توممکنہ طور پر آپ کو گردے کی بیماریاں ہونے کا خطرہ بھی لاحق ہو سکتاہے اسی لئے گردوں کی صحت کا خیال رکھنا ضروری ہے۔ گردے ہمارے جسم میں خون کو صاف کرنے ،زہریلے مادوں کے اخراج ،ضرورت سے زائد پانی سے چھٹکارے، بلڈ پریشر کو کنٹرول کرنے ،خون کے سرخ ذرات کی پیدا وار اور ہڈیوں کی مضبوطی میں اہم کردار ادا کرتے ہیں۔

ماہرین کا کہنا ہے کہ حالیہ تحقیق کے مطابق دنیا میں ہر دس میں سے ایک فرد کسی حد تک گردے کے امراض میں مبتلا ہے اور اگر اس خرابی کا بروقت تدارک نہ کیا جائے تو گردوں کے فیل ہونے کا امکان ہوتاہے ، گردے کے امراض میں اضافہ ہونے کے اسباب میں گردے کی پتھری ،پانی کا کم استعمال ،آلود ہ پانی کا استعمال ،ورزش کا فقدان،خون میں کیلشیم کی کمی ،کیمیائی ادویہ کا بلاوجہ استعمال اور خون میں یورک ایسڈ کی زیادتی شامل ہیں۔گردوں کے امراض سے بچنے کے لیے صاف پانی کا زیادہ استعمال اور غذا ئی احتیاط ضروری ہے ۔

ماہرین کا مزید کہنا ہے گردوں کی حفاظت کے لئے سبزیوں کا استعمال زیادہ کرناچاہیئے ، ماہرین کے مطابق ہرے پتوں والی سبزیاں وٹامِن سی سے بھرپور ہوتی ہیں ،یہ وٹامن ہمارے بَلڈ شوگر کو کنٹرول کرتے ہیں، جس سے گردوں پر دباؤکم ہو جاتاہے۔ ماہرین کا کہنا ہے کہ ہَرے پتوں والی سبزیاں کثرت سے استعمال کرنی چاہئے روزانہ پتوں والی سبزیاں پکا کر یا سلاد کے طور پر کھائیں جائیں تو گردوں کو بیماریوں سے محفوظ رکھا جا سکتا ہے۔

اللہ عَزَّوَجَلَّ نے 7 ہزار سے زائد ٹڈیوں کی اقسام دنیا میں پیدا کی ہیں جس میں سے تقریباً 20 اقسام سبزی خوروں کی بھی ہیں۔ ان20 سبزی خوروں میں سے انتہائی خطرناک ٹڈی دَل ہے جو ایک اندازے کے مطابق ایک مربع کلومیٹر میں پھیلا ٹڈی دَل کا لشکر تقریباً 35 ہزار انسانوں کی خوراک ایک دن میں چَٹ کر جاتا ہے، ٹڈی دَل ایک ماہ ایک دن میں تقریباً ایک ہزار انڈے دیتا ہے اور اگر ان کو نمی میسر آجائے تو ان میں سے سیکڑوں بچے نکل آتے ہیں۔ یہ ٹڈی دل اپنی ساخت، شکل اور رنگ تبدیل کرتے رہتے ہیں اور جیسے جیسے ان کو خوراک ملتی جاتی ہے، یہ مزید طاقتور، خطرناک اور بھیانک ہوتے جاتے ہیں اور جہاں جہاں سے گزرتے ہیں فصلوں اور سبز درختوں کا صفایا کرکے تباہ و برباد کرتے جاتے ہیں۔ یہ ٹڈی دَل دانے دار فصلوں گندم، مکئی، باجرہ، چاول، چنا، دالوں، پھل دار درختوں کی سخت ترین دشمن ہے جو کہ انسانی خوراک کیلئے انتہائی اہم ہیں۔

امیر اہل سنت دَامَتْ بَرَکَاتُہُمُ الْعَالِیَہ نے ٹڈی دَل کے نقصان سے بچنے کیلئے روحانی علاج بتاتے ہوئے کہا کہ ” یَا عَلِیْمُ“ کسی کاغَذ پر لکھ کر صاف پانی کے پتیلے میں ڈال دیں اور اس کی سیاہی جب پانی میں گھل جائے تو اسپرے بوتل میں پانی کو ملا کر فصلوں پر چھڑکا جائے اِنْ شَآءَ اللہ عَزَّ وَجَلَّ اس سے فائدہ ہوگا۔

لاہور کے علاقے گرین ٹاؤن فیز میں دعوت اسلامی کے ایک پرانے اسلامی بھائی   محمد انور عطاری فجر کی نماز کی ادائیگی کے دوران انتقال کرگئے جنہیں مقامی قبرستان میں سپرد خاک کردیاگیا۔ دعوت اسلامی کی مرکزی مجلس شوریٰ کے رکن و مجلس کفن دفن کے نگران حاجی منصور عطاری نے مرحوم کے گھرجاکر ان کے بیٹے نگران کابینہ محمد زبیر عطاری سے ملاقات کی اورمرحوم کے ایصال ثواب کیلئے دعا بھی کی۔ اس موقع پر زبیر عطاری کا کہنا تھا کہ مرحوم امیر اہل سنت دَامَتْ بَرَکَاتُہُمُ الْعَالِیَہ سے عقیدت رکھتے تھے اور ان کے مرید بھی تھے جبکہ باقاعدگی سے صدائے مدینہ بھی لگاتے تھے۔ان کا مزید کہنا تھا کہ دعوت اسلامی کے مدنی ماحول سے وابستہ رہنے کی برکت سے ان کے والد کو قابل رشک موت آئی۔

دنیا بھر میں قراٰن وسنت کی تعلیمات کو عام کرنے والی عاشقان رسول کی مدنی تحریک دعوت اسلامی کے زیر ِ اہتمام پنجاب کے شہر خان پور غزالی ٹاؤن میں مسجد فیضان جمال مصطفی کا سنگ بنیاد رکھنے کا سلسلہ ہوا جس میں نگران ریجن و رکن شوریٰ حاجی محمد اسلم عطاری، نگران زون،دیگر ذمہ داران اور شخصیات سمیت اہل علاقہ نے بھی شرکت کی۔

رکن شوریٰ حاجی محمد اسلم عطاری نے اینٹیں لگاکر مسجد کا سنگ بنیاد رکھا اور مسجد کی جلد تعمیر کیلئے دعا بھی کروائی۔ اس موقع پر رکن شوریٰ نے مخیر حضرات سے بھی مسجد کی تعمیرات میں بھرپور حصہ لینے کی ترغیب دلاتے ہوئے فرمایا کہ اِنْ شَآءَ اللہ عَزَّ وَجَلَّ مسجد کی تعمیرات کے بعد عاشقان رسول یہاں نماز پڑھیں گےاور بچے قراٰن پاک کی تعلیمات حاصل کریں گے۔

عید کے اس پُر مسرت موقع پر دعوت اسلامی کی  مجلس دعوت اسلامی ویلفیئر کے نگران شفاعت علی عطاری نے ذمہ داران کے ہمراہ امت مسلمہ کی ہمدردی اور غمگساری کے جذبے تحت کراچی میں واقع نیشنل انسٹیٹیوٹ چائلڈ ہیلتھ میں مریض بچوں سے عیادت کی اور ان کی دلجوئی کے لئے گفتگو کی اور دعائیں کرتے ہوئے گفٹ بھی تقسیم کئے۔بعد ازاں ویلفیئر ٹرسٹ کے ذمہ داران سول اسپتال پہنچے جہاں انہوں نے مختلف امراض میں مبتلا مریضوں کی عیادت کی اور ان میں بھی گفٹ تقسیم کئے۔

دعوت اسلامی کے تحت تھیلیسیمیا اور دیگر مریضوں کے لئے پاکستان کے مختلف شہروں میں وقتاً فوقتاً بلڈ کیمپ کا انعقاد کیا جارہا ہےجس میں عاشقانِ رسول اپنے خون کے عطیات جمع کراتے ہیں۔ اسی سلسلے میں گزشتہ روز 28 مئی بروز جمعرات صبح 9:30 بجے سےشام 5:00 بجے تک نارتھ کراچی 11,C میں بلڈ کیمپ کا انعقاد کیا گیا جس میں نیو کراچی، نارتھ کراچی، سرجانی اور اطراف کے عاشقان رسول نے خون کے عطیات دیئے۔

معروف عالم دین ،چیئر مین پنجاب قراٰن بورڈ، چیئر مین شعبہ امتحانات تنظیم المدارس اہلسنت پاکستان ،رکن اسلامی نظریاتی کونسل اور مہتمم شمس العلوم جامعہ رضویہ کر اچی مولانا ابو الظفر غلام محمد سیالوی صاحب کورونا وبا کے سبب29 مئی2020 ء کو 72 سال کی عمر میں کراچی میں انتقال کرگئے۔ مرحوم کی نماز جنازہ میں ان کے اہل خانہ اور عزیز و اقارب سمیت مختلف شعبہ ہائے زندگی سے وابستہ شخصیات نے شرکت کی ۔ نماز جنازہ مرکزی رؤیت ہلال کمیٹی پاکستان کے چیئر مین مفتی منیب الرحمن صاحب کی امامت میں کراچی میں ادا کی گئی۔

مرحوم 43 سال سے شمس العلوم جامعہ رضویہ نارتھ ناظم آباد سے وابستہ تھے۔ غلام محمد سیالوی صاحب کو شمس العلوم جامعہ رضویہ میں ہی سپرد خاک کر دیا گیا جہاں محکمہ صحت کراچی کے علاوہ مقامی انتظامیہ کے ذمہ داران بھی موجود تھے۔

مولانا ابو المظفرغلام محمد سیالوی عیدالفطر سے چند روز قبل کراچی روانہ ہوئے ۔طبیعت خراب ہونے پر ٹیسٹ کرائے گئے تو کورونا مثبت نکل آیا۔ ابتدائی طور پر ان کے ادارہ میں ہی رکھتے ہوئے علاج معالجہ کی کوشش کی گئی۔ طبعیت زیادہ خراب ہونے پر انہیں ہسپتال شفٹ کر دیا گیا۔جہاں جمعۃ المبارک کی صبح خالق حقیقی سے جا ملے۔

مولانا غلام محمد سیالوی صاحب کو پہلی بار21نومبر2011 کو ایک سال کیلئے چیئر مین تعینات کیا گیا ، 2011سے تاحال بطور چیئر مین پنجاب قرٰن بورڈ انہیں ہر سال عہدے پر توسیع دی جاتی رہی ۔ رکنِ شوریٰ حاجی ابوماجد محمد شاہد عطاری مدنی اور مجلس دعوتِ اسلامی کے شب وروز کے اراکین مولانا غلام محمد سیالوی صاحب کے انتقال پر گہرے دکھ اور افسوس کا اظہار کرتے ہیں اور دعاگو ہیں کہ اللہ پاک آپ کے درجات کو بلندیاں عطا فرمائے اور آپ کی دینی خدمات کو آپ کی نجات کا ذریعہ بنائے۔ آمین 

کراچی ریجن میں مجلس کفن دفن کے تحت یکم مئی سے شروع  ہونے والا سات دن کا آن لائن کفن دفن کورس اپنے اختتام کو پہنچا۔ کورس میں ہند،پنجاب اور کراچی ریجن کے کثیر تعداد میں اسلامی بھائیوں نے شرکت کی۔ کورس کے اختتام پر ٹیسٹ کا سلسلہ جاری ہوا جس میں کامیاب ہونیوالے اسلامی بھائیوں کو اِنْ شَآءَ اللہ عَزَّ وَجَلَّ سند بھی دی جائیں گی۔

کورس کروانے والے معلمین ریجن ذمہ دار عبدالروف عطاری اور زون ذمہ دار یاسر عطاری نے شرکائے کورس کو عیادت تعزیت جنازے کو غسل دینے اور کفن کاٹنے اور پہنانے کے حوالے سے مدنی پھول دیئے۔

کراچی ریجن میں مجلس کفن دفن کے تحت سات دن کا کفن دفن کا آن لائن کورس جاری ہے جس میں کثیر تعداد میں اسلامی بھائی شرکت کررہے ہیں جس میں اب تک غسل دینے، کفن کاٹنے، پہنانے، عیادت اور تعزیت کے بارے میں مدنی پھول دیئے جاچکے ہیں۔

4 مئی کو ریجن ذمہ دار عبدالروف عطاری اور زون ذمہ دار یاسر عطاری نے شرکائے کورس کو عیادت تعزیت جنازے کو غسل دینے اور کفن کاٹنے اور پہنانے کے حوالے سے مدنی پھول دیئے۔

کورس میں نگران کابینہ، کابینہ ذمہ داران، ڈویژن نگران، ڈویژن مشاورت، علاقہ مشاورت، حلقہ مشاورت اور ذیلی مشاورت ذمہ داران نے شرکت کی۔

دعوت اسلامی کے تحت ملک و بیرون ملک لوگوں کی امداد کا سلسلہ جاری ہے۔ عالمی مدنی مرکزفیضان مدینہ کراچی میں بھی اسلامی بھائی دن رات راشن کی پیکنگ اور پھر مختلف علاقوں میں گھر گھر پہنچانے میں مصروف ہیں۔ اسی سلسلے میں بروز جمعرات 6 رمضان المبارک کو ذمہ دار اسلامی بھائی عالمی مدنی مرکزفیضان مدینہ کراچی سےامدادی سامان لے کرمہران ٹاؤن کورنگی کے اطراف پہنچے اور  لوگوں میں راشن کے تھیلے، رقم کا لفافہ، پکا ہواکھانا اور سوٹ بھی تقسیم کئے ۔ اس موقع پر رکن سندھ اسمبلی غلام جیلانی بھی ذمہ داران کے ہمراہ تھے۔ غلام جیلانی نے دعوت اسلامی کی ان فلاحی کاوشوں کو سراہا اور مدنی چینل پر اپنے خیالات کااظہار کرتے ہوئے نیک خواہشات کا اظہار کیا۔

دوسری جانب کورنگی میں ہی ایک اور مقام ضیاء کالونی میں اسپیشل افراد یعنی گونگے، بہرے اور نابینا اسلامی بھائیوں میں بھی راشن، رقم، کھانا اور سوٹ بھی تقسیم کئے گئے جسے ان اسلامی بھائیوں نے خوب سراہا اور دعوت اسلامی کیلئے نیک خواہشات کااظہار کیا۔